📅 2022-yil 7-may · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2022 йил 7 май · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 7 мая 2022 г. · Постановления Кабинета Министров
Официальный текст. Официальный документ. Редакционные примечания не включены.
📅 7 May 2022 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
«Навоийазот» АЖ негизида давлат-хусусий шериклик асосида ташкил этиладиган кимё-технологик кластери учун иссиқлик ва қуёш электр станцияларини барпо этиш чора-тадбирлари тўғрисида
Тўғридан-тўғри давлат кафолатисиз хорижий инвестициялар ҳисобидан «Навоийазот» АЖ негизида ташкил этиладиган кимё-технологик кластери учун муқобил энергия таъминоти тизимини яратиш ва кимё тармоғи корхоналарини ишончли электр ва иссиқлик энергияси билан таъминлаш мақсадида Вазирлар Маҳкамаси қарор қилади:
1. «Навоийазот» АЖ негизида ташкил этиладиган кимё-технологик кластери учун иссиқлик ва қуёш электр станцияларини қуриш лойиҳасини (кейинги ўринларда — лойиҳа) амалга ошириш доирасида:
2021 йил ноябрь ойида «Ўзкимёсаноат» АЖ, «Electricite de France S.A.» (Франция), «Stone city InSolar B.V» (Нидерландия) ва «Siemens energy global GmbH&Co.KG» (Германия) компаниялари (кейинги ўринларда — хусусий шерик) ўртасида лойиҳа учун техник ечимларни ишлаб чиқиш ва таҳлил ўтказиш бўйича асосий шартлар тўғрисида битим имзоланганлиги;
хусусий шерик томонидан лойиҳани амалга ошириш мақсадида Ўзбекистон Республикасида махсус лойиҳа компанияси ташкил этилиши (кейинги ўринларда — лойиҳа компанияси) маълумот учун қабул қилинсин.
2. Белгилансинки:
лойиҳа хусусий шерик билан давлат-хусусий шериклик асосида тўғридан-тўғри музокаралар ўтказиш орқали амалга оширилади;
лойиҳа доирасида давлат шериги сифатида «Ўзкимёсаноат» АЖ иштирок этади;
лойиҳа компанияси ва давлат шериги ўртасида давлат-хусусий шериклик битими ҳамда Молия вазирлиги ўртасида давлат томонидан қўллаб-қувватлаш тўғрисида битим имзоланади;
«Ўзкимёсаноат» АЖ, Давлат-хусусий шерикликни ривожлантириш агентлиги (кейинги ўринларда — Агентлик) ва Молия вазирлиги лойиҳани амалга оширишда давлат шериги манфаатларини ҳимоя қилиш мақсадида икки ҳафта муддатда энг яхши таклифларни танлаш орқали юридик консультантни жалб қилади.
Бунда мазкур консультантлар учун харажатлар хусусий шерик томонидан қопланади.
3. «Ўзкимёсаноат» АЖ 2022 йил:
20 майга қадар лойиҳанинг якуний параметрларига аниқлик киритиш орқали техник-технологик ва молиявий-иқтисодий жиҳатдан энг мақбул ечимлар ишлаб чиқилиши;
5 июнга қадар хусусий шерик томонидан лойиҳа концепцияси ва лойиҳани баҳолаш ҳужжати ишлаб чиқилиши;
5 июлга қадар лойиҳа концепцияси ва лойиҳани баҳолаш ҳужжатларининг халқаро консультантлар ва Агентлик билан келишилиши;
20 июлга қадар лойиҳа концепцияси тасдиқлаш учун Вазирлар Маҳкамасига киритилиши;
1 августга қадар халқаро консультантлар, Агентлик, Энергетика вазирлиги ва Молия вазирлиги билан биргаликда давлат-хусусий шериклик битими ва давлат томонидан қўллаб-қувватлаш тўғрисида битим лойиҳалари тайёрланиши;
20 августга қадар хусусий шерик билан давлат-хусусий шериклик битими ва давлат томонидан қўллаб-қувватлаш тўғрисида битим лойиҳалари келишилиши;
1 сентябрга қадар лойиҳа доирасида ишлаб чиқарилган электр ва иссиқлик энергиясининг харид қилинишини инобатга олинган ҳолда давлат-хусусий шериклик битими имзоланишини таъминласин.
4. Молия вазирлиги «Ўзкимёсаноат» АЖ билан биргаликда 2022 йил 1 сентябрга қадар лойиҳа доирасида давлат томонидан қўллаб-қувватлаш тўғрисида битим имзоланишини таъминласин.
5. «Ўзкимёсаноат» АЖ Молия вазирлиги ва Энергетика вазирлиги билан биргаликда 2022 йил 1 октябрга қадар лойиҳани амалга ошириш бўйича тегишли норматив-ҳуқуқий ҳужжат лойиҳасини белгиланган тартибда Вазирлар Маҳкамасига киритсин.
6. Мазкур қарорнинг бажарилишини назорат қилиш Ўзбекистон Республикаси Бош вазирининг молия-иқтисодиёт ва камбағалликни қисқартириш масалалари бўйича ўринбосари — иқтисодий тараққиёт ва камбағалликни қисқартириш вазири Ж.А. Қўчқоров ҳамда Ўзбекистон Республикаси Бош вазирининг Геология, энергетика, саноат ва унинг базавий тармоқларини ривожлантириши масалалари бўйича маслаҳатчиси — Давлат геология ва минерал ресурслар қўмитаси раиси Б.Ф. Исламов зиммасига юклансин.
Ўзбекистон Республикасининг Бош вазири А. АРИПОВ
Тошкент ш.,
2022 йил 7 май,
240-сон
Oʻzbekiston Respublikasi Vazirlar Mahkamasining
qarori
“Navoiyazot” AJ negizida davlat-xususiy sheriklik asosida tashkil etiladigan kimyo-texnologik klasteri uchun issiqlik va quyosh elektr stansiyalarini barpo etish chora-tadbirlari toʻgʻrisida
Toʻgʻridan-toʻgʻri davlat kafolatisiz xorijiy investitsiyalar hisobidan “Navoiyazot” AJ negizida tashkil etiladigan kimyo-texnologik klasteri uchun muqobil energiya taʼminoti tizimini yaratish va kimyo tarmogʻi korxonalarini ishonchli elektr va issiqlik energiyasi bilan taʼminlash maqsadida Vazirlar Mahkamasi qaror qiladi:
1. “Navoiyazot” AJ negizida tashkil etiladigan kimyo-texnologik klasteri uchun issiqlik va quyosh elektr stansiyalarini qurish loyihasini (keyingi oʻrinlarda — loyiha) amalga oshirish doirasida:
2021-yil noyabr oyida “Oʻzkimyosanoat” AJ, “Electricite de France S.A.” (Fransiya), “Stone city InSolar B.V” (Niderlandiya) va “Siemens energy global GmbH&Co.KG” (Germaniya) kompaniyalari (keyingi oʻrinlarda — xususiy sherik) oʻrtasida loyiha uchun texnik yechimlarni ishlab chiqish va tahlil oʻtkazish boʻyicha asosiy shartlar toʻgʻrisida bitim imzolanganligi;
xususiy sherik tomonidan loyihani amalga oshirish maqsadida Oʻzbekiston Respublikasida maxsus loyiha kompaniyasi tashkil etilishi (keyingi oʻrinlarda — loyiha kompaniyasi) maʼlumot uchun qabul qilinsin.
2. Belgilansinki:
loyiha xususiy sherik bilan davlat-xususiy sheriklik asosida toʻgʻridan-toʻgʻri muzokaralar oʻtkazish orqali amalga oshiriladi;
loyiha doirasida davlat sherigi sifatida “Oʻzkimyosanoat” AJ ishtirok etadi;
loyiha kompaniyasi va davlat sherigi oʻrtasida davlat-xususiy sheriklik bitimi hamda Moliya vazirligi oʻrtasida davlat tomonidan qoʻllab-quvvatlash toʻgʻrisida bitim imzolanadi;
“Oʻzkimyosanoat” AJ, Davlat-xususiy sheriklikni rivojlantirish agentligi (keyingi oʻrinlarda — Agentlik) va Moliya vazirligi loyihani amalga oshirishda davlat sherigi manfaatlarini himoya qilish maqsadida ikki hafta muddatda eng yaxshi takliflarni tanlash orqali yuridik konsultantni jalb qiladi.
Bunda mazkur konsultantlar uchun xarajatlar xususiy sherik tomonidan qoplanadi.
3. “Oʻzkimyosanoat” AJ 2022-yil:
20-mayga qadar loyihaning yakuniy parametrlariga aniqlik kiritish orqali texnik-texnologik va moliyaviy-iqtisodiy jihatdan eng maqbul yechimlar ishlab chiqilishi;
5-iyunga qadar xususiy sherik tomonidan loyiha konsepsiyasi va loyihani baholash hujjati ishlab chiqilishi;
5-iyulga qadar loyiha konsepsiyasi va loyihani baholash hujjatlarining xalqaro konsultantlar va Agentlik bilan kelishilishi;
20-iyulga qadar loyiha konsepsiyasi tasdiqlash uchun Vazirlar Mahkamasiga kiritilishi;
1-avgustga qadar xalqaro konsultantlar, Agentlik, Energetika vazirligi va Moliya vazirligi bilan birgalikda davlat-xususiy sheriklik bitimi va davlat tomonidan qoʻllab-quvvatlash toʻgʻrisida bitim loyihalari tayyorlanishi;
20-avgustga qadar xususiy sherik bilan davlat-xususiy sheriklik bitimi va davlat tomonidan qoʻllab-quvvatlash toʻgʻrisida bitim loyihalari kelishilishi;
1-sentabrga qadar loyiha doirasida ishlab chiqarilgan elektr va issiqlik energiyasining xarid qilinishini inobatga olingan holda davlat-xususiy sheriklik bitimi imzolanishini taʼminlasin.
4. Moliya vazirligi “Oʻzkimyosanoat” AJ bilan birgalikda 2022-yil 1-sentabrga qadar loyiha doirasida davlat tomonidan qoʻllab-quvvatlash toʻgʻrisida bitim imzolanishini taʼminlasin.
5. “Oʻzkimyosanoat” AJ Moliya vazirligi va Energetika vazirligi bilan birgalikda 2022-yil 1-oktabrga qadar loyihani amalga oshirish boʻyicha tegishli normativ-huquqiy hujjat loyihasini belgilangan tartibda Vazirlar Mahkamasiga kiritsin.
6. Mazkur qarorning bajarilishini nazorat qilish Oʻzbekiston Respublikasi Bosh vazirining moliya-iqtisodiyot va kambagʻallikni qisqartirish masalalari boʻyicha oʻrinbosari — iqtisodiy taraqqiyot va kambagʻallikni qisqartirish vaziri J.A. Qoʻchqorov hamda Oʻzbekiston Respublikasi Bosh vazirining Geologiya, energetika, sanoat va uning bazaviy tarmoqlarini rivojlantirishi masalalari boʻyicha maslahatchisi — Davlat geologiya va mineral resurslar qoʻmitasi raisi B.F. Islamov zimmasiga yuklansin.
Oʻzbekiston Respublikasining Bosh vaziri A. ARIPOV
Toshkent sh.,
2022-yil 7-may,
240-son