📅 2022-yil 10-avgust · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2022 йил 10 август · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 10 августа 2022 г. · Постановления Кабинета Министров
Официальный текст. Официальный документ. Редакционные примечания не включены.
📅 10 August 2022 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
Ихтирочилик ва рационализаторлик фаолиятини қўллаб-қувватлаш чора-тадбирлари тўғрисида
Республика иқтисодиёт тармоқлари ва соҳалари ижтимоий-иқтисодий барқарор ривожланишида ихтирочилик ва рационализаторликнинг муҳим аҳамиятини эътиборга олиб, ихтирочилар ва рационализаторларнинг ижодий салоҳиятидан фойдаланишда нодавлат нотижорат ташкилотлар ролини ошириш мақсадида Вазирлар Маҳкамаси қарор қилади:
1. Инновацион ривожланиш вазирлигининг нодавлат нотижорат ташкилот шаклидаги Ўзбекистон Ихтирочилар ва рационализаторлар жамиятини (кейинги ўринларда — Жамият) ташкил этиш тўғрисидаги таклифи маъқуллансин.
2. Инновацион ривожланиш вазирлигига ихтирочилик ва рационализаторлик фаолиятини қўллаб-қувватлаш мақсадида қуйидаги вазифалар юклансин:
республика иқтисодиётининг барча тармоқларида ихтирочилик ва рационализаторлик фаолиятини ривожлантиришга кўмаклашиш;
давлат бошқаруви органлари, хўжалик бирлашмалари, устав фондида давлат улуши 50 фоиз ва ундан юқори бўлган ташкилотларнинг ихтирочилик ва рационализаторлик фаолиятини мувофиқлаштириш;
ихтирочилик ва рационализаторлик фаолияти билан шуғулланадиган нодавлат нотижорат ташкилотлар ташкил этишга ва уларнинг фаолиятига кўмаклашиш;
ихтирочилик ва рационализаторлик бўйича кўргазмалар ҳамда кўрик-танловлар ўтказиш;
республика даражасида ўтказиладиган кўрик-танловлар ғолибларини таълим ташкилотларига ўқишга киришда имтиёзлар бериш юзасидан Ўзбекистон Республикаси таълим муассасаларига ўқишга қабул қилиш бўйича давлат комиссиясига таклифлар киритиб бориш.
3. Инновацион ривожланиш вазирлиги манфаатдор вазирлик ва идоралар билан биргаликда 2022 йил 1 октябрга қадар Жамият фаолиятини йўлга қўйиш бўйича қуйидагиларни назарда тутувчи ташкилий чора-тадбирларни ишлаб чиқсин ва тасдиқлаш учун Вазирлар Маҳкамасига киритсин:
республикада ихтирочилик ва рационализаторлик фаолиятини ривожлантириш;
рационализаторлик фаолиятини ривожлантириш тўғрисида намунавий низом ишлаб чиқиш, тасдиқлаш ва ўз расмий веб-сайтига жойлаштириш;
ихтирочилар ва рационализаторларни тайёрлаш ҳамда уларнинг малакасини оширишга кўмаклашиш;
ихтирочилик ва рационализаторлик бўйича кўргазмалар ҳамда уларнинг доирасида кўрик-танловлар ўтказиш;
Жамиятга республикадаги тажрибали олимлар, ихтирочилар ва рационализаторларни жалб қилиш;
жорий қилинган ихтирочилик ва рационализаторлик таклифларини рағбатлантириш механизмларини такомиллаштириб бориш;
республикада ихтирочилик ва рационализаторлик фаолияти бўйича тарғибот-ташвиқот ишларини ташкил қилиш.
4. Белгилансинки, вазирлик ва идоралар, маҳаллий ижро этувчи ҳокимият органлари, хўжалик бирлашмалари, устав фондида давлат улуши 50 фоиз ва ундан юқори бўлган ташкилотларнинг инновацияларни жорий этиш бўйича вазифалар юклатилган раҳбар ўринбосарлари:
тегишли тармоқда ихтирочилик ва рационализаторлик фаолиятини йўлга қўйиш, ривожлантириш ҳамда натижаларини амалиётга жорий этишни таъминлайди;
тармоқ ташкилотларида мавжуд техник ва технологик муаммолар ечимига тегишли илмий ташкилотлар, ихтирочилар ва рационализаторларни кенг жалб қилади;
тармоқ ташкилотларида жорий этилган, иқтисодий самара берган ихтиролар ва рационализаторлик таклифларининг муаллифларини, ихтиролар ва рационализаторлик таклифларини ишлаб чиқаришга жорий этишда хизмат кўрсатган ходимларни тегишли инновацион фаолиятни қўллаб-қувватлаш жамғармалари маблағлари ва қонунчилик ҳужжатларида тақиқланмаган бошқа манбалар ҳисобидан рағбатлантириб боради.
5. Инновацион ривожланиш вазирлиги, Иқтисодий тараққиёт ва камбағалликни қисқартириш вазирлиги, Ёшлар ишлари агентлиги, Фанлар академияси, Олий ва ўрта махсус таълим вазирлиги, Халқ таълими вазирлиги, Президент таълим муассасалари агентлигининг 2022 йилдан бошлаб ҳар йили ҳудудлар, тармоқлар ва соҳалар кесимида ихтирочилик ва рационализаторлик бўйича кўргазмалар ва уларнинг доирасида кўрик-танлов ўтказиш тўғрисидаги таклифига розилик берилсин. Бунда:
а) ихтирочилик ва рационализаторлик бўйича ўтказиладиган кўрик-танловлар ғолибларига қуйидаги миқдорда бир марталик пул мукофотлари берилиши назарда тутилади:
1-ўринга — базавий ҳисоблаш миқдорининг 300 баравари;
2-ўринга — базавий ҳисоблаш миқдорининг 250 баравари;
3-ўринга — базавий ҳисоблаш миқдорининг 200 баравари;
б) ихтирочилик ва рационализаторлик бўйича ўтказиладиган кўрик-танловлар ғолиблари Инновацион ривожланиш вазирлиги томонидан Илм-фанни молиялаштириш ва инновацияларни қўллаб-қувватлаш жамғармаси маблағлари ҳисобидан мукофотланади;
в) кўрик-танловларда ғолибларнинг ихтирони патентлаш билан боғлиқ харажатлари Илм-фанни молиялаштириш ва инновацияларни қўллаб-қувватлаш жамғармаси маблағлари ҳисобидан қопланади;
г) кўрик-танловларда ғолибларнинг ихтироларини келгусида стартап лойиҳалар доирасида молиялаштиришга устуворлик берилади.
Инновацион ривожланиш вазирлиги 2022 йил 1 октябрга қадар:
ихтирочилик ва рационализаторлик бўйича кўргазмалар ва уларнинг доирасида кўрик-танловлар ўтказиш тартибини ишлаб чиқсин ва тасдиқлаш учун Вазирлар Маҳкамасига киритсин;
кўрик-танловларни онлайн форматда ўтказиш мақсадида электрон платформа ишга туширсин.
6. Белгилансинки, мазкур қарорнинг 5-бандида назарда тутилган кўргазмалар ва кўрик-танловлар ғолиблари ўзлари тамомланган таълим йўналишидан келиб чиқиб:
Президент таълим муассасалари агентлиги тизимидаги таълим муассасаларига ўқишга қабул қилиниши;
олий таълим муассасаларининг тегишли техник таълим йўналишлари бўйича магистратура мутахассислигига Ёшларга оид давлат сиёсатини қўллаб-қувватлаш жамғармасининг гранти ҳисобидан, қабул параметрларидан ташқари ўқишга имтиҳонсиз қабул қилиш юзасидан Ўзбекистон Республикаси таълим муассасаларига ўқишга қабул қилиш бўйича давлат комиссиясига киритилган таклифлар асосида чора-тадбирлар амалга оширилади.
7. Вазирликлар ва идоралар, маҳаллий ижро этувчи ҳокимият органларига илм-фан ва инновацияларни ривожлантиришга масъул таркибий бўлинма лавозимларига ишга қабул қилишда ихтиролар ва рационализаторлик таклифларининг муаллифларига (номзодларга) устунлик берилиши тавсия этилсин.
8. Ўзбекистон Миллий ахборот агентлиги, Ўзбекистон Миллий телерадиокомпанияси Инновацион ривожланиш вазирлиги билан биргаликда мавзуга оид мақолалар, туркум телекўрсатув ва радиоэшиттиришлар ташкил этиш орқали аҳоли ўртасида ихтирочилик ва рационализаторликка қизиқишни оширишни таъминласин.
9. Инновацион ривожланиш вазирлиги бир ой муддатда Вазирлар Маҳкамасининг 1992 йил 28 декабрдаги 596-сон қарори билан тасдиқланган Рационализаторлик фаолияти тўғрисидаги низомни бугунги замон талабларидан келиб чиқиб, шу жумладан, ихтирочига тўлаш лозим бўлган мукофотнинг энг кам миқдори корхонадаги меҳнатга ҳақ тўлашнинг энг кам миқдорининг 50 фоизидан кам бўлмаслиги кераклиги назарда тутган ҳолда, қайта кўриб чиқиш бўйича таклиф киритсин.
10. Мазкур қарорнинг бажарилишини назорат қилиш Ўзбекистон Республикаси Бош вазирининг инвестициялар ва ташқи иқтисодий алоқалар масалалари бўйича ўринбосари — инвестициялар ва ташқи савдо вазири Ж.А. Ходжаев ҳамда Ўзбекистон Республикаси инновацион ривожланиш вазири И.Ю. Абдурахмонов зиммасига юклансин.
Ўзбекистон Республикасининг Бош вазири А. АРИПОВ
Тошкент ш.,
2022 йил 10 август,
440-сон
Oʻzbekiston Respublikasi Vazirlar Mahkamasining
qarori
Ixtirochilik va ratsionalizatorlik faoliyatini qoʻllab-quvvatlash chora-tadbirlari toʻgʻrisida
Respublika iqtisodiyot tarmoqlari va sohalari ijtimoiy-iqtisodiy barqaror rivojlanishida ixtirochilik va ratsionalizatorlikning muhim ahamiyatini eʼtiborga olib, ixtirochilar va ratsionalizatorlarning ijodiy salohiyatidan foydalanishda nodavlat notijorat tashkilotlar rolini oshirish maqsadida Vazirlar Mahkamasi qaror qiladi:
1. Innovatsion rivojlanish vazirligining nodavlat notijorat tashkilot shaklidagi Oʻzbekiston Ixtirochilar va ratsionalizatorlar jamiyatini (keyingi oʻrinlarda — Jamiyat) tashkil etish toʻgʻrisidagi taklifi maʼqullansin.
2. Innovatsion rivojlanish vazirligiga ixtirochilik va ratsionalizatorlik faoliyatini qoʻllab-quvvatlash maqsadida quyidagi vazifalar yuklansin:
respublika iqtisodiyotining barcha tarmoqlarida ixtirochilik va ratsionalizatorlik faoliyatini rivojlantirishga koʻmaklashish;
davlat boshqaruvi organlari, xoʻjalik birlashmalari, ustav fondida davlat ulushi 50 foiz va undan yuqori boʻlgan tashkilotlarning ixtirochilik va ratsionalizatorlik faoliyatini muvofiqlashtirish;
ixtirochilik va ratsionalizatorlik faoliyati bilan shugʻullanadigan nodavlat notijorat tashkilotlar tashkil etishga va ularning faoliyatiga koʻmaklashish;
ixtirochilik va ratsionalizatorlik boʻyicha koʻrgazmalar hamda koʻrik-tanlovlar oʻtkazish;
respublika darajasida oʻtkaziladigan koʻrik-tanlovlar gʻoliblarini taʼlim tashkilotlariga oʻqishga kirishda imtiyozlar berish yuzasidan Oʻzbekiston Respublikasi taʼlim muassasalariga oʻqishga qabul qilish boʻyicha davlat komissiyasiga takliflar kiritib borish.
3. Innovatsion rivojlanish vazirligi manfaatdor vazirlik va idoralar bilan birgalikda 2022-yil 1-oktabrga qadar Jamiyat faoliyatini yoʻlga qoʻyish boʻyicha quyidagilarni nazarda tutuvchi tashkiliy chora-tadbirlarni ishlab chiqsin va tasdiqlash uchun Vazirlar Mahkamasiga kiritsin:
respublikada ixtirochilik va ratsionalizatorlik faoliyatini rivojlantirish;
ratsionalizatorlik faoliyatini rivojlantirish toʻgʻrisida namunaviy nizom ishlab chiqish, tasdiqlash va oʻz rasmiy veb-saytiga joylashtirish;
ixtirochilar va ratsionalizatorlarni tayyorlash hamda ularning malakasini oshirishga koʻmaklashish;
ixtirochilik va ratsionalizatorlik boʻyicha koʻrgazmalar hamda ularning doirasida koʻrik-tanlovlar oʻtkazish;
Jamiyatga respublikadagi tajribali olimlar, ixtirochilar va ratsionalizatorlarni jalb qilish;
joriy qilingan ixtirochilik va ratsionalizatorlik takliflarini ragʻbatlantirish mexanizmlarini takomillashtirib borish;
respublikada ixtirochilik va ratsionalizatorlik faoliyati boʻyicha targʻibot-tashviqot ishlarini tashkil qilish.
4. Belgilansinki, vazirlik va idoralar, mahalliy ijro etuvchi hokimiyat organlari, xoʻjalik birlashmalari, ustav fondida davlat ulushi 50 foiz va undan yuqori boʻlgan tashkilotlarning innovatsiyalarni joriy etish boʻyicha vazifalar yuklatilgan rahbar oʻrinbosarlari:
tegishli tarmoqda ixtirochilik va ratsionalizatorlik faoliyatini yoʻlga qoʻyish, rivojlantirish hamda natijalarini amaliyotga joriy etishni taʼminlaydi;
tarmoq tashkilotlarida mavjud texnik va texnologik muammolar yechimiga tegishli ilmiy tashkilotlar, ixtirochilar va ratsionalizatorlarni keng jalb qiladi;
tarmoq tashkilotlarida joriy etilgan, iqtisodiy samara bergan ixtirolar va ratsionalizatorlik takliflarining mualliflarini, ixtirolar va ratsionalizatorlik takliflarini ishlab chiqarishga joriy etishda xizmat koʻrsatgan xodimlarni tegishli innovatsion faoliyatni qoʻllab-quvvatlash jamgʻarmalari mablagʻlari va qonunchilik hujjatlarida taqiqlanmagan boshqa manbalar hisobidan ragʻbatlantirib boradi.
5. Innovatsion rivojlanish vazirligi, Iqtisodiy taraqqiyot va kambagʻallikni qisqartirish vazirligi, Yoshlar ishlari agentligi, Fanlar akademiyasi, Oliy va oʻrta maxsus taʼlim vazirligi, Xalq taʼlimi vazirligi, Prezident taʼlim muassasalari agentligining 2022-yildan boshlab har yili hududlar, tarmoqlar va sohalar kesimida ixtirochilik va ratsionalizatorlik boʻyicha koʻrgazmalar va ularning doirasida koʻrik-tanlov oʻtkazish toʻgʻrisidagi taklifiga rozilik berilsin. Bunda:
a) ixtirochilik va ratsionalizatorlik boʻyicha oʻtkaziladigan koʻrik-tanlovlar gʻoliblariga quyidagi miqdorda bir martalik pul mukofotlari berilishi nazarda tutiladi:
1-oʻringa — bazaviy hisoblash miqdorining 300 baravari;
2-oʻringa — bazaviy hisoblash miqdorining 250 baravari;
3-oʻringa — bazaviy hisoblash miqdorining 200 baravari;
b) ixtirochilik va ratsionalizatorlik boʻyicha oʻtkaziladigan koʻrik-tanlovlar gʻoliblari Innovatsion rivojlanish vazirligi tomonidan Ilm-fanni moliyalashtirish va innovatsiyalarni qoʻllab-quvvatlash jamgʻarmasi mablagʻlari hisobidan mukofotlanadi;
v) koʻrik-tanlovlarda gʻoliblarning ixtironi patentlash bilan bogʻliq xarajatlari Ilm-fanni moliyalashtirish va innovatsiyalarni qoʻllab-quvvatlash jamgʻarmasi mablagʻlari hisobidan qoplanadi;
g) koʻrik-tanlovlarda gʻoliblarning ixtirolarini kelgusida startap loyihalar doirasida moliyalashtirishga ustuvorlik beriladi.
Innovatsion rivojlanish vazirligi 2022-yil 1-oktabrga qadar:
ixtirochilik va ratsionalizatorlik boʻyicha koʻrgazmalar va ularning doirasida koʻrik-tanlovlar oʻtkazish tartibini ishlab chiqsin va tasdiqlash uchun Vazirlar Mahkamasiga kiritsin;
koʻrik-tanlovlarni onlayn formatda oʻtkazish maqsadida elektron platforma ishga tushirsin.
6. Belgilansinki, mazkur qarorning 5-bandida nazarda tutilgan koʻrgazmalar va koʻrik-tanlovlar gʻoliblari oʻzlari tamomlangan taʼlim yoʻnalishidan kelib chiqib:
Prezident taʼlim muassasalari agentligi tizimidagi taʼlim muassasalariga oʻqishga qabul qilinishi;
oliy taʼlim muassasalarining tegishli texnik taʼlim yoʻnalishlari boʻyicha magistratura mutaxassisligiga Yoshlarga oid davlat siyosatini qoʻllab-quvvatlash jamgʻarmasining granti hisobidan, qabul parametrlaridan tashqari oʻqishga imtihonsiz qabul qilish yuzasidan Oʻzbekiston Respublikasi taʼlim muassasalariga oʻqishga qabul qilish boʻyicha davlat komissiyasiga kiritilgan takliflar asosida chora-tadbirlar amalga oshiriladi.
7. Vazirliklar va idoralar, mahalliy ijro etuvchi hokimiyat organlariga ilm-fan va innovatsiyalarni rivojlantirishga masʼul tarkibiy boʻlinma lavozimlariga ishga qabul qilishda ixtirolar va ratsionalizatorlik takliflarining mualliflariga (nomzodlarga) ustunlik berilishi tavsiya etilsin.
8. Oʻzbekiston Milliy axborot agentligi, Oʻzbekiston Milliy teleradiokompaniyasi Innovatsion rivojlanish vazirligi bilan birgalikda mavzuga oid maqolalar, turkum telekoʻrsatuv va radioeshittirishlar tashkil etish orqali aholi oʻrtasida ixtirochilik va ratsionalizatorlikka qiziqishni oshirishni taʼminlasin.
9. Innovatsion rivojlanish vazirligi bir oy muddatda Vazirlar Mahkamasining 1992-yil 28-dekabrdagi 596-son qarori bilan tasdiqlangan Ratsionalizatorlik faoliyati toʻgʻrisidagi nizomni bugungi zamon talablaridan kelib chiqib, shu jumladan, ixtirochiga toʻlash lozim boʻlgan mukofotning eng kam miqdori korxonadagi mehnatga haq toʻlashning eng kam miqdorining 50 foizidan kam boʻlmasligi kerakligi nazarda tutgan holda, qayta koʻrib chiqish boʻyicha taklif kiritsin.
10. Mazkur qarorning bajarilishini nazorat qilish Oʻzbekiston Respublikasi Bosh vazirining investitsiyalar va tashqi iqtisodiy aloqalar masalalari boʻyicha oʻrinbosari — investitsiyalar va tashqi savdo vaziri J.A. Xodjayev hamda Oʻzbekiston Respublikasi innovatsion rivojlanish vaziri I.Y. Abduraxmonov zimmasiga yuklansin.
Oʻzbekiston Respublikasining Bosh vaziri A. ARIPOV
Toshkent sh.,
2022-yil 10-avgust,
440-son