📅 2021-yil 24-dekabr · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2021 йил 24 декабрь · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 24 декабря 2021 г. · Постановления Кабинета Министров
Официальный текст. Официальный документ. Редакционные примечания не включены.
📅 24 December 2021 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
Трансчегаравий пул ўтказмаларини таъминлаш бўйича тўлов тизимини ташкил этиш чора-тадбирлари тўғрисида
Пул ўтказмалари тизимининг самарадорлиги ва амалиётларнинг шаффофлиги даражасини ошириш, транзакцион (операцион) хатарларни минималлаштириш ва барқарорлигини таъминлаш, республикада хавфсиз пул ўтказмалари учун молия-банк тизимида зарур шарт-шароитлар яратиш ҳамда хориждаги Ўзбекистон Республикаси фуқароларини мунтазам ижтимоий қўллаб-қувватлашнинг самарали механизмини яратиш мақсадида Вазирлар Маҳкамаси қарор қилади:
1. Ўзбекистон Республикаси Бандлик ва меҳнат муносабатлари вазирлиги ҳамда «Ўзбекистон Республикаси Ташқи иқтисодий фаолият миллий банки» АЖнинг (кейинги ўринларда — Ўзмиллийбанк) хорижий давлатлар ҳудудидан Ўзбекистон Республикасига трансчегаравий пул ўтказмаларини амалга ошириш мақсадида «Ягона трансчегаравий пул ўтказмалари» тўлов тизимини ташкил этиш тўғрисидаги таклифларига розилик берилсин.
2. Белгилансинки:
«Ягона трансчегаравий пул ўтказмалари» тўлов тизими унинг оператори сифатида иштирок этувчи Ўзмиллийбанк процессинг маркази негизида ташкил этилади;
жисмоний шахслар ўртасидаги трансчегаравий ўтказмалар хорижий давлатлар ҳудудидан Ўзбекистон Республикасига ўзаро манфаатли тарифлар бўйича Ўзбекистон Республикаси тижорат банклари томонидан жисмоний шахсларнинг хоҳишига кўра ихтиёрий танлаш асосида бошқа тўлов тизимлари билан бир қаторда «Ягона трансчегаравий пул ўтказмалари» тўлов тизими орқали амалга оширилади;
«Ягона трансчегаравий пул ўтказмалари» тўлов тизими бир қатор аппарат ва дастурий-техник воситаларни ўзида мужассам қилган тизимли платформа бўлиб, тўлов тизими иштирокчилари (кредит ташкилотлари) учун вакиллик ҳисобварақлари орқали трансчегаравий ўтказмалар бўйича ҳисоб-китобларни амалга оширади;
«Ягона трансчегаравий пул ўтказмалари» тўлов тизими орқали амалга оширилган трансчегаравий ўтказмалар бўйича Ўзмиллийбанк ҳисоб-китоб банки функциясини бажаради;
«Азия — Инвест Банк» АЖ (Москва шаҳри) «Ягона трансчегаравий пул ўтказмалари» тўлов тизими орқали амалга оширилган трансчегаравий ўтказмалар бўйича Россия Федерацияси ҳудудидаги ҳисоб-китоб банкларидан бири ҳисобланади.
3. Ўзмиллийбанк уч ой муддатда «Ягона трансчегаравий пул ўтказмалари» тўлов тизими барча иштирокчилари учун трансчегаравий пул ўтказмалари ягона тариф сиёсати ва ўзаро ҳамкорлик қоидаларини ишлаб чиқсин ва тасдиқласин.
4. Ўзмиллийбанк «Ягона трансчегаравий пул ўтказмалари» тўлов тизими фаолиятини ташкил этиш доирасида:
«Азия — Инвест Банк» АЖ (Москва шаҳри) билан биргаликда олти ой муддатда «Ягона трансчегаравий пул ўтказмалари» тўлов тизимини яратиш бўйича барча зарур техник ва ташкилий ишларни ҳамда барча иштирокчиларга, шу жумладан, хорижий тўлов тизимларига технологик интеграция қилиш учун Ўзбекистон Республикаси ва Россия Федерацияси қонунчилик талабларига мувофиқ очиқ кириш имкониятини таъминлаш ишларини якунласин;
Ўзбекистон Республикаси тижорат банклари билан олти ой муддатда «Ягона трансчегаравий пул ўтказмалари» тўлов тизими билан технологик интеграция ишларини якунласин;
«Азия — Инвест Банк» АЖ (Москва шаҳри) билан биргаликда уч ой муддатда манфаатдор чет эл банклари ва хорижий тўлов тизимлари билан «Ягона трансчегаравий пул ўтказмалари» тўлов тизими хизматидан фойдаланиш бўйича фаолиятни ташкил этиш масаласи юзасидан, шунингдек ўтказмалар учун тарификация ва воситачилик ҳақини камайтириш юзасидан музокаралар олиб борсин ва меморандумларни имзоласин;
«Азия — Инвест Банк» АЖ (Москва шаҳри) билан биргаликда олти ой муддатда «Ягона трансчегаравий пул ўтказмалари» тўлов тизими томонидан шакллантирилган маълумотлар асосида скоринг таҳлилини амалга оширган ҳолда Россия Федерациясида меҳнат фаолиятини амалга ошираётган Ўзбекистон Республикаси фуқароларининг ишга жойлашиш бўйича харажатларини қоплаш мақсадида кредитлар ажратиш лойиҳасини ишлаб чиқсин ва амалиётга татбиқ этсин.
5. Ўзбекистон Республикаси тижорат банкларига трансчегаравий пул ўтказмалари бўйича банк хизматларини кўрсатишда бошқа тўлов тизимлари билан бир қаторда «Ягона трансчегаравий пул ўтказмалари» тўлов тизимидан фойдаланиш тавсия этилсин.
6. Мазкур қарорнинг ижросини назорат қилиш Ўзбекистон Республикаси Бош вазирининг молия-иқтисодиёт ва камбағалликни қисқартириш масалалари бўйича ўринбосари — иқтисодий тараққиёт ва камбағалликни қисқартириш вазири Ж.А. Қўчқоров ҳамда «Ўзбекистон Республикаси Ташқи иқтисодий фаолият миллий банки» акциядорлик жамияти бошқаруви раиси А.К. Мирсоатов зиммасига юклансин.
Ўзбекистон Республикасининг Бош вазири А. АРИПОВ
Тошкент ш.,
2021 йил 24 декабрь,
771-сон
Oʻzbekiston Respublikasi Vazirlar Mahkamasining
qarori
Transchegaraviy pul oʻtkazmalarini taʼminlash boʻyicha toʻlov tizimini tashkil etish chora-tadbirlari toʻgʻrisida
Pul oʻtkazmalari tizimining samaradorligi va amaliyotlarning shaffofligi darajasini oshirish, tranzaksion (operatsion) xatarlarni minimallashtirish va barqarorligini taʼminlash, respublikada xavfsiz pul oʻtkazmalari uchun moliya-bank tizimida zarur shart-sharoitlar yaratish hamda xorijdagi Oʻzbekiston Respublikasi fuqarolarini muntazam ijtimoiy qoʻllab-quvvatlashning samarali mexanizmini yaratish maqsadida Vazirlar Mahkamasi qaror qiladi:
1. Oʻzbekiston Respublikasi Bandlik va mehnat munosabatlari vazirligi hamda “Oʻzbekiston Respublikasi Tashqi iqtisodiy faoliyat milliy banki” AJning (keyingi oʻrinlarda — Oʻzmilliybank) xorijiy davlatlar hududidan Oʻzbekiston Respublikasiga transchegaraviy pul oʻtkazmalarini amalga oshirish maqsadida “Yagona transchegaraviy pul oʻtkazmalari” toʻlov tizimini tashkil etish toʻgʻrisidagi takliflariga rozilik berilsin.
2. Belgilansinki:
“Yagona transchegaraviy pul oʻtkazmalari” toʻlov tizimi uning operatori sifatida ishtirok etuvchi Oʻzmilliybank protsessing markazi negizida tashkil etiladi;
jismoniy shaxslar oʻrtasidagi transchegaraviy oʻtkazmalar xorijiy davlatlar hududidan Oʻzbekiston Respublikasiga oʻzaro manfaatli tariflar boʻyicha Oʻzbekiston Respublikasi tijorat banklari tomonidan jismoniy shaxslarning xohishiga koʻra ixtiyoriy tanlash asosida boshqa toʻlov tizimlari bilan bir qatorda “Yagona transchegaraviy pul oʻtkazmalari” toʻlov tizimi orqali amalga oshiriladi;
“Yagona transchegaraviy pul oʻtkazmalari” toʻlov tizimi bir qator apparat va dasturiy-texnik vositalarni oʻzida mujassam qilgan tizimli platforma boʻlib, toʻlov tizimi ishtirokchilari (kredit tashkilotlari) uchun vakillik hisobvaraqlari orqali transchegaraviy oʻtkazmalar boʻyicha hisob-kitoblarni amalga oshiradi;
“Yagona transchegaraviy pul oʻtkazmalari” toʻlov tizimi orqali amalga oshirilgan transchegaraviy oʻtkazmalar boʻyicha Oʻzmilliybank hisob-kitob banki funksiyasini bajaradi;
“Aziya — Invest Bank” AJ (Moskva shahri) “Yagona transchegaraviy pul oʻtkazmalari” toʻlov tizimi orqali amalga oshirilgan transchegaraviy oʻtkazmalar boʻyicha Rossiya Federatsiyasi hududidagi hisob-kitob banklaridan biri hisoblanadi.
3. Oʻzmilliybank uch oy muddatda “Yagona transchegaraviy pul oʻtkazmalari” toʻlov tizimi barcha ishtirokchilari uchun transchegaraviy pul oʻtkazmalari yagona tarif siyosati va oʻzaro hamkorlik qoidalarini ishlab chiqsin va tasdiqlasin.
4. Oʻzmilliybank “Yagona transchegaraviy pul oʻtkazmalari” toʻlov tizimi faoliyatini tashkil etish doirasida:
“Aziya — Invest Bank” AJ (Moskva shahri) bilan birgalikda olti oy muddatda “Yagona transchegaraviy pul oʻtkazmalari” toʻlov tizimini yaratish boʻyicha barcha zarur texnik va tashkiliy ishlarni hamda barcha ishtirokchilarga, shu jumladan, xorijiy toʻlov tizimlariga texnologik integratsiya qilish uchun Oʻzbekiston Respublikasi va Rossiya Federatsiyasi qonunchilik talablariga muvofiq ochiq kirish imkoniyatini taʼminlash ishlarini yakunlasin;
Oʻzbekiston Respublikasi tijorat banklari bilan olti oy muddatda “Yagona transchegaraviy pul oʻtkazmalari” toʻlov tizimi bilan texnologik integratsiya ishlarini yakunlasin;
“Aziya — Invest Bank” AJ (Moskva shahri) bilan birgalikda uch oy muddatda manfaatdor chet el banklari va xorijiy toʻlov tizimlari bilan “Yagona transchegaraviy pul oʻtkazmalari” toʻlov tizimi xizmatidan foydalanish boʻyicha faoliyatni tashkil etish masalasi yuzasidan, shuningdek oʻtkazmalar uchun tarifikatsiya va vositachilik haqini kamaytirish yuzasidan muzokaralar olib borsin va memorandumlarni imzolasin;
“Aziya — Invest Bank” AJ (Moskva shahri) bilan birgalikda olti oy muddatda “Yagona transchegaraviy pul oʻtkazmalari” toʻlov tizimi tomonidan shakllantirilgan maʼlumotlar asosida skoring tahlilini amalga oshirgan holda Rossiya Federatsiyasida mehnat faoliyatini amalga oshirayotgan Oʻzbekiston Respublikasi fuqarolarining ishga joylashish boʻyicha xarajatlarini qoplash maqsadida kreditlar ajratish loyihasini ishlab chiqsin va amaliyotga tatbiq etsin.
5. Oʻzbekiston Respublikasi tijorat banklariga transchegaraviy pul oʻtkazmalari boʻyicha bank xizmatlarini koʻrsatishda boshqa toʻlov tizimlari bilan bir qatorda “Yagona transchegaraviy pul oʻtkazmalari” toʻlov tizimidan foydalanish tavsiya etilsin.
6. Mazkur qarorning ijrosini nazorat qilish Oʻzbekiston Respublikasi Bosh vazirining moliya-iqtisodiyot va kambagʻallikni qisqartirish masalalari boʻyicha oʻrinbosari — iqtisodiy taraqqiyot va kambagʻallikni qisqartirish vaziri J.A. Qoʻchqorov hamda “Oʻzbekiston Respublikasi Tashqi iqtisodiy faoliyat milliy banki” aksiyadorlik jamiyati boshqaruvi raisi A.K. Mirsoatov zimmasiga yuklansin.
Oʻzbekiston Respublikasining Bosh vaziri A. ARIPOV
Toshkent sh.,
2021-yil 24-dekabr,
771-son