📅 2022-yil 18-yanvar · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2022 йил 18 январь · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 18 января 2022 г. · Постановления Кабинета Министров
Официальный текст. Официальный документ. Редакционные примечания не включены.
📅 18 January 2022 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
ТУЗИЛМАСИ
НИЗОМ
Истеъдодли ёшларни қўллаб-қувватлаш «Улуғбек» жамғармаси фаолиятини ривожлантириш чора-тадбирлари тўғрисида
Мамлакатимизда иқтидорли ёшларнинг ташаббусларини қўллаб-қувватлаш борасида амалга оширилаётган ишларни янада жадаллаштириш, уларни илмий-техник фаолиятга кенг жалб қилиш, иқтидорли ёшларнинг, жумладан, олис ҳудудларда истиқомат қилаётган йигит-қизларнинг билим, кўникма ва малакасини ошириш, инновацион ғояларини амалиётга татбиқ этиш ҳамда ҳаётда ўз ўрнини топишига кўмаклашишга қаратилган ишларни тизимли ташкил этиш мақсадида Вазирлар Маҳкамаси қарор қилади:
1. Истеъдодли ёшларни қўллаб-қувватлаш «Улуғбек» жамғармасининг (кейинги ўринларда — Жамғарма) олий органи — Конференцияси томонидан Жамғарманинг янгиланган тузилмаси 1-иловага мувофиқ тасдиқланганлиги маълумот учун қабул қилинсин.
2. Қуйидагилар Жамғарма фаолиятининг асосий йўналишлари этиб белгиланганлиги инобатга олинсин:
иқтидорли ёшларни излаб топиш, истеъдодини рўёбга чиқариш ва уларни қўллаб-қувватлашга кўмаклашиш;
давлат ва нодавлат ташкилотлари билан ҳамкорликда иқтидорли ёшларни аниқлаш ҳамда уларни илмий-техник фаолиятга кенг жалб этиш тизимини йўлга қўйишда иштирок этиш;
иқтидорли ёшларнинг, жумладан, Жамғарма томонидан ўтказилган танловлар ғолиблари, Президент гранти ва номли стипендиялар, «Ўзбекистон учун 100 ғоя» лойиҳаси совриндорларининг илмий-техник ишланмалари, ғоя ва ташаббусларининг амалиётга жорий этилишини қўллаб-қувватлаш;
давлат ва нодавлат ташкилотлар билан ҳамкорликда «Мирзо Улуғбек ворислари» республика танловини ташкил этиш, шунингдек, соҳа мутахассисларини жалб этган ҳолда иқтидорли ёшларни мақсадли ўқитиш;
иқтисодиёт тармоқларининг эҳтиёжларини ҳисобга олган ҳолда замонавий талабларга жавоб берадиган юқори малакали мутахассислар захирасини шакллантиришда қатнашиш;
илм-фан ва таълимга оид рисолалар, буклетлар ва бошқа адабиётларни нашр этиш ва тарқатиш.
3. Инновацион ривожланиш вазирлиги, Ёшлар ишлари агентлиги, Олий ва ўрта махсус таълим вазирлиги, Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликларининг 2022 йилдан бошлаб ҳар йили иқтидорли ёшларни кашф қилиш ва уларни қўллаб-қувватлашга қаратилган «Мирзо Улуғбек ворислари» республика танловини (кейинги ўринларда — Танлов) ўтказиш тўғрисидаги таклифи маъқуллансин.
Белгилансинки:
а) Танловнинг:
1-босқичи февраль-март ойларида туман (шаҳар)ларда ўтказилади ва унда энг юқори натижага эришган ҳар бир туман (шаҳар)дан 5 нафардан номзодлар 2-босқичга йўлланма олади;
2-босқичи апрель ойида Қорақалпоғистон Республикаси, вилоятлар ва Тошкент шаҳрида ўтказилади ҳамда Қорақалпоғистон Республикаси, вилоятлар ва Тошкент шаҳрида ҳар биридан энг юқори натижага эришган 20 нафар ёш навбатдаги босқичга йўлланма олади;
3-босқичи май ойида ўтказилади ва унда энг юқори натижага эришган 100 нафар ёш танловнинг республика босқичи ғолиби деб топилади;
1, 2 ва 3-босқичлар ғолиблари тегишлича базавий ҳисоблаш миқдорининг 5, 10 ва 20 баравари миқдорида бир марталик пул мукофоти ва диплом билан тақдирланади;
республика босқичи ғолиблари Жамғарма томонидан ташкил этиладиган мақсадли ўқув курсларида бепул таҳсил олади. Ўқишни муваффақиятли тамомлаган ёшлар ҳудудлар бўйича ишлаб чиқариш ташкилотлари ва тадбиркорлик субъектларига ихтиёрийлик асосида бириктирилади ҳамда «Ёшлар академияси» ва «Келажак лидерлари клуби»га жалб этилади;
б) танлов Жамғарма томонидан Инновацион ривожланиш вазирлиги, Ёшлар ишлари агентлиги, Олий ва ўрта махсус таълим вазирлиги, Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари билан биргаликда ўтказилади;
в) танловнинг 1 ва 2-босқичларига тайёргарлик кўриш ва уни ўтказиш, ушбу босқич ғолибларини тақдирлаш билан боғлиқ харажатлар маҳаллий бюджетнинг қўшимча манбаларидан белгиланган тартибда ажратилган маблағлар ҳисобидан қопланади.
4. «Мирзо Улуғбек ворислари» республика танловини ўтказиш тартиби тўғрисидаги низом 2-иловага мувофиқ тасдиқлансин.
5. Инновацион ривожланиш вазирлиги Танловга тайёргарлик кўриш ва ўтказиш, унинг республика босқичи ғолибларини тақдирлаш билан боғлиқ харажатларни ҳар йили, шунингдек, Жамғармада илм-фан ривожланишининг истиқболли йўналишларига мос замонавий лаборатория ҳамда инновацион кичик босмахонани ташкил этиш харажатларини Инновацион ривожланиш вазирлигининг Илм-фанни молиялаштириш ва инновацияларни қўллаб-қувватлаш жамғармаси маблағлари ҳисобидан қоплаб борсин.
6. Жамғарманинг Инновацион ривожланиш вазирлиги, Ёшлар ишлари агентлиги, Фанлар академияси, Олий ва ўрта махсус таълим вазирлигининг манфаатдор вазирлик ва идоралар ҳамда бошқа ташкилотлар билан биргаликда икки ой муддатда «Истеъдодли ёшлар ахборотномаси» илмий-амалий электрон журналини ҳамда «Мирзо Улуғбек ворислари» электрон порталини ташкил этиш тўғрисидаги таклифи маъқуллансин.
Бунда, «Мирзо Улуғбек ворислари» электрон порталида истеъдодли ёшларнинг электрон базаси шакллантирилади, ўқув курслари битирувчиларининг рейтинги жорий этилиб, инновацион ғоялари ва илмий-техник ишланмалари баҳолаб борилади.
7. Ўзбекистон Республикаси Олий Мажлиси ҳузуридаги Фуқаролик жамияти институтларини қўллаб-қувватлаш жамоат фонди маблағларини бошқариш бўйича Парламент комиссиясининг ушбу жамоат фондига 2022 йилнинг 1 февралидан бошлаб Жамғармани сақлаб туриш ва унинг фаолиятини самарали ташкил этиш учун давлат субсидияси ажратиш тўғрисидаги таклифи маълумот учун қабул қилинсин.
8. Қуйидагилар Жамғарма фаолиятини молиялаштириш манбалари этиб белгиланганлиги инобатга олинсин:
Ўзбекистон Республикаси Олий Мажлиси ҳузуридаги Фуқаролик жамияти институтларини қўллаб-қувватлаш жамоат фонди томонидан ҳар йили ажратиладиган давлат субсидияси;
жисмоний ва юридик шахсларнинг ҳомийлик хайриялари;
халқаро молия институтлари ва хорижий ташкилотларнинг грантлари;
хўжалик фаолияти ва шартнома асосида хизматлар кўрсатишдан тушадиган маблағлар;
қонунчилик ҳужжатларида тақиқланмаган бошқа манбалар.
9. «Олмалиқ кон-металлургия комбинати» акциядорлик жамиятининг Жамғармага ҳомийлик хайрияси сифатида 1 та хизмат автотранспорт воситаси ва 1 та автобус ажратиш тўғрисидаги таклифи маъқуллансин.
10. Давлат активларини бошқариш агентлиги, Қурилиш вазирлиги ва Тошкент шаҳар ҳокимлигининг:
Тошкент шаҳри, Мирзо Улуғбек тумани, Мовароуннаҳр кўчаси, 24-уй манзилида жойлашган Бўш турган объектлардан самарали фойдаланишни ташкил этиш марказининг Тошкент шаҳар ҳудудий бошқармаси бино ва иншоотларига (кейинги ўринларда — объект) Жамғармани текин фойдаланиш ҳуқуқи асосида жойлаштириш;
Жамғарманинг самарали фаолият олиб бориши учун объектда мукаммал таъмирлаш ҳамда замонавий тарзда жиҳозлаш ишларини амалга ошириш тўғрисидаги таклифларига розилик берилсин.
11. Давлат активларини бошқариш агентлиги Тошкент шаҳар ҳокимлиги билан биргаликда бир ой муддатда Жамғармани белгиланган тартибда объектга жойлаштирилишини таъминласин.
12. Белгилансинки, объектда мукаммал таъмирлаш ва замонавий тарзда жиҳозлаш ишларини амалга ошириш доирасида:
Тошкент шаҳар ҳокимлиги «Ягона буюртмачи хизмати» инжиниринг компанияси — буюртмачи функциясини бажаради;
бош лойиҳа ва бош пудрат ташкилотлари қонунчилик ҳужжатларида белгиланган тартибда тендер (танлов) савдолари асосида аниқланади;
мукаммал таъмирлаш ва жиҳозлаш ишлари билан боғлиқ харажатлар Вазирлар Маҳкамасининг захира жамғармаси ҳисобидан амалга оширилади.
Бунда, объектда ўқув аудиториялари, замонавий лаборатория, кутубхона ташкил этиш, кичик инновацион босмахона фаолияти учун шарт-шароитлар яратиш ҳамда лифт ўрнатиш лозимлиги инобатга олинсин.
13. Тошкент шаҳар ҳокимлиги Молия вазирлиги ва Қурилиш вазирлиги билан биргаликда Жамғарма қошида ташкил этиладиган ўқув курсларида таҳсил оладиган истеъдодли ёшларни ётоқхона билан таъминлаш масаласини атрофлича ўрганиб чиқиб, икки ҳафта муддатда Вазирлар Маҳкамасига асосланган таклиф киритсин.
14. Молия вазирлиги объектни мукаммал таъмирлаш ва замонавий тарзда жиҳозлаш ишларини қисқа муддатда якунлаш учун асосланган ҳисоб-китобларга мувофиқ Вазирлар Маҳкамасининг захира жамғармасидан буюртмачига зарур маблағ ажратилишини таъминласин.
15. Мазкур қарорнинг бажарилишини назорат қилиш Ўзбекистон Республикаси инновацион ривожланиш вазири И.Ю. Абдураҳмонов зиммасига ҳамда Вазирлар Маҳкамасининг Ёшлар, жамоат ташкилотлари, маҳалла ва оилани қўллаб-қувватлаш масалалари котибиятига юклансин.
Вазирлар Маҳкамасининг 2022 йил 18 январдаги 30-сон қарорига 1-ИЛОВА
Истеъдодли ёшларни қўллаб-қувватлаш «Улуғбек» жамғармаси
Раис Раис ёрдамчиси Раис ўринбосари Истеъдодли ёшларни саралаш, танловларни ташкил этиш ва ўтказиш бўйича мутахассис 1 Кадрлар бўйича мутахассис 1 Бухгалтерия 1 Ўқув курсларини ташкил этиш ва мувофиқлаштириш бўйича мутахассис 2 Босмахона 1 Кутубхона 1 «Улуғбек издошлари» танлови ғолиблари билан ишлаш бўйича мутахассис 1 «Истеъдодли ёшлар ахборотномаси» илмий-амалий электрон журнал таҳририяти 1
Вазирлар Маҳкамасининг 2022 йил 18 январдаги 30-сон қарорига 2-ИЛОВА
Истеъдодли ёшларни кашф қилиш ҳамда уларни қўллаб-қувватлашга қаратилган «Мирзо Улуғбек ворислари» танловини ўтказиш тартиби тўғрисида
1-боб. Умумий қоидалар
1. Ушбу Низом Истеъдодли ёшларни кашф қилиш ҳамда уларни қўллаб-қувватлашга қаратилган «Мирзо Улуғбек ворислари» танловини (кейинги ўринларда — Танлов) ўтказиш тартибини белгилайди.
2. Танлов 16 ёшдан 25 ёшгача бўлган иқтидорли ёшлар, жумладан, олис ҳудудларда истиқомат қилаётган йигит-қизлар, уюшмаган ёшлар, «Меҳрибонлик уйлари» тарбияланувчилари орасидан иқтидорли ёшларни излаб топиш ва уларни ўзлари қизиққан соҳаларга йўналтириш, илмий-техник ижодкорлиги ва ихтирочилигини рағбатлантириш, инновацион фаоллигини ошириш ва қўллаб-қувватлаш мақсадида ҳар йили ўтказилади.
3. Танловни ташкил этиш бўйича масъуллар Истеъдодли ёшларни қўллаб-қувватлаш «Улуғбек» жамғармаси, Ёшлар ишлари агентлиги, Инновацион ривожланиш вазирлиги, Олий ва ўрта махсус таълим вазирлиги, Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари (кейинги ўринларда — Ташкилотчилар) ҳисобланади.
4. Танловда иштирокчиларнинг салоҳиятини баҳолаш ва ғолибларни аниқлаш учун Ташкилотчилар томонидан тасдиқланган тегишли вазирликлар, идоралар ва ташкилотлар вакиллари, мутахассислар ҳамда олимлар аъзо бўлган камида етти кишидан иборат таркибда Танлов комиссияси (кейинги ўринларда — Комиссия) тузилади.
2-боб. Танловни ўтказиш шартлари, муддатлари, тартиби ва баҳолаш мезонлари
5. Танлов иштирокчиларининг салоҳиятини баҳолаш ва ғолибларни аниқлаш учун Комиссия аъзолари орасидан унинг раиси ва котиби сайланади.
6. Танловда Ўзбекистон Республикасининг барча ҳудудларидан 16 дан 25 ёшгача бўлган барча иқтидорли ёшлар қатнашиш ҳуқуқига эга.
7. Танловда иштирок этиш истагида бўлган иқтидорли ёшлар махсус веб-сайт орқали рўйхатдан ўтади.
8. Ташкилотчилар танлов бошланишидан бир ой олдин ўз расмий веб-сайтига аризаларни шакллантириш, рўйхатдан ўтказиш ва топшириш тартиби, муддати ва талаблари кўрсатилган эълонни жойлаштиради.
9. Ташкилотчилар Танлов иштирокчиларини танловнинг талаб ва шартлари тўғрисида хабардор қилади, танлов якунлари бўйича ғолибларга хабар беради ва уларни тақдирлашни ташкил этади.
10. Комиссия котиби рўйхатдан ўтган иқтидорли ёшларнинг маълумотларини умумлаштириб, Комиссия аъзоларига тақдим этади.
11. Танловда иштирок этиш истагида бўлган ёшлар қуйидаги талабларга жавоб бериши лозим:
Ўзбекистон Республикасининг фуқароси бўлиши;
аниқ бир ғоя ёки лойиҳага эга бўлиши;
IQ тест натижаси 110 баллдан паст бўлмаслиги;
танловларда ғолиб бўлганлиги тўғрисидаги диплом, сертификат ёки тавсияномага эга бўлиши.
12. Ташкилотчилар ва ҳомийлик қилувчи ташкилотлар ходимларининг ҳамда Комиссия аъзоларининг яқин қариндошлари Танловда иштирок этиш ҳуқуқига эга эмас (улар ўзини ўзи рад қилган ҳолатлар бундан мустасно).
13. Танлов бир йилда бир марта республика ҳудудлари бўйича босқичма-босқич ўтказилади:
1-босқич — туман ёки шаҳар миқёсида;
2-босқич — вилоят бўйича, шу жумладан, Қорақалпоғистон Республикасида ва Тошкент шаҳри миқёсида;
3-босқич — республика миқёсида.
14. Танловни ўтказиш муддатлари:
1-босқич — февраль-март;
2-босқич — апрель;
3-босқич — май.
15. Танловни ўтказиш тартиби:
1-босқичда иштирок этиб, энг юқори натижа кўрсатган 5 нафар ёш йигит қизлар Танловнинг туман (шаҳар) босқичи ғолиби деб топилади ҳамда вилоят босқичига йўлланма олади;
2-босқичда иштирок этиб, энг юқори натижа кўрсатган 20 нафар ёш йигит қизлар Танловнинг ҳудудий босқичи ғолиби деб топилади ҳамда республика босқичига йўлланма олади;
3-босқичда иштирок этиб энг юқори натижа кўрсатган 100 нафар ёш йигит қизлар Танловнинг республика босқичи ғолиби деб топилади.
16. Танлов Жамғарма томонидан Ёшлар ишлари агентлиги, Инновацион ривожланиш вазирлиги, Олий ва ўрта махсус таълим вазирлиги, Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари билан биргаликда ўтказилади.
17. Танлов натижалари бўйича ғолиблар ва уларнинг салоҳияти тўғрисидаги маълумотлар Комиссия баённомасида кўрсатилади ва унинг аъзолари томонидан имзоланади.
18. Танловнинг ҳар бир босқичи бўйича ғолиблар тест синовлари якунлангандан сўнг бир ҳафта муддат ичида Ташкилотчиларнинг расмий веб-сайтида ҳамда теле-радиоканалларда эълон қилинади.
19. Натижалар Комиссия томонидан баённома билан тасдиқланиб, Ташкилотчиларнинг масъул вакилига тақдим этилганидан сўнг якуний (ҳал қилувчи аҳамиятга эга) ҳисобланади ва Комиссия қарори бўйича Ташкилотчилар изоҳ бермайди.
3-боб. Танлов ғолибларини тақдирлаш
20. Танловнинг республика босқичи ғолибларини тақдирлаш маросими натижалар эълон қилингандан сўнг 10 кун ичида Ташкилотчилар томонидан амалга оширилади.
21. Танловнинг 1, 2 ва 3-босқичлар ғолиблари тегишлича базавий ҳисоблаш миқдорининг 5, 10 ва 20 баравари миқдорида бир марталик пул мукофоти ва тегишли диплом билан тақдирланади.
22. Танловнинг 1 ва 2-босқичларига тайёргарлик кўриш ва уни ўтказиш, ушбу босқич ғолибларини тақдирлаш билан боғлиқ харажатлар маҳаллий бюджетнинг қўшимча манбалари ҳисобидан қопланади.
23. Танловнинг 3-босқичи ғолиблари Жамғарма томонидан базавий ҳисоблаш миқдорининг 20 баравари миқдорида пул маблағи билан мукофотланади.
26. Танловнинг республика босқичи ғолибларининг инновацион ғоя ва илмий-техник лойиҳаларини хусусий сектор ва тармоқ ташкилотлари, йирик корхоналар ва ташкилотлар томонидан молиялаштириш амалиёти жорий этилади.
4-боб. Якунловчи қоидалар
27. Танлов тўғрисидаги маълумотлар ва унинг натижалари Ташкилотчилар ва уларнинг тизимидаги ташкилотлар расмий веб-сайти ва бошқа оммавий ахборот воситаларида эълон қилинади.
28. Ушбу Низом талабларини бузганликда айбдор шахслар қонунчиликка мувофиқ жавоб берадилар.
Ўзбекистон Республикасининг Бош вазири А. АРИПОВ
Тошкент ш.,
2022 йил 18 январь,
30-сон
Oʻzbekiston Respublikasi Vazirlar Mahkamasining
qarori
TUZILMASI
NIZOM
Isteʼdodli yoshlarni qoʻllab-quvvatlash “Ulugʻbek” jamgʻarmasi faoliyatini rivojlantirish chora-tadbirlari toʻgʻrisida
Mamlakatimizda iqtidorli yoshlarning tashabbuslarini qoʻllab-quvvatlash borasida amalga oshirilayotgan ishlarni yanada jadallashtirish, ularni ilmiy-texnik faoliyatga keng jalb qilish, iqtidorli yoshlarning, jumladan, olis hududlarda istiqomat qilayotgan yigit-qizlarning bilim, koʻnikma va malakasini oshirish, innovatsion gʻoyalarini amaliyotga tatbiq etish hamda hayotda oʻz oʻrnini topishiga koʻmaklashishga qaratilgan ishlarni tizimli tashkil etish maqsadida Vazirlar Mahkamasi qaror qiladi:
1. Isteʼdodli yoshlarni qoʻllab-quvvatlash “Ulugʻbek” jamgʻarmasining (keyingi oʻrinlarda — Jamgʻarma) oliy organi — Konferensiyasi tomonidan Jamgʻarmaning yangilangan tuzilmasi 1-ilovaga muvofiq tasdiqlanganligi maʼlumot uchun qabul qilinsin.
2. Quyidagilar Jamgʻarma faoliyatining asosiy yoʻnalishlari etib belgilanganligi inobatga olinsin:
iqtidorli yoshlarni izlab topish, isteʼdodini roʻyobga chiqarish va ularni qoʻllab-quvvatlashga koʻmaklashish;
davlat va nodavlat tashkilotlari bilan hamkorlikda iqtidorli yoshlarni aniqlash hamda ularni ilmiy-texnik faoliyatga keng jalb etish tizimini yoʻlga qoʻyishda ishtirok etish;
iqtidorli yoshlarning, jumladan, Jamgʻarma tomonidan oʻtkazilgan tanlovlar gʻoliblari, Prezident granti va nomli stipendiyalar, “Oʻzbekiston uchun 100 gʻoya” loyihasi sovrindorlarining ilmiy-texnik ishlanmalari, gʻoya va tashabbuslarining amaliyotga joriy etilishini qoʻllab-quvvatlash;
davlat va nodavlat tashkilotlar bilan hamkorlikda “Mirzo Ulugʻbek vorislari” respublika tanlovini tashkil etish, shuningdek, soha mutaxassislarini jalb etgan holda iqtidorli yoshlarni maqsadli oʻqitish;
iqtisodiyot tarmoqlarining ehtiyojlarini hisobga olgan holda zamonaviy talablarga javob beradigan yuqori malakali mutaxassislar zaxirasini shakllantirishda qatnashish;
ilm-fan va taʼlimga oid risolalar, bukletlar va boshqa adabiyotlarni nashr etish va tarqatish.
3. Innovatsion rivojlanish vazirligi, Yoshlar ishlari agentligi, Oliy va oʻrta maxsus taʼlim vazirligi, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklarining 2022-yildan boshlab har yili iqtidorli yoshlarni kashf qilish va ularni qoʻllab-quvvatlashga qaratilgan “Mirzo Ulugʻbek vorislari” respublika tanlovini (keyingi oʻrinlarda — Tanlov) oʻtkazish toʻgʻrisidagi taklifi maʼqullansin.
Belgilansinki:
a) Tanlovning:
1-bosqichi fevral-mart oylarida tuman (shahar)larda oʻtkaziladi va unda eng yuqori natijaga erishgan har bir tuman (shahar)dan 5 nafardan nomzodlar 2-bosqichga yoʻllanma oladi;
2-bosqichi aprel oyida Qoraqalpogʻiston Respublikasi, viloyatlar va Toshkent shahrida oʻtkaziladi hamda Qoraqalpogʻiston Respublikasi, viloyatlar va Toshkent shahrida har biridan eng yuqori natijaga erishgan 20 nafar yosh navbatdagi bosqichga yoʻllanma oladi;
3-bosqichi may oyida oʻtkaziladi va unda eng yuqori natijaga erishgan 100 nafar yosh tanlovning respublika bosqichi gʻolibi deb topiladi;
1, 2 va 3-bosqichlar gʻoliblari tegishlicha bazaviy hisoblash miqdorining 5, 10 va 20 baravari miqdorida bir martalik pul mukofoti va diplom bilan taqdirlanadi;
respublika bosqichi gʻoliblari Jamgʻarma tomonidan tashkil etiladigan maqsadli oʻquv kurslarida bepul tahsil oladi. Oʻqishni muvaffaqiyatli tamomlagan yoshlar hududlar boʻyicha ishlab chiqarish tashkilotlari va tadbirkorlik subyektlariga ixtiyoriylik asosida biriktiriladi hamda “Yoshlar akademiyasi” va “Kelajak liderlari klubi”ga jalb etiladi;
b) tanlov Jamgʻarma tomonidan Innovatsion rivojlanish vazirligi, Yoshlar ishlari agentligi, Oliy va oʻrta maxsus taʼlim vazirligi, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari bilan birgalikda oʻtkaziladi;
v) tanlovning 1 va 2-bosqichlariga tayyorgarlik koʻrish va uni oʻtkazish, ushbu bosqich gʻoliblarini taqdirlash bilan bogʻliq xarajatlar mahalliy budjetning qoʻshimcha manbalaridan belgilangan tartibda ajratilgan mablagʻlar hisobidan qoplanadi.
4. “Mirzo Ulugʻbek vorislari” respublika tanlovini oʻtkazish tartibi toʻgʻrisidagi nizom 2-ilovaga muvofiq tasdiqlansin.
5. Innovatsion rivojlanish vazirligi Tanlovga tayyorgarlik koʻrish va oʻtkazish, uning respublika bosqichi gʻoliblarini taqdirlash bilan bogʻliq xarajatlarni har yili, shuningdek, Jamgʻarmada ilm-fan rivojlanishining istiqbolli yoʻnalishlariga mos zamonaviy laboratoriya hamda innovatsion kichik bosmaxonani tashkil etish xarajatlarini Innovatsion rivojlanish vazirligining Ilm-fanni moliyalashtirish va innovatsiyalarni qoʻllab-quvvatlash jamgʻarmasi mablagʻlari hisobidan qoplab borsin.
6. Jamgʻarmaning Innovatsion rivojlanish vazirligi, Yoshlar ishlari agentligi, Fanlar akademiyasi, Oliy va oʻrta maxsus taʼlim vazirligining manfaatdor vazirlik va idoralar hamda boshqa tashkilotlar bilan birgalikda ikki oy muddatda “Isteʼdodli yoshlar axborotnomasi” ilmiy-amaliy elektron jurnalini hamda “Mirzo Ulugʻbek vorislari” elektron portalini tashkil etish toʻgʻrisidagi taklifi maʼqullansin.
Bunda, “Mirzo Ulugʻbek vorislari” elektron portalida isteʼdodli yoshlarning elektron bazasi shakllantiriladi, oʻquv kurslari bitiruvchilarining reytingi joriy etilib, innovatsion gʻoyalari va ilmiy-texnik ishlanmalari baholab boriladi.
7. Oʻzbekiston Respublikasi Oliy Majlisi huzuridagi Fuqarolik jamiyati institutlarini qoʻllab-quvvatlash jamoat fondi mablagʻlarini boshqarish boʻyicha Parlament komissiyasining ushbu jamoat fondiga 2022-yilning 1-fevralidan boshlab Jamgʻarmani saqlab turish va uning faoliyatini samarali tashkil etish uchun davlat subsidiyasi ajratish toʻgʻrisidagi taklifi maʼlumot uchun qabul qilinsin.
8. Quyidagilar Jamgʻarma faoliyatini moliyalashtirish manbalari etib belgilanganligi inobatga olinsin:
Oʻzbekiston Respublikasi Oliy Majlisi huzuridagi Fuqarolik jamiyati institutlarini qoʻllab-quvvatlash jamoat fondi tomonidan har yili ajratiladigan davlat subsidiyasi;
jismoniy va yuridik shaxslarning homiylik xayriyalari;
xalqaro moliya institutlari va xorijiy tashkilotlarning grantlari;
xoʻjalik faoliyati va shartnoma asosida xizmatlar koʻrsatishdan tushadigan mablagʻlar;
qonunchilik hujjatlarida taqiqlanmagan boshqa manbalar.
9. “Olmaliq kon-metallurgiya kombinati” aksiyadorlik jamiyatining Jamgʻarmaga homiylik xayriyasi sifatida 1 ta xizmat avtotransport vositasi va 1 ta avtobus ajratish toʻgʻrisidagi taklifi maʼqullansin.
10. Davlat aktivlarini boshqarish agentligi, Qurilish vazirligi va Toshkent shahar hokimligining:
Toshkent shahri, Mirzo Ulugʻbek tumani, Movarounnahr koʻchasi, 24-uy manzilida joylashgan Boʻsh turgan obyektlardan samarali foydalanishni tashkil etish markazining Toshkent shahar hududiy boshqarmasi bino va inshootlariga (keyingi oʻrinlarda — obyekt) Jamgʻarmani tekin foydalanish huquqi asosida joylashtirish;
Jamgʻarmaning samarali faoliyat olib borishi uchun obyektda mukammal taʼmirlash hamda zamonaviy tarzda jihozlash ishlarini amalga oshirish toʻgʻrisidagi takliflariga rozilik berilsin.
11. Davlat aktivlarini boshqarish agentligi Toshkent shahar hokimligi bilan birgalikda bir oy muddatda Jamgʻarmani belgilangan tartibda obyektga joylashtirilishini taʼminlasin.
12. Belgilansinki, obyektda mukammal taʼmirlash va zamonaviy tarzda jihozlash ishlarini amalga oshirish doirasida:
Toshkent shahar hokimligi “Yagona buyurtmachi xizmati” injiniring kompaniyasi — buyurtmachi funksiyasini bajaradi;
bosh loyiha va bosh pudrat tashkilotlari qonunchilik hujjatlarida belgilangan tartibda tender (tanlov) savdolari asosida aniqlanadi;
mukammal taʼmirlash va jihozlash ishlari bilan bogʻliq xarajatlar Vazirlar Mahkamasining zaxira jamgʻarmasi hisobidan amalga oshiriladi.
Bunda, obyektda oʻquv auditoriyalari, zamonaviy laboratoriya, kutubxona tashkil etish, kichik innovatsion bosmaxona faoliyati uchun shart-sharoitlar yaratish hamda lift oʻrnatish lozimligi inobatga olinsin.
13. Toshkent shahar hokimligi Moliya vazirligi va Qurilish vazirligi bilan birgalikda Jamgʻarma qoshida tashkil etiladigan oʻquv kurslarida tahsil oladigan isteʼdodli yoshlarni yotoqxona bilan taʼminlash masalasini atroflicha oʻrganib chiqib, ikki hafta muddatda Vazirlar Mahkamasiga asoslangan taklif kiritsin.
14. Moliya vazirligi obyektni mukammal taʼmirlash va zamonaviy tarzda jihozlash ishlarini qisqa muddatda yakunlash uchun asoslangan hisob-kitoblarga muvofiq Vazirlar Mahkamasining zaxira jamgʻarmasidan buyurtmachiga zarur mablagʻ ajratilishini taʼminlasin.
15. Mazkur qarorning bajarilishini nazorat qilish Oʻzbekiston Respublikasi innovatsion rivojlanish vaziri I.Yu. Abdurahmonov zimmasiga hamda Vazirlar Mahkamasining Yoshlar, jamoat tashkilotlari, mahalla va oilani qoʻllab-quvvatlash masalalari kotibiyatiga yuklansin.
Vazirlar Mahkamasining 2022-yil 18-yanvardagi 30-son qaroriga 1-ILOVA
Isteʼdodli yoshlarni qoʻllab-quvvatlash “Ulugʻbek” jamgʻarmasi
Rais Rais yordamchisi Rais oʻrinbosari Isteʼdodli yoshlarni saralash, tanlovlarni tashkil etish va oʻtkazish boʻyicha mutaxassis 1 Kadrlar boʻyicha mutaxassis 1 Buxgalteriya 1 Oʻquv kurslarini tashkil etish va muvofiqlashtirish boʻyicha mutaxassis 2 Bosmaxona 1 Kutubxona 1 “Ulugʻbek izdoshlari” tanlovi gʻoliblari bilan ishlash boʻyicha mutaxassis 1 “Isteʼdodli yoshlar axborotnomasi” ilmiy-amaliy elektron jurnal tahririyati 1
Vazirlar Mahkamasining 2022-yil 18-yanvardagi 30-son qaroriga 2-ILOVA
Isteʼdodli yoshlarni kashf qilish hamda ularni qoʻllab-quvvatlashga qaratilgan “Mirzo Ulugʻbek vorislari” tanlovini oʻtkazish tartibi toʻgʻrisida
1-bob. Umumiy qoidalar
1. Ushbu Nizom Isteʼdodli yoshlarni kashf qilish hamda ularni qoʻllab-quvvatlashga qaratilgan “Mirzo Ulugʻbek vorislari” tanlovini (keyingi oʻrinlarda — Tanlov) oʻtkazish tartibini belgilaydi.
2. Tanlov 16 yoshdan 25 yoshgacha boʻlgan iqtidorli yoshlar, jumladan, olis hududlarda istiqomat qilayotgan yigit-qizlar, uyushmagan yoshlar, “Mehribonlik uylari” tarbiyalanuvchilari orasidan iqtidorli yoshlarni izlab topish va ularni oʻzlari qiziqqan sohalarga yoʻnaltirish, ilmiy-texnik ijodkorligi va ixtirochiligini ragʻbatlantirish, innovatsion faolligini oshirish va qoʻllab-quvvatlash maqsadida har yili oʻtkaziladi.
3. Tanlovni tashkil etish boʻyicha masʼullar Isteʼdodli yoshlarni qoʻllab-quvvatlash “Ulugʻbek” jamgʻarmasi, Yoshlar ishlari agentligi, Innovatsion rivojlanish vazirligi, Oliy va oʻrta maxsus taʼlim vazirligi, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari (keyingi oʻrinlarda — Tashkilotchilar) hisoblanadi.
4. Tanlovda ishtirokchilarning salohiyatini baholash va gʻoliblarni aniqlash uchun Tashkilotchilar tomonidan tasdiqlangan tegishli vazirliklar, idoralar va tashkilotlar vakillari, mutaxassislar hamda olimlar aʼzo boʻlgan kamida yetti kishidan iborat tarkibda Tanlov komissiyasi (keyingi oʻrinlarda — Komissiya) tuziladi.
2-bob. Tanlovni oʻtkazish shartlari, muddatlari, tartibi va baholash mezonlari
5. Tanlov ishtirokchilarining salohiyatini baholash va gʻoliblarni aniqlash uchun Komissiya aʼzolari orasidan uning raisi va kotibi saylanadi.
6. Tanlovda Oʻzbekiston Respublikasining barcha hududlaridan 16 dan 25 yoshgacha boʻlgan barcha iqtidorli yoshlar qatnashish huquqiga ega.
7. Tanlovda ishtirok etish istagida boʻlgan iqtidorli yoshlar maxsus veb-sayt orqali roʻyxatdan oʻtadi.
8. Tashkilotchilar tanlov boshlanishidan bir oy oldin oʻz rasmiy veb-saytiga arizalarni shakllantirish, roʻyxatdan oʻtkazish va topshirish tartibi, muddati va talablari koʻrsatilgan eʼlonni joylashtiradi.
9. Tashkilotchilar Tanlov ishtirokchilarini tanlovning talab va shartlari toʻgʻrisida xabardor qiladi, tanlov yakunlari boʻyicha gʻoliblarga xabar beradi va ularni taqdirlashni tashkil etadi.
10. Komissiya kotibi roʻyxatdan oʻtgan iqtidorli yoshlarning maʼlumotlarini umumlashtirib, Komissiya aʼzolariga taqdim etadi.
11. Tanlovda ishtirok etish istagida boʻlgan yoshlar quyidagi talablarga javob berishi lozim:
Oʻzbekiston Respublikasining fuqarosi boʻlishi;
aniq bir gʻoya yoki loyihaga ega boʻlishi;
IQ test natijasi 110 balldan past boʻlmasligi;
tanlovlarda gʻolib boʻlganligi toʻgʻrisidagi diplom, sertifikat yoki tavsiyanomaga ega boʻlishi.
12. Tashkilotchilar va homiylik qiluvchi tashkilotlar xodimlarining hamda Komissiya aʼzolarining yaqin qarindoshlari Tanlovda ishtirok etish huquqiga ega emas (ular oʻzini oʻzi rad qilgan holatlar bundan mustasno).
13. Tanlov bir yilda bir marta respublika hududlari boʻyicha bosqichma-bosqich oʻtkaziladi:
1-bosqich — tuman yoki shahar miqyosida;
2-bosqich — viloyat boʻyicha, shu jumladan, Qoraqalpogʻiston Respublikasida va Toshkent shahri miqyosida;
3-bosqich — respublika miqyosida.
14. Tanlovni oʻtkazish muddatlari:
1-bosqich — fevral-mart;
2-bosqich — aprel;
3-bosqich — may.
15. Tanlovni oʻtkazish tartibi:
1-bosqichda ishtirok etib, eng yuqori natija koʻrsatgan 5 nafar yosh yigit qizlar Tanlovning tuman (shahar) bosqichi gʻolibi deb topiladi hamda viloyat bosqichiga yoʻllanma oladi;
2-bosqichda ishtirok etib, eng yuqori natija koʻrsatgan 20 nafar yosh yigit qizlar Tanlovning hududiy bosqichi gʻolibi deb topiladi hamda respublika bosqichiga yoʻllanma oladi;
3-bosqichda ishtirok etib eng yuqori natija koʻrsatgan 100 nafar yosh yigit qizlar Tanlovning respublika bosqichi gʻolibi deb topiladi.
16. Tanlov Jamgʻarma tomonidan Yoshlar ishlari agentligi, Innovatsion rivojlanish vazirligi, Oliy va oʻrta maxsus taʼlim vazirligi, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari bilan birgalikda oʻtkaziladi.
17. Tanlov natijalari boʻyicha gʻoliblar va ularning salohiyati toʻgʻrisidagi maʼlumotlar Komissiya bayonnomasida koʻrsatiladi va uning aʼzolari tomonidan imzolanadi.
18. Tanlovning har bir bosqichi boʻyicha gʻoliblar test sinovlari yakunlangandan soʻng bir hafta muddat ichida Tashkilotchilarning rasmiy veb-saytida hamda tele-radiokanallarda eʼlon qilinadi.
19. Natijalar Komissiya tomonidan bayonnoma bilan tasdiqlanib, Tashkilotchilarning masʼul vakiliga taqdim etilganidan soʻng yakuniy (hal qiluvchi ahamiyatga ega) hisoblanadi va Komissiya qarori boʻyicha Tashkilotchilar izoh bermaydi.
3-bob. Tanlov gʻoliblarini taqdirlash
20. Tanlovning respublika bosqichi gʻoliblarini taqdirlash marosimi natijalar eʼlon qilingandan soʻng 10 kun ichida Tashkilotchilar tomonidan amalga oshiriladi.
21. Tanlovning 1, 2 va 3-bosqichlar gʻoliblari tegishlicha bazaviy hisoblash miqdorining 5, 10 va 20 baravari miqdorida bir martalik pul mukofoti va tegishli diplom bilan taqdirlanadi.
22. Tanlovning 1 va 2-bosqichlariga tayyorgarlik koʻrish va uni oʻtkazish, ushbu bosqich gʻoliblarini taqdirlash bilan bogʻliq xarajatlar mahalliy budjetning qoʻshimcha manbalari hisobidan qoplanadi.
23. Tanlovning 3-bosqichi gʻoliblari Jamgʻarma tomonidan bazaviy hisoblash miqdorining 20 baravari miqdorida pul mablagʻi bilan mukofotlanadi.
26. Tanlovning respublika bosqichi gʻoliblarining innovatsion gʻoya va ilmiy-texnik loyihalarini xususiy sektor va tarmoq tashkilotlari, yirik korxonalar va tashkilotlar tomonidan moliyalashtirish amaliyoti joriy etiladi.
4-bob. Yakunlovchi qoidalar
27. Tanlov toʻgʻrisidagi maʼlumotlar va uning natijalari Tashkilotchilar va ularning tizimidagi tashkilotlar rasmiy veb-sayti va boshqa ommaviy axborot vositalarida eʼlon qilinadi.
28. Ushbu Nizom talablarini buzganlikda aybdor shaxslar qonunchilikka muvofiq javob beradilar.
Oʻzbekiston Respublikasining Bosh vaziri A. ARIPOV
Toshkent sh.,
2022-yil 18-yanvar,
30-son