📅 2022-yil 22-sentabr · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2022 йил 22 сентябрь · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 22 сентября 2022 г. · Постановления Кабинета Министров
Официальный текст. Официальный документ. Редакционные примечания не включены.
📅 22 September 2022 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
Тошкент шаҳрида жамоат хавфсизлигини таъминлаш борасидаги фаолиятни самарали ташкил этишда янги бошқарув тизими жорий этилганлиги муносабати билан Вазирлар Маҳкамасининг 2018 йил 28 августдаги 697-сон қарори билан тасдиқланган Тошкент шаҳрининг жамоат тартибини таъминлаш кучлари таркибида хизматни ўтаётган ходимлар ва ҳарбий хизматчилар фаолиятини баҳолаш ва уларга бир марталик пул мукофоти тўлаш мезонларини белгилаш тартиби тўғрисидаги низомга қўшимча киритиш ҳақида
Мамлакатимизда жамоат хавфсизлигини таъминлаш бўйича белгиланаётган янги механизмларни самарали жорий этиш, ички ишлар органларининг масъулиятини янада кучайтириш борасида бир қатор чора-тадбирлар амалга оширилмоқда.
Мазкур соҳада олиб борилаётган ислоҳотлар, ўз навбатида, жамоат хавфсизлигини таъминлашга жалб қилинган ички ишлар органлари бўйсунувидаги патруль-пост хизмати ходимларининг фаолияти самарадорлигини ошириш билан бир қаторда хизмат жараёнида юқори кўрсаткичларга эришган ходимларни рағбатлантиришни талаб этмоқда.
Тошкент шаҳрининг жамоат тартибини таъминлаш кучлари таркибидаги ички ишлар органлари патруль-пост хизмати саф бўлинмалари шахсий таркибининг хизмат ва жанговар тайёргарлигини таъминлаш, жамоат тартибини сақлаш, ҳуқуқбузарликларнинг олдини олиш ва жиноятларни бевосита фош этишда юқори натижаларга эришган ходимларни моддий рағбатлантириш тизимини такомиллаштириш мақсадида Вазирлар Маҳкамаси қарор қилади:
1. Вазирлар Маҳкамасининг 2018 йил 28 августдаги 697-сон қарори билан тасдиқланган Тошкент шаҳрининг жамоат тартибини таъминлаш кучлари таркибида хизматни ўтаётган ходимлар ва ҳарбий хизматчилар фаолиятини баҳолаш ва уларга бир марталик пул мукофоти тўлаш мезонларини белгилаш тартиби тўғрисидаги низомнинг 2-бандига Тошкент шаҳрининг жамоат тартибини таъминлаш кучлари таркибида хизматни ўтаётган ходимлар ва ҳарбий хизматчилар қаторига Тошкент шаҳрининг туман ички ишлар органлари бўйсунувидаги патруль-пост хизмати ходимларини киритишни назарда тутувчи қўшимча киритилсин ва мазкур банд қуйидаги таҳрирда баён этилсин:
«2. Ушбу Низом ички ишлар органларининг йўл-патруль хизмати, туман ички ишлар органлари бўйсунувидаги патруль-пост хизмати, Ўзбекистон Республикаси Миллий гвардияси қўриқлаш хизматлари ва саф бўлинмалари ходимлари ҳамда Миллий гвардиянинг шартнома асосида хизматни ўтаётган ҳарбий хизматчиларига татбиқ этилади».
2. Мазкур қарорнинг бажарилишини назорат қилиш Ўзбекистон Республикаси ички ишлар вазири П.Р. Бобожонов зиммасига юклансин.
Ўзбекистон Республикасининг Бош вазири А. АРИПОВ
Тошкент ш.,
2022 йил 22 сентябрь,
521-сон
Oʻzbekiston Respublikasi Vazirlar Mahkamasining
qarori
Toshkent shahrida jamoat xavfsizligini taʼminlash borasidagi faoliyatni samarali tashkil etishda yangi boshqaruv tizimi joriy etilganligi munosabati bilan Vazirlar Mahkamasining 2018-yil 28-avgustdagi 697-son qarori bilan tasdiqlangan Toshkent shahrining jamoat tartibini taʼminlash kuchlari tarkibida xizmatni oʻtayotgan xodimlar va harbiy xizmatchilar faoliyatini baholash va ularga bir martalik pul mukofoti toʻlash mezonlarini belgilash tartibi toʻgʻrisidagi nizomga qoʻshimcha kiritish haqida
Mamlakatimizda jamoat xavfsizligini taʼminlash boʻyicha belgilanayotgan yangi mexanizmlarni samarali joriy etish, ichki ishlar organlarining masʼuliyatini yanada kuchaytirish borasida bir qator chora-tadbirlar amalga oshirilmoqda.
Mazkur sohada olib borilayotgan islohotlar, oʻz navbatida, jamoat xavfsizligini taʼminlashga jalb qilingan ichki ishlar organlari boʻysunuvidagi patrul-post xizmati xodimlarining faoliyati samaradorligini oshirish bilan bir qatorda xizmat jarayonida yuqori koʻrsatkichlarga erishgan xodimlarni ragʻbatlantirishni talab etmoqda.
Toshkent shahrining jamoat tartibini taʼminlash kuchlari tarkibidagi ichki ishlar organlari patrul-post xizmati saf boʻlinmalari shaxsiy tarkibining xizmat va jangovar tayyorgarligini taʼminlash, jamoat tartibini saqlash, huquqbuzarliklarning oldini olish va jinoyatlarni bevosita fosh etishda yuqori natijalarga erishgan xodimlarni moddiy ragʻbatlantirish tizimini takomillashtirish maqsadida Vazirlar Mahkamasi qaror qiladi:
1. Vazirlar Mahkamasining 2018-yil 28-avgustdagi 697-son qarori bilan tasdiqlangan Toshkent shahrining jamoat tartibini taʼminlash kuchlari tarkibida xizmatni oʻtayotgan xodimlar va harbiy xizmatchilar faoliyatini baholash va ularga bir martalik pul mukofoti toʻlash mezonlarini belgilash tartibi toʻgʻrisidagi nizomning 2-bandiga Toshkent shahrining jamoat tartibini taʼminlash kuchlari tarkibida xizmatni oʻtayotgan xodimlar va harbiy xizmatchilar qatoriga Toshkent shahrining tuman ichki ishlar organlari boʻysunuvidagi patrul-post xizmati xodimlarini kiritishni nazarda tutuvchi qoʻshimcha kiritilsin va mazkur band quyidagi tahrirda bayon etilsin:
“2. Ushbu Nizom ichki ishlar organlarining yoʻl-patrul xizmati, tuman ichki ishlar organlari boʻysunuvidagi patrul-post xizmati, Oʻzbekiston Respublikasi Milliy gvardiyasi qoʻriqlash xizmatlari va saf boʻlinmalari xodimlari hamda Milliy gvardiyaning shartnoma asosida xizmatni oʻtayotgan harbiy xizmatchilariga tatbiq etiladi”.
2. Mazkur qarorning bajarilishini nazorat qilish Oʻzbekiston Respublikasi ichki ishlar vaziri P.R. Bobojonov zimmasiga yuklansin.
Oʻzbekiston Respublikasining Bosh vaziri A. ARIPOV
Toshkent sh.,
2022-yil 22-sentabr,
521-son