📅 2022-yil 3-oktabr · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2022 йил 3 октябрь · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 3 октября 2022 г. · Постановления Кабинета Министров
Официальный текст. Официальный документ. Редакционные примечания не включены.
📅 3 October 2022 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
Олий, ўрта махсус ва профессионал таълим муассасалари талаба ва ўқувчиларининг қишки таътилини ташкил этиш тўғрисида
Олий, ўрта махсус ва профессионал таълим муассасаларида таълим олувчиларнинг қишки таътил вақтида ўзлари доимий равишда истиқомат қилаётган жойларга ўз вақтида ва хавфсиз етиб боришлари ва қайтишларини ташкил этиш, уларнинг қишки таътил вақтини самарали ва мазмунли ўтказишини таъминлаш мақсадида Вазирлар Маҳкамаси қарор қилади:
1. Таълим соҳасидаги ваколатли давлат бошқаруви органларининг декабрь ойининг охирги ўн кунлиги ва январь ойининг биринчи ўн кунлиги оралиғида Ўзбекистон Республикаси ўрта махсус, профессионал ва олий таълим муассасалари талаба (ўқувчи)ларининг ҳар йилги икки ҳафталик қишки таътилини ўтказиш тўғрисидаги таклифлари маъқуллансин.
2. Белгилансинки:
Ўзбекистон Республикаси Олий ва ўрта махсус таълим вазирлигига (кейинги ўринларда — Вазирлик) мавжуд шароитдан келиб чиқиб, ўқувчи ва талабаларга таътил бериш муддатини ўзгартириш ҳуқуқи берилади;
мазкур қарорнинг 1-бандида белгиланган тартиб нодавлат таълим ташкилотлари учун тавсиявий ҳисобланади.
3. Тизимида олий, ўрта махсус, профессионал таълим муассасалари бўлган вазирликлар, идоралар ва давлат улуши мавжуд хўжалик бирлашмалари қишки таътилни ташкил этиш юзасидан зарур чораларни уюшқоқлик билан амалга оширсинлар ҳамда талаба ва ўқувчиларга уларнинг доимий яшаш жойларига бориб келишида ҳар томонлама ёрдам берсинлар.
4. Шундай тартиб ўрнатилсинки, унга мувофиқ:
байрам кунлари ва қишки таътил даврида талабалар турар жойларида қолаётган талабаларнинг хавфсизлиги ва бўш вақтини унумли ўтказиши, шунингдек, овқатланиши мазкур олий таълим муассасасининг бюджетдан ташқари маблағлари ҳисобидан амалга оширилади;
таътил даврида олий, ўрта махсус, профессионал давлат таълим муассасалари ва улар филиалларининг педагогика соҳасидаги имкониятидан самарали фойдаланиш таъминланади, ўқувчилар ва талабалар билан ишлашнинг дарсдан ташқари фаол усуллари, шунингдек, педагог ходимлар малакасини ошириш, олий таълим муассасасининг соҳасига мувофиқ турли маслаҳат ёрдамини бериш назарда тутилади.
5. Ўзбекистон Республикаси Транспорт вазирлиги Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари билан биргаликда талаба ва ўқувчиларга қўшимча қулайликлар яратиш ҳамда уларнинг ҳудудларга ҳаракатланиш имкониятини ошириш мақсадида ҳар йили қишки таътил кунлари уларнинг яшаш жойларига боришлари ва таълим муассасасига ўз вақтида қайтиб келишлари учун вақтинча кўпайтирилган транспорт воситалари қатновини йўлга қўйсин.
6. «Ўзбекистон темир йўллари» АЖ ва «Uzbekistan airways» АЖга Ўзбекистон Республикаси олий ва ўрта махсус таълим вазирининг қишки таътилни эълон қилиш ҳақидаги буйруғи ва буюртманомалари асосида қишки таътил бошланишидан 10 кун аввалдан бошлаб чиптанинг тўлиқ қийматидан 50 фоизли чегирма тўлови асосида республика ичида ҳаракатланувчи тезюрар ва йўловчи (юқори тезликда ҳаракатланувчи поездлар ва барча йўловчи поездларнинг СВ, ВИП вагонлари бундан мустасно) поездларига ҳамда маҳаллий авиарейсларга чипталарнинг эконом синфи тарифи қийматидан 50 фоизли чегирма тўлови асосида сотувини ташкил этиш тавсия этилсин.
Белгилаб қўйилсинки, 2022 йилдан бошлаб қишки таътил даврида ўқувчи ва талабаларнинг йўналишли шаҳарлараро автобус қатнови орқали ҳаракатланиши учун Ўзбекистон Республикаси Транспорт вазирлиги томонидан муддатли имтиёзлар тўпламини (чегирмали чипталар, акциялар) тақдим этиш механизми жорий этилади. Бунда, имтиёзлар талаба ва ўқувчиларнинг ижтимоий муҳофазаланиши заруратидан келиб чиқиб, ташувчилар томонидан жорий этилади.
7. Қишки таътил пайтида ҳаракатланиш графигини мувофиқлаштириш мақсадида олий таълим муассасалари талабалари тўғрисидаги маълумотлар базаси йўловчи ташишни амалга оширувчи операторларнинг маълумотлар базаларига интеграция қилинганлиги маълумот учун қабул қилинсин.
Ўзбекистон Республикаси Транспорт вазирлиги уч ой муддатда Вазирлик билан биргаликда ўрта махсус ва профессионал таълим муассасалари ўқувчилари тўғрисидаги маълумотлар базаларини йўловчи ташишни амалга оширувчи операторлар маълумотлар базаларига интеграция қилиш чорасини кўрсин.
8. Ўзбекистон Республикаси Олий ва ўрта махсус таълим вазирлиги манфаатдор вазирлик ва идоралар билан биргаликда ўзлари қабул қилган норматив-ҳуқуқий ҳужжатларни бир ой муддатда ушбу қарорга мувофиқлаштирсин.
9. Мазкур қарорнинг бажарилишини назорат қилиш Ўзбекистон Республикаси олий ва ўрта махсус таълим вазири А.Х. Тошкулов зиммасига ҳамда Вазирлар Маҳкамасининг Таълим, соғлиқни сақлаш ва спорт масалалари котибиятига юклансин.
Ўзбекистон Республикасининг Бош вазири А. АРИПОВ
Тошкент ш.,
2022 йил 3 октябрь,
560-сон
Oʻzbekiston Respublikasi Vazirlar Mahkamasining
qarori
Oliy, oʻrta maxsus va professional taʼlim muassasalari talaba va oʻquvchilarining qishki taʼtilini tashkil etish toʻgʻrisida
Oliy, oʻrta maxsus va professional taʼlim muassasalarida taʼlim oluvchilarning qishki taʼtil vaqtida oʻzlari doimiy ravishda istiqomat qilayotgan joylarga oʻz vaqtida va xavfsiz yetib borishlari va qaytishlarini tashkil etish, ularning qishki taʼtil vaqtini samarali va mazmunli oʻtkazishini taʼminlash maqsadida Vazirlar Mahkamasi qaror qiladi:
1. Taʼlim sohasidagi vakolatli davlat boshqaruvi organlarining dekabr oyining oxirgi oʻn kunligi va yanvar oyining birinchi oʻn kunligi oraligʻida Oʻzbekiston Respublikasi oʻrta maxsus, professional va oliy taʼlim muassasalari talaba (oʻquvchi)larining har yilgi ikki haftalik qishki taʼtilini oʻtkazish toʻgʻrisidagi takliflari maʼqullansin.
2. Belgilansinki:
Oʻzbekiston Respublikasi Oliy va oʻrta maxsus taʼlim vazirligiga (keyingi oʻrinlarda — Vazirlik) mavjud sharoitdan kelib chiqib, oʻquvchi va talabalarga taʼtil berish muddatini oʻzgartirish huquqi beriladi;
mazkur qarorning 1-bandida belgilangan tartib nodavlat taʼlim tashkilotlari uchun tavsiyaviy hisoblanadi.
3. Tizimida oliy, oʻrta maxsus, professional taʼlim muassasalari boʻlgan vazirliklar, idoralar va davlat ulushi mavjud xoʻjalik birlashmalari qishki taʼtilni tashkil etish yuzasidan zarur choralarni uyushqoqlik bilan amalga oshirsinlar hamda talaba va oʻquvchilarga ularning doimiy yashash joylariga borib kelishida har tomonlama yordam bersinlar.
4. Shunday tartib oʻrnatilsinki, unga muvofiq:
bayram kunlari va qishki taʼtil davrida talabalar turar joylarida qolayotgan talabalarning xavfsizligi va boʻsh vaqtini unumli oʻtkazishi, shuningdek, ovqatlanishi mazkur oliy taʼlim muassasasining budjetdan tashqari mablagʻlari hisobidan amalga oshiriladi;
taʼtil davrida oliy, oʻrta maxsus, professional davlat taʼlim muassasalari va ular filiallarining pedagogika sohasidagi imkoniyatidan samarali foydalanish taʼminlanadi, oʻquvchilar va talabalar bilan ishlashning darsdan tashqari faol usullari, shuningdek, pedagog xodimlar malakasini oshirish, oliy taʼlim muassasasining sohasiga muvofiq turli maslahat yordamini berish nazarda tutiladi.
5. Oʻzbekiston Respublikasi Transport vazirligi Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari bilan birgalikda talaba va oʻquvchilarga qoʻshimcha qulayliklar yaratish hamda ularning hududlarga harakatlanish imkoniyatini oshirish maqsadida har yili qishki taʼtil kunlari ularning yashash joylariga borishlari va taʼlim muassasasiga oʻz vaqtida qaytib kelishlari uchun vaqtincha koʻpaytirilgan transport vositalari qatnovini yoʻlga qoʻysin.
6. “Oʻzbekiston temir yoʻllari” AJ va “Uzbekistan airways” AJga Oʻzbekiston Respublikasi oliy va oʻrta maxsus taʼlim vazirining qishki taʼtilni eʼlon qilish haqidagi buyrugʻi va buyurtmanomalari asosida qishki taʼtil boshlanishidan 10 kun avvaldan boshlab chiptaning toʻliq qiymatidan 50 foizli chegirma toʻlovi asosida respublika ichida harakatlanuvchi tezyurar va yoʻlovchi (yuqori tezlikda harakatlanuvchi poyezdlar va barcha yoʻlovchi poyezdlarning SV, VIP vagonlari bundan mustasno) poyezdlariga hamda mahalliy aviareyslarga chiptalarning ekonom sinfi tarifi qiymatidan 50 foizli chegirma toʻlovi asosida sotuvini tashkil etish tavsiya etilsin.
Belgilab qoʻyilsinki, 2022-yildan boshlab qishki taʼtil davrida oʻquvchi va talabalarning yoʻnalishli shaharlararo avtobus qatnovi orqali harakatlanishi uchun Oʻzbekiston Respublikasi Transport vazirligi tomonidan muddatli imtiyozlar toʻplamini (chegirmali chiptalar, aksiyalar) taqdim etish mexanizmi joriy etiladi. Bunda, imtiyozlar talaba va oʻquvchilarning ijtimoiy muhofazalanishi zaruratidan kelib chiqib, tashuvchilar tomonidan joriy etiladi.
7. Qishki taʼtil paytida harakatlanish grafigini muvofiqlashtirish maqsadida oliy taʼlim muassasalari talabalari toʻgʻrisidagi maʼlumotlar bazasi yoʻlovchi tashishni amalga oshiruvchi operatorlarning maʼlumotlar bazalariga integratsiya qilinganligi maʼlumot uchun qabul qilinsin.
Oʻzbekiston Respublikasi Transport vazirligi uch oy muddatda Vazirlik bilan birgalikda oʻrta maxsus va professional taʼlim muassasalari oʻquvchilari toʻgʻrisidagi maʼlumotlar bazalarini yoʻlovchi tashishni amalga oshiruvchi operatorlar maʼlumotlar bazalariga integratsiya qilish chorasini koʻrsin.
8. Oʻzbekiston Respublikasi Oliy va oʻrta maxsus taʼlim vazirligi manfaatdor vazirlik va idoralar bilan birgalikda oʻzlari qabul qilgan normativ-huquqiy hujjatlarni bir oy muddatda ushbu qarorga muvofiqlashtirsin.
9. Mazkur qarorning bajarilishini nazorat qilish Oʻzbekiston Respublikasi oliy va oʻrta maxsus taʼlim vaziri A.X. Toshkulov zimmasiga hamda Vazirlar Mahkamasining Taʼlim, sogʻliqni saqlash va sport masalalari kotibiyatiga yuklansin.
Oʻzbekiston Respublikasining Bosh vaziri A. ARIPOV
Toshkent sh.,
2022-yil 3-oktabr,
560-son