UzbekAI

Ўзбекистон Республикаси Вазирлар Маҳкамасининг

қарори

НИЗОМ

СХЕМАСИ

СХЕМАСИ

НИЗОМ

СХЕМАСИ

РЎЙХАТИ

Давлат ер ва кадастр назоратини амалга ошириш тартиби ҳамда Давлат геодезия назоратини амалга ошириш тартиби тўғрисидаги низомларни тасдиқлаш ҳақида

Ўзбекистон Республикаси Ер кодексининг 83 1 ва 84-моддалари , «Геодезия ва картография фаолияти тўғрисида»ги Ўзбекистон Республикаси Қонунининг 12-моддаси , Ўзбекистон Республикаси Президентининг « Ўзбекистон Республикаси Давлат солиқ қўмитаси ҳузуридаги Кадастр агентлиги фаолиятини ташкил этиш чора-тадбирлари тўғрисида » 2020 йил 7 сентябрдаги ПҚ-4819-сон, « Қишлоқ хўжалигига мўлжалланган ерлардан фойдаланиш ва муҳофаза қилиш тизимини такомиллаштиришга доир қўшимча чора-тадбирлар тўғрисида » 2021 йил 24 февралдаги ПҚ-5006-сон ва « Ер участкаларидан фойдаланишда давлат назорати самарадорлигини ошириш чора-тадбирлари тўғрисида » 2022 йил 21 февралдаги ПҚ-138-сон қарорлари ижросини таъминлаш мақсадида Вазирлар Маҳкамаси қарор қилади:

1. Қуйидагиларни назарда тутувчи:

а) Давлат ер ва кадастр назоратини амалга ошириш тартиби тўғрисидаги низом 1-иловага мувофиқ:

давлат ер назоратини маҳаллий давлат ҳокимияти органлари ва махсус ваколатли давлат органлари (Иқтисодиёт ва молия вазирлиги ҳузуридаги Кадастр агентлиги, Вазирлар Маҳкамаси ҳузуридаги Агросаноат мажмуи устидан назорат қилиш инспекцияси, Экология, атроф-муҳитни муҳофаза қилиш ва иқлим ўзгариши вазирлиги) томонидан амалга ошириш тартиби;

давлат кадастр назоратини Иқтисодиёт ва молия вазирлиги ҳузуридаги Кадастр агентлиги томонидан амалга ошириш тартиби;

давлат ер ва кадастр назоратини амалга оширувчи махсус ваколатли давлат органларининг вазифа ва функциялари, ушбу органлар мансабдор шахслари таркиби, назорат тадбирлари иштирокчилари, уларнинг ҳуқуқлари ва мажбуриятлари, давлат ер ва кадастр назоратини ташкил этиш ва ўтказиш тартиби;

ерга оид ҳуқуқбузарликларни аниқлашда жамоатчилик назоратини амалга ошириш ва жамоатчилик назорати субъектларини базавий ҳисоблаш миқдорининг бир баравари (жарима миқдоридан ошмаган) миқдоридаги пул мукофоти билан рағбатлантириш тартиби;

давлат ер ва кадастр назорати натижасида ҳуқуқбузарликлар аниқланган тақдирда, айбдор шахсларнинг жавобгарлиги масаласи;

б) Давлат геодезия назоратини амалга ошириш тартиби тўғрисидаги низом 2-иловага мувофиқ тасдиқлансин:

давлат геодезия назоратини Иқтисодиёт ва молия вазирлиги ҳузуридаги Кадастр агентлиги (махсус ваколатли давлат органи) томонидан амалга ошириш тартиби;

геодезия ва картография фаолияти субъектлари томонидан геодезия ва картография фаолиятига оид қонунчилик ҳужжатлари талабларига риоя этилишини назорат қилиш, шунингдек, геодезия ва картографияга оид ишларни, геодезия пунктларини рўйхатдан ўтказиш ҳамда ҳисобга олишни ташкил этиш, давлат картография-геодезия фондининг фаолият юритишини таъминлашни давлат геодезия назоратининг асосий вазифалари этиб белгилаш;

давлат геодезия назоратини амалга оширувчи махсус ваколатли давлат органининг вазифа ва функциялари, ушбу орган мансабдор шахслари таркиби, назорат тадбирлари иштирокчилари, уларнинг ҳуқуқлари ва мажбуриятлари, давлат геодезия назоратини ташкил этиш ва ўтказиш тартиби;

давлат геодезия назорати натижасида ҳуқуқбузарликлар аниқланган тақдирда, айбдор шахсларнинг жавобгарлиги масаласи.

1 1 . Ўзбекистон Республикаси Президентининг «Ерга оид муносабатларда коррупциявий омилларни бартараф этиш механизмларини янада такомиллаштириш бўйича қўшимча чора-тадбирлар тўғрисида» 2025 йил 18 сентябрдаги ПҚ-287-сон қарори билан қуйидагилар:

давлат ер назорати Вазирлар Маҳкамаси ҳузуридаги Агросаноат мажмуи устидан назорат қилиш инспекцияси, Урбанизация ва уй-жой бозорини барқарор ривожлантириш миллий қўмитаси ҳузуридаги Кадастр агентлиги, Экология ва иқлим ўзгариши миллий қўмитаси, Қурилиш ва уй-жой коммунал хўжалиги вазирлиги, Қурилиш ва уй-жой коммунал хўжалиги соҳасида назорат қилиш инспекцияси (кейинги ўринларда — махсус ваколатли давлат органлари) томонидан амалга оширилиши;

ер участкаларидан мақсадсиз ва самарасиз фойдаланиш, ерларни ўзбошимчалик билан эгаллаш, ўзбошимчалик билан бино ва иншоотларни қуриш билан боғлиқ ҳуқуқбузарлик даражасига қараб, уларни «қизил», «сариқ» ва «яшил» тоифалардаги ҳудудларга бўлиш белгилангани маълумот учун қабул қилинсин.

1 2 . Белгилансинки, махсус ваколатли давлат органлари томонидан:

ўтказиладиган мониторинг кузатувларида ер участкаларидан мақсадсиз ва самарасиз фойдаланиш, ерларни ўзбошимчалик билан эгаллаш ҳамда ўзбошимчалик билан бино ва иншоотларни қуриш бўйича аниқланган ҳолатлар белгиланган тартибда «E-YER NAZORAT» автоматлаштирилган ахборот тизимига киритилади ҳамда дастлабки маълумотлар тегишлилиги бўйича махсус ваколатли давлат органларига юборилади. Бунда мониторинг кузатувлари «қизил» тоифадаги ҳудудларда ҳар чоракда, «сариқ» тоифадаги ҳудудларда ҳар олти ойда ҳамда «яшил» тоифадаги ҳудудларда бир йилда бир маротаба ўтказилади;

аниқланган қонунбузилишларни бартараф этиш орқали ер участкаларидан мақсадсиз ва самарасиз фойдаланиш, ерларни ўзбошимчалик билан эгаллаш ҳамда ўзбошимчалик билан бино ва иншоотларни қуриш ҳолатлари даражаси ҳар чоракда 15 фоиздан кам бўлмаган миқдорда тушириб борилади.

2. Ўзбекистон Республикаси Ҳукуматининг 3-иловага мувофиқ айрим қарорлари ўз кучини йўқотган деб ҳисоблансин.

3. Ўзбекистон Республикаси Давлат солиқ қўмитаси бошқа манфаатдор вазирликлар ва идоралар билан биргаликда ўзлари қабул қилган норматив-ҳуқуқий ҳужжатларни бир ой муддатда ушбу қарорга мувофиқлаштирсин.

4. Мазкур қарорнинг бажарилишини назорат қилиш Ўзбекистон Республикаси Бош вазирининг молия-иқтисодиёт ва камбағалликни қисқартириш масалалари бўйича ўринбосари — иқтисодий тараққиёт ва камбағалликни қисқартириш вазири Ж.А. Қўчқоров ҳамда Ўзбекистон Республикаси Давлат солиқ қўмитаси раиси Ш.Д. Кудбиев зиммасига юклансин.

Вазирлар Маҳкамасининг 2022 йил 14 апрелдаги 183-сон қарорига 1-ИЛОВА

Давлат ер ва кадастр назоратини амалга ошириш тартиби тўғрисида

1-боб. Умумий қоидалар

1. Мазкур Низом давлат ер ва кадастр назоратини амалга ошириш тартибини белгилайди.

2. Ушбу Низомда қуйидаги асосий тушунчалар қўлланилади:

давлат ер назорати — юридик ва жисмоний шахслар, республика ижро этувчи ҳокимият органлари, маҳаллий давлат ҳокимияти органлари томонидан ер тўғрисидаги қонунчилик талабларига риоя этилишини назорат қилиш мақсадида ваколатли органлар томонидан амалга ошириладиган ҳаракатлар мажмуи;

давлат кадастр назорати — юридик ва жисмоний шахслар, республика ижро этувчи ҳокимият органлари, маҳаллий давлат ҳокимияти органлари томонидан давлат кадастрлари тўғрисидаги қонунчилик талабларига риоя этилишини назорат қилиш мақсадида ваколатли органлар томонидан амалга ошириладиган ҳаракатлар мажмуи;

ер участкаси — ер фондининг қайд этилган чегарага, майдонга, жойлашиш манзилига, ҳуқуқий режимга ҳамда давлат ер кадастрида акс эттириладиган бошқа хусусиятларига эга бўлган қисми;

электрон график имзо (кейинги ўринларда — ЭГИ) — электрон ҳужжатни замонавий ахборот-коммуникация технологияларидан фойдаланган ҳолда планшет ёки компьютерга ўрнатилган техник қурилмалар ёрдамида тасдиқлайдиган электрон ҳужжатдаги шахс томонидан қўлда (ёзма равишда) амалга ошириладиган графикли имзо;

электрон рақамли имзо (кейинги ўринларда — ЭРИ) — электрон ҳужжатдаги мазкур электрон ҳужжат ахборотини электрон рақамли имзонинг ёпиқ калитидан фойдаланган ҳолда махсус ўзгаришлар натижасида ҳосил қилинган ҳамда электрон рақамли имзонинг очиқ калити ёрдамида электрон ҳужжатдаги ахборотда хатолик мавжуд эмаслигини аниқлаш ва электрон рақамли имзо калитининг эгасини идентификация қилиш имконини берадиган имзо;

ўзбошимчалик билан эгаллаб олинган ер участкаси — фуқаролар, якка тартибдаги тадбиркорлар ва резидент бўлган юридик шахслар томонидан ер участкасига бўлган ҳуқуқларни белгиловчи ҳужжатларсиз, шу жумладан, бундай ҳужжатлар йўқолган ёки тўлиқ расмийлаштирилмаган ҳолда эгаллаб келинаётган ёки ортиқча эгалланган ер участкаси;

ўзбошимчалик билан қурилган иморат — қонунчиликда белгиланган тартибда қурилиш мақсадлари учун ажратилмаган ер участкаларида қурилган уй-жой, бошқа бино ва иншоот;

«Е-YERNAZORAT» автоматлаштирилган ахборот тизими (кейинги ўринларда — «Е-YERNAZORAT» ААТ) — ерга оид ҳуқуқбузарликларни аниқлаш, ҳужжатлар тўпламини шакллантириш ва уларни ўз вақтида ва объектив кўриб чиқиш мақсадида электрон ҳужжатлар алмашинуви, шунингдек ҳуқуқбузарлик оқибатларини бартараф этишгача бўлган ҳолатларни кузатиб бориш имконига эга бўлган интеграциялаштирилган ахборот тизими.

3. Давлат ер ва кадастр назорати Ўзбекистон Республикасининг бутун ҳудудида амалга оширилади.

4. Юридик ва жисмоний шахслар, республика ижро этувчи ҳокимият органлари, маҳаллий давлат ҳокимияти органлари томонидан ер тўғрисидаги қонунчилик талабларига риоя этилишини таъминлаш давлат ер назоратининг асосий вазифаси ҳисобланади.

5. Давлат кадастрларини юритишга масъул бўлган вазирликлар, давлат қўмиталари, идоралар, маҳаллий давлат ҳокимияти органлари, шунингдек, юридик ва жисмоний шахслар томонидан давлат кадастрлари тўғрисидаги қонунчилик талабларига риоя этилишини назорат қилиш давлат кадастр назоратининг асосий вазифаси ҳисобланади.

6. Давлат ер ва кадастр назоратини амалга оширадиган давлат органлари қонунбузилишининг олдини олиш мақсадида ер ва кадастр тўғрисидаги қонунчилик талаблари юзасидан тушунтириш тадбирларини амалга оширади.

2-боб. Давлат ер ва кадастр назоратини амалга оширувчи ваколатли органлар

7. Давлат ер назорати маҳаллий давлат ҳокимияти органлари, шунингдек, махсус ваколатли давлат органлари томонидан ушбу Низомга 1-иловада келтирилган схемага мувофиқ амалга оширилади.

Маҳаллий давлат ҳокимияти органлари томонидан давлат ер назорати қуйидаги шаклларда амалга оширилади:

юқори турувчи маҳаллий давлат ҳокимияти органлари томонидан қуйи турувчи маҳаллий давлат ҳокимияти органлари фаолиятида ер тўғрисидаги қонунчилик талабларига риоя этилишини назорат қилиш;

халқ депутатлари Кенгашлари томонидан маҳаллий ижро ҳокимияти органлари ва уларга бўйсунувчи давлат органлари фаолиятида ер тўғрисидаги қонунчилик талабларига риоя этилишини назорат қилиш.

8. Қуйидагилар давлат ер назорати бўйича махсус ваколатли давлат органлари ҳисобланади:

Вазирлар Маҳкамаси ҳузуридаги Агросаноат мажмуи устидан назорат қилиш инспекцияси (кейинги ўринларда — «Ўзагроинспекция») ва унинг ҳудудий органлари — қишлоқ хўжалигига мўлжалланган ерлар тоифаси бўйича;

Экология ва иқлим ўзгариши миллий қўмитаси (кейинги ўринларда — Экология қўмитаси) ва унинг ҳудудий органлари — муҳофаза этиладиган табиий ҳудудлар эгаллаган ерлар, устувор равишда экологик, илмий, маданий, эстетик, рекреация ва санитария-соғломлаштириш мақсадларида фойдаланиладиган ерлар, ўрмонлар, «Яшил макон» умуммиллий лойиҳаси доирасида ташкил этилган зоналар, табиий сув ҳавзалари, хавфли чиқиндилар кўмилган ҳамда сақланаётган махсус омбор ва чиқинди полигонларига мўлжалланган ерлар бўйича;

Қурилиш ва уй-жой коммунал хўжалиги вазирлиги ва унинг ҳудудий органлари — биноларни, иншоотларни ёки бошқа объектларни қуриш, реконструкция қилиш ва капитал таъмирлашга тақиқлар (чекловлар) белгиланган зоналарда ушбу ишларни бажариш ёки аҳоли пунктларининг тасдиқланган бош режаларига, уларни режалаштириш ва қуриш лойиҳаларига зид равишда (бош режаларда назарда тутилмаган) бинолар ва иншоотларни лойиҳалаштириш, реконструкция қилиш ва қуриш ҳолатлари бўйича;

Вазирлар Маҳкамаси ҳузуридаги Қурилиш ва уй-жой коммунал хўжалиги соҳасида назорат қилиш инспекцияси (кейинги ўринларда — Қурилиш ва коммунал хўжалиги инспекцияси) ва унинг ҳудудий органлари — кўп квартирали уйлардаги жойларнинг мулкдорларига доимий фойдаланиш ҳуқуқи асосида ажратилган кўп квартирали уйга туташ ер участкалари, Қурилиш ва коммунал хўжалиги инспекцияси рухсатномаси талаб этиладиган қурилиш объектлари бўйича;

Урбанизация ва уй-жой бозорини барқарор ривожлантириш миллий қўмитаси ҳузуридаги Кадастр агентлиги (кейинги ўринларда — Кадастр агентлиги) ва унинг ҳудудий органлари — қолган барча тоифалар бўйича.

9. Кадастр агентлиги давлат кадастр назорати бўйича махсус ваколатли давлат органи ҳисобланади.

3-боб. Давлат ер ва кадастр назоратини амалга оширувчи махсус ваколатли давлат органларининг асосий вазифалари ва функциялари

10. Қуйидагилар Кадастр агентлиги органларининг давлат ер ва кадастр назоратини амалга оширишдаги асосий вазифалари ҳисобланади:

ер тоифасидан қатъи назар, барча турдаги ер участкалари ҳамда бино ва иншоотларга бўлган ҳуқуқларни давлат рўйхатидан ўтказмаслик ҳолатларини аниқлаш;

ер участкаларининг ўзбошимчалик билан эгаллаб олиниши ва ушбу ер участкаларида ўзбошимчалик билан иморат қурилишини аниқлаш;

ер участкаси чегараларини ўзбошимчалик билан ўзгартиришга йўл қўймаслик чораларини кўриш;

ер участкаларидан мақсадсиз фойдаланиш ҳолатларини ўз вақтида аниқлаш ва чора кўриш;

давлат кадастрларини юритиш тартибларига риоя қилинишини таъминлашга қаратилган давлат кадастр назоратини амалга ошириш.

11. Кадастр агентлиги органлари давлат ер ва кадастр назоратини амалга оширишда ўзларига юкланган асосий вазифаларга мувофиқ қуйидаги функцияларни бажаради:

ерлардан мақсадли фойдаланиш бўйича давлат назоратини амалга оширади;

ер участкаларига бўлган ҳуқуқларни давлат рўйхатидан ўтказилишини таъминлашга қаратилган ер назоратини амалга оширади;

ер участкаларини ўзбошимчалик билан эгаллаб олинишига йўл қўймасликка қаратилган самарали ер назоратини амалга оширади;

ер участкаси чегараларини (чегара нуқталарини) ўзбошимчалик билан ўзгартиришга йўл қўймаслик чораларини кўради;

аэрокосмик суратлар ва учувчисиз учиш аппаратларидан фойдаланган ҳолда ерларни масофадан туриб зондлашни, шунингдек, геодезик ўлчов ускуналари ёрдамида ерларни ўрганишни ташкил этади ва амалга оширади;

кўчмас мулкка бўлган ҳуқуқлар давлат рўйхатидан ўтказилишини таъминлашга қаратилган самарали кадастр назоратини ташкил этади ва амалга оширади;

кадастр йиғмажилди (паспорти) белгиланган тартибда шакллантирилиши ва расмийлаштирилишини назорат қилади;

давлат кадастрларини юритиш тартибларига риоя қилинишини назорат қилади.

Кадастр агентлиги органлари ўз ваколатлари доирасида қонунчилик ҳужжатларига мувофиқ бошқа вазифа ва функцияларни ҳам амалга оширишлари мумкин.

12. «Ўзагроинспекция» органларининг қишлоқ хўжалигига мўлжалланган ерларни муҳофаза қилиш бўйича давлат назорати соҳасидаги функциялари Вазирлар Маҳкамаси томонидан белгиланади.

13. Экология вазирлиги органларининг ерларни муҳофаза қилиш бўйича давлат назорати соҳасидаги функциялари Вазирлар Маҳкамаси томонидан белгиланади.

4-боб. Давлат ер ва кадастр назоратини амалга оширувчи махсус ваколатли давлат органларининг мансабдор шахслари

14. Давлат ер ва кадастр назорати Кадастр агентлиги, унинг Қорақалпоғистон Республикаси, вилоятлар ва Тошкент шаҳар бошқармалари, туманлар (шаҳарлар) бўлимларининг қуйидаги мансабдор шахслари томонидан амалга оширилади:

Кадастр агентлиги директори — ер ва кадастр назорати бўйича Ўзбекистон Республикасининг бош давлат инспектори;

Кадастр агентлиги директори ўринбосари — ер ва кадастр назорати бўйича Ўзбекистон Республикасининг бош давлат инспектори ўринбосари;

Кадастр агентлигининг ер ва кадастр назоратига масъул бошқармаси бошлиғи — ер ва кадастр назорати бўйича Ўзбекистон Республикасининг катта давлат инспектори;

Кадастр агентлигининг Қорақалпоғистон Республикаси, вилоятлар ва Тошкент шаҳри бошқармаси бошлиқлари — ер ва кадастр назорати бўйича Қорақалпоғистон Республикаси, вилоятлар ва Тошкент шаҳрининг бош давлат инспекторлари;

Кадастр агентлигининг Қорақалпоғистон Республикаси, вилоятлар ва Тошкент шаҳри бошқармаси бошлиғи ўринбосарлари — ер ва кадастр назорати бўйича Қорақалпоғистон Республикаси, вилоятлар ва Тошкент шаҳрининг катта давлат инспекторлари;

Кадастр агентлигининг туман (шаҳар) бўлими бошлиқлари — ер ва кадастр назорати бўйича туман (шаҳар) бош давлат инспекторлари;

Кадастр агентлигининг ер ва кадастр назоратига масъул бошқармаси бошлиғи ўринбосари, бўлим бошлиқлари ва мутахассислари, Қорақалпоғистон Республикаси, вилоятлар ва Тошкент шаҳар бошқармаси ер ва кадастр назоратига масъул бўлими бошлиғи ва мутахассислари, туман (шаҳар) бўлимларининг бош ва етакчи инспекторлари — ер ва кадастр назорати бўйича давлат инспекторлари.

15. Ўзагроинспекция ва Қорақалпоғистон Республикаси Агросаноат мажмуи устидан назорат қилиш инспекцияси, вилоятлар бошқармалари ва туманлар (Қувасой шаҳар) бўлимларининг мансабдор шахслари қишлоқ хўжалиги ерларидан фойдаланиш ва уни муҳофаза қилиш устидан давлат назоратини амалга оширувчи мансабдор шахслар ҳисобланади.

16. Экология вазирлиги ва Қорақалпоғистон Республикаси Экология, атроф-муҳитни муҳофаза қилиш ва иқлим ўзгариши вазирлиги, вилоятлар ва Тошкент шаҳар Экология, атроф-муҳитни муҳофаза қилиш ва иқлим ўзгариши бошқармалари бош давлат инспекторлари ва уларнинг ўринбосарлари, катта давлат инспекторлари ва давлат инспекторлари ўз ваколатларига мувофиқ Экология вазирлиги органларининг ерларни муҳофаза қилиш устидан давлат назоратини амалга оширувчи мансабдор шахслари ҳисобланади.

17. Давлат ер ва кадастр назорати соҳасида қонунийликни таъминлаш юзасидан махсус ваколатли давлат органларининг ўз ваколатлари доирасида қабул қилган қарорлари республика ижро этувчи ҳокимият органлари, маҳаллий давлат ҳокимияти органлари, хўжалик бирлашмалари, бошқа ташкилотлар ва уларнинг мансабдор шахслари, шу жумладан, юридик ва жисмоний шахслар томонидан бажарилиши мажбурий ҳисобланади.

5-боб. Давлат ер ва кадастр назорати тадбирлари иштирокчилари, уларнинг ҳуқуқлари ва мажбуриятлари

18. Давлат ер ва кадастр назоратини амалга оширувчи махсус ваколатли давлат органларининг мансабдор шахси, давлат ер ва кадастр назорат тадбири ўтказилаётган юридик шахснинг мансабдор шахси ёки унинг вакили ёхуд жисмоний шахс назорат тадбирининг иштирокчилари ҳисобланади.

19. Давлат ер ва кадастр назоратини амалга оширишда махсус ваколатли давлат органларининг мансабдор шахслари ўз ваколатлари доирасида қуйидаги ҳуқуқларга эга:

юридик ва жисмоний шахслардан кўчмас мулкка бўлган ҳуқуқларни тасдиқлайдиган ҳужжатларни талаб қилиш;

давлат ер ва кадастр назоратини амалга ошириш учун зарур бўлган маълумотларни республика ижро этувчи ҳокимият органлари, маҳаллий давлат ҳокимияти органлари, хўжалик бирлашмалари ҳамда юридик ва жисмоний шахслардан белгиланган тартибда сўраб олиш;

зарур ҳолларда, давлат ер ва кадастр назорати тадбирларида юзага келган масалаларни тушунтириш учун махсус билимларга эга бўлган республика ижро этувчи ҳокимият органлари ҳамда бошқа ташкилотларнинг мутахассисларини белгиланган тартибда жалб қилиш;

давлат ер ва кадастр назорати тадбирлари жараёнларини фото ва видеотасвирга тушириш, шунингдек, учувчисиз учиш аппаратлари (дронлар)дан белгиланган тартибда фойдаланиш, қонунчилик ҳужжатларида тақиқланган ҳоллар бундан мустасно;

зарур ҳолларда, давлат ер ва кадастр назорати тадбирларини ўтказиш чоғида юридик ва жисмоний шахслар томонидан фойдаланилаётган кадастр объектларини кўздан кечириш ва назорат ўлчовларидан ўтказиш;

давлат ер ва кадастр назорати масалаларида юридик ва жисмоний шахслардан зарур ахборотлар, маълумотлар, тушунтиришлар олиш;

давлат ер ва кадастр назорати тадбирларини ўтказиш чоғида давлат органлари ва бошқа ташкилотлар мансабдор шахсларини, жисмоний шахсларни махсус ваколатли давлат органига давлат ер ва кадастр назорати билан боғлиқ масалаларда тушунтиришлар беришга чақириш;

давлат ер ва кадастр назоратини амалга оширишга тўсқинлик қиладиган ҳаракатларнинг олдини олишда ёки уларни тўхтатишда, шунингдек, ер тўғрисидаги қонунчиликни бузганликда айбдор шахсларни аниқлашда ички ишлар органларига мурожаат қилиш;

давлат органлари ва бошқа ташкилотлар мансабдор шахсларига, шунингдек, жисмоний шахсларга давлат ер ва кадастр назорати соҳасида аниқланган қонун бузилишларини бартараф этиш ҳақида кўрсатмалар бериш;

кадастр объектларига оид ҳужжатларнинг қалбаки ёки сохталиги ҳақида шубҳа туғилган ҳолларда, уларни ҳақиқийлиги ёки тўғрилигини аниқлаш мақсадида олиб қўйиш.

Давлат ер ва кадастр назоратини амалга оширишда махсус ваколатли давлат органларининг мансабдор шахслари қонунчилик ҳужжатларига мувофиқ бошқа ҳуқуқларга ҳам эга бўлиши мумкин.

20. Давлат ер ва кадастр назоратини амалга оширишда махсус ваколатли давлат органларнинг мансабдор шахслари қуйидагиларга мажбур:

давлат ер ва кадастр назорати амалга оширилаётган юридик шахснинг мансабдор шахси ёки унинг вакилига ёхуд жисмоний шахсга ўз хизмат гувоҳномасини кўрсатиш;

юридик шахснинг мансабдор шахси ёки унинг вакилини ёхуд жисмоний шахсни давлат ер ва кадастр назорати мақсади ва уни амалга ошириш асослари билан таништириш;

юридик ва жисмоний шахснинг ҳуқуқ ва мажбуриятларини тушунтириш;

ўтказилган давлат ер ва кадастр назорати натижаларини далолатнома билан расмийлаштириш ҳамда бир нусхасини юридик шахснинг мансабдор шахси ёки унинг вакилига ёхуд жисмоний шахсга тақдим этиш.

Махсус ваколатли давлат органлари мансабдор шахсларининг зиммасида қонунчилик ҳужжатларига мувофиқ бошқа мажбуриятлар ҳам бўлиши мумкин.

21. Давлат ер ва кадастр назорати тадбири ўтказилаётган юридик шахснинг мансабдор шахси (вакили) ёки жисмоний шахс қуйидаги ҳуқуқларга эга:

махсус ваколатли давлат органи мансабдор шахсларининг назорат масалаларига алоқаси бўлмаган талабларини бажармаслик;

махсус ваколатли давлат органларига ер ва кадастр тўғрисидаги қонунчилик ижросига тааллуқли масалалар бўйича тушунтиришлар бериш;

махсус ваколатли давлат органи мансабдор шахсининг рухсати билан экспертиза ўтказишда иштирок этиш ва экспертга тушунтиришлар бериш, экспертнинг хулосаси билан танишиш;

давлат ер ва кадастр назорати материаллари билан танишиш ва назорат далолатномасини олиш;

махсус ваколатли давлат органи мансабдор шахсларининг ноқонуний хатти-ҳаракатлари юзасидан шикоят қилиш.

Давлат ер ва кадастр назорати ўтказилаётган юридик шахснинг мансабдор шахси ёки жисмоний шахс қонунчилик ҳужжатларига мувофиқ бошқа ҳуқуқларга ҳам эга бўлиши мумкин.

22. Давлат ер ва кадастр назорат тадбири ўтказилаётган юридик шахснинг мансабдор шахси (вакили) ёки жисмоний шахснинг мажбуриятлари:

махсус ваколатли давлат органларининг давлат ер ва кадастр назорати билан боғлиқ қонуний талабларини бажариш, улар мансабдор шахсларининг қонуний фаолиятига тўсқинлик қилмаслик;

назорат тадбирини ўтказаётган махсус ваколатли давлат органларининг мансабдор шахсларига назорат билан боғлиқ, шу жумладан, электрон ахборот жисмларида сақланадиган ҳужжатлар ва ахборотни ўрганиш ҳамда таҳлил қилиш имкониятини таъминлаш;

назорат тадбирини ўтказувчи мансабдор шахснинг талабига кўра ер ва кадастрга оид ҳужжатларни тақдим этиш.

Юридик шахснинг мансабдор шахси ёки жисмоний шахс ўз зиммасига қонунчилик ҳужжатларига мувофиқ бошқа мажбуриятларни ҳам олиши мумкин.

6-боб. Давлат ер назоратини ташкил этиш ва ўтказиш тартиби

1-§. Умумий қоидалар

23. Давлат ер назорати Ўзбекистон Республикасининг бутун ҳудудида махсус ваколатли давлат органлари томонидан «Е-YER NAZORAT» тизимида амалга оширилади. Бунда:

Кадастр агентлиги «Е-YER NAZORAT» тизимининг сифатли ва узлуксиз фаолият кўрсатишини ҳамда махсус ваколатли давлат органларининг тизимдан самарали фойдаланишларини таъминлаш бўйича масъул орган;

«Компьютерлаштириш, геоахборот технологияларини жорий этиш ва ривожлантириш маркази» давлат муассасаси «Е-YER NAZORAT» тизимининг оператори ҳисобланади.

24. «Е-YER NAZORAT» тизими ижро интизоми идоралараро ягона электрон тизими (edo.ijro.uz), «E-maʼmuriy ish», «Adolat», «E-material» ахборот тизимлари, Ижро иши юритувлари ягона электрон базаси билан интеграция қилинади.

Аэрокосмик мониторинг қилиш учун зарур маълумотлар давлат ер назоратини амалга оширувчи махсус ваколатли давлат органлари томонидан белгиланган тартибда Ўзбекистон Республикаси Рақамли технологиялар вазирлиги ҳузуридаги Космик тадқиқотлар ва технологиялар агентлигига (кейинги ўринларда — «Ўзбеккосмос» агентлиги) беғараз тақдим этиб борилади.

25. Қуйидагилар давлат ер назоратини амалга ошириш учун маълумотлар манбаи ҳисобланади:

ер мониторинги жараёнида ер тўғрисидаги қонунчиликнинг бузилиши кузатилганда;

махсус автоматлаштирилган ахборот тизими ҳамда аэрокосмик суратларни солиштириш орқали эҳтимолий ер тўғрисидаги қонунчиликнинг бузилиши қайд этилганда;

жисмоний ёки юридик шахсларнинг ер тўғрисидаги қонунчилик бузилиши ҳолатлари ҳақидаги асосланган мурожаатларига мувофиқ;

оммавий ахборот воситалари ёки бошқа ташқи манбаларда (ижтимоий тармоқлар ва веб-сайтларда) ерга оид ҳуқуқбузарликлар тўғрисидаги маълумотлар эълон қилинганда;

суд, ҳуқуқни муҳофаза қилувчи органлар, шунингдек, бошқа давлат органлари ва ташкилотларидан ерга оид ҳуқуқбузарликлар тўғрисида далолат берувчи ахборот келиб тушганда;

ўзбошимчалик билан эгаллаб олинган ер участкаларига ҳамда уларда қурилган бинолар ва иншоотларга бўлган ҳуқуқларни эътироф этиш жараёнида рад этилган объектлар «Eʼtirof» ахборот тизими орқали маълумот келиб тушганда.

Давлат ер назоратини амалга оширувчи махсус ваколатли давлат органлари ерга оид қонунбузилиш ҳолатларининг олдини олиш мақсадида ер тўғрисидаги қонунчилик талаблари юзасидан доимий равишда тушунтириш тадбирларини амалга оширади.

2-§. Ерга оид қонунбузилиш ҳолатларини давлат космик мониторинг натижаларини қайта ишлаш орқали аниқлаш ҳамда маълумотларни «E-YER NAZORAT» тизими орқали махсус ваколатли давлат органларига электрон шаклда манзилли юбориш тартиби

26. «Ўзбеккосмос» агентлиги:

давлат космик мониторинг қилиш бўйича тасдиқланган лойиҳалар доирасида ер участкаларидан мақсадсиз ва самарасиз фойдаланиш, ерларни ўзбошимчалик билан эгаллаш, бундай ерларда эҳтимолий ноқонуний қурилмалар қуриш ҳолатларини бир йилда икки маротаба аэрокосмик мониторинг орқали аниқлайди. Заруратга кўра, манфаатдор вазирлик ва идораларнинг бюджетдан ташқари маблағлари ҳисобидан қўшимча аэрокосмик мониторинг ўтказилиши мумкин;

амалга оширилган космик мониторинг натижаларида аниқланган ер участкаларидан мақсадсиз ва самарасиз фойдаланиш, ерларни ўзбошимчалик билан эгаллаш ҳамда ўзбошимчалик билан бино ва иншоотларни қуриш эҳтимоли юқори бўлган ҳолатларга оид дастлабки маълумотларни «Е-YER NAZORAT» тизими орқали махсус ваколатли давлат органларига электрон шаклда манзилли тақдим этиб боради.

27. «Ўзбеккосмос» агентлиги томонидан юборилган ерга оид қонунбузилиш эҳтимоли юқори бўлган ҳолатларга оид дастлабки маълумотлар тегишли махсус ваколатли давлат органининг «Е-YER NAZORAT» тизимидаги кабинетига автоматик тарзда тақсимланади.

28. Махсус ваколатли давлат органлари келиб тушган маълумотларни белгиланган тартибда ўрганиб чиқади ҳамда ўз ваколатлари доирасида тегишли чораларни кўради.

«Е-YER NAZORAT» тизимига келиб тушган маълумотларнинг махсус ваколатли давлат органлари томонидан асоссиз равишда қайтарилишига йўл қўйилмайди.

3-§. Махсус ваколатли давлат органлари томонидан «Е-YER NAZORAT» тизимида ерга оид қонунбузилиш ҳолатлари тўғрисидаги ишларни юритиш, давлат ер назорати ҳужжатларини расмийлаштириш, кўриб чиқиш ва қарор қабул қилиш ёки «Е-YER NAZORAT» тизими орқали ҳуқуқбузарликларни кўриб чиқиш ваколатига эга органга юбориш тартиби

29. Махсус ваколатли давлат органлари томонидан ерга оид ҳуқуқбузарликларни аниқлаш, ҳужжатлар тўпламини шакллантириш, уларни ўз вақтида ва холисона кўриб чиқиш мақсадида электрон ҳужжатлар алмашинуви «Е-YER NAZORAT» тизимидан фойдаланилган ҳолда амалга оширилади.

Ер тўғрисидаги қонунчилик ҳужжатлари бузилиши кузатилганда, махсус ваколатли давлат органи раҳбарининг (раҳбар ўринбосарининг) «Е-YER NAZORAT» тизимида электрон тарзда шакллантирилиб, давлат ер назоратини амалга ошириш тўғрисидаги тасдиқланган буйруғига асосан ўн иш кунидан кўп бўлмаган муддатда давлат ер назорати амалга оширилади.

Давлат ер назоратини амалга ошириш тўғрисидаги буйруқда юридик шахснинг номи ёки жисмоний шахснинг фамилияси, исми, отасининг исми, назорат амалга ошириладиган ер участкаси жойлашган манзил, назоратни амалга оширувчи мансабдор шахсларнинг фамилияси, исми, отасининг исми ҳамда лавозими, назоратни амалга ошириш муддати ва мақсадлари кўрсатилади, ушбу банднинг тўртинчи хатбошиси бундан мустасно.

Ер участкаларини ўзбошимчалик билан эгаллаб олиш, ушбу ер участкаларида ўзбошимчалик билан иморат қуриш билан боғлиқ давлат ер назоратини амалга ошириш тўғрисидаги буйруқда юридик ва жисмоний шахсларнинг номи кўрсатилмайди.

Давлат ер назоратини амалга ошириш тўғрисидаги буйруққа назорат объектининг WGS-84 координаталар тизимидаги геолокацияси илова қилиниши лозим.

Давлат ер назоратини амалга ошириш тўғрисидаги буйруқда кўрсатилган сана ушбу назоратни амалга ошириш муддатининг бошланиши ҳисобланади.

30. Агар давлат ер назоратида махсус ваколатли давлат органининг икки ёки ундан ортиқ назоратчи мансабдор шахслари қатнашганда, давлат ер назоратини амалга ошириш тўғрисидаги буйруқда фамилияси биринчи кўрсатилган мансабдор шахс назорат жараёнини бошқариш ва натижаларини умумлаштиришга жавобгар шахс ҳисобланади.

Махсус ваколатли давлат органларининг мансабдор шахслари давлат ер назорати тадбирларида ўз ваколатлари доирасидан четга чиқмаслиги ҳамда назорат предметига алоқадор бўлмаган ҳужжатларни (ахборотни) талаб қилмаслиги лозим.

31. Ерга оид ҳужжатларнинг қалбаки ёки сохталиги ҳақида шубҳа пайдо бўлган ҳолларда, давлат ер назоратини амалга ошираётган махсус ваколатли давлат органининг мансабдор шахси томонидан уларнинг ҳақиқийлиги ёки тўғрилигига аниқлик киритиш мақсадида олиб қўйилиши мумкин.

Бунда ҳужжатларни олиб қўйиш тўғрисида махсус ваколатли давлат органининг мансабдор шахси томонидан баённома тузилади ва унда қуйидагилар кўрсатилади:

баённома тузилган вақти ва жойи;

баённомани тузган шахснинг лавозими, фамилияси, исми, отасининг исми;

ҳужжатлари олиб қўйилган шахс тўғрисидаги маълумотлар (юридик шахс номи, унинг мансабдор шахси ёки ҳужжатларни олиб қўйишда иштирок этган вакили ёхуд жисмоний шахснинг фамилияси, исми, отасининг исми, манзили ва шу кабилар);

ҳужжатларни олиб қўйишда иштирок этган шахслар тўғрисидаги маълумотлар (агар улар бўлса);

олиб қўйилаётган ҳужжатнинг номи (мазмуни), санаси, рақами, уни қабул қилган (расмийлаштирган) орган, ташкилот номи ҳамда ҳужжатнинг варақлари сони.

Ҳужжатларни олиб қўйиш тўғрисидаги баённома планшет ёки компьютер ёрдамида «Е-YER NAZORAT» тизими орқали электрон тарзда расмийлаштирилади.

Ушбу баённома юридик шахснинг мансабдор шахси ёки унинг вакили ёхуд жисмоний шахс томонидан имзоларни идентификация қилишнинг тегишли воситалари (дактилоскопия (бармоқ изи), ёки ERI) билан тасдиқлангандан сўнг, баённома ушбу шахсларга электрон алоқа воситаси ёки почта хизмати орқали юборилади.

Юридик шахснинг мансабдор шахси ёки унинг вакили ёхуд жисмоний шахс ҳужжатларни олиб қўйиш тўғрисидаги баённомани имзолашдан бош тортган ҳолларда, бу ҳақида баённомага тегишли ёзув киритилади ва баённома ушбу шахсларга электрон алоқа воситаси ёки почта хизмати орқали юборилади.

32. Давлат ер назорати доирасидаги ҳаракатларни юридик ёки жисмоний шахс рўйхатдан ўтган ёки фаолият юритаётган ёхуд назорат тадбири ўтказилаётган жойнинг ўзида расмийлаштириш имкони бўлмаса, ушбу ҳаракатлар фуқароларнинг ўзини ўзи бошқариш органларининг ёки махсус ваколатли давлат органининг биносида планшет ва компьютер ёрдамида расмийлаштирилиши мумкин.

Махсус ваколатли давлат органининг мансабдор шахслари томонидан давлат ер назорати натижалари бўйича «Е-YER NAZORAT» тизимида қуйидагиларни илова қилган ҳолда электрон тарзда далолатнома тузилади:

назорат тадбири ўтказилган жой, далолатнома тузилган сана;

назорат тадбири ўтказиш учун асос;

назорат тадбирини ўтказган мансабдор шахсларнинг фамилияси, исми, отасининг исми;

юридик шахснинг номи ёки жисмоний шахснинг фамилияси, исми, отасининг исми, уларнинг манзили ва солиқ тўловчининг идентификация рақами (СТИР), жисмоний шахснинг шахсий идентификация рақами (ЖШШИР);

давлат ер назорати соҳасида ҳуқуқбузарлик содир этилган жойнинг аниқ манзили, WGS-84 координаталар каталоги, ҳолати ва ҳажми, шунингдек, ер тўғрисидаги қонунчилик ҳужжатларининг тегишли нормасига ҳавола этилган ҳолдаги батафсил тавсифи;

ерга оид ҳуқуқбузарлик оқибатларини қонунчилик ҳужжатларида белгиланган муддатларда ихтиёрий равишда бартараф этиш тўғрисида кўрсатма.

Далолатномага махсус ваколатли давлат органи мансабдор шахси томонидан ер назорати тадбирида олинган фотосуратлар, видеоёзувлар ва бошқа материаллар илова қилинади.

Ушбу далолатнома юридик шахснинг мансабдор шахси ёки унинг вакили ёхуд жисмоний шахс томонидан имзоларни идентификация қилишнинг тегишли воситалари (дактилоскопия (бармоқ изи) ёки ERI) билан тасдиқлагандан сўнг, далолатнома ушбу шахсларга электрон алоқа воситалари ва почта хизмати орқали юборилади.

Юридик шахснинг мансабдор шахси ёки унинг вакили ёхуд жисмоний шахс далолатномани имзолашдан бош тортган ҳолларда, бу ҳақида далолатномага тегишли ёзув киритилади ва далолатнома ушбу шахсларга уч иш кунидан кечиктирмасдан электрон алоқа воситалари ҳамда почта хизмати орқали юборилади.

Далолатнома юридик ёки жисмоний шахсга топширилган кун ёки унга юборилган кун давлат ер назорати тадбири якунланган вақт деб ҳисобланади.

Давлат ер назорати далолатномасини қоғоз шаклида расмийлаштириш зарурати юзага келганда, ушбу далолатнома белгиланган тартибда давлат ер назорати тадбири тугалланган кундан эътиборан кейинги иш кунидан кечиктирмасдан «E-YER NAZORAT» тизимига электрон шаклда киритилади.

Ер тўғрисидаги қонунчилик талабларини бузганлик учун юридик шахснинг мансабдор шахси ёки жисмоний шахс маъмурий жавобгарликка тортилиши лозим бўлса, махсус ваколатли давлат органларининг ер назоратини амалга оширган мансабдор шахси аниқланган ҳуқуқбузарликлар юзасидан Ўзбекистон Республикаси Маъмурий жавобгарлик тўғрисидаги кодексига мувофиқ ўз ваколатлари доирасида маъмурий ҳуқуқбузарлик тўғрисида баённома тузади.

Аниқланган ҳуқуқбузарликлар ваколат доирасига тегишли бўлмаган ҳолларда назорат қилувчи орган беш кун муддатда мазкур ҳуқуқбузарликларни кўриб чиқиш ваколатига эга органга юборилаётганлиги тўғрисида маълумотни киритган ҳолда «E-YER NAZORAT» тизими орқали ҳуқуқбузарликларни кўриб чиқиш ваколатига эга органга юборади.

4-§. Ерга оид қонунбузилиш ҳолатларини аниқлаш ва улар юзасидан ўтказилган давлат ер назорати тадбирлари тўғрисидаги маълумотларни тўплаш, сақлаш ва таҳлил қилиш қоидалари

33. Ерга оид қонунбузилиш ҳолатларини аниқлаш ва улар юзасидан ўтказилган давлат ер назорати тадбирлари тўғрисидаги маълумотлар (ёзма кўрсатма, маъмурий ҳуқуқбузарлик тўғрисидаги баённома, жарималарни қўллаш тўғрисидаги қарорлар ва суд қарорлари) бевосита «Е-YER NAZORAT» тизимининг махсус ва ўзгармас ID-рақам билан шакллантирилади ва тўпланади.

«Е-YER NAZORAT» тизимининг «Ҳуқуқбузарликни жойига чиқиб ўрганиш» бўлимида расмийлаштирилган буйруқ, ҳуқуқбузар тўғрисидаги маълумотлар, ноқонуний қурилма расмлари, ҳуқуқбузарнинг тушунтириш хати ва расмийлаштирилган далолатнома ва бошқа ҳужжатлар шакллантирилади ва тўпланади.

33 1 . Ҳуқуқбузарлик бўйича расмийлаштирилган маъмурий баённома ва қабул қилинган маъмурий жазо қўллаш ҳақидаги қарор Маъмурий ҳуқуқбузарликлар тўғрисида ягона электрон иш юритув тизимида («E-maʼmuriy ish») шакллантирилади ҳамда интеграция қилиш орқали «Е-YER NAZORAT» тизимининг «Чора кўриш» бўлимида тўпланади.

33 2 . Ўзбошимчалик билан эгалланган ер майдонларини мажбурий тартибда бўшатиш ҳамда ноқонуний қурилмаларни буздириш бўйича фуқаролик ва иқтисодий судларга киритилган даъво аризалари, шунингдек, фуқаролик ва иқтисодий судлар томонидан кўриб чиқиш тамомланиб, қонуний кучга кирган суд қарорлари «Е-YER NAZORAT» тизими ва «Adolat» ахборот тизимининг интеграцияси орқали «Е-YER NAZORAT» тизимида автоматик шакллантирилади ва тўпланади.

33 3 . Ерга оид қонунбузилиш ҳолатлари бўйича Қорақалпоғистон Республикаси, вилоятлар ва Тошкент шаҳри, туман, шаҳарлар бўйича ҳисобот жадваллари «Е-YER NAZORAT» тизимида мавжуд маълумотлар асосида шакллантирилади.

Бунда ҳуқуқбузарлик содир этилган туман (шаҳар)лар, МФЙ, манзили, ҳуқуқбузар шахснинг фамилияси, исми, отасининг исми, идентификацияловчи ID-картаси (паспорт) маълумотлари, ижрочи инспектор, расмийлаштирилган далолатноманинг санаси, ҳуқуқбузарлик бўйича расмийлаштирилган электрон баённома ва қабул қилинган қарор санаси, суд органларига киритилган даъво аризалари санаси, маъмурий жарима қўллаш тўғрисидаги баённома, қарор, ваколат доирасида бошқа идораларга юборилган ҳолатлар, Ўзбекистон Республикаси Бош прокуратураси ҳузуридаги Мажбурий ижро бюросига юборилган маъмурий ишлар маълумотларидан фойдаланилади.

Аниқланган ҳар бир ҳуқуқбузарлик бўйича амалга оширилган ишларни туман (шаҳар) даражасидан республика даражасигача бўлган вертикал назорат ва таҳлил қилиш имконияти яратилади.

33 4 . Ерга оид қонунбузилиш ҳолатларини аниқлаш ва улар юзасидан ўтказилган давлат ер назорати тадбирлари тўғрисидаги «Е-YER NAZORAT» тизимида шакллантирилган ҳужжатлар ва маълумотлар «Е-YER NAZORAT» тизимида сақланади.

Бунда қоғоз шаклидаги маълумотлар махсус ваколатли давлат органларида, уларнинг электрон нусхалари «Е-YER NAZORAT» тизимида сақланади.

33 5 . Махсус ваколатли давлат органига ҳамда Ўзбекистон Республикаси Бош прокуратурасига тегишлилигига кўра «Е-YER NAZORAT» тизимида сақланаётган ҳужжатлар ва маълумотларни кўриш ва таҳлил қилиш имконияти яратилади.

33 6 . «Е-YER NAZORAT» тизимида ерга оид ҳуқуқбузарликлар тўғрисидаги маълумотларни ўз вақтида киритиш ва ҳуқуқбузарликка оид ишларни кўриб чиқиш натижалари тўғрисида маълумотларни жойлаштириш учун Кадастр агентлиги ва ахборот тизимлари «Е-YER NAZORAT» тизимига интеграция қилинадиган ваколатли давлат органлари масъул ҳисобланади.

5-§. Давлат ер назорати тўғрисидаги маълумотларнинг ягона марказлаштирилган электрон тизимини юритиш тартиби

34. «Е-YER NAZORAT» тизимини юритишда давлат ер назорати тўғрисидаги ишлар бўйича гувоҳ, жабрланувчи, холис ва ҳуқуқбузар уларнинг электрон рақамли имзосидан (бармоқ изи ёки график имзо) фойдаланган ҳолда идентификация қилинади ҳамда ишни кўриб чиқаётган махсус ваколатли давлат органларининг мансабдор шахслари томонидан назорат тадбири натижаси тўғрисидаги ишлар ва ишга тааллуқли ҳужжатлар QR-код билан тасдиқланади.

34 1 . Кадастр агентлиги томонидан давлат ер назорати тўғрисидаги ишлар бўйича электрон шаклдаги маълумотлар архиви (иш ҳужжатларининг электрон шакли) қонунчилик ҳужжатларида белгиланган муддатларда сақланади.

34 2 . Махсус ваколатли давлат органлари томонидан ер қонунчилигига риоя қилмаслик, жумладан, ерлардан мақсадсиз ва самарасиз фойдаланиш, ерларни ўзбошимчалик билан эгаллаш ҳамда ўзбошимчалик билан бино ва иншоотларни қуриш ҳолатларини барвақт аниқлаш, уларга тегишли чоралар кўриш доирасида аниқланган ҳуқуқбузарликлар бўйича ундирилган жарималарнинг икки фоизи «Е-YER NAZORAT» тизими операторига йўналтирилади.

34 3 . «Е-YER NAZORAT» тизимидаги маълумотлар махсус ваколатли давлат органларининг мансабдор шахслари фойдаланадиган маълумотлар ҳисобланади ҳамда мазкур мансабдор шахслар «Е-YER NAZORAT» тизимидаги маълумотлар билан фақат қонунчилик ҳужжатлари асосида зиммасига юкланган вазифаларни амалга ошириш учун танишиши ва фойдаланиши мумкин.

6-§. Ер участкаларидан мақсадсиз ва самарасиз фойдаланиш, ерларни ўзбошимчалик билан эгаллаш, ўзбошимчалик билан бино ва иншоотларни қуриш билан боғлиқ ҳуқуқбузарликлар даражасига қараб ҳудудларни тоифаларга ажратиш мезонлари

35. Ер участкаларидан мақсадсиз ва самарасиз фойдаланиш, ерларни ўзбошимчалик билан эгаллаш, ўзбошимчалик билан бино ва иншоотларни қуриш билан боғлиқ ҳуқуқбузарлик даражасига қараб туман (шаҳар)лар қуйидагича ҳудудларга бўлинади:

«қизил» тоифадаги ҳудуд — ер участкаларидан мақсадсиз ва самарасиз фойдаланиш, ерларни ўзбошимчалик билан эгаллаш ҳамда ўзбошимчалик билан бино ва иншоотларни қуриш эҳтимоли юқори ҳудудлар;

«сариқ» тоифадаги ҳудуд — ер участкаларидан мақсадсиз ва самарасиз фойдаланиш, ерларни ўзбошимчалик билан эгаллаш ҳамда ўзбошимчалик билан бино ва иншоотларни қуриш эҳтимоли ўрта ҳудудлар;

«яшил» тоифадаги ҳудуд — ер участкаларидан мақсадсиз ва самарасиз фойдаланиш, ерларни ўзбошимчалик билан эгаллаш ҳамда ўзбошимчалик билан бино ва иншоотларни қуриш эҳтимоли паст ҳудудлар.

35 1 . Туман (шаҳар)лар давлат ер назоратини амалга ошириш учун маълумотлар манбалари орқали тақдим этиб бориладиган маълумотлар асосида ҳар чорак якуни билан тоифаларга бўлинади.

Йиғилган маълумотлар манбалари орқали ер участкаларидан мақсадсиз ва самарасиз фойдаланиш, ерларни ўзбошимчалик билан эгаллаш, ўзбошимчалик билан бино ва иншоотларни қуриш билан боғлиқ ҳуқуқбузарлик сони энг кўп бўлган туман (шаҳар) аниқланади.

Бунда ушбу ҳудудда аниқланган ҳуқуқбузарликларнинг умумий сонидан:

75 фоиз ва ундан ошган туман (шаҳар) — «қизил» тоифадаги ҳудуд;

50 фоиздан 75 фоизгача бўлган туман (шаҳар) — «сариқ» тоифадаги ҳудуд;

50 фоиз ва ундан кам бўлган туман (шаҳар) — «яшил» тоифадаги ҳудуд деб белгиланади.

35 2 . «Қизил» тоифадаги ҳудудларда ҳар чоракда камида бир маротаба махсус учувчисиз учиш аппаратларидан фойдаланган ҳолда, «сариқ» тоифадаги ҳудудларда ҳар олти ойда камида бир маротаба махсус самолёт ёрдамида мониторинг кузатувлари ўтказилади.

Ер участкаларидан мақсадсиз ва самарасиз фойдаланиш, ерларни ўзбошимчалик билан эгаллаш ва ўзбошимчалик билан бино ва иншоотларни қуриш ҳолатларини аниқлаган давлат органи томонидан ўз ваколати доирасида чора кўрилади ёки аниқланган маълумотлар тегишлилиги бўйича «Е-YER NAZORAT» тизими орқали махсус ваколатли давлат органларига чора кўриш учун юборилади.

Аниқланган ерга оид қонунбузилиш ҳолатлари бартараф этилгунга қадар махсус ваколатли давлат органларининг давлат ер назорати йўналишидаги асосий куч ва воситалари сафарбар этилади.

7-боб. Давлат кадастр назоратини амалга ошириш тартиби

36. Давлат кадастр назорати «Давлат кадастрлари тўғрисида»ги Ўзбекистон Республикасининг Қонуни ва бошқа қонунчилик ҳужжатларига мувофиқ Кадастр агентлиги органлари томонидан амалга оширилади.

37. Давлат кадастр назорати давлат кадастрларини юритишга масъул бўлган вазирликлар, давлат қўмиталари, идоралар ва маҳаллий давлат ҳокимияти органлари томонидан Давлат кадастрлари ягона тизимига киритиш учун тегишли ахборот тақдим этиш, шунингдек, юридик ва жисмоний шахслар томонидан давлат кадастрларини юритишга оид қонунчилик ҳужжатлари талабларига риоя этилишини назорат қилишдан иборат.

38. Кўчмас мулкка бўлган ҳуқуқларни давлат рўйхатидан ўтказишни амалга оширувчи органларга кўчмас мулкка бўлган ҳуқуқни рўйхатдан ўтказиш учун ўз вақтида мурожаат этмаслик билан боғлиқ кадастр назоратида «Кадастр ва кўчмас мулкни рўйхатдан ўтказиш интеграцион ахборот тизими» маълумотларидан фойдаланилади.

39. Давлат кадастрларини юритиш ва кўчмас мулкка бўлган ҳуқуқни рўйхатдан ўтказиш учун ўз вақтида мурожаат этмаслик билан боғлиқ маъмурий ҳуқуқбузарлик аниқланганда, маъмурий ҳуқуқбузарлик тўғрисидаги баённома тузиш ва ишни кўриб чиқиш ҳамда маъмурий ҳуқуқбузарликлар бўйича ишларни юритиш Ўзбекистон Республикаси Маъмурий жавобгарлик тўғрисидаги кодексига мувофиқ амалга оширилади.

8-боб. Давлат ер ва кадастр назоратини амалга оширувчи органларнинг ўзаро ҳамкорлиги

40. Махсус ваколатли давлат органлари томонидан уларнинг зиммаларига юклатилган вазифалар республика ижро этувчи ҳокимият органлари, маҳаллий давлат ҳокимияти органлари, фуқароларнинг ўзини ўзи бошқариш органлари, ҳуқуқни муҳофаза қилувчи органлар ва бошқа ташкилотлар билан ўзаро ҳамкорликда амалга оширилади.

Республика ижро этувчи ҳокимият органлари, маҳаллий давлат ҳокимияти органлари, фуқароларнинг ўзини ўзи бошқариш органлари, ҳуқуқни муҳофаза қилувчи органлар ҳамда ер эгалари, ердан фойдаланувчилар ва ижарачилар ер тўғрисидаги ва кадастр тўғрисидаги қонунчиликка риоя этилиши устидан давлат назоратини амалга ошириш ҳамда ерга оид ҳуқуқбузарликларга барҳам беришда махсус ваколатли давлат органларига кўмаклашишлари шарт.

41. Махсус ваколатли давлат органлари, маҳаллий давлат ҳокимияти органлари, ҳуқуқни муҳофаза қилувчи органлар ерга оид ҳуқуқбузарликлар тўғрисида бир-бирини хабардор қилади, шу жумладан, идоралараро электрон ҳамкорлик қилишдан фойдаланган ҳолда хабардор қилади, шунингдек, ўз зиммаларига юклатилган вазифаларни бажариш мақсадида бошқа ахборотлар билан алмашишни амалга оширади.

42. Кўчмас мулк объектига бўлган ҳуқуқларни давлат рўйхатидан ўтказувчи органлар, кадастр муҳандислари ва фуқароларнинг ўзини ўзи бошқариш органлари ўзларига ошкор бўлган ер тўғрисидаги қонунчиликнинг бузилиши, шу жумладан, ер участкаларини ўзбошимчалик билан эгаллаб олиш, кўчмас мулкка бўлган ҳуқуқларни тасдиқловчи ҳужжатларни қалбакилаштириш ҳолатлари тўғрисида тегишли махсус ваколатли давлат органини зудлик билан хабардор қилади.

43. Давлат ер ва кадастр назоратини амалга оширишга тўсқинлик қиладиган ҳаракатларнинг олдини олиш ёки уларни тўхтатиш ёхуд ер участкаларини ўзбошимчалик билан эгаллаган шахсларни аниқлаш ва ушлаб келтириш бўйича тезкор ҳаракатлар ички ишлар органлари томонидан амалга оширилади.

9-боб. Ерга оид ҳуқуқбузарликларни аниқлашда жамоатчилик назорати ва жамоатчилик назорати субъектларини рағбатлантириш тартиби

44. Жамоатчилик назорати субъектлари ерлардан фойдаланиш ҳамда уларни муҳофаза қилиш устидан жамоатчилик назоратини ўз ваколатлари доирасида амалга оширадилар.

Жамоатчилик назорати субъектлари махсус ваколатли давлат органига ерга оид ҳуқуқбузарликлар тўғрисида фотосуратлар, видеоёзувларни илова қилган ҳолда ахборот тизими орқали аризалар ва шикоятлар билан мурожаат қилиши мумкин.

Ерларни ўзбошимчалик билан эгаллаб олиш ҳолатлари тўғрисида маълумот берган шахслар, уларнинг берган маълумотлари асосида ҳуқуқбузардан ундирилган жарима ҳисобидан мазкур Низомга 2-иловага мувофиқ базавий ҳисоблаш миқдорининг бир баравари (жарима миқдоридан ошмаган) миқдоридаги пул мукофоти билан рағбатлантирилади.

45. Жамоатчилик назорати субъектлари томонидан махсус ваколатли давлат органига тақдим қилинган ерга оид ҳуқуқбузарликлар тўғрисидаги видеоёзувларда содир этилган ҳуқуқбузарлик ҳолати, ҳуқуқбузар шахс тўғрисидаги маълумотлар аниқ акс эттирилиши ҳамда қуйидаги талабларга мос бўлиши керак:

видеофайлнинг намойиш этиш имконияти 720х480 пикселдан кам бўлмаслиги;

видеоёзув давомийлиги 30 секунддан кам бўлмаслиги ва 10 дақиқадан ошмаслиги;

видеоёзув маълумотларида сана ва вақт кўрсатилиши.

46. Ҳуқуқбузарлик ҳолати акс эттирилган видеоёзувларга ҳар қандай тарзда ўзгартиришлар киритиш тақиқланади. Ўзгартириш киритилган видеоёзувлар кўриб чиқилмайди, ҳажмини қисқартириш мақсадида видеоёзувнинг бевосита ҳуқуқбузарлик ҳолати акс эттирилган қисмини кесиб олиш бундан мустасно.

47. Ҳуқуқбузарлик ҳолати акс эттирилган видеоёзувларни ахборот тизими орқали юборишда қуйидагилар тўлиқ кўрсатилиши лозим:

фуқаронинг исми, фамилияси, отасининг исми, доимий яшаш манзили, юридик шахснинг номи, жойлашган ери (почта манзили), банк ҳисобварағи (видеоёзув юридик шахс вакили номидан тўлдирилганда);

уяли телефон рақами ёки банк пластик картаси рақами ва электрон манзили;

ҳуқуқбузарлик содир этилган жой, сана ва вақт.

48. Ахборот тизимига келиб тушган ҳуқуқбузарлик ҳолатлари қайд этилган видеоёзувлар махсус ваколатли давлат органи томонидан уч иш куни мобайнида кўриб чиқилади.

Ҳуқуқбузарлик мавжуд бўлган тақдирда мазкур Низомнинг 23 — 35-бандларига мувофиқ ўн иш куни мобайнида давлат ер назорати тадбири ўтказилади ва натижаси бўйича мурожаатни юборган шахсга бир иш кунида электрон тарзда жавоб юборилади.

49. Қуйидаги ҳолларда видеотехника воситалари орқали қайд этилган ҳуқуқбузарлик ҳолатлари тўғрисидаги видеоёзувлар асосида маъмурий иш юритилмайди:

видеоёзувлар мазкур Низомнинг 45-бандида белгиланган талабларга жавоб бермаганда ёки сифатсиз бўлганда;

видеоёзувларга ўзгартиришлар киритилган бўлса, мазкур Низомнинг 46 бандида назарда тутилган ҳоллар бундан мустасно;

видеоёзувлар ахборот тизимига мазкур Низомнинг 47-бандида белгиланган талабларга риоя этмаган ҳолда юкланганда;

видеоёзувда қайд этилган ҳуқуқбузарлик бўйича қарор қабул қилинган ёки маъмурий иш юритилаётган тақдирда.

50. Рағбатлантириш ҳуқуқбузардан жарима ундирилгандан сўнг фуқаронинг уяли телефон рақами ҳисобига ёки банк пластик картасига, юридик шахснинг эса банкдаги ҳисобварағига махсус ваколатли давлат органининг бюджетдан ташқари жамғармаси ҳисобварағига ўтказилган маблағлар ҳисобидан автоматик тарзда пул ўтказиш йўли билан амалга оширилади.

51. Ҳуқуқбузарлик ҳолатлари тўғрисидаги маълумотларни тақдим этган шахслар тўғрисидаги маълумотларнинг ошкор этилишига йўл қўйилмайди.

10-боб. Якунловчи қоидалар

52. Давлат кадастрлари ягона тизимига киритиладиган давлат кадастрларининг ахборотини тақдим этиш тартибини бузиш ҳамда ерга оид қонунбузилиш ҳолатлари содир этилганда, Кадастр агентлиги уларнинг келиб чиқиш сабаблари ва бунга имконият яратиб бераётган шарт-шароитларни бартараф этиш ҳақида тегишли вазирликлар, давлат қўмиталари, идоралар, хўжалик бирлашмалари, маҳаллий давлат ҳокимияти органларига кўриб чиқилиши мажбурий бўлган тақдимнома киритиши мумкин.

53. Ер участкаларидан мақсадсиз фойдаланиш ва ўзбошимчалик билан эгалланган ер майдонида ноқонуний қурилган иморатларни бартараф этиш тўғрисидаги Кадастр агентлиги органларининг кўрсатмаси жисмоний ва юридик шахслар томонидан ўн беш кун муддатда ихтиёрий равишда бажарилган тақдирда, махсус ваколатли давлат органининг мансабдор шахслари томонидан ўзбошимчалик билан эгалланган ер майдонида ноқонуний қурилган иморатлар бартараф этилганини қайд этиш тўғрисида электрон шаклдаги далолатнома «E-YERNAZORAT» ААТ орқали расмийлаштирилиб, махсус ваколатли давлат органининг мансабдор шахслари томонидан ЭРИ билан тасдиқланади.

Мазкур кўрсатмалар бажарилмаган тақдирда, Кадастр агентлиги органлари Ўзбекистон Республикасининг Ер кодекси 36-моддасига мувофиқ ушбу ер участкаларига бўлган ҳуқуқни бекор қилиш ҳамда ноқонуний қурилган иморатларни бартараф этиш (бузиб ташлаш) юзасидан тўғридан тўғри судга мурожаат қилишга ҳақли.

54. Мазкур Низом талаблари асосида ўтказилган ер назорати тадбирлари натижалари бўйича махсус ваколатли давлат органининг мансабдор шахсларини рағбатлантириш тартиби махсус ваколатли давлат органи томонидан белгиланади.

55. Ушбу Низом талабларининг бузилишида айбдор шахслар қонунчиликка мувофиқ жавоб берадилар.

Давлат ер ва кадастр назоратини амалга ошириш тартиби тўғрисидаги низомга 1-ИЛОВА

Давлат ер назоратини амалга ошириш

Босқичлар Субъектлар Тадбирлар Бажариш муддатлари 1-босқич Махсус ваколатли давлат органлари Давлат ер назорати Ўзбекистон Республикасининг бутун ҳудудида махсус ваколатли давлат органлари томонидан «Е-YER NAZORAT» тизимида амалга оширилади. Доимий 2-босқич «Ўзбеккосмос» агентлиги Ер участкаларидан мақсадсиз ва самарасиз фойдаланиш, ерларни ўзбошимчалик билан эгаллаш, бундай ерларда эҳтимолий ноқонуний қурилмалар қуриш ҳолатларини аэрокосмик мониторинг орқали аниқлайди ва «Е-YER NAZORAT» тизими орқали махсус ваколатли давлат органларига юборади. Бир йилда икки маротаба 3-босқич Махсус ваколатли давлат органлари Давлат ер назорати ер тўғрисидаги қонунчилик бузилиши кузатилганда махсус ваколатли давлат органи раҳбарининг (раҳбар ўринбосарининг) тасдиқланган буйруғи «Е-YER NAZORAT» тизимида электрон тарзда шакллантирилади ва ваколат доирасида тегишли чоралар кўради. Ўн иш кунидан кўп бўлмаган муддатда 4-босқич Махсус ваколатли давлат органлари 1. Давлат ер назорати натижалари бўйича «Е-YER N AZORAT» тизимида электрон тарзда далолатнома тузади. 2. Далолатнома юридик шахснинг мансабдор шахси ёки унинг вакили ёхуд жисмоний шахс томонидан белгиланган тартибда тасдиқлангандан сўнг ёки улар далолатномани имзолашдан бош тортган тақдирда, бу ҳақида далолатномага тегишли ёзув киритилган ҳолда ушбу шахсларга электрон алоқа воситалари ва почта хизмати орқали юборилади. 10 иш куни мобайнида 5-босқич Махсус ваколатли давлат органлари 1. Ер тўғрисидаги қонунчилик талабларини бузганлик учун юридик шахснинг мансабдор шахси ёки жисмоний шахс маъмурий жавобгарликка тортилиши лозим бўлса, махсус ваколатли давлат органларининг ер назоратини амалга оширган мансабдор шахси аниқланган ҳуқуқбузарликлар юзасидан Ўзбекистон Республикаси Маъмурий жавобгарлик тўғрисидаги кодексига мувофиқ ўз ваколатлари доирасида маъмурий ҳуқуқбузарлик тўғрисида баённома тузади. Маъмурий жавобгарлик тўғрисидаги кодексида белгиланган муддатларда 2. Аниқланган ҳуқуқбузарликлар ваколат доирасига тегишли бўлмаган ҳолларда, мазкур ҳуқуқбузарликларни кўриб чиқиш ваколатига эга органга «E-YER N AZORAT» тизими орқали юборади. 5 кун муддатда

Давлат ер ва кадастр назоратини амалга ошириш тартиби тўғрисидаги низомга 2-ИЛОВА

Ерга оид ҳуқуқбузарликларни аниқлашда жамоатчилик назорати ва жамоатчилик назорати субъектларини рағбатлантириш

Босқич Субъект Тадбир Муддат 1-босқич Жамоатчилик назорати субъектлари Ерга оид ҳуқуқбузарликлар тўғрисида фотосуратлар, видеоёзувларни илова қилган ҳолда ахборот тизими орқали аризалар ва шикоятлар билан мурожаат қилади. Ўз хоҳишига кўра 2-босқич Махсус ваколатли давлат органи Келиб тушган ҳуқуқбузарлик ҳолатлари қайд этилган аризалар ва шикоятларни кўриб чиқади. Уч иш куни мобайнида 3-босқич Махсус ваколатли давлат органи Ҳуқуқбузарлик мавжуд бўлган тақдирда Давлат ер ва кадастр назоратини амалга ошириш тартиби тўғрисидаги низомнинг 23 — 35-бандларига мувофиқ давлат ер назорати тадбири ўтказилади. Ўн иш куни мобайнида 4-босқич Махсус ваколатли давлат органи Кўриб чиқиш натижаси бўйича мурожаатни юборган шахсга электрон тарзда жавоб юборилади. Бир иш куни мобайнида 5-босқич Махсус ваколатли давлат органи Рағбатлантириш фуқаронинг уяли телефон рақами ҳисобига ёки банк пластик картасига, юридик шахснинг эса банкдаги ҳисобварағига махсус ваколатли давлат органининг бюджетдан ташқари жамғармаси ҳисобварағига ўтказилган маблағлар ҳисобидан пул ўтказиш йўли билан амалга оширилади. Ҳуқуқбузардан жарима ундирилгандан сўнг автоматик тарзда

Вазирлар Маҳкамасининг 2022 йил 14 апрелдаги 183-сон қарорига 2-ИЛОВА

Давлат геодезия назоратини амалга ошириш тартиби тўғрисида

1-боб. Умумий қоидалар

1. Мазкур Низом давлат геодезия назоратини амалга ошириш тартибини белгилайди.

2. Ушбу Низомда қуйидаги асосий тушунчалар қўлланилади:

геодезия ва картографияга доир материаллар (маълумотлар) — ахборотни қайд этиш тури ва усулидан қатъи назар, геодезия ва картография фаолияти амалга оширилаётганда олинган геодезия, нивелир, гравиметрия ўлчовларининг, аэрокосмик ва картографик тасвирларнинг барча якуний ва оралиқ натижалари;

геодезия ва картографияга доир материаллар (маълумотлар) экспертизаси — геодезия ва картографияга доир материалларнинг (маълумотларнинг) геодезия ва картография фаолиятини техник жиҳатдан тартибга солиш соҳасидаги норматив ҳужжатлар, шунингдек, геодезия ва картографияга оид ишларни бажаришнинг техник лойиҳалари (дастурлари) талабларига мувофиқлигини аниқлаш;

геодезия ва картография фаолияти субъектлари — Ўзбекистон Республикаси Иқтисодиёт ва молия вазирлиги ҳузуридаги Кадастр агентлиги (кейинги ўринларда — Кадастр агентлиги), Мудофаа вазирлиги, давлат бошқаруви органлари, маҳаллий давлат ҳокимияти органлари, хўжалик бирлашмалари, геодезия ва картография фаолиятини амалга ошириш ҳуқуқига эга бўлган юридик шахслар, геодезия ва картографияга доир материалларни (маълумотларни) сақловчи юридик ва жисмоний шахслар;

давлат геодезия назорати — геодезия ва картография фаолияти субъектлари томонидан геодезия ва картография фаолияти тўғрисидаги қонунчилик талабларига риоя этилишини назорат қилиш мақсадида ваколатли органлар томонидан амалга ошириладиган ҳаракатлар мажмуи.

3. Давлат геодезия назорати Ўзбекистон Республикасининг бутун ҳудудида ушбу Низомга иловада келтирилган схемага мувофиқ амалга оширилади.

4. Геодезия ва картография фаолияти субъектлари томонидан геодезия ва картография фаолияти тўғрисидаги қонунчилик талабларига риоя этилишини назорат қилиш, шунингдек, геодезия ва картографияга оид ишларни, геодезия пунктларини рўйхатдан ўтказиш ҳамда ҳисобга олишни ташкил этиш, давлат картография-геодезия фондининг фаолият юритишини таъминлаш давлат геодезия назоратининг асосий вазифалари ҳисобланади.

5. Кадастр агентлиги — геодезия ва картография фаолиятининг барча субъектлари томонидан геодезия ва картография фаолияти тўғрисидаги қонунчилик талабларига риоя этилиши устидан давлат назоратини амалга оширадиган махсус ваколатли давлат органи (кейинги ўринларда — махсус ваколатли давлат органи) ҳисобланади, Ўзбекистон Республикаси Мудофаа вазирлиги ҳамда Давлат хавфсизлик хизмати тизимидаги геодезия ва картография фаолияти субъектлари бундан мустасно.

Ўзбекистон Республикаси Мудофаа вазирлиги ҳамда Давлат хавфсизлик хизмати тизимидаги геодезия ва картография фаолияти субъектлари томонидан геодезия ва картография фаолияти тўғрисидаги қонунчилик талабларига риоя этилиши устидан давлат назорати қонунчилик ҳужжатларида белгиланган тартибда амалга оширилади.

6. Махсус ваколатли давлат органи ҳуқуқни муҳофаза қилувчи органлар, давлат бошқаруви органлари, фуқароларнинг ўзини ўзи бошқариш органлари ҳамда бошқа нодавлат нотижорат ташкилотлар билан ўзаро ҳамкорлик қилади, уларга методик ва бошқа ёрдам кўрсатади.

7. Махсус ваколатли давлат органи геодезия ва картография фаолияти тўғрисидаги қонунчилик юзасидан профилактик тадбирларни амалга оширади.

8. Махсус ваколатли давлат органи томонидан геодезия ва картография соҳасида қонунийликни таъминлаш юзасидан ўз ваколатлари доирасида қабул қилган қарорлари давлат бошқаруви органлари, маҳаллий давлат ҳокимияти органлари, хўжалик бирлашмалари, бошқа ташкилотлар ва уларнинг мансабдор шахслари, шунингдек, юридик ва жисмоний шахслар томонидан бажарилиши мажбурий ҳисобланади.

2-боб. Махсус ваколатли давлат органининг асосий вазифалари ва функциялари

9. Қуйидагилар давлат геодезия назоратини амалга оширишда махсус ваколатли давлат органининг асосий вазифалари ҳисобланади:

геодезия ва картография фаолияти субъектлари томонидан геодезия ва картография фаолияти тўғрисидаги қонунчилик талабларига, геодезия ҳамда картографияга доир материаллардан (маълумотлардан) фойдаланиш қоидаларига риоя этилишини таъминлаш;

геодезия ва картографияга оид ишларни, геодезия пунктларини рўйхатдан ўтказиш ҳамда ҳисобга олишни ташкил этиш;

давлат картография-геодезия фондининг фаолият юритишини назорат қилиш.

10. Махсус ваколатли давлат органи давлат геодезия назоратини амалга оширишда ўзига юкланган асосий вазифаларга мувофиқ қуйидаги функцияларни бажаради:

геодезия ва картография фаолияти субъектлари томонидан геодезия ва картография фаолияти тўғрисидаги қонунчилик талабларига риоя этилиши устидан назорат қилади;

картографияга доир материалларда ҳамда бошқа ҳужжатларда Ўзбекистон Республикасининг Давлат чегараси ва ҳудуди тўғри акс эттирилганлиги устидан назорат қилади;

геодезия ва картографияга оид ишларни рўйхатдан ўтказади;

геодезия пунктларини ҳисобга олади;

давлат геодезия, нивелир, гравиметрия тармоқларидаги геодезия пунктларининг, шунингдек, қонунчиликда назарда тутилган ҳолларда бошқа геодезия пунктларининг бут сақланиши ва уларнинг муҳофаза зоналари режимига риоя этилиши устидан назорат қилади;

геодезия ва картография фаолияти субъектлари томонидан давлат картография-геодезия фонди ҳамда идоравий картография-геодезия фондлари материалларининг (маълумотларининг) сақланиши устидан назорат қилади;

геодезия ва картография фаолияти субъектлари томонидан геодезия координаталари, баландликлари, гравиметрия ўлчовлари давлат тизимларининг ҳамда давлат топографик хариталари ва режаларининг масштаб қатори, маҳаллий координаталар ҳамда бошқа координаталар тизимларининг қўлланилиши устидан назорат қилади;

геодезия ва картография фаолияти субъектлари томонидан умумдавлат аҳамиятига молик геодезия ва картографияга доир материаллар (маълумотлар) давлат картография-геодезия фондига топширилиши, шунингдек, бу субъектларнинг ушбу фонддан олган материаллардан (маълумотлардан) фойдаланиши устидан назорат қилади;

геодезия ва картографияга оид бажарилган ишлар тўғрисидаги техник ҳисоботларга доир талабларни белгилайди;

геодезия ва картографияга доир материалларни (маълумотларни) экспертизадан ўтказади;

Ўзбекистон Республикаси маъмурий-ҳудудий бирликлар навбатчи харитаси юритилишини назорат қилади;

рухсат бериш ва хабардор қилиш тартиб-таомилларига амал қилинганлигини доимий назорат қилади.

Махсус ваколатли давлат органи қонунчилик ҳужжатларига мувофиқ бошқа вазифа ва функцияларни ҳам амалга ошириши мумкин.

11. Геодезия пунктларини рўйхатдан ўтказиш ва ҳисобга олишни ташкил қилиш тартиби ҳамда давлат картография-геодезия фондининг фаолият юритиш тартиби махсус ваколатли давлат органи томонидан белгиланади.

3-боб. Давлат геодезия назоратини амалга оширувчи махсус ваколатли давлат органининг мансабдор шахслари

12. Давлат геодезия назорати Кадастр агентлиги томонидан амалга оширилади.

13. Давлат геодезия назорати Кадастр агентлигининг қуйидаги мансабдор шахслари томонидан амалга оширилади:

Кадастр агентлиги директори — геодезия назорати бўйича Ўзбекистон Республикасининг бош давлат инспектори;

Кадастр агентлиги директори ўринбосари — геодезия назорати бўйича Ўзбекистон Республикаси бош давлат инспекторининг ўринбосари;

Кадастр агентлигининг геодезия назоратига масъул бошқармаси бошлиғи — геодезия назорати бўйича Ўзбекистон Республикасининг катта давлат инспектори;

Кадастр агентлигининг геодезия назоратига масъул бошқармаси ходимлари — геодезия назорати бўйича давлат инспекторлари.

14. Давлат геодезия назоратини амалга оширишда Кадастр агентлигининг Қорақалпоғистон Республикаси, вилоятлар ва Тошкент шаҳар бошқармаси ҳамда туман (шаҳар) бўлими мутахассислари жалб қилиниши мумкин.

4-боб. Давлат геодезия назорати тадбирлари иштирокчилари, уларнинг ҳуқуқлари ва мажбуриятлари

15. Махсус ваколатли давлат органи мансабдор шахслари, геодезия ва картография фаолияти субъектлари (уларнинг вакиллари) давлат геодезия назоратининг иштирокчилари ҳисобланади.

16. Давлат геодезия ва картография фаолияти соҳасида қонунийликни таъминлаш юзасидан махсус ваколатли давлат органининг мансабдор шахслари қуйидаги ҳуқуқларга эга:

геодезия ва картография ишлари белгиланган тартибда рўйхатдан ўтказилмасдан ёхуд фаолиятни техник жиҳатдан тартибга солувчи норматив ҳужжатлар талаблари бузилган ҳолда олиб борилаётган бўлса, ушбу ишларни белгиланган тартибда тўхтатиб қўйиш;

геодезия ва картография ишлари ҳамда топография хариталари, режалари, геодезия пунктлари координатлари ва баландликлари тўғрисидаги маълумотларни сақлаш билан боғлиқ хоналарга белгиланган тартибда кириш;

геодезия ва картография фаолияти субъектлари раҳбарлари ёки мансабдор шахсларига геодезия ва картография ишларини ташкил этиш ва амалга ошириш тартибининг аниқланган бузилишларини бартараф этиш, шунингдек, ушбу ишларни бажариш ва аэрокосмик суратга олишлар натижалари бўйича олинган материаллар (маълумотлар)ни тўплаш, ҳисобини юритиш, сақлаш, улардан фойдаланиш ва реализация қилиш юзасидан бажарилиши мажбурий бўлган кўрсатмалар бериш;

давлат геодезия назоратини амалга ошириш билан боғлиқ текширишларни ўтказиш учун экспертларни белгиланган тартибда жалб этиш;

геодезия ва картография фаолияти субъектларидан ўзига юкланган вазифаларни бажариш учун зарур ахборотларни сўраб олиш;

геодезия ва картография фаолияти субъектларининг геодезия ва картографияга доир ахборот ресурслари, географик ахборот тизимлари, маълумотлар (геомаълумотлар) базалари, реестрларидан фойдаланиш, улардан маълумотлар ва (ёки) ахборотларни текин олиш;

рухсат бериш ва хабардор қилиш талаблари ва шартларига жисмоний ва юридик шахсларнинг риоя этишини текширишни Ўзбекистон Республикаси Президенти ҳузуридаги Тадбиркорлик субъектларининг ҳуқуқлари ва қонуний манфаатларини ҳимоя қилиш бўйича вакил билан келишилган, қонунчиликда белгиланган тартибда жойига чиққан ҳолда ўтказиш;

рухсат бериш ва хабардор қилиш талаблари ва шартларига риоя этилиши юзасидан текширувлар ўтказилаётганда юзага келадиган масалалар бўйича жисмоний ва юридик шахслардан зарур ахборотни сўраш ва олиш;

текширувлар натижалари асосида геодезия ва картография фаолияти субъектлари йўл қўйган рухсат бериш ва хабардор қилиш талаблари ҳамда шартларига доир қоидабузарликларни кўрсатган ҳолда далолатномалар тузиш;

геодезия ва картография фаолияти субъектлари зиммасига аниқланган қоидабузарликларни бартараф этиш мажбуриятини юкловчи қарорлар чиқариш, бундай қоидабузарликларни бартараф этиш муддатларини белгилаш;

рухсат этиш хусусиятига эга ҳужжатнинг амал қилишини тўхтатиб туриш ёки уни бекор қилиш тўғрисидаги ариза билан судга мурожаат қилиш;

геодезия ва картография фаолиятини бошлаганлик ёки тугатганлик ҳақида хабардор қилувчининг фаолиятини (ҳаракатларини) тўхтатиб туриш ва қайта тиклаш тўғрисида қарор қабул қилиш, уларнинг фаолиятини тугатиш тўғрисида, шунингдек, фаолиятини (ҳаракатларини) амалга оширишни тақиқлаш тўғрисида судга ариза бериш;

рухсат бериш ва хабардор қилиш тартиб-таомиллари соҳасидаги ҳуқуқбузарликлар учун юридик шахсларга жарима солиш тўғрисида судга ариза бериш;

рухсат бериш ва хабардор қилиш тартиб-таомиллари соҳасидаги ваколатларни амалга ошириш учун судга давлат божи тўламасдан аризалар бериш.

Махсус ваколатли давлат органининг мансабдор шахслари қонунчилик ҳужжатларига мувофиқ бошқа ҳуқуқларга ҳам эга бўлиши мумкин.

17. Махсус ваколатли давлат органининг мансабдор шахслари қуйидагиларга мажбур:

давлат геодезия назорати амалга оширилаётган юридик шахснинг мансабдор шахси ёки унинг вакилига ёхуд жисмоний шахсга текшириш ўтказиш махсус гувоҳномасини кўрсатиш;

юридик шахснинг мансабдор шахси ёки унинг вакилини ёхуд жисмоний шахсни давлат геодезия назорати мақсади ва уни амалга ошириш асослари билан таништириш;

юридик ва жисмоний шахснинг ҳуқуқ ва мажбуриятларини тушунтириш;

ўтказилган давлат геодезия назорати натижаларини далолатнома (кейинги ўринларда — далолатнома) билан расмийлаштириш ва бир нусхасини юридик шахснинг мансабдор шахси ёки унинг вакилига ёхуд жисмоний шахсга тақдим этиш.

Махсус ваколатли давлат органи мансабдор шахсларининг зиммасида қонунчилик ҳужжатларига мувофиқ бошқа мажбуриятлар ҳам бўлиши мумкин.

18. Давлат геодезия назоратини ўтказишда геодезия ва картография фаолияти субъектлари қуйидаги ҳуқуқларга эга:

давлат геодезия назорати инспекторларининг назорат масалаларига алоқаси бўлмаган талабларини бажармаслик;

давлат геодезия назоратини ўтказишда шахсан ёки ўз вакили орқали иштирок этиш;

давлат геодезия назорати инспекторининг рухсати билан экспертиза ўтказишда иштирок этиш ва экспертга тушунтиришлар бериш, экспертнинг хулосаси билан танишиш;

давлат геодезия назорати материаллари билан танишиш ва далолатномани олиш;

текширишларни рўйхатга олиш китобига тегишли ёзувлар киритилишини (ёки электрон тизимда қайд этилишини) талаб қилиш;

давлат геодезия назорати инспекторининг ноқонуний хатти-ҳаракатлари юзасидан шикоят қилиш.

Геодезия ва картография фаолияти субъектлари қонунчилик ҳужжатларига мувофиқ бошқа ҳуқуқларга ҳам эга бўлиши мумкин.

19. Давлат геодезия назоратини ўтказишда геодезия ва картография фаолияти субъектлари қуйидагиларга мажбур:

давлат геодезия назорати билан боғлиқ қонуний талабларини бажариш, улар мансабдор шахсларининг қонуний фаолиятига тўсқинлик қилмаслик;

давлат геодезия назоратини ўтказаётган давлат геодезия назорати инспекторларига текширув билан боғлиқ, шу жумладан, электрон ахборот жисмларида сақланадиган, ҳужжатлар ва ахборотни ўрганиш ҳамда таҳлил қилиш имкониятини таъминлаш;

давлат геодезия назорати инспекторининг талабига кўра геодезия ва картография фаолиятига оид шартномалар, шартномада кўрсатилган ишларни бажарилганлигини, техник лойиҳа ва ҳисоботлар, зарур ҳолатларда бажарилган ишлардан намуналар кўрсатиш.

Геодезия ва картография фаолияти субъектлари ўз зиммасига қонунчилик ҳужжатларига мувофиқ бошқа мажбуриятларни ҳам олиши мумкин.

5-боб. Давлат геодезия назоратини ташкил этиш ва ўтказиш тартиби

20. Давлат геодезия назорати «Геодезия ва картография фаолияти тўғрисида»ги Ўзбекистон Республикасининг Қонуни ва бошқа қонунчилик ҳужжатларига мувофиқ махсус ваколатли давлат органи томонидан амалга оширилади.

21. Махсус ваколатли давлат органи томонидан давлат геодезия назорати қуйидаги асосларга кўра белгиланган тартибда ўтказилади:

геодезия ва картография ишларини рўйхатдан ўтказилмаганлиги;

картография материалларида ва бошқа ҳужжатларда Ўзбекистон Республикаси Давлат чегараларининг ҳамда маъмурий-ҳудудий бирликлар чегараларини нотўғри акс эттирилганлигини;

геодезия ва картография фаолиятининг субъектлари томонидан геодезия ва картография фаолияти тўғрисидаги қонунчилик талабларига мувофиқ фаолият юритилмаганлиги;

давлат геодезия, нивелир, гравиметрия тармоқларидаги геодезия пунктларининг, шунингдек, қонунчилик ҳужжатларида назарда тутилган ҳолларда бошқа геодезия пунктларининг бут сақланиши ва уларнинг муҳофаза зоналари режимига риоя этилишини таъминламанганлиги;

давлат геодезия тармоғи пунктларининг қайта тикланишини таъминлаш бўйича тадбирларнинг бажарилмаганлиги;

рухсат бериш ва хабардор қилиш тартиб-таомилларига амал қилинмаганлиги;

геодезия ва картография фаолияти субъектлари томонидан умумдавлат аҳамиятига молик геодезия ва картографияга доир материаллар (маълумотлар) давлат картография-геодезия фондига топширилмаганда;

геодезия ва картография фаолияти субъектларининг давлат картография-геодезия фондидан олинган материаллардан (маълумотлардан) қонунчилик ҳужжатларига мувофиқ фойдаланилмаганлиги аниқланганда;

жисмоний ёки юридик шахсларнинг геодезия тўғрисидаги қонунчилик ҳужжатлари бузилиши ҳолатлари тўғрисидаги асосланган мурожаатларига мувофиқ;

оммавий ахборот воситалари ёки бошқа ташқи манбаларда (ижтимоий тармоқлар ва веб-сайтларда) геодезия ва картографияга оид ҳуқуқбузарликлар тўғрисидаги маълумотлар эълон қилинганда;

суд, ҳуқуқни муҳофаза қилувчи органлар, шунингдек, бошқа давлат органлари ва ташкилотлардан геодезия ва картографияга оид ҳуқуқбузарликлар тўғрисида далолат берувчи ахборот тушганда;

назорат қилувчи органларнинг «хавфни таҳлил этиш» тизими орқали ҳуқуқбузарликлар аниқланганда.

22. Давлат геодезия назорати махсус ваколатли давлат органи раҳбарининг (раҳбар ўринбосарининг) буйруғига асосан ўн иш кунидан кўп бўлмаган муддатда амалга оширилади.

Давлат геодезия назоратини амалга ошириш тўғрисидаги буйруқда кўрсатилган сана ушбу назоратни амалга ошириш муддатининг бошланиши деб ҳисобланади.

23. Агар давлат геодезия назоратида махсус ваколатли давлат органининг икки ёки ундан ортиқ назоратчи мансабдор шахслари қатнашганда, буйруқда фамилияси биринчи кўрсатилган мансабдор шахс назорат жараёнини бошқариш ва натижаларини умумлаштиришга жавобгар шахс ҳисобланади.

24. Махсус ваколатли давлат органининг мансабдор шахслари давлат геодезия назорати тадбирларида ўз ваколатлари доирасидан четга чиқмаслиги ҳамда назорат предметига алоқадор бўлмаган ҳужжатларни (ахборотни) талаб қилмаслиги лозим.

25. Геодезия ва картографияга доир материалларнинг (маълумотларнинг) қалбаки ёки сохталиги ҳақида шубҳа туғилган ҳолларда, давлат геодезия назоратини амалга ошираётган махсус ваколатли давлат органининг мансабдор шахси томонидан уларни ҳақиқийлиги ёки тўғрилигига аниқлик киритиш мақсадида олиб қўйилиши мумкин.

26. Ҳужжатларни олиб қўйиш тўғрисида махсус ваколатли давлат органининг мансабдор шахси томонидан баённома тузилади, унда қуйидагилар кўрсатилиши керак:

баённома тузилган вақти ва жойи;

баённомани тузган шахснинг лавозими, фамилияси, исми, отасининг исми;

ҳужжатлари олиб қўйилган шахс тўғрисидаги маълумотлар (юридик шахс номи, унинг мансабдор шахси ёки ҳужжатларни олиб қўйишда иштирок этган вакили ёхуд жисмоний шахснинг фамилияси, исми, отасининг исми, манзили ва шу кабилар);

ҳужжатларни олиб қўйишда иштирок этган шахслар тўғрисидаги маълумотлар, агар улар бўлса;

олиб қўйилаётган ҳужжатнинг номи (мазмуни), санаси, рақами, уни қабул қилган (расмийлаштирган) орган, ташкилот номи ҳамда ҳужжатнинг варақлари сони.

Ҳужжатларни олиб қўйиш тўғрисидаги баённома икки нусхада расмийлаштирилади ва унинг бир нусхаси юридик шахснинг мансабдор шахси ёки унинг вакилига ёхуд жисмоний шахсга имзо қўйдириб топширилади.

Юридик шахснинг мансабдор шахси ёки унинг вакили ёхуд жисмоний шахс ҳужжатлар олиб қўйиш тўғрисидаги баённомани имзолаш ва (ёки) олишдан бош тортган ҳолларда, бу ҳақида баённомага тегишли ёзув киритилади ва юридик ёки жисмоний шахсга почта орқали буюртма хат билан юборилади.

27. Давлат геодезия назорати доирасидаги ҳаракатларни юридик ёки жисмоний шахс рўйхатдан ўтган ёки фаолият юритаётган ёхуд назорат тадбири ўтказилаётган жойнинг ўзида расмийлаштириш имкони бўлмаса, фуқароларнинг ўзини ўзи бошқариш органи ёки махсус ваколатли давлат органининг биносида расмийлаштирилиши мумкин.

28. Давлат геодезия назоратини ўтказишда зарур ҳолларда белгиланган тартибда малакали мутахассислар ва таржимонлар жалб этилиши, шунингдек, экспертиза тайинланиши мумкин.

29. Экспертиза тайинлаш тўғрисидаги буйруқ махсус ваколатли давлат органи раҳбари (раҳбар ўринбосари) томонидан давлат геодезия назорати инспекторининг илтимосномаси асосида қабул қилинади.

30. Малакали мутахассислар ва таржимонни жалб қилиш учун махсус ваколатли давлат органи томонидан тегишли давлат органлари ва ташкилотларига мурожаат қилинади.

31. Малакали мутахассислар ва таржимонлар шартнома асосида махсус ваколатли давлат органининг маблағлари ҳисобидан жалб қилиниши мумкин, маблағ ажратиш тартиби махсус ваколатли давлат органи томонидан тасдиқланади.

32. Махсус ваколатли давлат органининг мансабдор шахслари томонидан давлат геодезия назорати натижалари бўйича қуйидагилар кўрсатилган ҳолда камида уч нусхада далолатнома тузилиши керак:

назорат тадбири ўтказилган жой, далолатнома тузилган сана;

назорат тадбири ўтказиш учун асос;

назорат тадбирини ўтказган мансабдор шахсларнинг фамилияси, исми, отасининг исми;

юридик шахснинг номи ёки жисмоний шахснинг фамилияси, исми, отасининг исми, уларнинг манзили ва солиқ тўловчининг идентификация рақами (СТИР), жисмоний шахснинг шахсий идентификация рақами (ЖШШИР);

геодезия ва картография соҳасидаги ҳуқуқбузарлик оқибатларини қонунчилик ҳужжатларида белгиланган муддатларда ихтиёрий равишда бартараф этиш тўғрисида кўрсатма.

Далолатномага махсус ваколатли давлат органи мансабдор шахси томонидан геодезия назорати тадбирида олинган фотосуратлар, видеоёзувлар ва бошқа материаллар илова қилинади.

33. Давлат геодезия назоратини ўтказиш натижасида геодезия ва картография тўғрисидаги қонунчилик ҳужжатларининг бузилишлари аниқланмаган бўлса, бу ҳақида далолатномада қайд этилади.

34. Далолатноманинг барча нусхалари махсус ваколатли давлат органининг мансабдор шахслари томонидан имзоланади ҳамда унинг бир нусхаси юридик шахснинг мансабдор шахси ёки унинг вакилига ёхуд жисмоний шахсга уни олган санани кўрсатган ҳолда имзо қўйдириб топширилади.

35. Юридик шахснинг мансабдор шахси ёки унинг вакили ёхуд жисмоний шахс далолатномани олишдан бош тортганда, далолатномага тегишли ёзув киритилади ва унинг бир нусхаси юридик ёки жисмоний шахсга уч иш кунидан кечиктирмасдан почта орқали буюртма хат билан юборилади ва юборилганидан эътиборан уч кун ўтгач, топширилган ҳисобланади.

36. Давлат геодезия назорати ўтказилган шахс (унинг вакили) далолатномада баён этилган ҳолатларга ва (ёки) текширувчиларнинг хулосалари ҳамда таклифларига рози бўлмаган тақдирда, далолатномани олган кундан эътиборан ўн кун ичида Кадастр агентлигига мазкур далолатнома бўйича умуман ёки унинг айрим ҳолатлари юзасидан ёзма эътирозларини тақдим этишга ҳақли.

37. Геодезия ва картография фаолияти субъектлари ўз эътирозларининг асосланганлигини тасдиқловчи ҳужжатларни (уларнинг тасдиқланган кўчирма нусхаларини) ёзма эътирозларга илова қилишга ёки келишилган муддатда ваколатли органга топширишга ҳақли.

38. Далолатнома геодезия ва картография фаолияти субъектига топширилган кун ёки унга юборилган кун давлат геодезия назорати тадбири якунланган вақт деб ҳисобланади.

39. Далолатнома махсус ваколатли давлат органи томонидан белгиланган тартибда тугалланган кундан эътиборан кейинги иш кунидан кечиктирмасдан рўйхатдан ўтказилиши лозим.

40. Давлат геодезия назоратини ўтказиш материалларини кўриб чиқиш ва натижаси бўйича қарор қабул қилиш геодезия ва картография фаолияти тўғрисидаги қонунчиликда белгиланган тартибда амалга оширилади.

41. Геодезия ва картография фаолияти тўғрисидаги қонунчилик талабларини бузганлик учун геодезия ва картография фаолияти субъектининг раҳбари ҳамда мансабдор шахси ёки жисмоний шахс маъмурий жавобгарликка тортилиши лозим бўлса, ваколатли органнинг геодезия назоратини амалга оширган мансабдор шахси аниқланган ҳуқуқбузарликлар юзасидан Ўзбекистон Республикаси Маъмурий жавобгарлик тўғрисидаги кодексига мувофиқ ўз ваколатлари доирасида маъмурий ҳуқуқбузарлик тўғрисида баённома тузади.

6-боб. Якунловчи қоидалар

42. Давлат геодезия назорати натижасида аниқланган маъмурий ҳуқуқбузарликлар тўғрисидаги ишларни кўриб чиқиш ва жарима солиш тариқасидаги маъмурий жазо чораларини қўллаш тааллуқлилиги бўйича махсус ваколатли давлат органи томонидан Ўзбекистон Республикаси Маъмурий жавобгарлик тўғрисидаги кодексига мувофиқ амалга оширилади.

Агар маъмурий ҳуқуқбузарлик тўғрисидаги ишларни кўриб чиқиш пайтида махсус ваколатли давлат органи (мансабдор шахси) томонидан ҳуқуқбузарлик ҳолатида жиноят аломатлари бор деган хулосага келинган тақдирда, тегишли материаллар белгиланган тартибда ҳуқуқни муҳофаза қилувчи органларга юборилади.

Рухсат бериш ва хабардор қилиш тартиб-таомиллари соҳасидаги ҳуқуқбузарликлар «Лицензиялаш, рухсат бериш ва хабардор қилиш тартиб-таомиллари тўғрисида»ги Ўзбекистон Республикасининг Қонунида белгиланган тартибда кўриб чиқилади.

43. Махсус ваколатли давлат органининг кўрсатмалари, тақдимномалари ва бошқа ҳужжатларини бажармаслик, шунингдек, давлат геодезия назоратини амалга оширувчи мансабдор шахслар фаолиятига асоссиз аралашиш ҳамда юклатилган вазифалар ва функцияларнинг қонуний ижро этилишига тўсқинлик қилиш мақсадида уларга ҳар қандай шаклда таъсир кўрсатиш тақиқланади ва бу қонунчиликда белгиланган тартибда жавобгарликка сабаб бўлади.

44. Ушбу Низом талабларининг бузилишида айбдор шахслар қонунчиликка мувофиқ жавоб берадилар.

Давлат геодезия назоратини амалга ошириш тартиби тўғрисидаги низомга ИЛОВА

Давлат геодезия назоратини амалга ошириш

Босқичлар Субъектлар Тадбирлар Бажариш муддатлари 1-босқич Махсус ваколатли давлат органи Давлат геодезия назоратини амалга оширади. Доимий 2-босқич Махсус ваколатли давлат органи Тадбиркорлик субъектларининг ҳуқуқлари ва қонуний манфаатларини ҳимоя қилиш бўйича вакил билан келишилгандан сўнг, давлат геодезия назоратини амалга ошириш тўғрисидаги махсус ваколатли давлат органи раҳбарининг (раҳбар ўринбосарининг) буйруғи қабул қилинади. Геодезия ва картография фаолияти тўғрисидаги қонунчиликнинг бузилиши кузатилганда 3-босқич Махсус ваколатли давлат органи Махсус ваколатли давлат органининг мансабдор шахслари давлат геодезия назоратини амалга оширади ва натижалари бўйича далолатнома тузади. 10 иш куни мобайнида 4-босқич Махсус ваколатли давлат органи Далолатномани имзолайди ҳамда унинг бир нусхасини юридик шахснинг мансабдор шахси ёки унинг вакилига ёхуд жисмоний шахсга уни олган санани кўрсатган ҳолда имзо қўйдириб топширади. 1 иш куни мобайнида 5-босқич Махсус ваколатли давлат органи Юридик шахснинг мансабдор шахси (вакили) ёхуд жисмоний шахс далолатномани олишдан бош тортганда, далолатномага тегишли ёзувни киритади ва унинг бир нусхасини юридик ёки жисмоний шахсга почта орқали юборади. 3 иш кунидан кечиктирмай 6-босқич Махсус ваколатли давлат органи Рухсат бер?ш ва хабардор қилиш тартиб-таомиллари соҳасидаги ҳуқуқбузарликлар ҳуқуқбузарликлар «Лицензиялаш, рухсат бериш ва хабардор қилиш тартиб-таомиллари тўғрисида»ги Ўзбекистон Республикасининг Қонунига мувофиқ кўриб чиқилади. Белгиланган тартибда 7-босқич Махсус ваколатли давлат органи Геодезия соҳасида аниқланган маъмурий ҳуқуқбузарликлар тўғрисидаги ишларни кўриб чиқиш ва маъмурий жазо чорасини қўллаш Ўзбекистон Республикасининг Маъмурий жавобгарлик тўғрисидаги Кодексига мувофиқ амалга оширилади. Белгиланган тартибда

Вазирлар Маҳкамасининг 2022 йил 14 апрелдаги 183-сон қарорига 3-ИЛОВА

Ўзбекистон Республикаси Ҳукуматининг ўз кучини йўқотган деб эътироф этилаётган қарорлари

2. Вазирлар Маҳкамасининг «Ўзбекистон Республикаси Ҳукуматининг айрим қарорларига ўзгартириш ва қўшимчалар киритиш тўғрисида (Ўзбекистон Республикаси Президентининг «Кичик бизнес ва хусусий тадбиркорликни янада ривожлантириш учун қулай ишбилармонлик муҳитини шакллантиришга доир қўшимча чора-тадбирлар тўғрисида» 2011 йил 24 августдаги ПФ-4354-сон Фармони, Ўзбекистон Республикаси Президентининг «Бюрократик тўсиқларни бартараф этиш ва тадбиркорлик фаолияти эркинлигини янада ошириш чора-тадбирлари тўғрисида» 2011 йил 25 августдаги ПҚ-1604-сон қарори)» 2011 йил 2 ноябрдаги 294-сон қарорига илованинг 28-банди .

3. Вазирлар Маҳкамасининг «Ўзбекистон Республикаси Ҳукуматининг айрим қарорларига ўзгартириш ва қўшимчалар киритиш тўғрисида (Ўзбекистон Республикаси Президентининг «Ерларни муҳофаза қилиш ва улардан оқилона фойдаланиш борасида назоратни кучайтириш, геодезия ва картография фаолиятини такомиллаштириш, давлат кадастрлари юритишни тартибга солиш чора-тадбирлари тўғрисида» 2017 йил 31 майдаги ПФ-5065-сон Фармони ва Ўзбекистон Республикаси Президентининг «Ўзбекистон Республикаси Ер ресурслари, геодезия, картография ва давлат кадастри давлат қўмитаси фаолиятини янада такомиллаштириш чора-тадбирлари тўғрисида» 2017 йил 31 майдаги ПҚ-3024-сон қарори)» 2017 йил 29 августдаги 679-сон қарорига илованинг 8-банди .

4. Вазирлар Маҳкамасининг «Ўзбекистон Республикаси Ҳукуматининг айрим қарорларига ўзгартиришлар киритиш тўғрисида (Ўзбекистон Республикаси Президентининг «Экология ва атроф-муҳитни муҳофаза қилиш соҳасида давлат бошқаруви тизимини такомиллаштириш тўғрисида» 2017 йил 21 апрелдаги ПФ-5024-сон Фармони ва Ўзбекистон Республикаси Президентининг «Ўзбекистон Республикаси Экология ва атроф-муҳитни муҳофаза қилиш давлат қўмитаси фаолиятини таъминлаш чора-тадбирлари тўғрисида» 2017 йил 21 апрелдаги ПҚ-2915-сон қарори)» 2017 йил 14 ноябрдаги 915-сон қарорига 1-илованинг 26-банди .

5. Вазирлар Маҳкамасининг «Ўзбекистон Республикаси Ҳукуматининг айрим қарорларига ўзгартиришлар киритиш тўғрисида (Ўзбекистон Республикаси Президентининг «Ўзбекистон Республикасининг давлат хавфсизлиги тизимини такомиллаштириш чора-тадбирлари тўғрисида» 2018 йил 14 мартдаги ПФ-5379-сон Фармони)» 2018 йил 29 майдаги 396-сон қарорига илованинг 34-банди .

7. Вазирлар Маҳкамасининг «Ўзбекистон Республикаси Ҳукуматининг айрим қарорларига ўзгартириш ва қўшимчалар киритиш тўғрисида («Ўзбекистон Республикасининг айрим қонун ҳужжатларига ер тўғрисидаги қонун ҳужжатларини такомиллаштиришга қаратилган ўзгартиш ва қўшимчалар киритиш ҳақида» 2018 йил 24 июлдаги ЎРҚ-487-сон Ўзбекистон Республикаси Қонуни)» 2019 йил 12 февралдаги 117-сон қарорига илованинг 1-банди .

Ўзбекистон Республикасининг Бош вазири А. АРИПОВ

Тошкент ш.,

2022 йил 14 апрель,

183-сон

(Қонунчилик маълумотлари миллий базаси, 15.04.2022 й., 09/22/183/0308-сон; 04.09.2025 й., 09/25/559/0802-сон; 16.12.2025 й., 09/25/791/1167-сон; 09.04.2026 й., 09/26/154/0331-сон)

lex.uz

Oʻzbekiston Respublikasi Vazirlar Mahkamasining

qarori

NIZOM

SXEMASI

SXEMASI

NIZOM

SXEMASI

ROʻYXATI

Davlat yer va kadastr nazoratini amalga oshirish tartibi hamda Davlat geodeziya nazoratini amalga oshirish tartibi toʻgʻrisidagi nizomlarni tasdiqlash haqida

Oʻzbekiston Respublikasi Yer kodeksining 83 1 va 84-moddalari , “Geodeziya va kartografiya faoliyati toʻgʻrisida”gi Oʻzbekiston Respublikasi Qonunining 12-moddasi , Oʻzbekiston Respublikasi Prezidentining “ Oʻzbekiston Respublikasi Davlat soliq qoʻmitasi huzuridagi Kadastr agentligi faoliyatini tashkil etish chora-tadbirlari toʻgʻrisida ” 2020-yil 7-sentabrdagi PQ-4819-son, “ Qishloq xoʻjaligiga moʻljallangan yerlardan foydalanish va muhofaza qilish tizimini takomillashtirishga doir qoʻshimcha chora-tadbirlar toʻgʻrisida ” 2021-yil 24-fevraldagi PQ-5006-son va “ Yer uchastkalaridan foydalanishda davlat nazorati samaradorligini oshirish chora-tadbirlari toʻgʻrisida ” 2022-yil 21-fevraldagi PQ-138-son qarorlari ijrosini taʼminlash maqsadida Vazirlar Mahkamasi qaror qiladi:

1. Quyidagilarni nazarda tutuvchi:

a) Davlat yer va kadastr nazoratini amalga oshirish tartibi toʻgʻrisidagi nizom 1-ilovaga muvofiq:

davlat yer nazoratini mahalliy davlat hokimiyati organlari va maxsus vakolatli davlat organlari (Iqtisodiyot va moliya vazirligi huzuridagi Kadastr agentligi, Vazirlar Mahkamasi huzuridagi Agrosanoat majmui ustidan nazorat qilish inspeksiyasi, Ekologiya, atrof-muhitni muhofaza qilish va iqlim oʻzgarishi vazirligi) tomonidan amalga oshirish tartibi;

davlat kadastr nazoratini Iqtisodiyot va moliya vazirligi huzuridagi Kadastr agentligi tomonidan amalga oshirish tartibi;

davlat yer va kadastr nazoratini amalga oshiruvchi maxsus vakolatli davlat organlarining vazifa va funksiyalari, ushbu organlar mansabdor shaxslari tarkibi, nazorat tadbirlari ishtirokchilari, ularning huquqlari va majburiyatlari, davlat yer va kadastr nazoratini tashkil etish va oʻtkazish tartibi;

yerga oid huquqbuzarliklarni aniqlashda jamoatchilik nazoratini amalga oshirish va jamoatchilik nazorati subyektlarini bazaviy hisoblash miqdorining bir baravari (jarima miqdoridan oshmagan) miqdoridagi pul mukofoti bilan ragʻbatlantirish tartibi;

davlat yer va kadastr nazorati natijasida huquqbuzarliklar aniqlangan taqdirda, aybdor shaxslarning javobgarligi masalasi;

b) Davlat geodeziya nazoratini amalga oshirish tartibi toʻgʻrisidagi nizom 2-ilovaga muvofiq tasdiqlansin:

davlat geodeziya nazoratini Iqtisodiyot va moliya vazirligi huzuridagi Kadastr agentligi (maxsus vakolatli davlat organi) tomonidan amalga oshirish tartibi;

geodeziya va kartografiya faoliyati subyektlari tomonidan geodeziya va kartografiya faoliyatiga oid qonunchilik hujjatlari talablariga rioya etilishini nazorat qilish, shuningdek, geodeziya va kartografiyaga oid ishlarni, geodeziya punktlarini roʻyxatdan oʻtkazish hamda hisobga olishni tashkil etish, davlat kartografiya-geodeziya fondining faoliyat yuritishini taʼminlashni davlat geodeziya nazoratining asosiy vazifalari etib belgilash;

davlat geodeziya nazoratini amalga oshiruvchi maxsus vakolatli davlat organining vazifa va funksiyalari, ushbu organ mansabdor shaxslari tarkibi, nazorat tadbirlari ishtirokchilari, ularning huquqlari va majburiyatlari, davlat geodeziya nazoratini tashkil etish va oʻtkazish tartibi;

davlat geodeziya nazorati natijasida huquqbuzarliklar aniqlangan taqdirda, aybdor shaxslarning javobgarligi masalasi.

1 1 . Oʻzbekiston Respublikasi Prezidentining “Yerga oid munosabatlarda korrupsiyaviy omillarni bartaraf etish mexanizmlarini yanada takomillashtirish boʻyicha qoʻshimcha chora-tadbirlar toʻgʻrisida” 2025-yil 18-sentabrdagi PQ-287-son qarori bilan quyidagilar:

davlat yer nazorati Vazirlar Mahkamasi huzuridagi Agrosanoat majmui ustidan nazorat qilish inspeksiyasi, Urbanizatsiya va uy-joy bozorini barqaror rivojlantirish milliy qoʻmitasi huzuridagi Kadastr agentligi, Ekologiya va iqlim oʻzgarishi milliy qoʻmitasi, Qurilish va uy-joy kommunal xoʻjaligi vazirligi, Qurilish va uy-joy kommunal xoʻjaligi sohasida nazorat qilish inspeksiyasi (keyingi oʻrinlarda — maxsus vakolatli davlat organlari) tomonidan amalga oshirilishi;

yer uchastkalaridan maqsadsiz va samarasiz foydalanish, yerlarni oʻzboshimchalik bilan egallash, oʻzboshimchalik bilan bino va inshootlarni qurish bilan bogʻliq huquqbuzarlik darajasiga qarab, ularni “qizil”, “sariq” va “yashil” toifalardagi hududlarga boʻlish belgilangani maʼlumot uchun qabul qilinsin.

1 2 . Belgilansinki, maxsus vakolatli davlat organlari tomonidan:

oʻtkaziladigan monitoring kuzatuvlarida yer uchastkalaridan maqsadsiz va samarasiz foydalanish, yerlarni oʻzboshimchalik bilan egallash hamda oʻzboshimchalik bilan bino va inshootlarni qurish boʻyicha aniqlangan holatlar belgilangan tartibda “E-YER NAZORAT” avtomatlashtirilgan axborot tizimiga kiritiladi hamda dastlabki maʼlumotlar tegishliligi boʻyicha maxsus vakolatli davlat organlariga yuboriladi. Bunda monitoring kuzatuvlari “qizil” toifadagi hududlarda har chorakda, “sariq” toifadagi hududlarda har olti oyda hamda “yashil” toifadagi hududlarda bir yilda bir marotaba oʻtkaziladi;

aniqlangan qonunbuzilishlarni bartaraf etish orqali yer uchastkalaridan maqsadsiz va samarasiz foydalanish, yerlarni oʻzboshimchalik bilan egallash hamda oʻzboshimchalik bilan bino va inshootlarni qurish holatlari darajasi har chorakda 15 foizdan kam boʻlmagan miqdorda tushirib boriladi.

2. Oʻzbekiston Respublikasi Hukumatining 3-ilovaga muvofiq ayrim qarorlari oʻz kuchini yoʻqotgan deb hisoblansin.

3. Oʻzbekiston Respublikasi Davlat soliq qoʻmitasi boshqa manfaatdor vazirliklar va idoralar bilan birgalikda oʻzlari qabul qilgan normativ-huquqiy hujjatlarni bir oy muddatda ushbu qarorga muvofiqlashtirsin.

4. Mazkur qarorning bajarilishini nazorat qilish Oʻzbekiston Respublikasi Bosh vazirining moliya-iqtisodiyot va kambagʻallikni qisqartirish masalalari boʻyicha oʻrinbosari — iqtisodiy taraqqiyot va kambagʻallikni qisqartirish vaziri J.A. Qoʻchqorov hamda Oʻzbekiston Respublikasi Davlat soliq qoʻmitasi raisi Sh.D. Kudbiyev zimmasiga yuklansin.

Vazirlar Mahkamasining 2022-yil 14-apreldagi 183-son qaroriga 1-ILOVA

Davlat yer va kadastr nazoratini amalga oshirish tartibi toʻgʻrisida

1-bob. Umumiy qoidalar

1. Mazkur Nizom davlat yer va kadastr nazoratini amalga oshirish tartibini belgilaydi.

2. Ushbu Nizomda quyidagi asosiy tushunchalar qoʻllaniladi:

davlat yer nazorati — yuridik va jismoniy shaxslar, respublika ijro etuvchi hokimiyat organlari, mahalliy davlat hokimiyati organlari tomonidan yer toʻgʻrisidagi qonunchilik talablariga rioya etilishini nazorat qilish maqsadida vakolatli organlar tomonidan amalga oshiriladigan harakatlar majmui;

davlat kadastr nazorati — yuridik va jismoniy shaxslar, respublika ijro etuvchi hokimiyat organlari, mahalliy davlat hokimiyati organlari tomonidan davlat kadastrlari toʻgʻrisidagi qonunchilik talablariga rioya etilishini nazorat qilish maqsadida vakolatli organlar tomonidan amalga oshiriladigan harakatlar majmui;

yer uchastkasi — yer fondining qayd etilgan chegaraga, maydonga, joylashish manziliga, huquqiy rejimga hamda davlat yer kadastrida aks ettiriladigan boshqa xususiyatlariga ega boʻlgan qismi;

elektron grafik imzo (keyingi oʻrinlarda — EGI) — elektron hujjatni zamonaviy axborot-kommunikatsiya texnologiyalaridan foydalangan holda planshet yoki kompyuterga oʻrnatilgan texnik qurilmalar yordamida tasdiqlaydigan elektron hujjatdagi shaxs tomonidan qoʻlda (yozma ravishda) amalga oshiriladigan grafikli imzo;

elektron raqamli imzo (keyingi oʻrinlarda — ERI) — elektron hujjatdagi mazkur elektron hujjat axborotini elektron raqamli imzoning yopiq kalitidan foydalangan holda maxsus oʻzgarishlar natijasida hosil qilingan hamda elektron raqamli imzoning ochiq kaliti yordamida elektron hujjatdagi axborotda xatolik mavjud emasligini aniqlash va elektron raqamli imzo kalitining egasini identifikatsiya qilish imkonini beradigan imzo;

oʻzboshimchalik bilan egallab olingan yer uchastkasi — fuqarolar, yakka tartibdagi tadbirkorlar va rezident boʻlgan yuridik shaxslar tomonidan yer uchastkasiga boʻlgan huquqlarni belgilovchi hujjatlarsiz, shu jumladan, bunday hujjatlar yoʻqolgan yoki toʻliq rasmiylashtirilmagan holda egallab kelinayotgan yoki ortiqcha egallangan yer uchastkasi;

oʻzboshimchalik bilan qurilgan imorat — qonunchilikda belgilangan tartibda qurilish maqsadlari uchun ajratilmagan yer uchastkalarida qurilgan uy-joy, boshqa bino va inshoot;

“E-YERNAZORAT” avtomatlashtirilgan axborot tizimi (keyingi oʻrinlarda — “E-YERNAZORAT” AAT) — yerga oid huquqbuzarliklarni aniqlash, hujjatlar toʻplamini shakllantirish va ularni oʻz vaqtida va obyektiv koʻrib chiqish maqsadida elektron hujjatlar almashinuvi, shuningdek huquqbuzarlik oqibatlarini bartaraf etishgacha boʻlgan holatlarni kuzatib borish imkoniga ega boʻlgan integratsiyalashtirilgan axborot tizimi.

3. Davlat yer va kadastr nazorati Oʻzbekiston Respublikasining butun hududida amalga oshiriladi.

4. Yuridik va jismoniy shaxslar, respublika ijro etuvchi hokimiyat organlari, mahalliy davlat hokimiyati organlari tomonidan yer toʻgʻrisidagi qonunchilik talablariga rioya etilishini taʼminlash davlat yer nazoratining asosiy vazifasi hisoblanadi.

5. Davlat kadastrlarini yuritishga masʼul boʻlgan vazirliklar, davlat qoʻmitalari, idoralar, mahalliy davlat hokimiyati organlari, shuningdek, yuridik va jismoniy shaxslar tomonidan davlat kadastrlari toʻgʻrisidagi qonunchilik talablariga rioya etilishini nazorat qilish davlat kadastr nazoratining asosiy vazifasi hisoblanadi.

6. Davlat yer va kadastr nazoratini amalga oshiradigan davlat organlari qonunbuzilishining oldini olish maqsadida yer va kadastr toʻgʻrisidagi qonunchilik talablari yuzasidan tushuntirish tadbirlarini amalga oshiradi.

2-bob. Davlat yer va kadastr nazoratini amalga oshiruvchi vakolatli organlar

7. Davlat yer nazorati mahalliy davlat hokimiyati organlari, shuningdek, maxsus vakolatli davlat organlari tomonidan ushbu Nizomga 1-ilovada keltirilgan sxemaga muvofiq amalga oshiriladi.

Mahalliy davlat hokimiyati organlari tomonidan davlat yer nazorati quyidagi shakllarda amalga oshiriladi:

yuqori turuvchi mahalliy davlat hokimiyati organlari tomonidan quyi turuvchi mahalliy davlat hokimiyati organlari faoliyatida yer toʻgʻrisidagi qonunchilik talablariga rioya etilishini nazorat qilish;

xalq deputatlari Kengashlari tomonidan mahalliy ijro hokimiyati organlari va ularga boʻysunuvchi davlat organlari faoliyatida yer toʻgʻrisidagi qonunchilik talablariga rioya etilishini nazorat qilish.

8. Quyidagilar davlat yer nazorati boʻyicha maxsus vakolatli davlat organlari hisoblanadi:

Vazirlar Mahkamasi huzuridagi Agrosanoat majmui ustidan nazorat qilish inspeksiyasi (keyingi oʻrinlarda — “Oʻzagroinspeksiya”) va uning hududiy organlari — qishloq xoʻjaligiga moʻljallangan yerlar toifasi boʻyicha;

Ekologiya va iqlim oʻzgarishi milliy qoʻmitasi (keyingi oʻrinlarda — Ekologiya qoʻmitasi) va uning hududiy organlari — muhofaza etiladigan tabiiy hududlar egallagan yerlar, ustuvor ravishda ekologik, ilmiy, madaniy, estetik, rekreatsiya va sanitariya-sogʻlomlashtirish maqsadlarida foydalaniladigan yerlar, oʻrmonlar, “Yashil makon” umummilliy loyihasi doirasida tashkil etilgan zonalar, tabiiy suv havzalari, xavfli chiqindilar koʻmilgan hamda saqlanayotgan maxsus ombor va chiqindi poligonlariga moʻljallangan yerlar boʻyicha;

Qurilish va uy-joy kommunal xoʻjaligi vazirligi va uning hududiy organlari — binolarni, inshootlarni yoki boshqa obyektlarni qurish, rekonstruksiya qilish va kapital taʼmirlashga taqiqlar (cheklovlar) belgilangan zonalarda ushbu ishlarni bajarish yoki aholi punktlarining tasdiqlangan bosh rejalariga, ularni rejalashtirish va qurish loyihalariga zid ravishda (bosh rejalarda nazarda tutilmagan) binolar va inshootlarni loyihalashtirish, rekonstruksiya qilish va qurish holatlari boʻyicha;

Vazirlar Mahkamasi huzuridagi Qurilish va uy-joy kommunal xoʻjaligi sohasida nazorat qilish inspeksiyasi (keyingi oʻrinlarda — Qurilish va kommunal xoʻjaligi inspeksiyasi) va uning hududiy organlari — koʻp kvartirali uylardagi joylarning mulkdorlariga doimiy foydalanish huquqi asosida ajratilgan koʻp kvartirali uyga tutash yer uchastkalari, Qurilish va kommunal xoʻjaligi inspeksiyasi ruxsatnomasi talab etiladigan qurilish obyektlari boʻyicha;

Urbanizatsiya va uy-joy bozorini barqaror rivojlantirish milliy qoʻmitasi huzuridagi Kadastr agentligi (keyingi oʻrinlarda — Kadastr agentligi) va uning hududiy organlari — qolgan barcha toifalar boʻyicha.

9. Kadastr agentligi davlat kadastr nazorati boʻyicha maxsus vakolatli davlat organi hisoblanadi.

3-bob. Davlat yer va kadastr nazoratini amalga oshiruvchi maxsus vakolatli davlat organlarining asosiy vazifalari va funksiyalari

10. Quyidagilar Kadastr agentligi organlarining davlat yer va kadastr nazoratini amalga oshirishdagi asosiy vazifalari hisoblanadi:

yer toifasidan qatʼi nazar, barcha turdagi yer uchastkalari hamda bino va inshootlarga boʻlgan huquqlarni davlat roʻyxatidan oʻtkazmaslik holatlarini aniqlash;

yer uchastkalarining oʻzboshimchalik bilan egallab olinishi va ushbu yer uchastkalarida oʻzboshimchalik bilan imorat qurilishini aniqlash;

yer uchastkasi chegaralarini oʻzboshimchalik bilan oʻzgartirishga yoʻl qoʻymaslik choralarini koʻrish;

yer uchastkalaridan maqsadsiz foydalanish holatlarini oʻz vaqtida aniqlash va chora koʻrish;

davlat kadastrlarini yuritish tartiblariga rioya qilinishini taʼminlashga qaratilgan davlat kadastr nazoratini amalga oshirish.

11. Kadastr agentligi organlari davlat yer va kadastr nazoratini amalga oshirishda oʻzlariga yuklangan asosiy vazifalarga muvofiq quyidagi funksiyalarni bajaradi:

yerlardan maqsadli foydalanish boʻyicha davlat nazoratini amalga oshiradi;

yer uchastkalariga boʻlgan huquqlarni davlat roʻyxatidan oʻtkazilishini taʼminlashga qaratilgan yer nazoratini amalga oshiradi;

yer uchastkalarini oʻzboshimchalik bilan egallab olinishiga yoʻl qoʻymaslikka qaratilgan samarali yer nazoratini amalga oshiradi;

yer uchastkasi chegaralarini (chegara nuqtalarini) oʻzboshimchalik bilan oʻzgartirishga yoʻl qoʻymaslik choralarini koʻradi;

aerokosmik suratlar va uchuvchisiz uchish apparatlaridan foydalangan holda yerlarni masofadan turib zondlashni, shuningdek, geodezik oʻlchov uskunalari yordamida yerlarni oʻrganishni tashkil etadi va amalga oshiradi;

koʻchmas mulkka boʻlgan huquqlar davlat roʻyxatidan oʻtkazilishini taʼminlashga qaratilgan samarali kadastr nazoratini tashkil etadi va amalga oshiradi;

kadastr yigʻmajildi (pasporti) belgilangan tartibda shakllantirilishi va rasmiylashtirilishini nazorat qiladi;

davlat kadastrlarini yuritish tartiblariga rioya qilinishini nazorat qiladi.

Kadastr agentligi organlari oʻz vakolatlari doirasida qonunchilik hujjatlariga muvofiq boshqa vazifa va funksiyalarni ham amalga oshirishlari mumkin.

12. “Oʻzagroinspeksiya” organlarining qishloq xoʻjaligiga moʻljallangan yerlarni muhofaza qilish boʻyicha davlat nazorati sohasidagi funksiyalari Vazirlar Mahkamasi tomonidan belgilanadi.

13. Ekologiya vazirligi organlarining yerlarni muhofaza qilish boʻyicha davlat nazorati sohasidagi funksiyalari Vazirlar Mahkamasi tomonidan belgilanadi.

4-bob. Davlat yer va kadastr nazoratini amalga oshiruvchi maxsus vakolatli davlat organlarining mansabdor shaxslari

14. Davlat yer va kadastr nazorati Kadastr agentligi, uning Qoraqalpogʻiston Respublikasi, viloyatlar va Toshkent shahar boshqarmalari, tumanlar (shaharlar) boʻlimlarining quyidagi mansabdor shaxslari tomonidan amalga oshiriladi:

Kadastr agentligi direktori — yer va kadastr nazorati boʻyicha Oʻzbekiston Respublikasining bosh davlat inspektori;

Kadastr agentligi direktori oʻrinbosari — yer va kadastr nazorati boʻyicha Oʻzbekiston Respublikasining bosh davlat inspektori oʻrinbosari;

Kadastr agentligining yer va kadastr nazoratiga masʼul boshqarmasi boshligʻi — yer va kadastr nazorati boʻyicha Oʻzbekiston Respublikasining katta davlat inspektori;

Kadastr agentligining Qoraqalpogʻiston Respublikasi, viloyatlar va Toshkent shahri boshqarmasi boshliqlari — yer va kadastr nazorati boʻyicha Qoraqalpogʻiston Respublikasi, viloyatlar va Toshkent shahrining bosh davlat inspektorlari;

Kadastr agentligining Qoraqalpogʻiston Respublikasi, viloyatlar va Toshkent shahri boshqarmasi boshligʻi oʻrinbosarlari — yer va kadastr nazorati boʻyicha Qoraqalpogʻiston Respublikasi, viloyatlar va Toshkent shahrining katta davlat inspektorlari;

Kadastr agentligining tuman (shahar) boʻlimi boshliqlari — yer va kadastr nazorati boʻyicha tuman (shahar) bosh davlat inspektorlari;

Kadastr agentligining yer va kadastr nazoratiga masʼul boshqarmasi boshligʻi oʻrinbosari, boʻlim boshliqlari va mutaxassislari, Qoraqalpogʻiston Respublikasi, viloyatlar va Toshkent shahar boshqarmasi yer va kadastr nazoratiga masʼul boʻlimi boshligʻi va mutaxassislari, tuman (shahar) boʻlimlarining bosh va yetakchi inspektorlari — yer va kadastr nazorati boʻyicha davlat inspektorlari.

15. Oʻzagroinspeksiya va Qoraqalpogʻiston Respublikasi Agrosanoat majmui ustidan nazorat qilish inspeksiyasi, viloyatlar boshqarmalari va tumanlar (Quvasoy shahar) boʻlimlarining mansabdor shaxslari qishloq xoʻjaligi yerlaridan foydalanish va uni muhofaza qilish ustidan davlat nazoratini amalga oshiruvchi mansabdor shaxslar hisoblanadi.

16. Ekologiya vazirligi va Qoraqalpogʻiston Respublikasi Ekologiya, atrof-muhitni muhofaza qilish va iqlim oʻzgarishi vazirligi, viloyatlar va Toshkent shahar Ekologiya, atrof-muhitni muhofaza qilish va iqlim oʻzgarishi boshqarmalari bosh davlat inspektorlari va ularning oʻrinbosarlari, katta davlat inspektorlari va davlat inspektorlari oʻz vakolatlariga muvofiq Ekologiya vazirligi organlarining yerlarni muhofaza qilish ustidan davlat nazoratini amalga oshiruvchi mansabdor shaxslari hisoblanadi.

17. Davlat yer va kadastr nazorati sohasida qonuniylikni taʼminlash yuzasidan maxsus vakolatli davlat organlarining oʻz vakolatlari doirasida qabul qilgan qarorlari respublika ijro etuvchi hokimiyat organlari, mahalliy davlat hokimiyati organlari, xoʻjalik birlashmalari, boshqa tashkilotlar va ularning mansabdor shaxslari, shu jumladan, yuridik va jismoniy shaxslar tomonidan bajarilishi majburiy hisoblanadi.

5-bob. Davlat yer va kadastr nazorati tadbirlari ishtirokchilari, ularning huquqlari va majburiyatlari

18. Davlat yer va kadastr nazoratini amalga oshiruvchi maxsus vakolatli davlat organlarining mansabdor shaxsi, davlat yer va kadastr nazorat tadbiri oʻtkazilayotgan yuridik shaxsning mansabdor shaxsi yoki uning vakili yoxud jismoniy shaxs nazorat tadbirining ishtirokchilari hisoblanadi.

19. Davlat yer va kadastr nazoratini amalga oshirishda maxsus vakolatli davlat organlarining mansabdor shaxslari oʻz vakolatlari doirasida quyidagi huquqlarga ega:

yuridik va jismoniy shaxslardan koʻchmas mulkka boʻlgan huquqlarni tasdiqlaydigan hujjatlarni talab qilish;

davlat yer va kadastr nazoratini amalga oshirish uchun zarur boʻlgan maʼlumotlarni respublika ijro etuvchi hokimiyat organlari, mahalliy davlat hokimiyati organlari, xoʻjalik birlashmalari hamda yuridik va jismoniy shaxslardan belgilangan tartibda soʻrab olish;

zarur hollarda, davlat yer va kadastr nazorati tadbirlarida yuzaga kelgan masalalarni tushuntirish uchun maxsus bilimlarga ega boʻlgan respublika ijro etuvchi hokimiyat organlari hamda boshqa tashkilotlarning mutaxassislarini belgilangan tartibda jalb qilish;

davlat yer va kadastr nazorati tadbirlari jarayonlarini foto va videotasvirga tushirish, shuningdek, uchuvchisiz uchish apparatlari (dronlar)dan belgilangan tartibda foydalanish, qonunchilik hujjatlarida taqiqlangan hollar bundan mustasno;

zarur hollarda, davlat yer va kadastr nazorati tadbirlarini oʻtkazish chogʻida yuridik va jismoniy shaxslar tomonidan foydalanilayotgan kadastr obyektlarini koʻzdan kechirish va nazorat oʻlchovlaridan oʻtkazish;

davlat yer va kadastr nazorati masalalarida yuridik va jismoniy shaxslardan zarur axborotlar, maʼlumotlar, tushuntirishlar olish;

davlat yer va kadastr nazorati tadbirlarini oʻtkazish chogʻida davlat organlari va boshqa tashkilotlar mansabdor shaxslarini, jismoniy shaxslarni maxsus vakolatli davlat organiga davlat yer va kadastr nazorati bilan bogʻliq masalalarda tushuntirishlar berishga chaqirish;

davlat yer va kadastr nazoratini amalga oshirishga toʻsqinlik qiladigan harakatlarning oldini olishda yoki ularni toʻxtatishda, shuningdek, yer toʻgʻrisidagi qonunchilikni buzganlikda aybdor shaxslarni aniqlashda ichki ishlar organlariga murojaat qilish;

davlat organlari va boshqa tashkilotlar mansabdor shaxslariga, shuningdek, jismoniy shaxslarga davlat yer va kadastr nazorati sohasida aniqlangan qonun buzilishlarini bartaraf etish haqida koʻrsatmalar berish;

kadastr obyektlariga oid hujjatlarning qalbaki yoki soxtaligi haqida shubha tugʻilgan hollarda, ularni haqiqiyligi yoki toʻgʻriligini aniqlash maqsadida olib qoʻyish.

Davlat yer va kadastr nazoratini amalga oshirishda maxsus vakolatli davlat organlarining mansabdor shaxslari qonunchilik hujjatlariga muvofiq boshqa huquqlarga ham ega boʻlishi mumkin.

20. Davlat yer va kadastr nazoratini amalga oshirishda maxsus vakolatli davlat organlarning mansabdor shaxslari quyidagilarga majbur:

davlat yer va kadastr nazorati amalga oshirilayotgan yuridik shaxsning mansabdor shaxsi yoki uning vakiliga yoxud jismoniy shaxsga oʻz xizmat guvohnomasini koʻrsatish;

yuridik shaxsning mansabdor shaxsi yoki uning vakilini yoxud jismoniy shaxsni davlat yer va kadastr nazorati maqsadi va uni amalga oshirish asoslari bilan tanishtirish;

yuridik va jismoniy shaxsning huquq va majburiyatlarini tushuntirish;

oʻtkazilgan davlat yer va kadastr nazorati natijalarini dalolatnoma bilan rasmiylashtirish hamda bir nusxasini yuridik shaxsning mansabdor shaxsi yoki uning vakiliga yoxud jismoniy shaxsga taqdim etish.

Maxsus vakolatli davlat organlari mansabdor shaxslarining zimmasida qonunchilik hujjatlariga muvofiq boshqa majburiyatlar ham boʻlishi mumkin.

21. Davlat yer va kadastr nazorati tadbiri oʻtkazilayotgan yuridik shaxsning mansabdor shaxsi (vakili) yoki jismoniy shaxs quyidagi huquqlarga ega:

maxsus vakolatli davlat organi mansabdor shaxslarining nazorat masalalariga aloqasi boʻlmagan talablarini bajarmaslik;

maxsus vakolatli davlat organlariga yer va kadastr toʻgʻrisidagi qonunchilik ijrosiga taalluqli masalalar boʻyicha tushuntirishlar berish;

maxsus vakolatli davlat organi mansabdor shaxsining ruxsati bilan ekspertiza oʻtkazishda ishtirok etish va ekspertga tushuntirishlar berish, ekspertning xulosasi bilan tanishish;

davlat yer va kadastr nazorati materiallari bilan tanishish va nazorat dalolatnomasini olish;

maxsus vakolatli davlat organi mansabdor shaxslarining noqonuniy xatti-harakatlari yuzasidan shikoyat qilish.

Davlat yer va kadastr nazorati oʻtkazilayotgan yuridik shaxsning mansabdor shaxsi yoki jismoniy shaxs qonunchilik hujjatlariga muvofiq boshqa huquqlarga ham ega boʻlishi mumkin.

22. Davlat yer va kadastr nazorat tadbiri oʻtkazilayotgan yuridik shaxsning mansabdor shaxsi (vakili) yoki jismoniy shaxsning majburiyatlari:

maxsus vakolatli davlat organlarining davlat yer va kadastr nazorati bilan bogʻliq qonuniy talablarini bajarish, ular mansabdor shaxslarining qonuniy faoliyatiga toʻsqinlik qilmaslik;

nazorat tadbirini oʻtkazayotgan maxsus vakolatli davlat organlarining mansabdor shaxslariga nazorat bilan bogʻliq, shu jumladan, elektron axborot jismlarida saqlanadigan hujjatlar va axborotni oʻrganish hamda tahlil qilish imkoniyatini taʼminlash;

nazorat tadbirini oʻtkazuvchi mansabdor shaxsning talabiga koʻra yer va kadastrga oid hujjatlarni taqdim etish.

Yuridik shaxsning mansabdor shaxsi yoki jismoniy shaxs oʻz zimmasiga qonunchilik hujjatlariga muvofiq boshqa majburiyatlarni ham olishi mumkin.

6-bob. Davlat yer nazoratini tashkil etish va oʻtkazish tartibi

1-§. Umumiy qoidalar

23. Davlat yer nazorati Oʻzbekiston Respublikasining butun hududida maxsus vakolatli davlat organlari tomonidan “E-YER NAZORAT” tizimida amalga oshiriladi. Bunda:

Kadastr agentligi “E-YER NAZORAT” tizimining sifatli va uzluksiz faoliyat koʻrsatishini hamda maxsus vakolatli davlat organlarining tizimdan samarali foydalanishlarini taʼminlash boʻyicha masʼul organ;

“Kompyuterlashtirish, geoaxborot texnologiyalarini joriy etish va rivojlantirish markazi” davlat muassasasi “E-YER NAZORAT” tizimining operatori hisoblanadi.

24. “E-YER NAZORAT” tizimi ijro intizomi idoralararo yagona elektron tizimi (edo.ijro.uz), “E-maʼmuriy ish”, “Adolat”, “E-material” axborot tizimlari, Ijro ishi yurituvlari yagona elektron bazasi bilan integratsiya qilinadi.

Aerokosmik monitoring qilish uchun zarur maʼlumotlar davlat yer nazoratini amalga oshiruvchi maxsus vakolatli davlat organlari tomonidan belgilangan tartibda Oʻzbekiston Respublikasi Raqamli texnologiyalar vazirligi huzuridagi Kosmik tadqiqotlar va texnologiyalar agentligiga (keyingi oʻrinlarda — “Oʻzbekkosmos” agentligi) begʻaraz taqdim etib boriladi.

25. Quyidagilar davlat yer nazoratini amalga oshirish uchun maʼlumotlar manbai hisoblanadi:

yer monitoringi jarayonida yer toʻgʻrisidagi qonunchilikning buzilishi kuzatilganda;

maxsus avtomatlashtirilgan axborot tizimi hamda aerokosmik suratlarni solishtirish orqali ehtimoliy yer toʻgʻrisidagi qonunchilikning buzilishi qayd etilganda;

jismoniy yoki yuridik shaxslarning yer toʻgʻrisidagi qonunchilik buzilishi holatlari haqidagi asoslangan murojaatlariga muvofiq;

ommaviy axborot vositalari yoki boshqa tashqi manbalarda (ijtimoiy tarmoqlar va veb-saytlarda) yerga oid huquqbuzarliklar toʻgʻrisidagi maʼlumotlar eʼlon qilinganda;

sud, huquqni muhofaza qiluvchi organlar, shuningdek, boshqa davlat organlari va tashkilotlaridan yerga oid huquqbuzarliklar toʻgʻrisida dalolat beruvchi axborot kelib tushganda;

oʻzboshimchalik bilan egallab olingan yer uchastkalariga hamda ularda qurilgan binolar va inshootlarga boʻlgan huquqlarni eʼtirof etish jarayonida rad etilgan obyektlar “Eʼtirof” axborot tizimi orqali maʼlumot kelib tushganda.

Davlat yer nazoratini amalga oshiruvchi maxsus vakolatli davlat organlari yerga oid qonunbuzilish holatlarining oldini olish maqsadida yer toʻgʻrisidagi qonunchilik talablari yuzasidan doimiy ravishda tushuntirish tadbirlarini amalga oshiradi.

2-§. Yerga oid qonunbuzilish holatlarini davlat kosmik monitoring natijalarini qayta ishlash orqali aniqlash hamda maʼlumotlarni “E-YER NAZORAT” tizimi orqali maxsus vakolatli davlat organlariga elektron shaklda manzilli yuborish tartibi

26. “Oʻzbekkosmos” agentligi:

davlat kosmik monitoring qilish boʻyicha tasdiqlangan loyihalar doirasida yer uchastkalaridan maqsadsiz va samarasiz foydalanish, yerlarni oʻzboshimchalik bilan egallash, bunday yerlarda ehtimoliy noqonuniy qurilmalar qurish holatlarini bir yilda ikki marotaba aerokosmik monitoring orqali aniqlaydi. Zaruratga koʻra, manfaatdor vazirlik va idoralarning budjetdan tashqari mablagʻlari hisobidan qoʻshimcha aerokosmik monitoring oʻtkazilishi mumkin;

amalga oshirilgan kosmik monitoring natijalarida aniqlangan yer uchastkalaridan maqsadsiz va samarasiz foydalanish, yerlarni oʻzboshimchalik bilan egallash hamda oʻzboshimchalik bilan bino va inshootlarni qurish ehtimoli yuqori boʻlgan holatlarga oid dastlabki maʼlumotlarni “E-YER NAZORAT” tizimi orqali maxsus vakolatli davlat organlariga elektron shaklda manzilli taqdim etib boradi.

27. “Oʻzbekkosmos” agentligi tomonidan yuborilgan yerga oid qonunbuzilish ehtimoli yuqori boʻlgan holatlarga oid dastlabki maʼlumotlar tegishli maxsus vakolatli davlat organining “E-YER NAZORAT” tizimidagi kabinetiga avtomatik tarzda taqsimlanadi.

28. Maxsus vakolatli davlat organlari kelib tushgan maʼlumotlarni belgilangan tartibda oʻrganib chiqadi hamda oʻz vakolatlari doirasida tegishli choralarni koʻradi.

“E-YER NAZORAT” tizimiga kelib tushgan maʼlumotlarning maxsus vakolatli davlat organlari tomonidan asossiz ravishda qaytarilishiga yoʻl qoʻyilmaydi.

3-§. Maxsus vakolatli davlat organlari tomonidan “E-YER NAZORAT” tizimida yerga oid qonunbuzilish holatlari toʻgʻrisidagi ishlarni yuritish, davlat yer nazorati hujjatlarini rasmiylashtirish, koʻrib chiqish va qaror qabul qilish yoki “E-YER NAZORAT” tizimi orqali huquqbuzarliklarni koʻrib chiqish vakolatiga ega organga yuborish tartibi

29. Maxsus vakolatli davlat organlari tomonidan yerga oid huquqbuzarliklarni aniqlash, hujjatlar toʻplamini shakllantirish, ularni oʻz vaqtida va xolisona koʻrib chiqish maqsadida elektron hujjatlar almashinuvi “E-YER NAZORAT” tizimidan foydalanilgan holda amalga oshiriladi.

Yer toʻgʻrisidagi qonunchilik hujjatlari buzilishi kuzatilganda, maxsus vakolatli davlat organi rahbarining (rahbar oʻrinbosarining) “E-YER NAZORAT” tizimida elektron tarzda shakllantirilib, davlat yer nazoratini amalga oshirish toʻgʻrisidagi tasdiqlangan buyrugʻiga asosan oʻn ish kunidan koʻp boʻlmagan muddatda davlat yer nazorati amalga oshiriladi.

Davlat yer nazoratini amalga oshirish toʻgʻrisidagi buyruqda yuridik shaxsning nomi yoki jismoniy shaxsning familiyasi, ismi, otasining ismi, nazorat amalga oshiriladigan yer uchastkasi joylashgan manzil, nazoratni amalga oshiruvchi mansabdor shaxslarning familiyasi, ismi, otasining ismi hamda lavozimi, nazoratni amalga oshirish muddati va maqsadlari koʻrsatiladi, ushbu bandning toʻrtinchi xatboshisi bundan mustasno.

Yer uchastkalarini oʻzboshimchalik bilan egallab olish, ushbu yer uchastkalarida oʻzboshimchalik bilan imorat qurish bilan bogʻliq davlat yer nazoratini amalga oshirish toʻgʻrisidagi buyruqda yuridik va jismoniy shaxslarning nomi koʻrsatilmaydi.

Davlat yer nazoratini amalga oshirish toʻgʻrisidagi buyruqqa nazorat obyektining WGS-84 koordinatalar tizimidagi geolokatsiyasi ilova qilinishi lozim.

Davlat yer nazoratini amalga oshirish toʻgʻrisidagi buyruqda koʻrsatilgan sana ushbu nazoratni amalga oshirish muddatining boshlanishi hisoblanadi.

30. Agar davlat yer nazoratida maxsus vakolatli davlat organining ikki yoki undan ortiq nazoratchi mansabdor shaxslari qatnashganda, davlat yer nazoratini amalga oshirish toʻgʻrisidagi buyruqda familiyasi birinchi koʻrsatilgan mansabdor shaxs nazorat jarayonini boshqarish va natijalarini umumlashtirishga javobgar shaxs hisoblanadi.

Maxsus vakolatli davlat organlarining mansabdor shaxslari davlat yer nazorati tadbirlarida oʻz vakolatlari doirasidan chetga chiqmasligi hamda nazorat predmetiga aloqador boʻlmagan hujjatlarni (axborotni) talab qilmasligi lozim.

31. Yerga oid hujjatlarning qalbaki yoki soxtaligi haqida shubha paydo boʻlgan hollarda, davlat yer nazoratini amalga oshirayotgan maxsus vakolatli davlat organining mansabdor shaxsi tomonidan ularning haqiqiyligi yoki toʻgʻriligiga aniqlik kiritish maqsadida olib qoʻyilishi mumkin.

Bunda hujjatlarni olib qoʻyish toʻgʻrisida maxsus vakolatli davlat organining mansabdor shaxsi tomonidan bayonnoma tuziladi va unda quyidagilar koʻrsatiladi:

bayonnoma tuzilgan vaqti va joyi;

bayonnomani tuzgan shaxsning lavozimi, familiyasi, ismi, otasining ismi;

hujjatlari olib qoʻyilgan shaxs toʻgʻrisidagi maʼlumotlar (yuridik shaxs nomi, uning mansabdor shaxsi yoki hujjatlarni olib qoʻyishda ishtirok etgan vakili yoxud jismoniy shaxsning familiyasi, ismi, otasining ismi, manzili va shu kabilar);

hujjatlarni olib qoʻyishda ishtirok etgan shaxslar toʻgʻrisidagi maʼlumotlar (agar ular boʻlsa);

olib qoʻyilayotgan hujjatning nomi (mazmuni), sanasi, raqami, uni qabul qilgan (rasmiylashtirgan) organ, tashkilot nomi hamda hujjatning varaqlari soni.

Hujjatlarni olib qoʻyish toʻgʻrisidagi bayonnoma planshet yoki kompyuter yordamida “E-YER NAZORAT” tizimi orqali elektron tarzda rasmiylashtiriladi.

Ushbu bayonnoma yuridik shaxsning mansabdor shaxsi yoki uning vakili yoxud jismoniy shaxs tomonidan imzolarni identifikatsiya qilishning tegishli vositalari (daktiloskopiya (barmoq izi), yoki ERI) bilan tasdiqlangandan soʻng, bayonnoma ushbu shaxslarga elektron aloqa vositasi yoki pochta xizmati orqali yuboriladi.

Yuridik shaxsning mansabdor shaxsi yoki uning vakili yoxud jismoniy shaxs hujjatlarni olib qoʻyish toʻgʻrisidagi bayonnomani imzolashdan bosh tortgan hollarda, bu haqida bayonnomaga tegishli yozuv kiritiladi va bayonnoma ushbu shaxslarga elektron aloqa vositasi yoki pochta xizmati orqali yuboriladi.

32. Davlat yer nazorati doirasidagi harakatlarni yuridik yoki jismoniy shaxs roʻyxatdan oʻtgan yoki faoliyat yuritayotgan yoxud nazorat tadbiri oʻtkazilayotgan joyning oʻzida rasmiylashtirish imkoni boʻlmasa, ushbu harakatlar fuqarolarning oʻzini oʻzi boshqarish organlarining yoki maxsus vakolatli davlat organining binosida planshet va kompyuter yordamida rasmiylashtirilishi mumkin.

Maxsus vakolatli davlat organining mansabdor shaxslari tomonidan davlat yer nazorati natijalari boʻyicha “E-YER NAZORAT” tizimida quyidagilarni ilova qilgan holda elektron tarzda dalolatnoma tuziladi:

nazorat tadbiri oʻtkazilgan joy, dalolatnoma tuzilgan sana;

nazorat tadbiri oʻtkazish uchun asos;

nazorat tadbirini oʻtkazgan mansabdor shaxslarning familiyasi, ismi, otasining ismi;

yuridik shaxsning nomi yoki jismoniy shaxsning familiyasi, ismi, otasining ismi, ularning manzili va soliq toʻlovchining identifikatsiya raqami (STIR), jismoniy shaxsning shaxsiy identifikatsiya raqami (JSHSHIR);

davlat yer nazorati sohasida huquqbuzarlik sodir etilgan joyning aniq manzili, WGS-84 koordinatalar katalogi, holati va hajmi, shuningdek, yer toʻgʻrisidagi qonunchilik hujjatlarining tegishli normasiga havola etilgan holdagi batafsil tavsifi;

yerga oid huquqbuzarlik oqibatlarini qonunchilik hujjatlarida belgilangan muddatlarda ixtiyoriy ravishda bartaraf etish toʻgʻrisida koʻrsatma.

Dalolatnomaga maxsus vakolatli davlat organi mansabdor shaxsi tomonidan yer nazorati tadbirida olingan fotosuratlar, videoyozuvlar va boshqa materiallar ilova qilinadi.

Ushbu dalolatnoma yuridik shaxsning mansabdor shaxsi yoki uning vakili yoxud jismoniy shaxs tomonidan imzolarni identifikatsiya qilishning tegishli vositalari (daktiloskopiya (barmoq izi) yoki ERI) bilan tasdiqlagandan soʻng, dalolatnoma ushbu shaxslarga elektron aloqa vositalari va pochta xizmati orqali yuboriladi.

Yuridik shaxsning mansabdor shaxsi yoki uning vakili yoxud jismoniy shaxs dalolatnomani imzolashdan bosh tortgan hollarda, bu haqida dalolatnomaga tegishli yozuv kiritiladi va dalolatnoma ushbu shaxslarga uch ish kunidan kechiktirmasdan elektron aloqa vositalari hamda pochta xizmati orqali yuboriladi.

Dalolatnoma yuridik yoki jismoniy shaxsga topshirilgan kun yoki unga yuborilgan kun davlat yer nazorati tadbiri yakunlangan vaqt deb hisoblanadi.

Davlat yer nazorati dalolatnomasini qogʻoz shaklida rasmiylashtirish zarurati yuzaga kelganda, ushbu dalolatnoma belgilangan tartibda davlat yer nazorati tadbiri tugallangan kundan eʼtiboran keyingi ish kunidan kechiktirmasdan “E-YER NAZORAT” tizimiga elektron shaklda kiritiladi.

Yer toʻgʻrisidagi qonunchilik talablarini buzganlik uchun yuridik shaxsning mansabdor shaxsi yoki jismoniy shaxs maʼmuriy javobgarlikka tortilishi lozim boʻlsa, maxsus vakolatli davlat organlarining yer nazoratini amalga oshirgan mansabdor shaxsi aniqlangan huquqbuzarliklar yuzasidan Oʻzbekiston Respublikasi Maʼmuriy javobgarlik toʻgʻrisidagi kodeksiga muvofiq oʻz vakolatlari doirasida maʼmuriy huquqbuzarlik toʻgʻrisida bayonnoma tuzadi.

Aniqlangan huquqbuzarliklar vakolat doirasiga tegishli boʻlmagan hollarda nazorat qiluvchi organ besh kun muddatda mazkur huquqbuzarliklarni koʻrib chiqish vakolatiga ega organga yuborilayotganligi toʻgʻrisida maʼlumotni kiritgan holda “E-YER NAZORAT” tizimi orqali huquqbuzarliklarni koʻrib chiqish vakolatiga ega organga yuboradi.

4-§. Yerga oid qonunbuzilish holatlarini aniqlash va ular yuzasidan oʻtkazilgan davlat yer nazorati tadbirlari toʻgʻrisidagi maʼlumotlarni toʻplash, saqlash va tahlil qilish qoidalari

33. Yerga oid qonunbuzilish holatlarini aniqlash va ular yuzasidan oʻtkazilgan davlat yer nazorati tadbirlari toʻgʻrisidagi maʼlumotlar (yozma koʻrsatma, maʼmuriy huquqbuzarlik toʻgʻrisidagi bayonnoma, jarimalarni qoʻllash toʻgʻrisidagi qarorlar va sud qarorlari) bevosita “E-YER NAZORAT” tizimining maxsus va oʻzgarmas ID-raqam bilan shakllantiriladi va toʻplanadi.

“E-YER NAZORAT” tizimining “Huquqbuzarlikni joyiga chiqib oʻrganish” boʻlimida rasmiylashtirilgan buyruq, huquqbuzar toʻgʻrisidagi maʼlumotlar, noqonuniy qurilma rasmlari, huquqbuzarning tushuntirish xati va rasmiylashtirilgan dalolatnoma va boshqa hujjatlar shakllantiriladi va toʻplanadi.

33 1 . Huquqbuzarlik boʻyicha rasmiylashtirilgan maʼmuriy bayonnoma va qabul qilingan maʼmuriy jazo qoʻllash haqidagi qaror Maʼmuriy huquqbuzarliklar toʻgʻrisida yagona elektron ish yurituv tizimida (“E-maʼmuriy ish”) shakllantiriladi hamda integratsiya qilish orqali “E-YER NAZORAT” tizimining “Chora koʻrish” boʻlimida toʻplanadi.

33 2 . Oʻzboshimchalik bilan egallangan yer maydonlarini majburiy tartibda boʻshatish hamda noqonuniy qurilmalarni buzdirish boʻyicha fuqarolik va iqtisodiy sudlarga kiritilgan daʼvo arizalari, shuningdek, fuqarolik va iqtisodiy sudlar tomonidan koʻrib chiqish tamomlanib, qonuniy kuchga kirgan sud qarorlari “E-YER NAZORAT” tizimi va “Adolat” axborot tizimining integratsiyasi orqali “E-YER NAZORAT” tizimida avtomatik shakllantiriladi va toʻplanadi.

33 3 . Yerga oid qonunbuzilish holatlari boʻyicha Qoraqalpogʻiston Respublikasi, viloyatlar va Toshkent shahri, tuman, shaharlar boʻyicha hisobot jadvallari “E-YER NAZORAT” tizimida mavjud maʼlumotlar asosida shakllantiriladi.

Bunda huquqbuzarlik sodir etilgan tuman (shahar)lar, MFY, manzili, huquqbuzar shaxsning familiyasi, ismi, otasining ismi, identifikatsiyalovchi ID-kartasi (pasport) maʼlumotlari, ijrochi inspektor, rasmiylashtirilgan dalolatnomaning sanasi, huquqbuzarlik boʻyicha rasmiylashtirilgan elektron bayonnoma va qabul qilingan qaror sanasi, sud organlariga kiritilgan daʼvo arizalari sanasi, maʼmuriy jarima qoʻllash toʻgʻrisidagi bayonnoma, qaror, vakolat doirasida boshqa idoralarga yuborilgan holatlar, Oʻzbekiston Respublikasi Bosh prokuraturasi huzuridagi Majburiy ijro byurosiga yuborilgan maʼmuriy ishlar maʼlumotlaridan foydalaniladi.

Aniqlangan har bir huquqbuzarlik boʻyicha amalga oshirilgan ishlarni tuman (shahar) darajasidan respublika darajasigacha boʻlgan vertikal nazorat va tahlil qilish imkoniyati yaratiladi.

33 4 . Yerga oid qonunbuzilish holatlarini aniqlash va ular yuzasidan oʻtkazilgan davlat yer nazorati tadbirlari toʻgʻrisidagi “E-YER NAZORAT” tizimida shakllantirilgan hujjatlar va maʼlumotlar “E-YER NAZORAT” tizimida saqlanadi.

Bunda qogʻoz shaklidagi maʼlumotlar maxsus vakolatli davlat organlarida, ularning elektron nusxalari “E-YER NAZORAT” tizimida saqlanadi.

33 5 . Maxsus vakolatli davlat organiga hamda Oʻzbekiston Respublikasi Bosh prokuraturasiga tegishliligiga koʻra “E-YER NAZORAT” tizimida saqlanayotgan hujjatlar va maʼlumotlarni koʻrish va tahlil qilish imkoniyati yaratiladi.

33 6 . “E-YER NAZORAT” tizimida yerga oid huquqbuzarliklar toʻgʻrisidagi maʼlumotlarni oʻz vaqtida kiritish va huquqbuzarlikka oid ishlarni koʻrib chiqish natijalari toʻgʻrisida maʼlumotlarni joylashtirish uchun Kadastr agentligi va axborot tizimlari “E-YER NAZORAT” tizimiga integratsiya qilinadigan vakolatli davlat organlari masʼul hisoblanadi.

5-§. Davlat yer nazorati toʻgʻrisidagi maʼlumotlarning yagona markazlashtirilgan elektron tizimini yuritish tartibi

34. “E-YER NAZORAT” tizimini yuritishda davlat yer nazorati toʻgʻrisidagi ishlar boʻyicha guvoh, jabrlanuvchi, xolis va huquqbuzar ularning elektron raqamli imzosidan (barmoq izi yoki grafik imzo) foydalangan holda identifikatsiya qilinadi hamda ishni koʻrib chiqayotgan maxsus vakolatli davlat organlarining mansabdor shaxslari tomonidan nazorat tadbiri natijasi toʻgʻrisidagi ishlar va ishga taalluqli hujjatlar QR-kod bilan tasdiqlanadi.

34 1 . Kadastr agentligi tomonidan davlat yer nazorati toʻgʻrisidagi ishlar boʻyicha elektron shakldagi maʼlumotlar arxivi (ish hujjatlarining elektron shakli) qonunchilik hujjatlarida belgilangan muddatlarda saqlanadi.

34 2 . Maxsus vakolatli davlat organlari tomonidan yer qonunchiligiga rioya qilmaslik, jumladan, yerlardan maqsadsiz va samarasiz foydalanish, yerlarni oʻzboshimchalik bilan egallash hamda oʻzboshimchalik bilan bino va inshootlarni qurish holatlarini barvaqt aniqlash, ularga tegishli choralar koʻrish doirasida aniqlangan huquqbuzarliklar boʻyicha undirilgan jarimalarning ikki foizi “E-YER NAZORAT” tizimi operatoriga yoʻnaltiriladi.

34 3 . “E-YER NAZORAT” tizimidagi maʼlumotlar maxsus vakolatli davlat organlarining mansabdor shaxslari foydalanadigan maʼlumotlar hisoblanadi hamda mazkur mansabdor shaxslar “E-YER NAZORAT” tizimidagi maʼlumotlar bilan faqat qonunchilik hujjatlari asosida zimmasiga yuklangan vazifalarni amalga oshirish uchun tanishishi va foydalanishi mumkin.

6-§. Yer uchastkalaridan maqsadsiz va samarasiz foydalanish, yerlarni oʻzboshimchalik bilan egallash, oʻzboshimchalik bilan bino va inshootlarni qurish bilan bogʻliq huquqbuzarliklar darajasiga qarab hududlarni toifalarga ajratish mezonlari

35. Yer uchastkalaridan maqsadsiz va samarasiz foydalanish, yerlarni oʻzboshimchalik bilan egallash, oʻzboshimchalik bilan bino va inshootlarni qurish bilan bogʻliq huquqbuzarlik darajasiga qarab tuman (shahar)lar quyidagicha hududlarga boʻlinadi:

“qizil” toifadagi hudud — yer uchastkalaridan maqsadsiz va samarasiz foydalanish, yerlarni oʻzboshimchalik bilan egallash hamda oʻzboshimchalik bilan bino va inshootlarni qurish ehtimoli yuqori hududlar;

“sariq” toifadagi hudud — yer uchastkalaridan maqsadsiz va samarasiz foydalanish, yerlarni oʻzboshimchalik bilan egallash hamda oʻzboshimchalik bilan bino va inshootlarni qurish ehtimoli oʻrta hududlar;

“yashil” toifadagi hudud — yer uchastkalaridan maqsadsiz va samarasiz foydalanish, yerlarni oʻzboshimchalik bilan egallash hamda oʻzboshimchalik bilan bino va inshootlarni qurish ehtimoli past hududlar.

35 1 . Tuman (shahar)lar davlat yer nazoratini amalga oshirish uchun maʼlumotlar manbalari orqali taqdim etib boriladigan maʼlumotlar asosida har chorak yakuni bilan toifalarga boʻlinadi.

Yigʻilgan maʼlumotlar manbalari orqali yer uchastkalaridan maqsadsiz va samarasiz foydalanish, yerlarni oʻzboshimchalik bilan egallash, oʻzboshimchalik bilan bino va inshootlarni qurish bilan bogʻliq huquqbuzarlik soni eng koʻp boʻlgan tuman (shahar) aniqlanadi.

Bunda ushbu hududda aniqlangan huquqbuzarliklarning umumiy sonidan:

75 foiz va undan oshgan tuman (shahar) — “qizil” toifadagi hudud;

50 foizdan 75 foizgacha boʻlgan tuman (shahar) — “sariq” toifadagi hudud;

50 foiz va undan kam boʻlgan tuman (shahar) — “yashil” toifadagi hudud deb belgilanadi.

35 2 . “Qizil” toifadagi hududlarda har chorakda kamida bir marotaba maxsus uchuvchisiz uchish apparatlaridan foydalangan holda, “sariq” toifadagi hududlarda har olti oyda kamida bir marotaba maxsus samolyot yordamida monitoring kuzatuvlari oʻtkaziladi.

Yer uchastkalaridan maqsadsiz va samarasiz foydalanish, yerlarni oʻzboshimchalik bilan egallash va oʻzboshimchalik bilan bino va inshootlarni qurish holatlarini aniqlagan davlat organi tomonidan oʻz vakolati doirasida chora koʻriladi yoki aniqlangan maʼlumotlar tegishliligi boʻyicha “E-YER NAZORAT” tizimi orqali maxsus vakolatli davlat organlariga chora koʻrish uchun yuboriladi.

Aniqlangan yerga oid qonunbuzilish holatlari bartaraf etilgunga qadar maxsus vakolatli davlat organlarining davlat yer nazorati yoʻnalishidagi asosiy kuch va vositalari safarbar etiladi.

7-bob. Davlat kadastr nazoratini amalga oshirish tartibi

36. Davlat kadastr nazorati “Davlat kadastrlari toʻgʻrisida”gi Oʻzbekiston Respublikasining Qonuni va boshqa qonunchilik hujjatlariga muvofiq Kadastr agentligi organlari tomonidan amalga oshiriladi.

37. Davlat kadastr nazorati davlat kadastrlarini yuritishga masʼul boʻlgan vazirliklar, davlat qoʻmitalari, idoralar va mahalliy davlat hokimiyati organlari tomonidan Davlat kadastrlari yagona tizimiga kiritish uchun tegishli axborot taqdim etish, shuningdek, yuridik va jismoniy shaxslar tomonidan davlat kadastrlarini yuritishga oid qonunchilik hujjatlari talablariga rioya etilishini nazorat qilishdan iborat.

38. Koʻchmas mulkka boʻlgan huquqlarni davlat roʻyxatidan oʻtkazishni amalga oshiruvchi organlarga koʻchmas mulkka boʻlgan huquqni roʻyxatdan oʻtkazish uchun oʻz vaqtida murojaat etmaslik bilan bogʻliq kadastr nazoratida “Kadastr va koʻchmas mulkni roʻyxatdan oʻtkazish integratsion axborot tizimi” maʼlumotlaridan foydalaniladi.

39. Davlat kadastrlarini yuritish va koʻchmas mulkka boʻlgan huquqni roʻyxatdan oʻtkazish uchun oʻz vaqtida murojaat etmaslik bilan bogʻliq maʼmuriy huquqbuzarlik aniqlanganda, maʼmuriy huquqbuzarlik toʻgʻrisidagi bayonnoma tuzish va ishni koʻrib chiqish hamda maʼmuriy huquqbuzarliklar boʻyicha ishlarni yuritish Oʻzbekiston Respublikasi Maʼmuriy javobgarlik toʻgʻrisidagi kodeksiga muvofiq amalga oshiriladi.

8-bob. Davlat yer va kadastr nazoratini amalga oshiruvchi organlarning oʻzaro hamkorligi

40. Maxsus vakolatli davlat organlari tomonidan ularning zimmalariga yuklatilgan vazifalar respublika ijro etuvchi hokimiyat organlari, mahalliy davlat hokimiyati organlari, fuqarolarning oʻzini oʻzi boshqarish organlari, huquqni muhofaza qiluvchi organlar va boshqa tashkilotlar bilan oʻzaro hamkorlikda amalga oshiriladi.

Respublika ijro etuvchi hokimiyat organlari, mahalliy davlat hokimiyati organlari, fuqarolarning oʻzini oʻzi boshqarish organlari, huquqni muhofaza qiluvchi organlar hamda yer egalari, yerdan foydalanuvchilar va ijarachilar yer toʻgʻrisidagi va kadastr toʻgʻrisidagi qonunchilikka rioya etilishi ustidan davlat nazoratini amalga oshirish hamda yerga oid huquqbuzarliklarga barham berishda maxsus vakolatli davlat organlariga koʻmaklashishlari shart.

41. Maxsus vakolatli davlat organlari, mahalliy davlat hokimiyati organlari, huquqni muhofaza qiluvchi organlar yerga oid huquqbuzarliklar toʻgʻrisida bir-birini xabardor qiladi, shu jumladan, idoralararo elektron hamkorlik qilishdan foydalangan holda xabardor qiladi, shuningdek, oʻz zimmalariga yuklatilgan vazifalarni bajarish maqsadida boshqa axborotlar bilan almashishni amalga oshiradi.

42. Koʻchmas mulk obyektiga boʻlgan huquqlarni davlat roʻyxatidan oʻtkazuvchi organlar, kadastr muhandislari va fuqarolarning oʻzini oʻzi boshqarish organlari oʻzlariga oshkor boʻlgan yer toʻgʻrisidagi qonunchilikning buzilishi, shu jumladan, yer uchastkalarini oʻzboshimchalik bilan egallab olish, koʻchmas mulkka boʻlgan huquqlarni tasdiqlovchi hujjatlarni qalbakilashtirish holatlari toʻgʻrisida tegishli maxsus vakolatli davlat organini zudlik bilan xabardor qiladi.

43. Davlat yer va kadastr nazoratini amalga oshirishga toʻsqinlik qiladigan harakatlarning oldini olish yoki ularni toʻxtatish yoxud yer uchastkalarini oʻzboshimchalik bilan egallagan shaxslarni aniqlash va ushlab keltirish boʻyicha tezkor harakatlar ichki ishlar organlari tomonidan amalga oshiriladi.

9-bob. Yerga oid huquqbuzarliklarni aniqlashda jamoatchilik nazorati va jamoatchilik nazorati subyektlarini ragʻbatlantirish tartibi

44. Jamoatchilik nazorati subyektlari yerlardan foydalanish hamda ularni muhofaza qilish ustidan jamoatchilik nazoratini oʻz vakolatlari doirasida amalga oshiradilar.

Jamoatchilik nazorati subyektlari maxsus vakolatli davlat organiga yerga oid huquqbuzarliklar toʻgʻrisida fotosuratlar, videoyozuvlarni ilova qilgan holda axborot tizimi orqali arizalar va shikoyatlar bilan murojaat qilishi mumkin.

Yerlarni oʻzboshimchalik bilan egallab olish holatlari toʻgʻrisida maʼlumot bergan shaxslar, ularning bergan maʼlumotlari asosida huquqbuzardan undirilgan jarima hisobidan mazkur Nizomga 2-ilovaga muvofiq bazaviy hisoblash miqdorining bir baravari (jarima miqdoridan oshmagan) miqdoridagi pul mukofoti bilan ragʻbatlantiriladi.

45. Jamoatchilik nazorati subyektlari tomonidan maxsus vakolatli davlat organiga taqdim qilingan yerga oid huquqbuzarliklar toʻgʻrisidagi videoyozuvlarda sodir etilgan huquqbuzarlik holati, huquqbuzar shaxs toʻgʻrisidagi maʼlumotlar aniq aks ettirilishi hamda quyidagi talablarga mos boʻlishi kerak:

videofaylning namoyish etish imkoniyati 720x480 pikseldan kam boʻlmasligi;

videoyozuv davomiyligi 30 sekunddan kam boʻlmasligi va 10 daqiqadan oshmasligi;

videoyozuv maʼlumotlarida sana va vaqt koʻrsatilishi.

46. Huquqbuzarlik holati aks ettirilgan videoyozuvlarga har qanday tarzda oʻzgartirishlar kiritish taqiqlanadi. Oʻzgartirish kiritilgan videoyozuvlar koʻrib chiqilmaydi, hajmini qisqartirish maqsadida videoyozuvning bevosita huquqbuzarlik holati aks ettirilgan qismini kesib olish bundan mustasno.

47. Huquqbuzarlik holati aks ettirilgan videoyozuvlarni axborot tizimi orqali yuborishda quyidagilar toʻliq koʻrsatilishi lozim:

fuqaroning ismi, familiyasi, otasining ismi, doimiy yashash manzili, yuridik shaxsning nomi, joylashgan yeri (pochta manzili), bank hisobvaragʻi (videoyozuv yuridik shaxs vakili nomidan toʻldirilganda);

uyali telefon raqami yoki bank plastik kartasi raqami va elektron manzili;

huquqbuzarlik sodir etilgan joy, sana va vaqt.

48. Axborot tizimiga kelib tushgan huquqbuzarlik holatlari qayd etilgan videoyozuvlar maxsus vakolatli davlat organi tomonidan uch ish kuni mobaynida koʻrib chiqiladi.

Huquqbuzarlik mavjud boʻlgan taqdirda mazkur Nizomning 23 — 35-bandlariga muvofiq oʻn ish kuni mobaynida davlat yer nazorati tadbiri oʻtkaziladi va natijasi boʻyicha murojaatni yuborgan shaxsga bir ish kunida elektron tarzda javob yuboriladi.

49. Quyidagi hollarda videotexnika vositalari orqali qayd etilgan huquqbuzarlik holatlari toʻgʻrisidagi videoyozuvlar asosida maʼmuriy ish yuritilmaydi:

videoyozuvlar mazkur Nizomning 45-bandida belgilangan talablarga javob bermaganda yoki sifatsiz boʻlganda;

videoyozuvlarga oʻzgartirishlar kiritilgan boʻlsa, mazkur Nizomning 46 bandida nazarda tutilgan hollar bundan mustasno;

videoyozuvlar axborot tizimiga mazkur Nizomning 47-bandida belgilangan talablarga rioya etmagan holda yuklanganda;

videoyozuvda qayd etilgan huquqbuzarlik boʻyicha qaror qabul qilingan yoki maʼmuriy ish yuritilayotgan taqdirda.

50. Ragʻbatlantirish huquqbuzardan jarima undirilgandan soʻng fuqaroning uyali telefon raqami hisobiga yoki bank plastik kartasiga, yuridik shaxsning esa bankdagi hisobvaragʻiga maxsus vakolatli davlat organining budjetdan tashqari jamgʻarmasi hisobvaragʻiga oʻtkazilgan mablagʻlar hisobidan avtomatik tarzda pul oʻtkazish yoʻli bilan amalga oshiriladi.

51. Huquqbuzarlik holatlari toʻgʻrisidagi maʼlumotlarni taqdim etgan shaxslar toʻgʻrisidagi maʼlumotlarning oshkor etilishiga yoʻl qoʻyilmaydi.

10-bob. Yakunlovchi qoidalar

52. Davlat kadastrlari yagona tizimiga kiritiladigan davlat kadastrlarining axborotini taqdim etish tartibini buzish hamda yerga oid qonunbuzilish holatlari sodir etilganda, Kadastr agentligi ularning kelib chiqish sabablari va bunga imkoniyat yaratib berayotgan shart-sharoitlarni bartaraf etish haqida tegishli vazirliklar, davlat qoʻmitalari, idoralar, xoʻjalik birlashmalari, mahalliy davlat hokimiyati organlariga koʻrib chiqilishi majburiy boʻlgan taqdimnoma kiritishi mumkin.

53. Yer uchastkalaridan maqsadsiz foydalanish va oʻzboshimchalik bilan egallangan yer maydonida noqonuniy qurilgan imoratlarni bartaraf etish toʻgʻrisidagi Kadastr agentligi organlarining koʻrsatmasi jismoniy va yuridik shaxslar tomonidan oʻn besh kun muddatda ixtiyoriy ravishda bajarilgan taqdirda, maxsus vakolatli davlat organining mansabdor shaxslari tomonidan oʻzboshimchalik bilan egallangan yer maydonida noqonuniy qurilgan imoratlar bartaraf etilganini qayd etish toʻgʻrisida elektron shakldagi dalolatnoma “E-YERNAZORAT” AAT orqali rasmiylashtirilib, maxsus vakolatli davlat organining mansabdor shaxslari tomonidan ERI bilan tasdiqlanadi.

Mazkur koʻrsatmalar bajarilmagan taqdirda, Kadastr agentligi organlari Oʻzbekiston Respublikasining Yer kodeksi 36-moddasiga muvofiq ushbu yer uchastkalariga boʻlgan huquqni bekor qilish hamda noqonuniy qurilgan imoratlarni bartaraf etish (buzib tashlash) yuzasidan toʻgʻridan toʻgʻri sudga murojaat qilishga haqli.

54. Mazkur Nizom talablari asosida oʻtkazilgan yer nazorati tadbirlari natijalari boʻyicha maxsus vakolatli davlat organining mansabdor shaxslarini ragʻbatlantirish tartibi maxsus vakolatli davlat organi tomonidan belgilanadi.

55. Ushbu Nizom talablarining buzilishida aybdor shaxslar qonunchilikka muvofiq javob beradilar.

Davlat yer va kadastr nazoratini amalga oshirish tartibi toʻgʻrisidagi nizomga 1-ILOVA

Davlat yer nazoratini amalga oshirish

Bosqichlar Subyektlar Tadbirlar Bajarish muddatlari 1-bosqich Maxsus vakolatli davlat organlari Davlat yer nazorati Oʻzbekiston Respublikasining butun hududida maxsus vakolatli davlat organlari tomonidan “E-YER NAZORAT” tizimida amalga oshiriladi. Doimiy 2-bosqich “Oʻzbekkosmos” agentligi Yer uchastkalaridan maqsadsiz va samarasiz foydalanish, yerlarni oʻzboshimchalik bilan egallash, bunday yerlarda ehtimoliy noqonuniy qurilmalar qurish holatlarini aerokosmik monitoring orqali aniqlaydi va “E-YER NAZORAT” tizimi orqali maxsus vakolatli davlat organlariga yuboradi. Bir yilda ikki marotaba 3-bosqich Maxsus vakolatli davlat organlari Davlat yer nazorati yer toʻgʻrisidagi qonunchilik buzilishi kuzatilganda maxsus vakolatli davlat organi rahbarining (rahbar oʻrinbosarining) tasdiqlangan buyrugʻi “E-YER NAZORAT” tizimida elektron tarzda shakllantiriladi va vakolat doirasida tegishli choralar koʻradi. Oʻn ish kunidan koʻp boʻlmagan muddatda 4-bosqich Maxsus vakolatli davlat organlari 1. Davlat yer nazorati natijalari boʻyicha “E-YER N AZORAT” tizimida elektron tarzda dalolatnoma tuzadi. 2. Dalolatnoma yuridik shaxsning mansabdor shaxsi yoki uning vakili yoxud jismoniy shaxs tomonidan belgilangan tartibda tasdiqlangandan soʻng yoki ular dalolatnomani imzolashdan bosh tortgan taqdirda, bu haqida dalolatnomaga tegishli yozuv kiritilgan holda ushbu shaxslarga elektron aloqa vositalari va pochta xizmati orqali yuboriladi. 10 ish kuni mobaynida 5-bosqich Maxsus vakolatli davlat organlari 1. Yer toʻgʻrisidagi qonunchilik talablarini buzganlik uchun yuridik shaxsning mansabdor shaxsi yoki jismoniy shaxs maʼmuriy javobgarlikka tortilishi lozim boʻlsa, maxsus vakolatli davlat organlarining yer nazoratini amalga oshirgan mansabdor shaxsi aniqlangan huquqbuzarliklar yuzasidan Oʻzbekiston Respublikasi Maʼmuriy javobgarlik toʻgʻrisidagi kodeksiga muvofiq oʻz vakolatlari doirasida maʼmuriy huquqbuzarlik toʻgʻrisida bayonnoma tuzadi. Maʼmuriy javobgarlik toʻgʻrisidagi kodeksida belgilangan muddatlarda 2. Aniqlangan huquqbuzarliklar vakolat doirasiga tegishli boʻlmagan hollarda, mazkur huquqbuzarliklarni koʻrib chiqish vakolatiga ega organga “E-YER N AZORAT” tizimi orqali yuboradi. 5 kun muddatda

Davlat yer va kadastr nazoratini amalga oshirish tartibi toʻgʻrisidagi nizomga 2-ILOVA

Yerga oid huquqbuzarliklarni aniqlashda jamoatchilik nazorati va jamoatchilik nazorati subyektlarini ragʻbatlantirish

Bosqich Subyekt Tadbir Muddat 1-bosqich Jamoatchilik nazorati subyektlari Yerga oid huquqbuzarliklar toʻgʻrisida fotosuratlar, videoyozuvlarni ilova qilgan holda axborot tizimi orqali arizalar va shikoyatlar bilan murojaat qiladi. Oʻz xohishiga koʻra 2-bosqich Maxsus vakolatli davlat organi Kelib tushgan huquqbuzarlik holatlari qayd etilgan arizalar va shikoyatlarni koʻrib chiqadi. Uch ish kuni mobaynida 3-bosqich Maxsus vakolatli davlat organi Huquqbuzarlik mavjud boʻlgan taqdirda Davlat yer va kadastr nazoratini amalga oshirish tartibi toʻgʻrisidagi nizomning 23 — 35-bandlariga muvofiq davlat yer nazorati tadbiri oʻtkaziladi. Oʻn ish kuni mobaynida 4-bosqich Maxsus vakolatli davlat organi Koʻrib chiqish natijasi boʻyicha murojaatni yuborgan shaxsga elektron tarzda javob yuboriladi. Bir ish kuni mobaynida 5-bosqich Maxsus vakolatli davlat organi Ragʻbatlantirish fuqaroning uyali telefon raqami hisobiga yoki bank plastik kartasiga, yuridik shaxsning esa bankdagi hisobvaragʻiga maxsus vakolatli davlat organining budjetdan tashqari jamgʻarmasi hisobvaragʻiga oʻtkazilgan mablagʻlar hisobidan pul oʻtkazish yoʻli bilan amalga oshiriladi. Huquqbuzardan jarima undirilgandan soʻng avtomatik tarzda

Vazirlar Mahkamasining 2022-yil 14-apreldagi 183-son qaroriga 2-ILOVA

Davlat geodeziya nazoratini amalga oshirish tartibi toʻgʻrisida

1-bob. Umumiy qoidalar

1. Mazkur Nizom davlat geodeziya nazoratini amalga oshirish tartibini belgilaydi.

2. Ushbu Nizomda quyidagi asosiy tushunchalar qoʻllaniladi:

geodeziya va kartografiyaga doir materiallar (maʼlumotlar) — axborotni qayd etish turi va usulidan qatʼi nazar, geodeziya va kartografiya faoliyati amalga oshirilayotganda olingan geodeziya, nivelir, gravimetriya oʻlchovlarining, aerokosmik va kartografik tasvirlarning barcha yakuniy va oraliq natijalari;

geodeziya va kartografiyaga doir materiallar (maʼlumotlar) ekspertizasi — geodeziya va kartografiyaga doir materiallarning (maʼlumotlarning) geodeziya va kartografiya faoliyatini texnik jihatdan tartibga solish sohasidagi normativ hujjatlar, shuningdek, geodeziya va kartografiyaga oid ishlarni bajarishning texnik loyihalari (dasturlari) talablariga muvofiqligini aniqlash;

geodeziya va kartografiya faoliyati subyektlari — Oʻzbekiston Respublikasi Iqtisodiyot va moliya vazirligi huzuridagi Kadastr agentligi (keyingi oʻrinlarda — Kadastr agentligi), Mudofaa vazirligi, davlat boshqaruvi organlari, mahalliy davlat hokimiyati organlari, xoʻjalik birlashmalari, geodeziya va kartografiya faoliyatini amalga oshirish huquqiga ega boʻlgan yuridik shaxslar, geodeziya va kartografiyaga doir materiallarni (maʼlumotlarni) saqlovchi yuridik va jismoniy shaxslar;

davlat geodeziya nazorati — geodeziya va kartografiya faoliyati subyektlari tomonidan geodeziya va kartografiya faoliyati toʻgʻrisidagi qonunchilik talablariga rioya etilishini nazorat qilish maqsadida vakolatli organlar tomonidan amalga oshiriladigan harakatlar majmui.

3. Davlat geodeziya nazorati Oʻzbekiston Respublikasining butun hududida ushbu Nizomga ilovada keltirilgan sxemaga muvofiq amalga oshiriladi.

4. Geodeziya va kartografiya faoliyati subyektlari tomonidan geodeziya va kartografiya faoliyati toʻgʻrisidagi qonunchilik talablariga rioya etilishini nazorat qilish, shuningdek, geodeziya va kartografiyaga oid ishlarni, geodeziya punktlarini roʻyxatdan oʻtkazish hamda hisobga olishni tashkil etish, davlat kartografiya-geodeziya fondining faoliyat yuritishini taʼminlash davlat geodeziya nazoratining asosiy vazifalari hisoblanadi.

5. Kadastr agentligi — geodeziya va kartografiya faoliyatining barcha subyektlari tomonidan geodeziya va kartografiya faoliyati toʻgʻrisidagi qonunchilik talablariga rioya etilishi ustidan davlat nazoratini amalga oshiradigan maxsus vakolatli davlat organi (keyingi oʻrinlarda — maxsus vakolatli davlat organi) hisoblanadi, Oʻzbekiston Respublikasi Mudofaa vazirligi hamda Davlat xavfsizlik xizmati tizimidagi geodeziya va kartografiya faoliyati subyektlari bundan mustasno.

Oʻzbekiston Respublikasi Mudofaa vazirligi hamda Davlat xavfsizlik xizmati tizimidagi geodeziya va kartografiya faoliyati subyektlari tomonidan geodeziya va kartografiya faoliyati toʻgʻrisidagi qonunchilik talablariga rioya etilishi ustidan davlat nazorati qonunchilik hujjatlarida belgilangan tartibda amalga oshiriladi.

6. Maxsus vakolatli davlat organi huquqni muhofaza qiluvchi organlar, davlat boshqaruvi organlari, fuqarolarning oʻzini oʻzi boshqarish organlari hamda boshqa nodavlat notijorat tashkilotlar bilan oʻzaro hamkorlik qiladi, ularga metodik va boshqa yordam koʻrsatadi.

7. Maxsus vakolatli davlat organi geodeziya va kartografiya faoliyati toʻgʻrisidagi qonunchilik yuzasidan profilaktik tadbirlarni amalga oshiradi.

8. Maxsus vakolatli davlat organi tomonidan geodeziya va kartografiya sohasida qonuniylikni taʼminlash yuzasidan oʻz vakolatlari doirasida qabul qilgan qarorlari davlat boshqaruvi organlari, mahalliy davlat hokimiyati organlari, xoʻjalik birlashmalari, boshqa tashkilotlar va ularning mansabdor shaxslari, shuningdek, yuridik va jismoniy shaxslar tomonidan bajarilishi majburiy hisoblanadi.

2-bob. Maxsus vakolatli davlat organining asosiy vazifalari va funksiyalari

9. Quyidagilar davlat geodeziya nazoratini amalga oshirishda maxsus vakolatli davlat organining asosiy vazifalari hisoblanadi:

geodeziya va kartografiya faoliyati subyektlari tomonidan geodeziya va kartografiya faoliyati toʻgʻrisidagi qonunchilik talablariga, geodeziya hamda kartografiyaga doir materiallardan (maʼlumotlardan) foydalanish qoidalariga rioya etilishini taʼminlash;

geodeziya va kartografiyaga oid ishlarni, geodeziya punktlarini roʻyxatdan oʻtkazish hamda hisobga olishni tashkil etish;

davlat kartografiya-geodeziya fondining faoliyat yuritishini nazorat qilish.

10. Maxsus vakolatli davlat organi davlat geodeziya nazoratini amalga oshirishda oʻziga yuklangan asosiy vazifalarga muvofiq quyidagi funksiyalarni bajaradi:

geodeziya va kartografiya faoliyati subyektlari tomonidan geodeziya va kartografiya faoliyati toʻgʻrisidagi qonunchilik talablariga rioya etilishi ustidan nazorat qiladi;

kartografiyaga doir materiallarda hamda boshqa hujjatlarda Oʻzbekiston Respublikasining Davlat chegarasi va hududi toʻgʻri aks ettirilganligi ustidan nazorat qiladi;

geodeziya va kartografiyaga oid ishlarni roʻyxatdan oʻtkazadi;

geodeziya punktlarini hisobga oladi;

davlat geodeziya, nivelir, gravimetriya tarmoqlaridagi geodeziya punktlarining, shuningdek, qonunchilikda nazarda tutilgan hollarda boshqa geodeziya punktlarining but saqlanishi va ularning muhofaza zonalari rejimiga rioya etilishi ustidan nazorat qiladi;

geodeziya va kartografiya faoliyati subyektlari tomonidan davlat kartografiya-geodeziya fondi hamda idoraviy kartografiya-geodeziya fondlari materiallarining (maʼlumotlarining) saqlanishi ustidan nazorat qiladi;

geodeziya va kartografiya faoliyati subyektlari tomonidan geodeziya koordinatalari, balandliklari, gravimetriya oʻlchovlari davlat tizimlarining hamda davlat topografik xaritalari va rejalarining masshtab qatori, mahalliy koordinatalar hamda boshqa koordinatalar tizimlarining qoʻllanilishi ustidan nazorat qiladi;

geodeziya va kartografiya faoliyati subyektlari tomonidan umumdavlat ahamiyatiga molik geodeziya va kartografiyaga doir materiallar (maʼlumotlar) davlat kartografiya-geodeziya fondiga topshirilishi, shuningdek, bu subyektlarning ushbu fonddan olgan materiallardan (maʼlumotlardan) foydalanishi ustidan nazorat qiladi;

geodeziya va kartografiyaga oid bajarilgan ishlar toʻgʻrisidagi texnik hisobotlarga doir talablarni belgilaydi;

geodeziya va kartografiyaga doir materiallarni (maʼlumotlarni) ekspertizadan oʻtkazadi;

Oʻzbekiston Respublikasi maʼmuriy-hududiy birliklar navbatchi xaritasi yuritilishini nazorat qiladi;

ruxsat berish va xabardor qilish tartib-taomillariga amal qilinganligini doimiy nazorat qiladi.

Maxsus vakolatli davlat organi qonunchilik hujjatlariga muvofiq boshqa vazifa va funksiyalarni ham amalga oshirishi mumkin.

11. Geodeziya punktlarini roʻyxatdan oʻtkazish va hisobga olishni tashkil qilish tartibi hamda davlat kartografiya-geodeziya fondining faoliyat yuritish tartibi maxsus vakolatli davlat organi tomonidan belgilanadi.

3-bob. Davlat geodeziya nazoratini amalga oshiruvchi maxsus vakolatli davlat organining mansabdor shaxslari

12. Davlat geodeziya nazorati Kadastr agentligi tomonidan amalga oshiriladi.

13. Davlat geodeziya nazorati Kadastr agentligining quyidagi mansabdor shaxslari tomonidan amalga oshiriladi:

Kadastr agentligi direktori — geodeziya nazorati boʻyicha Oʻzbekiston Respublikasining bosh davlat inspektori;

Kadastr agentligi direktori oʻrinbosari — geodeziya nazorati boʻyicha Oʻzbekiston Respublikasi bosh davlat inspektorining oʻrinbosari;

Kadastr agentligining geodeziya nazoratiga masʼul boshqarmasi boshligʻi — geodeziya nazorati boʻyicha Oʻzbekiston Respublikasining katta davlat inspektori;

Kadastr agentligining geodeziya nazoratiga masʼul boshqarmasi xodimlari — geodeziya nazorati boʻyicha davlat inspektorlari.

14. Davlat geodeziya nazoratini amalga oshirishda Kadastr agentligining Qoraqalpogʻiston Respublikasi, viloyatlar va Toshkent shahar boshqarmasi hamda tuman (shahar) boʻlimi mutaxassislari jalb qilinishi mumkin.

4-bob. Davlat geodeziya nazorati tadbirlari ishtirokchilari, ularning huquqlari va majburiyatlari

15. Maxsus vakolatli davlat organi mansabdor shaxslari, geodeziya va kartografiya faoliyati subyektlari (ularning vakillari) davlat geodeziya nazoratining ishtirokchilari hisoblanadi.

16. Davlat geodeziya va kartografiya faoliyati sohasida qonuniylikni taʼminlash yuzasidan maxsus vakolatli davlat organining mansabdor shaxslari quyidagi huquqlarga ega:

geodeziya va kartografiya ishlari belgilangan tartibda roʻyxatdan oʻtkazilmasdan yoxud faoliyatni texnik jihatdan tartibga soluvchi normativ hujjatlar talablari buzilgan holda olib borilayotgan boʻlsa, ushbu ishlarni belgilangan tartibda toʻxtatib qoʻyish;

geodeziya va kartografiya ishlari hamda topografiya xaritalari, rejalari, geodeziya punktlari koordinatlari va balandliklari toʻgʻrisidagi maʼlumotlarni saqlash bilan bogʻliq xonalarga belgilangan tartibda kirish;

geodeziya va kartografiya faoliyati subyektlari rahbarlari yoki mansabdor shaxslariga geodeziya va kartografiya ishlarini tashkil etish va amalga oshirish tartibining aniqlangan buzilishlarini bartaraf etish, shuningdek, ushbu ishlarni bajarish va aerokosmik suratga olishlar natijalari boʻyicha olingan materiallar (maʼlumotlar)ni toʻplash, hisobini yuritish, saqlash, ulardan foydalanish va realizatsiya qilish yuzasidan bajarilishi majburiy boʻlgan koʻrsatmalar berish;

davlat geodeziya nazoratini amalga oshirish bilan bogʻliq tekshirishlarni oʻtkazish uchun ekspertlarni belgilangan tartibda jalb etish;

geodeziya va kartografiya faoliyati subyektlaridan oʻziga yuklangan vazifalarni bajarish uchun zarur axborotlarni soʻrab olish;

geodeziya va kartografiya faoliyati subyektlarining geodeziya va kartografiyaga doir axborot resurslari, geografik axborot tizimlari, maʼlumotlar (geomaʼlumotlar) bazalari, reyestrlaridan foydalanish, ulardan maʼlumotlar va (yoki) axborotlarni tekin olish;

ruxsat berish va xabardor qilish talablari va shartlariga jismoniy va yuridik shaxslarning rioya etishini tekshirishni Oʻzbekiston Respublikasi Prezidenti huzuridagi Tadbirkorlik subyektlarining huquqlari va qonuniy manfaatlarini himoya qilish boʻyicha vakil bilan kelishilgan, qonunchilikda belgilangan tartibda joyiga chiqqan holda oʻtkazish;

ruxsat berish va xabardor qilish talablari va shartlariga rioya etilishi yuzasidan tekshiruvlar oʻtkazilayotganda yuzaga keladigan masalalar boʻyicha jismoniy va yuridik shaxslardan zarur axborotni soʻrash va olish;

tekshiruvlar natijalari asosida geodeziya va kartografiya faoliyati subyektlari yoʻl qoʻygan ruxsat berish va xabardor qilish talablari hamda shartlariga doir qoidabuzarliklarni koʻrsatgan holda dalolatnomalar tuzish;

geodeziya va kartografiya faoliyati subyektlari zimmasiga aniqlangan qoidabuzarliklarni bartaraf etish majburiyatini yuklovchi qarorlar chiqarish, bunday qoidabuzarliklarni bartaraf etish muddatlarini belgilash;

ruxsat etish xususiyatiga ega hujjatning amal qilishini toʻxtatib turish yoki uni bekor qilish toʻgʻrisidagi ariza bilan sudga murojaat qilish;

geodeziya va kartografiya faoliyatini boshlaganlik yoki tugatganlik haqida xabardor qiluvchining faoliyatini (harakatlarini) toʻxtatib turish va qayta tiklash toʻgʻrisida qaror qabul qilish, ularning faoliyatini tugatish toʻgʻrisida, shuningdek, faoliyatini (harakatlarini) amalga oshirishni taqiqlash toʻgʻrisida sudga ariza berish;

ruxsat berish va xabardor qilish tartib-taomillari sohasidagi huquqbuzarliklar uchun yuridik shaxslarga jarima solish toʻgʻrisida sudga ariza berish;

ruxsat berish va xabardor qilish tartib-taomillari sohasidagi vakolatlarni amalga oshirish uchun sudga davlat boji toʻlamasdan arizalar berish.

Maxsus vakolatli davlat organining mansabdor shaxslari qonunchilik hujjatlariga muvofiq boshqa huquqlarga ham ega boʻlishi mumkin.

17. Maxsus vakolatli davlat organining mansabdor shaxslari quyidagilarga majbur:

davlat geodeziya nazorati amalga oshirilayotgan yuridik shaxsning mansabdor shaxsi yoki uning vakiliga yoxud jismoniy shaxsga tekshirish oʻtkazish maxsus guvohnomasini koʻrsatish;

yuridik shaxsning mansabdor shaxsi yoki uning vakilini yoxud jismoniy shaxsni davlat geodeziya nazorati maqsadi va uni amalga oshirish asoslari bilan tanishtirish;

yuridik va jismoniy shaxsning huquq va majburiyatlarini tushuntirish;

oʻtkazilgan davlat geodeziya nazorati natijalarini dalolatnoma (keyingi oʻrinlarda — dalolatnoma) bilan rasmiylashtirish va bir nusxasini yuridik shaxsning mansabdor shaxsi yoki uning vakiliga yoxud jismoniy shaxsga taqdim etish.

Maxsus vakolatli davlat organi mansabdor shaxslarining zimmasida qonunchilik hujjatlariga muvofiq boshqa majburiyatlar ham boʻlishi mumkin.

18. Davlat geodeziya nazoratini oʻtkazishda geodeziya va kartografiya faoliyati subyektlari quyidagi huquqlarga ega:

davlat geodeziya nazorati inspektorlarining nazorat masalalariga aloqasi boʻlmagan talablarini bajarmaslik;

davlat geodeziya nazoratini oʻtkazishda shaxsan yoki oʻz vakili orqali ishtirok etish;

davlat geodeziya nazorati inspektorining ruxsati bilan ekspertiza oʻtkazishda ishtirok etish va ekspertga tushuntirishlar berish, ekspertning xulosasi bilan tanishish;

davlat geodeziya nazorati materiallari bilan tanishish va dalolatnomani olish;

tekshirishlarni roʻyxatga olish kitobiga tegishli yozuvlar kiritilishini (yoki elektron tizimda qayd etilishini) talab qilish;

davlat geodeziya nazorati inspektorining noqonuniy xatti-harakatlari yuzasidan shikoyat qilish.

Geodeziya va kartografiya faoliyati subyektlari qonunchilik hujjatlariga muvofiq boshqa huquqlarga ham ega boʻlishi mumkin.

19. Davlat geodeziya nazoratini oʻtkazishda geodeziya va kartografiya faoliyati subyektlari quyidagilarga majbur:

davlat geodeziya nazorati bilan bogʻliq qonuniy talablarini bajarish, ular mansabdor shaxslarining qonuniy faoliyatiga toʻsqinlik qilmaslik;

davlat geodeziya nazoratini oʻtkazayotgan davlat geodeziya nazorati inspektorlariga tekshiruv bilan bogʻliq, shu jumladan, elektron axborot jismlarida saqlanadigan, hujjatlar va axborotni oʻrganish hamda tahlil qilish imkoniyatini taʼminlash;

davlat geodeziya nazorati inspektorining talabiga koʻra geodeziya va kartografiya faoliyatiga oid shartnomalar, shartnomada koʻrsatilgan ishlarni bajarilganligini, texnik loyiha va hisobotlar, zarur holatlarda bajarilgan ishlardan namunalar koʻrsatish.

Geodeziya va kartografiya faoliyati subyektlari oʻz zimmasiga qonunchilik hujjatlariga muvofiq boshqa majburiyatlarni ham olishi mumkin.

5-bob. Davlat geodeziya nazoratini tashkil etish va oʻtkazish tartibi

20. Davlat geodeziya nazorati “Geodeziya va kartografiya faoliyati toʻgʻrisida”gi Oʻzbekiston Respublikasining Qonuni va boshqa qonunchilik hujjatlariga muvofiq maxsus vakolatli davlat organi tomonidan amalga oshiriladi.

21. Maxsus vakolatli davlat organi tomonidan davlat geodeziya nazorati quyidagi asoslarga koʻra belgilangan tartibda oʻtkaziladi:

geodeziya va kartografiya ishlarini roʻyxatdan oʻtkazilmaganligi;

kartografiya materiallarida va boshqa hujjatlarda Oʻzbekiston Respublikasi Davlat chegaralarining hamda maʼmuriy-hududiy birliklar chegaralarini notoʻgʻri aks ettirilganligini;

geodeziya va kartografiya faoliyatining subyektlari tomonidan geodeziya va kartografiya faoliyati toʻgʻrisidagi qonunchilik talablariga muvofiq faoliyat yuritilmaganligi;

davlat geodeziya, nivelir, gravimetriya tarmoqlaridagi geodeziya punktlarining, shuningdek, qonunchilik hujjatlarida nazarda tutilgan hollarda boshqa geodeziya punktlarining but saqlanishi va ularning muhofaza zonalari rejimiga rioya etilishini taʼminlamanganligi;

davlat geodeziya tarmogʻi punktlarining qayta tiklanishini taʼminlash boʻyicha tadbirlarning bajarilmaganligi;

ruxsat berish va xabardor qilish tartib-taomillariga amal qilinmaganligi;

geodeziya va kartografiya faoliyati subyektlari tomonidan umumdavlat ahamiyatiga molik geodeziya va kartografiyaga doir materiallar (maʼlumotlar) davlat kartografiya-geodeziya fondiga topshirilmaganda;

geodeziya va kartografiya faoliyati subyektlarining davlat kartografiya-geodeziya fondidan olingan materiallardan (maʼlumotlardan) qonunchilik hujjatlariga muvofiq foydalanilmaganligi aniqlanganda;

jismoniy yoki yuridik shaxslarning geodeziya toʻgʻrisidagi qonunchilik hujjatlari buzilishi holatlari toʻgʻrisidagi asoslangan murojaatlariga muvofiq;

ommaviy axborot vositalari yoki boshqa tashqi manbalarda (ijtimoiy tarmoqlar va veb-saytlarda) geodeziya va kartografiyaga oid huquqbuzarliklar toʻgʻrisidagi maʼlumotlar eʼlon qilinganda;

sud, huquqni muhofaza qiluvchi organlar, shuningdek, boshqa davlat organlari va tashkilotlardan geodeziya va kartografiyaga oid huquqbuzarliklar toʻgʻrisida dalolat beruvchi axborot tushganda;

nazorat qiluvchi organlarning “xavfni tahlil etish” tizimi orqali huquqbuzarliklar aniqlanganda.

22. Davlat geodeziya nazorati maxsus vakolatli davlat organi rahbarining (rahbar oʻrinbosarining) buyrugʻiga asosan oʻn ish kunidan koʻp boʻlmagan muddatda amalga oshiriladi.

Davlat geodeziya nazoratini amalga oshirish toʻgʻrisidagi buyruqda koʻrsatilgan sana ushbu nazoratni amalga oshirish muddatining boshlanishi deb hisoblanadi.

23. Agar davlat geodeziya nazoratida maxsus vakolatli davlat organining ikki yoki undan ortiq nazoratchi mansabdor shaxslari qatnashganda, buyruqda familiyasi birinchi koʻrsatilgan mansabdor shaxs nazorat jarayonini boshqarish va natijalarini umumlashtirishga javobgar shaxs hisoblanadi.

24. Maxsus vakolatli davlat organining mansabdor shaxslari davlat geodeziya nazorati tadbirlarida oʻz vakolatlari doirasidan chetga chiqmasligi hamda nazorat predmetiga aloqador boʻlmagan hujjatlarni (axborotni) talab qilmasligi lozim.

25. Geodeziya va kartografiyaga doir materiallarning (maʼlumotlarning) qalbaki yoki soxtaligi haqida shubha tugʻilgan hollarda, davlat geodeziya nazoratini amalga oshirayotgan maxsus vakolatli davlat organining mansabdor shaxsi tomonidan ularni haqiqiyligi yoki toʻgʻriligiga aniqlik kiritish maqsadida olib qoʻyilishi mumkin.

26. Hujjatlarni olib qoʻyish toʻgʻrisida maxsus vakolatli davlat organining mansabdor shaxsi tomonidan bayonnoma tuziladi, unda quyidagilar koʻrsatilishi kerak:

bayonnoma tuzilgan vaqti va joyi;

bayonnomani tuzgan shaxsning lavozimi, familiyasi, ismi, otasining ismi;

hujjatlari olib qoʻyilgan shaxs toʻgʻrisidagi maʼlumotlar (yuridik shaxs nomi, uning mansabdor shaxsi yoki hujjatlarni olib qoʻyishda ishtirok etgan vakili yoxud jismoniy shaxsning familiyasi, ismi, otasining ismi, manzili va shu kabilar);

hujjatlarni olib qoʻyishda ishtirok etgan shaxslar toʻgʻrisidagi maʼlumotlar, agar ular boʻlsa;

olib qoʻyilayotgan hujjatning nomi (mazmuni), sanasi, raqami, uni qabul qilgan (rasmiylashtirgan) organ, tashkilot nomi hamda hujjatning varaqlari soni.

Hujjatlarni olib qoʻyish toʻgʻrisidagi bayonnoma ikki nusxada rasmiylashtiriladi va uning bir nusxasi yuridik shaxsning mansabdor shaxsi yoki uning vakiliga yoxud jismoniy shaxsga imzo qoʻydirib topshiriladi.

Yuridik shaxsning mansabdor shaxsi yoki uning vakili yoxud jismoniy shaxs hujjatlar olib qoʻyish toʻgʻrisidagi bayonnomani imzolash va (yoki) olishdan bosh tortgan hollarda, bu haqida bayonnomaga tegishli yozuv kiritiladi va yuridik yoki jismoniy shaxsga pochta orqali buyurtma xat bilan yuboriladi.

27. Davlat geodeziya nazorati doirasidagi harakatlarni yuridik yoki jismoniy shaxs roʻyxatdan oʻtgan yoki faoliyat yuritayotgan yoxud nazorat tadbiri oʻtkazilayotgan joyning oʻzida rasmiylashtirish imkoni boʻlmasa, fuqarolarning oʻzini oʻzi boshqarish organi yoki maxsus vakolatli davlat organining binosida rasmiylashtirilishi mumkin.

28. Davlat geodeziya nazoratini oʻtkazishda zarur hollarda belgilangan tartibda malakali mutaxassislar va tarjimonlar jalb etilishi, shuningdek, ekspertiza tayinlanishi mumkin.

29. Ekspertiza tayinlash toʻgʻrisidagi buyruq maxsus vakolatli davlat organi rahbari (rahbar oʻrinbosari) tomonidan davlat geodeziya nazorati inspektorining iltimosnomasi asosida qabul qilinadi.

30. Malakali mutaxassislar va tarjimonni jalb qilish uchun maxsus vakolatli davlat organi tomonidan tegishli davlat organlari va tashkilotlariga murojaat qilinadi.

31. Malakali mutaxassislar va tarjimonlar shartnoma asosida maxsus vakolatli davlat organining mablagʻlari hisobidan jalb qilinishi mumkin, mablagʻ ajratish tartibi maxsus vakolatli davlat organi tomonidan tasdiqlanadi.

32. Maxsus vakolatli davlat organining mansabdor shaxslari tomonidan davlat geodeziya nazorati natijalari boʻyicha quyidagilar koʻrsatilgan holda kamida uch nusxada dalolatnoma tuzilishi kerak:

nazorat tadbiri oʻtkazilgan joy, dalolatnoma tuzilgan sana;

nazorat tadbiri oʻtkazish uchun asos;

nazorat tadbirini oʻtkazgan mansabdor shaxslarning familiyasi, ismi, otasining ismi;

yuridik shaxsning nomi yoki jismoniy shaxsning familiyasi, ismi, otasining ismi, ularning manzili va soliq toʻlovchining identifikatsiya raqami (STIR), jismoniy shaxsning shaxsiy identifikatsiya raqami (JSHSHIR);

geodeziya va kartografiya sohasidagi huquqbuzarlik oqibatlarini qonunchilik hujjatlarida belgilangan muddatlarda ixtiyoriy ravishda bartaraf etish toʻgʻrisida koʻrsatma.

Dalolatnomaga maxsus vakolatli davlat organi mansabdor shaxsi tomonidan geodeziya nazorati tadbirida olingan fotosuratlar, videoyozuvlar va boshqa materiallar ilova qilinadi.

33. Davlat geodeziya nazoratini oʻtkazish natijasida geodeziya va kartografiya toʻgʻrisidagi qonunchilik hujjatlarining buzilishlari aniqlanmagan boʻlsa, bu haqida dalolatnomada qayd etiladi.

34. Dalolatnomaning barcha nusxalari maxsus vakolatli davlat organining mansabdor shaxslari tomonidan imzolanadi hamda uning bir nusxasi yuridik shaxsning mansabdor shaxsi yoki uning vakiliga yoxud jismoniy shaxsga uni olgan sanani koʻrsatgan holda imzo qoʻydirib topshiriladi.

35. Yuridik shaxsning mansabdor shaxsi yoki uning vakili yoxud jismoniy shaxs dalolatnomani olishdan bosh tortganda, dalolatnomaga tegishli yozuv kiritiladi va uning bir nusxasi yuridik yoki jismoniy shaxsga uch ish kunidan kechiktirmasdan pochta orqali buyurtma xat bilan yuboriladi va yuborilganidan eʼtiboran uch kun oʻtgach, topshirilgan hisoblanadi.

36. Davlat geodeziya nazorati oʻtkazilgan shaxs (uning vakili) dalolatnomada bayon etilgan holatlarga va (yoki) tekshiruvchilarning xulosalari hamda takliflariga rozi boʻlmagan taqdirda, dalolatnomani olgan kundan eʼtiboran oʻn kun ichida Kadastr agentligiga mazkur dalolatnoma boʻyicha umuman yoki uning ayrim holatlari yuzasidan yozma eʼtirozlarini taqdim etishga haqli.

37. Geodeziya va kartografiya faoliyati subyektlari oʻz eʼtirozlarining asoslanganligini tasdiqlovchi hujjatlarni (ularning tasdiqlangan koʻchirma nusxalarini) yozma eʼtirozlarga ilova qilishga yoki kelishilgan muddatda vakolatli organga topshirishga haqli.

38. Dalolatnoma geodeziya va kartografiya faoliyati subyektiga topshirilgan kun yoki unga yuborilgan kun davlat geodeziya nazorati tadbiri yakunlangan vaqt deb hisoblanadi.

39. Dalolatnoma maxsus vakolatli davlat organi tomonidan belgilangan tartibda tugallangan kundan eʼtiboran keyingi ish kunidan kechiktirmasdan roʻyxatdan oʻtkazilishi lozim.

40. Davlat geodeziya nazoratini oʻtkazish materiallarini koʻrib chiqish va natijasi boʻyicha qaror qabul qilish geodeziya va kartografiya faoliyati toʻgʻrisidagi qonunchilikda belgilangan tartibda amalga oshiriladi.

41. Geodeziya va kartografiya faoliyati toʻgʻrisidagi qonunchilik talablarini buzganlik uchun geodeziya va kartografiya faoliyati subyektining rahbari hamda mansabdor shaxsi yoki jismoniy shaxs maʼmuriy javobgarlikka tortilishi lozim boʻlsa, vakolatli organning geodeziya nazoratini amalga oshirgan mansabdor shaxsi aniqlangan huquqbuzarliklar yuzasidan Oʻzbekiston Respublikasi Maʼmuriy javobgarlik toʻgʻrisidagi kodeksiga muvofiq oʻz vakolatlari doirasida maʼmuriy huquqbuzarlik toʻgʻrisida bayonnoma tuzadi.

6-bob. Yakunlovchi qoidalar

42. Davlat geodeziya nazorati natijasida aniqlangan maʼmuriy huquqbuzarliklar toʻgʻrisidagi ishlarni koʻrib chiqish va jarima solish tariqasidagi maʼmuriy jazo choralarini qoʻllash taalluqliligi boʻyicha maxsus vakolatli davlat organi tomonidan Oʻzbekiston Respublikasi Maʼmuriy javobgarlik toʻgʻrisidagi kodeksiga muvofiq amalga oshiriladi.

Agar maʼmuriy huquqbuzarlik toʻgʻrisidagi ishlarni koʻrib chiqish paytida maxsus vakolatli davlat organi (mansabdor shaxsi) tomonidan huquqbuzarlik holatida jinoyat alomatlari bor degan xulosaga kelingan taqdirda, tegishli materiallar belgilangan tartibda huquqni muhofaza qiluvchi organlarga yuboriladi.

Ruxsat berish va xabardor qilish tartib-taomillari sohasidagi huquqbuzarliklar “Litsenziyalash, ruxsat berish va xabardor qilish tartib-taomillari toʻgʻrisida”gi Oʻzbekiston Respublikasining Qonunida belgilangan tartibda koʻrib chiqiladi.

43. Maxsus vakolatli davlat organining koʻrsatmalari, taqdimnomalari va boshqa hujjatlarini bajarmaslik, shuningdek, davlat geodeziya nazoratini amalga oshiruvchi mansabdor shaxslar faoliyatiga asossiz aralashish hamda yuklatilgan vazifalar va funksiyalarning qonuniy ijro etilishiga toʻsqinlik qilish maqsadida ularga har qanday shaklda taʼsir koʻrsatish taqiqlanadi va bu qonunchilikda belgilangan tartibda javobgarlikka sabab boʻladi.

44. Ushbu Nizom talablarining buzilishida aybdor shaxslar qonunchilikka muvofiq javob beradilar.

Davlat geodeziya nazoratini amalga oshirish tartibi toʻgʻrisidagi nizomga ILOVA

Davlat geodeziya nazoratini amalga oshirish

Bosqichlar Subyektlar Tadbirlar Bajarish muddatlari 1-bosqich Maxsus vakolatli davlat organi Davlat geodeziya nazoratini amalga oshiradi. Doimiy 2-bosqich Maxsus vakolatli davlat organi Tadbirkorlik subyektlarining huquqlari va qonuniy manfaatlarini himoya qilish boʻyicha vakil bilan kelishilgandan soʻng, davlat geodeziya nazoratini amalga oshirish toʻgʻrisidagi maxsus vakolatli davlat organi rahbarining (rahbar oʻrinbosarining) buyrugʻi qabul qilinadi. Geodeziya va kartografiya faoliyati toʻgʻrisidagi qonunchilikning buzilishi kuzatilganda 3-bosqich Maxsus vakolatli davlat organi Maxsus vakolatli davlat organining mansabdor shaxslari davlat geodeziya nazoratini amalga oshiradi va natijalari boʻyicha dalolatnoma tuzadi. 10 ish kuni mobaynida 4-bosqich Maxsus vakolatli davlat organi Dalolatnomani imzolaydi hamda uning bir nusxasini yuridik shaxsning mansabdor shaxsi yoki uning vakiliga yoxud jismoniy shaxsga uni olgan sanani koʻrsatgan holda imzo qoʻydirib topshiradi. 1 ish kuni mobaynida 5-bosqich Maxsus vakolatli davlat organi Yuridik shaxsning mansabdor shaxsi (vakili) yoxud jismoniy shaxs dalolatnomani olishdan bosh tortganda, dalolatnomaga tegishli yozuvni kiritadi va uning bir nusxasini yuridik yoki jismoniy shaxsga pochta orqali yuboradi. 3 ish kunidan kechiktirmay 6-bosqich Maxsus vakolatli davlat organi Ruxsat ber?sh va xabardor qilish tartib-taomillari sohasidagi huquqbuzarliklar huquqbuzarliklar “Litsenziyalash, ruxsat berish va xabardor qilish tartib-taomillari toʻgʻrisida”gi Oʻzbekiston Respublikasining Qonuniga muvofiq koʻrib chiqiladi. Belgilangan tartibda 7-bosqich Maxsus vakolatli davlat organi Geodeziya sohasida aniqlangan maʼmuriy huquqbuzarliklar toʻgʻrisidagi ishlarni koʻrib chiqish va maʼmuriy jazo chorasini qoʻllash Oʻzbekiston Respublikasining Maʼmuriy javobgarlik toʻgʻrisidagi Kodeksiga muvofiq amalga oshiriladi. Belgilangan tartibda

Vazirlar Mahkamasining 2022-yil 14-apreldagi 183-son qaroriga 3-ILOVA

Oʻzbekiston Respublikasi Hukumatining oʻz kuchini yoʻqotgan deb eʼtirof etilayotgan qarorlari

2. Vazirlar Mahkamasining “Oʻzbekiston Respublikasi Hukumatining ayrim qarorlariga oʻzgartirish va qoʻshimchalar kiritish toʻgʻrisida (Oʻzbekiston Respublikasi Prezidentining “Kichik biznes va xususiy tadbirkorlikni yanada rivojlantirish uchun qulay ishbilarmonlik muhitini shakllantirishga doir qoʻshimcha chora-tadbirlar toʻgʻrisida” 2011-yil 24-avgustdagi PF-4354-son Farmoni, Oʻzbekiston Respublikasi Prezidentining “Byurokratik toʻsiqlarni bartaraf etish va tadbirkorlik faoliyati erkinligini yanada oshirish chora-tadbirlari toʻgʻrisida” 2011-yil 25-avgustdagi PQ-1604-son qarori)” 2011-yil 2-noyabrdagi 294-son qaroriga ilovaning 28-bandi .

3. Vazirlar Mahkamasining “Oʻzbekiston Respublikasi Hukumatining ayrim qarorlariga oʻzgartirish va qoʻshimchalar kiritish toʻgʻrisida (Oʻzbekiston Respublikasi Prezidentining “Yerlarni muhofaza qilish va ulardan oqilona foydalanish borasida nazoratni kuchaytirish, geodeziya va kartografiya faoliyatini takomillashtirish, davlat kadastrlari yuritishni tartibga solish chora-tadbirlari toʻgʻrisida” 2017-yil 31-maydagi PF-5065-son Farmoni va Oʻzbekiston Respublikasi Prezidentining “Oʻzbekiston Respublikasi Yer resurslari, geodeziya, kartografiya va davlat kadastri davlat qoʻmitasi faoliyatini yanada takomillashtirish chora-tadbirlari toʻgʻrisida” 2017-yil 31-maydagi PQ-3024-son qarori)” 2017-yil 29-avgustdagi 679-son qaroriga ilovaning 8-bandi .

4. Vazirlar Mahkamasining “Oʻzbekiston Respublikasi Hukumatining ayrim qarorlariga oʻzgartirishlar kiritish toʻgʻrisida (Oʻzbekiston Respublikasi Prezidentining “Ekologiya va atrof-muhitni muhofaza qilish sohasida davlat boshqaruvi tizimini takomillashtirish toʻgʻrisida” 2017-yil 21-apreldagi PF-5024-son Farmoni va Oʻzbekiston Respublikasi Prezidentining “Oʻzbekiston Respublikasi Ekologiya va atrof-muhitni muhofaza qilish davlat qoʻmitasi faoliyatini taʼminlash chora-tadbirlari toʻgʻrisida” 2017-yil 21-apreldagi PQ-2915-son qarori)” 2017-yil 14-noyabrdagi 915-son qaroriga 1-ilovaning 26-bandi .

5. Vazirlar Mahkamasining “Oʻzbekiston Respublikasi Hukumatining ayrim qarorlariga oʻzgartirishlar kiritish toʻgʻrisida (Oʻzbekiston Respublikasi Prezidentining “Oʻzbekiston Respublikasining davlat xavfsizligi tizimini takomillashtirish chora-tadbirlari toʻgʻrisida” 2018-yil 14-martdagi PF-5379-son Farmoni)” 2018-yil 29-maydagi 396-son qaroriga ilovaning 34-bandi .

7. Vazirlar Mahkamasining “Oʻzbekiston Respublikasi Hukumatining ayrim qarorlariga oʻzgartirish va qoʻshimchalar kiritish toʻgʻrisida (“Oʻzbekiston Respublikasining ayrim qonun hujjatlariga yer toʻgʻrisidagi qonun hujjatlarini takomillashtirishga qaratilgan oʻzgartish va qoʻshimchalar kiritish haqida” 2018-yil 24-iyuldagi OʻRQ-487-son Oʻzbekiston Respublikasi Qonuni)” 2019-yil 12-fevraldagi 117-son qaroriga ilovaning 1-bandi .

Oʻzbekiston Respublikasining Bosh vaziri A. ARIPOV

Toshkent sh.,

2022-yil 14-aprel,

183-son

(Qonunchilik maʼlumotlari milliy bazasi, 15.04.2022-y., 09/22/183/0308-son; 04.09.2025-y., 09/25/559/0802-son; 16.12.2025-y., 09/25/791/1167-son; 09.04.2026-y., 09/26/154/0331-son)

lex.uz