📅 2022-yil 19-avgust · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2022 йил 19 август · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 19 августа 2022 г. · Постановления Кабинета Министров
Официальный текст. Официальный документ. Редакционные примечания не включены.
📅 19 August 2022 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
Президент таълим муассасалари агентлиги тизимидаги ихтисослаштирилган мактаблар тармоғининг кенгайтирилиши муносабати билан Ўзбекистон Республикаси Ҳукуматининг айрим қарорларига ўзгартиришлар киритиш тўғрисида
Президент таълим муассасалари агентлиги тизимидаги ихтисослаштирилган мактаблар тармоғининг кенгайтирилиши муносабати билан ихтисослаштирилган мактабларни ташкил этишга ягона ёндашув белгиланди, ушбу мактаблар тармоғини кенгайтириш, моддий-техник базасини мустаҳкамлаш ҳамда таълим жараёнига малакали раҳбар ва педагог кадрларни жалб қилиш, иқтидорли ёшларни аниқлаш, танлаш, ўқитиш ва тарбиялаш жараёнларининг ягона тизими жорий этилди.
Жумладан, 2022 йил 1 сентябрга қадар 19 та ихтисослаштирилган мактаб-интернатларни, 141 та ихтисослаштирилган мактабларни, 2023 йил 1 июнга қадар 5 та ихтисослаштирилган мактаб-интернатларни, 3 та ихтисослаштирилган мактабларни ташкил этиш ҳамда 2022 — 2024 йилларда 25 та ихтисослаштирилган мактаб-интернатларни қуриш белгиланди.
Шунингдек, келгусида ихтисослаштирилган янги мактаб-интернатлар ва ихтисослаштирилган мактаблар фақат Президент таълим муассасалари агентлиги тизимида ташкил этилиб, 2022/2023 ўқув йилидан бошлаб Халқ таълими вазирлиги тизимидаги фанлар чуқур ўқитиладиган мактаблар ҳамда мактаб-интернатлар босқичма-босқич умумий ўрта таълим мактаблари сифатида қайта ташкил этилади.
Президент таълим муассасалари агентлиги тизимидаги таълим муассасалари учун давлат таълим стандарти, ўқув режалари, таълим дастурлари ва дарслик мажмуаларини ишлаб чиқиш ҳамда уларни харид қилиш, ушбу Агентлик тизимидаги таълим муассасалари битирувчиларини якуний давлат аттестациясидан ўтказиш ва таълим соҳасидаги илғор тажрибаларни ўрганиш ҳамда мамлакатимизда жорий этиш бўйича тавсиялар ишлаб чиқиш Президент таълим муассасалари агентлиги ҳузуридаги Педагогик маҳорат ва халқаро баҳолаш илмий-амалий марказининг асосий вазифалари сифатида белгиланди.
Шу билан бирга, Президент таълим муассасалари агентлиги тизимидаги муассасалар сони кўпайганлиги, марказий аппарати тузилмасида янги бўлимлар очилганлиги ҳамда умумий чекланган штат бирликлари сони белгиланганлиги, ҳудудий бўлимлар ташкил этилганлиги, болаларни соғлом овқатлантиришни ташкил этиш хизматларини кўрсатувчи аутсорсерлар танловини ўтказувчи комиссия таркиби ўзгарганлиги муносабати билан Ўзбекистон Республикаси Ҳукуматининг айрим қарорларига ўзгартиришлар киритиш зарурати юзага келмоқда.
Президент таълим муассасалари агентлиги тизимидаги ихтисослаштирилган мактаб-интернатлар ва ихтисослаштирилган мактаблар фаолиятини мувофиқлаштириш, шунингдек, Ўзбекистон Республикаси Президентининг «Президент таълим муассасалари агентлиги тизимидаги ихтисослаштирилган мактаблар тармоғини кенгайтириш тўғрисида» 2022 йил 14 апрелдаги ПФ-106-сон Фармонига мувофиқ Вазирлар Маҳкамаси қарор қилади:
1. Ўзбекистон Республикаси Ҳукуматининг иловага мувофиқ айрим қарорларига қуйидагиларни назарда тутувчи ўзгартиришлар киритилсин:
Президент таълим муассасалари агентлигининг (кейинги ўринларда — Агентлик) ташкилий тузилмасига Агентлик марказий аппаратида Соғлом овқатланишни ташкил этиш шуъбаси, Ички аудит хизмати, Ихтисослаштирилган мактаб-интернатлар ва ихтисослаштирилган мактаблар билан ишлаш бўлимини, шунингдек, Агентликнинг ҳар бири 4 та штат бирлигидан иборат 13 та ҳудудий бўлимларини ташкил этишни назарда тутувчи ўзгартириш киритиш;
Агентлик тизимидаги таълим муассасалари битирувчиларининг давлат олий таълим ташкилотлари бакалавриат таълим йўналишларига белгиланган имтиёзлар асосида қабул қилинишини ягона норматив-ҳуқуқий ҳужжатда акс эттириш;
Ўзбекистон Республикаси Халқ таълими вазирлиги тизимидаги фанлар чуқур ўқитиладиган мактаблар ҳамда мактаб-интернатларни босқичма-босқич умумий ўрта таълим мактаблари сифатида қайта ташкил этиш;
Агентлик тизимидаги мактабларда соғлом овқатлантиришни аутсорсинг усулида ташкил этиш тартибини такомиллаштириш;
Агентлик ҳузуридаги Педагогик маҳорат ва халқаро баҳолаш илмий-амалий марказининг асосий вазифаларини белгилаш.
2. Мазкур қарорнинг бажарилишини назорат қилиш Президент таълим муассасалари агентлиги директори Х.Ў. Умарова зиммасига ҳамда Вазирлар Маҳкамасининг Таълим, соғлиқни сақлаш ва спорт масалалари котибиятига юклансин.
Вазирлар Маҳкамасининг 2022 йил 19 августдаги 463-сон қарорига ИЛОВА
Ўзбекистон Республикаси Ҳукуматининг айрим қарорларига киритилаётган ўзгартиришлар
1. Вазирлар Маҳкамасининг 2008 йил 7 августдаги 173-сон қарори билан тасдиқланган Айрим фанлар чуқур ўрганиладиган давлат умумтаълим муассасаларининг ихтисослаштирилган синфлари, давлат ихтисослаштирилган умумтаълим муассасалари тўғрисидаги низомда :
а) II боб ўз кучини йўқотган деб ҳисоблансин;
б) 22-банддаги иккинчи хатбоши чиқариб ташлансин;
в) 28 , 33 ва 34-бандлар ўз кучини йўқотган деб ҳисоблансин.
3. Вазирлар Маҳкамасининг 2020 йил 18 апрелдаги 240-сон қарори билан тасдиқланган Ўзбекистон Республикаси Вазирлар Маҳкамаси ҳузуридаги Президент, ижод ва ихтисослаштирилган мактабларни ривожлантириш агентлиги тўғрисидаги низомнинг 8-банди қуйидаги таҳрирда баён этилсин:
«8. Агентликнинг тузилмаси қуйидагилардан иборат:
Агентликнинг марказий аппарати;
Қорақалпоғистон Республикаси ва вилоятлар ҳудудий бўлимлари;
Президент мактаблари;
Абдулла Орипов номидаги ижод мактаби;
Эркин Воҳидов номидаги ижод мактаби;
Муҳаммад Ризо Эрниёзбек ўғли Огаҳий номидаги ижод мактаби;
Исҳоқхон Ибрат номидаги ижод мактаби;
Ҳалима Худойбердиева номидаги ижод мактаби;
Абдулла Қодирий номидаги ижод мактаби;
Муҳаммад Юсуф номидаги ижод мактаби;
Ҳамид Олимжон ва Зулфия номидаги ижод мактаби;
Ибройим Юсупов номидаги ижод мактаби;
Муҳаммад ал-Хоразмий номидаги ихтисослаштирилган мактаб;
Мирзо Улуғбек номидаги ихтисослаштирилган мактаб;
Абу Али ибн Сино номидаги ихтисослаштирилган мактаб;
Қорақалпоғистон Республикаси, вилоятлар, Тошкент шаҳри ҳамда туман (шаҳар)лардаги ихтисослаштирилган мактаб-интернатлар ва ихтисослаштирилган мактаблар;
«Янги Ўзбекистон» университети;
Педагогик маҳорат ва халқаро баҳолаш илмий-амалий маркази;
«Ренессанс» болалар соғломлаштириш оромгоҳи».
4. Вазирлар Маҳкамасининг 2021 йил 14 апрелдаги 218-сон қарори билан тасдиқланган Ўзбекистон Республикаси Вазирлар Маҳкамаси ҳузуридаги Президент, ижод ва ихтисослаштирилган мактабларни ривожлантириш агентлиги тизимидаги мактабларда соғлом овқатлантиришни аутсорсинг усулида ташкил этиш тартиби тўғрисидаги низомнинг 13-банди қуйидаги таҳрирда баён этилсин:
«13. Қорақалпоғистон Республикаси ва вилоятлардаги мактаблар учун Қорақалпоғистон Республикаси ва вилоятлар ҳудудий бўлимлари бошлиқлари комиссия раиси ҳисобланади ҳамда комиссия таркибини ҳар йил учун алоҳида тасдиқлайди.
Тошкент шаҳридаги мактаблар учун Агентлик директори ўринбосари комиссия раиси ҳисобланади ва комиссия таркибини ҳар йил учун алоҳида тасдиқлайди.
Комиссия таркиби тоқ сонли аъзолардан иборат бўлиб, Соғлиқни сақлаш вазирлиги, Халқ таълими вазирлиги ҳамда Санитария-эпидемиологик осойишталик ва жамоат саломатлиги хизмати, ҳудудларда тегишлича уларнинг ҳудудий бошқармаларининг 2 нафар ходимлари ҳамда Агентлик марказий аппаратининг 1 нафар ходимидан ташкил топади».
5. Вазирлар Маҳкамасининг «Президент таълим муассасалари агентлиги ҳузуридаги Педагогик маҳорат ва халқаро баҳолаш маркази фаолиятини ташкил этиш тўғрисида» 2021 йил 7 декабрдаги 741-сон қарорида :
а) қарор номи қуйидаги таҳрирда баён этилсин:
«Президент таълим муассасалари агентлиги ҳузуридаги Педагогик маҳорат ва халқаро баҳолаш илмий-амалий маркази фаолиятини ташкил этиш тўғрисида»;
б) 1-банд қуйидаги таҳрирда баён этилсин:
«1. Қуйидагилар:
Ўзбекистон Республикаси Президентининг «Президент, ижод ва ихтисослаштирилган мактаблар фаолиятини янада такомиллаштириш бўйича қўшимча чора-тадбирлар тўғрисида» 2021 йил 19 июлдаги ПҚ-5188-сон қарорининг 11-бандига мувофиқ Президент таълим муассасалари агентлиги (кейинги ўринларда — Агентлик) ҳузурида юридик шахс мақомидаги Педагогик маҳорат ва халқаро баҳолаш маркази ташкил этилганлиги;
Ўзбекистон Республикаси Президентининг «Президент таълим муассасалари агентлиги тизимида ихтисослаштирилган мактаблар тармоғини кенгайтириш тўғрисида» 2022 йил 14 апрелдаги ПФ-106-сон Фармонига мувофиқ Агентлик ҳузуридаги Педагогик маҳорат ва халқаро баҳолаш маркази Педагогик маҳорат ва халқаро баҳолаш илмий-амалий маркази (кейинги ўринларда — Марказ) этиб қайта номланганлиги, қуйидагилар унинг асосий вазифалари этиб белгиланганлиги ҳамда тузилмаси тасдиқланганлиги маълумот учун қабул қилинсин:
Агентлик тизимидаги таълим муассасалари учун давлат таълим стандарти, ўқув режалари, таълим дастурлари ва дарслик мажмуаларини ишлаб чиқиш ҳамда харид қилиш;
Агентлик тизимидаги таълим муассасалари битирувчиларини якуний давлат аттестациясидан ўтказиш;
таълим соҳасидаги илғор тажрибаларни ўрганиш ва мамлакатимизда жорий этиш бўйича тавсиялар ишлаб чиқиш, ўқитувчиларнинг билим ва кўникмаларини баҳолаш ва сертификатлашни хорижий мамлакатларнинг етакчи илмий-тадқиқот муассасалари билан ҳамкорликда амалга ошириш;
раҳбар ва педагог кадрларни узлуксиз касбий ривожлантириш, уларнинг малакасини оширишга қўйиладиган давлат таълим талабларини ишлаб чиқиш ҳамда халқаро ташкилотлар билан ҳамкорликда малака ошириш курсларини ташкил этиш;
Агентлик тизимидаги таълим муассасаларини илмий-методик жиҳатдан таъминлаш, фундаментал, амалий ва инновацион тадқиқотлар ўтказиш, тадқиқот натижаларини амалиётга кенг жорий этиш.»;
в) 2-банд ўз кучини йўқотган деб ҳисоблансин;
г) 3 ва 4-бандлар қуйидаги таҳрирда баён этилсин:
«3. Белгилансинки:
Марказ давлат муассасаси ҳисобланади;
Марказ Молия вазирлиги Ғазначилигида шахсий ғазна ҳисобварағига эга бўлади ва унинг фаолияти Давлат бюджети маблағлари, бюджетдан ташқари маблағлар ҳамда қонунчилик ҳужжатларида тақиқланмаган бошқа манбалар ҳисобидан молиялаштирилади;
Марказнинг устав фонди миқдори Агентлик томонидан белгиланади ҳамда Агентлик ҳузуридаги Иқтидорли ёшларни қўллаб-қувватлаш жамғармаси маблағлари ҳисобидан шакллантирилади;
Марказнинг маъмурий-бошқарув ходимлари, профессор-ўқитувчилари ҳамда методистларига Давлат тест марказининг тегишли лавозимлари учун белгиланган меҳнатга ҳақ тўлаш ва моддий рағбатлантириш шартлари татбиқ этилади.
Марказ директори Агентлик томонидан лавозимга тайинланади ва лавозимдан озод этилади.
4. Қуйидагилар Марказ фаолиятини молиялаштириш манбалари этиб белгилансин:
Давлат бюджети маблағлари;
шартнома асосида хизматлар кўрсатишдан, шу жумладан, таълим хизматларидан олинадиган даромадлар;
Агентлик ҳузуридаги Иқтидорли ёшларни қўллаб-қувватлаш жамғармаси маблағлари;
жисмоний ва юридик шахсларнинг ҳомийлик хайриялари;
халқаро молия ташкилотлари ва хорижий давлатларнинг грантлари ва техник кўмаклашиш маблағлари;
қонунчилик ҳужжатлари билан тақиқланмаган бошқа манбалар»;
д) 5-бандда :
биринчи хатбоши чиқариб ташлансин;
иккинчи хатбоши биринчи хатбоши деб ҳисоблансин;
е) илова ўз кучини йўқотган деб ҳисоблансин.
Ўзбекистон Республикасининг Бош вазири А. АРИПОВ
Тошкент ш.,
2022 йил 19 август,
463-сон
Oʻzbekiston Respublikasi Vazirlar Mahkamasining
qarori
Prezident taʼlim muassasalari agentligi tizimidagi ixtisoslashtirilgan maktablar tarmogʻining kengaytirilishi munosabati bilan Oʻzbekiston Respublikasi Hukumatining ayrim qarorlariga oʻzgartirishlar kiritish toʻgʻrisida
Prezident taʼlim muassasalari agentligi tizimidagi ixtisoslashtirilgan maktablar tarmogʻining kengaytirilishi munosabati bilan ixtisoslashtirilgan maktablarni tashkil etishga yagona yondashuv belgilandi, ushbu maktablar tarmogʻini kengaytirish, moddiy-texnik bazasini mustahkamlash hamda taʼlim jarayoniga malakali rahbar va pedagog kadrlarni jalb qilish, iqtidorli yoshlarni aniqlash, tanlash, oʻqitish va tarbiyalash jarayonlarining yagona tizimi joriy etildi.
Jumladan, 2022-yil 1-sentabrga qadar 19 ta ixtisoslashtirilgan maktab-internatlarni, 141 ta ixtisoslashtirilgan maktablarni, 2023-yil 1-iyunga qadar 5 ta ixtisoslashtirilgan maktab-internatlarni, 3 ta ixtisoslashtirilgan maktablarni tashkil etish hamda 2022 — 2024-yillarda 25 ta ixtisoslashtirilgan maktab-internatlarni qurish belgilandi.
Shuningdek, kelgusida ixtisoslashtirilgan yangi maktab-internatlar va ixtisoslashtirilgan maktablar faqat Prezident taʼlim muassasalari agentligi tizimida tashkil etilib, 2022/2023 oʻquv yilidan boshlab Xalq taʼlimi vazirligi tizimidagi fanlar chuqur oʻqitiladigan maktablar hamda maktab-internatlar bosqichma-bosqich umumiy oʻrta taʼlim maktablari sifatida qayta tashkil etiladi.
Prezident taʼlim muassasalari agentligi tizimidagi taʼlim muassasalari uchun davlat taʼlim standarti, oʻquv rejalari, taʼlim dasturlari va darslik majmualarini ishlab chiqish hamda ularni xarid qilish, ushbu Agentlik tizimidagi taʼlim muassasalari bitiruvchilarini yakuniy davlat attestatsiyasidan oʻtkazish va taʼlim sohasidagi ilgʻor tajribalarni oʻrganish hamda mamlakatimizda joriy etish boʻyicha tavsiyalar ishlab chiqish Prezident taʼlim muassasalari agentligi huzuridagi Pedagogik mahorat va xalqaro baholash ilmiy-amaliy markazining asosiy vazifalari sifatida belgilandi.
Shu bilan birga, Prezident taʼlim muassasalari agentligi tizimidagi muassasalar soni koʻpayganligi, markaziy apparati tuzilmasida yangi boʻlimlar ochilganligi hamda umumiy cheklangan shtat birliklari soni belgilanganligi, hududiy boʻlimlar tashkil etilganligi, bolalarni sogʻlom ovqatlantirishni tashkil etish xizmatlarini koʻrsatuvchi autsorserlar tanlovini oʻtkazuvchi komissiya tarkibi oʻzgarganligi munosabati bilan Oʻzbekiston Respublikasi Hukumatining ayrim qarorlariga oʻzgartirishlar kiritish zarurati yuzaga kelmoqda.
Prezident taʼlim muassasalari agentligi tizimidagi ixtisoslashtirilgan maktab-internatlar va ixtisoslashtirilgan maktablar faoliyatini muvofiqlashtirish, shuningdek, Oʻzbekiston Respublikasi Prezidentining “Prezident taʼlim muassasalari agentligi tizimidagi ixtisoslashtirilgan maktablar tarmogʻini kengaytirish toʻgʻrisida” 2022-yil 14-apreldagi PF-106-son Farmoniga muvofiq Vazirlar Mahkamasi qaror qiladi:
1. Oʻzbekiston Respublikasi Hukumatining ilovaga muvofiq ayrim qarorlariga quyidagilarni nazarda tutuvchi oʻzgartirishlar kiritilsin:
Prezident taʼlim muassasalari agentligining (keyingi oʻrinlarda — Agentlik) tashkiliy tuzilmasiga Agentlik markaziy apparatida Sogʻlom ovqatlanishni tashkil etish shuʼbasi, Ichki audit xizmati, Ixtisoslashtirilgan maktab-internatlar va ixtisoslashtirilgan maktablar bilan ishlash boʻlimini, shuningdek, Agentlikning har biri 4 ta shtat birligidan iborat 13 ta hududiy boʻlimlarini tashkil etishni nazarda tutuvchi oʻzgartirish kiritish;
Agentlik tizimidagi taʼlim muassasalari bitiruvchilarining davlat oliy taʼlim tashkilotlari bakalavriat taʼlim yoʻnalishlariga belgilangan imtiyozlar asosida qabul qilinishini yagona normativ-huquqiy hujjatda aks ettirish;
Oʻzbekiston Respublikasi Xalq taʼlimi vazirligi tizimidagi fanlar chuqur oʻqitiladigan maktablar hamda maktab-internatlarni bosqichma-bosqich umumiy oʻrta taʼlim maktablari sifatida qayta tashkil etish;
Agentlik tizimidagi maktablarda sogʻlom ovqatlantirishni autsorsing usulida tashkil etish tartibini takomillashtirish;
Agentlik huzuridagi Pedagogik mahorat va xalqaro baholash ilmiy-amaliy markazining asosiy vazifalarini belgilash.
2. Mazkur qarorning bajarilishini nazorat qilish Prezident taʼlim muassasalari agentligi direktori X.Oʻ. Umarova zimmasiga hamda Vazirlar Mahkamasining Taʼlim, sogʻliqni saqlash va sport masalalari kotibiyatiga yuklansin.
Vazirlar Mahkamasining 2022-yil 19-avgustdagi 463-son qaroriga ILOVA
Oʻzbekiston Respublikasi Hukumatining ayrim qarorlariga kiritilayotgan oʻzgartirishlar
1. Vazirlar Mahkamasining 2008-yil 7-avgustdagi 173-son qarori bilan tasdiqlangan Ayrim fanlar chuqur oʻrganiladigan davlat umumtaʼlim muassasalarining ixtisoslashtirilgan sinflari, davlat ixtisoslashtirilgan umumtaʼlim muassasalari toʻgʻrisidagi nizomda :
a) II bob oʻz kuchini yoʻqotgan deb hisoblansin;
b) 22-banddagi ikkinchi xatboshi chiqarib tashlansin;
v) 28 , 33 va 34-bandlar oʻz kuchini yoʻqotgan deb hisoblansin.
3. Vazirlar Mahkamasining 2020-yil 18-apreldagi 240-son qarori bilan tasdiqlangan Oʻzbekiston Respublikasi Vazirlar Mahkamasi huzuridagi Prezident, ijod va ixtisoslashtirilgan maktablarni rivojlantirish agentligi toʻgʻrisidagi nizomning 8-bandi quyidagi tahrirda bayon etilsin:
“8. Agentlikning tuzilmasi quyidagilardan iborat:
Agentlikning markaziy apparati;
Qoraqalpogʻiston Respublikasi va viloyatlar hududiy boʻlimlari;
Prezident maktablari;
Abdulla Oripov nomidagi ijod maktabi;
Erkin Vohidov nomidagi ijod maktabi;
Muhammad Rizo Erniyozbek oʻgʻli Ogahiy nomidagi ijod maktabi;
Isʼhoqxon Ibrat nomidagi ijod maktabi;
Halima Xudoyberdiyeva nomidagi ijod maktabi;
Abdulla Qodiriy nomidagi ijod maktabi;
Muhammad Yusuf nomidagi ijod maktabi;
Hamid Olimjon va Zulfiya nomidagi ijod maktabi;
Ibroyim Yusupov nomidagi ijod maktabi;
Muhammad al-Xorazmiy nomidagi ixtisoslashtirilgan maktab;
Mirzo Ulugʻbek nomidagi ixtisoslashtirilgan maktab;
Abu Ali ibn Sino nomidagi ixtisoslashtirilgan maktab;
Qoraqalpogʻiston Respublikasi, viloyatlar, Toshkent shahri hamda tuman (shahar)lardagi ixtisoslashtirilgan maktab-internatlar va ixtisoslashtirilgan maktablar;
“Yangi Oʻzbekiston” universiteti;
Pedagogik mahorat va xalqaro baholash ilmiy-amaliy markazi;
“Renessans” bolalar sogʻlomlashtirish oromgohi”.
4. Vazirlar Mahkamasining 2021-yil 14-apreldagi 218-son qarori bilan tasdiqlangan Oʻzbekiston Respublikasi Vazirlar Mahkamasi huzuridagi Prezident, ijod va ixtisoslashtirilgan maktablarni rivojlantirish agentligi tizimidagi maktablarda sogʻlom ovqatlantirishni autsorsing usulida tashkil etish tartibi toʻgʻrisidagi nizomning 13-bandi quyidagi tahrirda bayon etilsin:
“13. Qoraqalpogʻiston Respublikasi va viloyatlardagi maktablar uchun Qoraqalpogʻiston Respublikasi va viloyatlar hududiy boʻlimlari boshliqlari komissiya raisi hisoblanadi hamda komissiya tarkibini har yil uchun alohida tasdiqlaydi.
Toshkent shahridagi maktablar uchun Agentlik direktori oʻrinbosari komissiya raisi hisoblanadi va komissiya tarkibini har yil uchun alohida tasdiqlaydi.
Komissiya tarkibi toq sonli aʼzolardan iborat boʻlib, Sogʻliqni saqlash vazirligi, Xalq taʼlimi vazirligi hamda Sanitariya-epidemiologik osoyishtalik va jamoat salomatligi xizmati, hududlarda tegishlicha ularning hududiy boshqarmalarining 2 nafar xodimlari hamda Agentlik markaziy apparatining 1 nafar xodimidan tashkil topadi”.
5. Vazirlar Mahkamasining “Prezident taʼlim muassasalari agentligi huzuridagi Pedagogik mahorat va xalqaro baholash markazi faoliyatini tashkil etish toʻgʻrisida” 2021-yil 7-dekabrdagi 741-son qarorida :
a) qaror nomi quyidagi tahrirda bayon etilsin:
“Prezident taʼlim muassasalari agentligi huzuridagi Pedagogik mahorat va xalqaro baholash ilmiy-amaliy markazi faoliyatini tashkil etish toʻgʻrisida”;
b) 1-band quyidagi tahrirda bayon etilsin:
“1. Quyidagilar:
Oʻzbekiston Respublikasi Prezidentining “Prezident, ijod va ixtisoslashtirilgan maktablar faoliyatini yanada takomillashtirish boʻyicha qoʻshimcha chora-tadbirlar toʻgʻrisida” 2021-yil 19-iyuldagi PQ-5188-son qarorining 11-bandiga muvofiq Prezident taʼlim muassasalari agentligi (keyingi oʻrinlarda — Agentlik) huzurida yuridik shaxs maqomidagi Pedagogik mahorat va xalqaro baholash markazi tashkil etilganligi;
Oʻzbekiston Respublikasi Prezidentining “Prezident taʼlim muassasalari agentligi tizimida ixtisoslashtirilgan maktablar tarmogʻini kengaytirish toʻgʻrisida” 2022-yil 14-apreldagi PF-106-son Farmoniga muvofiq Agentlik huzuridagi Pedagogik mahorat va xalqaro baholash markazi Pedagogik mahorat va xalqaro baholash ilmiy-amaliy markazi (keyingi oʻrinlarda — Markaz) etib qayta nomlanganligi, quyidagilar uning asosiy vazifalari etib belgilanganligi hamda tuzilmasi tasdiqlanganligi maʼlumot uchun qabul qilinsin:
Agentlik tizimidagi taʼlim muassasalari uchun davlat taʼlim standarti, oʻquv rejalari, taʼlim dasturlari va darslik majmualarini ishlab chiqish hamda xarid qilish;
Agentlik tizimidagi taʼlim muassasalari bitiruvchilarini yakuniy davlat attestatsiyasidan oʻtkazish;
taʼlim sohasidagi ilgʻor tajribalarni oʻrganish va mamlakatimizda joriy etish boʻyicha tavsiyalar ishlab chiqish, oʻqituvchilarning bilim va koʻnikmalarini baholash va sertifikatlashni xorijiy mamlakatlarning yetakchi ilmiy-tadqiqot muassasalari bilan hamkorlikda amalga oshirish;
rahbar va pedagog kadrlarni uzluksiz kasbiy rivojlantirish, ularning malakasini oshirishga qoʻyiladigan davlat taʼlim talablarini ishlab chiqish hamda xalqaro tashkilotlar bilan hamkorlikda malaka oshirish kurslarini tashkil etish;
Agentlik tizimidagi taʼlim muassasalarini ilmiy-metodik jihatdan taʼminlash, fundamental, amaliy va innovatsion tadqiqotlar oʻtkazish, tadqiqot natijalarini amaliyotga keng joriy etish.”;
v) 2-band oʻz kuchini yoʻqotgan deb hisoblansin;
g) 3 va 4-bandlar quyidagi tahrirda bayon etilsin:
“3. Belgilansinki:
Markaz davlat muassasasi hisoblanadi;
Markaz Moliya vazirligi Gʻaznachiligida shaxsiy gʻazna hisobvaragʻiga ega boʻladi va uning faoliyati Davlat budjeti mablagʻlari, budjetdan tashqari mablagʻlar hamda qonunchilik hujjatlarida taqiqlanmagan boshqa manbalar hisobidan moliyalashtiriladi;
Markazning ustav fondi miqdori Agentlik tomonidan belgilanadi hamda Agentlik huzuridagi Iqtidorli yoshlarni qoʻllab-quvvatlash jamgʻarmasi mablagʻlari hisobidan shakllantiriladi;
Markazning maʼmuriy-boshqaruv xodimlari, professor-oʻqituvchilari hamda metodistlariga Davlat test markazining tegishli lavozimlari uchun belgilangan mehnatga haq toʻlash va moddiy ragʻbatlantirish shartlari tatbiq etiladi.
Markaz direktori Agentlik tomonidan lavozimga tayinlanadi va lavozimdan ozod etiladi.
4. Quyidagilar Markaz faoliyatini moliyalashtirish manbalari etib belgilansin:
Davlat budjeti mablagʻlari;
shartnoma asosida xizmatlar koʻrsatishdan, shu jumladan, taʼlim xizmatlaridan olinadigan daromadlar;
Agentlik huzuridagi Iqtidorli yoshlarni qoʻllab-quvvatlash jamgʻarmasi mablagʻlari;
jismoniy va yuridik shaxslarning homiylik xayriyalari;
xalqaro moliya tashkilotlari va xorijiy davlatlarning grantlari va texnik koʻmaklashish mablagʻlari;
qonunchilik hujjatlari bilan taqiqlanmagan boshqa manbalar”;
d) 5-bandda :
birinchi xatboshi chiqarib tashlansin;
ikkinchi xatboshi birinchi xatboshi deb hisoblansin;
e) ilova oʻz kuchini yoʻqotgan deb hisoblansin.
Oʻzbekiston Respublikasining Bosh vaziri A. ARIPOV
Toshkent sh.,
2022-yil 19-avgust,
463-son