UzbekAI

Ўзбекистон Республикаси Вазирлар Маҳкамасининг

қарори

ТУЗИЛМАСИ

УСТАВ

РЎЙХАТИ

Ўзбекистон Республикаси Давлат божхона қўмитасининг Марказий божхона лабораторияси фаолиятини ташкил этиш чора-тадбирлари тўғрисида

Ўзбекистон Республикаси Президентининг «Божхона тартиб-таомилларини соддалаштириш ва давлат божхона хизмати органлари ташкилий тузилмасини янада такомиллаштириш тўғрисида» 2021 йил 10 сентябрдаги ПФ-6310-сон Фармонига мувофиқ, шунингдек, ташқи иқтисодий фаолиятни амалга ошириш жараёнида тадбиркорлик субъектлари учун қулай шарт-шароитлар яратиш ҳамда Ўзбекистон Республикаси Давлат божхона қўмитаси Марказий божхона лабораториясининг фаолиятини самарали ташкил этиш мақсадида Вазирлар Маҳкамаси қарор қилади:

1. Ўзбекистон Республикаси Президентининг «Божхона тартиб-таомилларини соддалаштириш ва давлат божхона хизмати органлари ташкилий тузилмасини янада такомиллаштириш тўғрисида» 2021 йил 10 сентябрдаги ПФ-6310-сон Фармонига мувофиқ божхона органларининг умумий чекланган штатлар сони доирасида Ўзбекистон Республикаси Давлат божхона қўмитаси тизимида алоҳида юридик шахс мақомига эга бўлган Марказий божхона лабораторияси ташкил этилганлиги маълумот учун қабул қилинсин.

2. Қуйидагилар:

а) Ўзбекистон Республикаси Давлат божхона қўмитаси Марказий божхона лабораториясининг тузилмаси 1-иловага мувофиқ;

б) қуйидагиларни назарда тутувчи Ўзбекистон Республикаси Давлат божхона қўмитаси Марказий божхона лабораторияси тўғрисидаги устав 2-иловага мувофиқ:

Ўзбекистон Республикаси Давлат божхона қўмитаси Марказий божхона лабораториясининг (кейинги ўринларда — Марказий божхона лабораторияси) мақоми, асосий вазифалари ва функциялари;

Марказий божхона лабораториясининг ҳуқуқлари, мажбуриятлари ҳамда Лаборатория бошлиғининг асосий функционал мажбуриятлари;

Марказий божхона лабораториясининг фаолиятини ташкил этиш ва уни молиялаштириш тартиби;

Ўзбекистон Республикаси Давлат божхона қўмитасининг Марказий божхона лабораториясини халқаро молия ва бошқа институтлар, хорижий ташкилотларнинг грантларини жалб қилган ҳолда, шунингдек, бюджетдан ташқари маблағлари ҳисобидан сотиб олинадиган замонавий лаборатория-технологик ускуналар ва инвентарлар рўйхати 3-иловага мувофиқ тасдиқлансин.

3. Белгилансинки:

Марказий божхона лабораторияси давлат муассасаси шаклидаги юридик шахс ҳисобланади;

Марказий божхона лабораторияси бошлиғи мақоми, меҳнатга ҳақ тўлаш ва транспорт хизмати кўрсатиш шароитларига кўра Ўзбекистон Республикаси Давлат божхона қўмитаси марказий аппаратининг бош бошқарма бошлиғига, бошлиқ ўринбосарлари эса Ўзбекистон Республикаси Давлат божхона қўмитаси марказий аппаратининг бош бошқарма бошлиғи ўринбосарига тенглаштирилади;

Марказий божхона лабораторияси ходимларига Ўзбекистон Республикаси Давлат божхона қўмитаси марказий аппарати ходимлари учун белгиланган моддий рағбатлантириш ва меҳнатга ҳақ тўлаш шартлари татбиқ этилади;

Ўзбекистон Республикасининг республика бюджети маблағлари, Ўзбекистон Республикаси Давлат божхона қўмитасининг бюджетдан ташқари маблағлари, халқаро молия институтлари ва хорижий молия ташкилотларининг грантлари, шунингдек, қонунчилик ҳужжатлари билан тақиқланмаган бошқа манбалар Марказий божхона лабораторияси фаолиятини молиялаштириш манбалари ҳисобланади;

Марказий божхона лабораторияси томонидан жисмоний ва юридик шахсларга кўрсатиладиган пулли хизматлар турлари ва тўловлар миқдорлари Ўзбекистон Республикаси Давлат божхона қўмитаси томонидан белгиланади, хорижий давлатлар божхона хизмати органларига халқаро шартномалар доирасида кўрсатиладиган хизматлар бундан мустасно.

4. Марказий божхона лабораторияси Ўзбекистон Республикаси Давлат божхона қўмитасига тегишли бўлган Тошкент шаҳри, Ислом Каримов кўчаси, 3-уй манзилидаги бинога жойлаштирилсин.

Ўзбекистон Республикаси Давлат божхона қўмитаси Марказий божхона лабораториясини унинг фаолиятини самарали амалга ошириш учун зарур бўлган офис жиҳозлари, асбоб ва ускуналар (лаборатория жиҳозлари, анжомлари, қурилмалар, реактивлар, эҳтиёт қисмлар, компьютер, принтер ва алоқа жамламалари, мебель ва бошқалар) билан таъминлаш чораларини кўрсин.

5. Жисмоний ва юридик шахсларга ҳамда хорижий давлатларнинг божхона хизмати органларига пулли хизматлар кўрсатишдан тушадиган маблағлар тўлиқ ҳажмда Марказий божхона лабораториясини ривожлантириш жамғармасига ўтказилади.

6. Мазкур қарорнинг бажарилишини назорат қилиш Ўзбекистон Республикаси Бош вазирининг молия-иқтисодиёт ва камбағалликни қисқартириш масалалари бўйича ўринбосари — иқтисодий тараққиёт ва камбағалликни қисқартириш вазири Ж.А. Қўчқоров ҳамда Ўзбекистон Республикаси Давлат божхона қўмитаси раиси А.Ю. Мавлонов зиммасига юклансин.

Вазирлар Маҳкамасининг 2021 йил 30 декабрдаги 790-сон қарорига 1-ИЛОВА

Ўзбекистон Республикаси Давлат божхона қўмитаси Марказий божхона лабораториясининг

Марказий божхона лабораторияси бошлиғи Марказий божхона лабораторияси бошлиғи ўринбосари — Экспертиза бошқармаси бошлиғи 1 Марказий божхона лабораторияси бошлиғи ўринбосари — Ташқи иқтисодий фаолият товар номенклатураси бошқармаси бошлиғи 1 Жисмоний ва юридик шахсларга хизмат кўрсатиш бўлими 3 Тиббий хизмат 2 Божхона экспертизаси бўлими 3 Суд экспертизаси бўлими 3 Классификация маркази 3 Молия-иқтисодиёт гуруҳи 1 Аналитик қурилмаларга техник хизмат кўрсатиш гуруҳи 1 Ташқи иқтисодий фаолият товар номенклатурасини юритиш бўлими 3 Бош юристконсульт 1 Моддий-техник таъминот, ёнғин ва техника хавфсизлиги гуруҳи 1

Жами штат бирлиги (мутахассис, ёрдамчи ва хизмат кўрсатувчи ходимларни ҳисобга олмаган ҳолда) — 24 та Мутахассис, ёрдамчи ва хизмат кўрсатувчи ходимлар. Шу жумладан : — 17 та халқаро ҳамкорлик бўйича мутахассис (Ягона тариф сеткаси бўйича 9-разряд) — 1 та товарларни сертификатлаш бўйича мутахассис (Ягона тариф сеткаси бўйича 9-разряд) — 2 та жисмоний ва юридик шахсларга хизмат кўрсатиш бўйича мутахассис (Ягона тариф сеткаси бўйича 9-разряд) — 4 та рентгенолаборант (Ягона тариф сеткаси бўйича 8-разряд) — 1 та лаборант (Ягона тариф сеткаси бўйича 8-разряд) — 6 та иш юритувчи (Ягона тариф сеткаси бўйича 6-разряд) — 1 та бухгалтер-кассир (Ягона тариф сеткаси бўйича 4-разряд) — 1 та енгил автомобиль ҳайдовчиси (Ягона тариф сеткаси бўйича 1 — 3-разряд) — 1 та

Вазирлар Маҳкамасининг 2021 йил 30 декабрдаги 790-сон қарорига 2-ИЛОВА

Ўзбекистон Республикаси Давлат божхона қўмитаси Марказий божхона лабораторияси тўғрисида

1-боб. Умумий қоидалар

1. Мазкур Устав Ўзбекистон Республикаси Давлат божхона қўмитаси Марказий божхона лабораториясининг (кейинги ўринларда — МБЛ) мақоми, асосий вазифалари, функциялари, ҳуқуқлари ва мажбуриятларини, шунингдек, фаолиятини ташкил этиш тартибини белгилайди.

2. МБЛ божхона органларида божхона ва суд экспертизаларини амалга оширадиган ҳамда ўз соҳасида илмий-амалий фаолият билан шуғулланадиган Ўзбекистон Республикаси Давлат божхона қўмитасининг (кейинги ўринларда — ДБҚ) бош бошқарма мақомига тенглаштирилган давлат муассасаси шаклидаги юридик шахс ҳисобланади.

3. МБЛ ўз фаолиятини Ўзбекистон Республикасининг Конституцияси ва қонунлари, Ўзбекистон Республикаси Олий Мажлиси палаталарининг қарорлари, Ўзбекистон Республикаси Президентининг фармонлари, қарорлари ва фармойишлари, Вазирлар Маҳкамасининг қарорлари ва фармойишлари, шунингдек, ушбу Устав ва бошқа қонунчилик ҳужжатларига асосан амалга оширилади.

4. МБЛ Ўзбекистон Республикасининг Давлат герби тасвири туширилган ва ўзининг тўлиқ номи ёзилган муҳри, бланкаси ва штампига эга.

2-боб. МБЛнинг вазифалари ва функциялари

5. Қуйидагилар МБЛнинг асосий вазифалари ҳисобланади:

товарларни индентификациясига мувофиқ божхона экспертизасидан ўтказиш;

товарларни уларнинг Ўзбекистон Республикаси ташқи иқтисодий фаолият товар номенклатураси (кейинги ўринларда — ТИФ ТН) бўйича классификациялаш;

никотин сақловчи маҳсулотлар ва спиртли ичимликлар таркибини аниқлаш;

жисмоний ва юридик шахсларга ТИФ ТН бўйича дастлабки қарор бериш, шартнома асосида товарларни экспертизадан ўтказиш ва сертификатлаш билан боғлиқ бўлган бошқа хизматлар кўрсатиш;

Давлат божхона хизмати органлари эҳтиёжига кўра суд экспертизасининг гиёҳвандлик воситалари, психотроп моддалар экспертизаси ва бошқа криминалистик турларини ўтказиш;

илмий-текшириш ишларини амалга ошириш;

минтақавий божхона лабораторияси мақоми доирасида хорижий мамлакатларнинг божхона органлари ходимлари билан яқиндан ҳамкорлик қилиш ва уларга хизматлар кўрсатиш;

МБЛ фаолиятини ташкилий-услубий жиҳатдан таъминлаш.

6. МБЛ ўзига юкланган вазифаларга мувофиқ қуйидаги функцияларни амалга оширади:

а) товарларни уларнинг индентификациясига мувофиқ божхона экспертизасидан ўтказиш соҳасида:

товарларни ТИФ ТН бўйича классификациялаш мақсадида уларнинг таркиби, хусусиятларини ва бошқа жиҳатларини аниқлашга қаратилган божхона экспертизасидан ўтказади ва хулосалар беради;

товарларни уларнинг келиб чиқиш мамлакатини аниқлашга қаратилган божхона экспертизасидан ўтказади ва хулосалар беради;

товарларни қайта ишлаш маҳсулотларида идентификациялайди;

товарларни интеллектуал мулкка бўлган ҳуқуқларга риоя этилиши учун идентификациялайди;

б) товарларнинг ТИФ ТН бўйича кодларини классификациялаш соҳасида:

ТИФ ТН бўйича товарларни классификациялайди ва классификация қарорларини қабул қилади;

товарларнинг классификациясига қаратилган маълумотларни йиғади, таҳлил қилади ва сақлайди;

ваколатли органлар билан ҳамкорликда ТИФ ТНни юритади ҳамда унинг янги таҳририни ишлаб чиқишда иштирок этади;

товарлар классификациясида учраётган хатоликларни таҳлил қилади ва уларнинг олдини олиш чораларини кўради;

соҳадаги муаммоли ҳолатлар бўйича Умумжаҳон божхона ташкилоти билан ҳамкорлик қилади;

ҳуқуқни муҳофаза қилувчи органлар билан комиссион, комплекс экспертизаларни ўтказишда иштирок этади, такрорий экспертизаларни амалга оширади;

в) никотин сақловчи маҳсулотлар ва спиртли ичимликлар таркибини аниқлаш соҳасида:

никотин сақловчи маҳсулотларни идентификацияси бўйича божхона экспертизасини амалга оширади ва хулосалар беради;

спиртли ичимликлар таркибини аниқлаш бўйича божхона экспертизасини амалга оширади ва хулосалар беради;

янги турдаги никотин сақловчи маҳсулотлар ва спиртли ичимликлар таҳлиллари бўйича эҳтиёжларни ўрганади;

г) жисмоний ва юридик шахсларга ТИФ ТН бўйича дастлабки қарор бериш, шартнома асосида товарларни экспертизадан ўтказиш ва сертификациялаш билан боғлиқ бўлган бошқа хизматлар кўрсатиш соҳасида:

Ўзбекистон Республикаси Божхона кодексига асосан товарларнинг классификацияланишига нисбатан ТИФ ТНга мувофиқ дастлабки қарор қабул қилади;

жисмоний ва юридик шахсларга Ўзбекистон Республикаси ҳудудига олиб кириладиган ва олиб чиқиладиган товарларни ТИФ ТН бўйича кодларини классификациялашга қаратилган экспертизаларни ўтказади;

жисмоний ва юридик шахсларга Ўзбекистон Республикаси ҳудудига олиб кириладиган ва олиб чиқиладиган товарларни ТИФ ТН бўйича классификациялайди;

Ўзбекистон Республикаси ҳудудига олиб кириладиган ва олиб чиқиладиган товарларни аккредитация доирасида сертификатлаш билан боғлиқ бўлган хизматлар кўрсатади;

жисмоний ва юридик шахсларга тиббиёт соҳасида лицензияланган хизматлар кўрсатади;

д) Давлат божхона хизмати органлари эҳтиёжига кўра суд экспертизасининг гиёҳвандлик воситалари, психотроп моддалар экспертизаси ва бошқа криминалистик турларини ўтказиш соҳасида давлат суд-экспертиза муассасаси сифатида қуйидаги экспертиза ва тадқиқотларни амалга оширади:

ўсимлик, синтетик гиёҳвандлик воситалари ва моддалари экспертизаси;

психотроп моддалар ва прекурсорлар экспертизаси;

қимматбаҳо металлар ва заргарлик буюмлари экспертизаси;

кучли таъсир қилувчи моддалар экспертизаси;

махсус кимёвий моддалар экспертизаси;

хатшунослик экспертизаси;

ҳужжатларнинг техник экспертизаси;

шунингдек, тегишли мутахассислар, зарур техник воситалар бўлганда, бошқа турдаги экспертизаларни ўтказиши мумкин.

е) минтақавий божхона лабораторияси мақоми доирасида хорижий мамлакатларнинг божхона органлари ходимлари билан яқиндан ҳамкорлик қилиш ва уларга хизматлар кўрсатиш соҳасида:

хорижий давлатларга божхона экспертизаси соҳасида ходимлар малакасини оширишга қаратилган илмий анжуманлар, конференциялар, ташкил этади;

Ўзбекистон Республикаси ва хорижий давлатларнинг давлат органлари, илмий ташкилотлари, ўқув юртлари билан ҳамкорликда илмий, инструментал хизмат кўрсатади;

хорижий давлатларга божхона экспертизаси соҳасида муаммоли масалаларни ечишга қаратилган ишларни олиб боради.

ё) илмий-текшириш ишларини амалга ошириш соҳасида:

товарларни ТИФ ТН бўйича классификациялаш соҳасида ўтказиладиган илмий-тадқиқот ишларини амалга оширади;

янги турдаги экспертизалар учун услублар ишлаб чиқади ва амалиётга жорий қилади;

намуна ва синамалар олишга доир методик қўлланмалар ишлаб чиқиб, амалиётга татбиқ этади;

МБЛ ўқув машғулотлари ўтказиш учун муҳим ҳисобланган товарлар коллекциясини, ўсимлик ва синтетик гиёҳвандлик моддалари, психотроп ва кучли руҳий таъсир қилувчи моддалар коллекцияси, қалбаки ҳужжатлар ва қимматли қоғозлар картотекаларини ташкил этади ва юритади;

картотекалар ва коллекцияларни юритиш самарадорлигини ошириш юзасидан таклифлар тайёрлайди;

илмий-тадқиқот ишлари ва тажриба-конструкторлик ишланмаларида иштирок этади;

хорижий мамлакатларнинг илғор тажрибаларини мунтазам ўрганади ва амалиётга татбиқ этиш чораларини кўради;

ж) МБЛ фаолиятини ташкилий-услубий жиҳатдан таъминлаш соҳасида:

МБЛга касбий ва ахлоқий-психологик тайёргарликка эга, иродали ва маънавий фазилатларга эга бўлган кадрларни танлаб олишни ташкил этади;

МБЛ ходимларини қайта тайёрлаш ва уларнинг малакасини оширишни ташкил этиш, ходимлар касбий тайёргарлигининг юқори даражасини таъминлаш учун ўқитишнинг замонавий технологиялари ва усулларидан кенг фойдаланади;

МБЛ ҳудудий божхона бошқармаларидаги товарларни классификациялаш гуруҳларининг соҳа йўналиши бўйича фаолиятини мувофиқлаштиради.

МБЛ қонунчилик ҳужжатларига мувофиқ бошқа функцияларни ҳам амалга ошириши мумкин.

3-боб. МБЛнинг ҳуқуқ ва мажбуриятлари

7. МБЛ ўзига юкланган вазифалар ва функцияларни амалга ошириш учун қуйидаги ҳуқуқларга эгадир:

МБЛ функцияларини ва вазифаларини бажариш учун керак бўладиган, қонунчиликда тақиқланмаган ҳужжатлар, маълумотлар ва хулосаларни божхона органлари, давлат органлари ва ташкилотлари ҳамда жисмоний ва юридик шахслардан қонунчиликда белгиланган тартибда сўраш ва олиш;

божхона органлари ва бошқа шахслардан товар намуналарини олиш;

жисмоний ва юридик шахсларга божхона экспертизаси, сертификатлаш билан боғлиқ ҳамда бошқа пулли хизматлар кўрсатиш, шунингдек, суғурта агенти сифатида фаолият юритиш;

хизмат кўрсатиш фаолиятида лабораториянинг моддий-техник базасидан фойдаланиш ҳамда мазкур фаолиятга штат ходимларини жалб этиш;

ТИФ ТНга ўзгартиш ва қўшимчаларни миллий ва халқаро қонунчилик талабларига мувофиқ ишлаб чиқиш ва белгиланган тартибда таклиф киритиш;

қонунчиликда белгиланган тартибда божхона экспертизаси объекти бўлган товар ва транспорт воситаларини кўрикдан ўтказишда иштирок этиш;

қонунчиликда белгиланган тартибда божхона назорати остида бўлган товар ва транспорт воситалари турган ҳудудга ва биноларга кириш;

МБЛ ваколатига оид масалалар бўйича илмий-амалий институтлар, муассасалар, корхоналар ва ташкилотлар билан ҳамкорлик қилиш;

тадқиқотлар ўтказиш, ходимлар малакасини ошириш, тажриба алмашиш, илмий-амалий семинарлар ўтказиш борасида республика ва хорижий давлатларнинг экспертиза муассасалари билан ўрнатилган тартибда ҳамкорликни амалга ошириш ва меморандумлар имзолаш;

МБЛ ходимларининг билими, маҳорати, касбий тайёргарлиги, амалий тажрибаси даражасини ва экспертизаларни мустақил равишда бажариш салоҳиятини баҳолаш мақсадида МБЛ Эксперт-малака комиссиясини ташкил этиш ва фаолият юритишини таъминлаш;

ходимларнинг муайян экспертлик фаолияти бўйича малакасини ҳар икки йилда ошириб бориш юзасидан ва экспертизаларни мустақил ўтказиш ҳуқуқини олиш учун таълим ташкилотлари, вазирлик ва идоралар мутахассисларини жалб этган ҳолда қайта тайёрлаш ва малака ошириш ишларини ташкил этиш;

МБЛни ривожлантириш жамғармасидаги маблағларни тижорат банкларининг депозит рақамларида миллий ва хорижий валютада жойлаштириш;

халқаро семинар, илмий-амалий йиғилишларда иштирок этиш.

МБЛ қонунчилик ҳужжатларига мувофиқ бошқа ҳуқуқларга ҳам эга бўлиши мумкин.

8. МБЛнинг мажбуриятлари қуйидагилардан иборат:

мазкур Уставда белгиланган вазифаларни талаб даражасида бажаришга;

қонунчиликда белгиланган тартибда зарур бўлганда, намуна ва синамаларни олишда эксперт сифатида ходимлар иштирокини таъминлаш;

хизмат вазифаларини амалга оширишда маълум бўлиб қолган давлат, хизмат ва тижорат сири ҳисобланган маълумот ва ахборотларни ошкор этмаслик;

ахборот хавфсизлигини таъминлаш қоидаларига риоя қилиш.

МБЛ қонунчилик ҳужжатларига мувофиқ бошқа мажбуриятларга ҳам эга бўлиши мумкин.

4-боб. МБЛ фаолиятини ташкил этиш

9. МБЛнинг офицер ва сержантлар таркибидаги ходимлари ДБҚ Раиси томонидан ўрнатилган тартибда лавозимга тайинланади ва лавозимдан озод этилади.

МБЛнинг мутахассис, ёрдамчи ва хизмат кўрсатувчи ходимлари ДБҚ Раиси ўринбосари томонидан меҳнат қонунчилиги талаблари асосида лавозимга тайинланади ва лавозимдан озод этилади.

МБЛнинг офицер ва сержантлар, шунингдек, мутахассис, хизмат кўрсатувчи ва ёрдамчи (техник) ходимлари билан кадрлар соҳасига оид муносабатлар Кадрлар бошқармаси томонидан амалга оширилади.

10. Ўзбекистон Республикасининг республика бюджети маблағлари, Ўзбекистон Республикаси Давлат божхона қўмитасининг бюджетдан ташқари маблағлари, Марказий божхона лабораториясини ривожлантириш жамғармаси (кейинги ўринларда — Жамғарма), халқаро молия институтлари ва хорижий молия ташкилотларининг грантлари, шунингдек, қонунчилик ҳужжатлари билан тақиқланмаган бошқа манбалар Марказий божхона лабораторияси фаолиятини молиялаштириш манбалари ҳисобланади.

11. Жамғарма маблағлари қуйидаги мақсадларда сарфланади:

Марказий божхона лабораториясининг моддий-техник базасини мустаҳкамлаш ҳамда ходимларни моддий рағбатлантириш;

МБЛ ходимларининг малакасини ошириш, шу жумладан, хорижий мамлакатларга хизмат сафарларини амалга ошириш;

кўрсатиладиган пулли хизматлар эҳтиёжидан келиб чиқиб, Жамғарма маблағлари ҳисобидан белгиланган штат жадвалидан ташқари қўшимча ходимларни фуқаролик ҳуқуқий шартнома асосида жалб қилиш.

Божхона қўмитасининг сўровига асосан МБЛнинг Жамғарма маблағлари Божхона қўмитасининг ривожлантириш жамғармасига ўтказилади ва Божхона қўмитаси томонидан қонунчиликда кўзда тутилган ҳоллар билан бир қаторда ходимларга устамалар тўлаш, божхона объектларини капитал қуриш, реконструкция қилиш ва таъмирлашга сарфланади.

12. МБЛ бошлиғи:

ўзининг ваколати доирасида экспертлик фаолиятини ташкил этиш бўйича кўрсатмалар, фармойишлар, буйруқлар чиқаради ва ДБҚ раҳбариятига божхона органлари томонидан бажарилиши мажбурий бўлган фармойишлар, буйруқлар лойиҳаларини киритади;

МБЛ фаолиятига доир ҳужжатларни тасдиқлайди, пул маблағларини тасарруф этади, фуқаролик-ҳуқуқий шартномаларни тузади;

Жамғарма маблағларининг МБЛ эҳтиёжи учун сарфланишини белгилайди;

товарларни ТИФ ТН бўйича классификациялаш мақсадида, унинг таркиби, хусусиятларини ва бошқа жиҳатларини аниқлашга қаратилган божхона экспертизаси ўтказилиши ташкил этилишини назорат қилади;

ўзининг ўринбосарлари ўртасида функционал мажбуриятларни тақсимлайди, уларга юкланган мажбуриятларнинг бажарилишини назорат қилади;

МБЛнинг иш режаларини тасдиқлайди;

ТИФ ТН бўйича товарларни классификациялаш ва классификация қарорларини қабул қилишни ташкил этади ва назорат қилади;

ваколатли органлар билан ҳамкорликда ТИФ ТНни юритиш ҳамда унинг янги таҳририни ишлаб чиқишда иштирок этишни ташкил этади ва назорат қилади;

соҳадаги муаммоли ҳолатлар бўйича Умумжаҳон божхона ташкилоти билан ҳамкорлик қилишни ташкиллаштиради;

Ўзбекистон Республикаси ҳудудига олиб кириладиган ва олиб чиқиладиган товарларни аккредитация доирасида сертификатлаш билан боғлиқ бўлган хизматлар кўрсатишни ташкил этади;

Давлат божхона хизмати органлари эҳтиёжига кўра суд экспертизасининг гиёҳвандлик воситалари, психотроп моддалар экспертизаси ва бошқа криминалистик турларини ўтказиш, жисмоний ва юридик шахсларга ТИФ ТН бўйича дастлабки қарор бериш юзасидан тегишли чора-тадбирларни амалга оширишни ташкил этади;

хорижий давлатларга божхона экспертизаси соҳасидаги ходимларни малакасини оширишга қаратилган илмий анжуманлар, конференциялар, ташкил этишини ташкил этади;

Ўзбекистон Республикаси ва хорижий давлатларнинг давлат органлари, илмий муассасалари ва ташкилотлари, ўқув юртлари билан илмий, инструментал хизмат кўрсатиш, божхона экспертизаси соҳасида муаммоли масалаларни ечишга қаратилган ишларни олиб боришни ташкил этиш чораларини кўради;

товарларни ТИФ ТН бўйича классификациялаш соҳасида ўтказиладиган илмий-тадқиқот ишларини амалга оширишни ташкиллаштиради;

янги турдаги экспертизалар учун услублар ишлаб чиқиш ва амалиётга жорий қилиш чораларини кўради;

МБЛ ўқув машғулотлари ўтказиш учун муҳим ҳисобланган товарлар коллекциясини, ўсимлик ва синтетик гиёҳвандлик моддалари, психотроп ва кучли руҳий таъсир қилувчи моддалар коллекцияси, қалбаки ҳужжатлар ва қимматли қоғозлар картотекаларини ташкил этиш ва юритишни ташкил этади;

илмий-тадқиқот ишлари ва тажриба-конструкторлик ишланмаларида иштирок этиш ва хорижий мамлакатларнинг илғор тажрибаларини мунтазам ўрганиш ва амалиётга татбиқ этиш чораларини кўради;

МБЛга касбий ва ахлоқий-психологик тайёргарликка эга, иродали ва маънавий фазилатларга эга бўлган кадрларни танлаб олади;

МБЛ ходимларини қайта тайёрлаш ва уларнинг малакасини оширишни ташкил этади, ходимлар касбий тайёргарлигининг юқори даражасини таъминлаш учун ўқитишнинг замонавий технологиялари ва усулларидан кенг фойдаланишни амалга оширади;

Товарларни ТИФ ТН бўйича классификациялаш йўналиши бўйича ҳудудий бошқармалар фаолиятини мувофиқлаштиради;

МБЛ ваколатига кирадиган бошқа вазифаларни амалга оширади.

13. МБЛ бошлиғи ўринбосари — ТИФ ТН бошқармаси бошлиғи:

ТИФ ТН бўйича товарларни классификациялаш тўғрисида ва классификация қарорларини қабул қилади;

ваколатли органлар билан ҳамкорликда ТИФ ТНни юритиш ҳамда унинг янги таҳририни ишлаб чиқишда иштирок этишни ташкил этади;

товарларни ТИФ ТН бўйича классификациялаш йўналишида ҳудудий бошқармалар фаолиятини мувофиқлаштиради.

товарларнинг классификациясига қаратилган маълумотларни йиғиш, таҳлил қилиш ва сақлашни ташкил этади;

товарларнинг классификациясига қаратилган методик йўриқномалар чоп этилишини таъминлайди;

товарлар классификациясида учраётган хатоликларни таҳлил қилиш ва уларнинг олдини олиш чораларини кўради;

соҳадаги муаммоли ҳолатлар бўйича Умумжаҳон божхона ташкилоти билан ҳамкорлик қилади;

ҳуқуқни муҳофаза қилувчи органлар билан комиссион, комплекс экспертизаларни ўтказишда иштирок этади, такрорий экспертизаларни амалга оширишни ташкил этади;

Ўзбекистон Республикаси Божхона кодексига асосан товарларнинг классификацияланишига нисбатан ТИФ ТНга мувофиқ дастлабки қарор қабул қилиш чораларини кўради;

жисмоний ва юридик шахсларга Ўзбекистон Республикаси ҳудудига олиб кириладиган ва олиб чиқиладиган товарларни ТИФ ТН бўйича классификациялашни ташкил этади;

ТИФ ТН соҳаси бўйича маълумотларни йиғиш, таҳлил қилиш, ҳисоботларни шакллантириш ва сақлашни ташкил этади;

хорижий давлатларга божхона экспертизаси соҳасида муаммоли масалаларни ечишга қаратилган ишларни ўрганишни ташкил этади;

товарларни ТИФ ТН бўйича классификациялаш соҳасида ўтказиладиган илмий-тадқиқот ишларини амалга ошириш учун шароитлар яратади;

намуна ва синамалар олишга доир методик қўлланмаларни ишлаб чиқишда ва амалиётга татбиқ этишда иштирок этади.

14. МБЛ бошлиғи ўринбосари — Экспертиза бошқармаси бошлиғи:

товарларни ТИФ ТН бўйича классификациялаш мақсадида уларнинг таркиби, хусусиятлари ва бошқа жиҳатларини аниқлашга қаратилган божхона экспертизасини ўтказишни ташкил этади;

товарларнинг келиб чиқиш мамлакатини аниқлашга қаратилган ва товарларни қайта ишлаш маҳсулотларида идентификациялашга қаратилган ҳамда никотин сақловчи маҳсулотлар, спиртли ичимликлар таркибини аниқлаш бўйича божхона экспертизасини амалга ошириш чораларини кўради;

товарларни интеллектуал мулкка бўлган ҳуқуқларга риоя этилиши учун идентификациялашни ташкил этади;

янги турдаги никотин сақловчи маҳсулотлар ва спиртли ичимликлар таҳлиллари бўйича эҳтиёжларни ўрганади;

жисмоний ва юридик шахсларга Ўзбекистон Республикаси ҳудудига олиб кириладиган ва олиб чиқиладиган товарларни ТИФ ТН кодларини классификациялашга қаратилган экспертизаларни ўтказишни ташкил этади;

ўсимлик, синтетик гиёҳвандлик воситалари ва моддалари экспертизаси, психотроп моддалар ва прекурсорлар экспертизаси, қимматбаҳо металлар ва заргарлик буюмлари экспертизаси, кучли таъсир қилувчи моддалар экспертизаси, махсус кимёвий моддалар экспертизаси, хатшунослик экспертизаси, ҳужжатларнинг техник экспертизаси каби суд криминалистик экспертизаларни ўтказишни ташкил этади;

Ўзбекистон Республикаси ва хорижий давлатларнинг давлат органлари, илмий муассасалари ва ташкилотлари, ўқув юртлари билан илмий, инструментал хизмат кўрсатиш, божхона экспертизаси соҳасида муаммоли масалаларни ечишга қаратилган ишларни олиб боришни ташкил этади;

товарларни ТИФ ТН бўйича классификациялаш соҳасида ўтказиладиган илмий-тадқиқот ишларини амалга оширади;

янги турдаги экспертизалар учун услубларни ишлаб чиқади ва амалиётга жорий этади;

намуна ва синамалар олишга доир методик қўлланмалар ишлаб чиқади ва амалиётга татбиқ этади;

картотекалар ва коллекцияларни юритиш самарадорлигини ошириш юзасидан таклифлар тайёрлайди;

илмий-тадқиқот ишлари ва тажриба-конструкторлик ишланмаларида иштирок этади;

хорижий мамлакатларнинг илғор тажрибаларини мунтазам равишда ўрганиш ва амалиётга татбиқ этиш чораларини кўради.

15. МБЛ томонидан жисмоний ва юридик шахсларга кўрсатиладиган пулли хизматлар турлари ва қиймати ДБҚ томонидан белгиланади, божхона органларига халқаро шартномалар доирасида кўрсатиладиган хизматлар бундан мустасно.

Жисмоний ва юридик шахсларга ҳамда хорижий давлатларнинг божхона хизмати органларига пулли хизматлар кўрсатишдан тушадиган маблағлар тўлиқ ҳажмда Марказий божхона лабораториясини ривожлантириш жамғармасига ўтказилади.

МБЛнинг пулли хизматлари бўйича мавжуд дебиторлик қарздорлиги юзасидан маблағларни қайтариб бериш тўғрисида мурожаат уч йил муддат ичида тақдим этилмаганда, ушбу пул маблағлари божхона органлари томонидан ўн беш иш куни ичида Ўзбекистон Республикасининг Давлат бюджетига ўтказилади.

5-боб. Якунловчи қоидалар

16. Мазкур Устав талаблари бузилишида айбдор бўлган шахслар қонунчилик ҳужжатларида белгиланган тартибда жавобгар бўлади.

Вазирлар Маҳкамасининг 2021 йил 30 декабрдаги 790-сон қарорига 3-ИЛОВА

Ўзбекистон Республикаси Давлат божхона қўмитаси Марказий божхона лабораториясини халқаро молия ва бошқа институтлар, хорижий ташкилотларнинг грантларини жалб қилган ҳолда шунингдек, бюджетдан ташқари маблағлари ҳисобидан сотиб олинадиган замонавий лаборатория-технологик ускуналар ва инвентарлар

Т/р Номланиши Ўлчов бирлиги Сони ТИФ ТН коди 1. MC-ICP-MS Индуктив боғланган плазмали изотоп масс-спектрометр (изотоп стандартлар билан) дона 1 9027 30 000 0 2. XRFРентген флуоресцентли анализатор (пресс ва печкаси билан) дона 1 9027 80 170 0 3. XRD рентген-дифракцион анализатор (маълумотлар базаси билан) дона 1 9027 80 170 0 4. Масс–спектрометрик детекторли юқори самарали суюқлик хроматографи дона 1 9027 20 000 0 5. Аналитик қурилмалар учун маълумотлар базаси (спектрал база) жамланма 1 Дастурий таъминот 6. ГМО лаборатория комплекси (ДНК реал тайм ПЗР, секвинатор ва бошқалар) жамланма 1 9027 7. Юқори аниқликдаги рақамли камерага эга материалшунослик стерио-микроскоп (Discovery V20) дона 1 9011 10 900 0 8. Роторли буғлаткич дона 1 8419 89 989 0 9. Кимёвий мебеллар (Kottermann) жамланма 1 9403 10 910 0, 9401 30 000 1 10. Юқори аниқликдаги рақамли камерага эга биологик микроскоп дона 1 9011 80 000 0 11. Микроавтобус базасида ҳаракатланувчи лаборатория дона 1 8705 12. Кимёвий реактивлар: Фтор бром метанолдаги эритмаси (BF 3 -methanol) кислоталар ишқорий металлар ишқорлар Метанол Этанол Хлороформ Этилацетат Гексан Петролейн эфири Ацетонитрил жамланма 1 2901, 2805, 2806, 2807, 2815, 2902, 2903, 2905, 2915, 2926 13. Миқдорий анализлар учун стандартлар: Ёғ кислоталари стандартлари Элемент таҳлили учун элементлар тўпламининг стандарти Гиёҳвандлик воситалари таркибидаги фаол моддалар стандартлари Тамаки махсулотлари миқдорий таҳлили учун стандарт моддалар (Никотин моддаси стандарти) Алкоголь маҳсулотлари миқдорий таҳлили учун стандарт моддалар Газ храматографи, масспектрометр учун стандартлар жамланма 1 3822 00 000 0 14. Рақамли микрометр дона 2 9017 30 000 0 15. Брикс кўрсаткичини ўлчовчи рефрактометр (Меттлер толедо) дона 1 9027 50 000 0 16. Рақамли тензиометр (Kruss GmbН) дона 1 9027 17. Устахона жиҳозлари жамланма 1 8467295100, 8205400000, 9030310000 18. Махсус кийим бош (махсус кийим, кимёвий моддаларга чидамли пойабзал, юз ниқоби) жамланма 20 6211 32 000 0, 6403 40 000 0 19. Лаборатория идишлари , шу жумладан: кимёвий лаборатория ўлчов идишлари тўплами (А тоифали) лаборатория идишлари (махсус ва бошқа тоифали) жамланма 2 7017 20. Илмийадабиётларвастандартлар : ISO (International Organization for Standardization) стандартлари аналитиккимё 6 таҳрири (Analytical Chemistry, 6th Edition) ASTM (American Society for Testing and Materials) стандарлари BSI (British Standards Institute) стандартлари расмийаналитикметодлартўплами (Official Method of Analysis, Association of Official Analytical Chemists (AOAC)) полимерларфаниватехнологиясиэнциклопедияси (Encyclopedia of Polymer Science and Technology) пластмассаиндентификациялаштаҳлиллари (Identification and Analysis of Plastics) жамланма 1 4901 10 000 0 21. Жаҳон божхона ташкилотининг НS электрон базаси 2022 — 2027 йиллар учун дона 1 Дастурий таъминот 22. Эҳтиёт қисмлар (лайнер, виалка қопқоқлари билан, ферруллар, пиролизер учун шишалар ва бошқалар) жамланма 1 9027 90 23. Стандартлар ва кимёвий моддалар сақлаш мўлжалланган лаборатор музлаткич дона 1 8418 24. Аналитик тарози дона 1 9016

Ўзбекистон Республикасининг Бош вазири А. АРИПОВ

Тошкент ш.,

2021 йил 30 декабрь,

790-сон

(Қонунчилик маълумотлари миллий базаси, 30.12.2021 й., 09/21/790/1223-сон, 27.04.2022 й., 06/22/122/0396-сон; 05.09.2022 й., 09/22/487/0794-сон; 07.11.2025 й., 09/25/700/1022-сон)

lex.uz

Oʻzbekiston Respublikasi Vazirlar Mahkamasining

qarori

TUZILMASI

USTAV

ROʻYXATI

Oʻzbekiston Respublikasi Davlat bojxona qoʻmitasining Markaziy bojxona laboratoriyasi faoliyatini tashkil etish chora-tadbirlari toʻgʻrisida

Oʻzbekiston Respublikasi Prezidentining “Bojxona tartib-taomillarini soddalashtirish va davlat bojxona xizmati organlari tashkiliy tuzilmasini yanada takomillashtirish toʻgʻrisida” 2021-yil 10-sentabrdagi PF-6310-son Farmoniga muvofiq, shuningdek, tashqi iqtisodiy faoliyatni amalga oshirish jarayonida tadbirkorlik subyektlari uchun qulay shart-sharoitlar yaratish hamda Oʻzbekiston Respublikasi Davlat bojxona qoʻmitasi Markaziy bojxona laboratoriyasining faoliyatini samarali tashkil etish maqsadida Vazirlar Mahkamasi qaror qiladi:

1. Oʻzbekiston Respublikasi Prezidentining “Bojxona tartib-taomillarini soddalashtirish va davlat bojxona xizmati organlari tashkiliy tuzilmasini yanada takomillashtirish toʻgʻrisida” 2021-yil 10-sentabrdagi PF-6310-son Farmoniga muvofiq bojxona organlarining umumiy cheklangan shtatlar soni doirasida Oʻzbekiston Respublikasi Davlat bojxona qoʻmitasi tizimida alohida yuridik shaxs maqomiga ega boʻlgan Markaziy bojxona laboratoriyasi tashkil etilganligi maʼlumot uchun qabul qilinsin.

2. Quyidagilar:

a) Oʻzbekiston Respublikasi Davlat bojxona qoʻmitasi Markaziy bojxona laboratoriyasining tuzilmasi 1-ilovaga muvofiq;

b) quyidagilarni nazarda tutuvchi Oʻzbekiston Respublikasi Davlat bojxona qoʻmitasi Markaziy bojxona laboratoriyasi toʻgʻrisidagi ustav 2-ilovaga muvofiq:

Oʻzbekiston Respublikasi Davlat bojxona qoʻmitasi Markaziy bojxona laboratoriyasining (keyingi oʻrinlarda — Markaziy bojxona laboratoriyasi) maqomi, asosiy vazifalari va funksiyalari;

Markaziy bojxona laboratoriyasining huquqlari, majburiyatlari hamda Laboratoriya boshligʻining asosiy funksional majburiyatlari;

Markaziy bojxona laboratoriyasining faoliyatini tashkil etish va uni moliyalashtirish tartibi;

Oʻzbekiston Respublikasi Davlat bojxona qoʻmitasining Markaziy bojxona laboratoriyasini xalqaro moliya va boshqa institutlar, xorijiy tashkilotlarning grantlarini jalb qilgan holda, shuningdek, budjetdan tashqari mablagʻlari hisobidan sotib olinadigan zamonaviy laboratoriya-texnologik uskunalar va inventarlar roʻyxati 3-ilovaga muvofiq tasdiqlansin.

3. Belgilansinki:

Markaziy bojxona laboratoriyasi davlat muassasasi shaklidagi yuridik shaxs hisoblanadi;

Markaziy bojxona laboratoriyasi boshligʻi maqomi, mehnatga haq toʻlash va transport xizmati koʻrsatish sharoitlariga koʻra Oʻzbekiston Respublikasi Davlat bojxona qoʻmitasi markaziy apparatining bosh boshqarma boshligʻiga, boshliq oʻrinbosarlari esa Oʻzbekiston Respublikasi Davlat bojxona qoʻmitasi markaziy apparatining bosh boshqarma boshligʻi oʻrinbosariga tenglashtiriladi;

Markaziy bojxona laboratoriyasi xodimlariga Oʻzbekiston Respublikasi Davlat bojxona qoʻmitasi markaziy apparati xodimlari uchun belgilangan moddiy ragʻbatlantirish va mehnatga haq toʻlash shartlari tatbiq etiladi;

Oʻzbekiston Respublikasining respublika budjeti mablagʻlari, Oʻzbekiston Respublikasi Davlat bojxona qoʻmitasining budjetdan tashqari mablagʻlari, xalqaro moliya institutlari va xorijiy moliya tashkilotlarining grantlari, shuningdek, qonunchilik hujjatlari bilan taqiqlanmagan boshqa manbalar Markaziy bojxona laboratoriyasi faoliyatini moliyalashtirish manbalari hisoblanadi;

Markaziy bojxona laboratoriyasi tomonidan jismoniy va yuridik shaxslarga koʻrsatiladigan pulli xizmatlar turlari va toʻlovlar miqdorlari Oʻzbekiston Respublikasi Davlat bojxona qoʻmitasi tomonidan belgilanadi, xorijiy davlatlar bojxona xizmati organlariga xalqaro shartnomalar doirasida koʻrsatiladigan xizmatlar bundan mustasno.

4. Markaziy bojxona laboratoriyasi Oʻzbekiston Respublikasi Davlat bojxona qoʻmitasiga tegishli boʻlgan Toshkent shahri, Islom Karimov koʻchasi, 3-uy manzilidagi binoga joylashtirilsin.

Oʻzbekiston Respublikasi Davlat bojxona qoʻmitasi Markaziy bojxona laboratoriyasini uning faoliyatini samarali amalga oshirish uchun zarur boʻlgan ofis jihozlari, asbob va uskunalar (laboratoriya jihozlari, anjomlari, qurilmalar, reaktivlar, ehtiyot qismlar, kompyuter, printer va aloqa jamlamalari, mebel va boshqalar) bilan taʼminlash choralarini koʻrsin.

5. Jismoniy va yuridik shaxslarga hamda xorijiy davlatlarning bojxona xizmati organlariga pulli xizmatlar koʻrsatishdan tushadigan mablagʻlar toʻliq hajmda Markaziy bojxona laboratoriyasini rivojlantirish jamgʻarmasiga oʻtkaziladi.

6. Mazkur qarorning bajarilishini nazorat qilish Oʻzbekiston Respublikasi Bosh vazirining moliya-iqtisodiyot va kambagʻallikni qisqartirish masalalari boʻyicha oʻrinbosari — iqtisodiy taraqqiyot va kambagʻallikni qisqartirish vaziri J.A. Qoʻchqorov hamda Oʻzbekiston Respublikasi Davlat bojxona qoʻmitasi raisi A.Yu. Mavlonov zimmasiga yuklansin.

Vazirlar Mahkamasining 2021-yil 30-dekabrdagi 790-son qaroriga 1-ILOVA

Oʻzbekiston Respublikasi Davlat bojxona qoʻmitasi Markaziy bojxona laboratoriyasining

Markaziy bojxona laboratoriyasi boshligʻi Markaziy bojxona laboratoriyasi boshligʻi oʻrinbosari — Ekspertiza boshqarmasi boshligʻi 1 Markaziy bojxona laboratoriyasi boshligʻi oʻrinbosari — Tashqi iqtisodiy faoliyat tovar nomenklaturasi boshqarmasi boshligʻi 1 Jismoniy va yuridik shaxslarga xizmat koʻrsatish boʻlimi 3 Tibbiy xizmat 2 Bojxona ekspertizasi boʻlimi 3 Sud ekspertizasi boʻlimi 3 Klassifikatsiya markazi 3 Moliya-iqtisodiyot guruhi 1 Analitik qurilmalarga texnik xizmat koʻrsatish guruhi 1 Tashqi iqtisodiy faoliyat tovar nomenklaturasini yuritish boʻlimi 3 Bosh yuristkonsult 1 Moddiy-texnik taʼminot, yongʻin va texnika xavfsizligi guruhi 1

Jami shtat birligi (mutaxassis, yordamchi va xizmat koʻrsatuvchi xodimlarni hisobga olmagan holda) — 24 ta Mutaxassis, yordamchi va xizmat koʻrsatuvchi xodimlar. Shu jumladan : — 17 ta xalqaro hamkorlik boʻyicha mutaxassis (Yagona tarif setkasi boʻyicha 9-razryad) — 1 ta tovarlarni sertifikatlash boʻyicha mutaxassis (Yagona tarif setkasi boʻyicha 9-razryad) — 2 ta jismoniy va yuridik shaxslarga xizmat koʻrsatish boʻyicha mutaxassis (Yagona tarif setkasi boʻyicha 9-razryad) — 4 ta rentgenolaborant (Yagona tarif setkasi boʻyicha 8-razryad) — 1 ta laborant (Yagona tarif setkasi boʻyicha 8-razryad) — 6 ta ish yurituvchi (Yagona tarif setkasi boʻyicha 6-razryad) — 1 ta buxgalter-kassir (Yagona tarif setkasi boʻyicha 4-razryad) — 1 ta yengil avtomobil haydovchisi (Yagona tarif setkasi boʻyicha 1 — 3-razryad) — 1 ta

Vazirlar Mahkamasining 2021-yil 30-dekabrdagi 790-son qaroriga 2-ILOVA

Oʻzbekiston Respublikasi Davlat bojxona qoʻmitasi Markaziy bojxona laboratoriyasi toʻgʻrisida

1-bob. Umumiy qoidalar

1. Mazkur Ustav Oʻzbekiston Respublikasi Davlat bojxona qoʻmitasi Markaziy bojxona laboratoriyasining (keyingi oʻrinlarda — MBL) maqomi, asosiy vazifalari, funksiyalari, huquqlari va majburiyatlarini, shuningdek, faoliyatini tashkil etish tartibini belgilaydi.

2. MBL bojxona organlarida bojxona va sud ekspertizalarini amalga oshiradigan hamda oʻz sohasida ilmiy-amaliy faoliyat bilan shugʻullanadigan Oʻzbekiston Respublikasi Davlat bojxona qoʻmitasining (keyingi oʻrinlarda — DBQ) bosh boshqarma maqomiga tenglashtirilgan davlat muassasasi shaklidagi yuridik shaxs hisoblanadi.

3. MBL oʻz faoliyatini Oʻzbekiston Respublikasining Konstitutsiyasi va qonunlari, Oʻzbekiston Respublikasi Oliy Majlisi palatalarining qarorlari, Oʻzbekiston Respublikasi Prezidentining farmonlari, qarorlari va farmoyishlari, Vazirlar Mahkamasining qarorlari va farmoyishlari, shuningdek, ushbu Ustav va boshqa qonunchilik hujjatlariga asosan amalga oshiriladi.

4. MBL Oʻzbekiston Respublikasining Davlat gerbi tasviri tushirilgan va oʻzining toʻliq nomi yozilgan muhri, blankasi va shtampiga ega.

2-bob. MBLning vazifalari va funksiyalari

5. Quyidagilar MBLning asosiy vazifalari hisoblanadi:

tovarlarni indentifikatsiyasiga muvofiq bojxona ekspertizasidan oʻtkazish;

tovarlarni ularning Oʻzbekiston Respublikasi tashqi iqtisodiy faoliyat tovar nomenklaturasi (keyingi oʻrinlarda — TIF TN) boʻyicha klassifikatsiyalash;

nikotin saqlovchi mahsulotlar va spirtli ichimliklar tarkibini aniqlash;

jismoniy va yuridik shaxslarga TIF TN boʻyicha dastlabki qaror berish, shartnoma asosida tovarlarni ekspertizadan oʻtkazish va sertifikatlash bilan bogʻliq boʻlgan boshqa xizmatlar koʻrsatish;

Davlat bojxona xizmati organlari ehtiyojiga koʻra sud ekspertizasining giyohvandlik vositalari, psixotrop moddalar ekspertizasi va boshqa kriminalistik turlarini oʻtkazish;

ilmiy-tekshirish ishlarini amalga oshirish;

mintaqaviy bojxona laboratoriyasi maqomi doirasida xorijiy mamlakatlarning bojxona organlari xodimlari bilan yaqindan hamkorlik qilish va ularga xizmatlar koʻrsatish;

MBL faoliyatini tashkiliy-uslubiy jihatdan taʼminlash.

6. MBL oʻziga yuklangan vazifalarga muvofiq quyidagi funksiyalarni amalga oshiradi:

a) tovarlarni ularning indentifikatsiyasiga muvofiq bojxona ekspertizasidan oʻtkazish sohasida:

tovarlarni TIF TN boʻyicha klassifikatsiyalash maqsadida ularning tarkibi, xususiyatlarini va boshqa jihatlarini aniqlashga qaratilgan bojxona ekspertizasidan oʻtkazadi va xulosalar beradi;

tovarlarni ularning kelib chiqish mamlakatini aniqlashga qaratilgan bojxona ekspertizasidan oʻtkazadi va xulosalar beradi;

tovarlarni qayta ishlash mahsulotlarida identifikatsiyalaydi;

tovarlarni intellektual mulkka boʻlgan huquqlarga rioya etilishi uchun identifikatsiyalaydi;

b) tovarlarning TIF TN boʻyicha kodlarini klassifikatsiyalash sohasida:

TIF TN boʻyicha tovarlarni klassifikatsiyalaydi va klassifikatsiya qarorlarini qabul qiladi;

tovarlarning klassifikatsiyasiga qaratilgan maʼlumotlarni yigʻadi, tahlil qiladi va saqlaydi;

vakolatli organlar bilan hamkorlikda TIF TNni yuritadi hamda uning yangi tahririni ishlab chiqishda ishtirok etadi;

tovarlar klassifikatsiyasida uchrayotgan xatoliklarni tahlil qiladi va ularning oldini olish choralarini koʻradi;

sohadagi muammoli holatlar boʻyicha Umumjahon bojxona tashkiloti bilan hamkorlik qiladi;

huquqni muhofaza qiluvchi organlar bilan komission, kompleks ekspertizalarni oʻtkazishda ishtirok etadi, takroriy ekspertizalarni amalga oshiradi;

v) nikotin saqlovchi mahsulotlar va spirtli ichimliklar tarkibini aniqlash sohasida:

nikotin saqlovchi mahsulotlarni identifikatsiyasi boʻyicha bojxona ekspertizasini amalga oshiradi va xulosalar beradi;

spirtli ichimliklar tarkibini aniqlash boʻyicha bojxona ekspertizasini amalga oshiradi va xulosalar beradi;

yangi turdagi nikotin saqlovchi mahsulotlar va spirtli ichimliklar tahlillari boʻyicha ehtiyojlarni oʻrganadi;

g) jismoniy va yuridik shaxslarga TIF TN boʻyicha dastlabki qaror berish, shartnoma asosida tovarlarni ekspertizadan oʻtkazish va sertifikatsiyalash bilan bogʻliq boʻlgan boshqa xizmatlar koʻrsatish sohasida:

Oʻzbekiston Respublikasi Bojxona kodeksiga asosan tovarlarning klassifikatsiyalanishiga nisbatan TIF TNga muvofiq dastlabki qaror qabul qiladi;

jismoniy va yuridik shaxslarga Oʻzbekiston Respublikasi hududiga olib kiriladigan va olib chiqiladigan tovarlarni TIF TN boʻyicha kodlarini klassifikatsiyalashga qaratilgan ekspertizalarni oʻtkazadi;

jismoniy va yuridik shaxslarga Oʻzbekiston Respublikasi hududiga olib kiriladigan va olib chiqiladigan tovarlarni TIF TN boʻyicha klassifikatsiyalaydi;

Oʻzbekiston Respublikasi hududiga olib kiriladigan va olib chiqiladigan tovarlarni akkreditatsiya doirasida sertifikatlash bilan bogʻliq boʻlgan xizmatlar koʻrsatadi;

jismoniy va yuridik shaxslarga tibbiyot sohasida litsenziyalangan xizmatlar koʻrsatadi;

d) Davlat bojxona xizmati organlari ehtiyojiga koʻra sud ekspertizasining giyohvandlik vositalari, psixotrop moddalar ekspertizasi va boshqa kriminalistik turlarini oʻtkazish sohasida davlat sud-ekspertiza muassasasi sifatida quyidagi ekspertiza va tadqiqotlarni amalga oshiradi:

oʻsimlik, sintetik giyohvandlik vositalari va moddalari ekspertizasi;

psixotrop moddalar va prekursorlar ekspertizasi;

qimmatbaho metallar va zargarlik buyumlari ekspertizasi;

kuchli taʼsir qiluvchi moddalar ekspertizasi;

maxsus kimyoviy moddalar ekspertizasi;

xatshunoslik ekspertizasi;

hujjatlarning texnik ekspertizasi;

shuningdek, tegishli mutaxassislar, zarur texnik vositalar boʻlganda, boshqa turdagi ekspertizalarni oʻtkazishi mumkin.

e) mintaqaviy bojxona laboratoriyasi maqomi doirasida xorijiy mamlakatlarning bojxona organlari xodimlari bilan yaqindan hamkorlik qilish va ularga xizmatlar koʻrsatish sohasida:

xorijiy davlatlarga bojxona ekspertizasi sohasida xodimlar malakasini oshirishga qaratilgan ilmiy anjumanlar, konferensiyalar, tashkil etadi;

Oʻzbekiston Respublikasi va xorijiy davlatlarning davlat organlari, ilmiy tashkilotlari, oʻquv yurtlari bilan hamkorlikda ilmiy, instrumental xizmat koʻrsatadi;

xorijiy davlatlarga bojxona ekspertizasi sohasida muammoli masalalarni yechishga qaratilgan ishlarni olib boradi.

yo) ilmiy-tekshirish ishlarini amalga oshirish sohasida:

tovarlarni TIF TN boʻyicha klassifikatsiyalash sohasida oʻtkaziladigan ilmiy-tadqiqot ishlarini amalga oshiradi;

yangi turdagi ekspertizalar uchun uslublar ishlab chiqadi va amaliyotga joriy qiladi;

namuna va sinamalar olishga doir metodik qoʻllanmalar ishlab chiqib, amaliyotga tatbiq etadi;

MBL oʻquv mashgʻulotlari oʻtkazish uchun muhim hisoblangan tovarlar kolleksiyasini, oʻsimlik va sintetik giyohvandlik moddalari, psixotrop va kuchli ruhiy taʼsir qiluvchi moddalar kolleksiyasi, qalbaki hujjatlar va qimmatli qogʻozlar kartotekalarini tashkil etadi va yuritadi;

kartotekalar va kolleksiyalarni yuritish samaradorligini oshirish yuzasidan takliflar tayyorlaydi;

ilmiy-tadqiqot ishlari va tajriba-konstruktorlik ishlanmalarida ishtirok etadi;

xorijiy mamlakatlarning ilgʻor tajribalarini muntazam oʻrganadi va amaliyotga tatbiq etish choralarini koʻradi;

j) MBL faoliyatini tashkiliy-uslubiy jihatdan taʼminlash sohasida:

MBLga kasbiy va axloqiy-psixologik tayyorgarlikka ega, irodali va maʼnaviy fazilatlarga ega boʻlgan kadrlarni tanlab olishni tashkil etadi;

MBL xodimlarini qayta tayyorlash va ularning malakasini oshirishni tashkil etish, xodimlar kasbiy tayyorgarligining yuqori darajasini taʼminlash uchun oʻqitishning zamonaviy texnologiyalari va usullaridan keng foydalanadi;

MBL hududiy bojxona boshqarmalaridagi tovarlarni klassifikatsiyalash guruhlarining soha yoʻnalishi boʻyicha faoliyatini muvofiqlashtiradi.

MBL qonunchilik hujjatlariga muvofiq boshqa funksiyalarni ham amalga oshirishi mumkin.

3-bob. MBLning huquq va majburiyatlari

7. MBL oʻziga yuklangan vazifalar va funksiyalarni amalga oshirish uchun quyidagi huquqlarga egadir:

MBL funksiyalarini va vazifalarini bajarish uchun kerak boʻladigan, qonunchilikda taqiqlanmagan hujjatlar, maʼlumotlar va xulosalarni bojxona organlari, davlat organlari va tashkilotlari hamda jismoniy va yuridik shaxslardan qonunchilikda belgilangan tartibda soʻrash va olish;

bojxona organlari va boshqa shaxslardan tovar namunalarini olish;

jismoniy va yuridik shaxslarga bojxona ekspertizasi, sertifikatlash bilan bogʻliq hamda boshqa pulli xizmatlar koʻrsatish, shuningdek, sugʻurta agenti sifatida faoliyat yuritish;

xizmat koʻrsatish faoliyatida laboratoriyaning moddiy-texnik bazasidan foydalanish hamda mazkur faoliyatga shtat xodimlarini jalb etish;

TIF TNga oʻzgartish va qoʻshimchalarni milliy va xalqaro qonunchilik talablariga muvofiq ishlab chiqish va belgilangan tartibda taklif kiritish;

qonunchilikda belgilangan tartibda bojxona ekspertizasi obyekti boʻlgan tovar va transport vositalarini koʻrikdan oʻtkazishda ishtirok etish;

qonunchilikda belgilangan tartibda bojxona nazorati ostida boʻlgan tovar va transport vositalari turgan hududga va binolarga kirish;

MBL vakolatiga oid masalalar boʻyicha ilmiy-amaliy institutlar, muassasalar, korxonalar va tashkilotlar bilan hamkorlik qilish;

tadqiqotlar oʻtkazish, xodimlar malakasini oshirish, tajriba almashish, ilmiy-amaliy seminarlar oʻtkazish borasida respublika va xorijiy davlatlarning ekspertiza muassasalari bilan oʻrnatilgan tartibda hamkorlikni amalga oshirish va memorandumlar imzolash;

MBL xodimlarining bilimi, mahorati, kasbiy tayyorgarligi, amaliy tajribasi darajasini va ekspertizalarni mustaqil ravishda bajarish salohiyatini baholash maqsadida MBL Ekspert-malaka komissiyasini tashkil etish va faoliyat yuritishini taʼminlash;

xodimlarning muayyan ekspertlik faoliyati boʻyicha malakasini har ikki yilda oshirib borish yuzasidan va ekspertizalarni mustaqil oʻtkazish huquqini olish uchun taʼlim tashkilotlari, vazirlik va idoralar mutaxassislarini jalb etgan holda qayta tayyorlash va malaka oshirish ishlarini tashkil etish;

MBLni rivojlantirish jamgʻarmasidagi mablagʻlarni tijorat banklarining depozit raqamlarida milliy va xorijiy valyutada joylashtirish;

xalqaro seminar, ilmiy-amaliy yigʻilishlarda ishtirok etish.

MBL qonunchilik hujjatlariga muvofiq boshqa huquqlarga ham ega boʻlishi mumkin.

8. MBLning majburiyatlari quyidagilardan iborat:

mazkur Ustavda belgilangan vazifalarni talab darajasida bajarishga;

qonunchilikda belgilangan tartibda zarur boʻlganda, namuna va sinamalarni olishda ekspert sifatida xodimlar ishtirokini taʼminlash;

xizmat vazifalarini amalga oshirishda maʼlum boʻlib qolgan davlat, xizmat va tijorat siri hisoblangan maʼlumot va axborotlarni oshkor etmaslik;

axborot xavfsizligini taʼminlash qoidalariga rioya qilish.

MBL qonunchilik hujjatlariga muvofiq boshqa majburiyatlarga ham ega boʻlishi mumkin.

4-bob. MBL faoliyatini tashkil etish

9. MBLning ofitser va serjantlar tarkibidagi xodimlari DBQ Raisi tomonidan oʻrnatilgan tartibda lavozimga tayinlanadi va lavozimdan ozod etiladi.

MBLning mutaxassis, yordamchi va xizmat koʻrsatuvchi xodimlari DBQ Raisi oʻrinbosari tomonidan mehnat qonunchiligi talablari asosida lavozimga tayinlanadi va lavozimdan ozod etiladi.

MBLning ofitser va serjantlar, shuningdek, mutaxassis, xizmat koʻrsatuvchi va yordamchi (texnik) xodimlari bilan kadrlar sohasiga oid munosabatlar Kadrlar boshqarmasi tomonidan amalga oshiriladi.

10. Oʻzbekiston Respublikasining respublika budjeti mablagʻlari, Oʻzbekiston Respublikasi Davlat bojxona qoʻmitasining budjetdan tashqari mablagʻlari, Markaziy bojxona laboratoriyasini rivojlantirish jamgʻarmasi (keyingi oʻrinlarda — Jamgʻarma), xalqaro moliya institutlari va xorijiy moliya tashkilotlarining grantlari, shuningdek, qonunchilik hujjatlari bilan taqiqlanmagan boshqa manbalar Markaziy bojxona laboratoriyasi faoliyatini moliyalashtirish manbalari hisoblanadi.

11. Jamgʻarma mablagʻlari quyidagi maqsadlarda sarflanadi:

Markaziy bojxona laboratoriyasining moddiy-texnik bazasini mustahkamlash hamda xodimlarni moddiy ragʻbatlantirish;

MBL xodimlarining malakasini oshirish, shu jumladan, xorijiy mamlakatlarga xizmat safarlarini amalga oshirish;

koʻrsatiladigan pulli xizmatlar ehtiyojidan kelib chiqib, Jamgʻarma mablagʻlari hisobidan belgilangan shtat jadvalidan tashqari qoʻshimcha xodimlarni fuqarolik huquqiy shartnoma asosida jalb qilish.

Bojxona qoʻmitasining soʻroviga asosan MBLning Jamgʻarma mablagʻlari Bojxona qoʻmitasining rivojlantirish jamgʻarmasiga oʻtkaziladi va Bojxona qoʻmitasi tomonidan qonunchilikda koʻzda tutilgan hollar bilan bir qatorda xodimlarga ustamalar toʻlash, bojxona obyektlarini kapital qurish, rekonstruksiya qilish va taʼmirlashga sarflanadi.

12. MBL boshligʻi:

oʻzining vakolati doirasida ekspertlik faoliyatini tashkil etish boʻyicha koʻrsatmalar, farmoyishlar, buyruqlar chiqaradi va DBQ rahbariyatiga bojxona organlari tomonidan bajarilishi majburiy boʻlgan farmoyishlar, buyruqlar loyihalarini kiritadi;

MBL faoliyatiga doir hujjatlarni tasdiqlaydi, pul mablagʻlarini tasarruf etadi, fuqarolik-huquqiy shartnomalarni tuzadi;

Jamgʻarma mablagʻlarining MBL ehtiyoji uchun sarflanishini belgilaydi;

tovarlarni TIF TN boʻyicha klassifikatsiyalash maqsadida, uning tarkibi, xususiyatlarini va boshqa jihatlarini aniqlashga qaratilgan bojxona ekspertizasi oʻtkazilishi tashkil etilishini nazorat qiladi;

oʻzining oʻrinbosarlari oʻrtasida funksional majburiyatlarni taqsimlaydi, ularga yuklangan majburiyatlarning bajarilishini nazorat qiladi;

MBLning ish rejalarini tasdiqlaydi;

TIF TN boʻyicha tovarlarni klassifikatsiyalash va klassifikatsiya qarorlarini qabul qilishni tashkil etadi va nazorat qiladi;

vakolatli organlar bilan hamkorlikda TIF TNni yuritish hamda uning yangi tahririni ishlab chiqishda ishtirok etishni tashkil etadi va nazorat qiladi;

sohadagi muammoli holatlar boʻyicha Umumjahon bojxona tashkiloti bilan hamkorlik qilishni tashkillashtiradi;

Oʻzbekiston Respublikasi hududiga olib kiriladigan va olib chiqiladigan tovarlarni akkreditatsiya doirasida sertifikatlash bilan bogʻliq boʻlgan xizmatlar koʻrsatishni tashkil etadi;

Davlat bojxona xizmati organlari ehtiyojiga koʻra sud ekspertizasining giyohvandlik vositalari, psixotrop moddalar ekspertizasi va boshqa kriminalistik turlarini oʻtkazish, jismoniy va yuridik shaxslarga TIF TN boʻyicha dastlabki qaror berish yuzasidan tegishli chora-tadbirlarni amalga oshirishni tashkil etadi;

xorijiy davlatlarga bojxona ekspertizasi sohasidagi xodimlarni malakasini oshirishga qaratilgan ilmiy anjumanlar, konferensiyalar, tashkil etishini tashkil etadi;

Oʻzbekiston Respublikasi va xorijiy davlatlarning davlat organlari, ilmiy muassasalari va tashkilotlari, oʻquv yurtlari bilan ilmiy, instrumental xizmat koʻrsatish, bojxona ekspertizasi sohasida muammoli masalalarni yechishga qaratilgan ishlarni olib borishni tashkil etish choralarini koʻradi;

tovarlarni TIF TN boʻyicha klassifikatsiyalash sohasida oʻtkaziladigan ilmiy-tadqiqot ishlarini amalga oshirishni tashkillashtiradi;

yangi turdagi ekspertizalar uchun uslublar ishlab chiqish va amaliyotga joriy qilish choralarini koʻradi;

MBL oʻquv mashgʻulotlari oʻtkazish uchun muhim hisoblangan tovarlar kolleksiyasini, oʻsimlik va sintetik giyohvandlik moddalari, psixotrop va kuchli ruhiy taʼsir qiluvchi moddalar kolleksiyasi, qalbaki hujjatlar va qimmatli qogʻozlar kartotekalarini tashkil etish va yuritishni tashkil etadi;

ilmiy-tadqiqot ishlari va tajriba-konstruktorlik ishlanmalarida ishtirok etish va xorijiy mamlakatlarning ilgʻor tajribalarini muntazam oʻrganish va amaliyotga tatbiq etish choralarini koʻradi;

MBLga kasbiy va axloqiy-psixologik tayyorgarlikka ega, irodali va maʼnaviy fazilatlarga ega boʻlgan kadrlarni tanlab oladi;

MBL xodimlarini qayta tayyorlash va ularning malakasini oshirishni tashkil etadi, xodimlar kasbiy tayyorgarligining yuqori darajasini taʼminlash uchun oʻqitishning zamonaviy texnologiyalari va usullaridan keng foydalanishni amalga oshiradi;

Tovarlarni TIF TN boʻyicha klassifikatsiyalash yoʻnalishi boʻyicha hududiy boshqarmalar faoliyatini muvofiqlashtiradi;

MBL vakolatiga kiradigan boshqa vazifalarni amalga oshiradi.

13. MBL boshligʻi oʻrinbosari — TIF TN boshqarmasi boshligʻi:

TIF TN boʻyicha tovarlarni klassifikatsiyalash toʻgʻrisida va klassifikatsiya qarorlarini qabul qiladi;

vakolatli organlar bilan hamkorlikda TIF TNni yuritish hamda uning yangi tahririni ishlab chiqishda ishtirok etishni tashkil etadi;

tovarlarni TIF TN boʻyicha klassifikatsiyalash yoʻnalishida hududiy boshqarmalar faoliyatini muvofiqlashtiradi.

tovarlarning klassifikatsiyasiga qaratilgan maʼlumotlarni yigʻish, tahlil qilish va saqlashni tashkil etadi;

tovarlarning klassifikatsiyasiga qaratilgan metodik yoʻriqnomalar chop etilishini taʼminlaydi;

tovarlar klassifikatsiyasida uchrayotgan xatoliklarni tahlil qilish va ularning oldini olish choralarini koʻradi;

sohadagi muammoli holatlar boʻyicha Umumjahon bojxona tashkiloti bilan hamkorlik qiladi;

huquqni muhofaza qiluvchi organlar bilan komission, kompleks ekspertizalarni oʻtkazishda ishtirok etadi, takroriy ekspertizalarni amalga oshirishni tashkil etadi;

Oʻzbekiston Respublikasi Bojxona kodeksiga asosan tovarlarning klassifikatsiyalanishiga nisbatan TIF TNga muvofiq dastlabki qaror qabul qilish choralarini koʻradi;

jismoniy va yuridik shaxslarga Oʻzbekiston Respublikasi hududiga olib kiriladigan va olib chiqiladigan tovarlarni TIF TN boʻyicha klassifikatsiyalashni tashkil etadi;

TIF TN sohasi boʻyicha maʼlumotlarni yigʻish, tahlil qilish, hisobotlarni shakllantirish va saqlashni tashkil etadi;

xorijiy davlatlarga bojxona ekspertizasi sohasida muammoli masalalarni yechishga qaratilgan ishlarni oʻrganishni tashkil etadi;

tovarlarni TIF TN boʻyicha klassifikatsiyalash sohasida oʻtkaziladigan ilmiy-tadqiqot ishlarini amalga oshirish uchun sharoitlar yaratadi;

namuna va sinamalar olishga doir metodik qoʻllanmalarni ishlab chiqishda va amaliyotga tatbiq etishda ishtirok etadi.

14. MBL boshligʻi oʻrinbosari — Ekspertiza boshqarmasi boshligʻi:

tovarlarni TIF TN boʻyicha klassifikatsiyalash maqsadida ularning tarkibi, xususiyatlari va boshqa jihatlarini aniqlashga qaratilgan bojxona ekspertizasini oʻtkazishni tashkil etadi;

tovarlarning kelib chiqish mamlakatini aniqlashga qaratilgan va tovarlarni qayta ishlash mahsulotlarida identifikatsiyalashga qaratilgan hamda nikotin saqlovchi mahsulotlar, spirtli ichimliklar tarkibini aniqlash boʻyicha bojxona ekspertizasini amalga oshirish choralarini koʻradi;

tovarlarni intellektual mulkka boʻlgan huquqlarga rioya etilishi uchun identifikatsiyalashni tashkil etadi;

yangi turdagi nikotin saqlovchi mahsulotlar va spirtli ichimliklar tahlillari boʻyicha ehtiyojlarni oʻrganadi;

jismoniy va yuridik shaxslarga Oʻzbekiston Respublikasi hududiga olib kiriladigan va olib chiqiladigan tovarlarni TIF TN kodlarini klassifikatsiyalashga qaratilgan ekspertizalarni oʻtkazishni tashkil etadi;

oʻsimlik, sintetik giyohvandlik vositalari va moddalari ekspertizasi, psixotrop moddalar va prekursorlar ekspertizasi, qimmatbaho metallar va zargarlik buyumlari ekspertizasi, kuchli taʼsir qiluvchi moddalar ekspertizasi, maxsus kimyoviy moddalar ekspertizasi, xatshunoslik ekspertizasi, hujjatlarning texnik ekspertizasi kabi sud kriminalistik ekspertizalarni oʻtkazishni tashkil etadi;

Oʻzbekiston Respublikasi va xorijiy davlatlarning davlat organlari, ilmiy muassasalari va tashkilotlari, oʻquv yurtlari bilan ilmiy, instrumental xizmat koʻrsatish, bojxona ekspertizasi sohasida muammoli masalalarni yechishga qaratilgan ishlarni olib borishni tashkil etadi;

tovarlarni TIF TN boʻyicha klassifikatsiyalash sohasida oʻtkaziladigan ilmiy-tadqiqot ishlarini amalga oshiradi;

yangi turdagi ekspertizalar uchun uslublarni ishlab chiqadi va amaliyotga joriy etadi;

namuna va sinamalar olishga doir metodik qoʻllanmalar ishlab chiqadi va amaliyotga tatbiq etadi;

kartotekalar va kolleksiyalarni yuritish samaradorligini oshirish yuzasidan takliflar tayyorlaydi;

ilmiy-tadqiqot ishlari va tajriba-konstruktorlik ishlanmalarida ishtirok etadi;

xorijiy mamlakatlarning ilgʻor tajribalarini muntazam ravishda oʻrganish va amaliyotga tatbiq etish choralarini koʻradi.

15. MBL tomonidan jismoniy va yuridik shaxslarga koʻrsatiladigan pulli xizmatlar turlari va qiymati DBQ tomonidan belgilanadi, bojxona organlariga xalqaro shartnomalar doirasida koʻrsatiladigan xizmatlar bundan mustasno.

Jismoniy va yuridik shaxslarga hamda xorijiy davlatlarning bojxona xizmati organlariga pulli xizmatlar koʻrsatishdan tushadigan mablagʻlar toʻliq hajmda Markaziy bojxona laboratoriyasini rivojlantirish jamgʻarmasiga oʻtkaziladi.

MBLning pulli xizmatlari boʻyicha mavjud debitorlik qarzdorligi yuzasidan mablagʻlarni qaytarib berish toʻgʻrisida murojaat uch yil muddat ichida taqdim etilmaganda, ushbu pul mablagʻlari bojxona organlari tomonidan oʻn besh ish kuni ichida Oʻzbekiston Respublikasining Davlat budjetiga oʻtkaziladi.

5-bob. Yakunlovchi qoidalar

16. Mazkur Ustav talablari buzilishida aybdor boʻlgan shaxslar qonunchilik hujjatlarida belgilangan tartibda javobgar boʻladi.

Vazirlar Mahkamasining 2021-yil 30-dekabrdagi 790-son qaroriga 3-ILOVA

Oʻzbekiston Respublikasi Davlat bojxona qoʻmitasi Markaziy bojxona laboratoriyasini xalqaro moliya va boshqa institutlar, xorijiy tashkilotlarning grantlarini jalb qilgan holda shuningdek, budjetdan tashqari mablagʻlari hisobidan sotib olinadigan zamonaviy laboratoriya-texnologik uskunalar va inventarlar

T/r Nomlanishi Oʻlchov birligi Soni TIF TN kodi 1. MC-ICP-MS Induktiv bogʻlangan plazmali izotop mass-spektrometr (izotop standartlar bilan) dona 1 9027 30 000 0 2. XRFRentgen fluoressentli analizator (press va pechkasi bilan) dona 1 9027 80 170 0 3. XRD rentgen-difraksion analizator (maʼlumotlar bazasi bilan) dona 1 9027 80 170 0 4. Mass–spektrometrik detektorli yuqori samarali suyuqlik xromatografi dona 1 9027 20 000 0 5. Analitik qurilmalar uchun maʼlumotlar bazasi (spektral baza) jamlanma 1 Dasturiy taʼminot 6. GMO laboratoriya kompleksi (DNK real taym PZR, sekvinator va boshqalar) jamlanma 1 9027 7. Yuqori aniqlikdagi raqamli kameraga ega materialshunoslik sterio-mikroskop (Discovery V20) dona 1 9011 10 900 0 8. Rotorli bugʻlatkich dona 1 8419 89 989 0 9. Kimyoviy mebellar (Kottermann) jamlanma 1 9403 10 910 0, 9401 30 000 1 10. Yuqori aniqlikdagi raqamli kameraga ega biologik mikroskop dona 1 9011 80 000 0 11. Mikroavtobus bazasida harakatlanuvchi laboratoriya dona 1 8705 12. Kimyoviy reaktivlar: Ftor brom metanoldagi eritmasi (BF 3 -methanol) kislotalar ishqoriy metallar ishqorlar Metanol Etanol Xloroform Etilatsetat Geksan Petroleyn efiri Atsetonitril jamlanma 1 2901, 2805, 2806, 2807, 2815, 2902, 2903, 2905, 2915, 2926 13. Miqdoriy analizlar uchun standartlar: Yogʻ kislotalari standartlari Element tahlili uchun elementlar toʻplamining standarti Giyohvandlik vositalari tarkibidagi faol moddalar standartlari Tamaki maxsulotlari miqdoriy tahlili uchun standart moddalar (Nikotin moddasi standarti) Alkogol mahsulotlari miqdoriy tahlili uchun standart moddalar Gaz xramatografi, masspektrometr uchun standartlar jamlanma 1 3822 00 000 0 14. Raqamli mikrometr dona 2 9017 30 000 0 15. Briks koʻrsatkichini oʻlchovchi refraktometr (Mettler toledo) dona 1 9027 50 000 0 16. Raqamli tenziometr (Kruss GmbN) dona 1 9027 17. Ustaxona jihozlari jamlanma 1 8467295100, 8205400000, 9030310000 18. Maxsus kiyim bosh (maxsus kiyim, kimyoviy moddalarga chidamli poyabzal, yuz niqobi) jamlanma 20 6211 32 000 0, 6403 40 000 0 19. Laboratoriya idishlari , shu jumladan: kimyoviy laboratoriya oʻlchov idishlari toʻplami (A toifali) laboratoriya idishlari (maxsus va boshqa toifali) jamlanma 2 7017 20. Ilmiyadabiyotlarvastandartlar : ISO (International Organization for Standardization) standartlari analitikkimyo 6 tahriri (Analytical Chemistry, 6th Edition) ASTM (American Society for Testing and Materials) standarlari BSI (British Standards Institute) standartlari rasmiyanalitikmetodlartoʻplami (Official Method of Analysis, Association of Official Analytical Chemists (AOAC)) polimerlarfanivatexnologiyasiensiklopediyasi (Encyclopedia of Polymer Science and Technology) plastmassaindentifikatsiyalashtahlillari (Identification and Analysis of Plastics) jamlanma 1 4901 10 000 0 21. Jahon bojxona tashkilotining NS elektron bazasi 2022 — 2027-yillar uchun dona 1 Dasturiy taʼminot 22. Ehtiyot qismlar (layner, vialka qopqoqlari bilan, ferrullar, pirolizer uchun shishalar va boshqalar) jamlanma 1 9027 90 23. Standartlar va kimyoviy moddalar saqlash moʻljallangan laborator muzlatkich dona 1 8418 24. Analitik tarozi dona 1 9016

Oʻzbekiston Respublikasining Bosh vaziri A. ARIPOV

Toshkent sh.,

2021-yil 30-dekabr,

790-son

(Qonunchilik maʼlumotlari milliy bazasi, 30.12.2021-y., 09/21/790/1223-son, 27.04.2022-y., 06/22/122/0396-son; 05.09.2022-y., 09/22/487/0794-son; 07.11.2025-y., 09/25/700/1022-son)

lex.uz