📅 2022-yil 1-iyun · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2022 йил 1 июнь · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 1 июня 2022 г. · Постановления Кабинета Министров
Официальный текст. Официальный документ. Редакционные примечания не включены.
📅 1 June 2022 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
Наманган вилоятида 2-вилоят фтизиатрия шифохонасини ташкил этиш чора-тадбирлари тўғрисида
Аҳоли саломатлигини муҳофаза қилиш, сил касаллигига чалинган беморларга ўз вақтида, тўлиқ ва сифатли тиббий ёрдам кўрсатиш, фтизиатрия ёрдамини янада яхшилаш ҳамда фтизиатрия муассасаларининг моддий-техник базасини мустаҳкамлаш мақсадида Вазирлар Маҳкамаси қарор қилади:
1. Вазирлар Маҳкамасининг «Республика ҳудудларида коронавирус пандемияси тарқалишининг олдини олишга доир қўшимча чора-тадбирлар тўғрисида» 2020 йил 20 майдаги 306-сон қарорига мувофиқ Наманган вилоятининг Поп туманида махсус шифохона ва вақтинчалик карантинда сақлаш мажмуаси ташкил этилганлиги маълумот учун қабул қилинсин.
2. Соғлиқни сақлаш вазирлиги, Молия вазирлиги, Наманган вилояти ҳокимлигининг:
Чуст тумани силга қарши кураш диспансери (80 ўринли), Мингбулоқ тумани 2-вилоят сил касалликлари шифохонаси (120 ўринли), вилоят фтизиатрия ва пульмонология марказининг болалар бўлимини (70 ўринли) Поп туманида жойлашган махсус шифохонага кўчириш;
Наманган вилоятининг, Поп туманида 2-вилоят фтизиатрия шифохонасини (кейинги ўринларда — 2-вилоят фтизиатрия шифохонаси) ташкил этиш;
Поп туманининг, Ғурумсарой қишлоғидаги, «Миришкор» маҳалласида жойлашган махсус шифохонанинг бино ва иншоотларини 2-вилоят фтизиатрия шифохонасига оператив бошқарув ҳуқуқи асосида бепул бериш тўғрисидаги таклифларига розилик берилсин.
3. Наманган вилояти ҳокимлиги ўн кун муддатда Поп туманининг Ғурумсарой қишлоғидаги «Миришкор» маҳалласида жойлашган махсус шифохонанинг бино ва иншоотларини 2-вилоят фтизиатрия шифохонасига белгиланган тартибда ўтказсин.
4. Соғлиқни сақлаш вазирлиги:
бир ой муддатда 2-вилоят фтизиатрия шифохонаси тузилмасини ишлаб чиқсин ва тасдиқласин;
2-вилоят фтизиатрия шифохонасини келгусида замонавий тиббий жиҳозлар ва малакали кадрлар билан таъминлаш чораларини кўрсин;
Молия вазирлиги билан биргаликда 2-вилоят фтизиатрия шифохонасини сақлаш харажатларининг сметаси ва штатлар жадвалини белгиланган тартибда кўриб чиқиб, рўйхатдан ўтказилишини таъминласин, келгуси йилдан бошлаб ушбу шифохонани сақлаш ва жиҳозлаш билан боғлиқ харажатларни республика бюджети параметрларини тасдиқлашда назарда тутсин;
Наманган вилояти ҳокимлиги, Давлат солиқ қўмитаси ҳузуридаги Кадастр агентлиги билан биргаликда махсус шифохонанинг бино ва иншоотлари 2-вилоят фтизиатрия шифохонасига белгиланган тартибда берилгандан сўнг кадастр ҳужжатлари расмийлаштирилишини таъминласин;
Давлат активларини бошқариш агентлиги, Наманган вилояти ҳокимлиги билан биргаликда Чуст тумани силга қарши кураш диспансери (80 ўринли), Мингбулоқ тумани 2-вилоят сил касалликлари шифохонаси (120 ўринли) ҳамда вилоят фтизиатрия ва пульмонология марказининг болалар бўлими (70 ўринли) кўчирилиши муносабати билан бўшайдиган бино ва иншоотлардан келгусида мақсадли фойдаланиш чораларини кўрсин.
5. Мазкур қарорнинг бажарилишини назорат қилиш Ўзбекистон Республикаси соғлиқни сақлаш вазири Б.А. Мусаев ва Наманган вилояти ҳокими Ш.Ш. Абдуразаков зиммасига юклансин.
Ўзбекистон Республикасининг Бош вазири А. АРИПОВ
Тошкент ш.,
2022 йил 1 июнь,
289-сон
Oʻzbekiston Respublikasi Vazirlar Mahkamasining
qarori
Namangan viloyatida 2-viloyat ftiziatriya shifoxonasini tashkil etish chora-tadbirlari toʻgʻrisida
Aholi salomatligini muhofaza qilish, sil kasalligiga chalingan bemorlarga oʻz vaqtida, toʻliq va sifatli tibbiy yordam koʻrsatish, ftiziatriya yordamini yanada yaxshilash hamda ftiziatriya muassasalarining moddiy-texnik bazasini mustahkamlash maqsadida Vazirlar Mahkamasi qaror qiladi:
1. Vazirlar Mahkamasining “Respublika hududlarida koronavirus pandemiyasi tarqalishining oldini olishga doir qoʻshimcha chora-tadbirlar toʻgʻrisida” 2020-yil 20-maydagi 306-son qaroriga muvofiq Namangan viloyatining Pop tumanida maxsus shifoxona va vaqtinchalik karantinda saqlash majmuasi tashkil etilganligi maʼlumot uchun qabul qilinsin.
2. Sogʻliqni saqlash vazirligi, Moliya vazirligi, Namangan viloyati hokimligining:
Chust tumani silga qarshi kurash dispanseri (80 oʻrinli), Mingbuloq tumani 2-viloyat sil kasalliklari shifoxonasi (120 oʻrinli), viloyat ftiziatriya va pulmonologiya markazining bolalar boʻlimini (70 oʻrinli) Pop tumanida joylashgan maxsus shifoxonaga koʻchirish;
Namangan viloyatining, Pop tumanida 2-viloyat ftiziatriya shifoxonasini (keyingi oʻrinlarda — 2-viloyat ftiziatriya shifoxonasi) tashkil etish;
Pop tumanining, Gʻurumsaroy qishlogʻidagi, “Mirishkor” mahallasida joylashgan maxsus shifoxonaning bino va inshootlarini 2-viloyat ftiziatriya shifoxonasiga operativ boshqaruv huquqi asosida bepul berish toʻgʻrisidagi takliflariga rozilik berilsin.
3. Namangan viloyati hokimligi oʻn kun muddatda Pop tumanining Gʻurumsaroy qishlogʻidagi “Mirishkor” mahallasida joylashgan maxsus shifoxonaning bino va inshootlarini 2-viloyat ftiziatriya shifoxonasiga belgilangan tartibda oʻtkazsin.
4. Sogʻliqni saqlash vazirligi:
bir oy muddatda 2-viloyat ftiziatriya shifoxonasi tuzilmasini ishlab chiqsin va tasdiqlasin;
2-viloyat ftiziatriya shifoxonasini kelgusida zamonaviy tibbiy jihozlar va malakali kadrlar bilan taʼminlash choralarini koʻrsin;
Moliya vazirligi bilan birgalikda 2-viloyat ftiziatriya shifoxonasini saqlash xarajatlarining smetasi va shtatlar jadvalini belgilangan tartibda koʻrib chiqib, roʻyxatdan oʻtkazilishini taʼminlasin, kelgusi yildan boshlab ushbu shifoxonani saqlash va jihozlash bilan bogʻliq xarajatlarni respublika budjeti parametrlarini tasdiqlashda nazarda tutsin;
Namangan viloyati hokimligi, Davlat soliq qoʻmitasi huzuridagi Kadastr agentligi bilan birgalikda maxsus shifoxonaning bino va inshootlari 2-viloyat ftiziatriya shifoxonasiga belgilangan tartibda berilgandan soʻng kadastr hujjatlari rasmiylashtirilishini taʼminlasin;
Davlat aktivlarini boshqarish agentligi, Namangan viloyati hokimligi bilan birgalikda Chust tumani silga qarshi kurash dispanseri (80 oʻrinli), Mingbuloq tumani 2-viloyat sil kasalliklari shifoxonasi (120 oʻrinli) hamda viloyat ftiziatriya va pulmonologiya markazining bolalar boʻlimi (70 oʻrinli) koʻchirilishi munosabati bilan boʻshaydigan bino va inshootlardan kelgusida maqsadli foydalanish choralarini koʻrsin.
5. Mazkur qarorning bajarilishini nazorat qilish Oʻzbekiston Respublikasi sogʻliqni saqlash vaziri B.A. Musayev va Namangan viloyati hokimi Sh.Sh. Abdurazakov zimmasiga yuklansin.
Oʻzbekiston Respublikasining Bosh vaziri A. ARIPOV
Toshkent sh.,
2022-yil 1-iyun,
289-son