📅 2022-yil 20-sentabr · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2022 йил 20 сентябрь · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 20 сентября 2022 г. · Постановления Кабинета Министров
Официальный текст. Официальный документ. Редакционные примечания не включены.
📅 20 September 2022 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
Қашқадарё вилоятининг Шаҳрисабз туманида Тамшуш сув иншоотларидан фойдаланиш дирекциясини ташкил этиш тўғрисида
Қашқадарё вилояти Шаҳрисабз тумани тоғ олди ҳудудларида янги ўзлаштириладиган ерларда сув таъминотини яхшилаш, Тамшуш дарёсидан тортилган сув қувурлари, ирригация иншоотлари ва бошқа асосий воситалардан самарали фойдаланиш, шунингдек, янги ўзлаштириладиган ерларда картошка ва сабзавот экинлари ташкил этиш мақсадида Вазирлар Маҳкамаси қарор қилади:
1. Вазирлар Маҳкамасининг «2021-2022 йилларда Қашқадарё вилоятида тадбиркорликни ривожлантириш, камбағалликни қисқартириш ва инфратузилмани янада яхшилашга доир тезкор чора-тадбирлар тўғрисида» 2021 йил 2 августдаги 479-сон қарорига мувофиқ:
Шаҳрисабз тумани тоғ олди ҳудудларида жами 3,2 минг гектар лалми ва яйлов ерларни ўзлаштириш учун республика бюджети маблағлари ҳисобидан «Ўзсувқурилиш» АЖнинг ҳузуридаги «Oʻzgidrotexnik» МЧЖ томонидан 16,0 км полиэтилин ва 10,5 км металл қувурлар ётқизилганлиги, сувни тежайдиган суғориш технологиялари учун 3 та сув тиндиргич ҳовузлар барпо қилинганлиги ҳамда вақтинча 9,0 км йўл қурилганлиги;
янги ўзлаштириладиган ер майдонлари ҳисобидан Шаҳрисабз туманининг тоғ олди ҳудудларидаги «Ғелон», «Кўл», «Ҳисорак», «Сайёд», «Сувтушар», «Бошқоп», «Сарчашма», «Бешбек» ва «Аммоғон» қишлоқларида кооперация асосида картошка ва сабзавот экинлари етиштириш йўлга қўйилиши маълумот учун қабул қилинсин.
2. Давлат активларини бошқариш агентлиги ва Қашқадарё вилояти ҳокимлигининг:
Шаҳрисабз туманининг тоғ олди ҳудудларидаги янги ўзлаштирилган ер майдонлари учун Тамшуш дарёсидан тортилган сув қувурлари, ирригация иншоотлари ва бошқа асосий воситалардан (кейинги ўринларда — объект) самарали фойдаланиш, истеъмолчиларга сувни етказиб бериш, сувни тўғри тақсимлаш ишларини амалга ошириш мақсадида Давлат активларини бошқариш агентлиги муассислигида «Тамшуш сув иншоотларидан фойдаланиш дирекцияси» давлат унитар корхонасини (кейинги ўринларда — Дирекция) ташкил этиш;
объектни оператив бошқарув ҳуқуқи асосида Дирекцияга бериш тўғрисидаги таклифларига розилик берилсин.
3. Қуйидагилар дирекциянинг асосий вазифалари этиб белгилансин:
объект бутлигини сақлаш ва ундан самарали фойдаланишни таъминлаш;
объектга тоғдан кўчки, сел, тош ва бошқа тоғ жинслари тушишидан ҳимоялаш учун зарур ҳимоя воситаларини ўрнатиш чораларини кўриб бориш;
сувни етказиб бериш, ҳудудларда суғориш тизимини яхшилаш ва сувни тежайдиган технологияларни жорий этиш;
объектни самарали фойдаланиш ҳамда заруратга кўра, қўшимча иншоотлар ва техникалар билан таъминлаш, истеъмолчиларга уруғлик картошкалар етказиб бериш;
сув истеъмолчилари томонидан ўрнатилган асбоб-ускуналардан самарали фойдаланилишини назорат қилиб бориш;
асосий воситалар ва асбоб-ускуналар ҳолатини доимий мониторинг қилиб бориш.
4. Қашқадарё вилояти ҳокимлиги ҳузуридаги «Ягона буюртмачи хизмати» инжиниринг компанияси «Ўзсувқурилиш» АЖ билан биргаликда объектни ишга тушириш далолатномасига асосан белгиланган тартибда фойдаланиш учун рухсатнома олинишини таъминласин.
5. Давлат активларини бошқариш агентлиги:
Дирекциянинг таъсис ҳужжатлари тасдиқланиши ва белгиланган тартибда давлат рўйхатидан ўтказилишини;
Дирекцияни сақлаш, фаолиятини йўлга қўйиш учун зарур бўлган жиҳоз ва техникалар билан таъминлаш мақсадида Дирекциянинг устав капиталини шакллантириш учун Давлат активлари агентлиги ҳузуридаги бюджетдан ташқари Давлат активларини бошқариш, трансформация ва хусусийлаштириш жамғармаси (кейинги ўринларда — Жамғарма) ҳисобидан 7 млрд сўм ажратилишини таъминласин.
6. Давлат солиқ қўмитаси ҳузуридаги Кадастр агентлиги Қишлоқ хўжалиги вазирлиги, Қашқадарё вилояти ҳокимлиги билан биргаликда Шаҳрисабз тумани тоғ олди ҳудудларида янги ўзлаштирилган ер майдонларини белгиланган тартибда давлат рўйхатидан ўтказилишини таъминласин.
7. Белгилансинки:
2024 йил 1 мартдан бошлаб янги ўзлаштирилган ер майдонлари Вазирлар Маҳкамасининг «Қишлоқ хўжалигига мўлжалланган ер участкаларини ижарага бериш тартибига доир норматив-ҳуқуқий ҳужжатларни тасдиқлаш тўғрисида» 2021 йил 24 ноябрдаги 709-сон қарори талаблари асосида электрон онлайн-аукцион савдолари орқали ижарага берилади;
Дирекция устав капиталини шакллантириш учун берилган маблағлар ҳисобидан қишлоқ хўжалик техника воситаларини сотиб олиб, ўзининг машина-трактор паркини шакллантиради;
Дирекция фаолияти сув истеъмолчиларига сув етказиб бериш ва кўрсатилган сув хўжалиги хизматларидан тушган маблағлар, Жамғарма маблағлари, шунингдек, бўш маблағларни тижорат банкларга депозитга қўйишдан олинадиган даромадлар, халқаро молия институтларининг кредитлари ва грантлари, банк кредитлари, ҳомийлик хайриялари ҳамда қонунчилик ҳужжатларида тақиқланмаган бошқа манбалар ҳисобидан молиялаштирилади.
8. Давлат активларини бошқариш агентлиги Қашқадарё вилояти ҳокимлиги ҳамда Олий ва ўрта махсус таълим вазирлиги билан биргаликда Дирекция Қашқадарё вилоятининг Шаҳрисабз тумани «Ҳисорак» МФЙдаги Ҳисорак қишлоғида жойлашган 2-сонли касб-ҳунар мактабининг ўқувчилар турар жойи биносининг бўш турган қисмига вақтинча текин фойдаланиш ҳуқуқи асосида жойлаштирилишини таъминласин.
9. Мазкур қарорнинг бажарилишини назорат қилиш Ўзбекистон Республикаси Бош вазир ўринбосари — иқтисодий тараққиёт ва камбағалликни қисқартириш вазири Ж.А. Қўчқоров зиммасига юклансин.
Ўзбекистон Республикасининг Бош вазири А. АРИПОВ
Тошкент ш.,
2022 йил 20 сентябрь,
517-сон
Oʻzbekiston Respublikasi Vazirlar Mahkamasining
qarori
Qashqadaryo viloyatining Shahrisabz tumanida Tamshush suv inshootlaridan foydalanish direksiyasini tashkil etish toʻgʻrisida
Qashqadaryo viloyati Shahrisabz tumani togʻ oldi hududlarida yangi oʻzlashtiriladigan yerlarda suv taʼminotini yaxshilash, Tamshush daryosidan tortilgan suv quvurlari, irrigatsiya inshootlari va boshqa asosiy vositalardan samarali foydalanish, shuningdek, yangi oʻzlashtiriladigan yerlarda kartoshka va sabzavot ekinlari tashkil etish maqsadida Vazirlar Mahkamasi qaror qiladi:
1. Vazirlar Mahkamasining “2021-2022-yillarda Qashqadaryo viloyatida tadbirkorlikni rivojlantirish, kambagʻallikni qisqartirish va infratuzilmani yanada yaxshilashga doir tezkor chora-tadbirlar toʻgʻrisida” 2021-yil 2-avgustdagi 479-son qaroriga muvofiq:
Shahrisabz tumani togʻ oldi hududlarida jami 3,2 ming gektar lalmi va yaylov yerlarni oʻzlashtirish uchun respublika budjeti mablagʻlari hisobidan “Oʻzsuvqurilish” AJning huzuridagi “Oʻzgidrotexnik” MCHJ tomonidan 16,0 km polietilin va 10,5 km metall quvurlar yotqizilganligi, suvni tejaydigan sugʻorish texnologiyalari uchun 3 ta suv tindirgich hovuzlar barpo qilinganligi hamda vaqtincha 9,0 km yoʻl qurilganligi;
yangi oʻzlashtiriladigan yer maydonlari hisobidan Shahrisabz tumanining togʻ oldi hududlaridagi “Gʻelon”, “Koʻl”, “Hisorak”, “Sayyod”, “Suvtushar”, “Boshqop”, “Sarchashma”, “Beshbek” va “Ammogʻon” qishloqlarida kooperatsiya asosida kartoshka va sabzavot ekinlari yetishtirish yoʻlga qoʻyilishi maʼlumot uchun qabul qilinsin.
2. Davlat aktivlarini boshqarish agentligi va Qashqadaryo viloyati hokimligining:
Shahrisabz tumanining togʻ oldi hududlaridagi yangi oʻzlashtirilgan yer maydonlari uchun Tamshush daryosidan tortilgan suv quvurlari, irrigatsiya inshootlari va boshqa asosiy vositalardan (keyingi oʻrinlarda — obyekt) samarali foydalanish, isteʼmolchilarga suvni yetkazib berish, suvni toʻgʻri taqsimlash ishlarini amalga oshirish maqsadida Davlat aktivlarini boshqarish agentligi muassisligida “Tamshush suv inshootlaridan foydalanish direksiyasi” davlat unitar korxonasini (keyingi oʻrinlarda — Direksiya) tashkil etish;
obyektni operativ boshqaruv huquqi asosida Direksiyaga berish toʻgʻrisidagi takliflariga rozilik berilsin.
3. Quyidagilar direksiyaning asosiy vazifalari etib belgilansin:
obyekt butligini saqlash va undan samarali foydalanishni taʼminlash;
obyektga togʻdan koʻchki, sel, tosh va boshqa togʻ jinslari tushishidan himoyalash uchun zarur himoya vositalarini oʻrnatish choralarini koʻrib borish;
suvni yetkazib berish, hududlarda sugʻorish tizimini yaxshilash va suvni tejaydigan texnologiyalarni joriy etish;
obyektni samarali foydalanish hamda zaruratga koʻra, qoʻshimcha inshootlar va texnikalar bilan taʼminlash, isteʼmolchilarga urugʻlik kartoshkalar yetkazib berish;
suv isteʼmolchilari tomonidan oʻrnatilgan asbob-uskunalardan samarali foydalanilishini nazorat qilib borish;
asosiy vositalar va asbob-uskunalar holatini doimiy monitoring qilib borish.
4. Qashqadaryo viloyati hokimligi huzuridagi “Yagona buyurtmachi xizmati” injiniring kompaniyasi “Oʻzsuvqurilish” AJ bilan birgalikda obyektni ishga tushirish dalolatnomasiga asosan belgilangan tartibda foydalanish uchun ruxsatnoma olinishini taʼminlasin.
5. Davlat aktivlarini boshqarish agentligi:
Direksiyaning taʼsis hujjatlari tasdiqlanishi va belgilangan tartibda davlat roʻyxatidan oʻtkazilishini;
Direksiyani saqlash, faoliyatini yoʻlga qoʻyish uchun zarur boʻlgan jihoz va texnikalar bilan taʼminlash maqsadida Direksiyaning ustav kapitalini shakllantirish uchun Davlat aktivlari agentligi huzuridagi budjetdan tashqari Davlat aktivlarini boshqarish, transformatsiya va xususiylashtirish jamgʻarmasi (keyingi oʻrinlarda — Jamgʻarma) hisobidan 7 mlrd soʻm ajratilishini taʼminlasin.
6. Davlat soliq qoʻmitasi huzuridagi Kadastr agentligi Qishloq xoʻjaligi vazirligi, Qashqadaryo viloyati hokimligi bilan birgalikda Shahrisabz tumani togʻ oldi hududlarida yangi oʻzlashtirilgan yer maydonlarini belgilangan tartibda davlat roʻyxatidan oʻtkazilishini taʼminlasin.
7. Belgilansinki:
2024-yil 1-martdan boshlab yangi oʻzlashtirilgan yer maydonlari Vazirlar Mahkamasining “Qishloq xoʻjaligiga moʻljallangan yer uchastkalarini ijaraga berish tartibiga doir normativ-huquqiy hujjatlarni tasdiqlash toʻgʻrisida” 2021-yil 24-noyabrdagi 709-son qarori talablari asosida elektron onlayn-auksion savdolari orqali ijaraga beriladi;
Direksiya ustav kapitalini shakllantirish uchun berilgan mablagʻlar hisobidan qishloq xoʻjalik texnika vositalarini sotib olib, oʻzining mashina-traktor parkini shakllantiradi;
Direksiya faoliyati suv isteʼmolchilariga suv yetkazib berish va koʻrsatilgan suv xoʻjaligi xizmatlaridan tushgan mablagʻlar, Jamgʻarma mablagʻlari, shuningdek, boʻsh mablagʻlarni tijorat banklarga depozitga qoʻyishdan olinadigan daromadlar, xalqaro moliya institutlarining kreditlari va grantlari, bank kreditlari, homiylik xayriyalari hamda qonunchilik hujjatlarida taqiqlanmagan boshqa manbalar hisobidan moliyalashtiriladi.
8. Davlat aktivlarini boshqarish agentligi Qashqadaryo viloyati hokimligi hamda Oliy va oʻrta maxsus taʼlim vazirligi bilan birgalikda Direksiya Qashqadaryo viloyatining Shahrisabz tumani “Hisorak” MFYdagi Hisorak qishlogʻida joylashgan 2-sonli kasb-hunar maktabining oʻquvchilar turar joyi binosining boʻsh turgan qismiga vaqtincha tekin foydalanish huquqi asosida joylashtirilishini taʼminlasin.
9. Mazkur qarorning bajarilishini nazorat qilish Oʻzbekiston Respublikasi Bosh vazir oʻrinbosari — iqtisodiy taraqqiyot va kambagʻallikni qisqartirish vaziri J.A. Qoʻchqorov zimmasiga yuklansin.
Oʻzbekiston Respublikasining Bosh vaziri A. ARIPOV
Toshkent sh.,
2022-yil 20-sentabr,
517-son