📅 2022-yil 19-iyul · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2022 йил 19 июль · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 19 июля 2022 г. · Постановления Кабинета Министров
Официальный текст. Официальный документ. Редакционные примечания не включены.
📅 19 July 2022 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
Халқ таълими вазирлиги тизимида Ўқувчи-ёшларни келажак касбларига тайёрлаш марказини ташкил этиш чора-тадбирлари тўғрисида
Ўқувчи-ёшларда замонавий билим ва кўникмаларни шакллантириш, таълим ва ишлаб чиқариш тармоқлари ўртасида интеграцияни йўлга қўйиш, мактаб битирувчиларига замонавий касб-ҳунар эгаллашлари учун зарур шарт-шароитлар яратиш мақсадида Вазирлар Маҳкамаси қарор қилади:
1. Ўзбекистон Республикаси Халқ таълими вазирлиги, Бандлик ва меҳнат муносабатлари вазирлиги ҳамда Жиззах вилояти ҳокимлигининг Зомин туманидаги 60-сон умумий ўрта таълим мактаби (кейинги ўринларда — Мактаб) ҳузурида давлат мактабдан ташқари таълим муассасаси шаклида юридик шахс мақомига эга бўлмаган Ўқувчи-ёшларни келажак касбларига тайёрлаш марказини (кейинги ўринларда — Марказ) ташкил этиш тўғрисидаги таклифи маъқуллансин.
2. Қуйидагилар Марказнинг асосий вазифалари этиб белгилансин:
умумий ўрта таълим мактаблари ўқувчилари учун келажак касбларига йўналтирувчи тўгараклар фаолиятини ташкил этиш;
ўқувчи-ёшларнинг бўш вақтларидан унумли ва мақсадли фойдаланиш, уларнинг ижодий, интеллектуал ва тадбиркорлик салоҳиятини ошириш, замонавий фанларни чуқур ўргатиш учун зарур шарт-шароитлар яратиш;
ўқувчи-ёшларда мустақил қарор қабул қилиш кўникмаларини, ватанпарварлик, миллий ва умуминсоний қадриятларни мустаҳкамлаш, ахборот маконидаги турли таҳдидларга нисбатан соғлом иммунитетни ҳосил қилиш;
ўқувчи-ёшларнинг мустақил ташаббус ва шахсий ғояларини илгари суриш, ҳаётий позицияга эга бўлишини таъминлашга йўналтирилган маҳорат дарсларини ҳамда маданий-маърифий тадбирларни ташкил этиш.
3. Марказ ходимларининг умумий чекланган сони 30 нафар (техник ва хизмат кўрсатувчи ходимлардан ташқари) этиб белгилансин.
Бунда Марказга Жиззах вилояти Зомин тумани Халқ таълими бўлими мудири томонидан лавозимга тайинланадиган ва лавозимдан озод қилинадиган Мактаб директорининг касбга йўналтириш бўйича ўринбосари — Марказ директори раҳбарлик қилади.
4. Белгилансинки:
Марказ директорининг базавий тариф ставкаси Халқ таълими муассасалари раҳбар ходимлари меҳнатига ҳақ тўлаш бўйича базавий тариф ставкалари миқдорларининг «Баркамол авлод» болалар мактаби директори учун белгиланган базавий тариф ставкасига мувофиқ;
тўгарак раҳбарининг базавий тариф ставкаси Халқ таълими муассасалари педагог ходимлари меҳнатига ҳақ тўлаш бўйича базавий тариф ставкалари миқдорларининг «Баркамол авлод» болалар мактаблари тўгарак раҳбарининг базавий тариф ставкасига мувофиқ амалга оширилади.
5. Қуйидагилар Марказни молиялаштириш манбалари этиб белгилансин:
Ўзбекистон Республика Давлат бюджетидан ажратиладиган маблағлар;
юридик ва жисмоний шахсларнинг, шу жумладан, Ўзбекистон Республикаси норезидентларининг ҳомийлик хайриялари;
халқаро молия ташкилотлари ва хорижий давлатларнинг грантлари ва техник кўмаклашиш маблағлари;
қонунчилик ҳужжатлари билан тақиқланмаган бошқа манбалар.
6. Ўзбекистон Республикаси Халқ таълими вазирлиги:
бир ой муддатда Марказ тузилмасини, уставини, ходимлар фаолияти самарадорлигини баҳолаш мезонларини (KPI) тасдиқласин;
манфаатдор вазирлик ва идоралар билан биргаликда Марказни малакали мутахассислар, зарур ўқув-услубий адабиётлар ҳамда тегишли жиҳозлар билан босқичма-босқич таъминласин ва янгилаб борсин;
Олий ва ўрта махсус таълим вазирлиги, Бандлик ва меҳнат муносабатлари вазирлиги билан биргаликда 2022 йил 1 августга қадар тўгаракларда ўргатиладиган касб-ҳунарларнинг ўқув режаси ва дастурларини тасдиқласин;
тўгаракларга йўналишлар бўйича малакали мутахассисларни бириктириш чораларини кўрсин;
ўқувчи-ёшлар учун тўгараклар йўналишлари бўйича ташкилотларга амалий экскурсияларни ташкил этсин.
7. Шундай тартиб ўрнатилсинки, 2022 йил 1 сентябрдан бошлаб Марказ директори ва тўгарак раҳбарларининг меҳнати уларнинг фаолият самарадорлигини баҳолаш мезонлари (KPI) асосида директор жамғармаси ҳамда Халқ таълими вазирлиги ҳузуридаги Халқ таълими соҳасида ислоҳотларга кўмаклашиш жамғармаси маблағлари ҳисобидан ҳар ойда қўшимча рағбатлантирилади.
8. Мазкур қарорнинг бажарилишини назорат қилиш Ўзбекистон Республикаси халқ таълими вазири Б.О. Саидов ҳамда Жиззах вилояти ҳокими Э.А. Салиев зиммасига юклансин.
Ўзбекистон Республикасининг Бош вазири А. АРИПОВ
Тошкент ш.,
2022 йил 19 июль,
390-сон
Oʻzbekiston Respublikasi Vazirlar Mahkamasining
qarori
Xalq taʼlimi vazirligi tizimida Oʻquvchi-yoshlarni kelajak kasblariga tayyorlash markazini tashkil etish chora-tadbirlari toʻgʻrisida
Oʻquvchi-yoshlarda zamonaviy bilim va koʻnikmalarni shakllantirish, taʼlim va ishlab chiqarish tarmoqlari oʻrtasida integratsiyani yoʻlga qoʻyish, maktab bitiruvchilariga zamonaviy kasb-hunar egallashlari uchun zarur shart-sharoitlar yaratish maqsadida Vazirlar Mahkamasi qaror qiladi:
1. Oʻzbekiston Respublikasi Xalq taʼlimi vazirligi, Bandlik va mehnat munosabatlari vazirligi hamda Jizzax viloyati hokimligining Zomin tumanidagi 60-son umumiy oʻrta taʼlim maktabi (keyingi oʻrinlarda — Maktab) huzurida davlat maktabdan tashqari taʼlim muassasasi shaklida yuridik shaxs maqomiga ega boʻlmagan Oʻquvchi-yoshlarni kelajak kasblariga tayyorlash markazini (keyingi oʻrinlarda — Markaz) tashkil etish toʻgʻrisidagi taklifi maʼqullansin.
2. Quyidagilar Markazning asosiy vazifalari etib belgilansin:
umumiy oʻrta taʼlim maktablari oʻquvchilari uchun kelajak kasblariga yoʻnaltiruvchi toʻgaraklar faoliyatini tashkil etish;
oʻquvchi-yoshlarning boʻsh vaqtlaridan unumli va maqsadli foydalanish, ularning ijodiy, intellektual va tadbirkorlik salohiyatini oshirish, zamonaviy fanlarni chuqur oʻrgatish uchun zarur shart-sharoitlar yaratish;
oʻquvchi-yoshlarda mustaqil qaror qabul qilish koʻnikmalarini, vatanparvarlik, milliy va umuminsoniy qadriyatlarni mustahkamlash, axborot makonidagi turli tahdidlarga nisbatan sogʻlom immunitetni hosil qilish;
oʻquvchi-yoshlarning mustaqil tashabbus va shaxsiy gʻoyalarini ilgari surish, hayotiy pozitsiyaga ega boʻlishini taʼminlashga yoʻnaltirilgan mahorat darslarini hamda madaniy-maʼrifiy tadbirlarni tashkil etish.
3. Markaz xodimlarining umumiy cheklangan soni 30 nafar (texnik va xizmat koʻrsatuvchi xodimlardan tashqari) etib belgilansin.
Bunda Markazga Jizzax viloyati Zomin tumani Xalq taʼlimi boʻlimi mudiri tomonidan lavozimga tayinlanadigan va lavozimdan ozod qilinadigan Maktab direktorining kasbga yoʻnaltirish boʻyicha oʻrinbosari — Markaz direktori rahbarlik qiladi.
4. Belgilansinki:
Markaz direktorining bazaviy tarif stavkasi Xalq taʼlimi muassasalari rahbar xodimlari mehnatiga haq toʻlash boʻyicha bazaviy tarif stavkalari miqdorlarining “Barkamol avlod” bolalar maktabi direktori uchun belgilangan bazaviy tarif stavkasiga muvofiq;
toʻgarak rahbarining bazaviy tarif stavkasi Xalq taʼlimi muassasalari pedagog xodimlari mehnatiga haq toʻlash boʻyicha bazaviy tarif stavkalari miqdorlarining “Barkamol avlod” bolalar maktablari toʻgarak rahbarining bazaviy tarif stavkasiga muvofiq amalga oshiriladi.
5. Quyidagilar Markazni moliyalashtirish manbalari etib belgilansin:
Oʻzbekiston Respublika Davlat budjetidan ajratiladigan mablagʻlar;
yuridik va jismoniy shaxslarning, shu jumladan, Oʻzbekiston Respublikasi norezidentlarining homiylik xayriyalari;
xalqaro moliya tashkilotlari va xorijiy davlatlarning grantlari va texnik koʻmaklashish mablagʻlari;
qonunchilik hujjatlari bilan taqiqlanmagan boshqa manbalar.
6. Oʻzbekiston Respublikasi Xalq taʼlimi vazirligi:
bir oy muddatda Markaz tuzilmasini, ustavini, xodimlar faoliyati samaradorligini baholash mezonlarini (KPI) tasdiqlasin;
manfaatdor vazirlik va idoralar bilan birgalikda Markazni malakali mutaxassislar, zarur oʻquv-uslubiy adabiyotlar hamda tegishli jihozlar bilan bosqichma-bosqich taʼminlasin va yangilab borsin;
Oliy va oʻrta maxsus taʼlim vazirligi, Bandlik va mehnat munosabatlari vazirligi bilan birgalikda 2022-yil 1-avgustga qadar toʻgaraklarda oʻrgatiladigan kasb-hunarlarning oʻquv rejasi va dasturlarini tasdiqlasin;
toʻgaraklarga yoʻnalishlar boʻyicha malakali mutaxassislarni biriktirish choralarini koʻrsin;
oʻquvchi-yoshlar uchun toʻgaraklar yoʻnalishlari boʻyicha tashkilotlarga amaliy ekskursiyalarni tashkil etsin.
7. Shunday tartib oʻrnatilsinki, 2022-yil 1-sentabrdan boshlab Markaz direktori va toʻgarak rahbarlarining mehnati ularning faoliyat samaradorligini baholash mezonlari (KPI) asosida direktor jamgʻarmasi hamda Xalq taʼlimi vazirligi huzuridagi Xalq taʼlimi sohasida islohotlarga koʻmaklashish jamgʻarmasi mablagʻlari hisobidan har oyda qoʻshimcha ragʻbatlantiriladi.
8. Mazkur qarorning bajarilishini nazorat qilish Oʻzbekiston Respublikasi xalq taʼlimi vaziri B.O. Saidov hamda Jizzax viloyati hokimi E.A. Saliyev zimmasiga yuklansin.
Oʻzbekiston Respublikasining Bosh vaziri A. ARIPOV
Toshkent sh.,
2022-yil 19-iyul,
390-son