📅 2021-yil 28-dekabr · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2021 йил 28 декабрь · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 28 декабря 2021 г. · Постановления Кабинета Министров
Официальный текст. Официальный документ. Редакционные примечания не включены.
📅 28 December 2021 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
Сариосиё туманида қурилиш материаллари ишлаб чиқариш салоҳиятини оширишга доир қўшимча чора-тадбирлар тўғрисида
Сурхондарё вилоятининг Сариосиё туманини ижтимоий-иқтисодий ривожлантириш, ҳудудда тадбиркорлик фаолияти учун қулай шарт-шароитлар яратиш, замонавий қурилиш материаллари ишлаб чиқаришни ташкил этишда инвестицияларни фаол жалб қилиш, янги рақобатбардош қурилиш материаллари ишлаб чиқаришларини ва тадбиркорлик субъектларини ривожлантиришни янада қўллаб-қувватлаш, аҳолининг бандлиги ва даромадларини ошириш ҳамда янги иш ўринлари ташкил этиш мақсадида Вазирлар Маҳкамаси қарор қилади:
1.Ўзбекистон Республикаси Президентининг «Ҳудудларнинг саноат салоҳиятини оширишга доир қўшимча чора-тадбирлар тўғрисида» 2021 йил 9 июндаги ПФ-6244-сон Фармонига асосан қурилиш материаллари ишлаб чиқаришга ихтисослашган туманларда зарур ер участкаларини ажратган ҳолда, шу жумладан, «Ўзсаноатқурилишбанк» АТБ ҳузуридаги «PSB Capital» МЧЖ инвестиция компанияси иштирокида, қурилиш материаллари ишлаб чиқариш лойиҳаларини амалга ошириш мақсадида «кичик саноат зоналари»ни ташкил этиш тўғрисидаги таклифлари маъқулланганлиги маълумот учун қабул қилинсин.
2. Сурхондарё вилояти ҳокимлигининг Ўзбекистон Республикаси Инвестициялар ва ташқи савдо вазирлиги, Иқтисодий тараққиёт ва камбағалликни қисқартириш вазирлиги билан биргаликда Сурхондарё вилояти, Сариосиё тумани «Анорзор» МФЙ ҳудудидаги Сариосиё тумани ҳокимлиги захирасида бўлган, қишлоқ хўжалигига мўлжалланмаган 10,0 гектар ер майдонида қурилиш материаллари ишлаб чиқаришга ихтисослашган «Анорзор» кичик саноат зонасини (кейинги ўринларда — «Анорзор» кичик саноат зонаси) ташкил этиш тўғрисидаги таклифига розилик берилсин.
3. Белгилансинки, «Анорзор» кичик саноат зонаси ҳудудидаги ер участкалари импорт ўрнини босувчи ва экспортга йўналтирилган гипс буюмлар, темир-бетон буюмлари, табиий бўёқлар, сэндвич-панеллар ҳамда бошқа турдаги қурилиш материаллари ишлаб чиқариш учун тадбиркорлик субъектларига «E-auksion» савдо майдончасида электрон онлайн-аукцион орқали реализация қилинади.
4. «Анорзор» кичик саноат зонасида инвесторлар билан ҳамкорликда «Ўзсаноатқурилишбанк» АТБ ўзининг инвестиция компанияси «SQB Capital» масъулияти чекланган жамияти ва унинг иштирокида таъсис этилган «SQB Construction» масъулияти чекланган жамиятларга инвестиция киритиш орқали қурилиш материаллари ишлаб чиқариш лойиҳаларини амалга ошириш тўғрисидаги таклифига розилик берилсин.
5. Кичик саноат зоналарида муҳандислик-коммуникация тармоқлари билан таъминлаш бўйича амалга ошириладиган чора-тадбирлар ва молиялаштириш манбалари Ўзбекистон Республикаси Президентининг «Ҳудудларда муҳандислик-коммуникация инфратузилмасини янада ривожлантириш чора-тадбирлари тўғрисида» 2020 йил 18 декабрдаги ПҚ-4929-сон қарори билан белгиланганлиги маълумот учун қабул қилинсин.
6. Сурхондарё вилояти ҳокимлиги:
Инвестиция ва ташқи савдо вазирлиги, «Ўзсаноатқурилишбанк» АТБ билан биргаликда бир ой муддатда «Анорзор» кичик саноат зонаси ҳудудида жойлаштириш учун таклиф этилаётган инвестиция лойиҳаларини амалга оширишнинг тармоқ жадвалларини ишлаб чиқсин ва Вазирлар Маҳкамасига киритилишини;
Қурилиш вазирлиги билан биргаликда кичик саноат зонасида қуриладиган объектлар бўйича лойиҳа-смета ҳужжатлари белгиланган тартибда давлат экспертизасидан ўтказилиши ва қурилиш-монтаж ишларининг сифатли бажарилиши устидан давлат назорати ўрнатилишини таъминласин.
7. Мазкур қарорнинг бажарилишини назорат қилиш Ўзбекистон Республикаси Бош вазирининг инвестициялар ва ташқи иқтисодий алоқалар масалалари бўйича ўринбосари — инвестициялар ва ташқи савдо вазири С.У. Умурзаков ва Сурхондарё вилояти ҳокими Т.А. Боболов зиммасига юклансин.
Ўзбекистон Республикасининг Бош вазири А. АРИПОВ
Тошкент ш.,
2021 йил 28 декабрь,
782-сон
Oʻzbekiston Respublikasi Vazirlar Mahkamasining
qarori
Sariosiyo tumanida qurilish materiallari ishlab chiqarish salohiyatini oshirishga doir qoʻshimcha chora-tadbirlar toʻgʻrisida
Surxondaryo viloyatining Sariosiyo tumanini ijtimoiy-iqtisodiy rivojlantirish, hududda tadbirkorlik faoliyati uchun qulay shart-sharoitlar yaratish, zamonaviy qurilish materiallari ishlab chiqarishni tashkil etishda investitsiyalarni faol jalb qilish, yangi raqobatbardosh qurilish materiallari ishlab chiqarishlarini va tadbirkorlik subyektlarini rivojlantirishni yanada qoʻllab-quvvatlash, aholining bandligi va daromadlarini oshirish hamda yangi ish oʻrinlari tashkil etish maqsadida Vazirlar Mahkamasi qaror qiladi:
1.Oʻzbekiston Respublikasi Prezidentining “Hududlarning sanoat salohiyatini oshirishga doir qoʻshimcha chora-tadbirlar toʻgʻrisida” 2021-yil 9-iyundagi PF-6244-son Farmoniga asosan qurilish materiallari ishlab chiqarishga ixtisoslashgan tumanlarda zarur yer uchastkalarini ajratgan holda, shu jumladan, “Oʻzsanoatqurilishbank” ATB huzuridagi “PSB Capital” MCHJ investitsiya kompaniyasi ishtirokida, qurilish materiallari ishlab chiqarish loyihalarini amalga oshirish maqsadida “kichik sanoat zonalari”ni tashkil etish toʻgʻrisidagi takliflari maʼqullanganligi maʼlumot uchun qabul qilinsin.
2. Surxondaryo viloyati hokimligining Oʻzbekiston Respublikasi Investitsiyalar va tashqi savdo vazirligi, Iqtisodiy taraqqiyot va kambagʻallikni qisqartirish vazirligi bilan birgalikda Surxondaryo viloyati, Sariosiyo tumani “Anorzor” MFY hududidagi Sariosiyo tumani hokimligi zaxirasida boʻlgan, qishloq xoʻjaligiga moʻljallanmagan 10,0 gektar yer maydonida qurilish materiallari ishlab chiqarishga ixtisoslashgan “Anorzor” kichik sanoat zonasini (keyingi oʻrinlarda — “Anorzor” kichik sanoat zonasi) tashkil etish toʻgʻrisidagi taklifiga rozilik berilsin.
3. Belgilansinki, “Anorzor” kichik sanoat zonasi hududidagi yer uchastkalari import oʻrnini bosuvchi va eksportga yoʻnaltirilgan gips buyumlar, temir-beton buyumlari, tabiiy boʻyoqlar, sendvich-panellar hamda boshqa turdagi qurilish materiallari ishlab chiqarish uchun tadbirkorlik subyektlariga “E-auksion” savdo maydonchasida elektron onlayn-auksion orqali realizatsiya qilinadi.
4. “Anorzor” kichik sanoat zonasida investorlar bilan hamkorlikda “Oʻzsanoatqurilishbank” ATB oʻzining investitsiya kompaniyasi “SQB Capital” masʼuliyati cheklangan jamiyati va uning ishtirokida taʼsis etilgan “SQB Construction” masʼuliyati cheklangan jamiyatlarga investitsiya kiritish orqali qurilish materiallari ishlab chiqarish loyihalarini amalga oshirish toʻgʻrisidagi taklifiga rozilik berilsin.
5. Kichik sanoat zonalarida muhandislik-kommunikatsiya tarmoqlari bilan taʼminlash boʻyicha amalga oshiriladigan chora-tadbirlar va moliyalashtirish manbalari Oʻzbekiston Respublikasi Prezidentining “Hududlarda muhandislik-kommunikatsiya infratuzilmasini yanada rivojlantirish chora-tadbirlari toʻgʻrisida” 2020-yil 18-dekabrdagi PQ-4929-son qarori bilan belgilanganligi maʼlumot uchun qabul qilinsin.
6. Surxondaryo viloyati hokimligi:
Investitsiya va tashqi savdo vazirligi, “Oʻzsanoatqurilishbank” ATB bilan birgalikda bir oy muddatda “Anorzor” kichik sanoat zonasi hududida joylashtirish uchun taklif etilayotgan investitsiya loyihalarini amalga oshirishning tarmoq jadvallarini ishlab chiqsin va Vazirlar Mahkamasiga kiritilishini;
Qurilish vazirligi bilan birgalikda kichik sanoat zonasida quriladigan obyektlar boʻyicha loyiha-smeta hujjatlari belgilangan tartibda davlat ekspertizasidan oʻtkazilishi va qurilish-montaj ishlarining sifatli bajarilishi ustidan davlat nazorati oʻrnatilishini taʼminlasin.
7. Mazkur qarorning bajarilishini nazorat qilish Oʻzbekiston Respublikasi Bosh vazirining investitsiyalar va tashqi iqtisodiy aloqalar masalalari boʻyicha oʻrinbosari — investitsiyalar va tashqi savdo vaziri S.U. Umurzakov va Surxondaryo viloyati hokimi T.A. Bobolov zimmasiga yuklansin.
Oʻzbekiston Respublikasining Bosh vaziri A. ARIPOV
Toshkent sh.,
2021-yil 28-dekabr,
782-son