📅 2022-yil 31-avgust · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2022 йил 31 август · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 31 августа 2022 г. · Постановления Кабинета Министров
Официальный текст. Официальный документ. Редакционные примечания не включены.
📅 31 August 2022 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
НИЗОМ
СХЕМАСИ
Ўзбекистон Республикаси бўйлаб амалга оширилган ички саёҳатлар харажатларининг бир қисмини қайтариб бериш тизимини жорий этишга оид чора-тадбирлар тўғрисида
Ўзбекистон Республикаси Президентининг «Ички туризм хизматларини диверсификация қилишга оид қўшимча чора-тадбирлар тўғрисида» 2022 йил 30 апрелдаги ПҚ-232-сон қарори ижросини таъминлаш, шунингдек, фуқароларнинг мамлакатимиз ҳудуди бўйлаб саёҳат қилишларини қўллаб-қувватлаш мақсадида Вазирлар Маҳкамаси қарор қилади:
1. Ўзбекистон Республикаси Президентининг «Ички туризм хизматларини диверсификация қилишга оид қўшимча чора-тадбирлар тўғрисида» 2022 йил 30 апрелдаги ПҚ-232-сон қарорига мувофиқ:
2022 йил 1 сентябрдан бошлаб Ўзбекистон Республикаси фуқаролари учун республика ҳудудларида «Ўзбекистон бўйлаб саёҳат қил!» дастури доирасида ички саёҳатларни амалга ошириш харажатларининг бир қисмини қайтариш (кейинги ўринларда — саёҳат харажатларини қайтариш) тартибининг жорий этилиши белгиланганлиги;
саёҳат харажатларини қайтаришни молиялаштириш учун республика бюджетининг қўшимча маблағлари ҳисобидан 30 млрд сўм маблағ Туризм ва маданий мерос вазирлиги ҳузуридаги бюджетдан ташқари Туризмни қўллаб-қувватлаш жамғармасига (кейинги ўринларда — Жамғарма) ажратилганлиги маълумот учун қабул қилинсин.
2. Қуйидагиларни назарда тутувчи Ўзбекистон Республикаси бўйлаб амалга оширилган ички саёҳатлар харажатларининг бир қисмини қайтариш тартиби тўғрисида низом иловага мувофиқ тасдиқлансин:
саёҳатлар харажатларини қайтаришни, шунингдек, саёҳат қилувчиларга тақдим қилинадиган чегирмалар ва тайёр туристик пакетларни мустақил шакллантиришни назарда тутувчи электрон платформада (кейинги ўринларда — Платформа) рўйхатдан ўтиш ҳамда ундан фойдаланиш тартиби;
саёҳатлар харажатлари қайтариладиган туризм хизматларининг турлари;
саёҳатлар харажатларини қайтариш миқдорлари, муддати ва қайтариш тартиби;
Ўзбекистон Республикаси Давлат солиқ қўмитаси ва Туризм ва маданий мерос вазирлиги томонидан Платформа орқали саёҳатлар харажатларини қайтариш талаблари бажарилишининг мониторинг қилиниши.
3. Белгилансинки:
а) 2023 йилда Ўзбекистон Республикаси Давлат бюджети маблағлари ҳисобидан ва 2024 йилдан бошлаб ҳар йили саёҳат харажатларини қайтаришнинг навбатдаги босқичларини молиялаштириш учун Туризмни қўллаб-қувватлаш жамғармаси ҳисобидан маблағлар ажратилиши назарда тутилади;
б) Ўзбекистон Республикаси Давлат солиқ қўмитаси ва Туризм ва маданий мерос вазирлиги Платформани узлуксиз фаолият олиб боришини таъминлаш, саёҳат харажатларини Платформага киритиш шартларини бузган фуқароларнинг Платформадан фойдаланишини чеклаш, шунингдек, улар тўғрисидаги маълумотларни таҳлил қилиш чораларини кўради;
в) саёҳат харажатларининг бир қисми улар мазкур қарорда белгиланган тартибда расмийлаштирилган ойдан кейинги ойнинг йигирма бешинчи санасига қадар қайтарилади;
г) Платформага хизмат кўрсатиш, унинг фаолиятини такомиллаштириб бориш ва доимий равишда техник қўллаб-қувватлаш Жамғармага саёҳат харажатларини қайтариш учун ажратилган маблағлар ҳисобидан амалга оширилади.
4. Ўзбекистон Республикаси Давлат солиқ қўмитаси Транспорт вазирлиги ҳамда Туризм ва маданий мерос вазирлиги билан биргаликда:
«Uztrans» ягона интерактив ахборот тизими, бошқа йўловчи ташиш лицензиясига эга ташкилотларнинг электрон чипталарни харид қилиш порталлари, шунингдек, жойлаштириш воситаларида яшовчиларни электрон шаклда ҳисобга олишнинг автоматлаштирилган махсус электрон дастурини Платформа билан интеграция қилиш ва доимий равишда узлуксиз фаолият олиб боришини таъминлаш чораларини кўрсин;
харид қилинган барча авиа, темирйўл ва шаҳарлараро автобус чипталари ҳамда жойлаштириш воситаларига келган фуқаролар тўғрисидаги маълумотларни онлайн режимида олиш имкониятини яратсин.
5. Ўзбекистон Республикаси Туризм ва маданий мерос вазирлиги Давлат солиқ қўмитаси билан бирга:
2023 йил 1 февралга қадар саёҳат қилувчиларга харажатларининг бир қисмини қайтариш учун уларнинг асослилиги ҳамда ажратилган маблағлардан фойдаланилиши юзасидан 2022 йил якуни бўйича ҳисоботни Вазирлар Маҳкамасига киритсин;
Ўзбекистон Миллий ахборот агентлиги ва Ўзбекистон Миллий телерадиокомпаниясига ушбу қарорнинг мазмун-моҳиятини оммавий ахборот воситаларида кенг ёритиш тавсия этилсин.
6. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосари — туризм ва маданий мерос вазири А.А. Абдухакимов ва давлат солиқ қўмитаси раиси Ш.Д. Кудбиев зиммасига юклансин.
Вазирлар Маҳкамасининг 2022 йил 31 августдаги 484-сон қарорига ИЛОВА
Ўзбекистон Республикаси бўйлаб амалга оширилган ички саёҳатлар харажатларининг бир қисмини қайтариш тартиби тўғрисида
1-боб. Умумий қоидалар
1. Ушбу Низом Ўзбекистон Республикаси фуқаролари томонидан (кейинги ўринларда — турист) республика ҳудудлари бўйлаб ички саёҳатларни амалга ошириш харажатларининг бир қисмини қайтариш (кейинги ўринларда — саёҳат харажатларини қайтариш) тартибини белгилайди.
2. Ушбу Низомда қуйидаги тушунчалар қўлланилади:
жойлаштириш воситалари — меҳмонхоналар, туристик базалар ва мажмуалар, дам олиш уйлари ва зоналари, пансионатлар, кемпинглар, мотеллар, меҳмон уйлари, ўтов ва чодирли оромгоҳлар, санаторийлар ҳамда меҳмонхона хизматлари (жойлаштириш бўйича хизматлар) кўрсатиладиган бошқа объектлар, шунингдек, жойлаштириш воситаси сифатида тунаб қолиш учун жиҳозланган ер усти транспорти;
маданият ташкилотлари — моддий маданий мерос объектлари, музейлар, театрлар, кинотеатрлар, бадиий галереялар (кўргазмалар), кўргазма заллари ва цирклар;
QR-кодли чек — сотилган товарлар (бажарилган ишлар ва кўрсатилган хизматлар) учун ҳисоб-китобларни амалга оширишдаги фискал белгили чек;
Платформа — «Soliq» мобил иловасидаги саёҳат харажатларини қайтариш, шунингдек, «Ўзбекистон бўйлаб саёҳат қил!» дастури доирасида тақдим қилинадиган чегирмалар, тайёр туристик пакетларни мустақил шакллантиришни назарда тутувчи электрон тизим.
3. Туристларга саёҳат харажатларини бир қисмини қайтаришни молиялаштириш учун маблағлар Ўзбекистон Республикаси Давлат бюджетидан Туризм ва маданий мерос вазирлиги ҳузуридаги бюджетдан ташқари Туризмни қўллаб-қувватлаш жамғармасига ажратилади.
Туризм ва маданий мерос вазирлиги саёҳат харажатларини бир қисмини қайтариш учун ажратилган маблағларни Давлат солиқ қўмитасининг талабномасига асосан махсус очилган ҳисоб рақамига ўтказиб беради.
4. Давлат солиқ қўмитаси туристларга саёҳат харажатларини қайтаришни Платформа орқали ушбу Низомнинг 5 ва 6-бандлари талаблари асосида амалга оширади.
2-боб. Саёҳат харажатларини қайтариш шартлари ва миқдорлари
5. Саёҳат харажатларини қайтариш ҳар бир турист томонидан Ўзбекистон Республикаси бўйлаб ички саёҳатларни амалга ошириш давомида бир вақтнинг ўзида қуйидаги туризм хизматларидан фойдаланган тақдирда амалга оширилади:
авиа, темир йўл ва (ёки) автобус транспортидан фойдаланиш;
жойлаштириш воситалари хизматларидан фойдаланиш;
саёҳат давомида камида бир марта маданият ташкилотларига ташриф буюриш.
6. Саёҳат харажатларини қайтариш ҳар бир туристга қуйидаги миқдорларда амалга оширилади:
авиақатнов орқали бориб-келиш чиптаси нархининг 15 фоизи, лекин 150 минг сўмдан ошмаган миқдорда;
темирйўлда ёки автобусда бориб-келиш чиптаси нархининг 15 фоизи, лекин 80 минг сўмдан ошмаган миқдорда;
жойлаштириш воситасида тунаб қолиш харажатининг 15 фоизи, лекин 80 минг сўмдан ошмаган миқдорда;
маданият ташкилотларига ҳар бир ташриф чиптаси нархининг 50 фоизи, лекин 20 минг сўмдан ошмаган миқдорда.
7. Саёҳат харажатларини қайтариш маҳсулотларнинг (товар ва хизматларнинг) ягона электрон миллий каталогида мавжуд ҳамда Ўзбекистон Республикаси Туризм ва маданий мерос вазирлиги томонидан тасдиқланган рўйхатдаги хизматлар учун амалга оширилади.
8. Саёҳат харажатлари туристларга бир ой давомида бир маротаба амалга оширилган саёҳатлар учун қайтарилади.
9. Кейинги саёҳатларни рўйхатга олиш учун охирги ҳисобга олинган чекдан бир ой ўтган бўлиши керак.
3-боб. Платформадан фойдаланиш ва саёҳат харажатларини қайтариб олиш тартиби
10. Туристларга саёҳат харажатларини қайтариш мазкур Низомга иловада келтирилган схемага мувофиқ амалга оширилади.
11. Туристлар саёҳат харажатларини қайтариш учун Платформани «Google PlayMarket» ёки «ApStore» интернет дўконидан мобил алоқа воситасига юклаб олади.
Платформани мобил алоқа воситасига юклаб олгандан сўнг, Платформада:
«Саёҳат учун кэшбек» тугмасини босиш орқали иловага кирилади;
саёҳат йўналиши, бориш ва келиш саналарини киритиш орқали саёҳат бошланганлиги тасдиқланади.
12. Туристлар Платформада қуйидагиларни:
бориш ва (ёки) келиш учун харид қилинган авиа, темирйўл ва (ёки) шаҳарлараро автобус чипталари учун берилган QR-кодли чекларни;
маданият ташкилотларига кириш чиптаси учун берилган QR-кодли чекларни;
жойлаштириш воситалари хизматларидан фойдаланганлиги учун тўловига берилган QR-кодли чекларни рўйхатдан ўтказади.
13. Платформада рўйхатдан ўтказилган QR-кодли чеклар бир вақтда Ўзбекистон Республикаси Президентининг «Чакана савдо ва хизмат кўрсатиш соҳасида назорат-касса техникасидан фойдаланишни такомиллаштиришга доир қўшимча чора-тадбирлар тўғрисида» 2021 йил 4 октябрдаги ПҚ-5252-сон қарорига мувофиқ 1 фоиз миқдорида «кешбек» ҳисобланишига ҳамда мазкур Низомнинг 5-бандига мувофиқ саёҳат харажатлари қайтарилишига асос ҳисобланади.
14. Саёҳат муддати тугаши билан Платформада рўйхатга олинган QR-кодли чеклар автоматик тарзда ҳисобланади. Шунингдек, турист махсус тугмани босиш орқали ўзи белгилаган муддатидан аввал саёҳатни тугатиш имкониятига эга.
4-боб. Якунловчи қоидалар
15. Давлат солиқ қўмитаси саёҳат якуни билан кейинги ойнинг 5-санасига қадар рўйхатдан ўтказилган чекларни текшириб, улардаги суммалар ҳисоб-китобини амалга оширади.
16. Саёҳат харажатларини қайтариш шартлари тўғри бажарилганлиги натижаси бўйича йиғилган маблағлар Платформа орқали амалга оширилган саёҳатлар учун унинг якуни билан кейинги ойнинг 25-санасига қадар туристларнинг шахсий банк карталарига Ўзбекистон Республикаси миллий валютасида қайтарилади. Жисмоний шахс ўз ихтиёрига кўра маблағларини дарахт кўчатларини экишга йўналтириш мақсадида Экология ва иқлим ўзгариши миллий қўмитаси ҳузуридаги Яшил хайрия жамғармасига ўтказиши мумкин.
Бунда, Давлат солиқ қўмитаси оператори ҳисобига тизимнинг узлуксиз ишлашини таъминлаш, банк комиссияси харажатларини қоплаш ва доимий равишда техник қўллаб-қувватлаш функцияларини бажарганлик учун ҳисобланган саёҳат харажатларини қайтариш суммасининг 1,5 фоизига тенг миқдорда комиссия ушлаб қолинади.
17. Ушбу Низомни қўллашда юзага келадиган низолар қонунчиликда белгиланган тартибда ҳал этилади.
18. Ўзбекистон Республикаси Туризм ва маданий мерос вазирлиги тегишли ахборот тизимлари орқали чегирмалар олиш ва саёҳат харажатларини қайтариб олиш талаблари бажарилишини доимий назорат ва мониторинг қилади.
19. Белгиланган тартибни бузган (бузишда гумон қилинган) туристларнинг Платформадан фойдаланишига чеклов (вақтинча чеклов) ўрнатилади.
20. Мазкур Низом талабларининг бузилишида айбдор бўлган шахслар қонунчиликка мувофиқ жавоб берадилар.
Ўзбекистон Республикаси бўйлаб амалга оширилган ички саёҳатлар харажатларининг бир қисмини қайтариш тартиби тўғрисидаги низомга ИЛОВА
Ўзбекистон Республикаси бўйлаб амалга оширилган ички саёҳатлар харажатларининг бир қисмини қайтариш
Босқичлар Субъектлар Чора-тадбирлар Муддатлар 1-босқич Турист «Soliq» платформасини «Google PlayMarket» ёки «ApStore» интернет дўконидан мобил телефонига юклаб олади. Саёҳат бошланишидан олдин 2-босқич Турист «Саёҳат учун кэшбек» тугмасини босиш орқали иловага кирилади, саёҳат йўналиши, бориш ва келиш саналарини киритиш орқали саёҳат бошланганлигини тасдиқлайди. Саёҳат бошланганда 3-босқич Турист Бориш ва (ёки) келиш учун харид қилинган авиа, темирйўл ва (ёки) шаҳарлараро автобус чипталари учун, маданият ташкилотларига кириш чипталари учун ҳамда жойлаштириш воситалари хизматларидан фойдаланганлиги учун тўловига берилган QR-кодли чекларни Платформада рўйхатдан ўтказади. Саёҳат давомида, унинг якунига қадар 4-босқич Турист Саёҳат муддатини тугатиши билан Платформада рўйхатга олинган QR-кодли чеклар автоматик тарзда ҳисобланади. Шунингдек, турист махсус тугмани босиш орқали ўзи белгилаган муддатидан аввал саёҳатни тугатиш имкониятига эга. Саёҳатни якунлаш 5-босқич Давлат солиқ қўмитаси Саёҳат якуни билан рўйхатдан ўтказилган чекларни текшириб, улардаги суммалар ҳисоб-китобини амалга оширади. Саёҳат якуни билан кейинги ойнинг 5-санасига қадар 6-босқич Давлат солиқ қўмитаси Саёҳат харажатларини қайтариш шартлари тўғри бажарилганлиги натижаси бўйича йиғилган маблағларни Платформа орқали амалга оширилган саёҳатлар учун унинг якуни билан ушбу Низомнинг 6-банди талаблари асосида туристларнинг шахсий банк карталарига Ўзбекистон Республикаси миллий валютасида ўтказиб беради. Бунда жисмоний шахснинг ихтиёрига кўра маблағларини дарахт кўчатларини экишга йўналтириш мақсадида Экология ва иқлим ўзгариши миллий қўмитаси ҳузуридаги Яшил хайрия жамғармасига ўтказиши мумкин. Саёҳат якуни билан кейинги ойнинг 25-санасига қадар
Ўзбекистон Республикасининг Бош вазири А. АРИПОВ
Тошкент ш.,
2022 йил 31 август,
484-сон
Oʻzbekiston Respublikasi Vazirlar Mahkamasining
qarori
NIZOM
SXEMASI
Oʻzbekiston Respublikasi boʻylab amalga oshirilgan ichki sayohatlar xarajatlarining bir qismini qaytarib berish tizimini joriy etishga oid chora-tadbirlar toʻgʻrisida
Oʻzbekiston Respublikasi Prezidentining “Ichki turizm xizmatlarini diversifikatsiya qilishga oid qoʻshimcha chora-tadbirlar toʻgʻrisida” 2022-yil 30-apreldagi PQ-232-son qarori ijrosini taʼminlash, shuningdek, fuqarolarning mamlakatimiz hududi boʻylab sayohat qilishlarini qoʻllab-quvvatlash maqsadida Vazirlar Mahkamasi qaror qiladi:
1. Oʻzbekiston Respublikasi Prezidentining “Ichki turizm xizmatlarini diversifikatsiya qilishga oid qoʻshimcha chora-tadbirlar toʻgʻrisida” 2022-yil 30-apreldagi PQ-232-son qaroriga muvofiq:
2022-yil 1-sentabrdan boshlab Oʻzbekiston Respublikasi fuqarolari uchun respublika hududlarida “Oʻzbekiston boʻylab sayohat qil!” dasturi doirasida ichki sayohatlarni amalga oshirish xarajatlarining bir qismini qaytarish (keyingi oʻrinlarda — sayohat xarajatlarini qaytarish) tartibining joriy etilishi belgilanganligi;
sayohat xarajatlarini qaytarishni moliyalashtirish uchun respublika budjetining qoʻshimcha mablagʻlari hisobidan 30 mlrd soʻm mablagʻ Turizm va madaniy meros vazirligi huzuridagi budjetdan tashqari Turizmni qoʻllab-quvvatlash jamgʻarmasiga (keyingi oʻrinlarda — Jamgʻarma) ajratilganligi maʼlumot uchun qabul qilinsin.
2. Quyidagilarni nazarda tutuvchi Oʻzbekiston Respublikasi boʻylab amalga oshirilgan ichki sayohatlar xarajatlarining bir qismini qaytarish tartibi toʻgʻrisida nizom ilovaga muvofiq tasdiqlansin:
sayohatlar xarajatlarini qaytarishni, shuningdek, sayohat qiluvchilarga taqdim qilinadigan chegirmalar va tayyor turistik paketlarni mustaqil shakllantirishni nazarda tutuvchi elektron platformada (keyingi oʻrinlarda — Platforma) roʻyxatdan oʻtish hamda undan foydalanish tartibi;
sayohatlar xarajatlari qaytariladigan turizm xizmatlarining turlari;
sayohatlar xarajatlarini qaytarish miqdorlari, muddati va qaytarish tartibi;
Oʻzbekiston Respublikasi Davlat soliq qoʻmitasi va Turizm va madaniy meros vazirligi tomonidan Platforma orqali sayohatlar xarajatlarini qaytarish talablari bajarilishining monitoring qilinishi.
3. Belgilansinki:
a) 2023-yilda Oʻzbekiston Respublikasi Davlat budjeti mablagʻlari hisobidan va 2024-yildan boshlab har yili sayohat xarajatlarini qaytarishning navbatdagi bosqichlarini moliyalashtirish uchun Turizmni qoʻllab-quvvatlash jamgʻarmasi hisobidan mablagʻlar ajratilishi nazarda tutiladi;
b) Oʻzbekiston Respublikasi Davlat soliq qoʻmitasi va Turizm va madaniy meros vazirligi Platformani uzluksiz faoliyat olib borishini taʼminlash, sayohat xarajatlarini Platformaga kiritish shartlarini buzgan fuqarolarning Platformadan foydalanishini cheklash, shuningdek, ular toʻgʻrisidagi maʼlumotlarni tahlil qilish choralarini koʻradi;
v) sayohat xarajatlarining bir qismi ular mazkur qarorda belgilangan tartibda rasmiylashtirilgan oydan keyingi oyning yigirma beshinchi sanasiga qadar qaytariladi;
g) Platformaga xizmat koʻrsatish, uning faoliyatini takomillashtirib borish va doimiy ravishda texnik qoʻllab-quvvatlash Jamgʻarmaga sayohat xarajatlarini qaytarish uchun ajratilgan mablagʻlar hisobidan amalga oshiriladi.
4. Oʻzbekiston Respublikasi Davlat soliq qoʻmitasi Transport vazirligi hamda Turizm va madaniy meros vazirligi bilan birgalikda:
“Uztrans” yagona interaktiv axborot tizimi, boshqa yoʻlovchi tashish litsenziyasiga ega tashkilotlarning elektron chiptalarni xarid qilish portallari, shuningdek, joylashtirish vositalarida yashovchilarni elektron shaklda hisobga olishning avtomatlashtirilgan maxsus elektron dasturini Platforma bilan integratsiya qilish va doimiy ravishda uzluksiz faoliyat olib borishini taʼminlash choralarini koʻrsin;
xarid qilingan barcha avia, temiryoʻl va shaharlararo avtobus chiptalari hamda joylashtirish vositalariga kelgan fuqarolar toʻgʻrisidagi maʼlumotlarni onlayn rejimida olish imkoniyatini yaratsin.
5. Oʻzbekiston Respublikasi Turizm va madaniy meros vazirligi Davlat soliq qoʻmitasi bilan birga:
2023-yil 1-fevralga qadar sayohat qiluvchilarga xarajatlarining bir qismini qaytarish uchun ularning asosliligi hamda ajratilgan mablagʻlardan foydalanilishi yuzasidan 2022-yil yakuni boʻyicha hisobotni Vazirlar Mahkamasiga kiritsin;
Oʻzbekiston Milliy axborot agentligi va Oʻzbekiston Milliy teleradiokompaniyasiga ushbu qarorning mazmun-mohiyatini ommaviy axborot vositalarida keng yoritish tavsiya etilsin.
6. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari — turizm va madaniy meros vaziri A.A. Abduxakimov va davlat soliq qoʻmitasi raisi Sh.D. Kudbiyev zimmasiga yuklansin.
Vazirlar Mahkamasining 2022-yil 31-avgustdagi 484-son qaroriga ILOVA
Oʻzbekiston Respublikasi boʻylab amalga oshirilgan ichki sayohatlar xarajatlarining bir qismini qaytarish tartibi toʻgʻrisida
1-bob. Umumiy qoidalar
1. Ushbu Nizom Oʻzbekiston Respublikasi fuqarolari tomonidan (keyingi oʻrinlarda — turist) respublika hududlari boʻylab ichki sayohatlarni amalga oshirish xarajatlarining bir qismini qaytarish (keyingi oʻrinlarda — sayohat xarajatlarini qaytarish) tartibini belgilaydi.
2. Ushbu Nizomda quyidagi tushunchalar qoʻllaniladi:
joylashtirish vositalari — mehmonxonalar, turistik bazalar va majmualar, dam olish uylari va zonalari, pansionatlar, kempinglar, motellar, mehmon uylari, oʻtov va chodirli oromgohlar, sanatoriylar hamda mehmonxona xizmatlari (joylashtirish boʻyicha xizmatlar) koʻrsatiladigan boshqa obyektlar, shuningdek, joylashtirish vositasi sifatida tunab qolish uchun jihozlangan yer usti transporti;
madaniyat tashkilotlari — moddiy madaniy meros obyektlari, muzeylar, teatrlar, kinoteatrlar, badiiy galereyalar (koʻrgazmalar), koʻrgazma zallari va sirklar;
QR-kodli chek — sotilgan tovarlar (bajarilgan ishlar va koʻrsatilgan xizmatlar) uchun hisob-kitoblarni amalga oshirishdagi fiskal belgili chek;
Platforma — “Soliq” mobil ilovasidagi sayohat xarajatlarini qaytarish, shuningdek, “Oʻzbekiston boʻylab sayohat qil!” dasturi doirasida taqdim qilinadigan chegirmalar, tayyor turistik paketlarni mustaqil shakllantirishni nazarda tutuvchi elektron tizim.
3. Turistlarga sayohat xarajatlarini bir qismini qaytarishni moliyalashtirish uchun mablagʻlar Oʻzbekiston Respublikasi Davlat budjetidan Turizm va madaniy meros vazirligi huzuridagi budjetdan tashqari Turizmni qoʻllab-quvvatlash jamgʻarmasiga ajratiladi.
Turizm va madaniy meros vazirligi sayohat xarajatlarini bir qismini qaytarish uchun ajratilgan mablagʻlarni Davlat soliq qoʻmitasining talabnomasiga asosan maxsus ochilgan hisob raqamiga oʻtkazib beradi.
4. Davlat soliq qoʻmitasi turistlarga sayohat xarajatlarini qaytarishni Platforma orqali ushbu Nizomning 5 va 6-bandlari talablari asosida amalga oshiradi.
2-bob. Sayohat xarajatlarini qaytarish shartlari va miqdorlari
5. Sayohat xarajatlarini qaytarish har bir turist tomonidan Oʻzbekiston Respublikasi boʻylab ichki sayohatlarni amalga oshirish davomida bir vaqtning oʻzida quyidagi turizm xizmatlaridan foydalangan taqdirda amalga oshiriladi:
avia, temir yoʻl va (yoki) avtobus transportidan foydalanish;
joylashtirish vositalari xizmatlaridan foydalanish;
sayohat davomida kamida bir marta madaniyat tashkilotlariga tashrif buyurish.
6. Sayohat xarajatlarini qaytarish har bir turistga quyidagi miqdorlarda amalga oshiriladi:
aviaqatnov orqali borib-kelish chiptasi narxining 15 foizi, lekin 150 ming soʻmdan oshmagan miqdorda;
temiryoʻlda yoki avtobusda borib-kelish chiptasi narxining 15 foizi, lekin 80 ming soʻmdan oshmagan miqdorda;
joylashtirish vositasida tunab qolish xarajatining 15 foizi, lekin 80 ming soʻmdan oshmagan miqdorda;
madaniyat tashkilotlariga har bir tashrif chiptasi narxining 50 foizi, lekin 20 ming soʻmdan oshmagan miqdorda.
7. Sayohat xarajatlarini qaytarish mahsulotlarning (tovar va xizmatlarning) yagona elektron milliy katalogida mavjud hamda Oʻzbekiston Respublikasi Turizm va madaniy meros vazirligi tomonidan tasdiqlangan roʻyxatdagi xizmatlar uchun amalga oshiriladi.
8. Sayohat xarajatlari turistlarga bir oy davomida bir marotaba amalga oshirilgan sayohatlar uchun qaytariladi.
9. Keyingi sayohatlarni roʻyxatga olish uchun oxirgi hisobga olingan chekdan bir oy oʻtgan boʻlishi kerak.
3-bob. Platformadan foydalanish va sayohat xarajatlarini qaytarib olish tartibi
10. Turistlarga sayohat xarajatlarini qaytarish mazkur Nizomga ilovada keltirilgan sxemaga muvofiq amalga oshiriladi.
11. Turistlar sayohat xarajatlarini qaytarish uchun Platformani “Google PlayMarket” yoki “ApStore” internet doʻkonidan mobil aloqa vositasiga yuklab oladi.
Platformani mobil aloqa vositasiga yuklab olgandan soʻng, Platformada:
“Sayohat uchun keshbek” tugmasini bosish orqali ilovaga kiriladi;
sayohat yoʻnalishi, borish va kelish sanalarini kiritish orqali sayohat boshlanganligi tasdiqlanadi.
12. Turistlar Platformada quyidagilarni:
borish va (yoki) kelish uchun xarid qilingan avia, temiryoʻl va (yoki) shaharlararo avtobus chiptalari uchun berilgan QR-kodli cheklarni;
madaniyat tashkilotlariga kirish chiptasi uchun berilgan QR-kodli cheklarni;
joylashtirish vositalari xizmatlaridan foydalanganligi uchun toʻloviga berilgan QR-kodli cheklarni roʻyxatdan oʻtkazadi.
13. Platformada roʻyxatdan oʻtkazilgan QR-kodli cheklar bir vaqtda Oʻzbekiston Respublikasi Prezidentining “Chakana savdo va xizmat koʻrsatish sohasida nazorat-kassa texnikasidan foydalanishni takomillashtirishga doir qoʻshimcha chora-tadbirlar toʻgʻrisida” 2021-yil 4-oktabrdagi PQ-5252-son qaroriga muvofiq 1 foiz miqdorida “keshbek” hisoblanishiga hamda mazkur Nizomning 5-bandiga muvofiq sayohat xarajatlari qaytarilishiga asos hisoblanadi.
14. Sayohat muddati tugashi bilan Platformada roʻyxatga olingan QR-kodli cheklar avtomatik tarzda hisoblanadi. Shuningdek, turist maxsus tugmani bosish orqali oʻzi belgilagan muddatidan avval sayohatni tugatish imkoniyatiga ega.
4-bob. Yakunlovchi qoidalar
15. Davlat soliq qoʻmitasi sayohat yakuni bilan keyingi oyning 5-sanasiga qadar roʻyxatdan oʻtkazilgan cheklarni tekshirib, ulardagi summalar hisob-kitobini amalga oshiradi.
16. Sayohat xarajatlarini qaytarish shartlari toʻgʻri bajarilganligi natijasi boʻyicha yigʻilgan mablagʻlar Platforma orqali amalga oshirilgan sayohatlar uchun uning yakuni bilan keyingi oyning 25-sanasiga qadar turistlarning shaxsiy bank kartalariga Oʻzbekiston Respublikasi milliy valyutasida qaytariladi. Jismoniy shaxs oʻz ixtiyoriga koʻra mablagʻlarini daraxt koʻchatlarini ekishga yoʻnaltirish maqsadida Ekologiya va iqlim oʻzgarishi milliy qoʻmitasi huzuridagi Yashil xayriya jamgʻarmasiga oʻtkazishi mumkin.
Bunda, Davlat soliq qoʻmitasi operatori hisobiga tizimning uzluksiz ishlashini taʼminlash, bank komissiyasi xarajatlarini qoplash va doimiy ravishda texnik qoʻllab-quvvatlash funksiyalarini bajarganlik uchun hisoblangan sayohat xarajatlarini qaytarish summasining 1,5 foiziga teng miqdorda komissiya ushlab qolinadi.
17. Ushbu Nizomni qoʻllashda yuzaga keladigan nizolar qonunchilikda belgilangan tartibda hal etiladi.
18. Oʻzbekiston Respublikasi Turizm va madaniy meros vazirligi tegishli axborot tizimlari orqali chegirmalar olish va sayohat xarajatlarini qaytarib olish talablari bajarilishini doimiy nazorat va monitoring qiladi.
19. Belgilangan tartibni buzgan (buzishda gumon qilingan) turistlarning Platformadan foydalanishiga cheklov (vaqtincha cheklov) oʻrnatiladi.
20. Mazkur Nizom talablarining buzilishida aybdor boʻlgan shaxslar qonunchilikka muvofiq javob beradilar.
Oʻzbekiston Respublikasi boʻylab amalga oshirilgan ichki sayohatlar xarajatlarining bir qismini qaytarish tartibi toʻgʻrisidagi nizomga ILOVA
Oʻzbekiston Respublikasi boʻylab amalga oshirilgan ichki sayohatlar xarajatlarining bir qismini qaytarish
Bosqichlar Subyektlar Chora-tadbirlar Muddatlar 1-bosqich Turist “Soliq” platformasini “Google PlayMarket” yoki “ApStore” internet doʻkonidan mobil telefoniga yuklab oladi. Sayohat boshlanishidan oldin 2-bosqich Turist “Sayohat uchun keshbek” tugmasini bosish orqali ilovaga kiriladi, sayohat yoʻnalishi, borish va kelish sanalarini kiritish orqali sayohat boshlanganligini tasdiqlaydi. Sayohat boshlanganda 3-bosqich Turist Borish va (yoki) kelish uchun xarid qilingan avia, temiryoʻl va (yoki) shaharlararo avtobus chiptalari uchun, madaniyat tashkilotlariga kirish chiptalari uchun hamda joylashtirish vositalari xizmatlaridan foydalanganligi uchun toʻloviga berilgan QR-kodli cheklarni Platformada roʻyxatdan oʻtkazadi. Sayohat davomida, uning yakuniga qadar 4-bosqich Turist Sayohat muddatini tugatishi bilan Platformada roʻyxatga olingan QR-kodli cheklar avtomatik tarzda hisoblanadi. Shuningdek, turist maxsus tugmani bosish orqali oʻzi belgilagan muddatidan avval sayohatni tugatish imkoniyatiga ega. Sayohatni yakunlash 5-bosqich Davlat soliq qoʻmitasi Sayohat yakuni bilan roʻyxatdan oʻtkazilgan cheklarni tekshirib, ulardagi summalar hisob-kitobini amalga oshiradi. Sayohat yakuni bilan keyingi oyning 5-sanasiga qadar 6-bosqich Davlat soliq qoʻmitasi Sayohat xarajatlarini qaytarish shartlari toʻgʻri bajarilganligi natijasi boʻyicha yigʻilgan mablagʻlarni Platforma orqali amalga oshirilgan sayohatlar uchun uning yakuni bilan ushbu Nizomning 6-bandi talablari asosida turistlarning shaxsiy bank kartalariga Oʻzbekiston Respublikasi milliy valyutasida oʻtkazib beradi. Bunda jismoniy shaxsning ixtiyoriga koʻra mablagʻlarini daraxt koʻchatlarini ekishga yoʻnaltirish maqsadida Ekologiya va iqlim oʻzgarishi milliy qoʻmitasi huzuridagi Yashil xayriya jamgʻarmasiga oʻtkazishi mumkin. Sayohat yakuni bilan keyingi oyning 25-sanasiga qadar
Oʻzbekiston Respublikasining Bosh vaziri A. ARIPOV
Toshkent sh.,
2022-yil 31-avgust,
484-son