UzbekAI

Ўзбекистон Республикаси Вазирлар Маҳкамасининг

қарори

НИЗОМ

СХЕМАСИ

НИЗОМ

СХЕМАСИ

БУЮРТМАНОМА

НИЗОМ

СХЕМАСИ

НИЗОМ

СХЕМАСИ

РЎЙХАТИ

Мактабгача таълим соҳасида давлат-хусусий шериклик муносабатларини замонавий рақамли технологиялар ёрдамида соддалаштириш чора-тадбирлари тўғрисида

Ўзбекистон Республикаси Президентининг « 2022 — 2026 йилларга мўлжалланган Янги Ўзбекистоннинг тараққиёт стратегияси тўғрисида » 2022 йил 28 январдаги ПФ-60-сон, « Оила ва хотин-қизларни тизимли қўллаб-қувватлашга доир ишларни янада жадаллаштириш чора-тадбирлари тўғрисида » 2022 йил 7 мартдаги ПФ-87-сон фармонлари ҳамда «Мактабгача таълим соҳасида давлат-хусусий шерикликни янада ривожлантириш бўйича қўшимча чора-тадбирлар тўғрисида» 2022 йил 14 июлдаги ПҚ-322-сон қарори ижросини таъминлаш, шунингдек, Вазирлар Маҳкамасининг «Молия вазирлиги ҳузурида Давлат молиявий назорати инспекцияси фаолиятини ташкил этиш ҳамда бюджет ташкилотларида молиявий назоратни такомиллаштириш чора-тадбирлари тўғрисида» 2022 йил 24 февралдаги 129-сон қарорига мувофиқ мактабгача таълим соҳасида давлат-хусусий шериклик жараёнларини янада такомиллаштириш мақсадида Вазирлар Маҳкамаси қарор қилади:

1. Белгилансинки, давлат-хусусий шериклик асосида фаолият юритаётган мактабгача таълим ташкилотларида, оилавий нодавлат мактабгача таълим ташкилотларида, шунингдек, мактабгача таълим қамрови 80 фоиздан паст бўлган туман (шаҳар)ларда ташкил этиладиган ҳамда янги кўп квартирали уйларнинг биринчи қаватида ташкил этиладиган хусусий нодавлат мактабгача таълим ташкилотларида:

Давлат бюджети маблағлари ҳисобидан субсидиялар ходимларнинг ишга келиб-кетиши ҳамда тарбияланувчиларнинг давоматидан келиб чиқиб Мактабгача таълим вазирлигининг нодавлат мактабгача таълим ташкилотларини бошқариш ахборот тизимида (кейинги ўринларда НМТТБАТ) автоматик равишда ҳисоблаб чиқилади;

ходимларнинг ишга келиб-кетишини ҳисобга олиш ҳамда тарбияланувчиларнинг давоматини юритиш мобил илова ёрдамида шахсни биометрик идентификация қилиш технологияси орқали амалга оширилади;

ҳисобот ойида тарбияланувчиларнинг ўртача ойлик давомати НМТТБАТда рўйхатга олинган тарбияланувчилар сонига нисбатан 40 фоиздан кам бўлганда, ушбу ой учун ходимларга Давлат бюджети маблағлари ҳисобидан иш ҳақи тўланмайди (ҳудуддаги фавқулодда ҳолатлар, об-ҳавонинг кескин совиб ёки исиб кетиши, санитария-эпидемиологик вазиятлар ва бошқа ҳолатлар рўй бериши сабабли давомат камайиши ҳолатлари бундан мустасно).

2. Қуйидагилар:

Молия вазирлиги томонидан давлат-хусусий шериклик асосидаги мактабгача таълим ташкилотларини ташкил этиш учун тижорат банкларига ресурс жойлаштириш тартиби тўғрисидаги низом 1-иловага мувофиқ;

Нодавлат мактабгача таълим ташкилотларига Давлат бюджети маблағлари ҳисобидан субсидиялар ва компенсациялар тўлаш тартиби тўғрисидаги низом 2-иловага мувофиқ;

Оилавий нодавлат мактабгача таълим ташкилотлари тўғрисидаги низом 3-иловага мувофиқ;

Кечки сменада хотин-қизлар ишлайдиган ташкилотлар ҳузурида ташкил этиладиган ҳамда тадбиркорлик субъектлари томонидан ходимларининг фарзандларини тарбиялаш мақсадида ташкил этилган мактабгача таълим ташкилоти тарбиячиларининг иш ҳақи харажатларини қоплаш учун Давлат бюджети маблағлари ҳисобидан субсидия тўлаш тартиби тўғрисидаги низом 4-иловага мувофиқ;

Нодавлат мактабгача таълим ташкилотларини бошқариш ахборот тизими ва «Электрон ҳукумат» тизимининг идоралараро интеграциялашув платформаси ўртасида ўзаро алмашиладиган маълумотлар рўйхати 5-иловага мувофиқ тасдиқлансин ҳамда 2022 йил 1 сентябрдан бошлаб амалиётга татбиқ этилсин.

3. Ахборот технологиялари ва коммуникацияларини ривожлантириш вазирлиги (Ш. Шерматов) 2022 йил 15 августга қадар:

а) Мактабгача таълим вазирлиги, манфаатдор вазирликлар ва идоралар билан биргаликда иловада кўрсатилган вазирликлар ва идораларнинг тегишли маълумотлари НМТТБАТга «Электрон ҳукумат» тизимининг идоралараро интеграциялашув платформаси орқали тақдим этилишини таъминласин.

Бунда 5-иловада кўрсатилган вазирликлар ва идоралар раҳбарларига электрон маълумот базаларини ўз вақтида ва сифатли шакллантириш, шунингдек, «Электрон ҳукумат» тизимининг идоралараро платформасига интеграциялашувини таъминлаш юзасидан шахсий жавобгарлик юклансин;

б) НМТТБАТнинг барқарор фаолиятини таъминлаш мақсадида нодавлат мактабгача таълим ташкилотлари жойлашган ҳудудларда мобил интернет тармоғи узлуксиз ва сифатли ишлашини таъминлаш чораларини кўрсин.

4. Тегишли тижорат банкларига:

тадбиркорлик субъектларига имтиёзли кредит ажратишда охиригача қуриб битказилмаган нодавлат мактабгача таълим ташкилотлари биноларини гаров таъминоти сифатида қабул қилиш;

имтиёзли кредит ажратилиб, бекор қилинган битимлар бўйича ажратилган имтиёзли кредит маблағларини қайтариш чораларини кўриш тавсия этилсин.

5. Ўзбекистон Республикаси Ҳукуматининг 6-иловага мувофиқ айрим қарорларига ўзгартириш ва қўшимчалар киритилсин.

6. Ўзбекистон Республикаси Ҳукуматининг 7-иловага мувофиқ айрим қарорлари ўз кучини йўқотган деб ҳисоблансин.

7. Мактабгача таълим вазирлиги манфаатдор вазирликлар ва идоралар билан биргаликда ўзлари қабул қилган норматив-ҳуқуқий ҳужжатларни бир ой муддатда ушбу қарорга мувофиқлаштирсин.

8. Ушбу қарорнинг бажарилишини назорат қилиш Ўзбекистон Республикаси мактабгача таълим вазири А.В. Шин зиммасига ҳамда Вазирлар Маҳкамасининг Таълим, соғлиқни сақлаш ва спорт масалалари котибиятига юклансин.

Вазирлар Маҳкамасининг 2022 йил 2 августдаги 426-сон қарорига 1-ИЛОВА

Молия вазирлиги томонидан давлат-хусусий шериклик асосидаги мактабгача таълим ташкилотларини ташкил этиш учун тижорат банкларига ресурс жойлаштириш тартиби тўғрисида

1-боб. Умумий қоидалар

1. Мазкур Низом Молия вазирлиги томонидан давлат-хусусий шериклик (кейинги ўринларда — ДХШ) шаклидаги мактабгача таълим ташкилотларини (кейинги ўринларда — МТТ) ташкил этиш учун тижорат банкларига ресурс жойлаштириш тартибини белгилайди.

2. Молия вазирлиги томонидан давлат-хусусий шериклик шаклидаги МТТни ташкил этиш учун тижорат банкларига ресурс жойлаштириш мазкур Низомга иловада келтирилган схемага мувофиқ амалга оширилади.

3. Тижорат банклари уларда Молия вазирлиги томонидан давлат-хусусий шериклик шаклидаги МТТни ташкил этиш учун жойлаштирилган ресурслардан фақат ДХШ тўғрисидаги битимда кўрсатилган объектларни қуриш, реконструкция қилиш, таъмирлаш ва жиҳозлаш учун имтиёзли кредитлар (кейинги ўринларда — имтиёзли кредит) бериш мақсадида фойдаланишга рухсат этилади.

2-боб. Ресурс маблағларидан фойдаланиш тартиби

4. Молия вазирлиги тижорат банклари билан қонунчиликда белгиланган фоиз ставкаларида ресурс жойлаштириш тўғрисида шартнома (бош келишув)лар тузади.

5. Ресурс маблағлари тижорат банки билан тузилган шартнома (бош келишув) доирасида тижорат банки томонидан тақдим этиладиган сўровномага асосан унинг махсус ҳисобварақларига жойлаштирилади.

6. Мактабгача таълим вазирлиги томонидан ажратилган ресурс доирасида имтиёзли кредит ажратилиши тавсия этилган ДХШ лойиҳалари рўйхати шакллантирилади ва Молия вазирлиги ҳамда тижорат банкларига тақдим этилади.

Бунда ДХШ битимига мувофиқ ўз мажбуриятларини тўлиқ бажармаган, молиялаштириш манбаи мавжуд бўлмаган ёки имтиёзли кредит олиш учун гаров таъминотига эга бўлмаган лойиҳаларни рўйхатга киритиш тақиқланади.

7. Тижорат банклари:

ДХШ лойиҳасини амалга оширувчи тадбиркорлик субъектидан ариза тушган вақтдан бошлаб уч банк иш куни ичида қонунчилик ҳужжатларида белгиланган тартибда ДХШ лойиҳаси бўйича имтиёзли кредитларни ажратиш ёки ажратмаслик тўғрисида қарор қабул қилади;

имтиёзли кредит ажратиш бўйича ижобий қарор қабул қилинган ДХШ лойиҳалари реестри, сўровнома ва ажратиладиган ресурс маблағларни қайтариш графигини Молия вазирлигига тақдим этади.

8. Молия вазирлиги ва тегишли тижорат банки ўртасида тақдим этилган сўровномага асосан ресурс ажратиш шартномаси тузилади. Бунда шартномада ресурсни қайтариш графиги кўрсатилади.

9. Ресурс маблағларини ажратиш шартномаси имзоланганидан сўнг икки банк иш куни ичида Молия вазирлиги тижорат банкининг махсус ҳисобварағига маблағларни ўтказади.

10. Тижорат банклари томонидан ДХШ лойиҳаларига имтиёзли кредитлар ажратиш Молия вазирлиги томонидан мазкур мақсадлар учун жойлаштирилган ресурс доирасида амалга оширилади.

11. ДХШ лойиҳаларига имтиёзли кредитлар тижорат банклари томонидан қонунчиликда белгиланган муддатларга ва йиллик фоиз ставкаларида кредитлар ўз вақтида қайтаришлик, тўловлилик, таъминланганлик, муддатлилик ва мақсадли фойдаланиш шартлари асосида ажратилади.

3-боб. Тижорат банклари томонидан ресурсни қайтариш тартиби

12. Тижорат банклари томонидан ажратилган маблағларни қайтариш, ресурс ажратиш шартномасида белгиланган график асосида амалга оширилади.

13. Молия вазирлиги ДХШ лойиҳаларини молиялаштириш учун ажратилган ресурс ҳар чоракда тижорат банклари томонидан қайтарилишини назорат қилади ҳамда кечиктирилган ресурслар бўйича тақдимномалар киритади.

4-боб. Кредит мониторингини амалга ошириш

14. Тижорат банклари Молия вазирлиги томонидан жойлаштирилган ресурс ҳисобидан тадбиркорлик субъектларига берилган имтиёзли кредитлар ва уларнинг мақсадли сарфланиши юзасидан ҳар чоракдан кейинги ойнинг 10-кунига қадар Мактабгача таълим вазирлиги ва Молия вазирлигига маълумот тақдим этиб боради.

15. Молия вазирлиги ва Мактабгача таълим вазирлиги тижорат банкларига ДХШ лойиҳалари бўйича имтиёзли кредитларни ажратиш учун жойлаштирилган ресурс мақсадли ва самарали ишлатилишини доимий равишда мониторинг қилиб боради.

5-боб. Якунловчи қоидалар

16. Ажратиладиган Давлат бюджети маблағларидан мақсадли фойдаланилиши устидан назорат қилиш Давлат молиявий назорати инспекцияси ҳамда унинг ҳудудий бўлинмалари томонидан амалга оширилади.

17. Мазкур Низом талаблари бузилишида айбдор бўлган шахслар қонунчилик ҳужжатларига мувофиқ жавоб берадилар.

Ўзбекистон Республикаси Молия вазирлиги томонидан давлат-хусусий шериклик шаклидаги мактабгача таълим ташкилотларини ташкил этиш учун тижорат банкларига ресурс жойлаштириш тартиби тўғрисидаги низомга ИЛОВА

Ўзбекистон Республикаси Молия вазирлиги томонидан давлат-хусусий шериклик шаклидаги мактабгача таълим ташкилотларини ташкил этиш учун тижорат банкларига ресурсларни жойлаштириш

Босқичлар Субъектлар Тадбирлар Бажариш муддатлари 1-босқич ДХШ лойиҳасини амалга оширувчи мактабгача таълим ташкилоти Мактабгача таълим вазирлиги томонидан тузиладиган ДХШ битимлари Нодавлат мактабгача таълим ташкилотларини бошқариш ахборот тизими (НМТТБАТ)да рўйхатга олинади. Битим имзоланган кунда 2-босқич Мактабгача таълим вазирлиги Имтиёзли кредит ажратилиши тавсия этилган ДХШ лойиҳалари рўйхати ва уларга ажратиладиган имтиёзли кредит маблағлари миқдорлари тўғрисидаги маълумотларни Молия вазирлиги ҳамда бириктирилган тижорат банкига тақдим этади. 3 иш кунида 3-босқич ДХШ лойиҳасини амалга оширувчи мактабгача таълим ташкилоти Бириктирилган тижорат банкига ДХШ лойиҳасини амалга ошириш учун кредит маблағи зарурлиги ҳақида ариза тақдим этади. Заруратдан келиб чиқиб 4-босқич Тижорат банклари Кредит олиш истагини билдирган ДХШ лойиҳалари реестри, буюртманома ва ажратиладиган ресурсни қайтариш графигини Молия вазирлигига тақдим этади. Заруратдан келиб чиқиб 5-босқич Молия вазирлиги Молия вазирлиги ва тегишли тижорат банки ўртасида тижорат банклари томонидан тақдим этилган буюртманомага асосан маблағларини қайтариш графигини кўрсатган ҳолда ресурс ажратиш шартномаси тузилади. 3 банк иш кунида 6-босқич Молия вазирлиги Тижорат банкининг махсус ҳисобварағига ресурс маблағларни ўтказиб беради. 2 банк иш кунида

Вазирлар Маҳкамасининг 2022 йил 2 августдаги 426-сон қарорига 2-ИЛОВА

Нодавлат мактабгача таълим ташкилотларига Давлат бюджети маблағлари ҳисобидан субсидиялар ва компенсациялар тўлаш тартиби тўғрисида

1-боб. Умумий қоидалар

1. Мазкур Низом нодавлат мактабгача таълим ташкилотларини ҳар томонлама қўллаб-қувватлаш, болаларга муносиб шарт-шароитлар яратиш ҳамда мактабгача таълим билан қамраб олиш кўрсаткичларини ошириш мақсадида Давлат бюджети маблағлари ҳисобидан бериладиган субсидиялар ва компенсацияларни тўлаш тартибини белгилайди.

2. Нодавлат мактабгача таълим ташкилотларига Давлат бюджети маблағлари ҳисобидан субсидиялар ва компенсацияларни тўлаш мазкур Низомга 1-иловада келтирилган схемага мувофиқ амалга оширилади.

3. Субсидиялар ва компенсацияларни тўлаш бўйича буюртманомалар мазкур Низомга 2 — 7-иловаларга мувофиқ Нодавлат мактабгача таълим ташкилотларини бошқариш ахборот тизими (кейинги ўринларда — НМТТБАТ) орқали автоматик тарзда шакллантирилади.

4. Давлат-хусусий шериклик шартлари асосида фаолият юритадиган нодавлат мактабгача таълим ташкилотлари (кейинги ўринларда — ДХШ асосидаги МТТ)га, шу жумладан, оилавий нодавлат мактабгача таълим ташкилотлари (кейинги ўринларда — оилавий МТТ)га субсидиялар ва компенсациялар давлат-хусусий шериклик тўғрисидаги битим амал қилиш даврида, ўқув йили ва соғломлаштириш даври мобайнида ҳисобланади ва тўланади.

4 1 . Мактабгача таълим қамрови 80 фоиздан паст бўлган туман (шаҳар)лардаги (Тошкент шаҳри бундан мустасно) мактабгача таълим ташкилотлари ва умумий ўрта таълим ташкилотларининг бўш ер майдонларидан бошқа жойларда қуввати 150 ўриндан кам бўлмаган хусусий нодавлат мактабгача таълим ташкилотлари (кейинги ўринларда — қамрови паст бўлган ҳудуддаги хусусий МТТ) ҳамда янги кўп квартирали уйларнинг биринчи қаватида ташкил этиладиган хусусий мактабгача таълим ташкилотлари (кейинги ўринларда — янги кўп квартирали уйларнинг биринчи қаватидаги хусусий МТТ)ни ташкил этадиган тадбиркорлик субъектларига 2026 йил 1 апрелдан бошлаб нодавлат мактабгача таълим ташкилоти лицензия олган санадан бошлаб уч йил давомида Мактабгача ва мактаб таълими вазирлиги билан имзоланган келишувга асосан субсидиялар ҳисобланади ва тўланади.

5. Ушбу Низомда қуйидаги асосий тушунчалар қўлланилади:

давлат-хусусий шериклик — давлат шериги ва хусусий шерикнинг муайян муддатга юридик жиҳатдан расмийлаштирилган, давлат-хусусий шериклик лойиҳасини амалга ошириш учун ўз ресурсларини бирлаштиришга асосланган мактабгача таълим соҳасидаги ўзаро самарали ҳамкорлиги;

давлат-хусусий шериклик тўғрисидаги битим томонлари (кейинги ўринларда — томонлар) — давлат шериги ва хусусий шерик;

давлат шериги — Мактабгача таълим вазирлиги;

хусусий шерик — қонунчилик ҳужжатларига мувофиқ рўйхатдан ўтказилган, давлат шериги билан нодавлат мактабгача таълим ташкилоти фаолиятини юритиш учун давлат-хусусий шериклик тўғрисида битим тузган тадбиркорлик субъекти;

давлат-хусусий шериклик тўғрисида битим (кейинги ўринларда — битим) — томонларнинг ҳуқуқлари, мажбуриятлари ва жавобгарлигини, шунингдек, давлат-хусусий шериклик лойиҳасини ижро этишнинг бошқа шартларини белгиловчи давлат шериги ва хусусий шерик ўртасида тузилган шартнома.

2-боб. ДХШ асосидаги ва қамрови паст бўлган ҳудуддаги ҳамда янги кўп квартирали уйларнинг биринчи қаватидаги хусусий МТТларга субсидияларни ҳисоблаш ва тўлаш тартиби

6. ДХШ асосидаги МТТга (оилавий МТТ бундан мустасно) ва қамрови паст бўлган ҳудуддаги ҳамда янги кўп квартирали уйларнинг биринчи қаватидаги хусусий МТТларга Давлат бюджети маблағлари ҳисобидан қуйидаги субсидиялар тўланади:

а) ДХШ асосидаги МТТга ушбу ташкилотларда таълим олаётган ҳар бир бола учун 9 соатлик иш режимида ишлайдиган умумий типдаги давлат мактабгача таълим ташкилотининг бир нафар тарбияланувчисига сарфланадиган харажатлар суммасига нисбатан:

Тошкент шаҳрида — 30 фоиз (2023 йил 1 январга қадар, истисно тариқасида, Тошкент шаҳри Янгиҳаёт туманидаги «Гулзор», «Жалоир» «Тошкент», «Хўжа Учқун» ва «Чортоқ» маҳалла фуқаролар йиғинларида фаолият кўрсатаётган ҳамда янги ташкил этиладиган нодавлат МТТга 50 фоиз) миқдорида;

Нукус шаҳри ҳамда вилоятлар марказларида — 40 фоиз миқдорида;

олис ва чекка ҳудудларда жойлашган ДХШ асосидаги МТТда — 75 фоиз миқдорида;

қолган ҳудудларда — 50 фоиз миқдорида;

б) Ўзбекистон Республикаси Президентининг 2018 йил 5 апрелдаги ПҚ-3651-сон қарори билан тасдиқланган Мактабгача таълим соҳасида давлат-хусусий шериклик тўғрисидаги низомнинг 12-бобида назарда тутилган хусусий шерик мулки негизида ташкил этилган ДХШ асосидаги МТТга (кейинги ўринларда — хусусий шерик мулки негизида ташкил этилган ДХШ асосидаги МТТ) директор, директор ўринбосари, тарбиячи, дефектолог, психолог, мусиқа ходимларининг иш ҳақини тўлаш учун — 9 соатлик иш режимида ишлайдиган умумий турдаги давлат мактабгача таълим ташкилотларида ушбу ходимлар учун белгиланган штатлар меъёрлари ҳамда меҳнатга ҳақ тўлаш шартлари ва миқдорларида;

в) фарзанди ДХШ асосидаги МТТда таълим ва тарбия олаётган боқувчисини йўқотган аёлларнинг ота-оналар тўловини қоплаш учун — тегишли ҳудуддаги 9 соатлик иш режимидаги давлат мактабгача таълим ташкилотлари учун белгиланган миқдорларда.

г) 2026 йил 1 апрелдан бошлаб мактабгача таълим қамрови 80 фоиздан паст бўлган туман (шаҳар)лардаги (Тошкент шаҳри бундан мустасно) давлат мактабгача таълим ташкилотлари ва умумий ўрта таълим ташкилотларининг (кўп тармоқли ихтисослаштирилган ва қўшма турдаги мактабгача таълим ташкилотлари, алоҳида таълим эҳтиёжлари бўлган болалар учун ихтисослаштирилган мактаблар ва мактаб-интернатлар бундан мустасно) бўш ер майдонларида давлат-хусусий шериклик (кейинги ўринларда — давлат мактабгача таълим ташкилотлари ва умумий ўрта таълим ташкилотларининг бўш ер майдонларида ташкил этиладиган ДХШ) шартлари асосида МТТларини ташкил қилган тадбиркорлик субъектларига ҳар бир бола учун 9 соатлик иш режимидаги давлат мактабгача таълим ташкилотларининг бир нафар тарбияланувчисига сарфланадиган харажатнинг 50 фоизи миқдорида.

Бунда «Давлат-хусусий шериклик тўғрисида»ги Қонунга мувофиқ болаларни мактабгача таълим билан қамраб олиш даражаси 80 фоиздан паст бўлган туман (шаҳар)ларда давлат мактабгача таълим ташкилотлари ва умумий ўрта таълим ташкилотларининг бўш ер майдонларида 2024 йилдан бошлаб ташкил этилган нодавлат мактабгача таълим ташкилотларига ҳам татбиқ этилади;

д) қамрови паст бўлган ҳудуддаги ҳамда янги кўп квартирали уйларнинг биринчи қаватидаги хусусий МТТлар тарбиячиларига ойлик иш ҳақи тўлаш харажатлари давлат мактабгача таълим ташкилотларидаги тарбиячилар учун белгиланган миқдорда нодавлат мактабгача таълим ташкилоти лицензия олган санадан бошлаб уч йил давомида қоплаб берилади.

Бунда тарбиячиларга иш ҳақини тўлаш учун субсидиялар ҳар 30 нафар тарбияланувчи учун бир штат бирлиги миқдорида тарбиячи ҳисобга олинган ҳолда тўланади.

7. Олис ва чекка ҳудудларда жойлашган ДХШ асосидаги МТТда (оилавий МТТлар бундан мустасно) «Ёшлар дафтари», «Темир дафтар» ёки «Аёллар дафтари»га киритилган оилаларнинг ҳар бир тарбияланувчи фарзандлари учун мазкур дафтарлар жамғармалари ҳисобидан давлат мактабгача таълим ташкилотининг бир нафар тарбияланувчиси учун сарфланадиган харажатлар суммасининг 25 фоизи миқдорида субсидия тўланади.

Бунда мазкур субсидия ушбу Низомнинг 6-банди «а» кичик банди тўртинчи хатбошидаги субсидияга қўшимча равишда НМТТБАТдаги болалар тўғрисидаги маълумотлар асосида мазкур жамғарма маблағларини тасарруф этувчи органлар томонидан тўланади.

8. ДХШ асосидаги МТТга (оилавий МТТлар бундан мустасно) уларда таълим олаётган ҳар бир бола учун ойлик субсидия суммалари қуйидаги формулалар асосида НМТТБАТда ҳисоб-китоб қилинади:

КХС = ДБХ / УБС / ИКС * СБФ

ТОС = КХС * ТҚС

Бунда:

КХС — ДХШ асосидаги МТТга бир нафар тарбияланувчисининг бир кунлик харажатини қоплашга ажратиладиган субсидиянинг республика бўйича қатъий миқдори;

ДБХ — жорий молия йилида Давлат бюджети маблағлари ҳисобидан 9 соатлик иш режимидаги умумий типдаги давлат мактабгача таълим ташкилотларини сақлаш харажатлари учун ажратилган маблағлар миқдори.

Бунда бир нафар тарбияланувчи учун сарфланадиган харажатлар суммасини ҳисоблашда давлат мактабгача таълим ташкилотларининг «Асосий воситалар бўйича харажатлар» ҳамда «Электр энергияси ва табиий газ, кўмир ва иссиқлик таъминоти харажатлари» ҳисобга олинмайди;

УБС — 9 соатлик иш режимидаги умумий типдаги давлат мактабгача таълим ташкилотларининг «Болалар боғчаси» мактабгача таълимни бошқариш ахборот тизимида рўйхатга олинган умумий болалар сони;

ИКС — жорий йилдаги иш кунлари сони;

СБФ — мазкур Низомнинг 6-банди «а» кичик бандида белгиланган ҳудудлар бўйича субсидиянинг белгиланган фоизи;

ТОС — ҳисобот ойида тарбияланувчилар учун тўланадиган ойлик субсидия суммаси;

ТҚС — ҳисобот ойида тарбияланувчининг ҳақиқатда ушбу МТТга қатнаган кунлари сони.

8 1 . Давлат мактабгача таълим ташкилотлари ва умумий ўрта таълим ташкилотларининг (кўп тармоқли ихтисослаштирилган ва қўшма турдаги мактабгача таълим ташкилотлари, алоҳида таълим эҳтиёжлари бўлган болалар учун ихтисослаштирилган мактаблар ва мактаб-интернатлар бундан мустасно) бўш ер майдонларида ташкил этиладиган ДХШ шартлари асосида МТТларини ташкил қилган тадбиркорлик субъектларига (оилавий МТТлар бундан мустасно) уларда таълим олаётган ҳар бир бола учун ойлик субсидия суммалари қуйидаги формулалар асосида НМТТБАТда ҳисоб-китоб қилинади:

КХС = ДБХ / УБС / ИКС * 0,5

ТОС = КХС * ТҚС

Бунда:

КХС — ДМТТ ва умумий ўрта таълим ташкилотларининг бўш ер майдонларида ДХШ шартлари асосида ташкил қилинган МТТга бир нафар тарбияланувчисининг бир кунлик харажатини қоплашга ажратиладиган субсидиянинг республика бўйича қатъий миқдори;

ИКС — жорий йилдаги иш кунлари сони;

ТОС — ҳисобот ойида тарбияланувчилар учун тўланадиган ойлик субсидия суммаси;

ТҚС — ҳисобот ойида тарбияланувчининг ҳақиқатда ушбу МТТга қатнаган кунлари сони.

9. Хусусий шерик мулки негизида ташкил этилган ДХШ асосидаги МТТ ва қамрови паст бўлган ҳудуддаги ҳамда янги кўп квартирали уйларнинг биринчи қаватидаги хусусий МТТларга иш ҳақи харажатларини қоплаш учун субсидия давлат мактабгача таълим ташкилотлари ходимларининг лавозими, маълумоти ва малака тоифаси ҳисобга олинган ҳолда қуйидаги формула асосида НМТТБАТда ҳисоб-китоб қилинади:

ИҲС = (БТС * ХИС / ИКС * (ДКС + АКС) + ТКС) * (1 + ИСС)

Бунда:

ИҲС — хусусий шерик мулки негизида ташкил этилган ДХШ асосидаги МТТ ва қамрови паст бўлган ҳудуддаги ҳамда янги кўп квартирали уйларнинг биринчи қаватидаги хусусий МТТ ходимига иш ҳақи харажатларини қоплаш учун субсидия суммаси (ҳар бир ходим учун алоҳида ҳисобланиб, жамланади);

БТС — ходимнинг лавозими, маълумоти ва малака тоифаси учун белгиланган базавий тариф ставкаси;

ХИС — ходимнинг лавозими бўйича белгиланган иш ставкаси;

ИКС — жорий ойдаги иш кунлари сони;

ДКС — НМТТБАТда қайд этилган ходимнинг давомат кунлари сони;

АКС — ходимнинг айбисиз (ҳудуддаги фавқулодда ҳолатлар,

об-ҳавонинг кескин совиб ёки исиб кетиши натижасида маҳаллий ҳокимликлар қарорлари асосида таълим муассасаларининг фаолияти вақтинча тўхтатилганда, санитария-эпидемиологик вазиятлар ва бошқа фавқулодда ҳолатлар рўй берганида) бекор туриб қолинган кунлар сони. Бунда ушбу кунлар сони хусусий шерик мулки негизида ташкил этилган ДХШ асосидаги МТТ ва қамрови паст бўлган ҳудуддаги ҳамда янги кўп квартирали уйларнинг биринчи қаватидаги хусусий МТТ раҳбари томонидан НМТТБАТда белгиланади ва асословчи ҳужжатлар тегишли мактабгача таълим органига НМТТБАТ орқали тақдим этилади;

ТКС — МТТ жойлашган ҳудуд учун қонунчиликда белгиланган туман коэффициенти суммаси;

ИСС — хусусий шерик мулки негизида ташкил этилган ДХШ асосидаги МТТ ва қамрови паст бўлган ҳудуддаги ҳамда янги кўп квартирали уйларнинг биринчи қаватидаги хусусий МТТ учун қонунчиликда белгиланган ижтимоий солиқ ставкаси.

10. Хусусий шерик мулки негизида ташкил этилган ДХШ асосидаги МТТ ва қамрови паст бўлган ҳудуддаги ҳамда янги кўп квартирали уйларнинг биринчи қаватидаги хусусий МТТларнинг ходимлари тўғрисидаги маълумотлар НМТТ томонидан НМТТБАТга киритилади.

Бунда киритиладиган маълумотлар Ўзбекистон Республикаси Камбағалликни қисқартириш ва бандлик вазирлиги, Иқтисодиёт ва молия вазирлиги, Адлия вазирлиги ҳамда Олий таълим, фан ва инновациялар вазирлигининг ахборот тизимларидан олинадиган маълумотлар билан солиштирилади.

3-боб. Оилавий МТТга субсидияларни ҳисоблаш ва тўлаш тартиби

11. Оилавий МТТга Давлат бюджети маблағлари ҳисобидан қуйидаги субсидиялар тўланади:

а) 2024 йил 1 августдан бошлаб Тошкент шаҳрида фаолият юритаётган оилавий МТТлар томонидан ёлланган тарбиячи ва тарбиячи ёрдамчиларига иш ҳақини тўлаш учун — 9 соатлик иш режимидаги давлат мактабгача таълим ташкилотларида ушбу ходимлар учун белгиланган меҳнатга ҳақ тўлаш шартлари ва миқдорларида;

б) 2024 йил 1 августдан бошлаб Қорақалпоғистон Республикаси ва вилоятларнинг 1 ва 2-тоифадаги туман (шаҳар)ларида фаолият юритаётган оилавий МТТларга:

улар томонидан ёлланган тарбиячи ва тарбиячи ёрдамчиларига иш ҳақини тўлаш учун — 9 соатлик давлат мактабгача таълим ташкилотлари учун белгиланган иш ҳақининг 75 фоизи миқдорида;

уларда таълим олаётган ҳар бир болани овқатлантириш, юмшоқ жиҳозлар (матраслар, ёстиқлар, кўрпалар, чойшаблар, кўрпа ва ёстиқ жилдлари, ёпинғичлар, қоп-кўрпа) ҳамда дори-дармонлар билан таъминлашга сарфланадиган харажатларни қоплаш учун — давлат мактабгача таълим ташкилотларида белгиланган нормативларнинг 75 фоизи миқдорида;

в) 2024 йил 1 августдан бошлаб 2025 йил 1 январга қадар 3-тоифадаги туман (шаҳар)ларда фаолият юритаётган оилавий МТТларга:

улар томонидан ёлланган тарбиячи ва тарбиячи ёрдамчиларига иш ҳақини тўлаш учун — 9 соатлик давлат мактабгача таълим ташкилотлари учун белгиланган иш ҳақининг 90 фоизи миқдорида;

г) 2025 йил 1 январдан бошлаб 3-тоифадаги туман (шаҳар)ларда фаолият юритаётган оилавий МТТларга:

улар томонидан ёлланган тарбиячи ва тарбиячи ёрдамчиларига иш ҳақини тўлаш учун — 9 соатлик давлат мактабгача таълим ташкилотлари учун белгиланган иш ҳақининг 85 фоизи миқдорида;

д) 4 ва 5-тоифадаги туман (шаҳар)ларда фаолият юритаётган оилавий МТТларга:

улар томонидан ёлланган тарбиячи ва тарбиячи ёрдамчиларига иш ҳақини тўлаш учун — 9 соатлик давлат мактабгача таълим ташкилотлари учун белгиланган меҳнатга ҳақ тўлаш шартлари ва миқдорларида;

е) фарзанди оилавий МТТда таълим ва тарбия олаётган боқувчисини йўқотган аёлларнинг ота-оналар бадали тўловларини қоплаш учун — тегишли ҳудуддаги 9 соатлик давлат мактабгача таълим ташкилотлари учун белгиланган ота-оналар бадали тўловлари миқдорида.

12. Оилавий МТТга улар томонидан ёлланган тарбиячи ва тарбиячи-ёрдамчиларга иш ҳақини тўлаш учун субсидиялар башарти ушбу МТТнинг ҳар бир гуруҳида тарбияланаётган болаларнинг ўртача ойлик сони камида 12 нафарни ташкил қилганда тўланади.

Бунда субсидиялар оилавий МТТдаги гуруҳлар сонидан келиб чиқиб, кўпи билан 4,5 та штат бирлигида (Тошкент шаҳри, Нукус шаҳри ва вилоятлар марказларида — 2,25 штат бирлигигача), шу жумладан, бир гуруҳда — 1,25 штат бирлигида тарбиячи ва 1 штат бирлигида тарбиячи ёрдамчиси лавозимида банд бўлган ходимларнинг иш ҳақини тўлаш учун ажратилади.

13. Оилавий МТТнинг тарбиячилари ва тарбиячи ёрдамчилари ишда бўлмаган вақт (меҳнат таътили, ўз ҳисобидан таътил, касаллик варақаси очилган давр ва бошқа ҳолатлар)да уларнинг ўрнига вақтинча ёллаган бошқа тарбиячилар ва тарбиячи ёрдамчилари ишлаган кунлар бўйича ҳақиқий давоматидан келиб чиқиб иш ҳақи учун субсидия ҳисобланади ва тўланди.

Бунда оилавий МТТ раҳбари янги ёлланган тарбиячилар ва тарбиячи ёрдамчилари тўғрисидаги маълумотларни НМТТБАТга киритиши лозим.

14. Оилавий МТТнинг тарбиячилари ва тарбиячи ёрдамчилари меҳнат таътили, ҳомиладорлик ва туғиш ҳамда бошқа турдаги таътилга чиққанда уларнинг таътил ва нафақа пулларини қоплаш учун субсидиялар ажратилмайди.

15. Оилавий МТТга иш ҳақи харажатларини қоплаш учун субсидия давлат мактабгача таълим ташкилотлари ходимларининг лавозими, маълумоти ва малака тоифаси ҳисобга олинган ҳолда қуйидаги формула асосида НМТТБАТда ҳисоб-китоб қилинади:

ИҲС = (БТС * ХИС / ИКС * (ДКС + АКС) + ТКС) * (1 + ИСС)

Бунда:

ИҲС — оилавий МТТ ходимига иш ҳақи харажатларини қоплаш учун субсидия суммаси (ҳар бир ходим учун алоҳида ҳисобланиб, жамланади);

БТС — ходимнинг лавозими, маълумоти ва малака тоифаси учун белгиланган базавий тариф ставкаси;

ХИС — ходимнинг лавозими бўйича белгиланган иш ставкаси;

ИКС — жорий ойдаги иш кунлари сони;

ТКС — оилавий МТТ жойлашган ҳудуд учун қонунчиликда белгиланган туман коэффициенти суммаси;

ДКС — НМТТБАТда қайд этилган ходимнинг давомат кунлари сони;

АКС — ходимнинг айбисиз (ҳудуддаги фавқулодда ҳолатлар, об-ҳавонинг кескин совуб ёки исиб кетиши натижасида маҳаллий ҳокимликлар қарорлар асосида таълим муассасаларининг фаолияти вақтинча тўхтатилганда, санитария-эпидемиологик вазиятлар ва бошқа фавқулодда ҳолатлар рўй берганида) бекор туриб қолинган кунлар сони. Бунда ушбу кунлар сони оилавий МТТ раҳбари томонидан НМТТБАТда белгиланади ва асословчи ҳужжатлар тегишли мактабгача таълим органига НМТТБАТ орқали тақдим этилади;

ИСС — хусусий шерик мулки негизида ташкил этилган ДХШ асосидаги МТТлар учун қонунчиликда белгиланган ижтимоий солиқ ставкаси.

16. Оилавий МТТда:

иш ҳақи харажатлари бюджет субсидиялари ҳисобидан молиялаштириладиган ходимлардан амалдаги қонунчиликда белгиланган миқдорларда ижтимоий солиқ, жисмоний шахслардан олинадиган даромад солиғи, шахсий жамғариб бориладиган пенсия ҳисобварағига бадал тўловлари ҳамда ходимларга тўланадиган иш ҳақи суммалари ҳар бир ходим учун НМТТБАТда ҳисобланади ва Молия вазирлигининг ахборот тизимига юборилади;

жисмоний шахслардан олинадиган даромад солиғи ва бошқа ажратмалар ушлаб қолингандан кейин ҳисобланган иш ҳақи туман (шаҳар) мактабгача таълим бўлимлари орқали Молия вазирлигининг тегишли ахборот тизими ёрдамида туман (шаҳар) маҳаллий бюджетларидан тўғридан-тўғри оилавий МТТ ходимларининг тегишли банк пластик карталарига ўтказиб берилади.

Оилавий МТТдан ва уларнинг ходимларидан ушлаб қолинган ижтимоий солиқ, жисмоний шахслардан олинадиган даромад солиғи ва шахсий жамғариб бориладиган пенсия ҳисобварағига бадал тўловлари туман (шаҳар) мактабгача таълим бўлимлари томонидан тегишлича туман (шаҳар) пенсия, солиқ органларига ва халқ банки бўлимларига тўлов топшириқнома асосида ўтказилади ҳамда ушбу солиқ ва бадал тўловларни тўлаётган якка тартибдаги тадбиркор номи ва унинг ходимлари маълумотлари (Ф.И.О, паспорт серияси, рақами ва бошқа) ва тўлов суммаси кўрсатилган ҳолда электрон тўлов қайднома (ведомость) жўнатилади.

17. Оилавий МТТда:

а) овқатланиш харажатларини қоплаш учун субсидиянинг ойлик суммаси қуйидаги формулалар асосида НМТТБАТда ҳисоб-китоб қилинади:

КОХ = (ДБХ / УБС + ОТМ*12) / ИКС

ОХС = КОХ * ТҚС

Бунда:

КОХ — оилавий МТТга бир нафар тарбияланувчисининг бир кунлик овқатланиш харажатини қоплашга ажратиладиган субсидиянинг республика бўйича қатъий миқдори;

ДБХ — тегишли молия йилида 9 соатлик иш режимидаги умумий типдаги давлат мактабгача таълим ташкилотларига (қонунчилик ҳужжатларига мувофиқ ота-оналар тўловлари бўйича имтиёз берилган туманларда жойлашган давлат мактабгача таълим ташкилотлари бундан мустасно) Давлат бюджети маблағлари ҳисобидан озиқ-овқат харажатларини қоплаш учун ажратилган маблағлар миқдори;

УБС — 9 соатлик иш режимидаги умумий типдаги давлат мактабгача таълим ташкилотларининг «Болалар боғчаси» мактабгача таълимни бошқариш ахборот тизимида рўйхатга олинган тўлиқ кунли гуруҳлардаги болалар сони;

ОТМ — туман марказларида жойлашган 9 соатлик иш режимидаги умумий типдаги давлат мактабгача таълим ташкилотларида болалар таъминоти учун бир ойлик ота-оналар тўлови миқдори;

ИКС — жорий йилдаги иш кунлари сони;

ОХС — ҳисобот ойида тарбияланувчиларни овқатлантириш учун тўланадиган ойлик субсидия суммаси;

ТҚС — ҳисобот ойида ҳар бир тарбияланувчининг ҳақиқатда ушбу МТТга қатнаган кунлари сони;

б) юмшоқ жиҳозлар харажатларини қоплаш учун субсидиянинг ойлик суммаси қуйидаги формулалар асосида НМТТБАТда ҳисоб-китоб қилинади:

ОЮХ = ДБХ / УБС / 12

ОЮС = ОЮХ * ДТС

Бунда:

ОЮХ — оилавий нодавлат МТТнинг бир нафар тарбияланувчисини бир ойлик юмшоқ жиҳозлар билан таъминлаш харажатларини қоплашга ажратиладиган субсидиянинг республика бўйича қатъий миқдори;

ДБХ — тегишли молия йилида 9 соатлик иш режимидаги умумий типдаги давлат мактабгача таълим ташкилотларига Давлат бюджети маблағлари ҳисобидан юмшоқ жиҳозлар харажатларини қоплаш учун ажратилган маблағлар миқдори;

ОЮС — ҳисобот ойида тарбияланувчиларни юмшоқ жиҳозлар билан таъминлаш учун ойлик субсидия суммаси;

ДТС — ҳисобот ойида давомати 40 фоиздан юқори бўлган тарбияланувчилар сони;

в) дори воситалари харажатларини қоплаш учун субсидиянинг ойлик суммаси қуйидаги формулалар асосида НМТТБАТда ҳисоб-китоб қилинади:

ОДХ = ДБХ / УБС / 12

ОДС = ОДХ * ДТС

Бунда:

ОДХ — оилавий нодавлат МТТнинг бир нафар тарбияланувчисини бир ойлик дори воситалари билан таъминлаш харажатларини қоплашга ажратиладиган субсидиянинг республика бўйича қатъий миқдори;

ДБХ — тегишли молия йилида 9 соатлик иш режимидаги умумий типдаги давлат мактабгача таълим ташкилотларига Давлат бюджети маблағлари ҳисобидан дори воситалари харажатларини қоплаш учун ажратилган маблағлар миқдори;

ОДС — ҳисобот ойида тарбияланувчиларни дори воситалари билан таъминлаш учун ойлик субсидия суммаси;

ДТС — ҳисобот ойида давомати 40 фоиздан юқори бўлган тарбияланувчилар сони.

17 1 . Оилавий МТТларга бюджет субсидиялари муассасанинг жойлашган ҳудудидан келиб чиқиб мазкур Низомнинг 11-бандида келтирилган тузатиш коэффициентларини қўллаган ҳолда ҳисобланади.

4-боб. ДХШ асосидаги МТТга компенсацияларни ҳисоблаш ва тўлаш тартиби

18. ДХШ асосидаги МТТ (оилавий МТТлар бундан мустасно) ва бошқа нодавлат МТТга ҳисобот ойида фойдаланган электр энергияси ва табиий газ хизматлари нархининг 50 фоизи миқдорида Давлат бюджети маблағлари ҳисобидан ҳар ойлик компенсация тўланади.

19. ДХШ асосидаги МТТ (оилавий МТТлар бундан мустасно) ва бошқа нодавлат МТТга тўланадиган электр энергияси хизматларидан фойдаланиш харажатлари учун компенсациянинг ойлик максимал суммаси қуйидаги формула асосида НМТТБАТда ҳисоб-китоб қилинади:

ЭКМ = ДБХ / УБС / ИКС * 0,5

ЭКС = ЭКМ * РТС

Бунда:

ЭКМ — электр энергияси хизматларидан фойдаланиш харажатлари учун бир нафар тарбияланувчига тўланадиган компенсациянинг кунлик қатъий миқдори;

ДБХ — 9 соатлик иш режимидаги умумий типдаги давлат мактабгача таълим ташкилотларига тегишли молия йилида Давлат бюджетидан электр энергияси хизматларидан фойдаланиш харажатлари учун ажратилган маблағларнинг умумий суммаси;

ИКС — жорий йилда иш кунлари сони;

ЭКС — электр энергияси хизматларидан фойдаланиш харажатлари учун тўланадиган компенсациянинг ойлик максимал суммаси;

РТС — ҳисобот ойидаги ҳар бир иш кунида ахборот тизимида рўйхатга олинган болалар сони йиғиндиси.

Бунда рўйхатдаги бола сони ташкилотнинг режадаги қувватидан ортиб кетган ҳолларда, режадан ортиқча рўйхатга киритилган болалар учун компенсация тўловлари ҳисобланмайди.

20. ДХШ асосидаги МТТ (оилавий МТТлар бундан мустасно) ва бошқа нодавлат МТТга тўланадиган табиий газ хизматларидан фойдаланиш харажатлари учун компенсациянинг ойлик суммаси қуйидаги формула асосида ҳисоб-китоб қилинади:

ГКМ = ДБХ / УБС / ИКС * 0,5

ГКС = ГКМ * РТС

Бунда:

ГКМ — табиий газ хизматларидан фойдаланиш харажатлари учун бир нафар тарбияланувчига тўланадиган компенсациянинг кунлик қатъий миқдори;

ДБХ — 9 соатлик иш режимидаги умумий типдаги давлат мактабгача таълим ташкилотларига тегишли молия йилида Давлат бюджетидан табиий газ хизматларидан фойдаланиш харажатлари учун ажратилган маблағларнинг умумий суммаси;

УБС — табиий газдан фойдаланадиган 9 соатлик иш режимидаги умумий типдаги давлат мактабгача таълим ташкилотларининг «Болалар боғчаси» мактабгача таълимни бошқариш ахборот тизимида рўйхатга олинган тўлиқ кунли гуруҳлардаги болалар сони;

ИКС — жорий йилда иш кунлари сони;

ГКС — табиий газ хизматларидан фойдаланиш харажатлари учун тўланадиган компенсациянинг ойлик суммаси;

РТС — ҳисобот ойидаги ҳар бир иш кунида НМТТБАТда рўйхатга олинган тарбияланувчиларнинг сони йиғиндиси.

21. ДХШ асосидаги МТТ (оилавий МТТлар бундан мустасно) ва бошқа нодавлат МТТга электр энергияси хизматларидан фойдаланиш харажатлари учун компенсация ҳисобот ойида улар томонидан ҳақиқатда фойдаланилган электр энергияси нархининг 50 фоизи миқдорида, бироқ электр энергиясидан фойдаланиш харажатлари учун компенсациянинг ойлик максимал суммасидан (ЭКСдан) ошмаган ҳолда тўланади.

ДХШ асосидаги МТТ (оилавий МТТлар бундан мустасно) ва бошқа нодавлат МТТнинг ҳисобот ойида ҳақиқатда фойдаланилган электр энергияси харажатлари тўғрисидаги маълумотлар электр энергиясини етказиб берувчи ташкилотлар томонидан идоралараро электрон маълумот алмашинуви орқали НМТТБАТга тақдим этилади.

Табиий газдан фойдаланиш харажатлари учун компенсация тўловлари барча ДХШ асосидаги МТТ (оилавий МТТлар бундан мустасно) ва бошқа нодавлат МТТга уларда марказлашган табиий газ таъминоти мавжуд бўлиши ёки бўлмаслигидан қатъи назар тўланади.

22. Электр энергияси ва табиий газ хизматларидан фойдаланиш харажатлари учун компенсациялар ДХШ асосидаги МТТ (оилавий МТТлар бундан мустасно) ва бошқа нодавлат МТТнинг НМТТБАТ орқали Мактабгача ва мактаб таълими вазирлигига бир йилда бир маротаба юборган аризаси асосида ҳисобот ойидан кейинги ойнинг 10-кунига қадар ҳисобланади.

Бунда компенсация тўловлари ариза берилган кундан кейин келадиган иш кунидан бошлаб НМТТБАТда рўйхатга олинган тарбияланувчилар сонидан келиб чиқиб ҳисоблаб борилади.

5-боб. ДХШ асосидаги ва бошқа нодавлат МТТга субсидиялар ҳамда компенсацияларни ҳисоблаш ва тўлаш шартлари

23. ДХШ асосидаги МТТга субсидия ажратиш давлат-хусусий шериклик тўғрисидаги битимда кўрсатилган муддат давомида амалга оширилади.

24. ДХШ асосидаги МТТга Давлат бюджети маблағлари ҳисобидан субсидиялар уларда таълим олаётган 3 ёш ва ундан катта ёшдаги (боқувчисини йўқотган аёлларнинг 2 ёш ва ундан катта ёшдаги), шу жумладан, 7 ёшга тўлган, бироқ мактабга қабул даврини кутаётган болалар учун тўланади.

Боқувчисини йўқотган аёллар ва уларнинг фарзандлари рўйхати НМТТБАТга тегишли вазирлик ва идораларнинг ахборот тизимидан ўзаро электрон ахборот алмашинуви орқали олинади.

25. ДХШ асосидаги ва бошқа нодавлат МТТ учун субсидиялар ва компенсацияларнинг қатъий миқдорлари Иқтисодиёт ва молия вазирлиги ва Мактабгача ва мактаб таълими вазирлиги томонидан 2022 йилнинг август ойида — 2022 йил август ойидан 2023 йил март ойигача бўлган муддат учун, кейинги йилларда эса ҳар йили апрель ойида — жорий йил апрель ойидан кейинги йилнинг март ойигача бўлган муддат учун тасдиқланади.

Бунда:

2024 йилдан бошлаб электр энергияси ва табиий газ нархлари (тарифлари) юридик шахслар учун оширилганда, компенсацияларнинг қатъий миқдорлари ҳам мос равишда оширилиб, Иқтисодиёт ва молия вазирлиги ва Мактабгача ва мактаб таълими вазирлиги томонидан қайта тасдиқланади ҳамда нархлар (тарифлар)нинг янги миқдорлари қонунчиликка киритилган ўзгаришлар кучга кирган санадан бошлаб ҳисоблаб борилади;

заруратдан келиб чиқиб, 2024 йилдан сўнг компенсацияларнинг қатъий миқдорлари ушбу банднинг биринчи хатбошисида белгиланган тартибда қайта кўриб чиқилиши мумкин.

26. Молия йили давомида қонунчилик ҳужжатларига мувофиқ меҳнатга ҳақ тўлаш миқдорлари ва шартлари ўзгарган ҳолларда, ДХШ асосидаги МТТга ва қамрови паст бўлган ҳудуддаги ҳамда янги кўп квартирали уйларнинг биринчи қаватидаги хусусий МТТга тўланадиган иш ҳақи харажатлари учун субсидияларнинг миқдорлари қайта кўриб чиқилади.

Бунда ДХШ асосидаги МТТга ва қамрови паст бўлган ҳудуддаги ҳамда янги кўп квартирали уйларнинг биринчи қаватидаги хусусий МТТга тўланадиган субсидияларнинг янги миқдорлари қонунчиликка киритилган ўзгаришлар кучга кирган санадан бошлаб ҳисоблаб борилади.

27. Субсидиялар ва компенсацияларни молиялаштириш учун зарур маблағлар тегишли молия йили учун республика бюджети параметрларида Мактабгача таълим вазирлиги учун ажратилади, кейинчалик ҳар ойда НМТТБАТда ҳисобланган субсидиялар ва компенсациялар миқдоридан келиб чиқиб тегишли туман (шаҳар) маҳаллий бюджетлари бўйича тақсимланади ва молиялаштирилади.

28. Субсидия олиш ҳуқуқига эга бўлган МТТларга субсидиялар ушбу ташкилотлар томонидан ходимлар ва тарбияланувчилар ҳақида маълумотлар НМТТБАТга киритилган кундан кейинги иш кунидан бошлаб беш кунлик иш ҳафтаси ҳисобидан ҳисоблаш бошланади.

Бунда:

оилавий МТТга субсидиялар оилавий МТТ ўз фаолиятини бошлаши тўғрисида хабарнома бўйича белгиланган тартибда берилган тасдиқномага асосан, ушбу тасдиқнома берилган кундан кейинги иш кунидан бошлаб ҳисобланади;

субсидиялар суммаси ДХШ асосидаги МТТнинг ходимлари ва тарбияланувчиларнинг ҳақиқий давоматидан келиб чиқиб автоматик равишда ҳисобланади;

ДХШ асосидаги МТТларга субсидиялар ва компенсациялар якка тартибдаги тадбиркорлик гувоҳномаси, фаолиятини бошлаганлиги тўғрисидаги хабарнома ёки нодавлат таълим ташкилоти лицензияси, тегишлича ижара шартномаси амал қилиш муддатларда ҳисобланади ва тўланади.

29. Ҳисобот ойида НМТТБАТда хусусий шерик мулки негизида ташкил этилган ДХШ асосидаги МТТ, қамрови паст бўлган ҳудуддаги ҳамда янги кўп квартирали уйларнинг биринчи қаватидаги хусусий МТТ ва оилавий МТТнинг гуруҳларидаги тарбияланувчилари бўйича ўртача ойлик давомати фоизи 40 фоиздан кам бўлганда, ҳисобот ойи учун ходимларига иш ҳақига субсидия ҳисобланмайди ва тўланмайди.

Тарбияланувчиларнинг ўртача ойлик давомати қуйидаги формула асосида аниқланади:

ЎОД = КДФ / ИКС

Бунда:

ЎОД — тарбияланувчиларнинг ўртача ойлик давомати;

КДФ — ҳисобот ойи давомида тарбияланувчиларнинг ҳар кунлик давоматининг фоизи жамланмаси. Бунда тарбияланувчиларнинг ҳар кунлик давомат фоизи МТТга келган тарбияланувчилар сонини ушбу кунда НМТТБАТда рўйхатга олинган тарбияланувчилар сонига бўлиш ва 100 фоизга кўпайтириш йўли билан аниқланади;

ИКС — ҳисобот ойида иш кунлари сони.

30. ДХШ асосидаги МТТнинг ходимлари (иш ҳақи харажатларини қоплаш учун субсидия олмайдиган ДХШ асосидаги МТТ ходимлари бундан мустасно) ва тарбияланувчиларининг ҳақиқий давомати ҳисоби НМТТБАТда жисмоний шахсни биометрик идентификация қилиш технологияси орқали юритилади.

НМТТга қабул қилинган тарбияланувчиларнинг фотосурати боланинг ота-онаси (бобоси, бувиси) ёки васийларининг номига расмийлаштирилган телефон рақамига СМС-хабарнома орқали код юборилади, ушбу код орқали боланинг фотосурати НМТТБАТда НМТТ раҳбари ёки ходимлари томонидан тасдиқланади. СМС билан тасдиқлаш харажатлари ахборот тизимига хизмат кўрсатувчи ташкилот томонидан қопланади.

31. Биометрик идентификация қилиш жараёни ДХШ асосидаги МТТ ва бошқа нодавлат МТТ раҳбари ёки ходимларининг смартфонлари ёхуд планшетлари ёрдамида, ушбу ташкилотнинг жойлашуви (геолокацияси) ҳисобга олинган ҳолда ҳар иш куни бир маротаба қуйидагича амалга оширилади:

тўлиқ кунли (9, 10,5 ва 12 соат) гуруҳларда — ҳар иш куни соат 07.00 — 17.00 гача;

болалар қисқа вақт бўладиган гуруҳларда — ушбу гуруҳларнинг иш режимидан келиб чиқиб ишнинг ҳар бир сменасидаги вақт мобайнида.

32. Субсидияларнинг ойлик суммалари ушбу Низомнинг 31-бандида белгиланган иш соатлари мобайнида НМТТБАТда қайд этилган ходимлар ва тарбияланувчиларнинг давомати асосида ҳисобланади.

Бунда давлат-хусусий шериклик тўғрисидаги битимда кўрсатилган ДХШ асосидаги МТТ ва қамрови паст бўлган ҳудуддаги ҳамда янги кўп квартирали уйларнинг биринчи қаватидаги хусусий МТТ манзили (жойлашуви бўйича геолокацияси)дан бошқа жойда қайд этилган ходимлар ва тарбияланувчиларнинг давомати НМТТБАТда ҳисобга олинмайди ва улар учун субсидия тўланмайди.

33. ДХШ асосидаги МТТ, шу жумладан, оилавий МТТ ва қамрови паст бўлган ҳудуддаги ҳамда янги кўп квартирали уйларнинг биринчи қаватидаги хусусий МТТ томонидан бир боланинг маълумотлари НМТТБАТга киритилиб, унинг фотосурати ўрнига бошқа бола (тарбияланувчи)нинг фотосурати ушбу ахборот тизимига жойлаштирилгани, электрон қурилмалар ва бошқа шаклдаги фотосурат орқали давомати белгиланиб келинаётгани, шунингдек, бошқа ташқи электрон дастурлар ёки иловалар, қўшимча қурилмалар ёрдамида ўзгартиришлар киритиш аниқланганда, Мактабгача ва мактаб таълими вазирлиги ходимлари томонидан бир томонлама далолатнома расмийлаштирилади ва электрон рақамли имзо билан тасдиқланган далолатнома тадбиркорнинг шахсий кабинетига НМТТБАТ орқали электрон тарзда юборилади.

Мазкур тарбияланувчи МТТга қатнаган барча даври учун тўланган субсидиялар суммаси тўлиқ Давлат бюджетига ундирилади.

Ушбу ҳолат биринчи маротаба аниқланганда, бир ой давомида, иккинчи маротаба аниқланганда эса икки ой давомида субсидия тўловлари ДХШ асосидаги МТТ, шу жумладан, оилавий МТТга ҳисобланмайди ва тўланмайди.

Бундай ҳолат учинчи маротаба аниқланганда, ушбу ДХШ асосидаги МТТ, шу жумладан, оилавий МТТ билан имзоланган давлат-хусусий шериклик тўғрисидаги битим бир томонлама бекор қилинади ва қайта тузилмайди.

34. НМТТБАТнинг мобил иловасидан интернет тармоғисиз (офлайн режимида) фойдаланган ҳолларда ДХШ асосидаги ва бошқа нодавлат МТТ ходимлари ва тарбияланувчилари давомати бўйича қайд этилган маълумотлар ҳисобот ойидан кейинги ойнинг 5-кунидан кечикмасдан интернет тармоғига уланган ҳолда (онлайн режимда) НМТТБАТга тақдим этилиши зарур.

НМТТБАТга маълумотларни ўз вақтида тақдим этмаган ДХШ асосидаги ва бошқа нодавлат МТТга Давлат бюджети маблағлари ҳисобидан субсидиялар ва компенсациялар тўланмайди.

35. Ҳисобот ойидан кейинги ойнинг 10-кунига қадар ДХШ асосидаги ва бошқа нодавлат МТТнинг туман ва шаҳарлар бўйича тўлов рўйхатлари (ҳисобланган субсидиялар ва компенсациялар ҳамда бошқа зарур маълумотлар) автоматик равишда электрон кўринишда НМТТБАТда шаклланади ва Молия вазирлигининг ахборот тизимига идоралараро маълумот алмашинуви орқали тақдим этилади.

36. Туман (шаҳар) мактабгача таълим бўлимлари икки иш куни мобайнида НМТТБАТ орқали тақдим этилган реестр асосида субсидия ва компенсацияларни тегишли ДХШ асосидаги ва нодавлат МТТнинг тижорат банкидаги ҳисобварағига ва ушбу ташкилотлар ходимларининг тегишли банк пластик карталарига белгиланган тартибда ўтказиб беради.

37. ДХШ асосидаги МТТга ўриндошлик асосида ишга қабул қилинадиган ходимнинг иш вақти жамланган ҳолда ҳисоблаб юритилганда, ўриндошлик асосида иш вақтининг умумий давомийлиги ҳисобга олинадиган давр учун ўриндошлик асосидаги лавозим бўйича иш вақти нормасининг ярмидан ортиқ бўлмаслиги керак. Бунда ҳисобга олинадиган давр бир ойдан ортиқ бўлмаслиги, кунлик ишнинг (сменанинг) давомийлиги эса — ўн икки соатдан ортиқ бўлмаслиги керак.

38. Техник ёки бошқа сабабларга кўра ҳисобот ойида НМТТБАТда субсидия ва (ёки) компенсациянинг ортиқча ёки кам ҳисобланганлиги аниқланганда, ҳисобот ойидан кейин келадиган ойда ушбу субсидия ва (ёки) компенсациялар тегишли суммалар қўшилган (ёки камайтирилган) ҳолда ҳисоб-китоб қилинади.

39. ДХШ асосидаги МТТ ва қамрови паст бўлган ҳудуддаги ҳамда янги кўп квартирали уйларнинг биринчи қаватидаги хусусий МТТ раҳбари ушбу ташкилот ва ходимларига тегишли бўлган маълумотларнинг НМТТБАТга ўз вақтида киритилиши, уларнинг тўлиқлиги ва ҳаққонийлиги бўйича жавобгар ҳисобланади. Бунда:

НМТТБАТга нотўғри ёки тўлиқ бўлмаган маълумотлар киритилиши натижасида субсидия ва компенсацияларни молиялаштириш имконияти бўлмаса, жавобгарлик тегишли МТТ раҳбарига юкланади;

маълумотларнинг тўғрилиги ва тўлиқлиги таъминлангандан сўнг субсидиялар ва компенсациялар қайта ҳисоб-китоб қилиниб, ҳисобот ойидан кейин келадиган ойда белгиланган тартибда молиялаштирилади;

ДХШ асосидаги МТТда (иш ҳақи харажатларини қоплаш учун субсидия олмайдиган ДХШ асосидаги МТТлар бундан мустасно) кадрлар таркиби ўзгариши билан боғлиқ бўлган маълумотлар ходимлар ишга қабул қилинган ва ишдан бўшатилган кунда НМТТБАТга киритилиши ҳамда уларнинг давомати ушбу Низомда белгиланган тартибда ҳисобга олиниши зарур.

6-боб. НМТТБАТдан фойдаланиш тартиби

40. НМТТБАТдан фойдаланиш учун ДХШ асосидаги ёки бошқа нодавлат МТТнинг раҳбари:

НМТТБАТнинг мобил иловасини юклаб олади;

НМТТБАТнинг интернет-сайти ёки мобил иловаси ёрдамида НМТТБАТга кириб, унда кўрсатилган оммавий оферта талаблари ва шартлари билан танишиб, ушбу ахборот тизимидан фойдаланиш бўйича ўз розилигини билдиради ва электрон рақамли имзоси билан тасдиқлайди.

Бунда НМТТБАТда МТТ раҳбарига шахсий кабинет очилади.

41. ДХШ асосидаги ва хусусий МТТга Давлат бюджети маблағларидан субсидиялар ва компенсациялар миқдори улар томонидан НМТТБАТ ва унинг мобил иловасидан фойдаланиш билан боғлиқ харажатлар амалга оширилгандан сўнг ҳисобланади.

7-боб. Якунловчи қоидалар

42. ДХШ асосидаги ва бошқа нодавлат МТТга ҳар ойлик субсидия ва компенсациялар:

уларни молиялаштириш учун талабномаларни ўз вақтида тақдим этилишида Мактабгача ва мактаб таълим вазирлиги масъул ҳисобланади;

ўз вақтида молиялаштирилишига Иқтисодиёт ва молия вазирлиги масъул ҳисобланади.

43. ДХШ асосидаги ва бошқа нодавлат МТТ томонидан ойлик субсидия ва компенсациялар маблағларининг мақсадли сарфланиши юзасидан назорат Мактабгача таълим вазирлигининг ички аудит ва молиявий назорат хизмати ҳамда Давлат молиявий назорати органлари томонидан амалга оширилади.

44. 2022 йил давомида НМТТБАТни жорий этишда тарбияланувчилар ва тарбиячилар давоматини ҳисобга олиш, субсидиялар ҳамда компенсацияларни ҳисоблаш, ДХШ асосидаги ва хусусий МТТ жойлашган ҳудудда интернет хизматлари кўрсатилмаслиги ёки интернет хизматини кўрсатувчи ташкилотлар томонидан интернет хизматлари вақтинчалик тақдим этилмаганда ёхуд узилишлар ҳамда бошқа техник носозликлар юзага келганда ойлик давоматни белгилаш учун НМТТБАТда қайд этилган ходимлар ва тарбияланувчиларнинг сўнгги 5 кунликда ўртача давомат кўрсаткичи қўлланилади ёхуд бундай кўрсаткичлар мавжуд бўлмаганида тегишли мактабгача таълим органи томонидан белгиланган тартибда тўлдирилган иш вақти табели ва тарбияланувчилар қатнови табелидан фойдаланилади.

Бунда ДХШ асосидаги ва бошқа нодавлат МТТ жойлашган ҳудудда интернет хизматлари кўрсатилмаслиги ёки интернет хизматини кўрсатувчи ташкилотлар томонидан интернет хизматлари вақтинчалик тақдим этилмаганлиги ёхуд узилишлар ҳамда бошқа техник носозликлар юзага келганлиги тўғрисидаги маълумотлар ДХШ асосидаги ва хусусий МТТ томонидан тегишли мактабгача таълим органига тақдим этилади.

45. Мазкур Низом талаблари бузилишида айбдор бўлган шахслар қонунчилик ҳужжатларига мувофиқ жавоб берадилар.

Нодавлат мактабгача таълим ташкилотларига Давлат бюджети маблағларидан субсидиялар ва компенсациялар тўлаш тартиби тўғрисидаги низомга 1-ИЛОВА

Нодавлат мактабгача таълим ташкилотларига Давлат бюджети маблағларидан субсидиялар ва компенсацияларни ажратиш ва тўлаш

Босқичлар Субъектлар Тадбирлар Бажариш муддатлари 1-босқич Таълим ташкилоти 1. «Болалар боғчаси» АТда тарбияланувчилар рўйхатини белгиланган тартибда шакллантиради. 2. Нодавлат мактабгача таълим ташкилотларини бошқариш ахборот тизимига (НМТТБАТ) ташкилот ва унинг ходимлари тўғрисидаги маълумотларни киритади. 3. Жисмоний шахсни биометрик идентификация қилиш орқали ходимлар ва тарбияланувчилар давоматини белгиланган тартибда юритади. Боланинг қонуний вакили ёкиходим билан меҳнат шартномаси тузилган кундан кейинги иш кунидан бошлаб 2-босқич Мактабгача таълим вазирлиги 1. Ҳисобот ойи давомида МТТга ҳақиқатда қатнаган ходимлар ва тарбияланувчилар рўйхатини автоматик тарзда шакллантиради. 2. МТТга ҳақиқатда қатнаган ходимлар ва тарбияланувчилар давомати ҳамда коммунал тўловлар бўйича электрон шаклда маълумотларни йиғади, тўланадиган субсидия ва компенсация миқдорларини ҳисоблайди. Ҳисобот ойидан кейинги ойнинг 7-кунигача 3-босқич Мактабгача таълим вазирлиги Субсидия ва компенсация турига қараб электрон шаклда буюртманомаларни шакллантиради ва Молия вазирлигининг тегишли ахборот тизимларига юборади. Ҳисобот ойидан кейинги ойнинг 10-кунигача 4-босқич Молия вазирлиги Ўзбекистон Республикаси Давлат бюджетидан субсидиялар ва компенсациялар ажратиш бўйича НМТТБАТда шакллантирилган талабномалар асосида зарур маблағларни туман мактабгача таълим бўлимларида очилган алоҳида ҳисобварақларига қайта тақсимлайди. Икки иш кунида 5-босқич Туман (шаҳар) мактабгача таълим бўлимлари Тақдим этилган реестр асосида тегишли ДХШ асосидаги ва нодавлат МТТнинг тижорат банкидаги ҳисобварағига субсидиялар ва компенсацияларни белгиланган тартибда ўтказиб беради. Икки иш кунида

Нодавлат мактабгача таълим ташкилотларига Давлат бюджети маблағларидан субсидиялар ва компенсациялар тўлаш тартиби тўғрисидаги низомга 2-ИЛОВА

20___ йил __________ ойи учун «__________» ДХШ асосидаги МТТда таълим олаётган ҳар бир бола учун субсидия олишга