📅 2022-yil 4-avgust · Prezident qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2022 йил 4 август · Президент қарорлари
Расмий матн. Расмий ҳужжат. Таҳририй изоҳлар киритилмаган.
📅 4 августа 2022 г. · Постановления Президента
Официальный текст. Официальный документ. Редакционные примечания не включены.
📅 4 August 2022 · Presidential resolutions
Official text. Official document. Editorial notes are not included.
Ўзбекистон Республикаси Президентининг
Қарори
Оилавий болалар уйлари фаолиятини такомиллаштиришга оид қўшимча чора-тадбирлар тўғрисида
Етим болалар ва ота-она қарамоғидан маҳрум бўлган болаларни тарбиялашнинг тубдан янгиланган тизимини жорий этиш, болаларни жойлаштиришнинг оилавий ҳамда бошқа муқобил шаклларини амалиётга киритиш, уларни мустақил ҳаётга тайёрлаш учун қулай шарт-шароитлар яратиш мақсадида:
1. Белгилансинки, 2022 йил 1 сентябрдан бошлаб:
оилавий болалар уйлари етим болалар ва ота-она қарамоғидан маҳрум бўлган болаларни (кейинги ўринларда — тарбияланувчилар) оилага тарбияга олишни истаган фуқаролар томонидан юридик шахс мақомисиз Ўзбекистон Республикаси Президенти ҳузуридаги Ижтимоий ҳимоя миллий агентлигининг тегишлича Қорақалпоғистон Республикаси, вилоятлар ва Тошкент шаҳар бошқармаларининг қарори асосида ташкил этилади;
оилавий болалар уйидаги тарбияланувчилар сони кўпи билан 5 нафарни ташкил қилиши лозим. Бунда оилавий болалар уйини ташкил қилган фуқароларнинг вояга етмаган фарзандлари ҳамда тарбияланувчиларнинг умумий сони 8 нафардан ошмаслиги керак;
оилавий болалар уйларини тутинган ота-оналарни тайёрлаш курсларини муваффақиятли тугатган фуқаролар томонидан ташкил қилишга рухсат этилади;
оилавий болалар уйлари фаолиятини мувофиқлаштириш ва назорат қилиш «Инсон» ижтимоий хизматлар марказлари томонидан амалга оширилади;
оилавий болалар уйини ташкил этиш тўғрисидаги ариза билан мурожаат қилган шахслардан тегишли вазирлик ва идораларнинг электрон маълумотлар базаларидан олиш мумкин бўлган ҳужжатларни талаб қилиш ман этилади.
2. Халқ таълими вазирлиги (Б. Саидов) Миллий гвардия (Р. Джураев), Адлия вазирлиги (Р. Давлетов), Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари билан биргаликда бир ой муддатда амалда юридик шахс мақомидаги давлат тарбия муассасаси сифатида фаолият кўрсатиб келаётган оилавий болалар уйларини юридик шахс мақомисиз қайта ташкил этиш чораларини кўрсин.
Белгилансинки, мазкур қарорнинг 1-бандида оилавий болалар уйидаги тарбияланувчиларнинг энг кўп сонига ўрнатилган чеклов давлат тарбия муассасаси сифатида фаолият кўрсатиб келаётган ва юридик шахс мақомисиз қайта ташкил этилаётган оилавий болалар уйларига татбиқ этилмайди.
Бунда, ушбу оилавий болалар уйларидаги тарбияланувчилар 18 ёшга тўлгунга ёхуд умумий ўрта, ўрта махсус ва бошланғич профессионал таълим муассасаларини тамомлагунига қадар мазкур уйларда қолади.
3. Миллий гвардия (Р. Джураев) Халқ таълими вазирлиги (Б. Саидов) билан биргаликда бир ой муддатда оилавий болалар уйларини ташкил қилмоқчи бўлган фуқаролар учун тутинган ота-оналарни тайёрлаш курсларини ташкил этиш ва ушбу жараёнга малакали, шу жумладан хорижий мутахассисларни жалб қилиш чораларини кўрсин.
Белгилансинки, оилавий болалар уйларини ташкил қилмоқчи бўлган фуқаролар нодавлат таълим ташкилотлари томонидан ташкил қилинган тутинган ота-оналарни тайёрлаш курсларида ўқиши ва тегишли сертификатни олиши мумкин.
4. Шундай тартиб ўрнатилсинки, унга мувофиқ 2022 йил 1 сентябрдан бошлаб:
а) оилавий болалар уйини ташкил этган фуқароларга ҳар ойда Давлат бюджетидан:
оилавий болалар уйидаги ҳар бир тарбияланувчининг яшаш харажатлари учун 7 ёшгача бўлган тарбияланувчиларга базавий ҳисоблаш миқдорининг 5 баравари миқдорида, 8 ёшдан 18 ёшгача бўлган тарбияланувчиларга базавий ҳисоблаш миқдорининг 7 баравари миқдорида;
оилавий болалар уйидаги ҳар бир тарбияланувчини парвариш қилиш учун меҳнатга ҳақ тўлаш энг кам миқдорининг 1 баравари (ногиронлиги бўлган болалар учун 1,5 баравари) миқдорида;
оилавий болалар уйига тарбияга олинган ҳар бир ногиронлиги бўлган болани даволаш-соғломлаштириш учун ҳар ойда базавий ҳисоблаш миқдорининг 1 баравари миқдорида маблағ ажратилади;
б) оилавий болалар уйидаги тарбияланувчиларнинг яшаш харажатлари учун ажратилган маблағлар ҳар ойнинг 5-санасига қадар тутинган ота-она номига очилган банк пластик картасига тўғридан-тўғри ўтказиб берилади;
в) оилавий болалар уйидаги тарбияланувчиларга ҳудудда жойлашган давлат спорт мажмуалари, маънавий-маърифий масканлар, тўгараклар, от спорти секциялари, «Ишга марҳамат» мономарказлари ва бошқа ўқув марказларидаги тўгараклар ва курсларга бепул қатнашиш ҳуқуқи берилади;
г) оилавий болалар уйидаги тарбияланувчилар учун:
Ўзбекистон Касаба уюшмалари федерацияси томонидан йилига бир маротаба соғломлаштириш оромгоҳларида дам олиш учун бепул йўлланмалар ажратилади;
туман (шаҳар) ҳокимликлари томонидан бир йилда икки маротаба республикамизнинг тарихий шаҳарларига бепул саёҳатлар ҳамда театр томошалари ва концерт дастурлари ташкил этилади;
д) оилавий болалар уйидаги тарбияланувчилар давлат даволаш-профилактика муассасалари томонидан бир йилда икки маротаба бепул тўлиқ тиббий текширувдан ўтказилади;
е) оилавий болалар уйидаги тарбияланувчиларга мазкур қарорга мувофиқ берилаётган соғломлаштириш оромгоҳига ва саёҳатга бориш, театр томошалари ва концертларда қатнашишга оид имтиёзлар оилавий болалар уйини ташкил этган фуқароларнинг ўз фарзандларига ҳам татбиқ этилади.
5. «Инсон» ижтимоий хизматлар марказлари Миллий гвардия ходимлари ҳамда маҳаллалардаги хотин-қизлар фаоллари билан ҳамкорликда оилавий болалар уйларини ташкил этишда тутинган ота-оналарга зарур ташкилий ёрдам кўрсатсин ҳамда ҳар ойда камида бир марта болаларнинг турмуши ва уларни тарбиялаш учун яратилган шароитларини кузатиб борсин.
6. Вазирлар Маҳкамаси икки ҳафта муддатда оилавий болалар уйларини ташкил этиш ва уларни молиялаштириш, етим болалар ва ота-она қарамоғидан маҳрум бўлган болаларни ушбу уйларга бериш тартибини тасдиқласин.
7. Миллий гвардия (Р. Джураев):
Халқ таълими вазирлиги (Б. Саидов), Ўзбекистон Миллий ахборот агентлиги (А. Кўчимов), Ўзбекистон Миллий телерадиокомпанияси (А. Хаджаев), Ахборот ва оммавий коммуникациялар агентлиги (А. Ходжаев) билан биргаликда 2023 йил 1 январга қадар бир ойда камида бир марта ушбу қарор мақсади ва вазифаларини оммавий ахборот воситаларида ва ижтимоий тармоқларда кенг ёритиш ишларини олиб борсин;
манфаатдор вазирлик ва идоралар билан биргаликда икки ой муддатда қонунчилик ҳужжатларига ушбу қарордан келиб чиқадиган ўзгартириш ва қўшимчалар тўғрисида Вазирлар Маҳкамасига таклифлар киритсин.
8. Мазкур қарор ижросини самарали ташкил қилишга масъул ва шахсий жавобгар этиб Миллий гвардия қўмондони Р.М. Джураев, халқ таълими вазири Б.О. Саидов ҳамда молия вазири Т.А. Ишметов белгилансин.
Қарор ижросини назорат қилиш ва ижро учун масъул ташкилотлар фаолиятини мувофиқлаштириш Ўзбекистон Республикаси Бош вазирининг ўринбосари Ж.А. Қўчқоров ҳамда Ўзбекистон Республикаси Президентининг маслаҳатчиси А.А. Абдувахитов зиммасига юклансин.
Ўзбекистон Республикаси Президенти Ш. МИРЗИЁЕВ
Тошкент ш.,
2022 йил 4 август,
ПҚ-345-сон
Oʻzbekiston Respublikasi Prezidentining
Qarori
Oilaviy bolalar uylari faoliyatini takomillashtirishga oid qoʻshimcha chora-tadbirlar toʻgʻrisida
Yetim bolalar va ota-ona qaramogʻidan mahrum boʻlgan bolalarni tarbiyalashning tubdan yangilangan tizimini joriy etish, bolalarni joylashtirishning oilaviy hamda boshqa muqobil shakllarini amaliyotga kiritish, ularni mustaqil hayotga tayyorlash uchun qulay shart-sharoitlar yaratish maqsadida:
1. Belgilansinki, 2022-yil 1-sentabrdan boshlab:
oilaviy bolalar uylari yetim bolalar va ota-ona qaramogʻidan mahrum boʻlgan bolalarni (keyingi oʻrinlarda — tarbiyalanuvchilar) oilaga tarbiyaga olishni istagan fuqarolar tomonidan yuridik shaxs maqomisiz Oʻzbekiston Respublikasi Prezidenti huzuridagi Ijtimoiy himoya milliy agentligining tegishlicha Qoraqalpogʻiston Respublikasi, viloyatlar va Toshkent shahar boshqarmalarining qarori asosida tashkil etiladi;
oilaviy bolalar uyidagi tarbiyalanuvchilar soni koʻpi bilan 5 nafarni tashkil qilishi lozim. Bunda oilaviy bolalar uyini tashkil qilgan fuqarolarning voyaga yetmagan farzandlari hamda tarbiyalanuvchilarning umumiy soni 8 nafardan oshmasligi kerak;
oilaviy bolalar uylarini tutingan ota-onalarni tayyorlash kurslarini muvaffaqiyatli tugatgan fuqarolar tomonidan tashkil qilishga ruxsat etiladi;
oilaviy bolalar uylari faoliyatini muvofiqlashtirish va nazorat qilish “Inson” ijtimoiy xizmatlar markazlari tomonidan amalga oshiriladi;
oilaviy bolalar uyini tashkil etish toʻgʻrisidagi ariza bilan murojaat qilgan shaxslardan tegishli vazirlik va idoralarning elektron maʼlumotlar bazalaridan olish mumkin boʻlgan hujjatlarni talab qilish man etiladi.
2. Xalq taʼlimi vazirligi (B. Saidov) Milliy gvardiya (R. Djurayev), Adliya vazirligi (R. Davletov), Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari bilan birgalikda bir oy muddatda amalda yuridik shaxs maqomidagi davlat tarbiya muassasasi sifatida faoliyat koʻrsatib kelayotgan oilaviy bolalar uylarini yuridik shaxs maqomisiz qayta tashkil etish choralarini koʻrsin.
Belgilansinki, mazkur qarorning 1-bandida oilaviy bolalar uyidagi tarbiyalanuvchilarning eng koʻp soniga oʻrnatilgan cheklov davlat tarbiya muassasasi sifatida faoliyat koʻrsatib kelayotgan va yuridik shaxs maqomisiz qayta tashkil etilayotgan oilaviy bolalar uylariga tatbiq etilmaydi.
Bunda, ushbu oilaviy bolalar uylaridagi tarbiyalanuvchilar 18 yoshga toʻlgunga yoxud umumiy oʻrta, oʻrta maxsus va boshlangʻich professional taʼlim muassasalarini tamomlaguniga qadar mazkur uylarda qoladi.
3. Milliy gvardiya (R. Djurayev) Xalq taʼlimi vazirligi (B. Saidov) bilan birgalikda bir oy muddatda oilaviy bolalar uylarini tashkil qilmoqchi boʻlgan fuqarolar uchun tutingan ota-onalarni tayyorlash kurslarini tashkil etish va ushbu jarayonga malakali, shu jumladan xorijiy mutaxassislarni jalb qilish choralarini koʻrsin.
Belgilansinki, oilaviy bolalar uylarini tashkil qilmoqchi boʻlgan fuqarolar nodavlat taʼlim tashkilotlari tomonidan tashkil qilingan tutingan ota-onalarni tayyorlash kurslarida oʻqishi va tegishli sertifikatni olishi mumkin.
4. Shunday tartib oʻrnatilsinki, unga muvofiq 2022-yil 1-sentabrdan boshlab:
a) oilaviy bolalar uyini tashkil etgan fuqarolarga har oyda Davlat budjetidan:
oilaviy bolalar uyidagi har bir tarbiyalanuvchining yashash xarajatlari uchun 7 yoshgacha boʻlgan tarbiyalanuvchilarga bazaviy hisoblash miqdorining 5 baravari miqdorida, 8 yoshdan 18 yoshgacha boʻlgan tarbiyalanuvchilarga bazaviy hisoblash miqdorining 7 baravari miqdorida;
oilaviy bolalar uyidagi har bir tarbiyalanuvchini parvarish qilish uchun mehnatga haq toʻlash eng kam miqdorining 1 baravari (nogironligi boʻlgan bolalar uchun 1,5 baravari) miqdorida;
oilaviy bolalar uyiga tarbiyaga olingan har bir nogironligi boʻlgan bolani davolash-sogʻlomlashtirish uchun har oyda bazaviy hisoblash miqdorining 1 baravari miqdorida mablagʻ ajratiladi;
b) oilaviy bolalar uyidagi tarbiyalanuvchilarning yashash xarajatlari uchun ajratilgan mablagʻlar har oyning 5-sanasiga qadar tutingan ota-ona nomiga ochilgan bank plastik kartasiga toʻgʻridan-toʻgʻri oʻtkazib beriladi;
v) oilaviy bolalar uyidagi tarbiyalanuvchilarga hududda joylashgan davlat sport majmualari, maʼnaviy-maʼrifiy maskanlar, toʻgaraklar, ot sporti seksiyalari, “Ishga marhamat” monomarkazlari va boshqa oʻquv markazlaridagi toʻgaraklar va kurslarga bepul qatnashish huquqi beriladi;
g) oilaviy bolalar uyidagi tarbiyalanuvchilar uchun:
Oʻzbekiston Kasaba uyushmalari federatsiyasi tomonidan yiliga bir marotaba sogʻlomlashtirish oromgohlarida dam olish uchun bepul yoʻllanmalar ajratiladi;
tuman (shahar) hokimliklari tomonidan bir yilda ikki marotaba respublikamizning tarixiy shaharlariga bepul sayohatlar hamda teatr tomoshalari va konsert dasturlari tashkil etiladi;
d) oilaviy bolalar uyidagi tarbiyalanuvchilar davlat davolash-profilaktika muassasalari tomonidan bir yilda ikki marotaba bepul toʻliq tibbiy tekshiruvdan oʻtkaziladi;
e) oilaviy bolalar uyidagi tarbiyalanuvchilarga mazkur qarorga muvofiq berilayotgan sogʻlomlashtirish oromgohiga va sayohatga borish, teatr tomoshalari va konsertlarda qatnashishga oid imtiyozlar oilaviy bolalar uyini tashkil etgan fuqarolarning oʻz farzandlariga ham tatbiq etiladi.
5. “Inson” ijtimoiy xizmatlar markazlari Milliy gvardiya xodimlari hamda mahallalardagi xotin-qizlar faollari bilan hamkorlikda oilaviy bolalar uylarini tashkil etishda tutingan ota-onalarga zarur tashkiliy yordam koʻrsatsin hamda har oyda kamida bir marta bolalarning turmushi va ularni tarbiyalash uchun yaratilgan sharoitlarini kuzatib borsin.
6. Vazirlar Mahkamasi ikki hafta muddatda oilaviy bolalar uylarini tashkil etish va ularni moliyalashtirish, yetim bolalar va ota-ona qaramogʻidan mahrum boʻlgan bolalarni ushbu uylarga berish tartibini tasdiqlasin.
7. Milliy gvardiya (R. Djurayev):
Xalq taʼlimi vazirligi (B. Saidov), Oʻzbekiston Milliy axborot agentligi (A. Koʻchimov), Oʻzbekiston Milliy teleradiokompaniyasi (A. Xadjayev), Axborot va ommaviy kommunikatsiyalar agentligi (A. Xodjayev) bilan birgalikda 2023-yil 1-yanvarga qadar bir oyda kamida bir marta ushbu qaror maqsadi va vazifalarini ommaviy axborot vositalarida va ijtimoiy tarmoqlarda keng yoritish ishlarini olib borsin;
manfaatdor vazirlik va idoralar bilan birgalikda ikki oy muddatda qonunchilik hujjatlariga ushbu qarordan kelib chiqadigan oʻzgartirish va qoʻshimchalar toʻgʻrisida Vazirlar Mahkamasiga takliflar kiritsin.
8. Mazkur qaror ijrosini samarali tashkil qilishga masʼul va shaxsiy javobgar etib Milliy gvardiya qoʻmondoni R.M. Djurayev, xalq taʼlimi vaziri B.O. Saidov hamda moliya vaziri T.A. Ishmetov belgilansin.
Qaror ijrosini nazorat qilish va ijro uchun masʼul tashkilotlar faoliyatini muvofiqlashtirish Oʻzbekiston Respublikasi Bosh vazirining oʻrinbosari J.A. Qoʻchqorov hamda Oʻzbekiston Respublikasi Prezidentining maslahatchisi A.A. Abduvaxitov zimmasiga yuklansin.
Oʻzbekiston Respublikasi Prezidenti Sh. MIRZIYOYEV
Toshkent sh.,
2022-yil 4-avgust,
PQ-345-son
Президента Республики Узбекистан
Постановление
О дополнительных мерах по совершенствованию деятельности детских домов семейного типа
В целях внедрения кардинально обновленной системы воспитания детей-сирот и детей, оставшихся без попечения родителей, применения на практике семейной и иных альтернативных форм устройства детей, создания благоприятных условий для их подготовки к самостоятельной жизни:
1. Установить, что с 1 сентября 2022 года:
детские дома семейного типа создаются без статуса юридического лица гражданами, желающими взять на воспитание в семью детей-сирот и детей, оставшихся без попечения родителей (далее — воспитанники), на основании решения соответствующих управлений Национального агентства социальной защиты при Президенте Республики Узбекистан Республики Каракалпакстан, областей и города Ташкента;
число воспитанников в детском доме семейного типа должно составлять не более пяти детей. При этом общая численность своих детей граждан, создавших детский дом семейного типа, а также воспитанников не должна превышать восемь детей;
разрешение на создание детского дома семейного типа предоставляется гражданам, успешно окончившим курсы подготовки приемных родителей;
координация и контроль деятельности детских домов семейного типа осуществляются центрами социальных услуг «Инсон»;
запрещается истребование у граждан, обратившихся с заявлением о создании детского дома семейного типа, документов, которые можно получить из электронных баз данных соответствующих министерств и ведомств.
2. Министерству народного образования (Б. Саидов) совместно с Национальной гвардией (Р. Джураев), Министерством юстиции (Р. Давлетов), Советом Министров Республики Каракалпакстан, хокимиятами областей и города Ташкента в месячный срок принять меры по преобразованию детских домов семейного типа, осуществляющих деятельность в качестве государственных воспитательных учреждений со статусом юридического лица, в детские дома семейного типа без статуса юридического лица.
Определить, что ограничение, установленное к максимальному количеству воспитанников в детском доме семейного типа, указанное в пункте 1 настоящего постановления, не применяется к детским домам семейного типа, осуществляющим деятельность в качестве государственного воспитательного учреждения и преобразуемым в детские дома семейного типа без статуса юридического лица.
При этом воспитанники детских домов семейного типа остаются в этих домах до достижения ими возраста 18 лет, либо окончания общих средних, средних специальных и начальных профессиональных образовательных учреждений.
3. Национальной гвардии (Р. Джураев) совместно с Министерством народного образования (Б.Саидов) в месячный срок принять меры по организации курсов подготовки приемных родителей для граждан, желающих создать детский дом семейного типа, и привлечению к этому процессу квалифицированных, включая зарубежных, специалистов.
Установить, что граждане, желающие создать детский дом семейного типа, могут учиться на курсах подготовки приемных родителей, организованных негосударственными образовательными организациями, и получить соответствующий сертификат.
4. Установить порядок, в соответствии с которым с 1 сентября 2022 года:
а) гражданам, создавшим детский дом семейного типа, ежемесячно из Государственного бюджета выделяются средства на:
расходы по проживанию в детском доме семейного типа в пятикратном размере базовой расчетной величины — за каждого воспитанника в возрасте до 7 лет, в семикратном размере базовой расчетной величины — за каждого воспитанника в возрасте от 8 лет до 18 лет;
уход за каждым воспитанником детского дома семейного типа — в однократном (за каждым ребенком с инвалидностью — 1,5-кратном) размере минимальной оплаты труда;
лечение и оздоровление каждого ребенка с инвалидностью, принятого на воспитание в детский дом семейного типа, — в однократном размере базовой расчетной величины;
б) средства, выделяемые на расходы по проживанию воспитанников в детском доме семейного типа, зачисляются непосредственно на банковскую пластиковую карту, открытую на имя приемного родителя, в срок до 5-го числа каждого месяца;
в) воспитанникам детских домов семейного типа предоставляется право на бесплатное посещение государственных спортивных комплексов, духовно-просветительских учреждений, кружков, конноспортивных секций, моноцентров «Ишга мархамат», а также кружков и курсов в других учебных центрах, расположенных на близлежащей территории;
г) для воспитанников детских домов семейного типа:
Федерацией профсоюзов Узбекистана один раз в год выделяются путевки для отдыха в оздоровительные лагеря на бесплатной основе;
хокимиятами районов (городов) два раза в год организуются путешествия по историческим городам республики, а также театрализованные представления и концертные программы на бесплатной основе;
д) государственные лечебно-профилактические учреждения два раза в год проводят полное медицинское обследование воспитанников детских домов семейного типа на бесплатной основе;
е) льготы на бесплатные путевки в оздоровительные лагеря, путешествия по историческим городам, участие в театрализованных представлениях и концертных программах, предоставленные воспитанникам детских домов семейного типа в соответствии с настоящим постановлением, распространяются также на своих детей граждан, создавших детский дом семейного типа.
5. Центрам социальных услуг «Инсон» во взаимодействии с сотрудниками Национальной гвардии и женскими активистами в махаллях оказывать необходимую организационную помощь приемным родителям в создании детских домов семейного типа, а также не реже одного раза в месяц проводить мониторинг условий, созданных для проживания и воспитания детей.
6. Кабинету Министров в двухнедельный срок утвердить Порядок создания, финансирования и устройства детей-сирот и детей, оставшихся без попечения родителей в детские дома семейного типа.
7. Национальной гвардии (Р. Джураев):
совместно с Министерством народного образования (Б. Саидов), Национальным информационным агентством Узбекистана (А. Кучимов), Национальной телерадиокомпанией Узбекистана (А. Хаджаев) и Агентством информации и массовых коммуникаций (А. Ходжаев) в период до 1 января 2023 года регулярно не реже одного раза в месяц проводить работу по широкому освещению целей и задач настоящего постановления в средствах массовой информации и социальных сетях;
совместно с заинтересованными министерствами и ведомствами в двухмесячный срок внести в Кабинет Министров предложения об изменениях и дополнениях в акты законодательства, вытекающих из настоящего постановления.
8. Возложить на командующего Национальной гвардией Р.М. Джураева, министра народного образования Б.О. Саидова и министра финансов Т.А. Ишметова персональную ответственность за эффективную организацию исполнения настоящего постановления.
Осуществление контроля за исполнением настоящего постановления и координацию деятельности организаций, ответственных за его исполнение, возложить на заместителя Премьер-министра Республики Узбекистан Д.А. Кучкарова и советника Президента Республики Узбекистан А.А. Абдувахитова.
Президент Республики Узбекистан Ш. МИРЗИЁЕВ
г. Ташкент,
4 августа 2022 г.,
№ ПП-345