📅 2022-yil 16-iyun · Prezident farmonlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2022 йил 16 июнь · Президент фармонлари
Расмий матн. Расмий ҳужжат. Таҳририй изоҳлар киритилмаган.
📅 16 июня 2022 г. · Указы Президента
Официальный текст. Официальный документ. Редакционные примечания не включены.
📅 16 June 2022 · Presidential decrees
Official text. Official document. Editorial notes are not included.
Ўзбекистон Республикаси Президентининг
Фармони
Ўзбекистон Республикаси Президентининг ташқи сиёсат масалалари бўйича махсус вакили лавозимини жорий этиш тўғрисида
Ўзбекистон Республикаси ташқи сиёсатининг самарали давом эттирилишини таъминлаш, хорижий давлатлар билан ўзаро манфаатли ва кўп қиррали ҳамкорликни кенгайтириш ҳамда мамлакатимизнинг халқаро майдонда нуфузи ва обрўсини янада ошириш мақсадида:
1. Ўзбекистон Республикаси Президенти Администрацияси тузилмасига амалдаги штат бирликлари доирасида Ўзбекистон Республикаси Президентининг ташқи сиёсат масалалари бўйича махсус вакили (кейинги ўринларда — Махсус вакил) лавозими киритилсин.
2. Қуйидагилар Махсус вакилнинг асосий вазифалари этиб белгилансин:
Ўзбекистон Республикаси Президентининг ташқи сиёсат соҳасидаги халқаро ва минтақавий ташаббусларининг самарали илгари сурилишини таъминлаш;
Ўзбекистон Республикаси Президентига мамлакат ташқи сиёсатининг устувор йўналишлари ва халқаро ҳамкорликни мустаҳкамлаш бўйича аниқ таклифлар киритиш;
глобал ва минтақавий муаммолар, ташқи сиёсат масалалари бўйича Ўзбекистон Республикаси позициясини етказиш мақсадида хорижий давлатлар ва халқаро ташкилотларнинг расмий вакиллари билан доимий ишчи алоқаларини ўрнатиш;
Ўзбекистон Республикаси Президентининг алоҳида топшириқларига асосан ташқи сиёсат ва халқаро ҳамкорликнинг долзарб масалалари бўйича махсус миссияларни бажариш;
Ўзбекистон Республикаси Президенти иштирокида ўтказиладиган халқаро тадбирлар ва учрашувларни тайёрлашда кўмаклашиш.
3. Белгилансинки:
Махсус вакил Ўзбекистон Республикаси Президенти томонидан лавозимга тайинланади ва лавозимдан озод қилинади;
Махсус вакил мақоми, меҳнатга ҳақ тўлаш, тиббий ва транспорт хизмати кўрсатиш шарт-шароитлари бўйича Ўзбекистон Республикаси Президенти маслаҳатчиси ўринбосарига тенглаштирилади.
4. Олий Мажлис палаталари, Вазирлар Маҳкамаси, Ташқи ишлар вазирлиги ҳамда Инвестициялар ва ташқи савдо вазирлигига Махсус вакилнинг фаолияти самарали амалга оширилишида ҳар томонлама кўмаклашиш вазифаси юклатилсин.
5. Ўзбекистон Республикаси Президенти Администрацияси раҳбари икки ҳафта муддатда Ўзбекистон Республикаси Президенти Администрациясининг штатлар жадвалига тегишли ўзгартиришлар киритсин.
6. Адлия вазирлиги бир ой муддатда қонунчилик ҳужжатларига мазкур Фармондан келиб чиқадиган ўзгартириш ва қўшимчалар тўғрисида таклифлар киритсин.
7. Мазкур Фармоннинг ижросини назорат қилиш Ўзбекистон Республикаси Президенти Администрацияси раҳбари З.Ш. Низомиддинов зиммасига юклансин.
Ўзбекистон Республикаси Президенти Ш. МИРЗИЁЕВ
Тошкент ш.,
2022 йил 16 июнь,
ПФ-155-сон
Oʻzbekiston Respublikasi Prezidentining
Farmoni
Oʻzbekiston Respublikasi Prezidentining tashqi siyosat masalalari boʻyicha maxsus vakili lavozimini joriy etish toʻgʻrisida
Oʻzbekiston Respublikasi tashqi siyosatining samarali davom ettirilishini taʼminlash, xorijiy davlatlar bilan oʻzaro manfaatli va koʻp qirrali hamkorlikni kengaytirish hamda mamlakatimizning xalqaro maydonda nufuzi va obroʻsini yanada oshirish maqsadida:
1. Oʻzbekiston Respublikasi Prezidenti Administratsiyasi tuzilmasiga amaldagi shtat birliklari doirasida Oʻzbekiston Respublikasi Prezidentining tashqi siyosat masalalari boʻyicha maxsus vakili (keyingi oʻrinlarda — Maxsus vakil) lavozimi kiritilsin.
2. Quyidagilar Maxsus vakilning asosiy vazifalari etib belgilansin:
Oʻzbekiston Respublikasi Prezidentining tashqi siyosat sohasidagi xalqaro va mintaqaviy tashabbuslarining samarali ilgari surilishini taʼminlash;
Oʻzbekiston Respublikasi Prezidentiga mamlakat tashqi siyosatining ustuvor yoʻnalishlari va xalqaro hamkorlikni mustahkamlash boʻyicha aniq takliflar kiritish;
global va mintaqaviy muammolar, tashqi siyosat masalalari boʻyicha Oʻzbekiston Respublikasi pozitsiyasini yetkazish maqsadida xorijiy davlatlar va xalqaro tashkilotlarning rasmiy vakillari bilan doimiy ishchi aloqalarini oʻrnatish;
Oʻzbekiston Respublikasi Prezidentining alohida topshiriqlariga asosan tashqi siyosat va xalqaro hamkorlikning dolzarb masalalari boʻyicha maxsus missiyalarni bajarish;
Oʻzbekiston Respublikasi Prezidenti ishtirokida oʻtkaziladigan xalqaro tadbirlar va uchrashuvlarni tayyorlashda koʻmaklashish.
3. Belgilansinki:
Maxsus vakil Oʻzbekiston Respublikasi Prezidenti tomonidan lavozimga tayinlanadi va lavozimdan ozod qilinadi;
Maxsus vakil maqomi, mehnatga haq toʻlash, tibbiy va transport xizmati koʻrsatish shart-sharoitlari boʻyicha Oʻzbekiston Respublikasi Prezidenti maslahatchisi oʻrinbosariga tenglashtiriladi.
4. Oliy Majlis palatalari, Vazirlar Mahkamasi, Tashqi ishlar vazirligi hamda Investitsiyalar va tashqi savdo vazirligiga Maxsus vakilning faoliyati samarali amalga oshirilishida har tomonlama koʻmaklashish vazifasi yuklatilsin.
5. Oʻzbekiston Respublikasi Prezidenti Administratsiyasi rahbari ikki hafta muddatda Oʻzbekiston Respublikasi Prezidenti Administratsiyasining shtatlar jadvaliga tegishli oʻzgartirishlar kiritsin.
6. Adliya vazirligi bir oy muddatda qonunchilik hujjatlariga mazkur Farmondan kelib chiqadigan oʻzgartirish va qoʻshimchalar toʻgʻrisida takliflar kiritsin.
7. Mazkur Farmonning ijrosini nazorat qilish Oʻzbekiston Respublikasi Prezidenti Administratsiyasi rahbari Z.Sh. Nizomiddinov zimmasiga yuklansin.
Oʻzbekiston Respublikasi Prezidenti Sh. MIRZIYOYEV
Toshkent sh.,
2022-yil 16-iyun,
PF-155-son