📅 2022-yil 24-mart · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2022 йил 24 март · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 24 марта 2022 г. · Постановления Кабинета Министров
Официальный текст. Официальный документ. Редакционные примечания не включены.
📅 24 March 2022 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
Энергетика вазирлиги ҳузурида «Миллий диспетчерлик маркази» давлат муассасасини ташкил этиш тўғрисида
Ўзбекистон Республикаси Президентининг «2022 — 2026 йилларга мўлжалланган Янги Ўзбекистоннинг тараққиёт стратегияси тўғрисида» 2022 йил 28 январдаги ПФ-60-сон Фармони ижросини таъминлаш ҳамда Ўзбекистон ягона энергетика тизимини ривожлантириш, электр энергиясини ишлаб чиқариш ва истеъмол қилиш баланси сақланишини ҳамда Марказий Осиё бирлашган энергетика тизимининг барқарор ишлашини таъминлаш мақсадида Вазирлар Маҳкамаси қарор қилади:
1. Энергетика вазирлиги, Молия вазирлиги, Иқтисодий тараққиёт ва камбағалликни қисқартириш вазирлиги, Давлат активларини бошқариш агентлиги ҳамда «McKinsey & Company» халқаро консалтинг компаниясининг:
Энергетика вазирлиги ҳузурида «Миллий диспетчерлик маркази» давлат муассасасини (кейинги ўринларда — Миллий диспетчерлик маркази) ташкил этиш;
Миллий диспетчерлик марказига «Ўзбекистон миллий электр тармоқлари» АЖ ҳамда «Ҳудудий электр тармоқлари» АЖнинг миллий, регионал ва ҳудудий диспетчерлик функцияларини ўтказиш тўғрисидаги таклифлари маъқуллансин.
2. Қуйидагилар Миллий диспетчерлик марказининг асосий вазифалари этиб белгилансин:
ягона электр энергетика тизимини реал вақт режимларида оператив бошқариш ва унинг ишончли ишлашини таъминлаш;
ягона электр энергетика тизими таркибига кирувчи корхоналарнинг диспетчерлик бошқарувини амалга ошириш;
электр энергиясига бўлган талаб ва таклифдан келиб чиқиб, шунингдек, электр энергиясини ишлаб чиқариш ва унинг истеъмол қилинишига таъсир қилувчи барча омилларни ҳисобга олган ҳолда, уни ишлаб чиқариш ва истеъмол қилишнинг ҳар соатлик режимини шакллантириш;
ягона электр энергетика тизимининг техник ва иқтисодий жиҳатдан энг мақбул режимларда ишлашини таъминлаш;
ягона электр энергетика тизимининг қўшни давлатлар энергетика тизимлари билан параллель равишда ишлаш режимларини бошқариш;
Миллий диспетчерлик маркази ходимларининг хорижда доимий равишда малака оширишини таъминлаш ҳамда малакали хорижий мутахассисларни Миллий диспетчерлик марказига жалб қилиш;
авария режимлари юзага келишининг олдини олиш, уларни бартараф этиш ва авария режими бартараф этилгандан кейин тизимнинг ишончлилигини тиклаш.
3. Энергетика вазирлиги ҳузурида «Миллий диспетчерлик маркази» давлат муассасаси бошқарув ходимларининг умумий чекланган сони 289 та штат бирлиги этиб белгилансин.
4. Белгилансинки:
Миллий диспетчерлик марказининг асосий бошқарув пульти Тошкент шаҳри, Яшнобод тумани, Истиқбол кўчаси 21-уй манзилдаги бинода ҳамда захира бошқарув пульти Тошкент шаҳри, Юнусобод тумани, Осиё кўчаси 42-уйда манзилдаги бинода жойлаштирилади;
Миллий диспетчерлик марказининг амалдаги бошқарув пульти собиқ «Ўзбекэнерго» АЖ биносидан «Ўзбекистон миллий электр тармоқлари» АЖ биносига уч ой муддатда кўчирилади;
Миллий диспетчерлик марказининг асосий бошқарув пульти тўлиқ ишга тушгандан сўнг асосий ҳамда захира бошқарув пультлари уч ой муддат параллель ишлайди;
Миллий диспетчерлик маркази фаолияти тўлиқ ташкил этилгандан сўнг «Ўзбекистон миллий электр тармоқлари» АЖ ҳамда «Ҳудудий электр тармоқлари» АЖда тегишлича реле ҳимоя ва автоматика қурилмаларини эксплуатация қилиш, энергия оқими режимларини ишлаб чиқиш, электр қурилмаларини таъмирга чиқаришни ташкил қилиш функциялари ситуацион-таҳлил бошқармалари кўринишида сақлаб қолинади;
«Ўзбекистон миллий электр тармоқлари» АЖ, «Ҳудудий электр тармоқлари» АЖ Давлат активларини бошқариш агентлиги билан биргаликда Миллий диспетчерлик марказининг ҳудудий филиаллари тўлиқ фаолият кўрсатиши учун зарур инвентарлар, алоқа воситалари ва бошқа барча ускуналар билан жиҳозланган хоналарга текин фойдаланиш ҳуқуқи асосида жойлаштирилади;
энергетика объектларининг барча диспетчерлик бўғинларида мавжуд электр қурилмаларнинг тезкор бошқарув бўйсунуви қайта кўриб чиқилгунга қадар жорий тезкор бошқарув бўйсунуви амалда сақланади;
Давлат — хусусий шериклик асосида фаолият юритаётган электр станциялари ва электр энергиясини сақлаш тизими операторлари ҳамда йирик истеъмолчиларга диспетчерлик хизматларини кўрсатгани учун шартномалар Миллий диспетчерлик маркази ва «Ўзэнергосотиш» АЖ ўртасида тузилади.
5. Қуйидагилар Миллий диспетчерлик маркази фаолиятини молиялаштириш манбалари этиб белгилансин:
«Иссиқлик электр станциялари» АЖ, «Ўзбекистон миллий электр тармоқлари» АЖ, «Ҳудудий электр тармоқлари» АЖ, «Ўзбекгидроэнерго» АЖ, «Ўзэнергосотиш» АЖ ҳамда электр энергиясини ишлаб чиқарувчи ва тақсимловчи бошқа ташкилотларга шартнома асосида диспетчерлик хизматини кўрсатишдан тушадиган маблағлар;
халқаро молия ташкилотлари ва хорижий ҳукумат молия ташкилотлари маблағлари;
ҳомийлик хайриялари ва қонунчилик ҳужжатлари билан тақиқланмаган бошқа манбалар.
5 1 . Шундай тартиб ўрнатилсинки, унга кўра Миллий диспетчерлик марказининг «Иссиқлик электр станциялари» АЖ, «Ўзбекистон миллий электр тармоқлари» АЖ, «Ҳудудий электр тармоқлари» АЖ ва «Ўзбекгидроэнерго» АЖга шартнома асосида диспетчерлик хизматини кўрсатишдан оладиган даромади (маблағлар) Вазирлар Маҳкамаси ҳузуридаги Идоралараро тариф комиссияси томонидан электр ва иссиқлик энергияси, шунингдек, табиий газ истеъмолчиларидан ва улгуржи қайта сотувчилардан тушадиган маблағларни тақсимлаш тартибида Миллий диспетчерлик маркази учун алоҳида пропорцияси кўзда тутилсин.
6. Молия вазирлиги Энергетика вазирлиги билан биргаликда бир ой муддатда Миллий диспетчерлик марказининг даромад ва харажатлари сметасини тасдиқласин.
7. Энергетика вазирлиги бир ой муддатда:
а) қуйидагиларни назарда тутувчи Миллий диспетчерлик маркази тўғрисидаги низомни ишлаб чиқсин ва Вазирлар Маҳкамасига киритсин:
Миллий диспетчерлик маркази фаолиятини ташкил этиш, унинг вазифалари, функциялари, ҳуқуқ ва мажбуриятлари;
«Иссиқлик электр станциялари» АЖ, «Ўзбекистон миллий электр тармоқлари» АЖ, «Ҳудудий электр тармоқлари» АЖ, «Ўзбекгидроэнерго» АЖ ва йирик истеъмолчилар ҳамда лойиҳалар асосида ягона энергетика тизимига уланаётган янги қувватлар Миллий диспетчерлик маркази томонидан фаолияти доирасида берилган топшириқларнинг сўзсиз бажарилиши мажбурийлиги;
бошқа давлатларнинг электр энергетика тизими билан параллель равишда ишлаш қоидаларининг аниқланиши;
электр энергетика тизими объектларидаги асосий электр қурилмаларини таъмирлаш ёки синов-созлаш учун чиқариш ва қайта ишга киритиш;
Миллий диспетчерлик маркази тўғридан-тўғри диспетчерлик департаменти, реле ҳимоя ва автоматика бўлими, республика ягона энергетика тизимини ва уларнинг қуйи бўлинмалари орқали тезкор-техник бошқарувни амалга ошириш;
б) Миллий диспетчерлик марказининг уставини, унинг молиявий-иқтисодий фаолият кўрсаткичларини инобатга олган ҳолда, Миллий диспетчерлик маркази ходимларининг меҳнатига ҳақ тўлаш ва уларни рағбатлантириш тартибини ишлаб чиқсин ва белгиланган тартибда тасдиқласин;
в) Энергетика вазирлигининг ташкилий тузилмасини ва марказий аппаратининг бошқарув ходимлари умумий чекланган сони ва тузилмасини ўзгартириш тўғрисида таклиф ишлаб чиқсин ва Вазирлар Маҳкамасига киритсин.
8. Энергетика вазирлиги, Иқтисодий тараққиёт ва камбағалликни қисқартириш вазирлиги, Молия вазирлигининг «Иссиқлик электр станциялари» АЖ ва «Ҳудудий электр тармоқлари» АЖ тизимидаги ташкилотларни ушбу жамиятларнинг ҳудудий филиаллари этиб қайта ташкил этиш таклифларига розилик берилсин.
9. Энергетика вазирлиги, «Ўзбекистон миллий электр тармоқлари» АЖ, «Ҳудудий электр тармоқлари» АЖ мазкур қарор талабларидан келиб чиқиб, «Ўзбекистон миллий электр тармоқлари» АЖ ва ҳудудий электр тармоқлари корхоналарининг ташкилий тузилмасини қайта кўриб чиқиб, Кузатув кенгашига тасдиқлаш учун киритилишини таъминласин.
10. Мазкур қарорнинг бажарилишини назорат қилиш Вазирлар Маҳкамасининг Геология, энергетика, саноат ва унинг базавий тармоқларини ривожлантириш масалалари департаменти ҳамда Ўзбекистон Республикаси энергетика вазири А.С. Султанов зиммасига юклансин.
Ўзбекистон Республикасининг Бош вазири А. АРИПОВ
Тошкент ш.,
2022 йил 24 март,
126-сон
Oʻzbekiston Respublikasi Vazirlar Mahkamasining
qarori
Energetika vazirligi huzurida “Milliy dispetcherlik markazi” davlat muassasasini tashkil etish toʻgʻrisida
Oʻzbekiston Respublikasi Prezidentining “2022 — 2026-yillarga moʻljallangan Yangi Oʻzbekistonning taraqqiyot strategiyasi toʻgʻrisida” 2022-yil 28-yanvardagi PF-60-son Farmoni ijrosini taʼminlash hamda Oʻzbekiston yagona energetika tizimini rivojlantirish, elektr energiyasini ishlab chiqarish va isteʼmol qilish balansi saqlanishini hamda Markaziy Osiyo birlashgan energetika tizimining barqaror ishlashini taʼminlash maqsadida Vazirlar Mahkamasi qaror qiladi:
1. Energetika vazirligi, Moliya vazirligi, Iqtisodiy taraqqiyot va kambagʻallikni qisqartirish vazirligi, Davlat aktivlarini boshqarish agentligi hamda “McKinsey & Company” xalqaro konsalting kompaniyasining:
Energetika vazirligi huzurida “Milliy dispetcherlik markazi” davlat muassasasini (keyingi oʻrinlarda — Milliy dispetcherlik markazi) tashkil etish;
Milliy dispetcherlik markaziga “Oʻzbekiston milliy elektr tarmoqlari” AJ hamda “Hududiy elektr tarmoqlari” AJning milliy, regional va hududiy dispetcherlik funksiyalarini oʻtkazish toʻgʻrisidagi takliflari maʼqullansin.
2. Quyidagilar Milliy dispetcherlik markazining asosiy vazifalari etib belgilansin:
yagona elektr energetika tizimini real vaqt rejimlarida operativ boshqarish va uning ishonchli ishlashini taʼminlash;
yagona elektr energetika tizimi tarkibiga kiruvchi korxonalarning dispetcherlik boshqaruvini amalga oshirish;
elektr energiyasiga boʻlgan talab va taklifdan kelib chiqib, shuningdek, elektr energiyasini ishlab chiqarish va uning isteʼmol qilinishiga taʼsir qiluvchi barcha omillarni hisobga olgan holda, uni ishlab chiqarish va isteʼmol qilishning har soatlik rejimini shakllantirish;
yagona elektr energetika tizimining texnik va iqtisodiy jihatdan eng maqbul rejimlarda ishlashini taʼminlash;
yagona elektr energetika tizimining qoʻshni davlatlar energetika tizimlari bilan parallel ravishda ishlash rejimlarini boshqarish;
Milliy dispetcherlik markazi xodimlarining xorijda doimiy ravishda malaka oshirishini taʼminlash hamda malakali xorijiy mutaxassislarni Milliy dispetcherlik markaziga jalb qilish;
avariya rejimlari yuzaga kelishining oldini olish, ularni bartaraf etish va avariya rejimi bartaraf etilgandan keyin tizimning ishonchliligini tiklash.
3. Energetika vazirligi huzurida “Milliy dispetcherlik markazi” davlat muassasasi boshqaruv xodimlarining umumiy cheklangan soni 289 ta shtat birligi etib belgilansin.
4. Belgilansinki:
Milliy dispetcherlik markazining asosiy boshqaruv pulti Toshkent shahri, Yashnobod tumani, Istiqbol koʻchasi 21-uy manzildagi binoda hamda zaxira boshqaruv pulti Toshkent shahri, Yunusobod tumani, Osiyo koʻchasi 42-uyda manzildagi binoda joylashtiriladi;
Milliy dispetcherlik markazining amaldagi boshqaruv pulti sobiq “Oʻzbekenergo” AJ binosidan “Oʻzbekiston milliy elektr tarmoqlari” AJ binosiga uch oy muddatda koʻchiriladi;
Milliy dispetcherlik markazining asosiy boshqaruv pulti toʻliq ishga tushgandan soʻng asosiy hamda zaxira boshqaruv pultlari uch oy muddat parallel ishlaydi;
Milliy dispetcherlik markazi faoliyati toʻliq tashkil etilgandan soʻng “Oʻzbekiston milliy elektr tarmoqlari” AJ hamda “Hududiy elektr tarmoqlari” AJda tegishlicha rele himoya va avtomatika qurilmalarini ekspluatatsiya qilish, energiya oqimi rejimlarini ishlab chiqish, elektr qurilmalarini taʼmirga chiqarishni tashkil qilish funksiyalari situatsion-tahlil boshqarmalari koʻrinishida saqlab qolinadi;
“Oʻzbekiston milliy elektr tarmoqlari” AJ, “Hududiy elektr tarmoqlari” AJ Davlat aktivlarini boshqarish agentligi bilan birgalikda Milliy dispetcherlik markazining hududiy filiallari toʻliq faoliyat koʻrsatishi uchun zarur inventarlar, aloqa vositalari va boshqa barcha uskunalar bilan jihozlangan xonalarga tekin foydalanish huquqi asosida joylashtiriladi;
energetika obyektlarining barcha dispetcherlik boʻgʻinlarida mavjud elektr qurilmalarning tezkor boshqaruv boʻysunuvi qayta koʻrib chiqilgunga qadar joriy tezkor boshqaruv boʻysunuvi amalda saqlanadi;
Davlat — xususiy sheriklik asosida faoliyat yuritayotgan elektr stansiyalari va elektr energiyasini saqlash tizimi operatorlari hamda yirik isteʼmolchilarga dispetcherlik xizmatlarini koʻrsatgani uchun shartnomalar Milliy dispetcherlik markazi va “Oʻzenergosotish” AJ oʻrtasida tuziladi.
5. Quyidagilar Milliy dispetcherlik markazi faoliyatini moliyalashtirish manbalari etib belgilansin:
“Issiqlik elektr stansiyalari” AJ, “Oʻzbekiston milliy elektr tarmoqlari” AJ, “Hududiy elektr tarmoqlari” AJ, “Oʻzbekgidroenergo” AJ, “Oʻzenergosotish” AJ hamda elektr energiyasini ishlab chiqaruvchi va taqsimlovchi boshqa tashkilotlarga shartnoma asosida dispetcherlik xizmatini koʻrsatishdan tushadigan mablagʻlar;
xalqaro moliya tashkilotlari va xorijiy hukumat moliya tashkilotlari mablagʻlari;
homiylik xayriyalari va qonunchilik hujjatlari bilan taqiqlanmagan boshqa manbalar.
5 1 . Shunday tartib oʻrnatilsinki, unga koʻra Milliy dispetcherlik markazining “Issiqlik elektr stansiyalari” AJ, “Oʻzbekiston milliy elektr tarmoqlari” AJ, “Hududiy elektr tarmoqlari” AJ va “Oʻzbekgidroenergo” AJga shartnoma asosida dispetcherlik xizmatini koʻrsatishdan oladigan daromadi (mablagʻlar) Vazirlar Mahkamasi huzuridagi Idoralararo tarif komissiyasi tomonidan elektr va issiqlik energiyasi, shuningdek, tabiiy gaz isteʼmolchilaridan va ulgurji qayta sotuvchilardan tushadigan mablagʻlarni taqsimlash tartibida Milliy dispetcherlik markazi uchun alohida proporsiyasi koʻzda tutilsin.
6. Moliya vazirligi Energetika vazirligi bilan birgalikda bir oy muddatda Milliy dispetcherlik markazining daromad va xarajatlari smetasini tasdiqlasin.
7. Energetika vazirligi bir oy muddatda:
a) quyidagilarni nazarda tutuvchi Milliy dispetcherlik markazi toʻgʻrisidagi nizomni ishlab chiqsin va Vazirlar Mahkamasiga kiritsin:
Milliy dispetcherlik markazi faoliyatini tashkil etish, uning vazifalari, funksiyalari, huquq va majburiyatlari;
“Issiqlik elektr stansiyalari” AJ, “Oʻzbekiston milliy elektr tarmoqlari” AJ, “Hududiy elektr tarmoqlari” AJ, “Oʻzbekgidroenergo” AJ va yirik isteʼmolchilar hamda loyihalar asosida yagona energetika tizimiga ulanayotgan yangi quvvatlar Milliy dispetcherlik markazi tomonidan faoliyati doirasida berilgan topshiriqlarning soʻzsiz bajarilishi majburiyligi;
boshqa davlatlarning elektr energetika tizimi bilan parallel ravishda ishlash qoidalarining aniqlanishi;
elektr energetika tizimi obyektlaridagi asosiy elektr qurilmalarini taʼmirlash yoki sinov-sozlash uchun chiqarish va qayta ishga kiritish;
Milliy dispetcherlik markazi toʻgʻridan-toʻgʻri dispetcherlik departamenti, rele himoya va avtomatika boʻlimi, respublika yagona energetika tizimini va ularning quyi boʻlinmalari orqali tezkor-texnik boshqaruvni amalga oshirish;
b) Milliy dispetcherlik markazining ustavini, uning moliyaviy-iqtisodiy faoliyat koʻrsatkichlarini inobatga olgan holda, Milliy dispetcherlik markazi xodimlarining mehnatiga haq toʻlash va ularni ragʻbatlantirish tartibini ishlab chiqsin va belgilangan tartibda tasdiqlasin;
v) Energetika vazirligining tashkiliy tuzilmasini va markaziy apparatining boshqaruv xodimlari umumiy cheklangan soni va tuzilmasini oʻzgartirish toʻgʻrisida taklif ishlab chiqsin va Vazirlar Mahkamasiga kiritsin.
8. Energetika vazirligi, Iqtisodiy taraqqiyot va kambagʻallikni qisqartirish vazirligi, Moliya vazirligining “Issiqlik elektr stansiyalari” AJ va “Hududiy elektr tarmoqlari” AJ tizimidagi tashkilotlarni ushbu jamiyatlarning hududiy filiallari etib qayta tashkil etish takliflariga rozilik berilsin.
9. Energetika vazirligi, “Oʻzbekiston milliy elektr tarmoqlari” AJ, “Hududiy elektr tarmoqlari” AJ mazkur qaror talablaridan kelib chiqib, “Oʻzbekiston milliy elektr tarmoqlari” AJ va hududiy elektr tarmoqlari korxonalarining tashkiliy tuzilmasini qayta koʻrib chiqib, Kuzatuv kengashiga tasdiqlash uchun kiritilishini taʼminlasin.
10. Mazkur qarorning bajarilishini nazorat qilish Vazirlar Mahkamasining Geologiya, energetika, sanoat va uning bazaviy tarmoqlarini rivojlantirish masalalari departamenti hamda Oʻzbekiston Respublikasi energetika vaziri A.S. Sultanov zimmasiga yuklansin.
Oʻzbekiston Respublikasining Bosh vaziri A. ARIPOV
Toshkent sh.,
2022-yil 24-mart,
126-son