📅 2022-yil 7-fevral · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2022 йил 7 февраль · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 7 февраля 2022 г. · Постановления Кабинета Министров
Официальный текст. Официальный документ. Редакционные примечания не включены.
📅 7 February 2022 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
ТАРКИБИ
НИЗОМ
СХЕМАСИ
«Бойсун баҳори» халқаро фольклор фестивалини ташкил этиш ва ўтказиш чора-тадбирлари тўғрисида
Маданият ва санъат соҳасига, халқимизнинг бой маданий меросига берилаётган эътибор натижасида мамлакатимизда Халқаро бахшичилик санъати фестивалини ўтказиш йўлга қўйилди. Ушбу фестиваль 2019 йилда Термиз шаҳрида, 2021 йилда Нукус шаҳрида нуфузли халқаро ташкилотлар ва меҳмонлар иштирокида юқори савияда ўтказилди.
ЮНЕСКОнинг Номоддий маданий меросни муҳофаза қилиш бўйича ҳукуматлараро қўмитаси XVI сессияси (2021 йил, Париж шаҳри) доирасида Бахшичилик санъати Ўзбекистоннинг номоддий маданий мероси элементи сифатида Инсоният номоддий маданий мероси Репрезентатив рўйхатига киритилди.
Халқимизнинг ўзига хос фольклор санъатини қўллаб-қувватлашни давом эттириш, шу жумладан, халқ достонлари, ҳунармандчилиги, миллий либослари ва халқ ўйинлари, қадимий урф-одатларини сақлаб қолиш ҳамда уларни кенг тарғиб қилиш мақсадида Вазирлар Маҳкамаси қарор қилади:
1. Сурхондарё вилояти ҳокимлиги, Маданият вазирлиги ҳамда Туризм ва маданий мерос вазирлигининг 2022 йилдан бошлаб ҳар икки йилда бир марта апрель ойида Бойсун туманида «Бойсун баҳори» халқаро фольклор фестивалини (кейинги ўринларда — Фестиваль) ташкил этиш ва ўтказиш тўғрисидаги таклифи маъқуллансин.
2. «Бойсун баҳори» халқаро фольклор фестивалига тайёргарлик кўриш ва уни ўтказиш бўйича ташкилий қўмита (кейинги ўринларда — Ташкилий қўмита) тузилсин ҳамда унинг таркиби 1-иловага мувофиқ тасдиқлансин.
3. Ташкилий қўмита:
манфаатдор вазирликлар ва идоралар билан биргаликда 2022 йилда Фестивални ташкил этиш ҳамда ўтказиш бўйича барча ташкилий ва ижодий ишларни мувофиқлаштирсин;
Фестиваль ўтказиладиган йилнинг 1 мартига қадар унга тайёргарлик кўриш ва уни ўтказиш билан боғлиқ харажатлар сметасини шакллантирсин ҳамда тасдиқласин;
Фестиваль ўтказиладиган йилнинг 1 мартига қадар совриндорларга топшириладиган диплом, сертификат, статуэтка намуналарини тасдиқласин;
Фестивални замонавий технологиялардан кенг фойдаланган ҳолда юқори бадиий савияда ўтказиш ишларини амалга оширсин.
4. Сурхондарё вилояти ҳокимлиги:
бир ой муддатда Фестивални ташкил этиш ва ўтказиш бўйича «йўл харитаси»ни тасдиқлаб, унда белгиланган вазифалар ижросини таъминласин;
Бойсун туманида кенг кўламдаги ободонлаштириш ва кўкаламзорлаштириш ишларини амалга оширсин, Фестиваль ўтказиладиган жойларни талаб даражасида тайёрласин;
Фестиваль иштирокчилари учун маданий дастурлар ҳамда Сурхондарё вилоятининг диққатга сазовор жойларига саёҳатларни ташкил этсин;
Маданият вазирлиги билан биргаликда Фестиваль ўтказиладиган йилнинг 10 февралига қадар тажрибали режиссёр, таниқли санъаткор, продюсер, композитор, шоир ва соҳанинг бошқа малакали мутахассисларини жалб этган ҳолда Фестивалнинг очилиш ва ёпилиш маросимлари сценарийси ҳамда бадиий дастурларини тайёрласин;
«Ҳунарманд» уюшмаси билан биргаликда Фестиваль доирасида миллий созлар ва либослар, ҳунармандчилик буюмлари, тасвирий ва амалий санъат асарлари кўргазмаларини, бадиий ва ҳужжатли фильмлар, аудио ва видео дисклар, китоблар, альбомлар, фотосуратлар намойиши ва уларнинг сотувини ташкил этсин;
Туризм ва маданий мерос вазирлиги билан биргаликда Фестиваль ўтказиладиган йилнинг 10 февралига қадар туризм соҳасидаги тадбиркорлик субъектлари орасида Фестивални кенг тарғиб қилиш ҳамда у ҳақидаги маълумотларни Интернет жаҳон ахборот тармоғи, ижтимоий тармоқлар ва бошқа оммавий ахборот воситаларида жойлаштириш чораларини кўрсин.
5. Белгилансинки, Фестивални ташкил этиш ва ўтказиш билан боғлиқ сарф-харажатлар Сурхондарё вилояти ҳокимлиги ва Маданият вазирлиги томонидан ишлаб чиқилган ҳамда Ташкилий қўмита томонидан тасдиқланган смета асосида қуйидаги тартибда:
30 фоизи — республика бюджетидан Маданият вазирлигига маданий тадбирлар учун ҳар йили ажратиладиган маблағлар ҳисобига;
70 фоизи — Сурхондарё вилояти маҳаллий бюджетининг қўшимча манбалари, шунингдек, жисмоний ва юридик шахсларнинг ҳомийлик хайриялари ҳамда қонунчилик ҳужжатларида тақиқланмаган бошқа манбалар ҳисобига қопланади.
6. Қуйидагиларни назарда тутувчи «Бойсун баҳори» халқаро фольклор фестивалини ташкил этиш ва ўтказиш тартиби тўғрисидаги низом 2-иловага мувофиқ тасдиқлансин:
Фестивални Сурхондарё вилояти ҳокимлиги ва Маданият вазирлиги томонидан ташкил этиш ва ўтказиш тартиби;
Фестивални ўтказиш тартиби ва шартлари, шу жумладан, унда фольклор жамоалари (фольклор санъати бўйича 12 нафардан, миллий халқ ўйинлари ва томоша санъати йўналишида 4 нафардан ошмаган ҳолда) томонидан ўз дастурларини намойиш этиш талаблари;
Фестиваль иштирокчиларини 9 — 11 нафар етакчи мутахассислардан иборат таркибда тузиладиган Ҳакамлар ҳайъати ҳар бир аъзоси томонидан алоҳида тарзда 10 баллик тизим бўйича баҳолаш ва ғолибларни аниқлаш мезонлари;
Фестивални ташкил этиш ва ўтказишни молиялаштириш тартиби ҳамда молиялаштириш манбалари.
7. Маданият вазирлиги 2022 йил якунига қадар:
Бахшичилик санъатини келажак авлодга муносиб етказиш мақсадида соҳа мутахассисларини жалб этган ҳолда ушбу санъатнинг илмий асосланган тарихи, ривожланиш босқичлари ҳақида китоб-альбом;
Кинематография агентлиги билан биргаликда Ўзбекистон ҳудудида бахшичиликнинг ривожланиш тарихини акс эттирувчи махсус фильм яратилишини таъминласин.
8. Ўзбекистон Миллий телерадиокомпанияси, Ўзбекистон Миллий ахборот агентлиги, Ўзбекистон электрон оммавий ахборот воситалари миллий ассоциацияси ва бошқа оммавий ахборот воситаларига Фестивални кенг ёритиб бориш тавсия этилсин.
9. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосари — туризм ва спорт вазири А.А. Абдухакимов, Сурхондарё вилояти ҳокими Т.А. Боболов ва Ўзбекистон Республикаси маданият вазири О.А. Назарбеков зиммасига юклансин.
Вазирлар Маҳкамасининг 2022 йил 7 февралдаги 59-сон қарорига 1-ИЛОВА
«Бойсун баҳори» халқаро фольклор фестивалига тайёргарлик кўриш ва уни ўтказиш бўйича ташкилий қўмита
1. А. Абдухакимов — Ўзбекистон Республикаси Бош вазирининг ўринбосари — туризм ва маданий мерос вазири, Ташкилий қўмита раиси 2. Т. Боболов — Сурхондарё вилояти ҳокими, Ташкилий қўмита раисининг ўринбосари 3. О. Назарбеков — маданият вазири, Ташкилий қўмита раисининг ўринбосари 4. Ғ. Фозилов — ташқи ишлар вазирининг ўринбосари 5. А. Нуридинов — Ўзбекистон Бадиий академияси раиси 6. М. Ходжиматов — Республика Маънавият ва маърифат маркази раҳбари 7. С. Саидов — Ўзбекистон Ёзувчилар уюшмаси раиси 8. У. Абдуллаев — Республика «Ҳунарманд» уюшмаси раиси 9. А. Хаджаев — Ўзбекистон Миллий телерадиокомпанияси раиси 10. А. Каримов — Халқаро «Олтин мерос» жамғармаси раиси 11. Ж. Тўраев — Сурхондарё вилояти ҳокимининг туризм, спорт, маданият, маданий мерос ва оммавий коммуникациялар масалалари бўйича ўринбосари 12. Қ. Амонқулов — Сурхондарё вилояти маданият бошқармаси бошлиғи, Ташкилий қўмита котиби
Вазирлар Маҳкамасининг 2022 йил 7 февралдаги 59-сон қарорига 2-ИЛОВА
«Бойсун баҳори» халқаро фольклор фестивалини ташкил этиш ва ўтказиш тартиби тўғрисида
1-боб. Умумий қоидалар
1. Мазкур Низом «Бойсун баҳори» халқаро фольклор фестивали (кейинги ўринларда — Фестиваль)ни ташкил этиш ва ўтказиш тартибини белгилайди.
2. Фестиваль 2022 йилдан бошлаб ҳар икки йилда бир марта апрель ойида Бойсун туманида ўтказилади.
Бунда унинг аниқ муддати «Бойсун баҳори» халқаро фольклор фестивалига тайёргарлик кўриш ва уни ўтказиш бўйича ташкилий қўмита (кейинги ўринларда — Ташкилий қўмита) томонидан Фестиваль бошланишидан 30 кун олдин оммавий ахборот воситаларида эълон қилинади.
3. Фестиваль Сурхондарё вилояти ҳокимлиги ва Маданият вазирлиги (кейинги ўринларда — ташкилотчилар) томонидан ташкил этилади ва ўтказилади.
4. Фестивални ташкил этиш ва ўтказиш Ташкилий қўмита томонидан мувофиқлаштирилади.
2-боб. Фестивалнинг асосий вазифалари
5. Фестивалнинг асосий вазифалари қуйидагилардан иборат:
ўзбек халқининг ўзига хос фольклор санъатини, шу жумладан, оғзаки шеърий ижодиёт, халқ достонлари, ҳунармандчилик, миллий либослар ва халқ ўйинлари, қадимий урф-одатларни сақлаб қолиш ҳамда уларни кенг тарғиб этиш;
хорижий давлатлар билан ҳамкорликда миллий маданиятлар уйғунлиги ва турфа хиллигини сақлаш ва ривожлантириш, номоддий маданий мероснинг энг яхши намуналарини муҳофаза қилиш ва ривожлантириш;
миллий анъаналарни асраб-авайлаш, ёшларда фольклор санъатига бўлган қизиқишни ошириш;
ўзбек халқининг маданиятини, хусусан, бетакрор фольклор санъатини, шу жумладан, Фестиваль доирасида ҳунармандчилик кўргазмалари, тасвирий ва амалий санъат асарлари, қадриятлар ва анъаналарни кенг тарғиб этиш;
турли миллат вакилларини маънавий мулоқотга жалб этиш, миллий анъаналар асосида халқаро маданий ҳамкорликни мустаҳкамлаш, маданий туризмни ривожлантириш.
3-боб. Фестивални ўтказиш тартиби ва шартлари
6. Фестиваль ижро дастури асосида мазкур Низомга иловада келтирилган схемага мувофиқ ўтказилади.
7. Ташкилотчилар томонидан Фестивалнинг ижро дастури ва танловда ижро этиладиган асарлар рўйхати (кейинги ўринларда — дастур ва асарлар рўйхати) тасдиқланади ҳамда Фестивални ўтказишнинг аниқ муддати билан бирга Фестиваль бошланишидан уч ой олдин оммавий ахборот воситаларида эълон қилинади.
8. Маданият вазирлиги дастур ва асарлар рўйхатини улар тасдиқлангандан кейин беш кун муддатда Қорақалпоғистон Республикаси Маданият вазирлиги, вилоятлар маданият бошқармалари ҳамда Тошкент шаҳар маданият бош бошқармасига етказади.
9. Қорақалпоғистон Республикаси Маданият вазирлиги, вилоятлар маданият бошқармалари ҳамда Тошкент шаҳар маданият бош бошқармаси дастур ва асарлар рўйхатини улар олингандан кейин уч кун муддатда фольклор ижрочилари ва жамоаларига етказади.
10. Ҳар бир иштирокчи Фестиваль ўтказилишидан 30 кун олдин Ташкилий қўмитага қуйидагиларни тақдим этади:
иштирокчининг маълумотномаси;
ижро дастури ва матни;
аудио ва видео диск.
11. Фестивалда:
якка ижрочилар, фольклор санъати бўйича 12 нафардан, миллий халқ ўйинлари ва томоша санъати йўналишида 4 нафардан ошмаган таркибда ижодий жамоалар чиқишлари намойиш этилади;
ижро асарлари чиройли ва мазмунли чиқиши учун рақслардан ҳам фойдаланиш (бунда рақслар Ҳакамлар ҳайъати томонидан баҳоланмайди) мумкин;
барча ижро этиладиган асарлар ёддан ижро этилади.
12. Фестиваль қуйидаги номинациялар бўйича ўтказилади:
фольклор санъати (алла, ўлан, лапар, рақс, терма, маросим қўшиқлари ва ҳоказо);
миллий халқ ўйинлари ва томоша санъати.
13. Фестивалга хорижий давлатлардан келадиган иштирокчилар ҳужжатлари ва материаллари тегишли давлатлардаги мутасадди ташкилотлар ва муассасалар томонидан Ўзбекистон Республикасининг хорижий давлатлардаги элчихоналари орқали тақдим этилади.
14. Номинация бўйича ҳар бир иштирокчининг чиқиш дастурлари ижроси 15 дақиқадан ошмаслиги керак.
15. Фестивалда иштирок этишда фонограммадан фойдаланишга йўл қўйилмайди.
16. Фестиваль доирасида илмий-ижодий конференциялар, семинарлар, давра суҳбатлари, сайиллар, концертлар, кўргазмалар ва бошқа тадбирлар ташкил этилади.
4-боб. Фестиваль иштирокчиларини баҳолаш ва ҳайъат фаолиятини ташкил этиш
17. Ташкилий қўмита томонидан 9 — 11 нафар аъзодан иборат Ҳакамлар ҳайъати таркиби ва Ҳайъат регламенти тасдиқланади.
Халқаро ҳайъат таркибига юқори малакали мутахассислар, таниқли санъат ва маданият арбоблари, олимлар, тадқиқотчилар, амалиётчилар, шунингдек, иштирокчи давлатлардан тегишли соҳалар намояндалари киритилади.
18. Фестиваль иштирокчиларининг ижро маҳорати Ҳакамлар ҳайъатининг ҳар бир аъзоси томонидан алоҳида тарзда 10 баллик тизим бўйича баҳоланади ва ғолиблар аниқланади.
19. Баҳолаш жараёнида:
репертуарнинг бадиий қиймати (этнографик аниқлик ва асар қайта ишланиши ёки стилизациясидаги афзалликлар), материалда ҳудудий ўзига хосликларнинг акс этиши;
маҳорат савияси, халқ ижрочилиги усулларини эгаллаганлик даражаси;
оғзаки, мусиқий, ашулачилик ва рақс миллий анъаналари ижроси услублари ва йўлларининг мутаносиблиги;
безакнинг бадиий савияси (кийимлар, реквизит) ва унинг миллий анъаналарга мослиги, анъанавий мусиқа асбобларидан фойдаланиш;
декоратив-амалий ижод асарлари бадиий савияси асосий мезон ҳисобланади.
20. Иштирокчиларни баҳолашда Ҳакамлар ҳайъати мустақил ҳисобланади.
21. Танловнинг якуний натижалари Ҳакамлар ҳайъатининг қарори билан расмийлаштирилади.
22. Халқаро ҳайъатнинг қарорлари қатъий ва қайта кўриб чиқилмайди.
5-боб. Мукофотлаш тартиби
23. Фестиваль ғолиблари қуйидаги пул мукофотлари билан тақдирланадилар:
1-ўрин (ҳар бир номинация бўйича) — 3 500 АҚШ доллари;
2-ўрин (ҳар бир номинация бўйича) — 2 500 АҚШ доллари;
3-ўрин (ҳар бир номинация бўйича) — 1 500 АҚШ доллари.
24. Фестивалнинг ғолибларига Ташкилий қўмита томонидан дипломлар, совринлар ва Фестиваль рамзлари туширилган эсдалик совғалари топширилади.
Халқаро ҳайъат қарори билан энг яхши деб топилган иштирокчилар ҳар бир номинация бўйича биттадан Лауреат дипломлари билан тақдирланадилар.
Бундан ташқари, ҳар бир номинацияда биттадан 1, 2 ва 3-даражали дипломлар, Фестиваль иштирокчиси дипломлари ҳамда ҳар бир қатнашчига махсус диплом берилади.
25. Фестиваль ташкилотчилари, давлат ва нодавлат ташкилотлар, оммавий ахборот воситалари, корхоналар, муассасалар, жамғармалар, ижодий уюшмалар ва бошқа ташкилотлар иштирокчилар учун махсус мукофотлар, совринлар, эсдалик совғалари ва махсус мукофотлар таъсис этишлари мумкин.
6-боб. Фестивални ташкил этиш ва ўтказишни молиялаштириш
26. Ҳакамлар ҳайъати аъзоларининг Сурхондарё вилоятига келиб-кетиши, меҳмонхона ва овқатланиши билан боғлиқ харажатлар Фестиваль сметаси доирасида қопланади.
27. Фестиваль иштирокчиларининг уни ўтказиш белгиланган ҳудудга келиб-кетиши, меҳмонхона ва овқатланиши билан боғлиқ харажатлар уларни Фестивалда иштирок этишга юборган ташкилот томонидан ўз маблағлари, жисмоний ва юридик шахсларнинг ҳомийлик хайриялари, шунингдек, қонунчилик ҳужжатларида тақиқланмаган бошқа манбалар ҳисобидан қопланади.
28. Хорижий меҳмонларнинг Ўзбекистон ҳудудидаги алоҳида меҳмонхона ва транспорт харажатлари уларни таклиф этган мезбон ташкилот ва муассасалар ёки меҳмонларнинг ўзлари томонидан қопланади.
29. Фестивални ташкил этиш ва ўтказиш билан боғлиқ сарф-харажатлар Сурхондарё вилояти ҳокимлиги ва Маданият вазирлиги томонидан ишлаб чиқилган ҳамда Ташкилий қўмита томонидан тасдиқланган смета асосида қуйидаги тартибда:
30 фоизи — Ўзбекистон Республикаси республика бюджетидан Маданият вазирлигига маданий тадбирлар учун ҳар йили ажратиладиган маблағлар ҳисобига;
70 фоизи — Сурхондарё вилояти маҳаллий бюджетининг қўшимча манбалари, шунингдек, жисмоний ва юридик шахсларнинг ҳомийлик хайриялари ҳамда қонунчилик ҳужжатларида тақиқланмаган бошқа манбалар ҳисобига қопланади.
7-боб. Якунловчи қоидалар
30. Ўзбекистон Республикасининг Солиқ кодексига мувофиқ кўрикларда, танловларда совринли ўринлар учун бериладиган совринлар, пул мукофотларига солиқ солинмайди, шунингдек, ягона ижтимоий тўлов ва суғурта бадаллари бўйича солиқ солиш объекти ҳисобланмайди.
31. Давлат молиявий назорати инспекцияси Фестивални ташкил этиш ва ўтказиш учун ажратилган бюджет маблағларининг мақсадли ишлатилиши ва тўғри тўланишини назорат қилади.
«Бойсун баҳори» халқаро фольклор фестивалини ташкил этиш ва ўтказиш тартиби тўғрисидаги низомга ИЛОВА
«Бойсун баҳори» халқаро фольклор фестивалини ташкил этиш ва ўтказиш
Босқичлар Субъектлар Амалга ошириладиган ишлар Бажариш муддати 1-босқич Ташкилотчилар Фестивалнинг ижро дастури ва унда ижро этиладиган асарлар рўйхатини (кейинги ўринларда — рўйхат) тасдиқлайди Фестиваль бошланишидан уч ой олдин 2-босқич Ташкилий қўмита Фестиваль ўтказиладиган аниқ муддатни оммавий ахборот воситаларида эълон қилади Фестиваль бошланишидан ўттиз кун олдин 3-босқич Маданият вазирлиги Рўйхатни Қорақалпоғистон Республикаси Маданият вазирлиги, вилоятлар маданият бошқармалари ҳамда Тошкент шаҳар маданият бош бошқармасига етказади Фестивалнинг ижро дастури ва танловда ижро этиладиган асарлар рўйхати тасдиқлангандан сўнг беш кун муддатда 4-босқич Қорақалпоғистон Республикаси Маданият вазирлиги, вилоятлар маданият бошқармалари ҳамда Тошкент шаҳар маданият бош бошқармаси Рўйхатни фольклор ижрочилари ва жамоаларига етказади Фестивалнинг ижро дастури ва танловда ижро этиладиган асарлар рўйхати олингандан кейин уч кун муддатда 5-босқич Фестиваль иштирокчилари Фестивалда қатнашиш учун зарур ҳужжатларни Ташкилий қўмитага тақдим қилади Фестиваль бошланишидан ўттиз кун олдин 6-босқич Ташкилотчилар, Ташкилий қўмита Фестивални ўтказади Фестиваль ўтказиладиган йилнинг апрель ойида 7-босқич Ташкилотчилар, Ташкилий қўмита Фестиваль ғолибларини тақдирлайди Фестиваль якуни бўйича
Ўзбекистон Республикасининг Бош вазири А. АРИПОВ
Тошкент ш.,
2022 йил 7 февраль,
59-сон
Oʻzbekiston Respublikasi Vazirlar Mahkamasining
qarori
TARKIBI
NIZOM
SXEMASI
“Boysun bahori” xalqaro folklor festivalini tashkil etish va oʻtkazish chora-tadbirlari toʻgʻrisida
Madaniyat va sanʼat sohasiga, xalqimizning boy madaniy merosiga berilayotgan eʼtibor natijasida mamlakatimizda Xalqaro baxshichilik sanʼati festivalini oʻtkazish yoʻlga qoʻyildi. Ushbu festival 2019-yilda Termiz shahrida, 2021-yilda Nukus shahrida nufuzli xalqaro tashkilotlar va mehmonlar ishtirokida yuqori saviyada oʻtkazildi.
YUNESKOning Nomoddiy madaniy merosni muhofaza qilish boʻyicha hukumatlararo qoʻmitasi XVI sessiyasi (2021-yil, Parij shahri) doirasida Baxshichilik sanʼati Oʻzbekistonning nomoddiy madaniy merosi elementi sifatida Insoniyat nomoddiy madaniy merosi Reprezentativ roʻyxatiga kiritildi.
Xalqimizning oʻziga xos folklor sanʼatini qoʻllab-quvvatlashni davom ettirish, shu jumladan, xalq dostonlari, hunarmandchiligi, milliy liboslari va xalq oʻyinlari, qadimiy urf-odatlarini saqlab qolish hamda ularni keng targʻib qilish maqsadida Vazirlar Mahkamasi qaror qiladi:
1. Surxondaryo viloyati hokimligi, Madaniyat vazirligi hamda Turizm va madaniy meros vazirligining 2022-yildan boshlab har ikki yilda bir marta aprel oyida Boysun tumanida “Boysun bahori” xalqaro folklor festivalini (keyingi oʻrinlarda — Festival) tashkil etish va oʻtkazish toʻgʻrisidagi taklifi maʼqullansin.
2. “Boysun bahori” xalqaro folklor festivaliga tayyorgarlik koʻrish va uni oʻtkazish boʻyicha tashkiliy qoʻmita (keyingi oʻrinlarda — Tashkiliy qoʻmita) tuzilsin hamda uning tarkibi 1-ilovaga muvofiq tasdiqlansin.
3. Tashkiliy qoʻmita:
manfaatdor vazirliklar va idoralar bilan birgalikda 2022-yilda Festivalni tashkil etish hamda oʻtkazish boʻyicha barcha tashkiliy va ijodiy ishlarni muvofiqlashtirsin;
Festival oʻtkaziladigan yilning 1-martiga qadar unga tayyorgarlik koʻrish va uni oʻtkazish bilan bogʻliq xarajatlar smetasini shakllantirsin hamda tasdiqlasin;
Festival oʻtkaziladigan yilning 1-martiga qadar sovrindorlarga topshiriladigan diplom, sertifikat, statuetka namunalarini tasdiqlasin;
Festivalni zamonaviy texnologiyalardan keng foydalangan holda yuqori badiiy saviyada oʻtkazish ishlarini amalga oshirsin.
4. Surxondaryo viloyati hokimligi:
bir oy muddatda Festivalni tashkil etish va oʻtkazish boʻyicha “yoʻl xaritasi”ni tasdiqlab, unda belgilangan vazifalar ijrosini taʼminlasin;
Boysun tumanida keng koʻlamdagi obodonlashtirish va koʻkalamzorlashtirish ishlarini amalga oshirsin, Festival oʻtkaziladigan joylarni talab darajasida tayyorlasin;
Festival ishtirokchilari uchun madaniy dasturlar hamda Surxondaryo viloyatining diqqatga sazovor joylariga sayohatlarni tashkil etsin;
Madaniyat vazirligi bilan birgalikda Festival oʻtkaziladigan yilning 10-fevraliga qadar tajribali rejissyor, taniqli sanʼatkor, prodyuser, kompozitor, shoir va sohaning boshqa malakali mutaxassislarini jalb etgan holda Festivalning ochilish va yopilish marosimlari ssenariysi hamda badiiy dasturlarini tayyorlasin;
“Hunarmand” uyushmasi bilan birgalikda Festival doirasida milliy sozlar va liboslar, hunarmandchilik buyumlari, tasviriy va amaliy sanʼat asarlari koʻrgazmalarini, badiiy va hujjatli filmlar, audio va video disklar, kitoblar, albomlar, fotosuratlar namoyishi va ularning sotuvini tashkil etsin;
Turizm va madaniy meros vazirligi bilan birgalikda Festival oʻtkaziladigan yilning 10-fevraliga qadar turizm sohasidagi tadbirkorlik subyektlari orasida Festivalni keng targʻib qilish hamda u haqidagi maʼlumotlarni Internet jahon axborot tarmogʻi, ijtimoiy tarmoqlar va boshqa ommaviy axborot vositalarida joylashtirish choralarini koʻrsin.
5. Belgilansinki, Festivalni tashkil etish va oʻtkazish bilan bogʻliq sarf-xarajatlar Surxondaryo viloyati hokimligi va Madaniyat vazirligi tomonidan ishlab chiqilgan hamda Tashkiliy qoʻmita tomonidan tasdiqlangan smeta asosida quyidagi tartibda:
30 foizi — respublika budjetidan Madaniyat vazirligiga madaniy tadbirlar uchun har yili ajratiladigan mablagʻlar hisobiga;
70 foizi — Surxondaryo viloyati mahalliy budjetining qoʻshimcha manbalari, shuningdek, jismoniy va yuridik shaxslarning homiylik xayriyalari hamda qonunchilik hujjatlarida taqiqlanmagan boshqa manbalar hisobiga qoplanadi.
6. Quyidagilarni nazarda tutuvchi “Boysun bahori” xalqaro folklor festivalini tashkil etish va oʻtkazish tartibi toʻgʻrisidagi nizom 2-ilovaga muvofiq tasdiqlansin:
Festivalni Surxondaryo viloyati hokimligi va Madaniyat vazirligi tomonidan tashkil etish va oʻtkazish tartibi;
Festivalni oʻtkazish tartibi va shartlari, shu jumladan, unda folklor jamoalari (folklor sanʼati boʻyicha 12 nafardan, milliy xalq oʻyinlari va tomosha sanʼati yoʻnalishida 4 nafardan oshmagan holda) tomonidan oʻz dasturlarini namoyish etish talablari;
Festival ishtirokchilarini 9 — 11 nafar yetakchi mutaxassislardan iborat tarkibda tuziladigan Hakamlar hayʼati har bir aʼzosi tomonidan alohida tarzda 10 ballik tizim boʻyicha baholash va gʻoliblarni aniqlash mezonlari;
Festivalni tashkil etish va oʻtkazishni moliyalashtirish tartibi hamda moliyalashtirish manbalari.
7. Madaniyat vazirligi 2022-yil yakuniga qadar:
Baxshichilik sanʼatini kelajak avlodga munosib yetkazish maqsadida soha mutaxassislarini jalb etgan holda ushbu sanʼatning ilmiy asoslangan tarixi, rivojlanish bosqichlari haqida kitob-albom;
Kinematografiya agentligi bilan birgalikda Oʻzbekiston hududida baxshichilikning rivojlanish tarixini aks ettiruvchi maxsus film yaratilishini taʼminlasin.
8. Oʻzbekiston Milliy teleradiokompaniyasi, Oʻzbekiston Milliy axborot agentligi, Oʻzbekiston elektron ommaviy axborot vositalari milliy assotsiatsiyasi va boshqa ommaviy axborot vositalariga Festivalni keng yoritib borish tavsiya etilsin.
9. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari — turizm va sport vaziri A.A. Abduxakimov, Surxondaryo viloyati hokimi T.A. Bobolov va Oʻzbekiston Respublikasi madaniyat vaziri O.A. Nazarbekov zimmasiga yuklansin.
Vazirlar Mahkamasining 2022-yil 7-fevraldagi 59-son qaroriga 1-ILOVA
“Boysun bahori” xalqaro folklor festivaliga tayyorgarlik koʻrish va uni oʻtkazish boʻyicha tashkiliy qoʻmita
1. A. Abduxakimov — Oʻzbekiston Respublikasi Bosh vazirining oʻrinbosari — turizm va madaniy meros vaziri, Tashkiliy qoʻmita raisi 2. T. Bobolov — Surxondaryo viloyati hokimi, Tashkiliy qoʻmita raisining oʻrinbosari 3. O. Nazarbekov — madaniyat vaziri, Tashkiliy qoʻmita raisining oʻrinbosari 4. Gʻ. Fozilov — tashqi ishlar vazirining oʻrinbosari 5. A. Nuridinov — Oʻzbekiston Badiiy akademiyasi raisi 6. M. Xodjimatov — Respublika Maʼnaviyat va maʼrifat markazi rahbari 7. S. Saidov — Oʻzbekiston Yozuvchilar uyushmasi raisi 8. U. Abdullayev — Respublika “Hunarmand” uyushmasi raisi 9. A. Xadjayev — Oʻzbekiston Milliy teleradiokompaniyasi raisi 10. A. Karimov — Xalqaro “Oltin meros” jamgʻarmasi raisi 11. J. Toʻrayev — Surxondaryo viloyati hokimining turizm, sport, madaniyat, madaniy meros va ommaviy kommunikatsiyalar masalalari boʻyicha oʻrinbosari 12. Q. Amonqulov — Surxondaryo viloyati madaniyat boshqarmasi boshligʻi, Tashkiliy qoʻmita kotibi
Vazirlar Mahkamasining 2022-yil 7-fevraldagi 59-son qaroriga 2-ILOVA
“Boysun bahori” xalqaro folklor festivalini tashkil etish va oʻtkazish tartibi toʻgʻrisida
1-bob. Umumiy qoidalar
1. Mazkur Nizom “Boysun bahori” xalqaro folklor festivali (keyingi oʻrinlarda — Festival)ni tashkil etish va oʻtkazish tartibini belgilaydi.
2. Festival 2022-yildan boshlab har ikki yilda bir marta aprel oyida Boysun tumanida oʻtkaziladi.
Bunda uning aniq muddati “Boysun bahori” xalqaro folklor festivaliga tayyorgarlik koʻrish va uni oʻtkazish boʻyicha tashkiliy qoʻmita (keyingi oʻrinlarda — Tashkiliy qoʻmita) tomonidan Festival boshlanishidan 30 kun oldin ommaviy axborot vositalarida eʼlon qilinadi.
3. Festival Surxondaryo viloyati hokimligi va Madaniyat vazirligi (keyingi oʻrinlarda — tashkilotchilar) tomonidan tashkil etiladi va oʻtkaziladi.
4. Festivalni tashkil etish va oʻtkazish Tashkiliy qoʻmita tomonidan muvofiqlashtiriladi.
2-bob. Festivalning asosiy vazifalari
5. Festivalning asosiy vazifalari quyidagilardan iborat:
oʻzbek xalqining oʻziga xos folklor sanʼatini, shu jumladan, ogʻzaki sheʼriy ijodiyot, xalq dostonlari, hunarmandchilik, milliy liboslar va xalq oʻyinlari, qadimiy urf-odatlarni saqlab qolish hamda ularni keng targʻib etish;
xorijiy davlatlar bilan hamkorlikda milliy madaniyatlar uygʻunligi va turfa xilligini saqlash va rivojlantirish, nomoddiy madaniy merosning eng yaxshi namunalarini muhofaza qilish va rivojlantirish;
milliy anʼanalarni asrab-avaylash, yoshlarda folklor sanʼatiga boʻlgan qiziqishni oshirish;
oʻzbek xalqining madaniyatini, xususan, betakror folklor sanʼatini, shu jumladan, Festival doirasida hunarmandchilik koʻrgazmalari, tasviriy va amaliy sanʼat asarlari, qadriyatlar va anʼanalarni keng targʻib etish;
turli millat vakillarini maʼnaviy muloqotga jalb etish, milliy anʼanalar asosida xalqaro madaniy hamkorlikni mustahkamlash, madaniy turizmni rivojlantirish.
3-bob. Festivalni oʻtkazish tartibi va shartlari
6. Festival ijro dasturi asosida mazkur Nizomga ilovada keltirilgan sxemaga muvofiq oʻtkaziladi.
7. Tashkilotchilar tomonidan Festivalning ijro dasturi va tanlovda ijro etiladigan asarlar roʻyxati (keyingi oʻrinlarda — dastur va asarlar roʻyxati) tasdiqlanadi hamda Festivalni oʻtkazishning aniq muddati bilan birga Festival boshlanishidan uch oy oldin ommaviy axborot vositalarida eʼlon qilinadi.
8. Madaniyat vazirligi dastur va asarlar roʻyxatini ular tasdiqlangandan keyin besh kun muddatda Qoraqalpogʻiston Respublikasi Madaniyat vazirligi, viloyatlar madaniyat boshqarmalari hamda Toshkent shahar madaniyat bosh boshqarmasiga yetkazadi.
9. Qoraqalpogʻiston Respublikasi Madaniyat vazirligi, viloyatlar madaniyat boshqarmalari hamda Toshkent shahar madaniyat bosh boshqarmasi dastur va asarlar roʻyxatini ular olingandan keyin uch kun muddatda folklor ijrochilari va jamoalariga yetkazadi.
10. Har bir ishtirokchi Festival oʻtkazilishidan 30 kun oldin Tashkiliy qoʻmitaga quyidagilarni taqdim etadi:
ishtirokchining maʼlumotnomasi;
ijro dasturi va matni;
audio va video disk.
11. Festivalda:
yakka ijrochilar, folklor sanʼati boʻyicha 12 nafardan, milliy xalq oʻyinlari va tomosha sanʼati yoʻnalishida 4 nafardan oshmagan tarkibda ijodiy jamoalar chiqishlari namoyish etiladi;
ijro asarlari chiroyli va mazmunli chiqishi uchun raqslardan ham foydalanish (bunda raqslar Hakamlar hayʼati tomonidan baholanmaydi) mumkin;
barcha ijro etiladigan asarlar yoddan ijro etiladi.
12. Festival quyidagi nominatsiyalar boʻyicha oʻtkaziladi:
folklor sanʼati (alla, oʻlan, lapar, raqs, terma, marosim qoʻshiqlari va hokazo);
milliy xalq oʻyinlari va tomosha sanʼati.
13. Festivalga xorijiy davlatlardan keladigan ishtirokchilar hujjatlari va materiallari tegishli davlatlardagi mutasaddi tashkilotlar va muassasalar tomonidan Oʻzbekiston Respublikasining xorijiy davlatlardagi elchixonalari orqali taqdim etiladi.
14. Nominatsiya boʻyicha har bir ishtirokchining chiqish dasturlari ijrosi 15 daqiqadan oshmasligi kerak.
15. Festivalda ishtirok etishda fonogrammadan foydalanishga yoʻl qoʻyilmaydi.
16. Festival doirasida ilmiy-ijodiy konferensiyalar, seminarlar, davra suhbatlari, sayillar, konsertlar, koʻrgazmalar va boshqa tadbirlar tashkil etiladi.
4-bob. Festival ishtirokchilarini baholash va hayʼat faoliyatini tashkil etish
17. Tashkiliy qoʻmita tomonidan 9 — 11 nafar aʼzodan iborat Hakamlar hayʼati tarkibi va Hayʼat reglamenti tasdiqlanadi.
Xalqaro hayʼat tarkibiga yuqori malakali mutaxassislar, taniqli sanʼat va madaniyat arboblari, olimlar, tadqiqotchilar, amaliyotchilar, shuningdek, ishtirokchi davlatlardan tegishli sohalar namoyandalari kiritiladi.
18. Festival ishtirokchilarining ijro mahorati Hakamlar hayʼatining har bir aʼzosi tomonidan alohida tarzda 10 ballik tizim boʻyicha baholanadi va gʻoliblar aniqlanadi.
19. Baholash jarayonida:
repertuarning badiiy qiymati (etnografik aniqlik va asar qayta ishlanishi yoki stilizatsiyasidagi afzalliklar), materialda hududiy oʻziga xosliklarning aks etishi;
mahorat saviyasi, xalq ijrochiligi usullarini egallaganlik darajasi;
ogʻzaki, musiqiy, ashulachilik va raqs milliy anʼanalari ijrosi uslublari va yoʻllarining mutanosibligi;
bezakning badiiy saviyasi (kiyimlar, rekvizit) va uning milliy anʼanalarga mosligi, anʼanaviy musiqa asboblaridan foydalanish;
dekorativ-amaliy ijod asarlari badiiy saviyasi asosiy mezon hisoblanadi.
20. Ishtirokchilarni baholashda Hakamlar hayʼati mustaqil hisoblanadi.
21. Tanlovning yakuniy natijalari Hakamlar hayʼatining qarori bilan rasmiylashtiriladi.
22. Xalqaro hayʼatning qarorlari qatʼiy va qayta koʻrib chiqilmaydi.
5-bob. Mukofotlash tartibi
23. Festival gʻoliblari quyidagi pul mukofotlari bilan taqdirlanadilar:
1-oʻrin (har bir nominatsiya boʻyicha) — 3 500 AQSh dollari;
2-oʻrin (har bir nominatsiya boʻyicha) — 2 500 AQSh dollari;
3-oʻrin (har bir nominatsiya boʻyicha) — 1 500 AQSh dollari.
24. Festivalning gʻoliblariga Tashkiliy qoʻmita tomonidan diplomlar, sovrinlar va Festival ramzlari tushirilgan esdalik sovgʻalari topshiriladi.
Xalqaro hayʼat qarori bilan eng yaxshi deb topilgan ishtirokchilar har bir nominatsiya boʻyicha bittadan Laureat diplomlari bilan taqdirlanadilar.
Bundan tashqari, har bir nominatsiyada bittadan 1, 2 va 3-darajali diplomlar, Festival ishtirokchisi diplomlari hamda har bir qatnashchiga maxsus diplom beriladi.
25. Festival tashkilotchilari, davlat va nodavlat tashkilotlar, ommaviy axborot vositalari, korxonalar, muassasalar, jamgʻarmalar, ijodiy uyushmalar va boshqa tashkilotlar ishtirokchilar uchun maxsus mukofotlar, sovrinlar, esdalik sovgʻalari va maxsus mukofotlar taʼsis etishlari mumkin.
6-bob. Festivalni tashkil etish va oʻtkazishni moliyalashtirish
26. Hakamlar hayʼati aʼzolarining Surxondaryo viloyatiga kelib-ketishi, mehmonxona va ovqatlanishi bilan bogʻliq xarajatlar Festival smetasi doirasida qoplanadi.
27. Festival ishtirokchilarining uni oʻtkazish belgilangan hududga kelib-ketishi, mehmonxona va ovqatlanishi bilan bogʻliq xarajatlar ularni Festivalda ishtirok etishga yuborgan tashkilot tomonidan oʻz mablagʻlari, jismoniy va yuridik shaxslarning homiylik xayriyalari, shuningdek, qonunchilik hujjatlarida taqiqlanmagan boshqa manbalar hisobidan qoplanadi.
28. Xorijiy mehmonlarning Oʻzbekiston hududidagi alohida mehmonxona va transport xarajatlari ularni taklif etgan mezbon tashkilot va muassasalar yoki mehmonlarning oʻzlari tomonidan qoplanadi.
29. Festivalni tashkil etish va oʻtkazish bilan bogʻliq sarf-xarajatlar Surxondaryo viloyati hokimligi va Madaniyat vazirligi tomonidan ishlab chiqilgan hamda Tashkiliy qoʻmita tomonidan tasdiqlangan smeta asosida quyidagi tartibda:
30 foizi — Oʻzbekiston Respublikasi respublika budjetidan Madaniyat vazirligiga madaniy tadbirlar uchun har yili ajratiladigan mablagʻlar hisobiga;
70 foizi — Surxondaryo viloyati mahalliy budjetining qoʻshimcha manbalari, shuningdek, jismoniy va yuridik shaxslarning homiylik xayriyalari hamda qonunchilik hujjatlarida taqiqlanmagan boshqa manbalar hisobiga qoplanadi.
7-bob. Yakunlovchi qoidalar
30. Oʻzbekiston Respublikasining Soliq kodeksiga muvofiq koʻriklarda, tanlovlarda sovrinli oʻrinlar uchun beriladigan sovrinlar, pul mukofotlariga soliq solinmaydi, shuningdek, yagona ijtimoiy toʻlov va sugʻurta badallari boʻyicha soliq solish obyekti hisoblanmaydi.
31. Davlat moliyaviy nazorati inspeksiyasi Festivalni tashkil etish va oʻtkazish uchun ajratilgan budjet mablagʻlarining maqsadli ishlatilishi va toʻgʻri toʻlanishini nazorat qiladi.
“Boysun bahori” xalqaro folklor festivalini tashkil etish va oʻtkazish tartibi toʻgʻrisidagi nizomga ILOVA
“Boysun bahori” xalqaro folklor festivalini tashkil etish va oʻtkazish
Bosqichlar Subyektlar Amalga oshiriladigan ishlar Bajarish muddati 1-bosqich Tashkilotchilar Festivalning ijro dasturi va unda ijro etiladigan asarlar roʻyxatini (keyingi oʻrinlarda — roʻyxat) tasdiqlaydi Festival boshlanishidan uch oy oldin 2-bosqich Tashkiliy qoʻmita Festival oʻtkaziladigan aniq muddatni ommaviy axborot vositalarida eʼlon qiladi Festival boshlanishidan oʻttiz kun oldin 3-bosqich Madaniyat vazirligi Roʻyxatni Qoraqalpogʻiston Respublikasi Madaniyat vazirligi, viloyatlar madaniyat boshqarmalari hamda Toshkent shahar madaniyat bosh boshqarmasiga yetkazadi Festivalning ijro dasturi va tanlovda ijro etiladigan asarlar roʻyxati tasdiqlangandan soʻng besh kun muddatda 4-bosqich Qoraqalpogʻiston Respublikasi Madaniyat vazirligi, viloyatlar madaniyat boshqarmalari hamda Toshkent shahar madaniyat bosh boshqarmasi Roʻyxatni folklor ijrochilari va jamoalariga yetkazadi Festivalning ijro dasturi va tanlovda ijro etiladigan asarlar roʻyxati olingandan keyin uch kun muddatda 5-bosqich Festival ishtirokchilari Festivalda qatnashish uchun zarur hujjatlarni Tashkiliy qoʻmitaga taqdim qiladi Festival boshlanishidan oʻttiz kun oldin 6-bosqich Tashkilotchilar, Tashkiliy qoʻmita Festivalni oʻtkazadi Festival oʻtkaziladigan yilning aprel oyida 7-bosqich Tashkilotchilar, Tashkiliy qoʻmita Festival gʻoliblarini taqdirlaydi Festival yakuni boʻyicha
Oʻzbekiston Respublikasining Bosh vaziri A. ARIPOV
Toshkent sh.,
2022-yil 7-fevral,
59-son