UzbekAI

Ўзбекистон Республикаси Ветеринария ва чорвачиликни ривожлантириш давлат қўмитасининг

Қарори

НИЗОМ

Ўзбекистон Республикаси ҳудудига олиб кириладиган давлат ветеринария хизмати назорати остидаги товарларни ишлаб чиқарадиган, қайта ишлайдиган ва сақлайдиган экспорт қилувчи ташкилотлар ва шахслар (хорижий экспорт қилувчилар) реестрини шакллантириш ва юритиш тартиби тўғрисидаги низомни тасдиқлаш ҳақида

Ўзбекистон Республикаси Вазирлар Маҳкамасининг 2020 йил 11 майдаги 277-сон «Давлат ветеринария хизмати назорати остидаги товарлар хавфсизлигини таъминлаш бўйича қўшимча чора-тадбирлар тўғрисида»ги қарорига асосан Ўзбекистон Республикаси Ветеринария ва чорвачиликни ривожлантириш давлат қўмитаси қарор қилади:

1. Ўзбекистон Республикаси ҳудудига олиб кириладиган давлат ветеринария хизмати назорати остидаги товарларни ишлаб чиқарадиган, қайта ишлайдиган ва сақлайдиган экспорт қилувчи ташкилотлар ва шахслар (хорижий экспорт қилувчилар) реестрини шакллантириш ва юритиш тартиби тўғрисидаги низом иловага мувофиқ тасдиқлансин.

2. Мазкур қарор 2022 йил 1 сентябрдан эътиборан кучга киради.

Келишилди:

Ўзбекистон Республикаси Ветеринария ва чорвачиликни ривожлантириш давлат қўмитасининг 2022 йил 12 мартдаги 12-сон қарорига ИЛОВА

Ўзбекистон Республикаси ҳудудига олиб кириладиган давлат ветеринария хизмати назорати остидаги товарларни ишлаб чиқарадиган, қайта ишлайдиган ва сақлайдиган экспорт қилувчи ташкилотлар ва шахслар (хорижий экспорт қилувчилар) реестрини шакллантириш ва юритиш тартиби тўғрисидаги

Мазкур Низом Ўзбекистон Республикаси ҳудудига олиб кириладиган давлат ветеринария хизмати назорати остидаги товарларни (бундан буён матнда назорат остидаги товарлар деб юритилади) ишлаб чиқарадиган, қайта ишлайдиган ва сақлайдиган экспорт қилувчи ташкилотлар ва шахслар (хорижий экспорт қилувчилар) реестрини шакллантириш ва юритиш тартибини белгилайди.

1-боб. Умумий қоидалар

1. Ушбу Низомда қуйидаги асосий тушунчалардан фойдаланилади:

аудит — масъул органнинг ветеринария назорати хизмати томонидан назорат остидаги товарларнинг ветеринария, ветеринария-санитария жиҳатдан хавфсизлигини таъминлаш бўйича амалга ошириладиган фаолиятни баҳолаш;

инспекция — хорижий экспорт қилувчилар ва уларнинг назорат остидаги товарларни ишлаб чиқариш, қайта ишлаш ва сақлаш жараёнларида иштирок этувчи барча объектларини бевосита жойига чиққан ҳолда ҳамда назорат остидаги товарлардан намуналар олиш йўли билан текшириш;

ваколатли орган — Ўзбекистон Республикаси Қишлоқ хўжалиги вазирлиги ҳузуридаги Ветеринария ва чорвачиликни ривожлантириш қўмитаси;

масъул орган — хорижий давлатнинг давлат ветеринария назоратини амалга оширувчи махсус ваколатли органи;

хорижий экспорт қилувчилар — Ўзбекистон Республикаси ҳудудига олиб кириладиган назорат остидаги товарларни ишлаб чиқарувчи, қайта ишловчи ва сақловчи экспорт қилувчи ташкилотлар ва шахслар;

инспектор — ваколатли орган ва унинг ҳудудий бошқармаларидаги давлат ветеринария инспекторлари;

эксперт — олий маълумот ва давлат ветеринария хизматида камида беш йиллик иш стажига эга бўлган ваколатли орган тизимидаги ветеринария мутахассиси ҳамда ваколатли орган томонидан келишув асосида жалб этиладиган, аудит ва инспекция ўтказиш бўйича кўникмага эга бўлган эксперт;

эпизоотия — тегишли ҳудудда ҳайвонларнинг ўта хавфли ва бошқа юқумли касалликлари тарқалиши;

назорат остидаги объектлар — хорижий экспорт қилувчиларнинг назорат остидаги товарларни ишлаб чиқариш, қайта ишлаш ва сақлаш жараёнларида иштирок этувчи барча объектлари;

назорат остидаги товарлар — қонунчилик ҳужжатларида белгиланган давлат ветеринария хизмати назорати остидаги товарлар;

Реестр — Ўзбекистон Республикаси ҳудудига олиб кириладиган назорат остидаги товарларни ишлаб чиқарадиган, қайта ишлайдиган ва сақлайдиган экспорт қилувчи ташкилотлар ва шахсларнинг (хорижий экспорт қилувчилар) электрон реестри;

Реестрга киритиш тўғрисидаги ариза — масъул органнинг ваколатли органга хорижий экспорт қилувчиларни Реестрга киритиш ҳақидаги мурожаати;

хорижий давлат расмий назорат тизими — масъул органнинг назорат остидаги товарларни ветеринария, ветеринария-санитария жиҳатдан хавфсизлигини таъминлаш бўйича ветеринария назорати тизими;

Ўзбекистон Республикасининг талаблари — ветеринария соҳасидаги қонунчилик ҳужжатлари, шунингдек давлат органлари ва бошқа органлар, юридик ҳамда жисмоний шахслар риоя этиши лозим бўлган ветеринария, ветеринария-санитария қоидалари ва нормалари.

2. Ўзбекистон Республикаси Вазирлар Маҳкамасининг 2020 йил 11 майдаги 277-сон «Давлат ветеринария хизмати назорати остидаги товарлар хавфсизлигини таъминлаш бўйича қўшимча чора-тадбирлар тўғрисида»ги қарорига асосан назорат остидаги товарларни Ўзбекистон Республикаси ҳудудига олиб киришга Реестрга киритилган хорижий экспорт қилувчиларга рухсат берилади.

Ушбу Низом талаблари фавқулодда вазиятларда, халқаро кўргазмаларда қатнашишда, лаборатория таҳлиллари учун намуналарда, шунингдек дипломатик корпус, ўқув муассасалари, илмий ва давлат мақсадлари учун олиб келинадиган назорат остидаги товарларга нисбатан татбиқ этилмайди.

3. Хорижий давлатлардан назорат остидаги товарларни Ўзбекистон Республикасига олиб киришга ветеринария, ветеринария-санитария қоидалари ва нормаларига риоя этилган ҳолда йўл қўйилади.

4. Бошқа давлатлар ҳудудида ҳайвонларнинг ўта хавфли юқумли касалликлари, ҳайвонларнинг келиб чиқиш сабаблари номаълум бўлган ялпи касалликлари ва ҳайвонларнинг илгари қайд этилмаган юқумли касалликлари пайдо бўлган тақдирда назорат остидаги товарларни олиб ўтишга тақиқ (чеклов) жорий этиш ҳамда уларни олиб ўтишни тиклаш тўғрисидаги қарор Ўзбекистон Республикаси Бош давлат ветеринария инспектори томонидан қабул қилинади.

4 1 . Аудит ва инспекция жараёнларида хорижий давлатларнинг муайян ҳайвон касалликлари бўйича ҳудудларга ажратилганлиги (регионализация) шунингдек, кичик ҳудудлар — компартментлар (ажратилган хавфсизлик тоифалари белгиланган зоналар) мавжудлиги ҳисобга олинади.

2-боб. Реестрни шакллантириш ва юритишга доир умумий талаблар

5. Хорижий экспорт қилувчиларни Реестрга киритиш ваколатли органнинг инспекторлари ва экспертлари томонидан жойига чиққан ҳолда ўтказиладиган аудит ва инспекция натижаларига кўра ёки масъул орган томонидан мазкур Низомнинг 6-бобига мувофиқ бериладиган кафолат асосида амалга оширилиши мумкин.

6. Аудит ва инспекция мазкур Низом ва ветеринария соҳасидаги бошқа қонунчилик ҳужжатлари, шунингдек Бутунжаҳон ҳайвонлар соғлиғини сақлаш ташкилотининг (бундан буён матнда ХЭБ деб юритилади) кодекслари, Кодекс Алиментариус комиссияси стандартлари ҳамда ветеринария, ветеринария-санитария қоидалари ва нормаларининг (бундан буён матнда ветеринария соҳасидаги назорат ҳужжатлари деб юритилади) талаблари асосида ўтказилади.

7. Хорижий экспорт қилувчиларни Реестрга киритиш бўйича аудит ва инспекция масъул органнинг Реестрга киритиш тўғрисидаги аризасига асосан ўтказилади.

8. Хорижий давлат расмий назорат тизими ва хорижий экспорт қилувчиларнинг назорат остидаги объектлари Ўзбекистон Республикаси талаблари ва ветеринария соҳасидаги назорат ҳужжатларига мувофиқлиги тўғрисидаги кафолат асосида хорижий экспорт қилувчини Реестрга киритиш ҳақида масъул орган томонидан ваколатли органга йўлланадиган мурожаатлар Ўзбекистон Республикаси ҳудудида кўриб чиқилади.

9. Аудит ва инспекция натижалари хорижий мамлакат ҳудудидаги эпизоотик вазиятга, ветеринария соҳасидаги назорат ҳужжатлари талабларига, шунингдек эпизоотик мониторинг маълумотларига асосланиши лозим.

10. Инспектор ва экспертлар аудит ва инспекцияни ўтказиш жараёнида мустақил ҳаракат қилади.

11. Инспектор ва экспертлар аудит ва инспекция ўтказиш жараёнида хорижий давлат расмий назорат тизими ҳамда хорижий экспорт қилувчилар ҳақидаги маълумотлар учинчи шахсларга ошкор этилмаслигини таъминлаши лозим.

12. Масъул орган ўз давлатининг қонунчилигида Реестрга киритилган хорижий экспорт қилувчиларнинг назорат остидаги товарларини ишлаб чиқариш, қайта ишлаш ва сақлаш жараёнлари ёки хорижий давлат расмий назорат тизими билан боғлиқ ўзгаришлар ҳақида ваколатли органни доимий равишда хабардор қилиб боради.

3-боб. Реестрга киритиш тўғрисидаги аризаларни кўриб чиқиш, аудит ва инспекция тайинлаш ёки уларни тайинлашни рад этиш

13. Масъул орган ваколатли органга хорижий экспорт қилувчиларни Реестрга киритиш тўғрисидаги ариза билан ёзма ёки ваколатли органнинг расмий сайти орқали электрон шаклда мурожаат қилади.

14. Реестрга киритиш тўғрисидаги аризада қуйидаги маълумотлар кўрсатилиши керак:

назорат остидаги товарларни экспорт қиладиган хорижий давлатнинг номи;

масъул органнинг расмий номи, жойлашган манзили (почта манзили, шу жумладан электрон почта манзили), телефон ва факс рақамлари;

назорат остидаги товарнинг номи ва Ўзбекистон Республикаси ташқи иқтисодий фаолиятининг товар номенклатураси (бундан буён матнда ТИФ ТН деб юритилади) бўйича коди;

назорат остидаги товарнинг келиб чиқиш жойи (алоҳида маъмурий-ҳудудий бирликни кўрсатган ҳолда (масалан, вилоят, штат, провинция);

хорижий экспорт қилувчининг расмий номи, жойлашган манзили (почта манзили, шу жумладан электрон почта манзили), телефон ва факс рақамлари, шунингдек унга хорижий давлатнинг тегишли органи томонидан берилган идентификация рақами (СТИР).

15. Ваколатли орган масъул органнинг Реестрга киритиш тўғрисидаги аризасини у келиб тушган кундан бошлаб 15 календарь кун ичида кўриб чиқади.

Бунда, масъул органнинг давлатидаги эпизоотик вазият барқарор ҳамда Реестрга киритиш тўғрисидаги аризада кўрсатилган назорат остидаги товарни олиб ўтишга Ўзбекистон Республикаси Бош давлат ветеринария инспекторининг қарорига асосан тақиқ (чеклов) жорий этилмаган бўлса, ваколатли орган хорижий давлат расмий назорат тизимини аудитдан ўтказиш юзасидан саволнома (бундан буён матнда аудит саволномаси деб юритилади) тайёрлайди ҳамда уни ариза келиб тушган тартибда масъул органга юборади.

16. Агар масъул органнинг давлатидаги эпизоотик вазият мураккаб ёки Реестрга киритиш тўғрисидаги аризада кўрсатилган назорат остидаги товарни олиб ўтишга Ўзбекистон Республикаси Бош давлат ветеринария инспекторининг қарорига асосан тақиқ (чеклов) жорий этилган бўлса, ушбу аризани кўриб чиқиш мазкур давлатда эпизоотик вазият барқарорлашгунга қадар ёки назорат остидаги товарлар бўйича тақиқ (чеклов) бекор қилингунга қадар тўхтатиб турилади ва бу ҳақда масъул органга хабар берилади.

17. Аудит саволномасида масъул орган томонидан тақдим этилиши лозим бўлган қуйидаги маълумотлар кўрсатилади:

масъул органнинг тузилмаси, ваколатлари, вазифа ва функциялари ҳамда қонунчилик ҳужжатларига мувофиқ ветеринария назорати тизимининг аҳволи;

хорижий давлатнинг соҳага оид қонунчилик ҳужжатлари, ветеринария, ветеринария-санитария қоидалари ва нормалари, регламентлари ҳамда стандартлари рўйхати ва уларнинг матни;

хорижий давлат расмий назорат тизимининг кадрлар билан таъминланганлик ҳолати;

хорижий давлат расмий назорат тизими эпизоотияга қарши тадбирларни амалга ошириш учун молиявий ресурслар билан таъминланганлиги;

одамлар ҳамда ҳайвонларнинг ҳаёти ва соғлиғини улар учун умумий бўлган ва бошқа юқумли касалликлардан муҳофаза қилиш тизимининг мавжудлиги;

ветеринария соҳасида сифатни бошқариш сиёсати ҳамда уни таъминлаш тизимининг мавжудлиги;

ишлаб чиқариш тизимини ветеринария-санитария жиҳатидан баҳолаш ва назорат қилиш дастурининг мавжудлиги;

қонунчилик ҳужжатларига асосан эпизоотик мониторинг ва ҳайвонлар идентификацияси тизимининг мавжудлиги;

аккредитацияланган тегишли лабораторияларнинг мавжудлиги;

ветеринария соҳасида хавфни таҳлил қилиш тизимининг мавжудлиги;

назорат остидаги товарларни сертификатлаш тизимининг мавжудлиги;

хорижий давлатдаги ҳайвонларнинг бош сони (статистик таҳлили);

ХЭБга хабар берилиши лозим бўлган ҳайвонлар касалликлари ва улар соғлиғининг ҳолати бўйича ХЭБга хабар бериш тизимининг мавжудлиги.

18. Масъул орган аудит саволномасини олган кундан бошлаб 30 календарь кундан кечиктирмай ваколатли органга аудит саволномасида сўралган маълумотларни келишилган шаклда (ёзма ёки электрон) тақдим этиши лозим.

19. Ваколатли орган масъул орган томонидан аудит саволномаси асосида тақдим этилган маълумотларни 60 календарь кундан кечиктирмай ўрганиб чиқади ҳамда ўрганиш натижаларига кўра қуйидаги қарорлардан бирини қабул қилади:

хорижий давлат расмий назорат тизимини аудитдан ва назорат остидаги объектни инспекциядан ўтказиш тўғрисида;

хорижий давлат расмий назорат тизимини аудитдан ва назорат остидаги объектни инспекциядан ўтказишни рад этиш тўғрисида.

20. Қуйидагилар ваколатли орган томонидан хорижий давлат расмий назорат тизимини аудитдан ва назорат остидаги объектни инспекциядан ўтказишни рад этиш тўғрисида қарор қабул қилишга асос бўлади:

ушбу хорижий давлат ҳудудида ҳайвонларнинг ўта хавфли юқумли касалликлари, ҳайвонларнинг келиб чиқиш сабаблари номаълум бўлган ялпи касалликлари ва ҳайвонларнинг илгари қайд этилмаган юқумли касалликлари пайдо бўлганлиги сабабли эпизоотик вазиятнинг мураккаблиги;

Реестрга киритиш тўғрисидаги аризада кўрсатилган назорат остидаги товарларни олиб ўтишга Ўзбекистон Республикаси Бош давлат ветеринария инспекторининг қарорига асосан тақиқ (чеклов) жорий этилганлиги;

масъул орган томонидан 30 календарь кун ичида аудит саволномасида сўралган тегишли маълумотлар ваколатли органга тақдим этилмаганлиги;

аудит саволномасига жавобан масъул орган томонидан тегишли маълумотларнинг тўлиқ ҳажмда тақдим қилинмаганлиги;

масъул орган томонидан тақдим этилган маълумотлар ишончсиз ёки бузиб кўрсатилганлиги ёхуд ушбу маълумотлар хорижий мамлакатдаги ҳақиқий эпизоотик вазиятни ифода этмаслиги;

ХЭБнинг Халқаро ветеринария кодекслари талабларига мувофиқ назорат остидаги товарларнинг хавф даражасини баҳолаш натижасида уларнинг ветеринария хавфи даражаси ўрта ёки юқори деб белгиланганлиги;

аудит саволномаси бўйича масъул орган томонидан тақдим қилинган тегишли маълумотларни кўриб чиқиш натижасида хорижий давлат расмий назорат тизими Ўзбекистон Республикаси талаблари ва ветеринария соҳасидаги назорат ҳужжатларига мувофиқ эмас деб ҳисобланганлиги.

21. Ваколатли орган томонидан аудит ва инспекция ўтказиш ёки улар ўтказишни рад этиш тўғрисидаги қарор, у қабул қилинган кундан эътиборан беш иш кунидан кечиктирмай масъул органга юборилиши лозим.

22. Ваколатли орган томонидан масъул органга аудит ва инспекция ўтказиш тўғрисидаги қарорга қўшимча равишда қуйидаги маълумотлар юборилади:

аудит ва инспекцияни ўтказиш мақсадлари;

аудит ва инспекцияни ўтказиш учун хорижий давлатга юбориладиган инспектор ва экспертлар рўйхати;

масъул органнинг аудит ўтказилиши режалаштирилган таркибий бўлинмалари ва фаолият йўналишлари рўйхати;

назорат остидаги товардан келиб чиқиб, инспекция доирасида кузатиш учун ташриф буюрилиши мумкин бўлган хом ашё етказиб берувчилар (хорижий экспорт қилувчиларга) ҳамда назорат остидаги товарни ишлаб чиқариш, қайта ишлаш ва сақлашда иштирок этувчи бошқа корхоналар рўйхати;

аудит ва инспекция ўтказилиши учун инспектор ҳамда экспертларга келишилган тилда (ўзбек, рус, инглиз ёки бошқа хорижий тилда) масъул орган томонидан тақдим этилиши лозим бўлган ҳужжатлар рўйхати.

23. Аудит ва инспекция ўтказишни бошлаш муддатлари масъул орган билан келишилган ҳолда белгиланади.

24. Аудит ва инспекция ўтказиш билан боғлиқ харажатлар, агар халқаро шартномаларда бошқача қоида назарда тутилмаган бўлса, Давлат органлари ва ташкилотлари ходимлари Ўзбекистон Республикаси ташқарисига хизмат сафарига юборилганда хизмат сафари харажатлари учун маблағлар бериш тартиби тўғрисидаги низомга (рўйхат рақами 2730, 2015 йил 19 ноябрь) мувофиқ масъул орган томонидан қопланади.

4-боб. Хорижий давлат расмий назорат тизимини аудитдан ўтказиш

25. Назорат остидаги товарларни ишлаб чиқариш, қайта ишлаш ва сақлаш билан боғлиқ жараёнларнинг ветеринария, ветеринария-санитария жиҳатдан хавфсизлиги ветеринария назорати остида эканлигини ўрганиш, шунингдек хорижий давлат расмий назорат тизими Ўзбекистон Республикаси талаблари ва ветеринария соҳасидаги назорат ҳужжатларига мувофиқлигини аниқлаш мақсадида ваколатли орган томонидан хорижий давлат расмий назорат тизимида аудит ўтказилади.

26. Аудитни ўтказиш учун ваколатли орган томонидан хорижий давлат ҳудудига инспектор ва экспертлардан иборат мутахассислар гуруҳи (бундан буён матнда мутахассислар деб юритилади) юборилади.

27. Аудит ваколатли органга аудит саволномасига жавобан масъул орган томонидан тақдим этилган маълумотларнинг ҳаққонийлиги ва ушбу маълумотлар хорижий давлат расмий назорат тизимининг ҳақиқий аҳволига мос ёки мос эмаслигини таққослаш йўли билан текшириш орқали ўтказилади.

28. Аудитни ўтказиш беш иш куни ичида якунланиши лозим.

29. Аудит натижасида масъул орган томонидан аудит саволномасига жавобан тақдим этилган маълумотлар:

тасдиқланса ва хорижий давлат расмий назорат тизимининг ҳақиқий ҳолатига мос деб ҳисобланса, хорижий давлат расмий назорат тизими Ўзбекистон Республикаси талаблари ва ветеринария соҳасидаги назорат ҳужжатларига мувофиқ деб топилади;

тасдиқланмаса ва хорижий давлат расмий назорат тизимининг ҳақиқий ҳолатига мос эмас деб ҳисобланса, хорижий давлат расмий назорат тизими Ўзбекистон Республикаси талаблари ва ветеринария соҳасидаги назорат ҳужжатларига мувофиқ эмас деб топилади.

30. Хорижий давлат расмий назорат тизими Ўзбекистон Республикаси талаблари ва ветеринария соҳасидаги назорат ҳужжатларига мувофиқ эмас деб топилганда инспекция ўтказилмайди.

31. Масъул орган аудит натижасида хорижий давлат расмий назорат тизимини Ўзбекистон Республикаси талаблари ва ветеринария соҳасидаги назорат ҳужжатларига мувофиқ эмас деб топишга асос бўлган камчиликларни бартараф этган ҳолда ушбу камчиликлар бартараф этилганлигини тасдиқловчи маълумотлар билан бирга ваколатли органга қайтадан мурожаат қилиши мумкин. Бунда, ушбу мурожаат ваколатли орган томонидан мазкур Низомнинг 3-бобига мувофиқ умумий асосларда кўриб чиқилади.

32. Бир турдаги назорат остидаги товар бўйича аввал ўтказилган аудит натижасида хорижий давлат расмий назорат тизими Ўзбекистон Республикаси талаблари ва ветеринария соҳасидаги назорат ҳужжатларига мувофиқ деб топилган бўлса, шу давлатда айнан ушбу турдаги назорат остидаги товарни ишлаб чиқарадиган, қайта ишлайдиган ва сақлайдиган бошқа хорижий экспорт қилувчиларни Реестрга киритишда хорижий давлат расмий назорат тизимини қайтадан аудитдан ўтказиш талаб этилмайди.

5-боб. Хорижий экспорт қилувчиларнинг назорат остидаги объектларини инспекциядан ўтказиш

33. Аудит натижасига кўра хорижий давлат расмий назорат тизими Ўзбекистон Республикаси талаблари ва ветеринария соҳасидаги назорат ҳужжатларига мувофиқ деб топилганда масъул органнинг Реестрга киритиш тўғрисидаги аризасида кўрсатилган хорижий экспорт қилувчининг назорат остидаги объектларида молиявий-хўжалик фаолиятига аралашмаган ҳолда инспекция ўтказилади.

34. Инспекция хорижий экспорт қилувчиларнинг назорат остидаги объектларида ишлаб чиқариш, қайта ишлаш ва сақлаш жараёнлари Ўзбекистон Республикаси талаблари ва ветеринария соҳасидаги назорат ҳужжатларига мувофиқ амалга оширилишини аниқлаш мақсадида ўтказилади.

35. Инспекция бошланишидан аввал масъул орган билан келишилган холда мутахассислар томонидан инспекция давомида ўрганиладиган назорат остидаги объектлар рўйхати, номи ҳамда инспекция ўтказиш муддатлари кўрсатиладиган инспекция ўтказиш режаси тасдиқланиши ва масъул органга тақдим этилиши керак.

36. Инспекция аудит ўтказишда бевосита иштирок этган мутахассислар томонидан аудит якунланган кундан кейинги иш кунидан бошлаб беш иш куни (агар инспекция ўтказиладиган хорижий экспорт қилувчилар сони биттадан ортиқ бўлса, ҳар бирида беш иш куни) давомида ўтказилади.

37. Инспекцияни ўтказиш давомида текшириладиган назорат остидаги объектлардан ташқари хорижий экспорт қилувчига хом ашё етказиб берувчи бошқа корхоналарга қарашли объектларга, агар бундай ташрифлар инспекция ўтказиш режасида назарда тутилган бўлса, масъул орган билан келишилган ҳолда ва фақат кузатиш мақсадида ташриф буюрилиши мумкин.

38. Инспекция ўтказиш давомида инспекция ўтказилаётган хорижий экспорт қилувчи ишлаб чиқарган, қайта ишлаган ёки сақлаган назорат остидаги товарлардан, шунингдек уларни ишлаб чиқаришда фойдаланилган хом ашёлардан ушбу Низомнинг 7-бобига мувофиқ танлов асосида намуналар олинади.

39. Инспекция давомида назорат остидаги объектларнинг Ўзбекистон Республикаси талаблари ва ветеринария соҳасидаги назорат ҳужжатларига номувофиқлиги билан боғлиқ ва жойида бартараф этилиши мумкин бўлган камчиликлар аниқланган тақдирда мутахассислар мазкур камчиликлар тўғрисидаги маълумотларни масъул орган ёки хорижий экспорт қилувчининг сўровига кўра инспекция якунида тақдим этади.

Бунда, хорижий экспорт қилувчи ушбу камчиликлар бартараф этилганлиги ёки уларни бартараф этиш чоралари кўрилаётганлиги ҳақидаги маълумотларни мутахассисларга, улар ушбу хорижий мамлакат ҳудудидан чиқиб кетишидан аввал масъул орган орқали тақдим қилиши мумкин. Мазкур маълумотлар мутахассислар томонидан инспекция натижалари бўйича ҳисобот тузишда инобатга олиниши керак.

40. Инспекция натижалари юзасидан ваколатли орган томонидан инспекция якунланган кундан эътиборан 90 календарь кундан кечиктирмай ушбу инспекцияни ўтказган мутахассислар иштирокида дастлабки ҳисобот тайёрланиши ва масъул органга юборилиши лозим.

41. Масъул орган ваколатли органнинг дастлабки ҳисоботини олган кундан эътиборан 30 календарь кундан кечиктирмай дастлабки ҳисобот юзасидан ўз таклиф ва эътирозлари (мавжуд бўлса), шунингдек аниқланган камчиликлар (мавжуд бўлса) бартараф этилганлигини ёки уларни бартараф этиш чоралари кўрилаётганлигини тасдиқловчи маълумотлар кўрсатилган жавоб хатини ваколатли органга юбориши мумкин. Масъул орган томонидан мазкур муддат ичида ваколатли органга жавоб хати юборилмаслиги масъул орган дастлабки ҳисоботга тўлиқ рози деб ҳисоблашга асос бўлади.

42. Ваколатли орган масъул органнинг жавоб хатини олган кундан эътиборан ёки масъул орган жавоб хати юбормаган тақдирда, мазкур Низомнинг 41-бандида белгиланган муддат якунланган кундан эътиборан 60 календарь кун ичида масъул органга аудит ва инспекция натижалари бўйича якуний ҳисоботни юбориши лозим.

43. Якуний ҳисоботда аудит ҳамда инспекциядан ўтказилган ҳар бир хорижий экспорт қилувчи бўйича алоҳида хулоса, шунингдек, агар хорижий экспорт қилувчининг назорат остидаги объектларида камчиликлар аниқланган бўлса, уларни бартараф этиш юзасидан амалга оширилиши керак бўлган чоралар бўйича тавсиялар кўрсатилиши керак.

44. Назорат остидаги товарларни ишлаб чиқариш, қайта ишлаш ва сақлаш жараёнлари Ўзбекистон Республикаси талаблари ва ветеринария соҳасидаги назорат ҳужжатларига мувофиқлигидан, шунингдек назорат остидаги товарлар ва уларни ишлаб чиқаришда фойдаланилган хом ашёлардан танлов асосида олинган намуналарнинг лаборатория текширувлари натижаларидан келиб чиқиб, якуний ҳисоботда ҳар бир хорижий экспорт қилувчи бўйича алоҳида қуйидаги қарорлардан бири кўрсатилади:

хорижий экспорт қилувчини Реестрга киритиш ҳақида;

хорижий экспорт қилувчини Реестрга киритишни рад этиш ҳақида.

45. Ваколатли орган якуний ҳисоботни ўзининг расмий сайтида эълон қилади. Бунда, эълон қилинадиган якуний ҳисоботда Реестрга киритилиши рад этилган хорижий экспорт қилувчиларни идентификация қилиш имконини берувчи маълумотлар (масалан, номи, манзили, хорижий давлатнинг тегишли органи томонида берилган идентификация рақами (СТИР) кўрсатилмайди.

46. Ваколатли орган Реестрга киритилган хорижий экспорт қилувчилар бўйича хорижий давлат расмий назорат тизими ҳамда назорат остидаги объектларни Эпизоотик вазиятни ўрганиш мақсадида мутахассисларни хорижий мамлакатларга юбориш заруратини аниқлаш мезонлари ва юбориш тартиби тўғрисидаги низомда (рўйхат рақами 3198, 2019 йил 29 ноябрь) белгиланган тартибда ўрганиб бориши мумкин.

6-боб. Кафолат бериш

47. Масъул орган ўз мамлакатидаги расмий назорат тизими ва хорижий экспорт қилувчиларнинг назорат остидаги объектлари Ўзбекистон Республикаси талаблари ва ветеринария соҳасидаги назорат ҳужжатларига мувофиқлиги тўғрисида кафолат (бундан буён матнда кафолат деб юритилади) берган ҳолда хорижий экспорт қилувчиларини аудит ва инспекция ўтказмасдан Реестрга киритишни сўраб ваколатли органга ёзма ёки электрон шаклда мурожаат (бундан буён матнда кафолат бериш ҳақидаги мурожаат деб юритилади) қилиши мумкин.

48. Масъул органнинг кафолати ҳар бир хорижий экспорт қилувчи учун назорат остидаги товарнинг ТИФ ТН коди бўйича алоҳида тақдим этилиши лозим.

49. Масъул органнинг кафолат бериш ҳақидаги мурожаатида мазкур Низомнинг 14 ва 17-бандларига мувофиқ Реестрга киритиш тўғрисидаги ариза ва аудит саволномасида сўралган барча маълумотлар кўрсатилиши керак.

50. Масъул органнинг кафолат бериш ҳақидаги мурожаати у келиб тушган кундан эътиборан 60 календарь кундан кечиктирмай ваколатли орган томонидан кўриб чиқилади.

51. Масъул органнинг кафолат бериш ҳақидаги мурожаатини кўриб чиқишда ваколатли орган томонидан қуйидагилар инобатга олинади:

хорижий давлатнинг соҳага оид қонунчилик ҳужжатлари, ветеринария, ветеринария-санитария қоидалари ва нормалари, регламентлари ҳамда стандартларининг мавжудлиги;

масъул органнинг тузилмаси, ваколатлари, вазифа ва функциялари ҳамда қонунчилик ҳужжатларига мувофиқ ветеринария назорати тизимининг аҳволи;

қонунчилик ҳужжатларига асосан эпизоотик мониторинг ва ҳайвонлар идентификацияси тизимининг мавжудлиги;

ветеринария соҳасида хавфни таҳлил қилиш тизимининг мавжудлиги;

назорат остидаги товарларни сертификатлаш тизимининг мавжудлиги;

ХЭБга хабар берилиши лозим бўлган ҳайвонлар касалликлари ва улар соғлиғининг ҳолати бўйича ХЭБга хабар бериш тизимининг мавжудлиги.

ветеринария соҳасида сифатни бошқариш сиёсати ҳамда уни таъминлаш тизимининг мавжудлиги;

ишлаб чиқариш тизимини ветеринария-санитария жиҳатидан баҳолаш ва назорат қилиш дастурининг мавжудлиги;

масъул органнинг аввал тақдим этилган кафолатлари бўйича Реестрга киритилган хорижий экспорт қилувчилар томонидан Ўзбекистон Республикаси талаблари ва ветеринария соҳасидаги назорат ҳужжатларига риоя қилинганлик ҳолати;

хорижий давлат ҳудудини ҳайвонларнинг юқумли касалликлари олиб кирилишидан муҳофаза қилишнинг таъминланганлиги;

хорижий давлатдаги эпизоотик вазият;

кафолат берилаётган хорижий экспорт қилувчиларнинг назорат остидаги товарларини олиб ўтишга Ўзбекистон Республикаси Бош давлат ветеринария инспекторининг қарорига асосан тақиқ (чеклов) жорий этилганлиги;

назорат остидаги товарларни ушбу хорижий мамлакатдан Ўзбекистон Республикаси ҳудудига олиб ўтиш бўйича ваколатли орган томонидан ўтказилган мониторинг натижалари (мавжуд бўлса);

назорат остидаги товарлар бўйича масъул орган томонидан ўтказилган мониторинг натижалари;

кафолат берилиши назарда тутилаётган хорижий экспорт қилувчилар фаолиятида ветеринария, ветеринария-санитария қоидалари ва нормалари талабларига риоя этилишининг ҳолатини масъул орган томонидан доимий равишда назорат қилиш тизимининг мавжудлиги;

муқаддам ушбу хорижий мамлакатдаги хорижий экспорт қилувчиларни ваколатли орган томонидан инспекциядан ўтказишнинг натижалари (мавжуд бўлса);

хорижий экспорт қилувчиларнинг Ўзбекистон Республикаси талаблари ва ветеринария соҳасидаги назорат ҳужжатларига мувофиқлигини тасдиқловчи бошқа маълумотлар (мавжуд бўлса).

52. Масъул органнинг кафолат бериш ҳақидаги мурожаатини мазкур Низомнинг 51-бандига мувофиқ кўриб чиқиш натижасида ваколатли орган қуйидаги қарорлардан бирини қабул қилади:

масъул органнинг кафолати асосида хорижий экспорт қилувчини Реестрга киритиш мумкинлиги ҳақида;

масъул органнинг кафолати асосида хорижий экспорт қилувчини Реестрга киритишни рад этиш ҳақида.

53. Қуйидагилар масъул органнинг кафолати асосида хорижий экспорт қилувчини Реестрга киритишни рад этиш ҳақида қарор қабул қилишга асос бўлади:

ушбу хорижий давлат ҳудудида ҳайвонларнинг ўта хавфли юқумли касалликлари, ҳайвонларнинг келиб чиқиш сабаблари номаълум бўлган ялпи касалликлари ва ҳайвонларнинг илгари қайд этилмаган юқумли касалликлари пайдо бўлганлиги сабабли эпизоотик вазиятнинг мураккаблиги;

кафолат бериш ҳақидаги мурожаатда кўрсатилган назорат остидаги товарларни олиб ўтишга Ўзбекистон Республикаси Бош давлат ветеринария инспекторининг қарорига асосан тақиқ (чеклов) жорий этилганлиги;

мазкур Низомнинг 14 ва 17-бандларига мувофиқ Реестрга киритиш тўғрисидаги ариза ва аудит саволномасида сўралган тегишли маълумотлар масъул орган томонидан тўлиқ ҳажмда тақдим қилинмаганлиги;

масъул орган томонидан тақдим этилган маълумотлар ишончсиз ёки бузиб кўрсатилганлиги ёхуд ушбу маълумотлар хорижий мамлакатдаги ҳақиқий эпизоотик вазиятни ифода этмаслиги;

ХЭБнинг Халқаро ветеринария кодекслари талабларига мувофиқ назорат остидаги товарларнинг хавф даражасини баҳолаш натижасида уларнинг ветеринария хавфи даражаси ўрта ёки юқори деб белгиланганлиги;

масъул орган томонидан тақдим қилинган маълумотларни кўриб чиқиш натижасида хорижий давлат расмий назорат тизими ва назорат остидаги объектлар Ўзбекистон Республикаси талаблари ва ветеринария соҳасидаги назорат ҳужжатларига мувофиқ эмас деб топилганлиги.

54. Кафолат бериш ҳақидаги мурожаат бўйича ваколатли органнинг қарори қабул қилинган кундан эътиборан беш иш кунидан кечиктирмай масъул органга юборилиши керак.

55. Масъул орган ваколатли органнинг кафолат асосида хорижий экспорт қилувчини Реестрга киритишни рад этиш ҳақидаги қарорини олган кундан эътиборан 30 календарь кундан кечиктирмай ушбу қарор юзасидан ўз таклиф ва эътирозлари (мавжуд бўлса), шунингдек, агар камчиликлар аниқланган бўлса, уларни бартараф этиш чоралари кўрилаётганлигини тасдиқловчи маълумотлар кўрсатилган жавоб хатини юбориши мумкин. Масъул орган томонидан ушбу муддат ичида ваколатли органга жавоб хати юборилмаслиги масъул орган ваколатли органнинг кафолат бериш ҳақидаги мурожаат бўйича қарорига тўлиқ рози деб ҳисоблашга асос бўлади.

56. Масъул орган ваколатли органнинг кафолат асосида хорижий экспорт қилувчини Реестрга киритишни рад этиш ҳақидаги қарори юзасидан жавоб хати юборганда ушбу жавоб хати ваколатли орган томонидан 15 календарь кун ичида кўриб чиқилиши ҳамда агар ваколатли органнинг қарорида кўрсатилган камчиликлар бартараф этилган бўлса, хорижий экспорт қилувчини Реестрга киритишни рад этиш ҳақидаги қарор ўзгартирилиши лозим.

57. Ваколатли орган масъул органнинг кафолат бериш ҳақидаги мурожаатини кўриб чиқиш натижаси бўйича якуний қарорини у қабул қилинган кундан эътиборан беш иш кунидан кечиктирмай масъул органга юбориши керак.

7-боб. Инспекция жараёнида назорат остидаги товарлардан намуналар олиш

58. Инспекцияни ўтказиш жараёнида назорат остидаги товарларнинг, шунингдек уларни ишлаб чиқаришда фойдаланилган хом ашёнинг ветеринария, ветеринария-санитария қоидалари ва нормалари талабларига мувофиқлигини аниқлаш мақсадида лаборатория текширувлари ўтказиш учун назорат остидаги товарлар ва уларни ишлаб чиқаришда фойдаланилган хом ашёдан танлов асосида намуналар олинади.

59. Лаборатория текширувлари учун намуналар олиш инспекция ўтказаётган мутахассисларнинг сўровига кўра амалга оширилади.

60. Назорат остидаги товарлар ва хом ашёдан намуналар олиш келишув асосида мутахассислар ёки масъул орган ходимлари ёхуд бевосита хорижий экспорт қилувчиларнинг вакиллари томонидан амалга оширилиши мумкин. Бунда, ушбу шахслар товарлардан намуналар олиш бўйича билим ва малакага эга бўлишлари талаб этилади.

61. Назорат остидаги товарлар ва хом ашёдан намуналар олиш масъул орган билан келишилган ҳолда Ўзбекистон Республикаси ёки мазкур хорижий давлатнинг қонунчилиги талаблари асосида амалга оширилиши мумкин.

62. Назорат остидаги товарлар ва хом ашёдан олинган намуналарда лаборатория текширувларини ўтказиш учун тегишли лаборатория масъул орган билан келишув асосида мазкур хорижий давлатнинг аккредитациядан ўтган лабораториялари орасидан танланади.

63. Масъул орган назорат остидаги товарлар ва хом ашёдан олинган намуналарда ўтказилган лаборатория текширувлари натижаларини улар олинган куннинг ўзида мутахассисларга тақдим этилишини таъминлаши керак.

64. Лаборатория текширувлари натижалари бўйича ҳужжатлар масъул орган билан келишилган тилда (ўзбек, рус, инглиз ёки бошқа хорижий тилда) расмийлаштирилади.

8-боб. Реестрни шакллантириш ва юритиш

65. Реестр ваколатли органнинг расмий сайтида электрон шаклда юритилади ва фойдаланиш учун очиқ ҳисобланади.

66. Ваколатли орган Реестрни шакллантириш, юритиш ва ундаги ахборотнинг яхлитлиги учун масъул ҳисобланади.

67. Реестр хорижий экспорт қилувчилар тўғрисидаги маълумотлар киритиладиган ягона электрон база ҳисобланади ва унда хорижий экспорт қилувчиларнинг қуйидаги маълумотлари қайд этилади:

тўлиқ номи (ўзбек, рус, инглиз ёки бошқа тегишли хорижий тилда);

жойлашган манзили (почта манзили, шу жумладан электрон почта манзили), фаолиятни амалга ошириш манзили (алоҳида маъмурий-ҳудудий бирликни кўрсатган ҳолда (масалан, вилоят, штат, провинция);

телефон ва факс рақамлари, шунингдек хорижий давлатнинг тегишли органи томонида берилган идентификация рақами (СТИР);

ишлаб чиқарадиган, қайта ишлайдиган ёки сақлайдиган назорат остидаги товарлари рўйхати;

ветеринария, ветеринария-санитария жиҳатдан статуси (бундан буён матнда статус деб юритилади).

68. Хорижий экспорт қилувчилар қуйидагилардан бири асосида Реестрга киритилади:

аудит ва инспекция натижаларига кўра ваколатли органнинг тегишли қарори билан хорижий экспорт қилувчини Реестрга киритиш мумкин деб топилганда;

ваколатли органнинг тегишли қарори билан масъул органнинг кафолати асосида хорижий экспорт қилувчини Реестрга киритиш мумкин деб топилганда.

69. Ваколатли органнинг инспекция натижалари юзасидан тайёрланган якуний ҳисоботи ёки кафолат бериш ҳақидаги мурожаат бўйича қабул қилинган қарори масъул органга юборилган кундан бошлаб 10 календарь кун ичида ваколатли орган хорижий экспорт қилувчини Реестрга киритади ҳамда бу ҳақда икки иш куни ичида масъул органга билдиришнома юборади.

70. Реестрга киритилган хорижий экспорт қилувчи қуйидаги статуслардан бирига эга бўлади:

«чекловларсиз» — хорижий экспорт қилувчининг назорат остидаги товарлари Ўзбекистон Республикаси ҳудудига тақиқ ва чекловларсиз белгиланган тартибда экспорт қилинади;

«вақтинча чекланган» — давлат ветеринария хизмати назоратини амалга оширишда ветеринария, ветеринария-санитария қоидалари ва нормаларида белгиланган талабларга номувофиқлик аниқланганлиги сабабли, хорижий экспорт қилувчининг назорат остидаги товарларини Ўзбекистон Республикаси ҳудудига экспорт қилиш вақтинча чекланади;

«кучайтирилган лаборатория назоратида» — хорижий экспорт қилувчининг мамлакатидаги эпизоотик вазият барқарор эмаслиги сабабли, хорижий экспорт қилувчининг Ўзбекистон Республикаси ҳудудига экспорт қилинган назорат остидаги товарларининг ҳар бир партиясидан лаборатория текшируви учун намуна олиш талаб этилади;

«огоҳлантирилган» — давлат ветеринария хизмати назоратини амалга ошириш давомида хорижий экспорт қилувчининг назорат остидаги товарларида салбий ўзгаришлар аниқланганда масъул орган ушбу салбий ўзгаришлар бартараф этилиши зарурлиги ҳақида муддати кўрсатилган ҳолда ваколатли орган томонидан огоҳлантирилади. Бунда, салбий ўзгаришлар тегишли муддатда бартараф этилмаса, хорижий экспорт қилувчининг статуси «вақтинча чекланган» ёки «кучайтирилган лаборатория назоратида» статусига ўзгартирилади;

«махсус шартларда» — хорижий экспорт қилувчининг назорат остидаги товарларини Ўзбекистон Республикаси ҳудудига олиб киришга товарларни тайёрлаш, қайта ишлаш ёки сақлаш усулини (масалан, музлатилган, совутилган, қадоқланган, вакуумда ёки бошқа) ўзгартирган тақдирда йўл қўйилади. Бунда, агар тегишли ўзгартириш амалга оширилмайдиган бўлса, хорижий экспорт қилувчининг статуси «вақтинча чекланган» статусига ўзгартирилади.

71. Хорижий экспорт қилувчининг Реестрдаги амалдаги статуси қуйидагилар асосида ўзгартирилиши мумкин:

масъул органнинг сўрови асосида;

давлат ветеринария хизмати назоратини амалга оширишда хорижий экспорт қилувчининг назорат остидаги товарларида ветеринария, ветеринария-санитария қоидалари ва нормаларига номувофиқлик аниқланганда;

хорижий экспорт қилувчининг мамлакатидаги эпизоотик вазият барқарор эмас ёки аксинча барқарор деб топилганда;

хорижий экспорт қилувчининг назорат остидаги товарларида салбий ўзгаришлар аниқланганда масъул орган ушбу салбий ўзгаришлар бартараф этилиши зарурлиги ҳақида ваколатли орган томонидан муддати кўрсатилган ҳолда огоҳлантирилганлигига қарамасдан, ушбу салбий ўзгаришлар тегишли муддат ичида бартараф этилмаган бўлса;

хорижий экспорт қилувчининг назорат остидаги товарларини Ўзбекистон Республикаси ҳудудига олиб кириш учун товарларни ишлаб чиқариш, қайта ишлаш ёки сақлаш усулини ўзгартириш зарурлигига қарамасдан, хорижий экспорт қилувчи тегишли ўзгартиришни амалга оширмаган бўлса;

хорижий давлат расмий назорат тизими ва назорат остидаги объектларни Эпизоотик вазиятни ўрганиш мақсадида мутахассисларни хорижий мамлакатларга юбориш заруратини аниқлаш мезонлари ва юбориш тартиби тўғрисидаги низомда (рўйхат рақами 3198, 2019 йил 29 ноябрь) белгиланган тартибда ўрганиш натижасида улар Ўзбекистон Республикаси талаблари ёки ветеринария соҳасидаги назорат ҳужжатларига мувофиқ ёки мувофиқ эмас деб топилганда.

72. Масъул орган Реестрга киритилган хорижий экспорт қилувчилар фаолияти билан боғлиқ ўзгаришлар (масалан, тугатилиши, қайта ташкил этилиши, номининг ўзгариши) ҳақида ваколатли органни доимий равишда хабардор қилиб бориши лозим.

73. Реестрда аввал қайд этилган маълумотлар ўзгарган ҳолларда тегишли ўзгартиришлар ваколатли орган томонидан Реестрга 10 календарь кун ичида киритилиши керак.

74. Хорижий экспорт қилувчининг Реестрдаги статуси ўзгарганда, хорижий экспорт қилувчи Ўзбекистон Республикаси ва ветеринария соҳасидаги назорат ҳужжатлари талабларига амал қилмаганда ёки назорат остидаги товарларда салбий ўзгаришлар аниқланганда ваколатли орган бу ҳақда масъул органни икки иш куни ичида хабардор қилиши лозим.

Бунда, масъул орган ваколатли органнинг хабарида кўрсатилган ҳолатни зудлик билан ўрганиб чиқиши ҳамда ушбу ҳолат тасдиқланган тақдирда, мавжуд камчиликларни бартараф этиш чораларини кўриши, шунингдек камчиликлар бартараф этилганда бу ҳақда ваколатли органга тасдиқловчи ҳужжатлар билан бирга маълумот тақдим этиши керак.

75. Реестрга киритилган хорижий экспорт қилувчи ўзининг ёки масъул органнинг сўрови асосида, шунингдек назорат остидаги товарларни ишлаб чиқариш, қайта ишлаш ёки сақлашда Ўзбекистон Республикаси ва ветеринария соҳасидаги назорат ҳужжатлари талабларига амал қилинмаган тақдирда ваколатли органнинг ташаббуси билан Реестрдан чиқарилиши мумкин.

9-боб. Якуний қоидалар

76. Ваколатли органнинг қарорлари устидан қонунчиликда белгиланган тартибда шикоят қилиниши мумкин.

77. Мазкур Низом талабларининг бузилишида айбдор бўлган шахслар қонунчилик ҳужжатларида белгиланган тартибда жавобгар бўлади.

78. Мазкур Низом Ўзбекистон Республикаси Инвестициялар ва ташқи савдо вазирлиги, Санитария-эпидемиологик осойишталик ва жамоат саломатлиги хизмати, Монополияга қарши курашиш қўмитаси, Ўзбекистон Савдо-саноат палатаси ҳамда Инвестициялар ва ташқи савдо вазирлиги ҳузуридаги Ўзбекистон техник жиҳатдан тартибга солиш агентлиги билан келишилган.

Раис Б. НОРКОБИЛОВ

Ўзбекистон Савдо-саноат палатаси раиси А. ИКРАМОВ

Ўзбекистон Республикаси Санитария-эпидемиологик осойишталик ва жамоат саломатлиги хизмати бошлиғи Б. ЮСУПАЛИЕВ

Монополияга қарши курашиш кўмитаси раиси Ш. ШАРАХМЕТОВ

Техник жихатдан тартибга солиш агентлиги Бош директори Д. САТТАРОВ

Инвестициялар ва ташки савдо вазири С. УМУРЗАКОВ

Тошкент ш.,

2022 йил 12 март,

2022 йил 21 февраль

2022 йил 11 февраль

2022 йил 10 февраль

2022 йил 17 февраль

2022 йил 11 март

12-сон

(Қонунчилик маълумотлари миллий базаси, 29.04.2022 й., 10/22/3365/0370-сон; 08.08.2024 й., 10/24/3365-1/0598-сон; 28.04.2026 й., 10/26/3365-2/0424-сон)

lex.uz

Oʻzbekiston Respublikasi Veterinariya va chorvachilikni rivojlantirish davlat qoʻmitasining

Qarori

NIZOM

Oʻzbekiston Respublikasi hududiga olib kiriladigan davlat veterinariya xizmati nazorati ostidagi tovarlarni ishlab chiqaradigan, qayta ishlaydigan va saqlaydigan eksport qiluvchi tashkilotlar va shaxslar (xorijiy eksport qiluvchilar) reyestrini shakllantirish va yuritish tartibi toʻgʻrisidagi nizomni tasdiqlash haqida

Oʻzbekiston Respublikasi Vazirlar Mahkamasining 2020-yil 11-maydagi 277-son “Davlat veterinariya xizmati nazorati ostidagi tovarlar xavfsizligini taʼminlash boʻyicha qoʻshimcha chora-tadbirlar toʻgʻrisida”gi qaroriga asosan Oʻzbekiston Respublikasi Veterinariya va chorvachilikni rivojlantirish davlat qoʻmitasi qaror qiladi:

1. Oʻzbekiston Respublikasi hududiga olib kiriladigan davlat veterinariya xizmati nazorati ostidagi tovarlarni ishlab chiqaradigan, qayta ishlaydigan va saqlaydigan eksport qiluvchi tashkilotlar va shaxslar (xorijiy eksport qiluvchilar) reyestrini shakllantirish va yuritish tartibi toʻgʻrisidagi nizom ilovaga muvofiq tasdiqlansin.

2. Mazkur qaror 2022-yil 1-sentabrdan eʼtiboran kuchga kiradi.

Kelishildi:

Oʻzbekiston Respublikasi Veterinariya va chorvachilikni rivojlantirish davlat qoʻmitasining 2022-yil 12-martdagi 12-son qaroriga ILOVA

Oʻzbekiston Respublikasi hududiga olib kiriladigan davlat veterinariya xizmati nazorati ostidagi tovarlarni ishlab chiqaradigan, qayta ishlaydigan va saqlaydigan eksport qiluvchi tashkilotlar va shaxslar (xorijiy eksport qiluvchilar) reyestrini shakllantirish va yuritish tartibi toʻgʻrisidagi

Mazkur Nizom Oʻzbekiston Respublikasi hududiga olib kiriladigan davlat veterinariya xizmati nazorati ostidagi tovarlarni (bundan buyon matnda nazorat ostidagi tovarlar deb yuritiladi) ishlab chiqaradigan, qayta ishlaydigan va saqlaydigan eksport qiluvchi tashkilotlar va shaxslar (xorijiy eksport qiluvchilar) reyestrini shakllantirish va yuritish tartibini belgilaydi.

1-bob. Umumiy qoidalar

1. Ushbu Nizomda quyidagi asosiy tushunchalardan foydalaniladi:

audit — masʼul organning veterinariya nazorati xizmati tomonidan nazorat ostidagi tovarlarning veterinariya, veterinariya-sanitariya jihatdan xavfsizligini taʼminlash boʻyicha amalga oshiriladigan faoliyatni baholash;

inspeksiya — xorijiy eksport qiluvchilar va ularning nazorat ostidagi tovarlarni ishlab chiqarish, qayta ishlash va saqlash jarayonlarida ishtirok etuvchi barcha obyektlarini bevosita joyiga chiqqan holda hamda nazorat ostidagi tovarlardan namunalar olish yoʻli bilan tekshirish;

vakolatli organ — Oʻzbekiston Respublikasi Qishloq xoʻjaligi vazirligi huzuridagi Veterinariya va chorvachilikni rivojlantirish qoʻmitasi;

masʼul organ — xorijiy davlatning davlat veterinariya nazoratini amalga oshiruvchi maxsus vakolatli organi;

xorijiy eksport qiluvchilar — Oʻzbekiston Respublikasi hududiga olib kiriladigan nazorat ostidagi tovarlarni ishlab chiqaruvchi, qayta ishlovchi va saqlovchi eksport qiluvchi tashkilotlar va shaxslar;

inspektor — vakolatli organ va uning hududiy boshqarmalaridagi davlat veterinariya inspektorlari;

ekspert — oliy maʼlumot va davlat veterinariya xizmatida kamida besh yillik ish stajiga ega boʻlgan vakolatli organ tizimidagi veterinariya mutaxassisi hamda vakolatli organ tomonidan kelishuv asosida jalb etiladigan, audit va inspeksiya oʻtkazish boʻyicha koʻnikmaga ega boʻlgan ekspert;

epizootiya — tegishli hududda hayvonlarning oʻta xavfli va boshqa yuqumli kasalliklari tarqalishi;

nazorat ostidagi obyektlar — xorijiy eksport qiluvchilarning nazorat ostidagi tovarlarni ishlab chiqarish, qayta ishlash va saqlash jarayonlarida ishtirok etuvchi barcha obyektlari;

nazorat ostidagi tovarlar — qonunchilik hujjatlarida belgilangan davlat veterinariya xizmati nazorati ostidagi tovarlar;

Reyestr — Oʻzbekiston Respublikasi hududiga olib kiriladigan nazorat ostidagi tovarlarni ishlab chiqaradigan, qayta ishlaydigan va saqlaydigan eksport qiluvchi tashkilotlar va shaxslarning (xorijiy eksport qiluvchilar) elektron reyestri;

Reyestrga kiritish toʻgʻrisidagi ariza — masʼul organning vakolatli organga xorijiy eksport qiluvchilarni Reyestrga kiritish haqidagi murojaati;

xorijiy davlat rasmiy nazorat tizimi — masʼul organning nazorat ostidagi tovarlarni veterinariya, veterinariya-sanitariya jihatdan xavfsizligini taʼminlash boʻyicha veterinariya nazorati tizimi;

Oʻzbekiston Respublikasining talablari — veterinariya sohasidagi qonunchilik hujjatlari, shuningdek davlat organlari va boshqa organlar, yuridik hamda jismoniy shaxslar rioya etishi lozim boʻlgan veterinariya, veterinariya-sanitariya qoidalari va normalari.

2. Oʻzbekiston Respublikasi Vazirlar Mahkamasining 2020-yil 11-maydagi 277-son “Davlat veterinariya xizmati nazorati ostidagi tovarlar xavfsizligini taʼminlash boʻyicha qoʻshimcha chora-tadbirlar toʻgʻrisida”gi qaroriga asosan nazorat ostidagi tovarlarni Oʻzbekiston Respublikasi hududiga olib kirishga Reyestrga kiritilgan xorijiy eksport qiluvchilarga ruxsat beriladi.

Ushbu Nizom talablari favqulodda vaziyatlarda, xalqaro koʻrgazmalarda qatnashishda, laboratoriya tahlillari uchun namunalarda, shuningdek diplomatik korpus, oʻquv muassasalari, ilmiy va davlat maqsadlari uchun olib kelinadigan nazorat ostidagi tovarlarga nisbatan tatbiq etilmaydi.

3. Xorijiy davlatlardan nazorat ostidagi tovarlarni Oʻzbekiston Respublikasiga olib kirishga veterinariya, veterinariya-sanitariya qoidalari va normalariga rioya etilgan holda yoʻl qoʻyiladi.

4. Boshqa davlatlar hududida hayvonlarning oʻta xavfli yuqumli kasalliklari, hayvonlarning kelib chiqish sabablari nomaʼlum boʻlgan yalpi kasalliklari va hayvonlarning ilgari qayd etilmagan yuqumli kasalliklari paydo boʻlgan taqdirda nazorat ostidagi tovarlarni olib oʻtishga taqiq (cheklov) joriy etish hamda ularni olib oʻtishni tiklash toʻgʻrisidagi qaror Oʻzbekiston Respublikasi Bosh davlat veterinariya inspektori tomonidan qabul qilinadi.

4 1 . Audit va inspeksiya jarayonlarida xorijiy davlatlarning muayyan hayvon kasalliklari boʻyicha hududlarga ajratilganligi (regionalizatsiya) shuningdek, kichik hududlar — kompartmentlar (ajratilgan xavfsizlik toifalari belgilangan zonalar) mavjudligi hisobga olinadi.

2-bob. Reyestrni shakllantirish va yuritishga doir umumiy talablar

5. Xorijiy eksport qiluvchilarni Reyestrga kiritish vakolatli organning inspektorlari va ekspertlari tomonidan joyiga chiqqan holda oʻtkaziladigan audit va inspeksiya natijalariga koʻra yoki masʼul organ tomonidan mazkur Nizomning 6-bobiga muvofiq beriladigan kafolat asosida amalga oshirilishi mumkin.

6. Audit va inspeksiya mazkur Nizom va veterinariya sohasidagi boshqa qonunchilik hujjatlari, shuningdek Butunjahon hayvonlar sogʻligʻini saqlash tashkilotining (bundan buyon matnda XEB deb yuritiladi) kodekslari, Kodeks Alimentarius komissiyasi standartlari hamda veterinariya, veterinariya-sanitariya qoidalari va normalarining (bundan buyon matnda veterinariya sohasidagi nazorat hujjatlari deb yuritiladi) talablari asosida oʻtkaziladi.

7. Xorijiy eksport qiluvchilarni Reyestrga kiritish boʻyicha audit va inspeksiya masʼul organning Reyestrga kiritish toʻgʻrisidagi arizasiga asosan oʻtkaziladi.

8. Xorijiy davlat rasmiy nazorat tizimi va xorijiy eksport qiluvchilarning nazorat ostidagi obyektlari Oʻzbekiston Respublikasi talablari va veterinariya sohasidagi nazorat hujjatlariga muvofiqligi toʻgʻrisidagi kafolat asosida xorijiy eksport qiluvchini Reyestrga kiritish haqida masʼul organ tomonidan vakolatli organga yoʻllanadigan murojaatlar Oʻzbekiston Respublikasi hududida koʻrib chiqiladi.

9. Audit va inspeksiya natijalari xorijiy mamlakat hududidagi epizootik vaziyatga, veterinariya sohasidagi nazorat hujjatlari talablariga, shuningdek epizootik monitoring maʼlumotlariga asoslanishi lozim.

10. Inspektor va ekspertlar audit va inspeksiyani oʻtkazish jarayonida mustaqil harakat qiladi.

11. Inspektor va ekspertlar audit va inspeksiya oʻtkazish jarayonida xorijiy davlat rasmiy nazorat tizimi hamda xorijiy eksport qiluvchilar haqidagi maʼlumotlar uchinchi shaxslarga oshkor etilmasligini taʼminlashi lozim.

12. Masʼul organ oʻz davlatining qonunchiligida Reyestrga kiritilgan xorijiy eksport qiluvchilarning nazorat ostidagi tovarlarini ishlab chiqarish, qayta ishlash va saqlash jarayonlari yoki xorijiy davlat rasmiy nazorat tizimi bilan bogʻliq oʻzgarishlar haqida vakolatli organni doimiy ravishda xabardor qilib boradi.

3-bob. Reyestrga kiritish toʻgʻrisidagi arizalarni koʻrib chiqish, audit va inspeksiya tayinlash yoki ularni tayinlashni rad etish

13. Masʼul organ vakolatli organga xorijiy eksport qiluvchilarni Reyestrga kiritish toʻgʻrisidagi ariza bilan yozma yoki vakolatli organning rasmiy sayti orqali elektron shaklda murojaat qiladi.

14. Reyestrga kiritish toʻgʻrisidagi arizada quyidagi maʼlumotlar koʻrsatilishi kerak:

nazorat ostidagi tovarlarni eksport qiladigan xorijiy davlatning nomi;

masʼul organning rasmiy nomi, joylashgan manzili (pochta manzili, shu jumladan elektron pochta manzili), telefon va faks raqamlari;

nazorat ostidagi tovarning nomi va Oʻzbekiston Respublikasi tashqi iqtisodiy faoliyatining tovar nomenklaturasi (bundan buyon matnda TIF TN deb yuritiladi) boʻyicha kodi;

nazorat ostidagi tovarning kelib chiqish joyi (alohida maʼmuriy-hududiy birlikni koʻrsatgan holda (masalan, viloyat, shtat, provinsiya);

xorijiy eksport qiluvchining rasmiy nomi, joylashgan manzili (pochta manzili, shu jumladan elektron pochta manzili), telefon va faks raqamlari, shuningdek unga xorijiy davlatning tegishli organi tomonidan berilgan identifikatsiya raqami (STIR).

15. Vakolatli organ masʼul organning Reyestrga kiritish toʻgʻrisidagi arizasini u kelib tushgan kundan boshlab 15 kalendar kun ichida koʻrib chiqadi.

Bunda, masʼul organning davlatidagi epizootik vaziyat barqaror hamda Reyestrga kiritish toʻgʻrisidagi arizada koʻrsatilgan nazorat ostidagi tovarni olib oʻtishga Oʻzbekiston Respublikasi Bosh davlat veterinariya inspektorining qaroriga asosan taqiq (cheklov) joriy etilmagan boʻlsa, vakolatli organ xorijiy davlat rasmiy nazorat tizimini auditdan oʻtkazish yuzasidan savolnoma (bundan buyon matnda audit savolnomasi deb yuritiladi) tayyorlaydi hamda uni ariza kelib tushgan tartibda masʼul organga yuboradi.

16. Agar masʼul organning davlatidagi epizootik vaziyat murakkab yoki Reyestrga kiritish toʻgʻrisidagi arizada koʻrsatilgan nazorat ostidagi tovarni olib oʻtishga Oʻzbekiston Respublikasi Bosh davlat veterinariya inspektorining qaroriga asosan taqiq (cheklov) joriy etilgan boʻlsa, ushbu arizani koʻrib chiqish mazkur davlatda epizootik vaziyat barqarorlashgunga qadar yoki nazorat ostidagi tovarlar boʻyicha taqiq (cheklov) bekor qilingunga qadar toʻxtatib turiladi va bu haqda masʼul organga xabar beriladi.

17. Audit savolnomasida masʼul organ tomonidan taqdim etilishi lozim boʻlgan quyidagi maʼlumotlar koʻrsatiladi:

masʼul organning tuzilmasi, vakolatlari, vazifa va funksiyalari hamda qonunchilik hujjatlariga muvofiq veterinariya nazorati tizimining ahvoli;

xorijiy davlatning sohaga oid qonunchilik hujjatlari, veterinariya, veterinariya-sanitariya qoidalari va normalari, reglamentlari hamda standartlari roʻyxati va ularning matni;

xorijiy davlat rasmiy nazorat tizimining kadrlar bilan taʼminlanganlik holati;

xorijiy davlat rasmiy nazorat tizimi epizootiyaga qarshi tadbirlarni amalga oshirish uchun moliyaviy resurslar bilan taʼminlanganligi;

odamlar hamda hayvonlarning hayoti va sogʻligʻini ular uchun umumiy boʻlgan va boshqa yuqumli kasalliklardan muhofaza qilish tizimining mavjudligi;

veterinariya sohasida sifatni boshqarish siyosati hamda uni taʼminlash tizimining mavjudligi;

ishlab chiqarish tizimini veterinariya-sanitariya jihatidan baholash va nazorat qilish dasturining mavjudligi;

qonunchilik hujjatlariga asosan epizootik monitoring va hayvonlar identifikatsiyasi tizimining mavjudligi;

akkreditatsiyalangan tegishli laboratoriyalarning mavjudligi;

veterinariya sohasida xavfni tahlil qilish tizimining mavjudligi;

nazorat ostidagi tovarlarni sertifikatlash tizimining mavjudligi;

xorijiy davlatdagi hayvonlarning bosh soni (statistik tahlili);

XEBga xabar berilishi lozim boʻlgan hayvonlar kasalliklari va ular sogʻligʻining holati boʻyicha XEBga xabar berish tizimining mavjudligi.

18. Masʼul organ audit savolnomasini olgan kundan boshlab 30 kalendar kundan kechiktirmay vakolatli organga audit savolnomasida soʻralgan maʼlumotlarni kelishilgan shaklda (yozma yoki elektron) taqdim etishi lozim.

19. Vakolatli organ masʼul organ tomonidan audit savolnomasi asosida taqdim etilgan maʼlumotlarni 60 kalendar kundan kechiktirmay oʻrganib chiqadi hamda oʻrganish natijalariga koʻra quyidagi qarorlardan birini qabul qiladi:

xorijiy davlat rasmiy nazorat tizimini auditdan va nazorat ostidagi obyektni inspeksiyadan oʻtkazish toʻgʻrisida;

xorijiy davlat rasmiy nazorat tizimini auditdan va nazorat ostidagi obyektni inspeksiyadan oʻtkazishni rad etish toʻgʻrisida.

20. Quyidagilar vakolatli organ tomonidan xorijiy davlat rasmiy nazorat tizimini auditdan va nazorat ostidagi obyektni inspeksiyadan oʻtkazishni rad etish toʻgʻrisida qaror qabul qilishga asos boʻladi:

ushbu xorijiy davlat hududida hayvonlarning oʻta xavfli yuqumli kasalliklari, hayvonlarning kelib chiqish sabablari nomaʼlum boʻlgan yalpi kasalliklari va hayvonlarning ilgari qayd etilmagan yuqumli kasalliklari paydo boʻlganligi sababli epizootik vaziyatning murakkabligi;

Reyestrga kiritish toʻgʻrisidagi arizada koʻrsatilgan nazorat ostidagi tovarlarni olib oʻtishga Oʻzbekiston Respublikasi Bosh davlat veterinariya inspektorining qaroriga asosan taqiq (cheklov) joriy etilganligi;

masʼul organ tomonidan 30 kalendar kun ichida audit savolnomasida soʻralgan tegishli maʼlumotlar vakolatli organga taqdim etilmaganligi;

audit savolnomasiga javoban masʼul organ tomonidan tegishli maʼlumotlarning toʻliq hajmda taqdim qilinmaganligi;

masʼul organ tomonidan taqdim etilgan maʼlumotlar ishonchsiz yoki buzib koʻrsatilganligi yoxud ushbu maʼlumotlar xorijiy mamlakatdagi haqiqiy epizootik vaziyatni ifoda etmasligi;

XEBning Xalqaro veterinariya kodekslari talablariga muvofiq nazorat ostidagi tovarlarning xavf darajasini baholash natijasida ularning veterinariya xavfi darajasi oʻrta yoki yuqori deb belgilanganligi;

audit savolnomasi boʻyicha masʼul organ tomonidan taqdim qilingan tegishli maʼlumotlarni koʻrib chiqish natijasida xorijiy davlat rasmiy nazorat tizimi Oʻzbekiston Respublikasi talablari va veterinariya sohasidagi nazorat hujjatlariga muvofiq emas deb hisoblanganligi.

21. Vakolatli organ tomonidan audit va inspeksiya oʻtkazish yoki ular oʻtkazishni rad etish toʻgʻrisidagi qaror, u qabul qilingan kundan eʼtiboran besh ish kunidan kechiktirmay masʼul organga yuborilishi lozim.

22. Vakolatli organ tomonidan masʼul organga audit va inspeksiya oʻtkazish toʻgʻrisidagi qarorga qoʻshimcha ravishda quyidagi maʼlumotlar yuboriladi:

audit va inspeksiyani oʻtkazish maqsadlari;

audit va inspeksiyani oʻtkazish uchun xorijiy davlatga yuboriladigan inspektor va ekspertlar roʻyxati;

masʼul organning audit oʻtkazilishi rejalashtirilgan tarkibiy boʻlinmalari va faoliyat yoʻnalishlari roʻyxati;

nazorat ostidagi tovardan kelib chiqib, inspeksiya doirasida kuzatish uchun tashrif buyurilishi mumkin boʻlgan xom ashyo yetkazib beruvchilar (xorijiy eksport qiluvchilarga) hamda nazorat ostidagi tovarni ishlab chiqarish, qayta ishlash va saqlashda ishtirok etuvchi boshqa korxonalar roʻyxati;

audit va inspeksiya oʻtkazilishi uchun inspektor hamda ekspertlarga kelishilgan tilda (oʻzbek, rus, ingliz yoki boshqa xorijiy tilda) masʼul organ tomonidan taqdim etilishi lozim boʻlgan hujjatlar roʻyxati.

23. Audit va inspeksiya oʻtkazishni boshlash muddatlari masʼul organ bilan kelishilgan holda belgilanadi.

24. Audit va inspeksiya oʻtkazish bilan bogʻliq xarajatlar, agar xalqaro shartnomalarda boshqacha qoida nazarda tutilmagan boʻlsa, Davlat organlari va tashkilotlari xodimlari Oʻzbekiston Respublikasi tashqarisiga xizmat safariga yuborilganda xizmat safari xarajatlari uchun mablagʻlar berish tartibi toʻgʻrisidagi nizomga (roʻyxat raqami 2730, 2015-yil 19-noyabr) muvofiq masʼul organ tomonidan qoplanadi.

4-bob. Xorijiy davlat rasmiy nazorat tizimini auditdan oʻtkazish

25. Nazorat ostidagi tovarlarni ishlab chiqarish, qayta ishlash va saqlash bilan bogʻliq jarayonlarning veterinariya, veterinariya-sanitariya jihatdan xavfsizligi veterinariya nazorati ostida ekanligini oʻrganish, shuningdek xorijiy davlat rasmiy nazorat tizimi Oʻzbekiston Respublikasi talablari va veterinariya sohasidagi nazorat hujjatlariga muvofiqligini aniqlash maqsadida vakolatli organ tomonidan xorijiy davlat rasmiy nazorat tizimida audit oʻtkaziladi.

26. Auditni oʻtkazish uchun vakolatli organ tomonidan xorijiy davlat hududiga inspektor va ekspertlardan iborat mutaxassislar guruhi (bundan buyon matnda mutaxassislar deb yuritiladi) yuboriladi.

27. Audit vakolatli organga audit savolnomasiga javoban masʼul organ tomonidan taqdim etilgan maʼlumotlarning haqqoniyligi va ushbu maʼlumotlar xorijiy davlat rasmiy nazorat tizimining haqiqiy ahvoliga mos yoki mos emasligini taqqoslash yoʻli bilan tekshirish orqali oʻtkaziladi.

28. Auditni oʻtkazish besh ish kuni ichida yakunlanishi lozim.

29. Audit natijasida masʼul organ tomonidan audit savolnomasiga javoban taqdim etilgan maʼlumotlar:

tasdiqlansa va xorijiy davlat rasmiy nazorat tizimining haqiqiy holatiga mos deb hisoblansa, xorijiy davlat rasmiy nazorat tizimi Oʻzbekiston Respublikasi talablari va veterinariya sohasidagi nazorat hujjatlariga muvofiq deb topiladi;

tasdiqlanmasa va xorijiy davlat rasmiy nazorat tizimining haqiqiy holatiga mos emas deb hisoblansa, xorijiy davlat rasmiy nazorat tizimi Oʻzbekiston Respublikasi talablari va veterinariya sohasidagi nazorat hujjatlariga muvofiq emas deb topiladi.

30. Xorijiy davlat rasmiy nazorat tizimi Oʻzbekiston Respublikasi talablari va veterinariya sohasidagi nazorat hujjatlariga muvofiq emas deb topilganda inspeksiya oʻtkazilmaydi.

31. Masʼul organ audit natijasida xorijiy davlat rasmiy nazorat tizimini Oʻzbekiston Respublikasi talablari va veterinariya sohasidagi nazorat hujjatlariga muvofiq emas deb topishga asos boʻlgan kamchiliklarni bartaraf etgan holda ushbu kamchiliklar bartaraf etilganligini tasdiqlovchi maʼlumotlar bilan birga vakolatli organga qaytadan murojaat qilishi mumkin. Bunda, ushbu murojaat vakolatli organ tomonidan mazkur Nizomning 3-bobiga muvofiq umumiy asoslarda koʻrib chiqiladi.

32. Bir turdagi nazorat ostidagi tovar boʻyicha avval oʻtkazilgan audit natijasida xorijiy davlat rasmiy nazorat tizimi Oʻzbekiston Respublikasi talablari va veterinariya sohasidagi nazorat hujjatlariga muvofiq deb topilgan boʻlsa, shu davlatda aynan ushbu turdagi nazorat ostidagi tovarni ishlab chiqaradigan, qayta ishlaydigan va saqlaydigan boshqa xorijiy eksport qiluvchilarni Reyestrga kiritishda xorijiy davlat rasmiy nazorat tizimini qaytadan auditdan oʻtkazish talab etilmaydi.

5-bob. Xorijiy eksport qiluvchilarning nazorat ostidagi obyektlarini inspeksiyadan oʻtkazish

33. Audit natijasiga koʻra xorijiy davlat rasmiy nazorat tizimi Oʻzbekiston Respublikasi talablari va veterinariya sohasidagi nazorat hujjatlariga muvofiq deb topilganda masʼul organning Reyestrga kiritish toʻgʻrisidagi arizasida koʻrsatilgan xorijiy eksport qiluvchining nazorat ostidagi obyektlarida moliyaviy-xoʻjalik faoliyatiga aralashmagan holda inspeksiya oʻtkaziladi.

34. Inspeksiya xorijiy eksport qiluvchilarning nazorat ostidagi obyektlarida ishlab chiqarish, qayta ishlash va saqlash jarayonlari Oʻzbekiston Respublikasi talablari va veterinariya sohasidagi nazorat hujjatlariga muvofiq amalga oshirilishini aniqlash maqsadida oʻtkaziladi.

35. Inspeksiya boshlanishidan avval masʼul organ bilan kelishilgan xolda mutaxassislar tomonidan inspeksiya davomida oʻrganiladigan nazorat ostidagi obyektlar roʻyxati, nomi hamda inspeksiya oʻtkazish muddatlari koʻrsatiladigan inspeksiya oʻtkazish rejasi tasdiqlanishi va masʼul organga taqdim etilishi kerak.

36. Inspeksiya audit oʻtkazishda bevosita ishtirok etgan mutaxassislar tomonidan audit yakunlangan kundan keyingi ish kunidan boshlab besh ish kuni (agar inspeksiya oʻtkaziladigan xorijiy eksport qiluvchilar soni bittadan ortiq boʻlsa, har birida besh ish kuni) davomida oʻtkaziladi.

37. Inspeksiyani oʻtkazish davomida tekshiriladigan nazorat ostidagi obyektlardan tashqari xorijiy eksport qiluvchiga xom ashyo yetkazib beruvchi boshqa korxonalarga qarashli obyektlarga, agar bunday tashriflar inspeksiya oʻtkazish rejasida nazarda tutilgan boʻlsa, masʼul organ bilan kelishilgan holda va faqat kuzatish maqsadida tashrif buyurilishi mumkin.

38. Inspeksiya oʻtkazish davomida inspeksiya oʻtkazilayotgan xorijiy eksport qiluvchi ishlab chiqargan, qayta ishlagan yoki saqlagan nazorat ostidagi tovarlardan, shuningdek ularni ishlab chiqarishda foydalanilgan xom ashyolardan ushbu Nizomning 7-bobiga muvofiq tanlov asosida namunalar olinadi.

39. Inspeksiya davomida nazorat ostidagi obyektlarning Oʻzbekiston Respublikasi talablari va veterinariya sohasidagi nazorat hujjatlariga nomuvofiqligi bilan bogʻliq va joyida bartaraf etilishi mumkin boʻlgan kamchiliklar aniqlangan taqdirda mutaxassislar mazkur kamchiliklar toʻgʻrisidagi maʼlumotlarni masʼul organ yoki xorijiy eksport qiluvchining soʻroviga koʻra inspeksiya yakunida taqdim etadi.

Bunda, xorijiy eksport qiluvchi ushbu kamchiliklar bartaraf etilganligi yoki ularni bartaraf etish choralari koʻrilayotganligi haqidagi maʼlumotlarni mutaxassislarga, ular ushbu xorijiy mamlakat hududidan chiqib ketishidan avval masʼul organ orqali taqdim qilishi mumkin. Mazkur maʼlumotlar mutaxassislar tomonidan inspeksiya natijalari boʻyicha hisobot tuzishda inobatga olinishi kerak.

40. Inspeksiya natijalari yuzasidan vakolatli organ tomonidan inspeksiya yakunlangan kundan eʼtiboran 90 kalendar kundan kechiktirmay ushbu inspeksiyani oʻtkazgan mutaxassislar ishtirokida dastlabki hisobot tayyorlanishi va masʼul organga yuborilishi lozim.

41. Masʼul organ vakolatli organning dastlabki hisobotini olgan kundan eʼtiboran 30 kalendar kundan kechiktirmay dastlabki hisobot yuzasidan oʻz taklif va eʼtirozlari (mavjud boʻlsa), shuningdek aniqlangan kamchiliklar (mavjud boʻlsa) bartaraf etilganligini yoki ularni bartaraf etish choralari koʻrilayotganligini tasdiqlovchi maʼlumotlar koʻrsatilgan javob xatini vakolatli organga yuborishi mumkin. Masʼul organ tomonidan mazkur muddat ichida vakolatli organga javob xati yuborilmasligi masʼul organ dastlabki hisobotga toʻliq rozi deb hisoblashga asos boʻladi.

42. Vakolatli organ masʼul organning javob xatini olgan kundan eʼtiboran yoki masʼul organ javob xati yubormagan taqdirda, mazkur Nizomning 41-bandida belgilangan muddat yakunlangan kundan eʼtiboran 60 kalendar kun ichida masʼul organga audit va inspeksiya natijalari boʻyicha yakuniy hisobotni yuborishi lozim.

43. Yakuniy hisobotda audit hamda inspeksiyadan oʻtkazilgan har bir xorijiy eksport qiluvchi boʻyicha alohida xulosa, shuningdek, agar xorijiy eksport qiluvchining nazorat ostidagi obyektlarida kamchiliklar aniqlangan boʻlsa, ularni bartaraf etish yuzasidan amalga oshirilishi kerak boʻlgan choralar boʻyicha tavsiyalar koʻrsatilishi kerak.

44. Nazorat ostidagi tovarlarni ishlab chiqarish, qayta ishlash va saqlash jarayonlari Oʻzbekiston Respublikasi talablari va veterinariya sohasidagi nazorat hujjatlariga muvofiqligidan, shuningdek nazorat ostidagi tovarlar va ularni ishlab chiqarishda foydalanilgan xom ashyolardan tanlov asosida olingan namunalarning laboratoriya tekshiruvlari natijalaridan kelib chiqib, yakuniy hisobotda har bir xorijiy eksport qiluvchi boʻyicha alohida quyidagi qarorlardan biri koʻrsatiladi:

xorijiy eksport qiluvchini Reyestrga kiritish haqida;

xorijiy eksport qiluvchini Reyestrga kiritishni rad etish haqida.

45. Vakolatli organ yakuniy hisobotni oʻzining rasmiy saytida eʼlon qiladi. Bunda, eʼlon qilinadigan yakuniy hisobotda Reyestrga kiritilishi rad etilgan xorijiy eksport qiluvchilarni identifikatsiya qilish imkonini beruvchi maʼlumotlar (masalan, nomi, manzili, xorijiy davlatning tegishli organi tomonida berilgan identifikatsiya raqami (STIR) koʻrsatilmaydi.

46. Vakolatli organ Reyestrga kiritilgan xorijiy eksport qiluvchilar boʻyicha xorijiy davlat rasmiy nazorat tizimi hamda nazorat ostidagi obyektlarni Epizootik vaziyatni oʻrganish maqsadida mutaxassislarni xorijiy mamlakatlarga yuborish zaruratini aniqlash mezonlari va yuborish tartibi toʻgʻrisidagi nizomda (roʻyxat raqami 3198, 2019-yil 29-noyabr) belgilangan tartibda oʻrganib borishi mumkin.

6-bob. Kafolat berish

47. Masʼul organ oʻz mamlakatidagi rasmiy nazorat tizimi va xorijiy eksport qiluvchilarning nazorat ostidagi obyektlari Oʻzbekiston Respublikasi talablari va veterinariya sohasidagi nazorat hujjatlariga muvofiqligi toʻgʻrisida kafolat (bundan buyon matnda kafolat deb yuritiladi) bergan holda xorijiy eksport qiluvchilarini audit va inspeksiya oʻtkazmasdan Reyestrga kiritishni soʻrab vakolatli organga yozma yoki elektron shaklda murojaat (bundan buyon matnda kafolat berish haqidagi murojaat deb yuritiladi) qilishi mumkin.

48. Masʼul organning kafolati har bir xorijiy eksport qiluvchi uchun nazorat ostidagi tovarning TIF TN kodi boʻyicha alohida taqdim etilishi lozim.

49. Masʼul organning kafolat berish haqidagi murojaatida mazkur Nizomning 14 va 17-bandlariga muvofiq Reyestrga kiritish toʻgʻrisidagi ariza va audit savolnomasida soʻralgan barcha maʼlumotlar koʻrsatilishi kerak.

50. Masʼul organning kafolat berish haqidagi murojaati u kelib tushgan kundan eʼtiboran 60 kalendar kundan kechiktirmay vakolatli organ tomonidan koʻrib chiqiladi.

51. Masʼul organning kafolat berish haqidagi murojaatini koʻrib chiqishda vakolatli organ tomonidan quyidagilar inobatga olinadi:

xorijiy davlatning sohaga oid qonunchilik hujjatlari, veterinariya, veterinariya-sanitariya qoidalari va normalari, reglamentlari hamda standartlarining mavjudligi;

masʼul organning tuzilmasi, vakolatlari, vazifa va funksiyalari hamda qonunchilik hujjatlariga muvofiq veterinariya nazorati tizimining ahvoli;

qonunchilik hujjatlariga asosan epizootik monitoring va hayvonlar identifikatsiyasi tizimining mavjudligi;

veterinariya sohasida xavfni tahlil qilish tizimining mavjudligi;

nazorat ostidagi tovarlarni sertifikatlash tizimining mavjudligi;

XEBga xabar berilishi lozim boʻlgan hayvonlar kasalliklari va ular sogʻligʻining holati boʻyicha XEBga xabar berish tizimining mavjudligi.

veterinariya sohasida sifatni boshqarish siyosati hamda uni taʼminlash tizimining mavjudligi;

ishlab chiqarish tizimini veterinariya-sanitariya jihatidan baholash va nazorat qilish dasturining mavjudligi;

masʼul organning avval taqdim etilgan kafolatlari boʻyicha Reyestrga kiritilgan xorijiy eksport qiluvchilar tomonidan Oʻzbekiston Respublikasi talablari va veterinariya sohasidagi nazorat hujjatlariga rioya qilinganlik holati;

xorijiy davlat hududini hayvonlarning yuqumli kasalliklari olib kirilishidan muhofaza qilishning taʼminlanganligi;

xorijiy davlatdagi epizootik vaziyat;

kafolat berilayotgan xorijiy eksport qiluvchilarning nazorat ostidagi tovarlarini olib oʻtishga Oʻzbekiston Respublikasi Bosh davlat veterinariya inspektorining qaroriga asosan taqiq (cheklov) joriy etilganligi;

nazorat ostidagi tovarlarni ushbu xorijiy mamlakatdan Oʻzbekiston Respublikasi hududiga olib oʻtish boʻyicha vakolatli organ tomonidan oʻtkazilgan monitoring natijalari (mavjud boʻlsa);

nazorat ostidagi tovarlar boʻyicha masʼul organ tomonidan oʻtkazilgan monitoring natijalari;

kafolat berilishi nazarda tutilayotgan xorijiy eksport qiluvchilar faoliyatida veterinariya, veterinariya-sanitariya qoidalari va normalari talablariga rioya etilishining holatini masʼul organ tomonidan doimiy ravishda nazorat qilish tizimining mavjudligi;

muqaddam ushbu xorijiy mamlakatdagi xorijiy eksport qiluvchilarni vakolatli organ tomonidan inspeksiyadan oʻtkazishning natijalari (mavjud boʻlsa);

xorijiy eksport qiluvchilarning Oʻzbekiston Respublikasi talablari va veterinariya sohasidagi nazorat hujjatlariga muvofiqligini tasdiqlovchi boshqa maʼlumotlar (mavjud boʻlsa).

52. Masʼul organning kafolat berish haqidagi murojaatini mazkur Nizomning 51-bandiga muvofiq koʻrib chiqish natijasida vakolatli organ quyidagi qarorlardan birini qabul qiladi:

masʼul organning kafolati asosida xorijiy eksport qiluvchini Reyestrga kiritish mumkinligi haqida;

masʼul organning kafolati asosida xorijiy eksport qiluvchini Reyestrga kiritishni rad etish haqida.

53. Quyidagilar masʼul organning kafolati asosida xorijiy eksport qiluvchini Reyestrga kiritishni rad etish haqida qaror qabul qilishga asos boʻladi:

ushbu xorijiy davlat hududida hayvonlarning oʻta xavfli yuqumli kasalliklari, hayvonlarning kelib chiqish sabablari nomaʼlum boʻlgan yalpi kasalliklari va hayvonlarning ilgari qayd etilmagan yuqumli kasalliklari paydo boʻlganligi sababli epizootik vaziyatning murakkabligi;

kafolat berish haqidagi murojaatda koʻrsatilgan nazorat ostidagi tovarlarni olib oʻtishga Oʻzbekiston Respublikasi Bosh davlat veterinariya inspektorining qaroriga asosan taqiq (cheklov) joriy etilganligi;

mazkur Nizomning 14 va 17-bandlariga muvofiq Reyestrga kiritish toʻgʻrisidagi ariza va audit savolnomasida soʻralgan tegishli maʼlumotlar masʼul organ tomonidan toʻliq hajmda taqdim qilinmaganligi;

masʼul organ tomonidan taqdim etilgan maʼlumotlar ishonchsiz yoki buzib koʻrsatilganligi yoxud ushbu maʼlumotlar xorijiy mamlakatdagi haqiqiy epizootik vaziyatni ifoda etmasligi;

XEBning Xalqaro veterinariya kodekslari talablariga muvofiq nazorat ostidagi tovarlarning xavf darajasini baholash natijasida ularning veterinariya xavfi darajasi oʻrta yoki yuqori deb belgilanganligi;

masʼul organ tomonidan taqdim qilingan maʼlumotlarni koʻrib chiqish natijasida xorijiy davlat rasmiy nazorat tizimi va nazorat ostidagi obyektlar Oʻzbekiston Respublikasi talablari va veterinariya sohasidagi nazorat hujjatlariga muvofiq emas deb topilganligi.

54. Kafolat berish haqidagi murojaat boʻyicha vakolatli organning qarori qabul qilingan kundan eʼtiboran besh ish kunidan kechiktirmay masʼul organga yuborilishi kerak.

55. Masʼul organ vakolatli organning kafolat asosida xorijiy eksport qiluvchini Reyestrga kiritishni rad etish haqidagi qarorini olgan kundan eʼtiboran 30 kalendar kundan kechiktirmay ushbu qaror yuzasidan oʻz taklif va eʼtirozlari (mavjud boʻlsa), shuningdek, agar kamchiliklar aniqlangan boʻlsa, ularni bartaraf etish choralari koʻrilayotganligini tasdiqlovchi maʼlumotlar koʻrsatilgan javob xatini yuborishi mumkin. Masʼul organ tomonidan ushbu muddat ichida vakolatli organga javob xati yuborilmasligi masʼul organ vakolatli organning kafolat berish haqidagi murojaat boʻyicha qaroriga toʻliq rozi deb hisoblashga asos boʻladi.

56. Masʼul organ vakolatli organning kafolat asosida xorijiy eksport qiluvchini Reyestrga kiritishni rad etish haqidagi qarori yuzasidan javob xati yuborganda ushbu javob xati vakolatli organ tomonidan 15 kalendar kun ichida koʻrib chiqilishi hamda agar vakolatli organning qarorida koʻrsatilgan kamchiliklar bartaraf etilgan boʻlsa, xorijiy eksport qiluvchini Reyestrga kiritishni rad etish haqidagi qaror oʻzgartirilishi lozim.

57. Vakolatli organ masʼul organning kafolat berish haqidagi murojaatini koʻrib chiqish natijasi boʻyicha yakuniy qarorini u qabul qilingan kundan eʼtiboran besh ish kunidan kechiktirmay masʼul organga yuborishi kerak.

7-bob. Inspeksiya jarayonida nazorat ostidagi tovarlardan namunalar olish

58. Inspeksiyani oʻtkazish jarayonida nazorat ostidagi tovarlarning, shuningdek ularni ishlab chiqarishda foydalanilgan xom ashyoning veterinariya, veterinariya-sanitariya qoidalari va normalari talablariga muvofiqligini aniqlash maqsadida laboratoriya tekshiruvlari oʻtkazish uchun nazorat ostidagi tovarlar va ularni ishlab chiqarishda foydalanilgan xom ashyodan tanlov asosida namunalar olinadi.

59. Laboratoriya tekshiruvlari uchun namunalar olish inspeksiya oʻtkazayotgan mutaxassislarning soʻroviga koʻra amalga oshiriladi.

60. Nazorat ostidagi tovarlar va xom ashyodan namunalar olish kelishuv asosida mutaxassislar yoki masʼul organ xodimlari yoxud bevosita xorijiy eksport qiluvchilarning vakillari tomonidan amalga oshirilishi mumkin. Bunda, ushbu shaxslar tovarlardan namunalar olish boʻyicha bilim va malakaga ega boʻlishlari talab etiladi.

61. Nazorat ostidagi tovarlar va xom ashyodan namunalar olish masʼul organ bilan kelishilgan holda Oʻzbekiston Respublikasi yoki mazkur xorijiy davlatning qonunchiligi talablari asosida amalga oshirilishi mumkin.

62. Nazorat ostidagi tovarlar va xom ashyodan olingan namunalarda laboratoriya tekshiruvlarini oʻtkazish uchun tegishli laboratoriya masʼul organ bilan kelishuv asosida mazkur xorijiy davlatning akkreditatsiyadan oʻtgan laboratoriyalari orasidan tanlanadi.

63. Masʼul organ nazorat ostidagi tovarlar va xom ashyodan olingan namunalarda oʻtkazilgan laboratoriya tekshiruvlari natijalarini ular olingan kunning oʻzida mutaxassislarga taqdim etilishini taʼminlashi kerak.

64. Laboratoriya tekshiruvlari natijalari boʻyicha hujjatlar masʼul organ bilan kelishilgan tilda (oʻzbek, rus, ingliz yoki boshqa xorijiy tilda) rasmiylashtiriladi.

8-bob. Reyestrni shakllantirish va yuritish

65. Reyestr vakolatli organning rasmiy saytida elektron shaklda yuritiladi va foydalanish uchun ochiq hisoblanadi.

66. Vakolatli organ Reyestrni shakllantirish, yuritish va undagi axborotning yaxlitligi uchun masʼul hisoblanadi.

67. Reyestr xorijiy eksport qiluvchilar toʻgʻrisidagi maʼlumotlar kiritiladigan yagona elektron baza hisoblanadi va unda xorijiy eksport qiluvchilarning quyidagi maʼlumotlari qayd etiladi:

toʻliq nomi (oʻzbek, rus, ingliz yoki boshqa tegishli xorijiy tilda);

joylashgan manzili (pochta manzili, shu jumladan elektron pochta manzili), faoliyatni amalga oshirish manzili (alohida maʼmuriy-hududiy birlikni koʻrsatgan holda (masalan, viloyat, shtat, provinsiya);

telefon va faks raqamlari, shuningdek xorijiy davlatning tegishli organi tomonida berilgan identifikatsiya raqami (STIR);

ishlab chiqaradigan, qayta ishlaydigan yoki saqlaydigan nazorat ostidagi tovarlari roʻyxati;

veterinariya, veterinariya-sanitariya jihatdan statusi (bundan buyon matnda status deb yuritiladi).

68. Xorijiy eksport qiluvchilar quyidagilardan biri asosida Reyestrga kiritiladi:

audit va inspeksiya natijalariga koʻra vakolatli organning tegishli qarori bilan xorijiy eksport qiluvchini Reyestrga kiritish mumkin deb topilganda;

vakolatli organning tegishli qarori bilan masʼul organning kafolati asosida xorijiy eksport qiluvchini Reyestrga kiritish mumkin deb topilganda.

69. Vakolatli organning inspeksiya natijalari yuzasidan tayyorlangan yakuniy hisoboti yoki kafolat berish haqidagi murojaat boʻyicha qabul qilingan qarori masʼul organga yuborilgan kundan boshlab 10 kalendar kun ichida vakolatli organ xorijiy eksport qiluvchini Reyestrga kiritadi hamda bu haqda ikki ish kuni ichida masʼul organga bildirishnoma yuboradi.

70. Reyestrga kiritilgan xorijiy eksport qiluvchi quyidagi statuslardan biriga ega boʻladi:

“cheklovlarsiz” — xorijiy eksport qiluvchining nazorat ostidagi tovarlari Oʻzbekiston Respublikasi hududiga taqiq va cheklovlarsiz belgilangan tartibda eksport qilinadi;

“vaqtincha cheklangan” — davlat veterinariya xizmati nazoratini amalga oshirishda veterinariya, veterinariya-sanitariya qoidalari va normalarida belgilangan talablarga nomuvofiqlik aniqlanganligi sababli, xorijiy eksport qiluvchining nazorat ostidagi tovarlarini Oʻzbekiston Respublikasi hududiga eksport qilish vaqtincha cheklanadi;

“kuchaytirilgan laboratoriya nazoratida” — xorijiy eksport qiluvchining mamlakatidagi epizootik vaziyat barqaror emasligi sababli, xorijiy eksport qiluvchining Oʻzbekiston Respublikasi hududiga eksport qilingan nazorat ostidagi tovarlarining har bir partiyasidan laboratoriya tekshiruvi uchun namuna olish talab etiladi;

“ogohlantirilgan” — davlat veterinariya xizmati nazoratini amalga oshirish davomida xorijiy eksport qiluvchining nazorat ostidagi tovarlarida salbiy oʻzgarishlar aniqlanganda masʼul organ ushbu salbiy oʻzgarishlar bartaraf etilishi zarurligi haqida muddati koʻrsatilgan holda vakolatli organ tomonidan ogohlantiriladi. Bunda, salbiy oʻzgarishlar tegishli muddatda bartaraf etilmasa, xorijiy eksport qiluvchining statusi “vaqtincha cheklangan” yoki “kuchaytirilgan laboratoriya nazoratida” statusiga oʻzgartiriladi;

“maxsus shartlarda” — xorijiy eksport qiluvchining nazorat ostidagi tovarlarini Oʻzbekiston Respublikasi hududiga olib kirishga tovarlarni tayyorlash, qayta ishlash yoki saqlash usulini (masalan, muzlatilgan, sovutilgan, qadoqlangan, vakuumda yoki boshqa) oʻzgartirgan taqdirda yoʻl qoʻyiladi. Bunda, agar tegishli oʻzgartirish amalga oshirilmaydigan boʻlsa, xorijiy eksport qiluvchining statusi “vaqtincha cheklangan” statusiga oʻzgartiriladi.

71. Xorijiy eksport qiluvchining Reyestrdagi amaldagi statusi quyidagilar asosida oʻzgartirilishi mumkin:

masʼul organning soʻrovi asosida;

davlat veterinariya xizmati nazoratini amalga oshirishda xorijiy eksport qiluvchining nazorat ostidagi tovarlarida veterinariya, veterinariya-sanitariya qoidalari va normalariga nomuvofiqlik aniqlanganda;

xorijiy eksport qiluvchining mamlakatidagi epizootik vaziyat barqaror emas yoki aksincha barqaror deb topilganda;

xorijiy eksport qiluvchining nazorat ostidagi tovarlarida salbiy oʻzgarishlar aniqlanganda masʼul organ ushbu salbiy oʻzgarishlar bartaraf etilishi zarurligi haqida vakolatli organ tomonidan muddati koʻrsatilgan holda ogohlantirilganligiga qaramasdan, ushbu salbiy oʻzgarishlar tegishli muddat ichida bartaraf etilmagan boʻlsa;

xorijiy eksport qiluvchining nazorat ostidagi tovarlarini Oʻzbekiston Respublikasi hududiga olib kirish uchun tovarlarni ishlab chiqarish, qayta ishlash yoki saqlash usulini oʻzgartirish zarurligiga qaramasdan, xorijiy eksport qiluvchi tegishli oʻzgartirishni amalga oshirmagan boʻlsa;

xorijiy davlat rasmiy nazorat tizimi va nazorat ostidagi obyektlarni Epizootik vaziyatni oʻrganish maqsadida mutaxassislarni xorijiy mamlakatlarga yuborish zaruratini aniqlash mezonlari va yuborish tartibi toʻgʻrisidagi nizomda (roʻyxat raqami 3198, 2019-yil 29-noyabr) belgilangan tartibda oʻrganish natijasida ular Oʻzbekiston Respublikasi talablari yoki veterinariya sohasidagi nazorat hujjatlariga muvofiq yoki muvofiq emas deb topilganda.

72. Masʼul organ Reyestrga kiritilgan xorijiy eksport qiluvchilar faoliyati bilan bogʻliq oʻzgarishlar (masalan, tugatilishi, qayta tashkil etilishi, nomining oʻzgarishi) haqida vakolatli organni doimiy ravishda xabardor qilib borishi lozim.

73. Reyestrda avval qayd etilgan maʼlumotlar oʻzgargan hollarda tegishli oʻzgartirishlar vakolatli organ tomonidan Reyestrga 10 kalendar kun ichida kiritilishi kerak.

74. Xorijiy eksport qiluvchining Reyestrdagi statusi oʻzgarganda, xorijiy eksport qiluvchi Oʻzbekiston Respublikasi va veterinariya sohasidagi nazorat hujjatlari talablariga amal qilmaganda yoki nazorat ostidagi tovarlarda salbiy oʻzgarishlar aniqlanganda vakolatli organ bu haqda masʼul organni ikki ish kuni ichida xabardor qilishi lozim.

Bunda, masʼul organ vakolatli organning xabarida koʻrsatilgan holatni zudlik bilan oʻrganib chiqishi hamda ushbu holat tasdiqlangan taqdirda, mavjud kamchiliklarni bartaraf etish choralarini koʻrishi, shuningdek kamchiliklar bartaraf etilganda bu haqda vakolatli organga tasdiqlovchi hujjatlar bilan birga maʼlumot taqdim etishi kerak.

75. Reyestrga kiritilgan xorijiy eksport qiluvchi oʻzining yoki masʼul organning soʻrovi asosida, shuningdek nazorat ostidagi tovarlarni ishlab chiqarish, qayta ishlash yoki saqlashda Oʻzbekiston Respublikasi va veterinariya sohasidagi nazorat hujjatlari talablariga amal qilinmagan taqdirda vakolatli organning tashabbusi bilan Reyestrdan chiqarilishi mumkin.

9-bob. Yakuniy qoidalar

76. Vakolatli organning qarorlari ustidan qonunchilikda belgilangan tartibda shikoyat qilinishi mumkin.

77. Mazkur Nizom talablarining buzilishida aybdor boʻlgan shaxslar qonunchilik hujjatlarida belgilangan tartibda javobgar boʻladi.

78. Mazkur Nizom Oʻzbekiston Respublikasi Investitsiyalar va tashqi savdo vazirligi, Sanitariya-epidemiologik osoyishtalik va jamoat salomatligi xizmati, Monopoliyaga qarshi kurashish qoʻmitasi, Oʻzbekiston Savdo-sanoat palatasi hamda Investitsiyalar va tashqi savdo vazirligi huzuridagi Oʻzbekiston texnik jihatdan tartibga solish agentligi bilan kelishilgan.

Rais B. NORKOBILOV

Oʻzbekiston Savdo-sanoat palatasi raisi A. IKRAMOV

Oʻzbekiston Respublikasi Sanitariya-epidemiologik osoyishtalik va jamoat salomatligi xizmati boshligʻi B. YUSUPALIYEV

Monopoliyaga qarshi kurashish koʻmitasi raisi Sh. SHARAXMETOV

Texnik jixatdan tartibga solish agentligi Bosh direktori D. SATTAROV

Investitsiyalar va tashki savdo vaziri S. UMURZAKOV

Toshkent sh.,

2022-yil 12-mart,

2022-yil 21-fevral

2022-yil 11-fevral

2022-yil 10-fevral

2022-yil 17-fevral

2022-yil 11-mart

12-son

(Qonunchilik maʼlumotlari milliy bazasi, 29.04.2022-y., 10/22/3365/0370-son; 08.08.2024-y., 10/24/3365-1/0598-son; 28.04.2026-y., 10/26/3365-2/0424-son)

lex.uz