📅 2022-yil 17-yanvar · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2022 йил 17 январь · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 17 января 2022 г. · Постановления Кабинета Министров
Официальный текст. Официальный документ. Редакционные примечания не включены.
📅 17 January 2022 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
Иссиқхона хўжаликлари фаолиятини самарали ташкил этиш бўйича қўшимча чора-тадбирлар тўғрисида
Мамлакатда озиқ-овқат хавфсизлигини таъминлаш, иссиқхона хўжаликларини молиявий соғломлаштириш, экспортбоп ва рақобатбардош қишлоқ хўжалиги маҳсулотларини узлуксиз етиштириш ҳамда қишлоқ жойларида аҳоли бандлигини таъминлаш ва даромад олишга янада қулай шароит яратиш мақсадида Вазирлар Маҳкамаси қарор қилади:
1. Ўзбекистон Республикаси Бош вазирининг ўринбосари Ш.М. Ғаниев ва Ҳисоб палатаси раиси ўринбосари С.С. Саидкаримов бошчилигида «Бухоро агро» эркин иқтисодий зонасидаги муаммоли иссиқхона хўжаликлари фаолиятини ўрганиш бўйича республика ишчи гуруҳи ташкил этилсин ва унинг таркиби иловага мувофиқ тасдиқлансин.
Республика ишчи гуруҳи икки ҳафта муддатда «Бухоро агро» эркин иқтисодий зонасидаги иссиқхона хўжаликлари моддий-техника базасини, иқтисодий аҳволини ва инфратузилма билан таъминланганлик даражасини ўрганиб чиқсин.
2. Ўзбекистон Республикаси Иқтисодий тараққиёт ва камбағалликни қисқартириш вазирлиги, Қишлоқ хўжалиги вазирлиги, Марказий банк ҳамда тижорат банкларининг «Бухоро агро» эркин иқтисодий зонасидаги иссиқхона хўжаликларига:
давлат дастурлари доирасида ҳамда давлат қарзи эвазига жалб қилинадиган ресурслар ҳисобидан ажратиладиган кредитлар муддатини 7 йилдан 10 йилгача қилиб белгилаш ҳамда мазкур иссиқхона хўжаликларига илгари ажратилган кредит муддатларини тегишли равишда 3 йилгача узайтириш;
табиий газ учун мавжуд қарздорликни 6 ойга узайтириш ва 2022 йил 1 июлдан бошлаб тенг улушларда йил охиригача қайтариш;
табиий газ учун тўловни ўз вақтида амалга оширмаганлик учун пеня миқдорини 0,4 фоизидан 0,1 фоизга тушириш, шунингдек 2021 йил 31 декабрь ҳолатига ҳисобланган пеня суммасини ҳисобдан чиқариш;
табиий газ учун оширилган ставкада (шартномавий ҳажмдан ошган қисм учун 1,4 коэффициент) тўлов қўллаш тартибини бекор қилиш тўғрисидаги таклифларига розилик берилсин.
Бунда мазкур имтиёзлар Республика ишчи гуруҳининг ўрганиш натижаларига кўра шакллантирилган рўйхат асосида тақдим этилади.
3. Ўзбекистон Республикаси Қишлоқ хўжалиги вазирлиги ҳузуридаги Боғдорчилик ва иссиқхона хўжалигини ривожлантириш агентлиги:
республикадаги мавжуд тажрибали ва малакали агроном, энтомолог, лаборатория мутахассисларини «Бухоро агро» эркин иқтисодий зонасидаги иссиқхона хўжаликларига бириктириш;
хорижий агрономларни жалб қилган ҳолда давлат дастурлари доирасида кредит ажратилган республикадаги иссиқхона хўжаликлари фаолиятини аудитдан ўтказиш;
Ўзбекистон Республикаси Президентининг «Мева-сабзавотчилик соҳасини давлат томонидан қўллаб-қувватлаш, тармоқда кластер ва кооперация тизимини янада ривожлантириш чора-тадбирлари тўғрисида» 2021 йил 15 декабрдаги ПҚ-52-сон қарорида белгиланган маблағлар ҳисобидан «Бухоро агро» эркин иқтисодий зонасидаги иссиқхона хўжаликларига экинларни етиштириш учун ҳосил қийматининг 50 фоизигача йиллик 14 фоиз (шундан 2 фоизи банк маржаси) ставкада 6 ойлик имтиёзли давр билан 12 ой муддатга кредитлар ажратиш чораларини кўрсин.
4. Ўзбекистон Республикаси Ўсимликлар карантини ва ҳимояси агентлиги икки ҳафта муддатда Ўзбекистон Республикаси Қишлоқ хўжалиги вазирлиги ҳузуридаги Боғдорчилик ва иссиқхона хўжалигини ривожлантириш агентлиги ҳамда масалага алоқадор бошқа вазирлик ва идоралар билан биргаликда республика ҳудудларида фаолият кўрсатаётган иссиқхоналарда етиштирилган қишлоқ хўжалиги маҳсулотларини экспортга йўналтиришда вужудга келадиган муаммоларни бартараф этишга қаратилган чора-тадбирлар режасини ишлаб чиқсин ва ижросини таъминласин.
5. Республика ишчи гуруҳи Қорақалпоғистон Республикаси Вазирлар Кенгаши, вилоятлар ҳокимликлари, хизмат кўрсатувчи тижорат банклари билан биргаликда «Бухоро агро» эркин иқтисодий зонасидаги самарасиз иссиқхона хўжаликларини аниқлаб, уларнинг мулкдорлари билан келишган ҳолда мазкур иссиқхона хўжаликларини янги ташаббускорларга ўтказиб берилишини (олди-сотди, кредит бўйича банк олдидаги мажбуриятларни ўтказиш ёки бошқа келишилган шартларда) ташкил этсин.
Республика ишчи гуруҳи, Қорақалпоғистон Республикаси Вазирлар Кенгаши раиси, вилоят ҳокимлари самарасиз иссиқхона хўжаликларини сотишда иқтисодий жиҳатдан барқарор фаолият юритаётган, зарурий инфратузилма объектлари, шунингдек, мол-мулк ва бошқа воситаларга эга бўлган салоҳиятли ташаббускорларни танланишига шахсан жавобгар ҳисобланади.
6. Республика ишчи гуруҳи, Ўзбекистон Республикаси Қишлоқ хўжалиги вазирлиги ҳузуридаги Боғдорчилик ва иссиқхона хўжалигини ривожлантириш агентлиги бир ой муддатда иссиқхона хўжаликлари молиявий аҳволини соғломлаштириш ва ривожлантириш бўйича тегишли қарор лойиҳасини Вазирлар Маҳкамасига киритсин.
7. Ўзбекистон Республикаси Қишлоқ хўжалиги вазирлиги манфаатдор вазирлик ва идоралар билан биргаликда бир ой муддатда қонунчилик ҳужжатларига ушбу қарордан келиб чиқадиган ўзгартириш ва қўшимчалар киритиш тўғрисида Вазирлар Маҳкамасига таклиф киритсин.
8. Мазкур қарорнинг бажарилишини назорат қилиш Ўзбекистон Республикаси Бош вазирининг аграр ва озиқ-овқат соҳаларини ривожлантириш масалалари бўйича ўринбосари Ш.М. Ғаниев ва қишлоқ хўжалиги вазири Ж.А. Ходжаев зиммасига юклансин.
Вазирлар Маҳкамасининг 2022 йил 17 январдаги 27-сон қарорига ИЛОВА
«Бухоро агро» эркин иқтисодий зонасидаги муаммоли иссиқхона хўжаликлари фаолиятини ўрганиш бўйича республика ишчи гуруҳи таркиби
1. Ш.М. Ғаниев — Ўзбекистон Республикаси Бош вазирининг ўринбосари, ишчи гуруҳи раҳбари 2. С.С. Саидкаримов — Ўзбекистон Республикаси Ҳисоб палатаси раисининг ўринбосари, ишчи гуруҳи раҳбари ўринбосари (келишувга кўра) 3. Х.М. Каримов — Боғдорчилик ва иссиқхона хўжалигини ривожлантириш агентлиги директори, ишчи гуруҳи раҳбари ўринбосари 4. А.А. Камалов — Ўзбекистон Республикаси Марказий банки раисининг ўринбосари 5. А.Д. Асамов — Ўзбекистон Республикаси Қишлоқ хўжалиги вазирининг ўринбосари 6. Ш.Х. Ходжаев — Ўзбекистон Республикаси Энергетика вазирининг ўринбосари 7. Ж.И. Абдиев — Давлат солиқ қўмитаси раиси ўринбосари 8. Б.Б. Эшмуратов — «Ҳудудгазтаъминот» АЖ раиси 9. Б.Э. Муродов — Ўсимликлар карантини ва ҳимояси агентлиги директори ўринбосари 10. А.И. Назаров — Бухоро вилояти ҳокимининг қишлоқ ва сув хўжалиги масалалари бўйича ўринбосари 11. Ж.У. Эшниёзов — Ўзбекистон Республикаси Вазирлар Маҳкамаси бош мутахассиси — ишчи гуруҳ котиби
Ўзбекистон Республикасининг Бош вазири А. АРИПОВ
Тошкент ш.,
2022 йил 17 январь,
27-сон
Oʻzbekiston Respublikasi Vazirlar Mahkamasining
qarori
Issiqxona xoʻjaliklari faoliyatini samarali tashkil etish boʻyicha qoʻshimcha chora-tadbirlar toʻgʻrisida
Mamlakatda oziq-ovqat xavfsizligini taʼminlash, issiqxona xoʻjaliklarini moliyaviy sogʻlomlashtirish, eksportbop va raqobatbardosh qishloq xoʻjaligi mahsulotlarini uzluksiz yetishtirish hamda qishloq joylarida aholi bandligini taʼminlash va daromad olishga yanada qulay sharoit yaratish maqsadida Vazirlar Mahkamasi qaror qiladi:
1. Oʻzbekiston Respublikasi Bosh vazirining oʻrinbosari Sh.M. Gʻaniyev va Hisob palatasi raisi oʻrinbosari S.S. Saidkarimov boshchiligida “Buxoro agro” erkin iqtisodiy zonasidagi muammoli issiqxona xoʻjaliklari faoliyatini oʻrganish boʻyicha respublika ishchi guruhi tashkil etilsin va uning tarkibi ilovaga muvofiq tasdiqlansin.
Respublika ishchi guruhi ikki hafta muddatda “Buxoro agro” erkin iqtisodiy zonasidagi issiqxona xoʻjaliklari moddiy-texnika bazasini, iqtisodiy ahvolini va infratuzilma bilan taʼminlanganlik darajasini oʻrganib chiqsin.
2. Oʻzbekiston Respublikasi Iqtisodiy taraqqiyot va kambagʻallikni qisqartirish vazirligi, Qishloq xoʻjaligi vazirligi, Markaziy bank hamda tijorat banklarining “Buxoro agro” erkin iqtisodiy zonasidagi issiqxona xoʻjaliklariga:
davlat dasturlari doirasida hamda davlat qarzi evaziga jalb qilinadigan resurslar hisobidan ajratiladigan kreditlar muddatini 7 yildan 10 yilgacha qilib belgilash hamda mazkur issiqxona xoʻjaliklariga ilgari ajratilgan kredit muddatlarini tegishli ravishda 3 yilgacha uzaytirish;
tabiiy gaz uchun mavjud qarzdorlikni 6 oyga uzaytirish va 2022-yil 1-iyuldan boshlab teng ulushlarda yil oxirigacha qaytarish;
tabiiy gaz uchun toʻlovni oʻz vaqtida amalga oshirmaganlik uchun penya miqdorini 0,4 foizidan 0,1 foizga tushirish, shuningdek 2021-yil 31-dekabr holatiga hisoblangan penya summasini hisobdan chiqarish;
tabiiy gaz uchun oshirilgan stavkada (shartnomaviy hajmdan oshgan qism uchun 1,4 koeffitsiyent) toʻlov qoʻllash tartibini bekor qilish toʻgʻrisidagi takliflariga rozilik berilsin.
Bunda mazkur imtiyozlar Respublika ishchi guruhining oʻrganish natijalariga koʻra shakllantirilgan roʻyxat asosida taqdim etiladi.
3. Oʻzbekiston Respublikasi Qishloq xoʻjaligi vazirligi huzuridagi Bogʻdorchilik va issiqxona xoʻjaligini rivojlantirish agentligi:
respublikadagi mavjud tajribali va malakali agronom, entomolog, laboratoriya mutaxassislarini “Buxoro agro” erkin iqtisodiy zonasidagi issiqxona xoʻjaliklariga biriktirish;
xorijiy agronomlarni jalb qilgan holda davlat dasturlari doirasida kredit ajratilgan respublikadagi issiqxona xoʻjaliklari faoliyatini auditdan oʻtkazish;
Oʻzbekiston Respublikasi Prezidentining “Meva-sabzavotchilik sohasini davlat tomonidan qoʻllab-quvvatlash, tarmoqda klaster va kooperatsiya tizimini yanada rivojlantirish chora-tadbirlari toʻgʻrisida” 2021-yil 15-dekabrdagi PQ-52-son qarorida belgilangan mablagʻlar hisobidan “Buxoro agro” erkin iqtisodiy zonasidagi issiqxona xoʻjaliklariga ekinlarni yetishtirish uchun hosil qiymatining 50 foizigacha yillik 14 foiz (shundan 2 foizi bank marjasi) stavkada 6 oylik imtiyozli davr bilan 12 oy muddatga kreditlar ajratish choralarini koʻrsin.
4. Oʻzbekiston Respublikasi Oʻsimliklar karantini va himoyasi agentligi ikki hafta muddatda Oʻzbekiston Respublikasi Qishloq xoʻjaligi vazirligi huzuridagi Bogʻdorchilik va issiqxona xoʻjaligini rivojlantirish agentligi hamda masalaga aloqador boshqa vazirlik va idoralar bilan birgalikda respublika hududlarida faoliyat koʻrsatayotgan issiqxonalarda yetishtirilgan qishloq xoʻjaligi mahsulotlarini eksportga yoʻnaltirishda vujudga keladigan muammolarni bartaraf etishga qaratilgan chora-tadbirlar rejasini ishlab chiqsin va ijrosini taʼminlasin.
5. Respublika ishchi guruhi Qoraqalpogʻiston Respublikasi Vazirlar Kengashi, viloyatlar hokimliklari, xizmat koʻrsatuvchi tijorat banklari bilan birgalikda “Buxoro agro” erkin iqtisodiy zonasidagi samarasiz issiqxona xoʻjaliklarini aniqlab, ularning mulkdorlari bilan kelishgan holda mazkur issiqxona xoʻjaliklarini yangi tashabbuskorlarga oʻtkazib berilishini (oldi-sotdi, kredit boʻyicha bank oldidagi majburiyatlarni oʻtkazish yoki boshqa kelishilgan shartlarda) tashkil etsin.
Respublika ishchi guruhi, Qoraqalpogʻiston Respublikasi Vazirlar Kengashi raisi, viloyat hokimlari samarasiz issiqxona xoʻjaliklarini sotishda iqtisodiy jihatdan barqaror faoliyat yuritayotgan, zaruriy infratuzilma obyektlari, shuningdek, mol-mulk va boshqa vositalarga ega boʻlgan salohiyatli tashabbuskorlarni tanlanishiga shaxsan javobgar hisoblanadi.
6. Respublika ishchi guruhi, Oʻzbekiston Respublikasi Qishloq xoʻjaligi vazirligi huzuridagi Bogʻdorchilik va issiqxona xoʻjaligini rivojlantirish agentligi bir oy muddatda issiqxona xoʻjaliklari moliyaviy ahvolini sogʻlomlashtirish va rivojlantirish boʻyicha tegishli qaror loyihasini Vazirlar Mahkamasiga kiritsin.
7. Oʻzbekiston Respublikasi Qishloq xoʻjaligi vazirligi manfaatdor vazirlik va idoralar bilan birgalikda bir oy muddatda qonunchilik hujjatlariga ushbu qarordan kelib chiqadigan oʻzgartirish va qoʻshimchalar kiritish toʻgʻrisida Vazirlar Mahkamasiga taklif kiritsin.
8. Mazkur qarorning bajarilishini nazorat qilish Oʻzbekiston Respublikasi Bosh vazirining agrar va oziq-ovqat sohalarini rivojlantirish masalalari boʻyicha oʻrinbosari Sh.M. Gʻaniyev va qishloq xoʻjaligi vaziri J.A. Xodjayev zimmasiga yuklansin.
Vazirlar Mahkamasining 2022-yil 17-yanvardagi 27-son qaroriga ILOVA
“Buxoro agro” erkin iqtisodiy zonasidagi muammoli issiqxona xoʻjaliklari faoliyatini oʻrganish boʻyicha respublika ishchi guruhi tarkibi
1. Sh.M. Gʻaniyev — Oʻzbekiston Respublikasi Bosh vazirining oʻrinbosari, ishchi guruhi rahbari 2. S.S. Saidkarimov — Oʻzbekiston Respublikasi Hisob palatasi raisining oʻrinbosari, ishchi guruhi rahbari oʻrinbosari (kelishuvga koʻra) 3. X.M. Karimov — Bogʻdorchilik va issiqxona xoʻjaligini rivojlantirish agentligi direktori, ishchi guruhi rahbari oʻrinbosari 4. A.A. Kamalov — Oʻzbekiston Respublikasi Markaziy banki raisining oʻrinbosari 5. A.D. Asamov — Oʻzbekiston Respublikasi Qishloq xoʻjaligi vazirining oʻrinbosari 6. Sh.X. Xodjayev — Oʻzbekiston Respublikasi Energetika vazirining oʻrinbosari 7. J.I. Abdiyev — Davlat soliq qoʻmitasi raisi oʻrinbosari 8. B.B. Eshmuratov — “Hududgaztaʼminot” AJ raisi 9. B.E. Murodov — Oʻsimliklar karantini va himoyasi agentligi direktori oʻrinbosari 10. A.I. Nazarov — Buxoro viloyati hokimining qishloq va suv xoʻjaligi masalalari boʻyicha oʻrinbosari 11. J.U. Eshniyozov — Oʻzbekiston Respublikasi Vazirlar Mahkamasi bosh mutaxassisi — ishchi guruh kotibi
Oʻzbekiston Respublikasining Bosh vaziri A. ARIPOV
Toshkent sh.,
2022-yil 17-yanvar,
27-son