📅 2022-yil 31-mart · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2022 йил 31 март · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 31 марта 2022 г. · Постановления Кабинета Министров
Официальный текст. Официальный документ. Редакционные примечания не включены.
📅 31 March 2022 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
Озиқ-овқат хавфсизлиги ва ички бозорда нархлар барқарорлигини таъминлаш бўйича қўшимча чора-тадбирлар тўғрисида
[Кўчирма]
Дунё бозорларида юзага келган кескин тебранишларнинг ички бозорни озиқ-овқат маҳсулотлари билан таъминлашга салбий таъсирини камайтириш, ички бозорни буғдой, ун ва ўсимлик ёғи маҳсулотлари билан узлуксиз ва кафолатли таъминлаш мақсадида Вазирлар Маҳкамаси қарор қилади:
1. Ўзбекистон Республикаси Қишлоқ хўжалиги вазирлиги, Иқтисодий тараққиёт ва камбағалликни қисқартириш вазирлиги ва Молия вазирлигининг Ўзбекистон Республикаси Вазирлар Маҳкамаси ҳузуридаги Давлат захираларини бошқариш қўмитаси (кейинги ўринларда — «Ўздавзахира» қўмитаси) «Ўздонмаҳсулот» АК ва хусусий корхоналар билан биргаликда 2022 йил апрель — июль ойларида Қозоғистон Республикасидан 100 минг тонна 3-синф буғдойини (бир қисми ун) мақбул нархларда импорт қилиш бўйича таклифига розилик берилсин.
2. Ўзбекистон Республикаси Бош вазирининг инвестициялар ва ташқи иқтисодий алоқалар масалалари бўйича ўринбосари — инвестициялар ва ташқи савдо вазири С.У. Умурзаков ҳамда Қишлоқ хўжалиги вазирлиги Қозоғистон Республикаси Ҳукумати, Қозоғистон Республикасининг «Продовольственная контрактная корпорация» миллий компанияси акциядорлик жамияти ва буғдой (ун) экспорт қилувчи бошқа корхоналари билан Ўзбекистон Республикасига 100 минг тонна буғдойни (бир қисми ун) мақбул нархларда импорт қилиш бўйича келишувга эришишни таъминласин.
Бунда, «Ўздавзахира» қўмитаси томонидан Қозоғистон Республикасининг «Продовольственная контрактная корпорация» миллий компанияси акциядорлик жамияти ва буғдойни экспорт қилувчи бошқа корхоналаридан 2022 йил апрель — июль ойларида 100 минг тонна 3-синф буғдойни (бир қисми ун) етказиб бериш бўйича импорт шартномалари имзоланади.
Ўзбекистон Республикаси Молия вазирлиги импорт қилинган буғдой (ун)ни сақлаш харажатларини қоплашга амалдаги меъёрлар доирасида маблағ ажратилишини таъминласин.
3. Ўзбекистон Республикаси Қишлоқ хўжалиги вазирлиги ҳамда Иқтисодий тараққиёт ва камбағалликни қисқартириш вазирлиги ички ва ташқи бозорлардаги вазиятдан келиб чиқиб, мазкур қарор доирасида ажратиладиган маблағлар ҳисобидан яна 500 минг тонна буғдойни импорт қилиш зарурати юзасидан асослантирилган таклиф киритсин.
4. Шундан тартиб ўрнатилсинки, унга мувофиқ мазкур қарор доирасида ажратиладиган маблағлар «Ўздавзахира» қўмитасига тўғридан-тўғри фоизсиз ссуда шаклида, буғдой (ун) ва ўсимлик ёғи импорт қилувчи хусусий тадбиркорлик субъектларига Вазирлар Маҳкамасининг «Аҳолини асосий турдаги озиқ-овқат маҳсулотлари билан кафолатли таъминлаш ва ички бозорда нархлар барқарорлигини сақлашга доир қўшимча чора-тадбирлар тўғрисида» 2021 йил 7 октябрдаги 627-сон қарорида белгиланган шартларда ажратилади.
5. «Ўздавзахира» қўмитаси:
«Ўздонмаҳсулот» АК, Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари билан биргаликда импорт қилинган буғдой (ун) ҳамда ўсимлик ёғини омборхоналарда сифатли сақланишини;
импорт қилинган буғдой (ун) ва ўсимлик ёғини сотишдан тушган маблағлар ўз вақтида Ўзбекистон Республикаси Давлат бюджетига қайтарилишини таъминласин.
6. Импорт қилинган буғдой (ун) ва ўсимлик ёғи ҳажмлари Вазирлар Маҳкамаси билан келишилган ҳолда Ўзбекистон Республикаси Иқтисодий тараққиёт ва камбағалликни қисқартириш вазирлигининг таклифлари асосида биржа савдолари орқали сотилиши белгилаб қўйилсин.
7. Ўзбекистон Республикаси Иқтисодий тараққиёт ва камбағалликни қисқартириш вазирлиги, Молия вазирлиги ҳамда Қишлоқ хўжалиги вазирлигининг Вазирлар Маҳкамасининг «Аҳолини асосий турдаги озиқ-овқат маҳсулотлари билан кафолатли таъминлаш ва ички бозорда нархлар барқарорлигини сақлашга доир қўшимча чора-тадбирлар тўғрисида» 2021 йил 7 октябрдаги 627-сон қарори доирасида ажратилган имтиёзли кредитларни қайтариш муддатини 2022 йил 31 декабрига қадар узайтириш бўйича таклифига розилик берилсин.
8. Ўзбекистон Республикаси Давлат солиқ қўмитаси «Ўздавзахира» қўмитасини 2022 йил 1 апрелдан бошлаб қўшилган қиймат солиғи тўловчиси сифатида рўйхатга олсин ва ўрнатилган тартибда қўшилган қиймат солиғи тўловчиси гувоҳномасини расмийлаштириб берсин.
9. Ўзбекистон Республикаси Транспорт вазирлиги ва «Ўзбекистон темир йўллари» АЖ:
2022 йил 1 апрелдан бошлаб йил якунига қадар «Ўздавзахира» қўмитаси томонидан импорт қилинадиган буғдой (ун) ва ўсимлик ёғини темир йўллар орқали ташишда 50 фоизли имтиёзли тарифлар қўлланилишини;
юкларни вагонлардан тушириб олиш муддати бўйича қўлланиладиган тарифлар (простой) миқдорини барча турдаги буғдой импортёрларига дастлабки уч кун учун 40 фоизга пасайтирсин.
10. Ўзбекистон Республикаси Давлат божхона қўмитаси, Ўсимликлар карантини ва ҳимояси агентлиги, Ўзбекистон техник жиҳатдан тартибга солиш агентлиги, Агросаноат мажмуи устидан назорат қилиш инспекцияси буғдой ва ўсимлик ёғи импорти бўйича тегишли рухсатномаларнинг қисқа муддатда расмийлаштирилишини таъминласин.
13. Мазкур қарорнинг бажарилишини назорат қилиш Ўзбекистон Республикаси Бош вазирининг молия-иқтисодиёт ва камбағалликни қисқартириш масалалари бўйича ўринбосари — иқтисодий тараққиёт ва камбағалликни қисқартириш вазири Ж.А. Қўчқоров ва инвестициялар ва ташқи иқтисодий алоқалар масалалари бўйича ўринбосари — инвестициялар ва ташқи савдо вазири С.У. Умурзаков зиммасига юклансин.
Ўзбекистон Республикасининг Бош вазири А. АРИПОВ
Тошкент ш.,
2022 йил 31 март,
147-сон
Oʻzbekiston Respublikasi Vazirlar Mahkamasining
qarori
Oziq-ovqat xavfsizligi va ichki bozorda narxlar barqarorligini taʼminlash boʻyicha qoʻshimcha chora-tadbirlar toʻgʻrisida
[Koʻchirma]
Dunyo bozorlarida yuzaga kelgan keskin tebranishlarning ichki bozorni oziq-ovqat mahsulotlari bilan taʼminlashga salbiy taʼsirini kamaytirish, ichki bozorni bugʻdoy, un va oʻsimlik yogʻi mahsulotlari bilan uzluksiz va kafolatli taʼminlash maqsadida Vazirlar Mahkamasi qaror qiladi:
1. Oʻzbekiston Respublikasi Qishloq xoʻjaligi vazirligi, Iqtisodiy taraqqiyot va kambagʻallikni qisqartirish vazirligi va Moliya vazirligining Oʻzbekiston Respublikasi Vazirlar Mahkamasi huzuridagi Davlat zaxiralarini boshqarish qoʻmitasi (keyingi oʻrinlarda — “Oʻzdavzaxira” qoʻmitasi) “Oʻzdonmahsulot” AK va xususiy korxonalar bilan birgalikda 2022-yil aprel — iyul oylarida Qozogʻiston Respublikasidan 100 ming tonna 3-sinf bugʻdoyini (bir qismi un) maqbul narxlarda import qilish boʻyicha taklifiga rozilik berilsin.
2. Oʻzbekiston Respublikasi Bosh vazirining investitsiyalar va tashqi iqtisodiy aloqalar masalalari boʻyicha oʻrinbosari — investitsiyalar va tashqi savdo vaziri S.U. Umurzakov hamda Qishloq xoʻjaligi vazirligi Qozogʻiston Respublikasi Hukumati, Qozogʻiston Respublikasining “Prodovolstvennaya kontraktnaya korporatsiya” milliy kompaniyasi aksiyadorlik jamiyati va bugʻdoy (un) eksport qiluvchi boshqa korxonalari bilan Oʻzbekiston Respublikasiga 100 ming tonna bugʻdoyni (bir qismi un) maqbul narxlarda import qilish boʻyicha kelishuvga erishishni taʼminlasin.
Bunda, “Oʻzdavzaxira” qoʻmitasi tomonidan Qozogʻiston Respublikasining “Prodovolstvennaya kontraktnaya korporatsiya” milliy kompaniyasi aksiyadorlik jamiyati va bugʻdoyni eksport qiluvchi boshqa korxonalaridan 2022-yil aprel — iyul oylarida 100 ming tonna 3-sinf bugʻdoyni (bir qismi un) yetkazib berish boʻyicha import shartnomalari imzolanadi.
Oʻzbekiston Respublikasi Moliya vazirligi import qilingan bugʻdoy (un)ni saqlash xarajatlarini qoplashga amaldagi meʼyorlar doirasida mablagʻ ajratilishini taʼminlasin.
3. Oʻzbekiston Respublikasi Qishloq xoʻjaligi vazirligi hamda Iqtisodiy taraqqiyot va kambagʻallikni qisqartirish vazirligi ichki va tashqi bozorlardagi vaziyatdan kelib chiqib, mazkur qaror doirasida ajratiladigan mablagʻlar hisobidan yana 500 ming tonna bugʻdoyni import qilish zarurati yuzasidan asoslantirilgan taklif kiritsin.
4. Shundan tartib oʻrnatilsinki, unga muvofiq mazkur qaror doirasida ajratiladigan mablagʻlar “Oʻzdavzaxira” qoʻmitasiga toʻgʻridan toʻgʻri foizsiz ssuda shaklida, bugʻdoy (un) va oʻsimlik yogʻi import qiluvchi xususiy tadbirkorlik subyektlariga Vazirlar Mahkamasining “Aholini asosiy turdagi oziq-ovqat mahsulotlari bilan kafolatli taʼminlash va ichki bozorda narxlar barqarorligini saqlashga doir qoʻshimcha chora-tadbirlar toʻgʻrisida” 2021-yil 7-oktabrdagi 627-son qarorida belgilangan shartlarda ajratiladi.
5. “Oʻzdavzaxira” qoʻmitasi:
“Oʻzdonmahsulot” AK, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari bilan birgalikda import qilingan bugʻdoy (un) hamda oʻsimlik yogʻini omborxonalarda sifatli saqlanishini;
import qilingan bugʻdoy (un) va oʻsimlik yogʻini sotishdan tushgan mablagʻlar oʻz vaqtida Oʻzbekiston Respublikasi Davlat budjetiga qaytarilishini taʼminlasin.
6. Import qilingan bugʻdoy (un) va oʻsimlik yogʻi hajmlari Vazirlar Mahkamasi bilan kelishilgan holda Oʻzbekiston Respublikasi Iqtisodiy taraqqiyot va kambagʻallikni qisqartirish vazirligining takliflari asosida birja savdolari orqali sotilishi belgilab qoʻyilsin.
7. Oʻzbekiston Respublikasi Iqtisodiy taraqqiyot va kambagʻallikni qisqartirish vazirligi, Moliya vazirligi hamda Qishloq xoʻjaligi vazirligining Vazirlar Mahkamasining “Aholini asosiy turdagi oziq-ovqat mahsulotlari bilan kafolatli taʼminlash va ichki bozorda narxlar barqarorligini saqlashga doir qoʻshimcha chora-tadbirlar toʻgʻrisida” 2021-yil 7-oktabrdagi 627-son qarori doirasida ajratilgan imtiyozli kreditlarni qaytarish muddatini 2022-yil 31-dekabriga qadar uzaytirish boʻyicha taklifiga rozilik berilsin.
8. Oʻzbekiston Respublikasi Davlat soliq qoʻmitasi “Oʻzdavzaxira” qoʻmitasini 2022-yil 1-apreldan boshlab qoʻshilgan qiymat soligʻi toʻlovchisi sifatida roʻyxatga olsin va oʻrnatilgan tartibda qoʻshilgan qiymat soligʻi toʻlovchisi guvohnomasini rasmiylashtirib bersin.
9. Oʻzbekiston Respublikasi Transport vazirligi va “Oʻzbekiston temir yoʻllari” AJ:
2022-yil 1-apreldan boshlab yil yakuniga qadar “Oʻzdavzaxira” qoʻmitasi tomonidan import qilinadigan bugʻdoy (un) va oʻsimlik yogʻini temir yoʻllar orqali tashishda 50 foizli imtiyozli tariflar qoʻllanilishini;
yuklarni vagonlardan tushirib olish muddati boʻyicha qoʻllaniladigan tariflar (prostoy) miqdorini barcha turdagi bugʻdoy importyorlariga dastlabki uch kun uchun 40 foizga pasaytirsin.
10. Oʻzbekiston Respublikasi Davlat bojxona qoʻmitasi, Oʻsimliklar karantini va himoyasi agentligi, Oʻzbekiston texnik jihatdan tartibga solish agentligi, Agrosanoat majmui ustidan nazorat qilish inspeksiyasi bugʻdoy va oʻsimlik yogʻi importi boʻyicha tegishli ruxsatnomalarning qisqa muddatda rasmiylashtirilishini taʼminlasin.
13. Mazkur qarorning bajarilishini nazorat qilish Oʻzbekiston Respublikasi Bosh vazirining moliya-iqtisodiyot va kambagʻallikni qisqartirish masalalari boʻyicha oʻrinbosari — iqtisodiy taraqqiyot va kambagʻallikni qisqartirish vaziri J.A. Qoʻchqorov va investitsiyalar va tashqi iqtisodiy aloqalar masalalari boʻyicha oʻrinbosari — investitsiyalar va tashqi savdo vaziri S.U. Umurzakov zimmasiga yuklansin.
Oʻzbekiston Respublikasining Bosh vaziri A. ARIPOV
Toshkent sh.,
2022-yil 31-mart,
147-son