📅 2022-yil 27-avgust · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2022 йил 27 август · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 27 августа 2022 г. · Постановления Кабинета Министров
Официальный текст. Официальный документ. Редакционные примечания не включены.
📅 27 August 2022 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
Тадбиркорлик фаолияти соҳасидаги рухсат бериш тартиб-таомилларини соддалаштириш, шунингдек, бизнес юритиш шарт-шароитлари яхшиланиши муносабати билан Ўзбекистон Республикаси Ҳукуматининг айрим қарорларига ўзгартиришлар киритиш тўғрисида
Мамлакатимизда тадбиркорлик соҳасини давлат томонидан тартибга солишда ортиқча бюрократик жараёнларни тубдан қисқартириш, рақамли иқтисодиётни фаол ривожлантириш ҳамда миллий иқтисодиёт тармоқларининг рақобатбардошлигини ошириш борасида тизимли чора-тадбирлар амалга оширилмоқда.
Шу билан бирга, Ўзбекистон Республикаси ҳудудида фаолият кўрсатаётган мобил алоқа операторлари томонидан кўрсатилаётган хизматларнинг қамраб олиш даражаси ҳамда хизмат кўрсатиш сифатининг пастлиги, шунингдек, хизмат кўрсатиш жараёнларини ташкил этишда рухсат бериш жараёнида ортиқча чекловларнинг мавжудлиги долзарб муаммо бўлиб қолмоқда.
Ўзбекистон Республикаси ҳудудида фаолият кўрсатаётган мобил алоқа операторлари томонидан сифатли хизмат кўрсатиш учун барча зарур шарт-шароитлар яратиш, ҳудудларда уларнинг қамров даражасини ошириш ҳамда хизмат кўрсатиш жараёнларини ташкил этишда ортиқча ҳужжатларнинг талаб этилишини қисқартириш мақсадида, Ўзбекистон Республикаси Президентининг «Хизматлар соҳасини ривожлантиришга оид қўшимча чора-тадбирлар тўғрисида» 2022 йил 27 январдаги ПҚ-104-сон қарорига мувофиқ, Вазирлар Маҳкамаси қарор қилади:
1. Ўзбекистон Республикаси Ҳукуматининг айрим қарорларига иловага мувофиқ радиочастота спектридан фойдаланувчиларга радиочастота органларининг тегишли рухсатномаларига асосан радиочастота спектридан биргаликда фойдаланиш ҳуқуқини берувчи ўзгартиришлар киритилсин.
2. Ўзбекистон Республикаси Ахборот технологиялари ва коммуникацияларини ривожлантириш вазирлиги манфаатдор вазирлик ва идоралар билан биргаликда ўзлари қабул қилган норматив-ҳуқуқий ҳужжатларни бир ой муддатда ушбу қарорга мувофиқлаштирсин.
3. Мазкур қарорнинг бажарилишини назорат қилиш Ўзбекистон Республикаси Ахборот технологиялари ва коммуникацияларини ривожлантириш вазири Ш.Х. Шерматов зиммасига юклансин.
Вазирлар Маҳкамасининг 2022 йил 27 августдаги 476-сон қарорига ИЛОВА
Ўзбекистон Республикаси Ҳукуматининг айрим қарорларига киритилаётган ўзгартиришлар
1. Вазирлар Маҳкамасининг 2001 йил 26 октябрдаги 429-сон қарори билан тасдиқланган Ўзбекистон Республикасида радиочастота спектридан фойдаланганлик учун ҳақ тўлаш тартиби тўғрисидаги низомнинг 3-банди қуйидаги таҳрирда баён этилсин:
«3. Радиочастота спектридан фойдаланувчиларга радиочастота органларининг тегишли рухсатномаларига асосан радиочастота спектридан биргаликда фойдаланиш ҳуқуқи берилади».
2. Вазирлар Маҳкамасининг 2020 йил 22 декабрдаги 801-сон қарори билан тасдиқланган Радиоэлектрон воситаларни сотиб олиш ва (ёки) ўрнатиш, хориждан олиб кириш, эксплуатация қилишга рухсат этиш ва улардан фойдаланиш тартиби тўғрисидаги низом 16-бандининг биринчи хатбошиси қуйидаги таҳрирда баён этилсин:
«16. Радиочастота спектридан фойдаланувчиларга радиочастота органларининг тегишли рухсатномаларига асосан РЭВни эксплуатация қилиш учун радиочастоталардан биргаликда фойдаланиш ҳуқуқи берилади».
Ўзбекистон Республикасининг Бош вазири А. АРИПОВ
Тошкент ш.,
2022 йил 27 август,
476-сон
Oʻzbekiston Respublikasi Vazirlar Mahkamasining
qarori
Tadbirkorlik faoliyati sohasidagi ruxsat berish tartib-taomillarini soddalashtirish, shuningdek, biznes yuritish shart-sharoitlari yaxshilanishi munosabati bilan Oʻzbekiston Respublikasi Hukumatining ayrim qarorlariga oʻzgartirishlar kiritish toʻgʻrisida
Mamlakatimizda tadbirkorlik sohasini davlat tomonidan tartibga solishda ortiqcha byurokratik jarayonlarni tubdan qisqartirish, raqamli iqtisodiyotni faol rivojlantirish hamda milliy iqtisodiyot tarmoqlarining raqobatbardoshligini oshirish borasida tizimli chora-tadbirlar amalga oshirilmoqda.
Shu bilan birga, Oʻzbekiston Respublikasi hududida faoliyat koʻrsatayotgan mobil aloqa operatorlari tomonidan koʻrsatilayotgan xizmatlarning qamrab olish darajasi hamda xizmat koʻrsatish sifatining pastligi, shuningdek, xizmat koʻrsatish jarayonlarini tashkil etishda ruxsat berish jarayonida ortiqcha cheklovlarning mavjudligi dolzarb muammo boʻlib qolmoqda.
Oʻzbekiston Respublikasi hududida faoliyat koʻrsatayotgan mobil aloqa operatorlari tomonidan sifatli xizmat koʻrsatish uchun barcha zarur shart-sharoitlar yaratish, hududlarda ularning qamrov darajasini oshirish hamda xizmat koʻrsatish jarayonlarini tashkil etishda ortiqcha hujjatlarning talab etilishini qisqartirish maqsadida, Oʻzbekiston Respublikasi Prezidentining “Xizmatlar sohasini rivojlantirishga oid qoʻshimcha chora-tadbirlar toʻgʻrisida” 2022-yil 27-yanvardagi PQ-104-son qaroriga muvofiq, Vazirlar Mahkamasi qaror qiladi:
1. Oʻzbekiston Respublikasi Hukumatining ayrim qarorlariga ilovaga muvofiq radiochastota spektridan foydalanuvchilarga radiochastota organlarining tegishli ruxsatnomalariga asosan radiochastota spektridan birgalikda foydalanish huquqini beruvchi oʻzgartirishlar kiritilsin.
2. Oʻzbekiston Respublikasi Axborot texnologiyalari va kommunikatsiyalarini rivojlantirish vazirligi manfaatdor vazirlik va idoralar bilan birgalikda oʻzlari qabul qilgan normativ-huquqiy hujjatlarni bir oy muddatda ushbu qarorga muvofiqlashtirsin.
3. Mazkur qarorning bajarilishini nazorat qilish Oʻzbekiston Respublikasi Axborot texnologiyalari va kommunikatsiyalarini rivojlantirish vaziri Sh.X. Shermatov zimmasiga yuklansin.
Vazirlar Mahkamasining 2022-yil 27-avgustdagi 476-son qaroriga ILOVA
Oʻzbekiston Respublikasi Hukumatining ayrim qarorlariga kiritilayotgan oʻzgartirishlar
1. Vazirlar Mahkamasining 2001-yil 26-oktabrdagi 429-son qarori bilan tasdiqlangan Oʻzbekiston Respublikasida radiochastota spektridan foydalanganlik uchun haq toʻlash tartibi toʻgʻrisidagi nizomning 3-bandi quyidagi tahrirda bayon etilsin:
“3. Radiochastota spektridan foydalanuvchilarga radiochastota organlarining tegishli ruxsatnomalariga asosan radiochastota spektridan birgalikda foydalanish huquqi beriladi”.
2. Vazirlar Mahkamasining 2020-yil 22-dekabrdagi 801-son qarori bilan tasdiqlangan Radioelektron vositalarni sotib olish va (yoki) oʻrnatish, xorijdan olib kirish, ekspluatatsiya qilishga ruxsat etish va ulardan foydalanish tartibi toʻgʻrisidagi nizom 16-bandining birinchi xatboshisi quyidagi tahrirda bayon etilsin:
“16. Radiochastota spektridan foydalanuvchilarga radiochastota organlarining tegishli ruxsatnomalariga asosan REVni ekspluatatsiya qilish uchun radiochastotalardan birgalikda foydalanish huquqi beriladi”.
Oʻzbekiston Respublikasining Bosh vaziri A. ARIPOV
Toshkent sh.,
2022-yil 27-avgust,
476-son