UzbekAI

Ўзбекистон Республикаси Вазирлар Маҳкамасининг

қарори

«Ёш гвардиячилар» болалар ва ўсмирлар спорт мактаблари фаолиятини ташкил этиш тўғрисида

Ўзбекистон Республикаси Президентининг «Ўзбекистон Республикасида жисмоний тарбия ва спортни янада такомиллаштириш ва оммалаштириш чора-тадбирлари тўғрисида» 2020 йил 24 январдаги ПФ-5924-сон Фармонига мувофиқ, шунингдек мамлакатимизда ёшларни спортга кенг жалб этиш, уларни ҳарбий-ватанпарварлик руҳида тарбиялаш, соғлом турмуш тарзига ва спорт билан шуғулланишга тарғиб қилиш ишларини янада такомиллаштириш мақсадида Вазирлар Маҳкамаси қарор қилади:

1. Ўзбекистон Республикаси Туризм ва спорт вазирлиги ҳамда Ўзбекистон Республикаси Миллий гвардиясининг Ўзбекистон Республикаси Туризм ва спорт вазирлиги тизимидаги Тошкент шаҳар, Олмазор тумани 2-сон болалар ва ўсмирлар спорт мактаби ҳамда Наманган вилояти, Янгиқўрғон тумани 1-сон болалар ва ўсмирлар спорт мактаби филиалини Ўзбекистон Республикаси Миллий гвардияси тизимига ўтказиш ва уларнинг негизида амалдаги молиялаштириш тартибини сақлаб қолган ҳолда «Ёш гвардиячилар» болалар ва ўсмирлар спорт мактаблари (кейинги ўринларда — спорт мактаблари) фаолиятини ташкил этиш тўғрисидаги таклифлари маъқуллансин.

2. Қуйидагилар спорт мактабларининг асосий вазифалари этиб белгилансин:

ёшларни ҳарбий-ватанпарварлик руҳида тарбиялаш, уларни соғлом турмуш тарзига тарғиб этиш ва спорт билан мунтазам равишда шуғулланишларини ташкил этиш;

нотиқлик ва етакчилик хислатларига эга, жисмонан ривожланган, чидамли, мард ва жасур Ватан ҳимоячиларини, шунингдек, Ўзбекистон Республикаси Миллий гвардияси учун кадрлар резервини шакллантириш мақсадида республиканинг олий, олий ҳарбий ва ихтисослаштирилган таълим муассасаларига ўқишга кириши учун муносиб номзодларни тайёрлашда кўмаклашиш;

олимпия ва миллий спорт турлари бўйича янги илмий-методик тавсиялар ва ютуқлар асосида спорт захираларини, терма жамоаларга юқори маҳоратли спортчиларни тайёрлаш;

ўқувчиларнинг жисмоний тайёргарлиги ва техник-тактик кўникмаларини такомиллаштириш, профессионал фазилатларини ривожлантириш, шунингдек спортни ривожлантириш халқаро талабларига мувофиқ ҳолда Ўзбекистон миллий терма жамоалари захирасини тайёрлаш даражасини ошириш;

ўқувчи-спортчилар ва тренерлар таркибининг профессионал маҳоратини ошириш учун хорижий спорт мактаблари ва клублари билан тажриба алмашиш бўйича ҳамкорликни кенгайтириш.

3. Белгилаб қўйилсинки:

спорт мактаблари фаолияти Вазирлар Маҳкамасининг «Спорт мактаблари фаолиятини ҳамда спорт мактаблари тренерлари ва мутахассислари меҳнатини моддий рағбатлантириш тизимини янада такомиллаштириш тўғрисида» 2010 йил 23 сентябрдаги 211-сон қарорига мувофиқ амалга оширилади;

спорт мактаби директорини лавозимга тайинлаш Ўзбекистон Республикаси Туризм ва спорт вазирлиги билан келишилган ҳолда Ўзбекистон Республикаси Миллий гвардияси томонидан амалга оширилади;

спорт мактаблари ўқувчиларининг машғулот даврига халақит бермаган ҳолда Ўзбекистон Республикаси Миллий гвардияси ҳарбий хизматчи ва ходимларига спорт мактабларининг спорт иншоотларидан фойдаланиши учун рухсат берилади.

4. Ўзбекистон Республикаси Миллий гвардияси:

а) бир ой муддатда:

Туризм ва спорт вазирлиги билан биргаликда спорт мактабларининг уставини тасдиқлаш ва белгиланган тартибда давлат рўйхатидан ўтказилишини;

спорт мактабларида машғулот олиб борадиган спортчиларга спорт иншоотида тўлиқ шарт-шароитлар яратилишини таъминласин;

б) 2022 йил 1 сентябрга қадар Ўзбекистон Республикаси Миллий гвардияси Қўриқлаш бош бошқармаси маблағлари ҳисобидан спорт иншоотларининг моддий-техника базасини мустаҳкамлаш ҳамда ёпиқ турдаги янги спорт иншоотларини қуриш, мавжудларини реконструкция қилиш, таъмирлаш ва жиҳозлаш ишларини амалга оширсин.

5. Ўзбекистон Республикаси Туризм ва спорт вазирлиги:

Ўзбекистон Республикаси Миллий гвардияси билан биргаликда бир ой муддатда белгиланган тартибда спорт иншоотларини топшириш-қабул қилиш ишлари амалга оширилишини таъминласин;

спорт мактабларига болалар, ўсмирлар ва ёшларни жисмоний тарбия ва спорт билан мунтазам шуғулланишлари учун кенг жалб этсин ҳамда спорт захираси ва юқори маҳоратли спортчиларни тайёрлаш бўйича ўқув-машқ жараёнини самарали ташкил этсин;

юқори малакали тренер кадрлар билан таъминлаш ва спорт захирасини тайёрлаш ишларини олиб борсин.

6. Мазкур қарорнинг бажарилишини назорат қилиш Ўзбекистон Республикаси Бош вазири ўринбосари — туризм ва спорт вазири А.А. Абдухакимов ҳамда Ўзбекистон Республикаси Миллий гвардияси қўмондони Р.М. Джураев зиммасига юклансин.

Ўзбекистон Республикасининг Бош вазири А. АРИПОВ

Тошкент ш.,

2022 йил 2 февраль,

50-сон

(Қонунчилик маълумотлари миллий базаси, 03.02.2022 й., 09/22/50/0092-сон)

lex.uz

Oʻzbekiston Respublikasi Vazirlar Mahkamasining

qarori

“Yosh gvardiyachilar” bolalar va oʻsmirlar sport maktablari faoliyatini tashkil etish toʻgʻrisida

Oʻzbekiston Respublikasi Prezidentining “Oʻzbekiston Respublikasida jismoniy tarbiya va sportni yanada takomillashtirish va ommalashtirish chora-tadbirlari toʻgʻrisida” 2020-yil 24-yanvardagi PF-5924-son Farmoniga muvofiq, shuningdek mamlakatimizda yoshlarni sportga keng jalb etish, ularni harbiy-vatanparvarlik ruhida tarbiyalash, sogʻlom turmush tarziga va sport bilan shugʻullanishga targʻib qilish ishlarini yanada takomillashtirish maqsadida Vazirlar Mahkamasi qaror qiladi:

1. Oʻzbekiston Respublikasi Turizm va sport vazirligi hamda Oʻzbekiston Respublikasi Milliy gvardiyasining Oʻzbekiston Respublikasi Turizm va sport vazirligi tizimidagi Toshkent shahar, Olmazor tumani 2-son bolalar va oʻsmirlar sport maktabi hamda Namangan viloyati, Yangiqoʻrgʻon tumani 1-son bolalar va oʻsmirlar sport maktabi filialini Oʻzbekiston Respublikasi Milliy gvardiyasi tizimiga oʻtkazish va ularning negizida amaldagi moliyalashtirish tartibini saqlab qolgan holda “Yosh gvardiyachilar” bolalar va oʻsmirlar sport maktablari (keyingi oʻrinlarda — sport maktablari) faoliyatini tashkil etish toʻgʻrisidagi takliflari maʼqullansin.

2. Quyidagilar sport maktablarining asosiy vazifalari etib belgilansin:

yoshlarni harbiy-vatanparvarlik ruhida tarbiyalash, ularni sogʻlom turmush tarziga targʻib etish va sport bilan muntazam ravishda shugʻullanishlarini tashkil etish;

notiqlik va yetakchilik xislatlariga ega, jismonan rivojlangan, chidamli, mard va jasur Vatan himoyachilarini, shuningdek, Oʻzbekiston Respublikasi Milliy gvardiyasi uchun kadrlar rezervini shakllantirish maqsadida respublikaning oliy, oliy harbiy va ixtisoslashtirilgan taʼlim muassasalariga oʻqishga kirishi uchun munosib nomzodlarni tayyorlashda koʻmaklashish;

olimpiya va milliy sport turlari boʻyicha yangi ilmiy-metodik tavsiyalar va yutuqlar asosida sport zaxiralarini, terma jamoalarga yuqori mahoratli sportchilarni tayyorlash;

oʻquvchilarning jismoniy tayyorgarligi va texnik-taktik koʻnikmalarini takomillashtirish, professional fazilatlarini rivojlantirish, shuningdek sportni rivojlantirish xalqaro talablariga muvofiq holda Oʻzbekiston milliy terma jamoalari zaxirasini tayyorlash darajasini oshirish;

oʻquvchi-sportchilar va trenerlar tarkibining professional mahoratini oshirish uchun xorijiy sport maktablari va klublari bilan tajriba almashish boʻyicha hamkorlikni kengaytirish.

3. Belgilab qoʻyilsinki:

sport maktablari faoliyati Vazirlar Mahkamasining “Sport maktablari faoliyatini hamda sport maktablari trenerlari va mutaxassislari mehnatini moddiy ragʻbatlantirish tizimini yanada takomillashtirish toʻgʻrisida” 2010-yil 23-sentabrdagi 211-son qaroriga muvofiq amalga oshiriladi;

sport maktabi direktorini lavozimga tayinlash Oʻzbekiston Respublikasi Turizm va sport vazirligi bilan kelishilgan holda Oʻzbekiston Respublikasi Milliy gvardiyasi tomonidan amalga oshiriladi;

sport maktablari oʻquvchilarining mashgʻulot davriga xalaqit bermagan holda Oʻzbekiston Respublikasi Milliy gvardiyasi harbiy xizmatchi va xodimlariga sport maktablarining sport inshootlaridan foydalanishi uchun ruxsat beriladi.

4. Oʻzbekiston Respublikasi Milliy gvardiyasi:

a) bir oy muddatda:

Turizm va sport vazirligi bilan birgalikda sport maktablarining ustavini tasdiqlash va belgilangan tartibda davlat roʻyxatidan oʻtkazilishini;

sport maktablarida mashgʻulot olib boradigan sportchilarga sport inshootida toʻliq shart-sharoitlar yaratilishini taʼminlasin;

b) 2022-yil 1-sentabrga qadar Oʻzbekiston Respublikasi Milliy gvardiyasi Qoʻriqlash bosh boshqarmasi mablagʻlari hisobidan sport inshootlarining moddiy-texnika bazasini mustahkamlash hamda yopiq turdagi yangi sport inshootlarini qurish, mavjudlarini rekonstruksiya qilish, taʼmirlash va jihozlash ishlarini amalga oshirsin.

5. Oʻzbekiston Respublikasi Turizm va sport vazirligi:

Oʻzbekiston Respublikasi Milliy gvardiyasi bilan birgalikda bir oy muddatda belgilangan tartibda sport inshootlarini topshirish-qabul qilish ishlari amalga oshirilishini taʼminlasin;

sport maktablariga bolalar, oʻsmirlar va yoshlarni jismoniy tarbiya va sport bilan muntazam shugʻullanishlari uchun keng jalb etsin hamda sport zaxirasi va yuqori mahoratli sportchilarni tayyorlash boʻyicha oʻquv-mashq jarayonini samarali tashkil etsin;

yuqori malakali trener kadrlar bilan taʼminlash va sport zaxirasini tayyorlash ishlarini olib borsin.

6. Mazkur qarorning bajarilishini nazorat qilish Oʻzbekiston Respublikasi Bosh vaziri oʻrinbosari — turizm va sport vaziri A.A. Abduxakimov hamda Oʻzbekiston Respublikasi Milliy gvardiyasi qoʻmondoni R.M. Djurayev zimmasiga yuklansin.

Oʻzbekiston Respublikasining Bosh vaziri A. ARIPOV

Toshkent sh.,

2022-yil 2-fevral,

50-son

(Qonunchilik maʼlumotlari milliy bazasi, 03.02.2022-y., 09/22/50/0092-son)

lex.uz