📅 2022-yil 9-iyun · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2022 йил 9 июнь · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 9 июня 2022 г. · Постановления Кабинета Министров
Официальный текст. Официальный документ. Редакционные примечания не включены.
📅 9 June 2022 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
Ўзбекистон халқ шоири Тўра Сулаймон уй-музейини ташкил этиш тўғрисида
Ўзининг юксак бадиий асарлари билан ўзбек адабиётида ўзига хос ижодий мактаб яратган оташин ижодкор, Ўзбекистон халқ шоири Тўра Сулаймоннинг она Ватанга чексиз муҳаббат ва садоқат, миллий қадриятларимиздан фахрланиш ва ифтихор туйғулари сингдирилган асарларининг халқимиз маънавиятини юксалтириш ва ёш авлод тарбиясидаги ўрни ва аҳамиятини ҳисобга олиб, шунингдек, адибнинг бой ижодий меросини чуқур ўрганиш, тарғиб қилиш ҳамда унинг номини абадийлаштириш мақсадида Вазирлар Маҳкамаси қарор қилади:
1. Ўзбекистон Ёзувчилар уюшмаси, Туризм ва маданий мерос вазирлиги, Олий ва ўрта махсус таълим вазирлиги, Республика Маънавият ва маърифат маркази, Сирдарё вилояти ҳокимлиги ҳамда кенг жамоатчиликнинг Ўзбекистон халқ шоири Тўра Сулаймон яшаб ижод қилган Сирдарё вилояти Мирзаобод тумани Турғун Аҳмедов номидаги маҳалла фуқаролар йигини Бахмал кўчаси 7-уй манзилида Туризм ва маданий мерос вазирлиги ҳузуридаги Маданий мерос агентлигининг юридик шахс бўлган Тўра Сулаймон уй-музейини (кейинги ўринларда — уй-музей) ташкил этиш тўғрисидаги таклифи маъкуллансин.
2. Сирдарё вилояти Мирзаобод тумани Турғун Аҳмедов номидаги маҳалла фуқаролар йигини Бахмал кўчаси 7-уй манзилида Ўзбекистон халқ шоири Тўра Сулаймоннинг мулк ҳуқуқи асосида истиқомат қилувчи қариндошлари билан ушбу манзилдаги бинони уй-музейга айлантириш бўйича ўзаро келишув асосида розилик олинганлиги ва шу асосда уларни белгиланган тартибда уй-жой билан таъминлаш назарда тутилганлиги маълумот учун қабул қилинсин.
3. Сирдарё вилояти ҳокимлиги икки ой муддатда лойиҳа ташкилотлари билан биргаликда уй-музейни ташкил этиш лойиҳаларини ишлаб чиқсин ва белгиланган тартибда тасдиқласин.
Бунда, уй-музей ҳовлисида шоирнинг ҳайкалини ўрнатиш, уй-музей биносини реконструкция қилиш, қўшимча бинолар қуриш ва атрофини ободонлаштириш, 2022 йил охирига қадар уй-музейни фойдаланишга топшириш билан боғлиқ чора-тадбирлар назарда тутилади.
4. Қуйидагилар:
Сирдарё вилояти ҳокимлиги ҳузуридаги «Ягона буюртмачи хизмати» инжиниринг компанияси — уй-музей биносини реконструкция қилиш, қўшимча бинолар қуриш ва атрофини ободонлаштириш ҳамда уй-музей экспозициясини яратиш бўйича;
Сирдарё вилояти ҳокимлиги — Тўра Сулаймон ҳайкалини яратиш бўйича буюртмачи этиб белгилансин.
5. Ўзбекистон Бадиий академияси бир ой муддатда Тўра Сулаймон ҳайкалини яратиш бўйича ижодий танлов эълон қилсин ва уни белгиланган тартибда ўтказсин.
6. Белгилаб қўйилсинки:
а) уй-музей биносини реконструкция қилиш, қўшимча бинолар қуриш ва атрофини ободонлаштириш, шоир ҳайкалининг постаментини барпо этиш, ҳайкални ўрнатиш бўйича лойиҳа-смета ҳужжатларини ишлаб чиқиш ва экспертизадан ўтказиш ишларини молиялаштириш:
Сирдарё вилояти маҳаллий бюджети маблағлари;
жисмоний ва юридик шахсларнинг ҳомийлик хайриялари;
қонунчилик ҳужжатларида тақиқланмаган бошқа манбалар ҳисобига;
б) уй-музейни сақлаш, шу жумладан, ходимлар меҳнатига ҳақ тўлаш билан боғлиқ харажатлар Ўзбекистон Республикаси Давлат бюджети параметрларида ижтимоий соҳага назарда тутилган маблағлар ҳисобига амалга оширилади.
7. Қурилиш вазирлиги ҳайкалнинг постаментини барпо этсин ва мазкур қарор доирасида ҳайкални ўрнатишда бажариладиган ишларнинг сифати юзасидан давлат архитектура-қурилиш назоратини ўрнатсин.
8. Сирдарё вилояти ҳокимлиги:
а) Туризм ва маданий мерос вазирлиги ҳузуридаги Маданий мерос агентлиги, манфаатдор вазирликлар ва идоралар билан биргаликда:
икки ой муддатда уй-музейнинг концепциясини ишлаб чиқиш ва тасдиқлаш;
уй-музей ходимлари штатлар жадвалини белгиланган тартибда ишлаб чиқиш ва тасдиқлаш ҳамда уй-музейни малакали кадрлар билан тўлдириш;
уй-музейни замонавий интерфаол ахборот-коммуникация технологиялари билан таъминлаш;
б) Жиззах вилояти ҳокимлиги ва Ёзувчилар уюшмаси билан биргаликда уй-музей экспозициясини музей ашёлари билан тўлдириш чораларини кўрсин.
9. Қуйидагиларга:
а) Ўзбекистон Ёзувчилар уюшмасига Олий ва ўрта махсус таълим вазирлиги, Халқ таълими вазирлиги, Маданият вазирлиги, Кинематография агентлиги, Туризм ва маданий мерос вазирлиги ҳузуридаги Маданий мерос агентлиги, Сирдарё вилояти ҳокимлиги ҳамда бошқа манфаатдор ташкилотлар билан биргаликда шоир ҳаёти ва ижодига бағишланган:
уй-музейда давра суҳбатлари, ижодий учрашувлар, маданий-маърифий тадбирларни мунтазам равишда ташкил этиб бориш;
ҳужжатли фильм суратга олиш, мусиқа асарлари ва қўшиқлар, Интернет ва ижтимоий тармоқлар учун мўлжалланган аудиовизуал асарлар яратиш ишларини ташкил қилиш;
б) Ўзбекистон Миллий ахборот агентлиги, Ўзбекистон Миллий телерадиокомпанияси ва бошқа оммавий ахборот воситаларига уй-музей фаолиятини, шу жумладан уй-музейда ўтказиладиган тадбирларни кенг ёритиб бориш тавсия этилсин.
10. Вазирлар Маҳкамасининг 2017 йил 11 декабрдаги 975-сон қарори билан тасдиқланган Ўзбекистон Республикаси Давлат бюджети ҳисобидан молиялаштириладиган музейлари, уларнинг филиал ва бўлимлари рўйхатига иловага мувофиқ қўшимча киритилсин.
11. Мазкур қарорнинг бажарилишини назорат қилиш Ўзбекистон Республикасининг Бош вазири ўринбосари — туризм ва маданий мерос вазири А.А. Абдуҳакимов ҳамда Сирдарё вилояти ҳокими Ғ.Ғ. Мирзаев зиммасига юклансин.
Вазирлар Маҳкамасининг 2022 йил 9 майдаги 321-сон қарорига ИЛОВА
Вазирлар Маҳкамасининг 2017 йил 11 декабрдаги 975-сон қарори билан тасдиқланган Ўзбекистон Республикаси Давлат бюджети ҳисобидан молиялаштириладиган музейлари, уларнинг филиал ва бўлимлари рўйхатига киритилаётган қўшимча
Қуйидаги мазмундаги 13 1 -позиция билан тўлдирилсин:
« 13 1 . Тўра Сулаймон уй-музейи Мирзаобод тумани ».
Ўзбекистон Республикасининг Бош вазири А. АРИПОВ
Тошкент ш.,
2022 йил 9 июнь,
321-сон
Oʻzbekiston Respublikasi Vazirlar Mahkamasining
qarori
Oʻzbekiston xalq shoiri Toʻra Sulaymon uy-muzeyini tashkil etish toʻgʻrisida
Oʻzining yuksak badiiy asarlari bilan oʻzbek adabiyotida oʻziga xos ijodiy maktab yaratgan otashin ijodkor, Oʻzbekiston xalq shoiri Toʻra Sulaymonning ona Vatanga cheksiz muhabbat va sadoqat, milliy qadriyatlarimizdan faxrlanish va iftixor tuygʻulari singdirilgan asarlarining xalqimiz maʼnaviyatini yuksaltirish va yosh avlod tarbiyasidagi oʻrni va ahamiyatini hisobga olib, shuningdek, adibning boy ijodiy merosini chuqur oʻrganish, targʻib qilish hamda uning nomini abadiylashtirish maqsadida Vazirlar Mahkamasi qaror qiladi:
1. Oʻzbekiston Yozuvchilar uyushmasi, Turizm va madaniy meros vazirligi, Oliy va oʻrta maxsus taʼlim vazirligi, Respublika Maʼnaviyat va maʼrifat markazi, Sirdaryo viloyati hokimligi hamda keng jamoatchilikning Oʻzbekiston xalq shoiri Toʻra Sulaymon yashab ijod qilgan Sirdaryo viloyati Mirzaobod tumani Turgʻun Ahmedov nomidagi mahalla fuqarolar yigini Baxmal koʻchasi 7-uy manzilida Turizm va madaniy meros vazirligi huzuridagi Madaniy meros agentligining yuridik shaxs boʻlgan Toʻra Sulaymon uy-muzeyini (keyingi oʻrinlarda — uy-muzey) tashkil etish toʻgʻrisidagi taklifi maʼkullansin.
2. Sirdaryo viloyati Mirzaobod tumani Turgʻun Ahmedov nomidagi mahalla fuqarolar yigini Baxmal koʻchasi 7-uy manzilida Oʻzbekiston xalq shoiri Toʻra Sulaymonning mulk huquqi asosida istiqomat qiluvchi qarindoshlari bilan ushbu manzildagi binoni uy-muzeyga aylantirish boʻyicha oʻzaro kelishuv asosida rozilik olinganligi va shu asosda ularni belgilangan tartibda uy-joy bilan taʼminlash nazarda tutilganligi maʼlumot uchun qabul qilinsin.
3. Sirdaryo viloyati hokimligi ikki oy muddatda loyiha tashkilotlari bilan birgalikda uy-muzeyni tashkil etish loyihalarini ishlab chiqsin va belgilangan tartibda tasdiqlasin.
Bunda, uy-muzey hovlisida shoirning haykalini oʻrnatish, uy-muzey binosini rekonstruksiya qilish, qoʻshimcha binolar qurish va atrofini obodonlashtirish, 2022-yil oxiriga qadar uy-muzeyni foydalanishga topshirish bilan bogʻliq chora-tadbirlar nazarda tutiladi.
4. Quyidagilar:
Sirdaryo viloyati hokimligi huzuridagi “Yagona buyurtmachi xizmati” injiniring kompaniyasi — uy-muzey binosini rekonstruksiya qilish, qoʻshimcha binolar qurish va atrofini obodonlashtirish hamda uy-muzey ekspozitsiyasini yaratish boʻyicha;
Sirdaryo viloyati hokimligi — Toʻra Sulaymon haykalini yaratish boʻyicha buyurtmachi etib belgilansin.
5. Oʻzbekiston Badiiy akademiyasi bir oy muddatda Toʻra Sulaymon haykalini yaratish boʻyicha ijodiy tanlov eʼlon qilsin va uni belgilangan tartibda oʻtkazsin.
6. Belgilab qoʻyilsinki:
a) uy-muzey binosini rekonstruksiya qilish, qoʻshimcha binolar qurish va atrofini obodonlashtirish, shoir haykalining postamentini barpo etish, haykalni oʻrnatish boʻyicha loyiha-smeta hujjatlarini ishlab chiqish va ekspertizadan oʻtkazish ishlarini moliyalashtirish:
Sirdaryo viloyati mahalliy budjeti mablagʻlari;
jismoniy va yuridik shaxslarning homiylik xayriyalari;
qonunchilik hujjatlarida taqiqlanmagan boshqa manbalar hisobiga;
b) uy-muzeyni saqlash, shu jumladan, xodimlar mehnatiga haq toʻlash bilan bogʻliq xarajatlar Oʻzbekiston Respublikasi Davlat budjeti parametrlarida ijtimoiy sohaga nazarda tutilgan mablagʻlar hisobiga amalga oshiriladi.
7. Qurilish vazirligi haykalning postamentini barpo etsin va mazkur qaror doirasida haykalni oʻrnatishda bajariladigan ishlarning sifati yuzasidan davlat arxitektura-qurilish nazoratini oʻrnatsin.
8. Sirdaryo viloyati hokimligi:
a) Turizm va madaniy meros vazirligi huzuridagi Madaniy meros agentligi, manfaatdor vazirliklar va idoralar bilan birgalikda:
ikki oy muddatda uy-muzeyning konsepsiyasini ishlab chiqish va tasdiqlash;
uy-muzey xodimlari shtatlar jadvalini belgilangan tartibda ishlab chiqish va tasdiqlash hamda uy-muzeyni malakali kadrlar bilan toʻldirish;
uy-muzeyni zamonaviy interfaol axborot-kommunikatsiya texnologiyalari bilan taʼminlash;
b) Jizzax viloyati hokimligi va Yozuvchilar uyushmasi bilan birgalikda uy-muzey ekspozitsiyasini muzey ashyolari bilan toʻldirish choralarini koʻrsin.
9. Quyidagilarga:
a) Oʻzbekiston Yozuvchilar uyushmasiga Oliy va oʻrta maxsus taʼlim vazirligi, Xalq taʼlimi vazirligi, Madaniyat vazirligi, Kinematografiya agentligi, Turizm va madaniy meros vazirligi huzuridagi Madaniy meros agentligi, Sirdaryo viloyati hokimligi hamda boshqa manfaatdor tashkilotlar bilan birgalikda shoir hayoti va ijodiga bagʻishlangan:
uy-muzeyda davra suhbatlari, ijodiy uchrashuvlar, madaniy-maʼrifiy tadbirlarni muntazam ravishda tashkil etib borish;
hujjatli film suratga olish, musiqa asarlari va qoʻshiqlar, Internet va ijtimoiy tarmoqlar uchun moʻljallangan audiovizual asarlar yaratish ishlarini tashkil qilish;
b) Oʻzbekiston Milliy axborot agentligi, Oʻzbekiston Milliy teleradiokompaniyasi va boshqa ommaviy axborot vositalariga uy-muzey faoliyatini, shu jumladan uy-muzeyda oʻtkaziladigan tadbirlarni keng yoritib borish tavsiya etilsin.
10. Vazirlar Mahkamasining 2017-yil 11-dekabrdagi 975-son qarori bilan tasdiqlangan Oʻzbekiston Respublikasi Davlat budjeti hisobidan moliyalashtiriladigan muzeylari, ularning filial va boʻlimlari roʻyxatiga ilovaga muvofiq qoʻshimcha kiritilsin.
11. Mazkur qarorning bajarilishini nazorat qilish Oʻzbekiston Respublikasining Bosh vaziri oʻrinbosari — turizm va madaniy meros vaziri A.A. Abduhakimov hamda Sirdaryo viloyati hokimi Gʻ.Gʻ. Mirzayev zimmasiga yuklansin.
Vazirlar Mahkamasining 2022-yil 9-maydagi 321-son qaroriga ILOVA
Vazirlar Mahkamasining 2017-yil 11-dekabrdagi 975-son qarori bilan tasdiqlangan Oʻzbekiston Respublikasi Davlat budjeti hisobidan moliyalashtiriladigan muzeylari, ularning filial va boʻlimlari roʻyxatiga kiritilayotgan qoʻshimcha
Quyidagi mazmundagi 13 1 -pozitsiya bilan toʻldirilsin:
“ 13 1 . Toʻra Sulaymon uy-muzeyi Mirzaobod tumani ”.
Oʻzbekiston Respublikasining Bosh vaziri A. ARIPOV
Toshkent sh.,
2022-yil 9-iyun,
321-son