📅 2022-yil 6-aprel · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2022 йил 6 апрель · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 6 апреля 2022 г. · Постановления Кабинета Министров
Официальный текст. Официальный документ. Редакционные примечания не включены.
📅 6 April 2022 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
Олимпия ва паралимпия ўйинларида ғолиб ҳамда совриндор бўлган спортчилар фаолиятини аҳоли орасида кенг тарғиб қилиш чора-тадбирлари тўғрисида
Олимпия ва паралимпия ўйинларида ғолиб ҳамда совриндор бўлган спортчиларнинг ҳаёти ва фаолиятини ёритиш орқали аҳолининг кенг қатламларини спорт билан шуғулланишга ва соғлом турмуш тарзини юритишга жалб этиш, шунингдек, Ўзбекистон Республикаси Президентининг «Спорт-таълим муассасалари фаолиятини 2025 йилгача ривожлантириш дастури тўғрисида» 2021 йил 5 ноябрдаги ПҚ-5280-сон қарори ижросини таъминлаш мақсадида Вазирлар Маҳкамаси қарор қилади:
1. Шундай тартиб ўрнатилсинки, унга мувофиқ:
а) 2021 йил Токио шаҳрида (Япония) бўлиб ўтган XXXII ёзги Олимпия ва XVI Паралимпия ўйинларидан бошлаб олимпия ва паралимпия ўйинларида ғолиб ҳамда совриндор бўлган спортчилар (кейинги ўринларда — совриндор спортчилар) ҳаёти ва фаолиятини кенг тарғиб этишга бағишланган «Юрт фахри» номли кўргазмалар (кейинги ўринларда — Кўргазма) ташкил этилади;
б) Кўргазма ҳар йили июль-август ойларида совриндор спортчилар истиқомат қилаётган маҳаллаларда ҳамда октябрь-ноябрь ойларида улар таҳсил олган таълим муассасалари, шу жумладан, спорт-таълим ва олий таълим муассасаларида ўтказилади;
в) Кўргазма давомида:
совриндор спортчиларнинг ҳаёти ва фаолияти тўғрисида ҳамда қўлга киритилган медаллар, шунингдек, олимпия ва паралимпия ўйинлари доирасида видео ва фотосуратлар экспозициялари ҳамда кўргазмали тадбирлар ташкил этилади;
совриндор спортчилар ва уларнинг тренерлари иштирокида «маҳорат сабоқлари» ўтказилади;
г) Спортни ривожлантириш вазирлиги Кўргазмани ташкил этиш ва ўтказиш бўйича мувофиқлаштирувчи орган ҳисобланади;
д) Спортни ривожлантириш вазирлиги Кўргазмани ташкил этиш ва ўтказиш доирасида:
Кўргазма дастурини ишлаб чиқади ва тасдиқлайди;
Кўргазманинг оммавий ахборот воситаларида, шу жумладан Интернет тармоғи орқали ёритиб борилиши, совриндор спортчилар ва уларнинг тренерларини Кўргазмага жалб этилишини таъминлайди;
Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари, Маҳалла ва нуронийларни қўллаб-қувватлаш вазирлиги, Ўзбекистон Миллий олимпия қўмитаси ҳамда Ўзбекистон Миллий паралимпия қўмитаси билан биргаликда Олимпия ва паралимпия шон-шуҳрати музейида, совриндор спортчилар истиқомат қилаётган маҳаллаларда ҳамда таҳсил олган таълим муассасаларида уларнинг ҳаёти ва фаолиятини тарғиб этишга бағишланган экспозициялар ва кўргазмали тадбирларни ташкил этади;
Халқ таълим вазирлиги, Олий ва ўрта махсус таълим вазирлиги, Ўзбекистон Миллий олимпия қўмитаси ҳамда Ўзбекистон Миллий паралимпия қўмитаси билан биргаликда таълим муассасаларида совриндор спортчилар иштирокида уларнинг ҳаёти ва фаолиятига бағишланган учрашувлар ва фотосуратлар кўргазмасини ташкил этади;
Ёшлар ишлари агентлиги билан биргаликда ёшлар ва волонтёрларни Кўргазмаларга кенг жалб қилиш чораларини кўради.
Белгилансинки, Кўргазмани ташкил этиш ва ўтказиш билан боғлиқ харажатлар Спортни қўллаб-қувватлаш жамғармаси маблағлари, маҳаллий бюджетларнинг қўшимча манбалари, жисмоний ва юридик шахсларнинг ҳомийлик хайриялари ҳамда қонунчилик ҳужжатларида тақиқланмаган бошқа манбалар ҳисобидан амалга оширилади.
Спортни ривожлантириш вазирлиги Ўзбекистон Миллий олимпия қўмитаси, Ўзбекистон Миллий паралимпия қўмитаси, манфаатдор вазирлик ва идоралар билан биргаликда бир ой муддатда мазкур қарор талабларидан келиб чиқиб, Кўргазмани юқори савияда ташкил қилиш ва ўтказиш тўғрисидаги низомни ишлаб чиқсин ва тасдиқласин.
2. Спортни ривожлантириш вазирлиги Ўзбекистон Миллий олимпия қўмитаси ҳамда Ўзбекистон Миллий паралимпия қўмитаси билан биргаликда:
Олимпия ва Паралимпия спорт турлари бўйича шуғулланган, спорт фаолияти давомида жароҳат олганлиги туфайли ўз фаолиятини тугатган, миллий терма жамоанинг асосий таркибида камида беш йил фаолият юритган спортчиларни тегишли спорт федерация (ассоциация)лари талабномасига асосан Ўзбекистон Миллий олимпия қўмитаси ҳузуридаги Республика спорт тиббиёти илмий-амалий марказида бир йилда икки маротаба чуқурлаштирилган бепул тиббий кўрикдан ўтказиш, зарурат бўлган тақдирда, тиббий муолажаларни амалга ошириш;
Олимпия ва Паралимпия спорт турлари бўйича ўз фаолиятини тугатган, миллий терма жамоанинг асосий таркибида камида беш йил фаолият юритган спортчиларни муносиб иш билан таъминлаш, жумладан, жойлардаги спорт-таълим муассасаларига тренерлик, йўриқчи-услубчилик, спорт федерацияларига (ассоциациялар)га ҳакамлик ва спорт менежери лавозимларига ишга қабул қилиш чораларини кўрсин.
Ўзбекистон Миллий паралимпия қўмитаси паралимпия ўйинларида ғолиб ва совриндор бўлган спортчиларнинг ҳаёти ва фаолияти, шунингдек, жисмоний имконияти чекланган ва ногиронлиги бўлган шахсларни спортга кенг жалб этиш жараёнини ёритиш мақсадида 2022 йил якунига қадар қўмитанинг тегишли биносида замонавий LED экранни жойлаштириш чораларини кўрсин.
3. Кинематография агентлиги Спортни ривожлантириш вазирлиги, Ўзбекистон Миллий олимпия қўмитаси ва Ўзбекистон Миллий паралимпия қўмитаси билан биргаликда 2022 йилда давлат буюртмаси асосида ишлаб чиқариладиган кино маҳсулотлари доирасида совриндор спортчиларнинг ҳаёти ва фаолияти ҳақида ҳужжатли фильм суратга олиниб, ва маҳаллий телеканаллар орқали намойиш этилишини таъминласин.
4. Ўзбекистон Миллий телерадиокомпанияси Спортни ривожлантириш вазирлиги, Ўзбекистон Миллий олимпия қўмитаси ва Ўзбекистон Миллий паралимпия қўмитаси билан биргаликда 2022 йил давомида марказий телеканалларда совриндор спортчилар ва уларнинг тренерлари иштирокида мулоқот ва учрашувлар ташкил қилиш бўйича тегишли чоралар қабул қилсин.
5. Спортни ривожлантириш вазирлиги қабул қилган норматив-ҳуқуқий ҳужжатларни бир ой муддатда ушбу қарорга мувофиқлаштирсин.
6. Мазкур қарорнинг бажарилишини назорат қилиш Ўзбекистон Республикаси спортни ривожлантириш вазири А.И. Икрамов зиммасига ҳамда Вазирлар Маҳкамасининг Таълим, соғлиқни сақлаш ва спорт масалалари котибиятига юклансин.
Ўзбекистон Республикасининг Бош вазири А. АРИПОВ
Тошкент ш.,
2022 йил 6 апрель,
162-сон
Oʻzbekiston Respublikasi Vazirlar Mahkamasining
qarori
Olimpiya va paralimpiya oʻyinlarida gʻolib hamda sovrindor boʻlgan sportchilar faoliyatini aholi orasida keng targʻib qilish chora-tadbirlari toʻgʻrisida
Olimpiya va paralimpiya oʻyinlarida gʻolib hamda sovrindor boʻlgan sportchilarning hayoti va faoliyatini yoritish orqali aholining keng qatlamlarini sport bilan shugʻullanishga va sogʻlom turmush tarzini yuritishga jalb etish, shuningdek, Oʻzbekiston Respublikasi Prezidentining “Sport-taʼlim muassasalari faoliyatini 2025-yilgacha rivojlantirish dasturi toʻgʻrisida” 2021-yil 5-noyabrdagi PQ-5280-son qarori ijrosini taʼminlash maqsadida Vazirlar Mahkamasi qaror qiladi:
1. Shunday tartib oʻrnatilsinki, unga muvofiq:
a) 2021-yil Tokio shahrida (Yaponiya) boʻlib oʻtgan XXXII yozgi Olimpiya va XVI Paralimpiya oʻyinlaridan boshlab olimpiya va paralimpiya oʻyinlarida gʻolib hamda sovrindor boʻlgan sportchilar (keyingi oʻrinlarda — sovrindor sportchilar) hayoti va faoliyatini keng targʻib etishga bagʻishlangan “Yurt faxri” nomli koʻrgazmalar (keyingi oʻrinlarda — Koʻrgazma) tashkil etiladi;
b) Koʻrgazma har yili iyul-avgust oylarida sovrindor sportchilar istiqomat qilayotgan mahallalarda hamda oktabr-noyabr oylarida ular tahsil olgan taʼlim muassasalari, shu jumladan, sport-taʼlim va oliy taʼlim muassasalarida oʻtkaziladi;
v) Koʻrgazma davomida:
sovrindor sportchilarning hayoti va faoliyati toʻgʻrisida hamda qoʻlga kiritilgan medallar, shuningdek, olimpiya va paralimpiya oʻyinlari doirasida video va fotosuratlar ekspozitsiyalari hamda koʻrgazmali tadbirlar tashkil etiladi;
sovrindor sportchilar va ularning trenerlari ishtirokida “mahorat saboqlari” oʻtkaziladi;
g) Sportni rivojlantirish vazirligi Koʻrgazmani tashkil etish va oʻtkazish boʻyicha muvofiqlashtiruvchi organ hisoblanadi;
d) Sportni rivojlantirish vazirligi Koʻrgazmani tashkil etish va oʻtkazish doirasida:
Koʻrgazma dasturini ishlab chiqadi va tasdiqlaydi;
Koʻrgazmaning ommaviy axborot vositalarida, shu jumladan Internet tarmogʻi orqali yoritib borilishi, sovrindor sportchilar va ularning trenerlarini Koʻrgazmaga jalb etilishini taʼminlaydi;
Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari, Mahalla va nuroniylarni qoʻllab-quvvatlash vazirligi, Oʻzbekiston Milliy olimpiya qoʻmitasi hamda Oʻzbekiston Milliy paralimpiya qoʻmitasi bilan birgalikda Olimpiya va paralimpiya shon-shuhrati muzeyida, sovrindor sportchilar istiqomat qilayotgan mahallalarda hamda tahsil olgan taʼlim muassasalarida ularning hayoti va faoliyatini targʻib etishga bagʻishlangan ekspozitsiyalar va koʻrgazmali tadbirlarni tashkil etadi;
Xalq taʼlim vazirligi, Oliy va oʻrta maxsus taʼlim vazirligi, Oʻzbekiston Milliy olimpiya qoʻmitasi hamda Oʻzbekiston Milliy paralimpiya qoʻmitasi bilan birgalikda taʼlim muassasalarida sovrindor sportchilar ishtirokida ularning hayoti va faoliyatiga bagʻishlangan uchrashuvlar va fotosuratlar koʻrgazmasini tashkil etadi;
Yoshlar ishlari agentligi bilan birgalikda yoshlar va volontyorlarni Koʻrgazmalarga keng jalb qilish choralarini koʻradi.
Belgilansinki, Koʻrgazmani tashkil etish va oʻtkazish bilan bogʻliq xarajatlar Sportni qoʻllab-quvvatlash jamgʻarmasi mablagʻlari, mahalliy budjetlarning qoʻshimcha manbalari, jismoniy va yuridik shaxslarning homiylik xayriyalari hamda qonunchilik hujjatlarida taqiqlanmagan boshqa manbalar hisobidan amalga oshiriladi.
Sportni rivojlantirish vazirligi Oʻzbekiston Milliy olimpiya qoʻmitasi, Oʻzbekiston Milliy paralimpiya qoʻmitasi, manfaatdor vazirlik va idoralar bilan birgalikda bir oy muddatda mazkur qaror talablaridan kelib chiqib, Koʻrgazmani yuqori saviyada tashkil qilish va oʻtkazish toʻgʻrisidagi nizomni ishlab chiqsin va tasdiqlasin.
2. Sportni rivojlantirish vazirligi Oʻzbekiston Milliy olimpiya qoʻmitasi hamda Oʻzbekiston Milliy paralimpiya qoʻmitasi bilan birgalikda:
Olimpiya va Paralimpiya sport turlari boʻyicha shugʻullangan, sport faoliyati davomida jarohat olganligi tufayli oʻz faoliyatini tugatgan, milliy terma jamoaning asosiy tarkibida kamida besh yil faoliyat yuritgan sportchilarni tegishli sport federatsiya (assotsiatsiya)lari talabnomasiga asosan Oʻzbekiston Milliy olimpiya qoʻmitasi huzuridagi Respublika sport tibbiyoti ilmiy-amaliy markazida bir yilda ikki marotaba chuqurlashtirilgan bepul tibbiy koʻrikdan oʻtkazish, zarurat boʻlgan taqdirda, tibbiy muolajalarni amalga oshirish;
Olimpiya va Paralimpiya sport turlari boʻyicha oʻz faoliyatini tugatgan, milliy terma jamoaning asosiy tarkibida kamida besh yil faoliyat yuritgan sportchilarni munosib ish bilan taʼminlash, jumladan, joylardagi sport-taʼlim muassasalariga trenerlik, yoʻriqchi-uslubchilik, sport federatsiyalariga (assotsiatsiyalar)ga hakamlik va sport menejeri lavozimlariga ishga qabul qilish choralarini koʻrsin.
Oʻzbekiston Milliy paralimpiya qoʻmitasi paralimpiya oʻyinlarida gʻolib va sovrindor boʻlgan sportchilarning hayoti va faoliyati, shuningdek, jismoniy imkoniyati cheklangan va nogironligi boʻlgan shaxslarni sportga keng jalb etish jarayonini yoritish maqsadida 2022-yil yakuniga qadar qoʻmitaning tegishli binosida zamonaviy LED ekranni joylashtirish choralarini koʻrsin.
3. Kinematografiya agentligi Sportni rivojlantirish vazirligi, Oʻzbekiston Milliy olimpiya qoʻmitasi va Oʻzbekiston Milliy paralimpiya qoʻmitasi bilan birgalikda 2022-yilda davlat buyurtmasi asosida ishlab chiqariladigan kino mahsulotlari doirasida sovrindor sportchilarning hayoti va faoliyati haqida hujjatli film suratga olinib, va mahalliy telekanallar orqali namoyish etilishini taʼminlasin.
4. Oʻzbekiston Milliy teleradiokompaniyasi Sportni rivojlantirish vazirligi, Oʻzbekiston Milliy olimpiya qoʻmitasi va Oʻzbekiston Milliy paralimpiya qoʻmitasi bilan birgalikda 2022-yil davomida markaziy telekanallarda sovrindor sportchilar va ularning trenerlari ishtirokida muloqot va uchrashuvlar tashkil qilish boʻyicha tegishli choralar qabul qilsin.
5. Sportni rivojlantirish vazirligi qabul qilgan normativ-huquqiy hujjatlarni bir oy muddatda ushbu qarorga muvofiqlashtirsin.
6. Mazkur qarorning bajarilishini nazorat qilish Oʻzbekiston Respublikasi sportni rivojlantirish vaziri A.I. Ikramov zimmasiga hamda Vazirlar Mahkamasining Taʼlim, sogʻliqni saqlash va sport masalalari kotibiyatiga yuklansin.
Oʻzbekiston Respublikasining Bosh vaziri A. ARIPOV
Toshkent sh.,
2022-yil 6-aprel,
162-son