📅 2022-yil 26-yanvar · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2022 йил 26 январь · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 26 января 2022 г. · Постановления Кабинета Министров
Официальный текст. Официальный документ. Редакционные примечания не включены.
📅 26 January 2022 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
Авиаспоттингни ривожлантириш учун шарт-шароитлар яратиш чора-тадбирлари тўғрисида
Ўзбекистоннинг ижобий имижи, туристик салоҳияти ва инвестициявий жозибадорлигини ошириш, мамлакат аэропортлари ва авиакомпанияларини дунё жамоатчилигига танитиш мақсадида Вазирлар Маҳкамаси қарор қилади:
1. Белгилансинки:
2022 йил 1 майдан бошлаб Ўзбекистон Республикасидаги халқаро аэропортларда авиаспоттинг — белгиланган тартибга асосан аэропортларда ҳаво кемалари ҳаракатини ҳамда парвозини кузатиш, шунингдек уларни профессионал ва ҳаваскорлар (авиаспоттерлар) томонидан фото, видео тасвирга олишни амалга ошириш йўлга қўйилади;
республикадаги барча халқаро аэропортлар ҳудудида уларнинг бошқарув шаклидан қатъи назар, шунингдек, уларга туташ ҳудудларда парвозлар хавфсизлиги талаблари, Халқаро фуқаро авиацияси ташкилоти (ИКАО) тавсиялари ва илғор хорижий тажриба ҳисобга олинган ҳолда, авиаспоттинг машғулотлари учун ихтисослаштирилган жойлар (кейинги ўринларда — кузатиш майдончалари) босқичма-босқич ажратилади;
кузатиш майдончаларига, шу жумладан, улар жойлашган жойларга нисбатан талаблар «Uzbеkistan Airports» АЖ таклифлари асосида Ўзбекистон Республикаси Туризм ва спорт вазирлиги ва Транспорт вазирлиги томонидан тасдиқланади;
2022 йил 1 майдан бошлаб хорижий авиаспоттерлар жалб қилинган ҳолда, маҳаллий ҳаваскорлар ва профессионал авиаспоттерлар учун ҳар чораклик мавсумий танловлар, шунингдек, ҳар йилги танловлар таъсис этилади ҳамда ташкил қилинади;
халқаро аэропортлар ҳудудида кузатиш майдончаларини ташкил қилиш ва жиҳозлаш ишлари аэропортларнинг ўз молиявий ресурслари, шунингдек, қонунчилик ҳужжатларида тақиқланмаган бошқа маблағлар, уларга туташ ҳудудларда эса — хусусий сектор жалб қилинган ҳолда маҳаллий бюджетлар маблағлари, шунингдек, қонунчилик ҳужжатларида тақиқланмаган бошқа маблағлар ҳисобидан амалга оширилади.
2. Ўзбекистон Республикаси Транспорт вазирлиги Туризм ва спорт вазирлиги, Ички ишлар вазирлиги ҳамда «Uzbеkistan Airports» АЖ билан биргаликда кузатиш майдончалари ва улар жойлашган жойларга нисбатан қуйидагиларни назарда тутувчи талабларни бир ой муддатда тасдиқласин:
авиаспоттерларни кузатиш майдончаларига киритиш ва улар томонидан аэропортлар ички тартибига риоя этилиши регламентини тасдиқлаш;
ўта муҳим рейслар парвозлари вақтида кузатиш майдончаларига киритишни келишиш;
видеокузатув тизимини ташкил қилиш ва унга халқаро аэропортлар авиация хавфсизлиги хизматини улаш.
3. Қорақалпоғистон Республикаси Вазирлар Кенгаши, Андижон, Бухоро, Қашқадарё, Навоий, Наманган, Самарқанд, Сурхондарё, Фарғона, Хоразм вилоятлари ва Тошкент шаҳар ҳокимликлари:
2022 йил 1 февралга қадар «Uzbеkistan Airports» АЖ билан биргаликда авиаспоттинг билан шуғулланиш учун кузатиш майдончаларини ва тегишли инфратузилмани ташкил қилиш мақсадида халқаро аэропортларга туташ ҳудудларни белгиласин;
2022 йил 1 майга қадар хорижий тажрибани ўрганган ҳолда, халқаро аэропортларга туташ ҳудудларда кузатиш майдончаларининг тўлиқ фаолият кўрсатишини таъминласин ва уларни зарур инфратузилма (кириш йўли, автотураргоҳ, санузел, умумий овқатланиш жойлари, видеокузатув тизими ва бошқалар) билан жиҳозласин.
4. Ўзбекистон Республикаси Транспорт вазирлиги:
ушбу қарорнинг 1-бандида кўрсатилган танловларни мазкур қарор талаблари инобатга олинган ҳолда ўтказиш регламентини икки ой муддатда ишлаб чиқиб тасдиқласин;
«Uzbеkistan Airports» АЖ, Фуқаро авиацияси агентлиги, «Ўзаэронавигация маркази» ДУК билан биргаликда 2022 йил 1 майга қадар биринчи босқичда Ислом Каримов номидаги «Тошкент» халқаро аэропорти ва «Самарқанд» халқаро аэропортида, 2022 йил 1 июлдан бошлаб — қолган барча халқаро аэропортлар ҳудудида авиаспоттинг билан шуғулланиш учун кузатиш майдончаларининг тўлиқ фаолият кўрсатишини таъминласин;
«Uzbеkistan Airports» АЖ, Ўзбекистон Республикаси Мудофаа вазирлиги, Тошкент шаҳар ҳокимлиги билан биргаликда икки ой муддатда Ўзбекистон миллий авиация музейини ташкил қилиш бўйича Вазирлар Маҳкамасига таклиф киритсин;
«Uzbеkistan Airports» АЖ билан биргаликда маҳаллий авиаспоттерлар учун маҳорат сабоқлари ўтказиш, шунингдек, ушбу соҳани янада ривожлантириш мақсадида уларнинг тавсиялари ва таклифларини олиш учун таниқли авиаспоттерларни доимий асосда жалб қилинишини таъминласин;
аэропортларда таълим муассасалари ўқувчилари ва талабалари учун очиқ эшиклар кунларининг мунтазам ўтказилишини таъминласин.
5. Ўзбекистон Республикаси Туризм ва спорт вазирлиги Транспорт вазирлиги, «Uzbеkistan Airports» АЖ ва «Uzbеkistan Airways» АЖ билан биргаликда авиаспоттинг бўйича фотосуратларни машҳур онлайн платформаларда («Gettylmages», «Flickr», «Shutterstock.com», «Depositphotos.com» ва бошқаларда) жойлаштириш чораларини кўрсин.
6. Ўзбекистон Республикаси Транспорт вазирлиги Туризм ва спорт вазирлиги ҳамда «Uzbеkistan Airports» АЖ билан биргаликда парвозлар кўп амалга ошириладиган, авиаспоттинг ва авиаспоттерлар учун зарур шарт-шароитлар яратилган дунёдаги йирик аэропортлар фаолияти мунтазам ўрганилишини таъминласин, шунингдек, ўрганиш натижалари бўйича ушбу фаолиятни Ўзбекистон Республикасида ривожлантириб бориш юзасидан зарур чоралар кўрсин.
7. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосари — туризм ва спорт вазири А.А. Абдухакимов ва Ўзбекистон Республикаси транспорт вазири И.Р. Маҳкамов зиммасига юклансин.
Ўзбекистон Республикасининг Бош вазири А. АРИПОВ
Тошкент ш.,
2022 йил 26 январь,
43-сон
Oʻzbekiston Respublikasi Vazirlar Mahkamasining
qarori
Aviaspottingni rivojlantirish uchun shart-sharoitlar yaratish chora-tadbirlari toʻgʻrisida
Oʻzbekistonning ijobiy imiji, turistik salohiyati va investitsiyaviy jozibadorligini oshirish, mamlakat aeroportlari va aviakompaniyalarini dunyo jamoatchiligiga tanitish maqsadida Vazirlar Mahkamasi qaror qiladi:
1. Belgilansinki:
2022-yil 1-maydan boshlab Oʻzbekiston Respublikasidagi xalqaro aeroportlarda aviaspotting — belgilangan tartibga asosan aeroportlarda havo kemalari harakatini hamda parvozini kuzatish, shuningdek ularni professional va havaskorlar (aviaspotterlar) tomonidan foto, video tasvirga olishni amalga oshirish yoʻlga qoʻyiladi;
respublikadagi barcha xalqaro aeroportlar hududida ularning boshqaruv shaklidan qatʼi nazar, shuningdek, ularga tutash hududlarda parvozlar xavfsizligi talablari, Xalqaro fuqaro aviatsiyasi tashkiloti (IKAO) tavsiyalari va ilgʻor xorijiy tajriba hisobga olingan holda, aviaspotting mashgʻulotlari uchun ixtisoslashtirilgan joylar (keyingi oʻrinlarda — kuzatish maydonchalari) bosqichma-bosqich ajratiladi;
kuzatish maydonchalariga, shu jumladan, ular joylashgan joylarga nisbatan talablar “Uzbekistan Airports” AJ takliflari asosida Oʻzbekiston Respublikasi Turizm va sport vazirligi va Transport vazirligi tomonidan tasdiqlanadi;
2022-yil 1-maydan boshlab xorijiy aviaspotterlar jalb qilingan holda, mahalliy havaskorlar va professional aviaspotterlar uchun har choraklik mavsumiy tanlovlar, shuningdek, har yilgi tanlovlar taʼsis etiladi hamda tashkil qilinadi;
xalqaro aeroportlar hududida kuzatish maydonchalarini tashkil qilish va jihozlash ishlari aeroportlarning oʻz moliyaviy resurslari, shuningdek, qonunchilik hujjatlarida taqiqlanmagan boshqa mablagʻlar, ularga tutash hududlarda esa — xususiy sektor jalb qilingan holda mahalliy budjetlar mablagʻlari, shuningdek, qonunchilik hujjatlarida taqiqlanmagan boshqa mablagʻlar hisobidan amalga oshiriladi.
2. Oʻzbekiston Respublikasi Transport vazirligi Turizm va sport vazirligi, Ichki ishlar vazirligi hamda “Uzbekistan Airports” AJ bilan birgalikda kuzatish maydonchalari va ular joylashgan joylarga nisbatan quyidagilarni nazarda tutuvchi talablarni bir oy muddatda tasdiqlasin:
aviaspotterlarni kuzatish maydonchalariga kiritish va ular tomonidan aeroportlar ichki tartibiga rioya etilishi reglamentini tasdiqlash;
oʻta muhim reyslar parvozlari vaqtida kuzatish maydonchalariga kiritishni kelishish;
videokuzatuv tizimini tashkil qilish va unga xalqaro aeroportlar aviatsiya xavfsizligi xizmatini ulash.
3. Qoraqalpogʻiston Respublikasi Vazirlar Kengashi, Andijon, Buxoro, Qashqadaryo, Navoiy, Namangan, Samarqand, Surxondaryo, Fargʻona, Xorazm viloyatlari va Toshkent shahar hokimliklari:
2022-yil 1-fevralga qadar “Uzbekistan Airports” AJ bilan birgalikda aviaspotting bilan shugʻullanish uchun kuzatish maydonchalarini va tegishli infratuzilmani tashkil qilish maqsadida xalqaro aeroportlarga tutash hududlarni belgilasin;
2022-yil 1-mayga qadar xorijiy tajribani oʻrgangan holda, xalqaro aeroportlarga tutash hududlarda kuzatish maydonchalarining toʻliq faoliyat koʻrsatishini taʼminlasin va ularni zarur infratuzilma (kirish yoʻli, avtoturargoh, sanuzel, umumiy ovqatlanish joylari, videokuzatuv tizimi va boshqalar) bilan jihozlasin.
4. Oʻzbekiston Respublikasi Transport vazirligi:
ushbu qarorning 1-bandida koʻrsatilgan tanlovlarni mazkur qaror talablari inobatga olingan holda oʻtkazish reglamentini ikki oy muddatda ishlab chiqib tasdiqlasin;
“Uzbekistan Airports” AJ, Fuqaro aviatsiyasi agentligi, “Oʻzaeronavigatsiya markazi” DUK bilan birgalikda 2022-yil 1-mayga qadar birinchi bosqichda Islom Karimov nomidagi “Toshkent” xalqaro aeroporti va “Samarqand” xalqaro aeroportida, 2022-yil 1-iyuldan boshlab — qolgan barcha xalqaro aeroportlar hududida aviaspotting bilan shugʻullanish uchun kuzatish maydonchalarining toʻliq faoliyat koʻrsatishini taʼminlasin;
“Uzbekistan Airports” AJ, Oʻzbekiston Respublikasi Mudofaa vazirligi, Toshkent shahar hokimligi bilan birgalikda ikki oy muddatda Oʻzbekiston milliy aviatsiya muzeyini tashkil qilish boʻyicha Vazirlar Mahkamasiga taklif kiritsin;
“Uzbekistan Airports” AJ bilan birgalikda mahalliy aviaspotterlar uchun mahorat saboqlari oʻtkazish, shuningdek, ushbu sohani yanada rivojlantirish maqsadida ularning tavsiyalari va takliflarini olish uchun taniqli aviaspotterlarni doimiy asosda jalb qilinishini taʼminlasin;
aeroportlarda taʼlim muassasalari oʻquvchilari va talabalari uchun ochiq eshiklar kunlarining muntazam oʻtkazilishini taʼminlasin.
5. Oʻzbekiston Respublikasi Turizm va sport vazirligi Transport vazirligi, “Uzbekistan Airports” AJ va “Uzbekistan Airways” AJ bilan birgalikda aviaspotting boʻyicha fotosuratlarni mashhur onlayn platformalarda (“Gettylmages”, “Flickr”, “Shutterstock.com”, “Depositphotos.com” va boshqalarda) joylashtirish choralarini koʻrsin.
6. Oʻzbekiston Respublikasi Transport vazirligi Turizm va sport vazirligi hamda “Uzbekistan Airports” AJ bilan birgalikda parvozlar koʻp amalga oshiriladigan, aviaspotting va aviaspotterlar uchun zarur shart-sharoitlar yaratilgan dunyodagi yirik aeroportlar faoliyati muntazam oʻrganilishini taʼminlasin, shuningdek, oʻrganish natijalari boʻyicha ushbu faoliyatni Oʻzbekiston Respublikasida rivojlantirib borish yuzasidan zarur choralar koʻrsin.
7. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari — turizm va sport vaziri A.A. Abduxakimov va Oʻzbekiston Respublikasi transport vaziri I.R. Mahkamov zimmasiga yuklansin.
Oʻzbekiston Respublikasining Bosh vaziri A. ARIPOV
Toshkent sh.,
2022-yil 26-yanvar,
43-son