📅 2021-yil 10-noyabr · Vazirlik va idoralar hujjatlari · Davlat bojxona qoʻmitasi
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2021 йил 10 ноябрь · Вазирлик ва идоралар ҳужжатлари · Давлат божхона қўмитаси
Расмий матн. Расмий ҳужжат. Таҳририй изоҳлар киритилмаган.
📅 10 ноября 2021 г. · Документы министерств и ведомств · Государственного таможенного комитета
Официальный текст. Официальный документ. Редакционные примечания не включены.
📅 10 November 2021 · Ministry and agency documents · Davlat bojxona qoʻmitasi
Official text. Official document. Editorial notes are not included.
Ўзбекистон Республикаси Давлат божхона қўмитасининг
Қарори
НИЗОМ
Ўзбекистон Республикасига олиб кириладиган товарларга тўланиши лозим бўлган божхона тўловлари миқдорини аниқлаш бўйича дастлабки қарорни қабул қилиш тартиби тўғрисидаги низомни тасдиқлаш ҳақида
Ўзбекистон Республикаси Президентининг 2021 йил 10 сентябрдаги ПФ-6310-сон «Божхона тартиб-таомилларини соддалаштириш ва давлат божхона хизмати органлари ташкилий тузилмасини янада такомиллаштириш тўғрисида»ги Фармонига мувофиқ Ўзбекистон Республикаси Давлат божхона қўмитаси қарор қилади:
1. Ўзбекистон Республикасига олиб кириладиган товарларга тўланиши лозим бўлган божхона тўловлари миқдорини аниқлаш бўйича дастлабки қарорни қабул қилиш тартиби тўғрисидаги низом иловага мувофиқ тасдиқлансин.
2. Мазкур қарор 2022 йил 1 январдан кучга киради.
Келишилди:
Ўзбекистон Республикаси Давлат божхона қўмитасининг 2021 йил 10 ноябрдаги 01-02/8-51-сон қарорига ИЛОВА
Ўзбекистон Республикасига олиб кириладиган товарларга тўланиши лозим бўлган божхона тўловлари миқдорини аниқлаш бўйича дастлабки қарорни қабул қилиш тартиби тўғрисидаги
Ушбу Низом ташқи иқтисодий фаолият қатнашчилари томонидан Ўзбекистон Республикасига олиб кириладиган товарларнинг божхона расмийлаштирувидан олдин ушбу товарлар бўйича тўланиши лозим бўлган божхона тўловлари миқдорини аниқлашда божхона органлари томонидан дастлабки қарорни қабул қилиш тартибини белгилайди.
1-боб. Умумий қоидалар
1. Ушбу Низомда қуйидаги асосий тушунчалардан фойдаланилади:
дастлабки қарор — Ўзбекистон Республикасига ташқи иқтисодий фаолият қатнашчилари томонидан олиб кириладиган товарларни эркин муомалага чиқариш (импорт) божхона режимига расмийлаштиришда тўланиши лозим бўлган божхона тўловлари миқдорини олдиндан аниқлаш бўйича божхона органи томонидан қабул қилинадиган ҳужжат;
манфаатдор шахс — Ўзбекистон Республикасига олиб кириладиган товарнинг эгаси бўлган ташқи иқтисодий фаолият қатнашчиси ёки товарга нисбатан божхона тўғрисидаги қонунчиликка мувофиқ ваколатларга эга бўлган ёхуд товарнинг эгаси номидан тегишли шартнома ёки ишончнома асосида иш кўрувчи шахс;
божхона органи — Ўзбекистон Республикаси Иқтисодиёт ва молия вазирлиги ҳузуридаги Божхона қўмитасининг (бундан буён матнда Божхона қўмитаси деб юритилади) Қорақалпоғистон Республикаси, вилоятлар, Тошкент шаҳри бўйича бошқармалари ва «Тошкент-АЭРО» ихтисослаштирилган божхона комплекси;
Ўзбекистон Республикасига олиб кириладиган товарлар (бундан буён матнда товар деб юритилади) — Ўзбекистон Республикасининг божхона ҳудудида эркин муомалага чиқариш (импорт) божхона режимига нисбатан божхона расмийлаштируви учун мўлжалланган чет эл товарлари ва (ёки) транспорт воситалари;
божхона йиғими — Ўзбекистон Республикаси Вазирлар Маҳкамаси томонидан белгиланган ставкаларда дастлабки қарорни қабул қилганлик учун ундириладиган йиғим.
2. Дастлабки қарорни олиш манфаатдор шахс учун ихтиёрий ҳисобланади.
Бунда, божхона органи томонидан божхона расмийлаштирувини амалга оширишда манфаатдор шахсдан дастлабки қарорни тақдим этишни талаб қилишга, шунингдек дастлабки қарорнинг мавжуд эмаслигини асос қилиб, божхона расмийлаштирувини амалга оширишни рад этишга йўл қўйилмайди.
3. Манфаатдор шахс томонидан дастлабки қарорни олиш юзасидан божхона органларига эркин муомалага чиқариш (импорт) божхона режимига жойлаштирилмаган товарлар юзасидан мурожаат қилинади.
4. Дастлабки қарор товарларнинг божхона расмийлаштирувини амалга оширадиган тегишли божхона органи томонидан ушбу Низомнинг 1-иловасига мувофиқ шаклда қабул қилинади ва манфаатдор шахсга тақдим этилади.
Агар товарларни бир нечта божхона органлари орқали олиб ўтиш режалаштирилган бўлса, манфаатдор шахс ўз хоҳишига кўра ушбу божхона органларидан исталган биттасига мурожаат қилишга ҳақли.
5. Дастлабки қарор божхона органлари учун мажбурий ҳисобланади.
2-боб. Дастлабки қарорни олиш учун мурожаат қилиш
6. Манфаатдор шахс дастлабки қарорни олиш учун ушбу Низомнинг 2-иловасига мувофиқ шаклдаги ариза билан божхона органига ёзма ёки Ягона интерактив давлат хизматлари портали (бундан буён матнда ЯИДХП деб юритилади) ёхуд Божхона қўмитасининг расмий веб-сайти (бундан буён матнда веб-сайт деб юритилади) орқали электрон тарзда мурожаат қилади.
Манфаатдор шахс аризани товарнинг божхона қийматини кўрсатмаган, шунингдек ушбу Низомнинг 8-бандида назарда тутилган ҳужжатлар ва маълумотларни илова қилмаган ҳолда тақдим этиши мумкин. Бунда, манфаатдор шахс ариза шаклининг 3.12-позициясига тегишли белги қўяди.
7. Товарлар асосий техник-тижорат тавсифлари (маркалари, моделлари, артикуллари, модификациялари), ишлаб чиқарувчиси, ишлаб чиқарилган йили ва бошқа хусусиятларига кўра бир-биридан фарқланса, аризада товарлар мазкур белгиларига кўра алоҳида кўрсатилади.
Агар товарларнинг миқдори асосий ўлчов бирлигидан (килограмм) фарқ қиладиган ўлчов бирликларида ўлчанса, аризада ҳар бир товар бўйича қўшимча ўлчов бирликларидаги (дона, литр, метр, кв. метр, жуфт ва бошқалар) миқдорлар ҳам кўрсатилиши керак.
8. Аризага қуйидаги маълумотлар ва ҳужжатлар илова қилинади:
а) мажбурий тартибда:
коносамент, авиа, автотранспорт ёки темир йўл варақаси;
ҳисоб-фактура (инвойс) ёки проформа-инвойс;
Ўзбекистон Республикаси Ташқи иқтисодий фаолиятининг товар номенклатурасига (бундан буён матнда ТИФ ТН деб юритилади) мувофиқ товарларнинг коди;
товарларнинг нархи, миқдори (қўшимча ўлчов бирлигидаги миқдори), асосий техник-тижорат тавсифлари (маркаси, модели, артикули, модификацияси), ишлаб чиқарувчиси, ишлаб чиқарилган мамлакати, ишлаб чиқарилган йили тўғрисидаги маълумотлар;
товарнинг божхона қийматини аниқлаш усулидан келиб чиққан ҳолда ушбу Низомнинг 3-иловасида келтирилган божхона қийматини тасдиқловчи маълумотлар ва ҳужжатлар;
б) мавжуд бўлганда:
товарларнинг келиб чиқиш мамлакатини тасдиқловчи сертификат;
юк ташиш (ўров) варақлари;
товарларни таснифлаш бўйича олинган дастлабки қарор;
товарларнинг фотосуратлари, расмлари, чизмалари ва паспортлари, шунингдек дастлабки қарорни қабул қилиш учун зарур бўлган бошқа маълумотлар ва ҳужжатлар.
Манфаатдор шахслардан ушбу банднинг «а» кичик бандида назарда тутилмаган ҳужжатлар тақдим этилишини талаб қилишга йўл қўйилмайди.
8 1 . Манфаатдор шахс томонидан ариза ушбу Низомнинг 6-банди иккинчи хатбошисида белгиланган тартибда тақдим этилганда, дастлабки қарорни қабул қилиш учун божхона қийматини аниқлашнинг захира усулидан фойдаланган ҳолда ўртача божхона қиймати аниқланади ва божхона тўловлари ҳисоблаб чиқарилади.
Масалан, манфаатдор шахс томонидан Бирлашган Араб Амирликларидан «BMW X7» русумли автотранспорт воситасини олиб келиши мўлжалланган, бироқ манфаатдор шахсда товарнинг божхона қиймати тўғрисидаги маълумотлар ҳамда зарур ҳужжатлар мавжуд бўлмаган ҳолларда ҳам дастлабки қарор олиш юзасидан божхона органларига мурожаат қилиши мумкин. Божхона органи эса, ўртача божхона қийматларидан фойдаланган ҳолда божхона тўловларини ҳисоблаб чиқаради ва дастлабки қарорни қабул қилади.
Ушбу талаблар асосида қабул қилинган дастлабки қарор божхона расмийлаштируви учун асос сифатида қабул қилинмайди ва божхона органлари учун мажбурий ҳисобланмайди.
9. Ариза ҳамда унга илова қилинадиган ҳужжатлардаги маълумотлар тўғри ва тўлиқ бўлиши лозим. Бунда, маълумотларнинг тўғрилиги ва тўлиқлиги учун манфаатдор шахс жавобгар ҳисобланади.
10. Манфаатдор шахс божхона органига ёзма шаклда мурожаат қилганда, божхона органи ходими томонидан манфаатдор шахсга ариза қабул қилинганлигини тасдиқловчи ушбу ходимнинг фамилияси, исми ва отасининг исми ҳамда ариза қабул қилинган сана кўрсатилган тегишли ҳужжат ёки аризанинг нусхасига ушбу маълумотларни қайд этган ҳолда имзо қўйиб берилади.
11. Манфаатдор шахс ЯИДХП ёки веб-сайт орқали мурожаат қилганда, аризада товарлар ҳақидаги тегишли маълумотларни кўрсатган ҳолда мазкур Низомнинг 8-бандига мувофиқ тегишли ҳужжатларнинг электрон нусхаларини ЯИДХП ёки веб-сайтда бириктиради.
Манфаатдор шахс аризани ўзининг электрон рақамли имзоси билан тасдиқлайди ва божхона расмийлаштирувини амалга оширадиган тегишли божхона органига юборади.
3-боб. Аризани кўриб чиқиш ва кўриб чиқишни рад этиш
12. ЯИДХП ёки веб-сайт орқали мурожаат қилинганда, ариза Божхона қўмитасининг Ягона автоматлаштирилган ахборот тизимига (бундан буён матнда Божхона қўмитаси ЯААТ деб юритилади) автоматик равишда келиб тушади. Ёзма шаклда топширилган аризалар келиб тушган кундан кечиктирмай божхона органининг масъул ходими томонидан Божхона қўмитаси ЯААТга киритилади.
Аризалар Божхона қўмитаси ЯААТга келиб тушган куннинг ўзида электрон тарзда рўйхатдан ўтказилади.
13. Ариза рўйхатдан ўтказилганидан сўнг шу куннинг ўзида манфаатдор шахснинг аризасида кўрсатилган телефон рақамига ариза қабул қилинганлиги ва унинг рўйхат рақами кўрсатилган SMS хабар юборилади.
ЯИДХП ва веб-сайтда аризанинг рўйхат рақами орқали унинг ҳолатини онлайн тарзда кўриш мумкин.
14. Ариза Божхона қўмитаси ЯААТда рўйхатдан ўтказилган кундан бошлаб ўн иш куни ичида кўриб чиқилади.
15. Божхона органи масъул ходими ариза келиб тушган кундан эътиборан уч иш куни ичида унинг мазкур Низомнинг 2-бобида назарда тутилган талабларга мувофиқлигини ўрганади.
16. Қуйидаги ҳолларда аризани кўриб чиқиш рад этилади:
а) аризани тақдим этишда мазкур Низомнинг 7-бандида назарда тутилган қоидаларга риоя қилинмаган бўлса;
б) аризага ушбу Низомнинг 8-банди «а» кичик бандида назарда тутилган ҳужжатлар илова қилинмаган бўлса, бундан ушбу Низомнинг 6-банди иккинчи хатбошисида белгиланган тартибда тақдим этилган аризалар мустасно;
в) аризада назарда тутилган маълумотлар нотўғри, товарларнинг божхона қийматини миқдорий жиҳатдан аниқлаш имконини бермайдиган ва ҳужжатлар билан тасдиқланмаган ахборотга асосланган бўлса;
г) манфаатдор шахс томонидан тақдим қилинган ариза ва унга илова қилинган ҳужжатлардаги маълумотлар ўртасида номувофиқликлар мавжуд бўлса.
Аризани кўриб чиқиш ушбу бандда назарда тутилмаган асосларга кўра рад этилишига йўл қўйилмайди.
17. Мазкур Низомнинг 16-бандига мувофиқ аризани кўриб чиқиш рад этилган тақдирда, бу ҳақда шу куннинг ўзида манфаатдор шахсга ёзма ёки электрон тарзда хабарнома юборилади. Хабарномада аризани кўриб чиқишнинг рад этилиши сабаблари кўрсатилади.
18. Манфаатдор шахс аризани кўриб чиқишнинг рад этилишига асос бўлган сабабларни бартараф этган ҳолда, дастлабки қарорни олиш учун қайтадан мурожаат қилиши мумкин.
19. Аризани кўриб чиқиш рад этилган тақдирда, такроран киритилган ариза ушбу Низомга мувофиқ умумий асосларда кўриб чиқилади.
20. Аризани кўриб чиқишнинг рад этилишига асослар мавжуд бўлмаган тақдирда, божхона органи масъул ходими аризада кўрсатилган божхона қийматини аниқлаш усулидан келиб чиқиб, тақдим этилган маълумотлар ва ҳужжатларни Ўзбекистон Республикаси Божхона кодексининг 44-бобига мувофиқ кўриб чиқади.
Божхона органининг масъул ходими аризада кўрсатилган товарларнинг божхона қийматини аниқлаш усули уни тасдиқлаш учун тақдим этилган маълумотлар ва ҳужжатларга мос эмаслигини аниқласа, бу ҳақида шу куннинг ўзида манфаатдор шахсга ёзма ёки электрон тарзда хабарнома юборади. Хабарномада божхона қийматини аниқлаш усулининг уни тасдиқлаш учун тақдим этилган маълумотлар ва ҳужжатларга мос эмаслиги мос эмаслиги сабаблари ҳамда божхона органи томонидан мустақил равишда божхона қийматини ва уни аниқлаш усулини кетма-кетликда белгилаш орқали аризани кўриб чиқиш таклифи кўрсатилади.
Манфаатдор шахс божхона органининг таклифига розилик билдирган тақдирда, дастлабки қарорни қабул қилиш рад этилмайди ҳамда товарнинг божхона қийматини аниқлаш божхона органи томонидан мустақил тарзда Ўзбекистон Республикаси Божхона кодекси ва Ўзбекистон Республикаси Вазирлар Маҳкамасининг 2022 йил 6 апрелдаги 160-сон қарори билан тасдиқланган Ўзбекистон Республикаси божхона ҳудудига олиб кириладиган товарнинг божхона қийматини аниқлаш тартиби тўғрисидаги низомга мувофиқ олиб кириладиган товарнинг божхона қийматини аниқлаш усулларини кетма-кетликда қўллаш орқали амалга оширилади.
21. Дастлабки қарорни олиш бўйича аризанинг кўриб чиқилганлиги учун йиғим ундирилмайди.
4-боб. Дастлабки қарорни қабул қилиш
22. Дастлабки қарор Божхона қўмитаси ЯААТда божхона органининг раҳбари (ўринбосари) томонидан электрон рақамли имзо орқали тасдиқлаш йўли билан қабул қилинади. Тасдиқланган дастлабки қарорга Божхона қўмитаси ЯААТ орқали автоматик равишда матрицали штрих код (QR-код) қўйилади.
Бунда, аризада кўрсатилган товарларнинг турлари ва ҳажмидан қатъи назар, битта ариза бўйича битта дастлабки қарор қабул қилинади.
23. Дастлабки қарор қабул қилинганидан сўнг манфаатдор шахснинг телефон рақамига дастлабки қарор қабул қилинганлиги ва божхона йиғимини тўлаш лозимлиги тўғрисида тегишли тўлов бўйича инвойс шакллантирилган ҳаволали SMS хабар юборилади.
Божхона йиғими божхона органининг шу мақсадда очилган шахсий ғазна ҳисобварағига Ўзбекистон Республикаси Вазирлар Маҳкамаси томонидан тасдиқланган ставкаларда дастлабки қарорни қабул қилганлик учун белгиланган миқдорда тўланади.
Бунда, дастлабки қарорни олиш учун ЯИДХП орқали мурожаат қилинганда, мазкур бандда кўрсатилган йиғим бўйича тўланиши лозим бўлган суммадан 90 фоиз миқдорида тўланади.
ЯИДХПда божхона йиғимини тўлаш имконияти яратилади.
24. Дастлабки қарорни қабул қилганлик учун божхона йиғими манфаатдор шахснинг кўрсатмасига асосан унинг божхона органи шахсий ғазна ҳисобварағига дастлабки тарзда ўтказилган пул маблағларидан ҳам ечиб олиниши мумкин.
25. Манфаатдор шахс божхона йиғимини тўлаганидан сўнг, ўзи мурожаат қилган ЯИДХП ёки веб-сайт орқали аризанинг рўйхат рақамини киритган ҳолда дастлабки қарорнинг электрон шаклини юклаб олади, шунингдек ёзма шаклда мурожаат қилинган бўлса, дастлабки қарорнинг электрон ёки қоғоз шаклини ариза топширилган божхона органидан олади.
26. Манфаатдор шахс қабул қилинган дастлабки қарор учун божхона йиғимини ўттиз кун ичида тўламаган тақдирда, божхона йиғими божхона органи томонидан суд тартибида ундириб олинади.
27. Қабул қилинган дастлабки қарорлар тўғрисидаги маълумотлар манфаатдор шахслар ҳақидаги маълумотларнинг конфиденциаллигини сақлаган ҳолда веб-сайтга автоматик тарзда жойлаштириб борилади.
5-боб. Дастлабки қарорни қабул қилишни рад этиш асослари
28. Қуйидаги ҳолларда божхона органи томонидан дастлабки қарорни қабул қилиш рад этилади:
а) ариза юзасидан муқаддам айнан бир манфаатдор шахсга айнан бир хил товарлар бўйича дастлабки қарор берилган ва бунга қадар ушбу дастлабки қарорнинг амал қилиш муддати тугамаган бўлса;
б) аризада кўрсатилган товарларнинг божхона қийматини аниқлаш усули уни тасдиқлаш учун тақдим этилган маълумотлар ва ҳужжатларга мос эмаслиги аниқланган бўлса.
в) дастлабки қарорни олиш юзасидан тақдим этилган аризада кўрсатилган товарлар эркин муомалага чиқариш божхона режимига расмийлаштирилган бўлса.
Мазкур банднинг «б» кичик бандида назарда тутилган ҳолларда дастлабки қарорни қабул қилишни рад этиш манфаатдор шахс томонидан божхона органининг мустақил тарзда божхона қийматини ва уни аниқлаш усулини кетма-кетликда белгилаш орқали аризани кўриб чиқиш таклифига розилик билдирмаган ёки уни рад этган ҳолларда амалга оширилади.
Дастлабки қарорни қабул қилиш ушбу бандда назарда тутилмаган асосларга кўра рад этилишига йўл қўйилмайди.
29. Божхона органи томонидан дастлабки қарорни қабул қилиш рад этилган тақдирда, бу ҳақда шу куннинг ўзида манфаатдор шахсга ёзма ёки электрон шаклда хабарнома юборилади. Хабарномада дастлабки қарорни қабул қилишнинг рад этилиши сабаблари кўрсатилади.
30. Манфаатдор шахс дастлабки қарорни қабул қилишнинг рад этилиши учун асос бўлган сабабларни бартараф этган ҳолда божхона органига қайтадан мурожаат қилиши мумкин.
6-боб. Дастлабки қарорга ўзгартириш киритиш ва уни бекор қилиш
31. Божхона органлари томонидан дастлабки қарорни қабул қилишда божхона қиймати ва (ёки) божхона тўловлари миқдорига таъсир этган хатоликларга йўл қўйилганлиги аниқланган тақдирда, шунингдек манфаатдор шахснинг аризасига кўра ёки қонунчилик ҳужжатлари ўзгариши муносабати билан амал қилиш муддати тугамаган дастлабки қарорга ўзгартириш киритилиши мумкин.
Манфаатдор шахс дастлабки қарорга ўзгартириш киритиш тўғрисида мурожаат қилганда, дастлабки қарорга ўзгартириш киритиш мазкур Низомда дастлабки қарорни қабул қилиш учун белгиланган тартибда амалга оширилади.
Дастлабки қарорга ўзгартириш киритилиши унинг амал қилиш муддатининг ўзгаришига олиб келмайди.
32. Манфаатдор шахс дастлабки қарорга ўзгартириш киритиш учун мазкур Низомнинг 2-бобида белгиланган тартибда ва шаклда мурожаат қилади ҳамда ўзгартириш киритиш зарурияти ва асословчи ҳужжатларни тақдим этади.
33. Дастлабки қарорга манфаатдор шахснинг аризасига асосан ўзгартириш киритилганда, дастлабки қарор қабул қилинганлиги учун белгиланган миқдорда божхона йиғими ундирилади.
Дастлабки қарорга божхона органининг ташаббуси билан ўзгартириш киритилган тақдирда, божхона йиғими ундирилмайди.
34. Дастлабки қарорга ўзгартириш киритилганидан сўнг, ЯИДХП, веб-сайт ва Божхона қўмитаси ЯААТга жойлаштирилган дастлабки қарор божхона органи томонидан унинг ўзгартирилган ҳолатдаги шаклига алмаштириб қўйилади.
35. Дастлабки қарорга киритилган ўзгартириш у киритилган кундан бошлаб амал қилади.
36. Манфаатдор шахс томонидан дастлабки қарорни олиш учун атайлаб нотўғри ёки бузиб кўрсатилган маълумотлар тақдим этилганлиги аниқланса, дастлабки қарор Божхона қўмитаси ёки суд томонидан бекор қилинади.
37. Божхона қўмитаси томонидан дастлабки қарорни бекор қилиш ҳақидаги қарор мазкур Низомнинг 4-иловасига мувофиқ шаклда қабул қилинади.
Дастлабки қарорни бекор қилиш ҳақидаги қарор қабул қилинганда дастлабки қарор қабул қилинган кундан эътиборан бекор қилинган ҳисобланади.
38. Агар божхона ҳудуди орқали ўтказилган товарларнинг божхона тўловлари бекор қилинган дастлабки қарор асосида ҳақиқатда тўланиши лозим бўлган суммадан кам тўланганлиги аниқланса, тўловларнинг кам тўланган қисми айбдор шахслардан ихтиёрий ёки суд тартибида ундирилади.
39. Дастлабки қарор манфаатдор шахснинг айби билан бекор қилинган тақдирда, унинг учун тўланган божхона йиғими қайтарилмайди.
40. Дастлабки қарорни бекор қилиш ҳақидаги қарор Божхона қўмитаси ЯААТга электрон шаклда жойлаштирилади.
41. Дастлабки қарорга ўзгартириш киритиш ёки уни бекор қилиш ҳақидаги қарор қабул қилинган кундан кейинги иш кунидан кечиктирмай манфаатдор шахсга ёзма ёки электрон шаклда етказилади.
7-боб. Дастлабки қарорнинг амал қилиш доираси ва муддати
42. Дастлабки қарор қабул қилинган кундан бошлаб 90 календарь кун давомида амал қилади.
43. Дастлабки қарорда кўрсатилган товарлар битта ташқи савдо шартномаси доирасида олиб кирилган тақдирда, дастлабки қарор ташқи савдо шартномаси муддати тугагунга қадар, бироқ қабул қилинган кундан бошлаб 90 календарь кун давомида амал қилади.
44. Дастлабки қарор асосида Ўзбекистон Республикасининг исталган божхона постида божхона расмийлаштируви амалга оширилади.
Бунда, дастлабки қарорни қабул қилиш учун тақдим этилган маълумотлар ва ҳужжатлар божхона расмийлаштирувида тақдим этилган ҳужжатлар билан бир хил бўлиши керак.
45. Божхона расмийлаштирувини амалга ошириш жараёнида божхона органининг ходимлари томонидан Божхона қўмитаси ЯААТдан дастлабки қарорнинг электрон шакли манфаатдор шахс тақдим этган маълумотлар (фамилия, исм, отасининг исми ёки аризанинг рўйхат рақами) асосида исталган вақтда юклаб олинади.
46. Товарлар бўйича божхона тўловлари дастлабки қарор асосида амалга оширилади.
Бунда, дастлабки қарорда келтирилган божхона тўловларининг миқдори қуйидаги ҳолларда ўзгариши мумкинлиги инобатга олинади:
а) валюта курсининг ўзгариши натижасида божхона қиймати миқдорининг мос тарзда ўзгариши;
б) божхона тўловлари ставкаларининг ўзгариши;
в) божхона тўловларидан берилган имтиёзларнинг муддати тугаши ёки бекор қилиниши, божхона тўловлари бўйича имтиёз назарда тутилган қонунчилик ҳужжатига ўзгартириш киритилиши ёхуд божхона тўловларидан имтиёз назарда тутилган қонунчилик ҳужжати қабул қилиниши.
8-боб. Якуний қоидалар
47. Мазкур Низом талабларининг бузилишида айбдор бўлган шахслар қонунчилик ҳужжатларида белгиланган тартибда жавобгар бўлади.
48. Манфаатдор шахслар божхона органларининг қарорларидан норози бўлган тақдирда, бевосита Божхона қўмитасининг апелляция кенгашига ёки белгиланган тартибда судга мурожаат қилишлари мумкин.
Божхона органлари томонидан манфаатдор шахслардан асоссиз равишда ундирилган маблағлар қоплаб берилади.
49. Мазкур Низом Ўзбекистон Республикаси Ахборот технологиялари ва коммуникацияларини ривожлантириш вазирлиги ва Ўзбекистон Савдо-саноат палатаси билан келишилган.
Ўзбекистон Республикасига олиб кириладиган товарларга тўланиши лозим бўлган божхона тўловлари миқдорини аниқлаш бўйича дастлабки қарорни қабул қилиш тартиби тўғрисидаги низомга 1-ИЛОВА
Ўзбекистон Республикасига олиб кириладиган товарлар бўйича тўланиши лозим бўлган божхона тўловлари миқдорини аниқлаш бўйича ДАСТЛАБКИ ҚАРОР QR-код (матрик штрихли код ) 1. Дастлабки қарорни рўйхатга олиш рақами ва санаси: 2. Дастлабки қарорни қабул қилган божхона органининг номи: 3. Манфаатдор шахс: 4. Дастлабки қарорнинг амал қилиш муддати: 5. Товарнинг Ташқи иқтисодий фаолият товар номенклатурасига мувофиқ коди: 6. Товарлар номи ва тавсифи: (товарнинг асосий техник-тижорат тавсифлари ( маркаси, модели, артикули, модификацияси), ишлаб чиқарувчиси, ишлаб чиқарилган мамлакати ва бошқа хусусиятлари тўғрисидаги маълумот, нетто вазни, брутто вазни, шартнома валютаси, юк жўнатувчи мамлакат, савдо қилувчи мамлакат, ишлаб чиқарувчи ва ҳ.к.) 7. Товарларнинг божхона қийматини аниқлаш усули ва уни асослаш: 8. Товарларнинг келиб чиқиш мамлакати ва уни асослаш: 9. Божхона тўловлари ва йиғимлари тўғрисида маълумот: 10. Дастлабки қарорни қабул қилиш асослари: 11. Манфаатдор шахс томонидан тақдим қилинган маълумотлар ва ҳужжатлар рўйхати: 12. Қўшимча маълумотлар: 13. Божхона органининг мансабдор шахси _____________________ Лавозим (электрон рақамли имзо) _________________________ Фамилия, исм, отасининг исми
Ўзбекистон Республикасига олиб кириладиган товарларга тўланиши лозим бўлган божхона тўловлари миқдорини аниқлаш бўйича дастлабки қарорни қабул қилиш тартиби тўғрисидаги низомга 2-ИЛОВА
Ўзбекистон Республикасига олиб кириладиган товарлар бўйича тўланиши лозим бўлган божхона тўловларини аниқлашда дастлабки қарор қабул қилиш тўғрисида АРИЗА ______________ (сана) ______________ (рақам) I. Товарлар ёки транспорт воситасининг эгаси тўғрисидаги маълумот 1.1 Товарлар ёки транспорт воситаси эгаси бўлган юридик шахснинг тўлиқ номи ёки жисмоний шахснинг Ф.И.О. 1.2 Почта манзили (Почта индекси) 1.3 Ташкилий-ҳуқуқий шакли 1.4 СТИР ёки жисмоний шахснинг шахсий идентификация (ЖШШИР) рақами ҳамда шахсни тасдиқловчи ҳужжат серияси ва рақами 1.5 Давлат рўйхатидан ўтган рақами ва санаси 1.6 Телефон рақами II. Товарлар ёки транспорт воситаси эгасининг номидан ариза топширувчи ваколатли шахс тўғрисидаги маълумот (ариза ваколатли шахс томонидан тақдим этилганда) 2.1 Ваколатли шахснинг ЖШШИР ҳамда шахсни тасдиқловчи ҳужжат серияси ва рақами 2.2. Ваколатини тасдиқловчи ҳужжат санаси ва рақами * III. Дастлабки қарорни қабул қилиш учун товарлар ҳақидаги маълумотлар 3.1 Товарларнинг савдо, тижорат номи ва тўлиқ тавсифи, савдо белгиси, асосий техник-тижорат тавсифлари (маркаси, модели, артикули, модификацияси), нави, стандартлари, бажарадиган функциялари, техник ва тижорат хусусиятлари 3.2 Товарлар ҳақида маълумот (ТИФ ТНга мувофиқ товарларнинг коди, савдо қилувчи мамлакат, юк жўнатувчи ва келиб чиқиш мамлакати, юк жўнатувчи, сотувчи, товар ишлаб чиқарувчи, товарнинг брутто/нетто оғирликлари ҳамда асосий ва (ёки) қўшимча ўлчов бирликларидаги � иқдори 3.3 Товарларнинг нархи, валютаси ва валюта коди кўрсатилган ҳолда 3.4 Товарларни ташиш учун ишлатиладиган халқаро транспорт воситасининг тури 3.5 Ўрамга эга бўлган товарлар учун — товар эгаллаган юк жойларининг умумий сони, товар ўрами тури ва ўрамлар миқдори 3.6 Ташқи савдо шартномаси (мавжуд бўлса), товарларни етказиб бериш шартлари 3.7 Товарларнинг божхона қийматини аниқлаш усули 3.8 Божхона қийматини аниқлашнинг аввалги усуллари қўлланилмаслигининг сабаблари 3.9 Илгари қабул қилинган дастлабки қарор ҳақидаги маълумотлар (агар мавжуд бўлса) 3.10 Товарларнинг божхона қийматини аниқлаш учун муҳим бўлган қўшимча маълумотлар 3.11 Илова қилинадиган ҳужжатлар ** 3.12 Товарнинг божхона қийматини кўрсатмаган, шунингдек тегишли ҳужжатлар ва маълумотларни илова қилмаган ҳолда тақдим этиладиган ариза ***
Ўзбекистон Республикасига олиб кириладиган товарларга тўланиши лозим бўлган божхона тўловлари миқдорини аниқлаш бўйича дастлабки қарорни қабул қилиш тартиби тўғрисидаги низомга 3-ИЛОВА
Ўзбекистон Республикасига олиб кириладиган товарлар бўйича тўланиши лозим бўлган божхона тўловларини аниқлашда манфаатдор шахс томонидан тақдим этиладиган ҳужжатлар (маълумотлар) РЎЙХАТИ * I. Олиб кириладиган товарга доир битимнинг қиймати бўйича 1.1 Ташқи савдо операцияларининг ягона электрон ахборот тизими томонидан бириктирилган ташқи савдо контракти (шартнома, келишув) ва идентификация рақами 1.2 Ташқи савдо контрактида (шартномасида, келишувида) белгиланган битим шартларидан келиб чиқиб, маълум қилинган нархга тузатишлар киритиш лозим бўлганда 1.2.1 суғурта ҳужжатлари 1.2.2 товарнинг ташиш ва (ёки) юклаш, тушириш, қайта юклаш, бошқа жойга тўкиш бўйича шартномаси (транспорт экспедиция шартномаси), товарни ташишга, юклаш, тушириш, қайта юклаш, бошқа жойга тўкишга ҳисобварақ-фактура (инвойс), банк ҳужжатлари (агар ҳисобварақ-фактура (инвойс) тўланган бўлса), транспорт тарифлари тўғрисидаги ҳужжатлар (маълумотлар) ёки ташиш қийматини акс эттирувчи бухгалтерлик ҳужжатлари (агар сотиб олувчи ўзининг транспортида товарни ташишни амалга оширган бўлса) 1.2.3 воситачилик хизматларини кўрсатиш тўғрисидаги шартнома (воситачилик шартномаси, брокерлик хизматларини кўрсатиш тўғрисидаги шартнома), воситачилик хизматларини кўрсатиш учун ҳисобварақ-фактура (инвойс), банк тўлов ҳужжатлари 1.2.4 лицензион ва (ёки) муаллифлик келишуви, ҳисобварақ-фактура (инвойс), банк тўлов ҳужжатлари, олиб келинаётган (олиб келинган) товарга тааллуқли бўлган интеллектуал мулк объектларидан фойдаланганлик учун тўловлар тўғрисидаги маълумотларни ўз ичига олган бухгалтерлик ва бошқа ҳужжатлар 1.2.5 олиб кирилган товарни кейинчалик қайта сотиш, ундан фойдаланиш ёки уни тасарруф этишдан сотувчига бевосита ёки билвосита ўтадиган тушумнинг исталган қисми тўғрисидаги маълумотларни ўз ичига олган ҳужжат (шу жумладан, бухгалтерлик) ва маълумотлар 1.2.6 контейнер ва (ёки) кўп марта ишлатиладиган бошқа идишларнинг, ўров-жойлов материалларининг ва ўраш-жойлаш ишларининг, агар мазкур харажатлар сотиб олувчи томонидан амалга оширилган, бироқ олиб кириладиган товар учун амалда тўланган ёки тўланиши лозим бўлган нархга қўшилмаган қиймат тўғрисидаги шартномалар, ҳисобварақлар, банк тўлов ҳужжатлари 1.2.7 сотувчи томонидан сотиб олувчига муайян товар туркуми учун чегирма бериш асосини, уларнинг миқдорини кўрсатувчи маълумотлар 1.3 Агар маълум қилинган божхона қиймати охирги тўқсон календарь кун ичида олиб кирилиб, 1-усулда қабул қилинган товарнинг божхона қийматидан паст бўлса: 1.3.1 Жўнатувчи мамлакат божхона декларацияси ** 1.3.2 Товарни етказиб берилишига алоқадор бўлган учинчи шахслар билан контрактлар ва улар учун тўлов ҳисоблари *** 1.8 Битим тарафларининг ўзаро боғлиқлиги олиб кириладиган товарлар билан тузилган битим қийматига таъсир қилмаганлигини тасдиқлаш мақсадида ихтиёрий равишда: 1.8.1 айнан бир хил ёки ўхшаш товарлар сотувчи билан ўзаро боғлиқ бўлмаган сотиб олувчиларга Ўзбекистон Республикаси божхона ҳудудига олиб чиқиш учун сотилганда, унинг қийматини тасдиқловчи ҳужжатлар 1.8.2 Божхона қиймати 4 ёки 5-усуллар билан аниқланган айнан бир хил ёки ўхшаш товарларнинг божхона қийматини тасдиқловчи ҳужжатлар II. Айнан бир хил товарга доир битимнинг қиймати бўйича ҳамда ўхшаш товарга доир битимнинг қиймати бўйича 2.1 Божхона органи томонидан қабул қилинган ва божхона қиймати Божхона кодексининг 303-моддаси бўйича аниқланган ҳолда чиқарилган айнан бир хил ва ўхшаш товарларга тегишли бўлган божхона декларацияси рўйхат рақами ва унга тегишли товар тартиб рақами 2.2 Қийматга тузатишлар киритиш амалга оширилиши лозим бўлган ҳолларда товарни Ўзбекистон Республикаси божхона ҳудудига олиб кириладиган жойга етказиб берилгунга қадар қилинадиган харажатларни тасдиқловчи ҳужжат ва маълумотлар **** 2.2.2 ҳисобварақ-фактура (инвойс) III. Қийматларни чегириб ташлаш асосида 3.1 Ўзбекистон Республикаси божхона ҳудудида баҳоланаётган, айнан бир хил ва ўхшаш товарларни сотилганлиги тўғрисидаги шартномалар 3.2 Ўзбекистон Республикаси божхона ҳудудида ўша классдаги ва турдаги товарларни сотишда қўйилган ҳисобварақ-фактура (инвойс) 3.3 Ўзбекистон Республикаси божхона ҳудудига товарни олиб кириш ва сотиш билан боғлиқ бўлган харажатларни акс эттирувчи ҳисобварақ-фактура, банк ҳужжатлари (агар ҳисобварақ-фактуралар тўланган бўлса), бухгалтерлик ҳужжатлари (воситачи ҳақлари тўғрисида, тижорат харажатлари, ташиш харажатлари, суғурта, юклаш ва тушириш ишлари, олинадиган даромад) 3.4 Товарга ишлов бериш натижасида қўшилган қиймат тўғрисидаги маълумот ва ҳужжатлар, агар бундай товар унга кейинчалик ишлов берилгандан кейин сотилаётган бўлса, ишлов бериш бўйича пуллик хизмат кўрсатиш шартномаси, буюртмачига ижрочи томонидан қўйилган ҳисобварақ-фактура (инвойс), ушбу шартномани тўлаш бўйича банк ҳужжатлари, ишлов бериш қиймати тўғрисида бухгалтерлик ҳужжатлари (калькуляция) 3.5 Муқаддам Ўзбекистон Республикаси божхона ҳудудига товарларни олиб кириш ва (ёки) сотиш муносабати билан Ўзбекистон Республикасида божхона божи, солиқлар, йиғимлар ва бошқа тўловларни тўланганлиги тўғрисидаги ҳужжатлар IV. Қийматларни қўшиш асосида 4.1 Ишлаб чиқариш учун қилинган харажатлар ҳамда материалларни сотиб олиш ва (ёки) баҳоланаётган товарларни ишлаб чиқариш бўйича ишлаб чиқарувчи (сотувчи) харажатлари тўғрисидаги маълумотларни ўз ичига олган бухгалтерлик ҳужжатлари, шунингдек, баҳоланаётган (олиб кириладиган) товарни ишлаб чиқариш билан боғлиқ бўлган бошқа операциялар, шу жумладан, идиш ва ўраш-жойлаш учун қилинган харажатлар, шу билан бирга, Ўзбекистон Республикаси божхона ҳудудидан ташқарида бажарилган лойиҳалашнинг, тажриба-конструкторлик ишларининг, бадиий безатишнинг, дизайннинг, эскизларнинг ёки чизмаларнинг қийматлари ишлаб чиқарувчи тўлаганлиги умумэътироф этилган бухгалтерлик ҳисоби тамойилларига мувофи? тузилган баҳоланаётган тов?р ишлаб чиқарувчисининг тижорат ҳисобварақлари 4.2 Ишлаб чиқарувчи ва (ёки) экспортёрнинг баҳоланаётган товар ишлаб чиқарилган айни ўша мамлакатда ишлаб чиқарилган, айни ўша классдаги ва турдаги товарни Ўзбекистон Республикасида сотишда одатда экспорт қилувчи томонидан олинадиган фойда ва Божхона кодексининг 312-моддаси «а» кичик бандида акс эттирилмаган умумий харажатларнинг ҳажми тўғрисидаги маълумотларни ўз ичига олган бухгалтерлик ҳужжатлари; 4.3 Ташқи савдо контрактида (шартномасида, келишувида) белгиланган битим шартларига мувофиқ суғурта ҳужжатлари 4.4 Ташиш учун ҳисобварақ-фактура (инвойс) (ташиш харажатлари калькуляцияси), Ўзбекистон Республикасининг божхона ҳудудига олиб кириладиган жойга етказиб берилгунга қадар қилинадиган харажатларни тасдиқловчи ҳужжатлар V. Захира усул 5.1 Агар олиб кирилган товарнинг ҳужжатларда кўрсатилган нарх бўйича ҳисобланиши учун: 5.1.1 олиб кириладиган товарларнинг қийматини ёки қийматини ҳисоблаб чиқариш тўғрисидаги маълумотларни ўз ичига олган ижара, лизинг, айирбошлаш, ҳадя қилиш шартномалари 5.1.2 етказиб бериш шартидан келиб чиқиб, мазкур Рўйхатнинг 1.2-бандида (1.2.1 — 1.2.7-бандлар) кўрсатилган ҳужжатлар 5.2 Агар аниқ бир манбадаги нархга ҳавола қилинган бўлса, қуйидагилардан бири 5.2.1 баҳоланаётган товар билан айнан бир хил ёки ўхшаш товарларнинг Ўзбекистон Республикаси божхона ҳудудига олиб кирилган бир вақтда ёки тегишли даврда жаҳон бозорида сотилиши ёки сотилиши таклиф қилинган нархлар тўғрисидаги маълумотларни ўз ичига олган мустақил оммавий ахборот манбаларининг биринчи (маълумот манбасининг номи ва санаси кўрсатилган муқова) ва тегишли варақларининг нусхалари 5.2.2 Товарларнинг расмий нархлари эълон қилинадиган ёки тарқатиладиган ёки аниқ товарлар етказиб берувчиларнинг нархлар тўғрисидаги тижорат таклифлари, шунингдек жаҳон биржа котировкалари 5.2.3 Муқаддам божхона органида расмийлаштирилган божхона юк декларацияси ва тегишли товар рақами 5.3 Агар товарнинг ички бозорда сотилаётган нархига ҳавола қилинган бўлса, Ўзбекистон Республикасининг қонунчилик ҳужжатларига мувофиқ фаолият юритаётган баҳоловчи ташкилотлар томонидан тайёрланган олиб кириладиган товарларни баҳолаш ҳисоботлари
Ўзбекистон Республикасига олиб кириладиган товарларга тўланиши лозим бўлган божхона тўловлари миқдорини аниқлаш бўйича дастлабки қарорни қабул қилиш тартиби тўғрисидаги низомга 4-ИЛОВА
Ўзбекистон Республикасига олиб кириладиган товарлар бўйича тўланиши лозим бўлган божхона тўловлари тўғрисидаги дастлабки қарорни бекор қилиш ҳақида ҚАРОР QR код (матрик штрихли код) 1. Дастлабки қарорни бекор қилиш ҳақида қарор қабул қилган божхона органи 2. Манфаатдор шахс ҳақида маълумот 3. Дастлабки қарорни бекор қилиш ҳақидаги қарор қабул қилинган сана 4. Бекор қилинган дастлабки қарорнинг рўйхатга олиш рақами ва санаси 5. Бекор қилинган дастлабки қарорда кўрсатилган товар номи 6. Дастлабки қарорни бекор қилиш ҳақида қарор қабул қилишнинг асослари ва сабаблари 7. Дастлабки қарорни бекор қилиш ҳақидаги қарор кучга кирадиган сана 8. Дастлабки қарорни бекор қилиш ҳақидаги қарор қабул қилган Иқтисодиёт ва молия вазирлиги ҳузуридаги Божхона қўмитасининг мансабдор шахси _____________________ Лавозим (электрон рақамли имзо) ____________________________ Фамилия, исм, отасининг исми
Раис М. АЗИМОВ
Ўзбекистон Республикаси Ахборот технологиялари ва коммуникацияларини ривожлантириш вазирининг биринчи ўринбосари O. ПЕКОС
Ўзбекистон Савдо-саноат палатаси раиси А. ИКРАМОВ
Тошкент ш.,
2021 йил 10 ноябрь,
2021 йил 9 ноябрь
2021 йил 9 ноябрь
01-02/8-51-сон
Oʻzbekiston Respublikasi Davlat bojxona qoʻmitasining
Qarori
NIZOM
Oʻzbekiston Respublikasiga olib kiriladigan tovarlarga toʻlanishi lozim boʻlgan bojxona toʻlovlari miqdorini aniqlash boʻyicha dastlabki qarorni qabul qilish tartibi toʻgʻrisidagi nizomni tasdiqlash haqida
Oʻzbekiston Respublikasi Prezidentining 2021-yil 10-sentabrdagi PF-6310-son “Bojxona tartib-taomillarini soddalashtirish va davlat bojxona xizmati organlari tashkiliy tuzilmasini yanada takomillashtirish toʻgʻrisida”gi Farmoniga muvofiq Oʻzbekiston Respublikasi Davlat bojxona qoʻmitasi qaror qiladi:
1. Oʻzbekiston Respublikasiga olib kiriladigan tovarlarga toʻlanishi lozim boʻlgan bojxona toʻlovlari miqdorini aniqlash boʻyicha dastlabki qarorni qabul qilish tartibi toʻgʻrisidagi nizom ilovaga muvofiq tasdiqlansin.
2. Mazkur qaror 2022-yil 1-yanvardan kuchga kiradi.
Kelishildi:
Oʻzbekiston Respublikasi Davlat bojxona qoʻmitasining 2021-yil 10-noyabrdagi 01-02/8-51-son qaroriga ILOVA
Oʻzbekiston Respublikasiga olib kiriladigan tovarlarga toʻlanishi lozim boʻlgan bojxona toʻlovlari miqdorini aniqlash boʻyicha dastlabki qarorni qabul qilish tartibi toʻgʻrisidagi
Ushbu Nizom tashqi iqtisodiy faoliyat qatnashchilari tomonidan Oʻzbekiston Respublikasiga olib kiriladigan tovarlarning bojxona rasmiylashtiruvidan oldin ushbu tovarlar boʻyicha toʻlanishi lozim boʻlgan bojxona toʻlovlari miqdorini aniqlashda bojxona organlari tomonidan dastlabki qarorni qabul qilish tartibini belgilaydi.
1-bob. Umumiy qoidalar
1. Ushbu Nizomda quyidagi asosiy tushunchalardan foydalaniladi:
dastlabki qaror — Oʻzbekiston Respublikasiga tashqi iqtisodiy faoliyat qatnashchilari tomonidan olib kiriladigan tovarlarni erkin muomalaga chiqarish (import) bojxona rejimiga rasmiylashtirishda toʻlanishi lozim boʻlgan bojxona toʻlovlari miqdorini oldindan aniqlash boʻyicha bojxona organi tomonidan qabul qilinadigan hujjat;
manfaatdor shaxs — Oʻzbekiston Respublikasiga olib kiriladigan tovarning egasi boʻlgan tashqi iqtisodiy faoliyat qatnashchisi yoki tovarga nisbatan bojxona toʻgʻrisidagi qonunchilikka muvofiq vakolatlarga ega boʻlgan yoxud tovarning egasi nomidan tegishli shartnoma yoki ishonchnoma asosida ish koʻruvchi shaxs;
bojxona organi — Oʻzbekiston Respublikasi Iqtisodiyot va moliya vazirligi huzuridagi Bojxona qoʻmitasining (bundan buyon matnda Bojxona qoʻmitasi deb yuritiladi) Qoraqalpogʻiston Respublikasi, viloyatlar, Toshkent shahri boʻyicha boshqarmalari va “Toshkent-AERO” ixtisoslashtirilgan bojxona kompleksi;
Oʻzbekiston Respublikasiga olib kiriladigan tovarlar (bundan buyon matnda tovar deb yuritiladi) — Oʻzbekiston Respublikasining bojxona hududida erkin muomalaga chiqarish (import) bojxona rejimiga nisbatan bojxona rasmiylashtiruvi uchun moʻljallangan chet el tovarlari va (yoki) transport vositalari;
bojxona yigʻimi — Oʻzbekiston Respublikasi Vazirlar Mahkamasi tomonidan belgilangan stavkalarda dastlabki qarorni qabul qilganlik uchun undiriladigan yigʻim.
2. Dastlabki qarorni olish manfaatdor shaxs uchun ixtiyoriy hisoblanadi.
Bunda, bojxona organi tomonidan bojxona rasmiylashtiruvini amalga oshirishda manfaatdor shaxsdan dastlabki qarorni taqdim etishni talab qilishga, shuningdek dastlabki qarorning mavjud emasligini asos qilib, bojxona rasmiylashtiruvini amalga oshirishni rad etishga yoʻl qoʻyilmaydi.
3. Manfaatdor shaxs tomonidan dastlabki qarorni olish yuzasidan bojxona organlariga erkin muomalaga chiqarish (import) bojxona rejimiga joylashtirilmagan tovarlar yuzasidan murojaat qilinadi.
4. Dastlabki qaror tovarlarning bojxona rasmiylashtiruvini amalga oshiradigan tegishli bojxona organi tomonidan ushbu Nizomning 1-ilovasiga muvofiq shaklda qabul qilinadi va manfaatdor shaxsga taqdim etiladi.
Agar tovarlarni bir nechta bojxona organlari orqali olib oʻtish rejalashtirilgan boʻlsa, manfaatdor shaxs oʻz xohishiga koʻra ushbu bojxona organlaridan istalgan bittasiga murojaat qilishga haqli.
5. Dastlabki qaror bojxona organlari uchun majburiy hisoblanadi.
2-bob. Dastlabki qarorni olish uchun murojaat qilish
6. Manfaatdor shaxs dastlabki qarorni olish uchun ushbu Nizomning 2-ilovasiga muvofiq shakldagi ariza bilan bojxona organiga yozma yoki Yagona interaktiv davlat xizmatlari portali (bundan buyon matnda YIDXP deb yuritiladi) yoxud Bojxona qoʻmitasining rasmiy veb-sayti (bundan buyon matnda veb-sayt deb yuritiladi) orqali elektron tarzda murojaat qiladi.
Manfaatdor shaxs arizani tovarning bojxona qiymatini koʻrsatmagan, shuningdek ushbu Nizomning 8-bandida nazarda tutilgan hujjatlar va maʼlumotlarni ilova qilmagan holda taqdim etishi mumkin. Bunda, manfaatdor shaxs ariza shaklining 3.12-pozitsiyasiga tegishli belgi qoʻyadi.
7. Tovarlar asosiy texnik-tijorat tavsiflari (markalari, modellari, artikullari, modifikatsiyalari), ishlab chiqaruvchisi, ishlab chiqarilgan yili va boshqa xususiyatlariga koʻra bir-biridan farqlansa, arizada tovarlar mazkur belgilariga koʻra alohida koʻrsatiladi.
Agar tovarlarning miqdori asosiy oʻlchov birligidan (kilogramm) farq qiladigan oʻlchov birliklarida oʻlchansa, arizada har bir tovar boʻyicha qoʻshimcha oʻlchov birliklaridagi (dona, litr, metr, kv. metr, juft va boshqalar) miqdorlar ham koʻrsatilishi kerak.
8. Arizaga quyidagi maʼlumotlar va hujjatlar ilova qilinadi:
a) majburiy tartibda:
konosament, avia, avtotransport yoki temir yoʻl varaqasi;
hisob-faktura (invoys) yoki proforma-invoys;
Oʻzbekiston Respublikasi Tashqi iqtisodiy faoliyatining tovar nomenklaturasiga (bundan buyon matnda TIF TN deb yuritiladi) muvofiq tovarlarning kodi;
tovarlarning narxi, miqdori (qoʻshimcha oʻlchov birligidagi miqdori), asosiy texnik-tijorat tavsiflari (markasi, modeli, artikuli, modifikatsiyasi), ishlab chiqaruvchisi, ishlab chiqarilgan mamlakati, ishlab chiqarilgan yili toʻgʻrisidagi maʼlumotlar;
tovarning bojxona qiymatini aniqlash usulidan kelib chiqqan holda ushbu Nizomning 3-ilovasida keltirilgan bojxona qiymatini tasdiqlovchi maʼlumotlar va hujjatlar;
b) mavjud boʻlganda:
tovarlarning kelib chiqish mamlakatini tasdiqlovchi sertifikat;
yuk tashish (oʻrov) varaqlari;
tovarlarni tasniflash boʻyicha olingan dastlabki qaror;
tovarlarning fotosuratlari, rasmlari, chizmalari va pasportlari, shuningdek dastlabki qarorni qabul qilish uchun zarur boʻlgan boshqa maʼlumotlar va hujjatlar.
Manfaatdor shaxslardan ushbu bandning “a” kichik bandida nazarda tutilmagan hujjatlar taqdim etilishini talab qilishga yoʻl qoʻyilmaydi.
8 1 . Manfaatdor shaxs tomonidan ariza ushbu Nizomning 6-bandi ikkinchi xatboshisida belgilangan tartibda taqdim etilganda, dastlabki qarorni qabul qilish uchun bojxona qiymatini aniqlashning zaxira usulidan foydalangan holda oʻrtacha bojxona qiymati aniqlanadi va bojxona toʻlovlari hisoblab chiqariladi.
Masalan, manfaatdor shaxs tomonidan Birlashgan Arab Amirliklaridan “BMW X7” rusumli avtotransport vositasini olib kelishi moʻljallangan, biroq manfaatdor shaxsda tovarning bojxona qiymati toʻgʻrisidagi maʼlumotlar hamda zarur hujjatlar mavjud boʻlmagan hollarda ham dastlabki qaror olish yuzasidan bojxona organlariga murojaat qilishi mumkin. Bojxona organi esa, oʻrtacha bojxona qiymatlaridan foydalangan holda bojxona toʻlovlarini hisoblab chiqaradi va dastlabki qarorni qabul qiladi.
Ushbu talablar asosida qabul qilingan dastlabki qaror bojxona rasmiylashtiruvi uchun asos sifatida qabul qilinmaydi va bojxona organlari uchun majburiy hisoblanmaydi.
9. Ariza hamda unga ilova qilinadigan hujjatlardagi maʼlumotlar toʻgʻri va toʻliq boʻlishi lozim. Bunda, maʼlumotlarning toʻgʻriligi va toʻliqligi uchun manfaatdor shaxs javobgar hisoblanadi.
10. Manfaatdor shaxs bojxona organiga yozma shaklda murojaat qilganda, bojxona organi xodimi tomonidan manfaatdor shaxsga ariza qabul qilinganligini tasdiqlovchi ushbu xodimning familiyasi, ismi va otasining ismi hamda ariza qabul qilingan sana koʻrsatilgan tegishli hujjat yoki arizaning nusxasiga ushbu maʼlumotlarni qayd etgan holda imzo qoʻyib beriladi.
11. Manfaatdor shaxs YIDXP yoki veb-sayt orqali murojaat qilganda, arizada tovarlar haqidagi tegishli maʼlumotlarni koʻrsatgan holda mazkur Nizomning 8-bandiga muvofiq tegishli hujjatlarning elektron nusxalarini YIDXP yoki veb-saytda biriktiradi.
Manfaatdor shaxs arizani oʻzining elektron raqamli imzosi bilan tasdiqlaydi va bojxona rasmiylashtiruvini amalga oshiradigan tegishli bojxona organiga yuboradi.
3-bob. Arizani koʻrib chiqish va koʻrib chiqishni rad etish
12. YIDXP yoki veb-sayt orqali murojaat qilinganda, ariza Bojxona qoʻmitasining Yagona avtomatlashtirilgan axborot tizimiga (bundan buyon matnda Bojxona qoʻmitasi YAAAT deb yuritiladi) avtomatik ravishda kelib tushadi. Yozma shaklda topshirilgan arizalar kelib tushgan kundan kechiktirmay bojxona organining masʼul xodimi tomonidan Bojxona qoʻmitasi YAAATga kiritiladi.
Arizalar Bojxona qoʻmitasi YAAATga kelib tushgan kunning oʻzida elektron tarzda roʻyxatdan oʻtkaziladi.
13. Ariza roʻyxatdan oʻtkazilganidan soʻng shu kunning oʻzida manfaatdor shaxsning arizasida koʻrsatilgan telefon raqamiga ariza qabul qilinganligi va uning roʻyxat raqami koʻrsatilgan SMS xabar yuboriladi.
YIDXP va veb-saytda arizaning roʻyxat raqami orqali uning holatini onlayn tarzda koʻrish mumkin.
14. Ariza Bojxona qoʻmitasi YAAATda roʻyxatdan oʻtkazilgan kundan boshlab oʻn ish kuni ichida koʻrib chiqiladi.
15. Bojxona organi masʼul xodimi ariza kelib tushgan kundan eʼtiboran uch ish kuni ichida uning mazkur Nizomning 2-bobida nazarda tutilgan talablarga muvofiqligini oʻrganadi.
16. Quyidagi hollarda arizani koʻrib chiqish rad etiladi:
a) arizani taqdim etishda mazkur Nizomning 7-bandida nazarda tutilgan qoidalarga rioya qilinmagan boʻlsa;
b) arizaga ushbu Nizomning 8-bandi “a” kichik bandida nazarda tutilgan hujjatlar ilova qilinmagan boʻlsa, bundan ushbu Nizomning 6-bandi ikkinchi xatboshisida belgilangan tartibda taqdim etilgan arizalar mustasno;
v) arizada nazarda tutilgan maʼlumotlar notoʻgʻri, tovarlarning bojxona qiymatini miqdoriy jihatdan aniqlash imkonini bermaydigan va hujjatlar bilan tasdiqlanmagan axborotga asoslangan boʻlsa;
g) manfaatdor shaxs tomonidan taqdim qilingan ariza va unga ilova qilingan hujjatlardagi maʼlumotlar oʻrtasida nomuvofiqliklar mavjud boʻlsa.
Arizani koʻrib chiqish ushbu bandda nazarda tutilmagan asoslarga koʻra rad etilishiga yoʻl qoʻyilmaydi.
17. Mazkur Nizomning 16-bandiga muvofiq arizani koʻrib chiqish rad etilgan taqdirda, bu haqda shu kunning oʻzida manfaatdor shaxsga yozma yoki elektron tarzda xabarnoma yuboriladi. Xabarnomada arizani koʻrib chiqishning rad etilishi sabablari koʻrsatiladi.
18. Manfaatdor shaxs arizani koʻrib chiqishning rad etilishiga asos boʻlgan sabablarni bartaraf etgan holda, dastlabki qarorni olish uchun qaytadan murojaat qilishi mumkin.
19. Arizani koʻrib chiqish rad etilgan taqdirda, takroran kiritilgan ariza ushbu Nizomga muvofiq umumiy asoslarda koʻrib chiqiladi.
20. Arizani koʻrib chiqishning rad etilishiga asoslar mavjud boʻlmagan taqdirda, bojxona organi masʼul xodimi arizada koʻrsatilgan bojxona qiymatini aniqlash usulidan kelib chiqib, taqdim etilgan maʼlumotlar va hujjatlarni Oʻzbekiston Respublikasi Bojxona kodeksining 44-bobiga muvofiq koʻrib chiqadi.
Bojxona organining masʼul xodimi arizada koʻrsatilgan tovarlarning bojxona qiymatini aniqlash usuli uni tasdiqlash uchun taqdim etilgan maʼlumotlar va hujjatlarga mos emasligini aniqlasa, bu haqida shu kunning oʻzida manfaatdor shaxsga yozma yoki elektron tarzda xabarnoma yuboradi. Xabarnomada bojxona qiymatini aniqlash usulining uni tasdiqlash uchun taqdim etilgan maʼlumotlar va hujjatlarga mos emasligi mos emasligi sabablari hamda bojxona organi tomonidan mustaqil ravishda bojxona qiymatini va uni aniqlash usulini ketma-ketlikda belgilash orqali arizani koʻrib chiqish taklifi koʻrsatiladi.
Manfaatdor shaxs bojxona organining taklifiga rozilik bildirgan taqdirda, dastlabki qarorni qabul qilish rad etilmaydi hamda tovarning bojxona qiymatini aniqlash bojxona organi tomonidan mustaqil tarzda Oʻzbekiston Respublikasi Bojxona kodeksi va Oʻzbekiston Respublikasi Vazirlar Mahkamasining 2022-yil 6-apreldagi 160-son qarori bilan tasdiqlangan Oʻzbekiston Respublikasi bojxona hududiga olib kiriladigan tovarning bojxona qiymatini aniqlash tartibi toʻgʻrisidagi nizomga muvofiq olib kiriladigan tovarning bojxona qiymatini aniqlash usullarini ketma-ketlikda qoʻllash orqali amalga oshiriladi.
21. Dastlabki qarorni olish boʻyicha arizaning koʻrib chiqilganligi uchun yigʻim undirilmaydi.
4-bob. Dastlabki qarorni qabul qilish
22. Dastlabki qaror Bojxona qoʻmitasi YAAATda bojxona organining rahbari (oʻrinbosari) tomonidan elektron raqamli imzo orqali tasdiqlash yoʻli bilan qabul qilinadi. Tasdiqlangan dastlabki qarorga Bojxona qoʻmitasi YAAAT orqali avtomatik ravishda matritsali shtrix kod (QR-kod) qoʻyiladi.
Bunda, arizada koʻrsatilgan tovarlarning turlari va hajmidan qatʼi nazar, bitta ariza boʻyicha bitta dastlabki qaror qabul qilinadi.
23. Dastlabki qaror qabul qilinganidan soʻng manfaatdor shaxsning telefon raqamiga dastlabki qaror qabul qilinganligi va bojxona yigʻimini toʻlash lozimligi toʻgʻrisida tegishli toʻlov boʻyicha invoys shakllantirilgan havolali SMS xabar yuboriladi.
Bojxona yigʻimi bojxona organining shu maqsadda ochilgan shaxsiy gʻazna hisobvaragʻiga Oʻzbekiston Respublikasi Vazirlar Mahkamasi tomonidan tasdiqlangan stavkalarda dastlabki qarorni qabul qilganlik uchun belgilangan miqdorda toʻlanadi.
Bunda, dastlabki qarorni olish uchun YIDXP orqali murojaat qilinganda, mazkur bandda koʻrsatilgan yigʻim boʻyicha toʻlanishi lozim boʻlgan summadan 90 foiz miqdorida toʻlanadi.
YIDXPda bojxona yigʻimini toʻlash imkoniyati yaratiladi.
24. Dastlabki qarorni qabul qilganlik uchun bojxona yigʻimi manfaatdor shaxsning koʻrsatmasiga asosan uning bojxona organi shaxsiy gʻazna hisobvaragʻiga dastlabki tarzda oʻtkazilgan pul mablagʻlaridan ham yechib olinishi mumkin.
25. Manfaatdor shaxs bojxona yigʻimini toʻlaganidan soʻng, oʻzi murojaat qilgan YIDXP yoki veb-sayt orqali arizaning roʻyxat raqamini kiritgan holda dastlabki qarorning elektron shaklini yuklab oladi, shuningdek yozma shaklda murojaat qilingan boʻlsa, dastlabki qarorning elektron yoki qogʻoz shaklini ariza topshirilgan bojxona organidan oladi.
26. Manfaatdor shaxs qabul qilingan dastlabki qaror uchun bojxona yigʻimini oʻttiz kun ichida toʻlamagan taqdirda, bojxona yigʻimi bojxona organi tomonidan sud tartibida undirib olinadi.
27. Qabul qilingan dastlabki qarorlar toʻgʻrisidagi maʼlumotlar manfaatdor shaxslar haqidagi maʼlumotlarning konfidensialligini saqlagan holda veb-saytga avtomatik tarzda joylashtirib boriladi.
5-bob. Dastlabki qarorni qabul qilishni rad etish asoslari
28. Quyidagi hollarda bojxona organi tomonidan dastlabki qarorni qabul qilish rad etiladi:
a) ariza yuzasidan muqaddam aynan bir manfaatdor shaxsga aynan bir xil tovarlar boʻyicha dastlabki qaror berilgan va bunga qadar ushbu dastlabki qarorning amal qilish muddati tugamagan boʻlsa;
b) arizada koʻrsatilgan tovarlarning bojxona qiymatini aniqlash usuli uni tasdiqlash uchun taqdim etilgan maʼlumotlar va hujjatlarga mos emasligi aniqlangan boʻlsa.
v) dastlabki qarorni olish yuzasidan taqdim etilgan arizada koʻrsatilgan tovarlar erkin muomalaga chiqarish bojxona rejimiga rasmiylashtirilgan boʻlsa.
Mazkur bandning “b” kichik bandida nazarda tutilgan hollarda dastlabki qarorni qabul qilishni rad etish manfaatdor shaxs tomonidan bojxona organining mustaqil tarzda bojxona qiymatini va uni aniqlash usulini ketma-ketlikda belgilash orqali arizani koʻrib chiqish taklifiga rozilik bildirmagan yoki uni rad etgan hollarda amalga oshiriladi.
Dastlabki qarorni qabul qilish ushbu bandda nazarda tutilmagan asoslarga koʻra rad etilishiga yoʻl qoʻyilmaydi.
29. Bojxona organi tomonidan dastlabki qarorni qabul qilish rad etilgan taqdirda, bu haqda shu kunning oʻzida manfaatdor shaxsga yozma yoki elektron shaklda xabarnoma yuboriladi. Xabarnomada dastlabki qarorni qabul qilishning rad etilishi sabablari koʻrsatiladi.
30. Manfaatdor shaxs dastlabki qarorni qabul qilishning rad etilishi uchun asos boʻlgan sabablarni bartaraf etgan holda bojxona organiga qaytadan murojaat qilishi mumkin.
6-bob. Dastlabki qarorga oʻzgartirish kiritish va uni bekor qilish
31. Bojxona organlari tomonidan dastlabki qarorni qabul qilishda bojxona qiymati va (yoki) bojxona toʻlovlari miqdoriga taʼsir etgan xatoliklarga yoʻl qoʻyilganligi aniqlangan taqdirda, shuningdek manfaatdor shaxsning arizasiga koʻra yoki qonunchilik hujjatlari oʻzgarishi munosabati bilan amal qilish muddati tugamagan dastlabki qarorga oʻzgartirish kiritilishi mumkin.
Manfaatdor shaxs dastlabki qarorga oʻzgartirish kiritish toʻgʻrisida murojaat qilganda, dastlabki qarorga oʻzgartirish kiritish mazkur Nizomda dastlabki qarorni qabul qilish uchun belgilangan tartibda amalga oshiriladi.
Dastlabki qarorga oʻzgartirish kiritilishi uning amal qilish muddatining oʻzgarishiga olib kelmaydi.
32. Manfaatdor shaxs dastlabki qarorga oʻzgartirish kiritish uchun mazkur Nizomning 2-bobida belgilangan tartibda va shaklda murojaat qiladi hamda oʻzgartirish kiritish zaruriyati va asoslovchi hujjatlarni taqdim etadi.
33. Dastlabki qarorga manfaatdor shaxsning arizasiga asosan oʻzgartirish kiritilganda, dastlabki qaror qabul qilinganligi uchun belgilangan miqdorda bojxona yigʻimi undiriladi.
Dastlabki qarorga bojxona organining tashabbusi bilan oʻzgartirish kiritilgan taqdirda, bojxona yigʻimi undirilmaydi.
34. Dastlabki qarorga oʻzgartirish kiritilganidan soʻng, YIDXP, veb-sayt va Bojxona qoʻmitasi YAAATga joylashtirilgan dastlabki qaror bojxona organi tomonidan uning oʻzgartirilgan holatdagi shakliga almashtirib qoʻyiladi.
35. Dastlabki qarorga kiritilgan oʻzgartirish u kiritilgan kundan boshlab amal qiladi.
36. Manfaatdor shaxs tomonidan dastlabki qarorni olish uchun ataylab notoʻgʻri yoki buzib koʻrsatilgan maʼlumotlar taqdim etilganligi aniqlansa, dastlabki qaror Bojxona qoʻmitasi yoki sud tomonidan bekor qilinadi.
37. Bojxona qoʻmitasi tomonidan dastlabki qarorni bekor qilish haqidagi qaror mazkur Nizomning 4-ilovasiga muvofiq shaklda qabul qilinadi.
Dastlabki qarorni bekor qilish haqidagi qaror qabul qilinganda dastlabki qaror qabul qilingan kundan eʼtiboran bekor qilingan hisoblanadi.
38. Agar bojxona hududi orqali oʻtkazilgan tovarlarning bojxona toʻlovlari bekor qilingan dastlabki qaror asosida haqiqatda toʻlanishi lozim boʻlgan summadan kam toʻlanganligi aniqlansa, toʻlovlarning kam toʻlangan qismi aybdor shaxslardan ixtiyoriy yoki sud tartibida undiriladi.
39. Dastlabki qaror manfaatdor shaxsning aybi bilan bekor qilingan taqdirda, uning uchun toʻlangan bojxona yigʻimi qaytarilmaydi.
40. Dastlabki qarorni bekor qilish haqidagi qaror Bojxona qoʻmitasi YAAATga elektron shaklda joylashtiriladi.
41. Dastlabki qarorga oʻzgartirish kiritish yoki uni bekor qilish haqidagi qaror qabul qilingan kundan keyingi ish kunidan kechiktirmay manfaatdor shaxsga yozma yoki elektron shaklda yetkaziladi.
7-bob. Dastlabki qarorning amal qilish doirasi va muddati
42. Dastlabki qaror qabul qilingan kundan boshlab 90 kalendar kun davomida amal qiladi.
43. Dastlabki qarorda koʻrsatilgan tovarlar bitta tashqi savdo shartnomasi doirasida olib kirilgan taqdirda, dastlabki qaror tashqi savdo shartnomasi muddati tugagunga qadar, biroq qabul qilingan kundan boshlab 90 kalendar kun davomida amal qiladi.
44. Dastlabki qaror asosida Oʻzbekiston Respublikasining istalgan bojxona postida bojxona rasmiylashtiruvi amalga oshiriladi.
Bunda, dastlabki qarorni qabul qilish uchun taqdim etilgan maʼlumotlar va hujjatlar bojxona rasmiylashtiruvida taqdim etilgan hujjatlar bilan bir xil boʻlishi kerak.
45. Bojxona rasmiylashtiruvini amalga oshirish jarayonida bojxona organining xodimlari tomonidan Bojxona qoʻmitasi YAAATdan dastlabki qarorning elektron shakli manfaatdor shaxs taqdim etgan maʼlumotlar (familiya, ism, otasining ismi yoki arizaning roʻyxat raqami) asosida istalgan vaqtda yuklab olinadi.
46. Tovarlar boʻyicha bojxona toʻlovlari dastlabki qaror asosida amalga oshiriladi.
Bunda, dastlabki qarorda keltirilgan bojxona toʻlovlarining miqdori quyidagi hollarda oʻzgarishi mumkinligi inobatga olinadi:
a) valyuta kursining oʻzgarishi natijasida bojxona qiymati miqdorining mos tarzda oʻzgarishi;
b) bojxona toʻlovlari stavkalarining oʻzgarishi;
v) bojxona toʻlovlaridan berilgan imtiyozlarning muddati tugashi yoki bekor qilinishi, bojxona toʻlovlari boʻyicha imtiyoz nazarda tutilgan qonunchilik hujjatiga oʻzgartirish kiritilishi yoxud bojxona toʻlovlaridan imtiyoz nazarda tutilgan qonunchilik hujjati qabul qilinishi.
8-bob. Yakuniy qoidalar
47. Mazkur Nizom talablarining buzilishida aybdor boʻlgan shaxslar qonunchilik hujjatlarida belgilangan tartibda javobgar boʻladi.
48. Manfaatdor shaxslar bojxona organlarining qarorlaridan norozi boʻlgan taqdirda, bevosita Bojxona qoʻmitasining apellyatsiya kengashiga yoki belgilangan tartibda sudga murojaat qilishlari mumkin.
Bojxona organlari tomonidan manfaatdor shaxslardan asossiz ravishda undirilgan mablagʻlar qoplab beriladi.
49. Mazkur Nizom Oʻzbekiston Respublikasi Axborot texnologiyalari va kommunikatsiyalarini rivojlantirish vazirligi va Oʻzbekiston Savdo-sanoat palatasi bilan kelishilgan.
Oʻzbekiston Respublikasiga olib kiriladigan tovarlarga toʻlanishi lozim boʻlgan bojxona toʻlovlari miqdorini aniqlash boʻyicha dastlabki qarorni qabul qilish tartibi toʻgʻrisidagi nizomga 1-ILOVA
Oʻzbekiston Respublikasiga olib kiriladigan tovarlar boʻyicha toʻlanishi lozim boʻlgan bojxona toʻlovlari miqdorini aniqlash boʻyicha DASTLABKI QAROR QR-kod (matrik shtrixli kod ) 1. Dastlabki qarorni roʻyxatga olish raqami va sanasi: 2. Dastlabki qarorni qabul qilgan bojxona organining nomi: 3. Manfaatdor shaxs: 4. Dastlabki qarorning amal qilish muddati: 5. Tovarning Tashqi iqtisodiy faoliyat tovar nomenklaturasiga muvofiq kodi: 6. Tovarlar nomi va tavsifi: (tovarning asosiy texnik-tijorat tavsiflari ( markasi, modeli, artikuli, modifikatsiyasi), ishlab chiqaruvchisi, ishlab chiqarilgan mamlakati va boshqa xususiyatlari toʻgʻrisidagi maʼlumot, netto vazni, brutto vazni, shartnoma valyutasi, yuk joʻnatuvchi mamlakat, savdo qiluvchi mamlakat, ishlab chiqaruvchi va h.k.) 7. Tovarlarning bojxona qiymatini aniqlash usuli va uni asoslash: 8. Tovarlarning kelib chiqish mamlakati va uni asoslash: 9. Bojxona toʻlovlari va yigʻimlari toʻgʻrisida maʼlumot: 10. Dastlabki qarorni qabul qilish asoslari: 11. Manfaatdor shaxs tomonidan taqdim qilingan maʼlumotlar va hujjatlar roʻyxati: 12. Qoʻshimcha maʼlumotlar: 13. Bojxona organining mansabdor shaxsi _____________________ Lavozim (elektron raqamli imzo) _________________________ Familiya, ism, otasining ismi
Oʻzbekiston Respublikasiga olib kiriladigan tovarlarga toʻlanishi lozim boʻlgan bojxona toʻlovlari miqdorini aniqlash boʻyicha dastlabki qarorni qabul qilish tartibi toʻgʻrisidagi nizomga 2-ILOVA
Oʻzbekiston Respublikasiga olib kiriladigan tovarlar boʻyicha toʻlanishi lozim boʻlgan bojxona toʻlovlarini aniqlashda dastlabki qaror qabul qilish toʻgʻrisida ARIZA ______________ (sana) ______________ (raqam) I. Tovarlar yoki transport vositasining egasi toʻgʻrisidagi maʼlumot 1.1 Tovarlar yoki transport vositasi egasi boʻlgan yuridik shaxsning toʻliq nomi yoki jismoniy shaxsning F.I.O. 1.2 Pochta manzili (Pochta indeksi) 1.3 Tashkiliy-huquqiy shakli 1.4 STIR yoki jismoniy shaxsning shaxsiy identifikatsiya (JSHSHIR) raqami hamda shaxsni tasdiqlovchi hujjat seriyasi va raqami 1.5 Davlat roʻyxatidan oʻtgan raqami va sanasi 1.6 Telefon raqami II. Tovarlar yoki transport vositasi egasining nomidan ariza topshiruvchi vakolatli shaxs toʻgʻrisidagi maʼlumot (ariza vakolatli shaxs tomonidan taqdim etilganda) 2.1 Vakolatli shaxsning JSHSHIR hamda shaxsni tasdiqlovchi hujjat seriyasi va raqami 2.2. Vakolatini tasdiqlovchi hujjat sanasi va raqami * III. Dastlabki qarorni qabul qilish uchun tovarlar haqidagi maʼlumotlar 3.1 Tovarlarning savdo, tijorat nomi va toʻliq tavsifi, savdo belgisi, asosiy texnik-tijorat tavsiflari (markasi, modeli, artikuli, modifikatsiyasi), navi, standartlari, bajaradigan funksiyalari, texnik va tijorat xususiyatlari 3.2 Tovarlar haqida maʼlumot (TIF TNga muvofiq tovarlarning kodi, savdo qiluvchi mamlakat, yuk joʻnatuvchi va kelib chiqish mamlakati, yuk joʻnatuvchi, sotuvchi, tovar ishlab chiqaruvchi, tovarning brutto/netto ogʻirliklari hamda asosiy va (yoki) qoʻshimcha oʻlchov birliklaridagi � iqdori 3.3 Tovarlarning narxi, valyutasi va valyuta kodi koʻrsatilgan holda 3.4 Tovarlarni tashish uchun ishlatiladigan xalqaro transport vositasining turi 3.5 Oʻramga ega boʻlgan tovarlar uchun — tovar egallagan yuk joylarining umumiy soni, tovar oʻrami turi va oʻramlar miqdori 3.6 Tashqi savdo shartnomasi (mavjud boʻlsa), tovarlarni yetkazib berish shartlari 3.7 Tovarlarning bojxona qiymatini aniqlash usuli 3.8 Bojxona qiymatini aniqlashning avvalgi usullari qoʻllanilmasligining sabablari 3.9 Ilgari qabul qilingan dastlabki qaror haqidagi maʼlumotlar (agar mavjud boʻlsa) 3.10 Tovarlarning bojxona qiymatini aniqlash uchun muhim boʻlgan qoʻshimcha maʼlumotlar 3.11 Ilova qilinadigan hujjatlar ** 3.12 Tovarning bojxona qiymatini koʻrsatmagan, shuningdek tegishli hujjatlar va maʼlumotlarni ilova qilmagan holda taqdim etiladigan ariza ***
Oʻzbekiston Respublikasiga olib kiriladigan tovarlarga toʻlanishi lozim boʻlgan bojxona toʻlovlari miqdorini aniqlash boʻyicha dastlabki qarorni qabul qilish tartibi toʻgʻrisidagi nizomga 3-ILOVA
Oʻzbekiston Respublikasiga olib kiriladigan tovarlar boʻyicha toʻlanishi lozim boʻlgan bojxona toʻlovlarini aniqlashda manfaatdor shaxs tomonidan taqdim etiladigan hujjatlar (maʼlumotlar) ROʻYXATI * I. Olib kiriladigan tovarga doir bitimning qiymati boʻyicha 1.1 Tashqi savdo operatsiyalarining yagona elektron axborot tizimi tomonidan biriktirilgan tashqi savdo kontrakti (shartnoma, kelishuv) va identifikatsiya raqami 1.2 Tashqi savdo kontraktida (shartnomasida, kelishuvida) belgilangan bitim shartlaridan kelib chiqib, maʼlum qilingan narxga tuzatishlar kiritish lozim boʻlganda 1.2.1 sugʻurta hujjatlari 1.2.2 tovarning tashish va (yoki) yuklash, tushirish, qayta yuklash, boshqa joyga toʻkish boʻyicha shartnomasi (transport ekspeditsiya shartnomasi), tovarni tashishga, yuklash, tushirish, qayta yuklash, boshqa joyga toʻkishga hisobvaraq-faktura (invoys), bank hujjatlari (agar hisobvaraq-faktura (invoys) toʻlangan boʻlsa), transport tariflari toʻgʻrisidagi hujjatlar (maʼlumotlar) yoki tashish qiymatini aks ettiruvchi buxgalterlik hujjatlari (agar sotib oluvchi oʻzining transportida tovarni tashishni amalga oshirgan boʻlsa) 1.2.3 vositachilik xizmatlarini koʻrsatish toʻgʻrisidagi shartnoma (vositachilik shartnomasi, brokerlik xizmatlarini koʻrsatish toʻgʻrisidagi shartnoma), vositachilik xizmatlarini koʻrsatish uchun hisobvaraq-faktura (invoys), bank toʻlov hujjatlari 1.2.4 litsenzion va (yoki) mualliflik kelishuvi, hisobvaraq-faktura (invoys), bank toʻlov hujjatlari, olib kelinayotgan (olib kelingan) tovarga taalluqli boʻlgan intellektual mulk obyektlaridan foydalanganlik uchun toʻlovlar toʻgʻrisidagi maʼlumotlarni oʻz ichiga olgan buxgalterlik va boshqa hujjatlar 1.2.5 olib kirilgan tovarni keyinchalik qayta sotish, undan foydalanish yoki uni tasarruf etishdan sotuvchiga bevosita yoki bilvosita oʻtadigan tushumning istalgan qismi toʻgʻrisidagi maʼlumotlarni oʻz ichiga olgan hujjat (shu jumladan, buxgalterlik) va maʼlumotlar 1.2.6 konteyner va (yoki) koʻp marta ishlatiladigan boshqa idishlarning, oʻrov-joylov materiallarining va oʻrash-joylash ishlarining, agar mazkur xarajatlar sotib oluvchi tomonidan amalga oshirilgan, biroq olib kiriladigan tovar uchun amalda toʻlangan yoki toʻlanishi lozim boʻlgan narxga qoʻshilmagan qiymat toʻgʻrisidagi shartnomalar, hisobvaraqlar, bank toʻlov hujjatlari 1.2.7 sotuvchi tomonidan sotib oluvchiga muayyan tovar turkumi uchun chegirma berish asosini, ularning miqdorini koʻrsatuvchi maʼlumotlar 1.3 Agar maʼlum qilingan bojxona qiymati oxirgi toʻqson kalendar kun ichida olib kirilib, 1-usulda qabul qilingan tovarning bojxona qiymatidan past boʻlsa: 1.3.1 Joʻnatuvchi mamlakat bojxona deklaratsiyasi ** 1.3.2 Tovarni yetkazib berilishiga aloqador boʻlgan uchinchi shaxslar bilan kontraktlar va ular uchun toʻlov hisoblari *** 1.8 Bitim taraflarining oʻzaro bogʻliqligi olib kiriladigan tovarlar bilan tuzilgan bitim qiymatiga taʼsir qilmaganligini tasdiqlash maqsadida ixtiyoriy ravishda: 1.8.1 aynan bir xil yoki oʻxshash tovarlar sotuvchi bilan oʻzaro bogʻliq boʻlmagan sotib oluvchilarga Oʻzbekiston Respublikasi bojxona hududiga olib chiqish uchun sotilganda, uning qiymatini tasdiqlovchi hujjatlar 1.8.2 Bojxona qiymati 4 yoki 5-usullar bilan aniqlangan aynan bir xil yoki oʻxshash tovarlarning bojxona qiymatini tasdiqlovchi hujjatlar II. Aynan bir xil tovarga doir bitimning qiymati boʻyicha hamda oʻxshash tovarga doir bitimning qiymati boʻyicha 2.1 Bojxona organi tomonidan qabul qilingan va bojxona qiymati Bojxona kodeksining 303-moddasi boʻyicha aniqlangan holda chiqarilgan aynan bir xil va oʻxshash tovarlarga tegishli boʻlgan bojxona deklaratsiyasi roʻyxat raqami va unga tegishli tovar tartib raqami 2.2 Qiymatga tuzatishlar kiritish amalga oshirilishi lozim boʻlgan hollarda tovarni Oʻzbekiston Respublikasi bojxona hududiga olib kiriladigan joyga yetkazib berilgunga qadar qilinadigan xarajatlarni tasdiqlovchi hujjat va maʼlumotlar **** 2.2.2 hisobvaraq-faktura (invoys) III. Qiymatlarni chegirib tashlash asosida 3.1 Oʻzbekiston Respublikasi bojxona hududida baholanayotgan, aynan bir xil va oʻxshash tovarlarni sotilganligi toʻgʻrisidagi shartnomalar 3.2 Oʻzbekiston Respublikasi bojxona hududida oʻsha klassdagi va turdagi tovarlarni sotishda qoʻyilgan hisobvaraq-faktura (invoys) 3.3 Oʻzbekiston Respublikasi bojxona hududiga tovarni olib kirish va sotish bilan bogʻliq boʻlgan xarajatlarni aks ettiruvchi hisobvaraq-faktura, bank hujjatlari (agar hisobvaraq-fakturalar toʻlangan boʻlsa), buxgalterlik hujjatlari (vositachi haqlari toʻgʻrisida, tijorat xarajatlari, tashish xarajatlari, sugʻurta, yuklash va tushirish ishlari, olinadigan daromad) 3.4 Tovarga ishlov berish natijasida qoʻshilgan qiymat toʻgʻrisidagi maʼlumot va hujjatlar, agar bunday tovar unga keyinchalik ishlov berilgandan keyin sotilayotgan boʻlsa, ishlov berish boʻyicha pullik xizmat koʻrsatish shartnomasi, buyurtmachiga ijrochi tomonidan qoʻyilgan hisobvaraq-faktura (invoys), ushbu shartnomani toʻlash boʻyicha bank hujjatlari, ishlov berish qiymati toʻgʻrisida buxgalterlik hujjatlari (kalkulyatsiya) 3.5 Muqaddam Oʻzbekiston Respublikasi bojxona hududiga tovarlarni olib kirish va (yoki) sotish munosabati bilan Oʻzbekiston Respublikasida bojxona boji, soliqlar, yigʻimlar va boshqa toʻlovlarni toʻlanganligi toʻgʻrisidagi hujjatlar IV. Qiymatlarni qoʻshish asosida 4.1 Ishlab chiqarish uchun qilingan xarajatlar hamda materiallarni sotib olish va (yoki) baholanayotgan tovarlarni ishlab chiqarish boʻyicha ishlab chiqaruvchi (sotuvchi) xarajatlari toʻgʻrisidagi maʼlumotlarni oʻz ichiga olgan buxgalterlik hujjatlari, shuningdek, baholanayotgan (olib kiriladigan) tovarni ishlab chiqarish bilan bogʻliq boʻlgan boshqa operatsiyalar, shu jumladan, idish va oʻrash-joylash uchun qilingan xarajatlar, shu bilan birga, Oʻzbekiston Respublikasi bojxona hududidan tashqarida bajarilgan loyihalashning, tajriba-konstruktorlik ishlarining, badiiy bezatishning, dizaynning, eskizlarning yoki chizmalarning qiymatlari ishlab chiqaruvchi toʻlaganligi umumeʼtirof etilgan buxgalterlik hisobi tamoyillariga muvofi? tuzilgan baholanayotgan tov?r ishlab chiqaruvchisining tijorat hisobvaraqlari 4.2 Ishlab chiqaruvchi va (yoki) eksportyorning baholanayotgan tovar ishlab chiqarilgan ayni oʻsha mamlakatda ishlab chiqarilgan, ayni oʻsha klassdagi va turdagi tovarni Oʻzbekiston Respublikasida sotishda odatda eksport qiluvchi tomonidan olinadigan foyda va Bojxona kodeksining 312-moddasi “a” kichik bandida aks ettirilmagan umumiy xarajatlarning hajmi toʻgʻrisidagi maʼlumotlarni oʻz ichiga olgan buxgalterlik hujjatlari; 4.3 Tashqi savdo kontraktida (shartnomasida, kelishuvida) belgilangan bitim shartlariga muvofiq sugʻurta hujjatlari 4.4 Tashish uchun hisobvaraq-faktura (invoys) (tashish xarajatlari kalkulyatsiyasi), Oʻzbekiston Respublikasining bojxona hududiga olib kiriladigan joyga yetkazib berilgunga qadar qilinadigan xarajatlarni tasdiqlovchi hujjatlar V. Zaxira usul 5.1 Agar olib kirilgan tovarning hujjatlarda koʻrsatilgan narx boʻyicha hisoblanishi uchun: 5.1.1 olib kiriladigan tovarlarning qiymatini yoki qiymatini hisoblab chiqarish toʻgʻrisidagi maʼlumotlarni oʻz ichiga olgan ijara, lizing, ayirboshlash, hadya qilish shartnomalari 5.1.2 yetkazib berish shartidan kelib chiqib, mazkur Roʻyxatning 1.2-bandida (1.2.1 — 1.2.7-bandlar) koʻrsatilgan hujjatlar 5.2 Agar aniq bir manbadagi narxga havola qilingan boʻlsa, quyidagilardan biri 5.2.1 baholanayotgan tovar bilan aynan bir xil yoki oʻxshash tovarlarning Oʻzbekiston Respublikasi bojxona hududiga olib kirilgan bir vaqtda yoki tegishli davrda jahon bozorida sotilishi yoki sotilishi taklif qilingan narxlar toʻgʻrisidagi maʼlumotlarni oʻz ichiga olgan mustaqil ommaviy axborot manbalarining birinchi (maʼlumot manbasining nomi va sanasi koʻrsatilgan muqova) va tegishli varaqlarining nusxalari 5.2.2 Tovarlarning rasmiy narxlari eʼlon qilinadigan yoki tarqatiladigan yoki aniq tovarlar yetkazib beruvchilarning narxlar toʻgʻrisidagi tijorat takliflari, shuningdek jahon birja kotirovkalari 5.2.3 Muqaddam bojxona organida rasmiylashtirilgan bojxona yuk deklaratsiyasi va tegishli tovar raqami 5.3 Agar tovarning ichki bozorda sotilayotgan narxiga havola qilingan boʻlsa, Oʻzbekiston Respublikasining qonunchilik hujjatlariga muvofiq faoliyat yuritayotgan baholovchi tashkilotlar tomonidan tayyorlangan olib kiriladigan tovarlarni baholash hisobotlari
Oʻzbekiston Respublikasiga olib kiriladigan tovarlarga toʻlanishi lozim boʻlgan bojxona toʻlovlari miqdorini aniqlash boʻyicha dastlabki qarorni qabul qilish tartibi toʻgʻrisidagi nizomga 4-ILOVA
Oʻzbekiston Respublikasiga olib kiriladigan tovarlar boʻyicha toʻlanishi lozim boʻlgan bojxona toʻlovlari toʻgʻrisidagi dastlabki qarorni bekor qilish haqida QAROR QR kod (matrik shtrixli kod) 1. Dastlabki qarorni bekor qilish haqida qaror qabul qilgan bojxona organi 2. Manfaatdor shaxs haqida maʼlumot 3. Dastlabki qarorni bekor qilish haqidagi qaror qabul qilingan sana 4. Bekor qilingan dastlabki qarorning roʻyxatga olish raqami va sanasi 5. Bekor qilingan dastlabki qarorda koʻrsatilgan tovar nomi 6. Dastlabki qarorni bekor qilish haqida qaror qabul qilishning asoslari va sabablari 7. Dastlabki qarorni bekor qilish haqidagi qaror kuchga kiradigan sana 8. Dastlabki qarorni bekor qilish haqidagi qaror qabul qilgan Iqtisodiyot va moliya vazirligi huzuridagi Bojxona qoʻmitasining mansabdor shaxsi _____________________ Lavozim (elektron raqamli imzo) ____________________________ Familiya, ism, otasining ismi
Rais M. AZIMOV
Oʻzbekiston Respublikasi Axborot texnologiyalari va kommunikatsiyalarini rivojlantirish vazirining birinchi oʻrinbosari O. PEKOS
Oʻzbekiston Savdo-sanoat palatasi raisi A. IKRAMOV
Toshkent sh.,
2021-yil 10-noyabr,
2021-yil 9-noyabr
2021-yil 9-noyabr
01-02/8-51-son