📅 2022-yil 3-oktabr · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2022 йил 3 октябрь · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 3 октября 2022 г. · Постановления Кабинета Министров
Официальный текст. Официальный документ. Редакционные примечания не включены.
📅 3 October 2022 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
Давлат тиббиёт муассасаларини кадрлар билан таъминлаш тизимини такомиллаштириш тўғрисида
Давлат тиббиёт муассасаларини кадрлар билан таъминлаш тизимини такомиллаштириш, тиббиёт олий таълим муассасалари талабаларининг таҳсил олиш жараёнида меҳнат фаолияти билан шуғулланишлари ва муносиб даромад олишлари учун қўшимча шароитлар яратиш, уларнинг амалий кўникмаларини ривожлантириш ва ўқишдан бўш вақтларини самарали ташкил этиш, аҳолига кўрсатилаётган тиббий хизматлар сифатини янада ошириш мақсадида, шунингдек коронавирус пандемияси давом этаётганлигини инобатга олган ҳолда Вазирлар Маҳкамаси қарор қилади:
1. Вазирлар Маҳкамасининг «Андижон давлат тиббиёт институти ва унинг клиникаси фаолиятини тубдан такомиллаштириш чора-тадбирлари тўғрисида» 2021 йил 25 ноябрдаги 713-сон қарори 4-бандининг «а» кичик бандига мувофиқ 2022/2023 ўқув йилидан бошлаб барча тиббиёт олий таълим муассасаларининг «Даволаш иши» ва «Педиатрия иши» таълим йўналишлари битирувчи курс талабалари учун ўқув йилининг биринчи семестри (5 ой) давомида доимий яшаш жойларидаги тиббиёт муассасаларида амалиёт ўташини, режадаги маъруза ва ўқув машғулотларининг назарий қисмини масофавий шаклда олиб борилишини жорий қилиш белгиланганлиги маълумот учун қабул қилинсин.
2. Соғлиқни сақлаш вазирлигининг Қорақалпоғистон Республикаси, вилоятлар ва Тошкент шаҳрида тажриба-синов тариқасида (кейинги ўринларда — тажриба-синов лойиҳаси) 2022/2023 ўқув йилида:
барча тиббиёт олий таълим муассасаларининг «Даволаш иши», «Педиатрия иши» ва «Тиббий-профилактика иши» бакалавриат таълим йўналишларининг битирувчи курс талабаларига (кейинги ўринларда — талабалар) меҳнат шартномаси асосида тўлиқ ставкагача бирламчи тиббий-санитария ёрдами муассасаларида оилавий шифокор, тез тиббий ёрдам муассасаларида шифокор ҳамда Санитария-эпидемиологик осойишталик ва жамоат саломатлиги хизматининг туман (шаҳар) бўлимларида мавжуд шифокор вакант ўринларида;
барча тиббиёт олий таълим муассасалари, республика ихтисослаштирилган илмий-амалий тиббиёт марказлари ва Тиббиёт ходимларининг касбий малакасини ривожлантириш марказининг магистратура ва клиник ординатура мутахассисликларининг битирувчи курс талабаларига ўз йўналишидаги мутахассислик бўйича мавжуд вакант ўринларда меҳнат шартномаси асосида тўлиқ ставкагача фаолият кўрсатишларига рухсат бериш тўғрисидаги таклифлари маъқуллансин.
Белгилаб қўйилсинки:
«Даволаш иши», «Педиатрия иши» ва «Тиббий-профилактика иши» бакалавриат таълим йўналишлари, магистратура ва клиник ординатура мутахассисликлари ўқув режаларидаги фанлар ва амалий машғулотларнинг назарий қисми масофавий шаклда ўзлаштирилади;
тиббиёт муассасаларининг тажрибали шифокорлари ҳамда тиббиёт олий таълим муассасаларининг масъул профессор-ўқитувчилари устоз-шогирд тизими асосида талабалар, магистр ва клиник ординаторларга бириктирилади;
талабалар, магистр ва клиник ординаторлар томонидан аҳолига кўрсатилган тиббий ёрдам сифатига уларга бириктирилган тиббиёт муассасаларининг шифокорлари ҳамда тиббиёт олий таълим муассасаларининг профессор-ўқитувчилари бевосита масъул этиб белгиланади;
талабаларга бириктирилган шифокорлар ҳар иш куни якуни бўйича талабалар томонидан аҳолига кўрсатилган тиббий ёрдам юзасидан муҳокама ўтказади ва уларга тегишли тавсиялар бериб боради.
3. Соғлиқни сақлаш вазирлиги:
Қорақалпоғистон Республикаси Вазирлар Кенгаши Раиси, вилоятлар ва Тошкент шаҳар ҳокимлари билан биргаликда туман (шаҳар)лар кесимида бирламчи тиббий-санитария ёрдами муассасаларида оилавий шифокор ва тор доирадаги шифокорлар, тез тиббий ёрдам муассасаларида шифокорлар, шунингдек Санитария-эпидемиологик осойишталик ва жамоат саломатлиги хизматининг туман (шаҳар) бўлимларида шифокорларга бўлган эҳтиёжни аниқласин ҳамда биринчи босқичда 2022 йил 1 октябрдан бошлаб Сурхондарё вилоятида, иккинчи босқичда эса 2022 йил 1 ноябрдан бошлаб республиканинг қолган ҳудудларида мавжуд вакант лавозимларга талабалар, магистр ва клиник ординаторларни ишга жойлаштириш чораларини кўрсин;
бир ҳафта муддатда талабалар, магистр ва клиник ординаторлар томонидан аҳолига кўрсатиладиган тиббий ёрдам сифатини бириктирилган шифокорлар ва профессор-ўқитувчилар томонидан назорат қилиш, уларнинг аниқ вазифаларини белгиловчи тартибни ишлаб чиқсин ва тасдиқласин;
тиббиёт олий таълим муассасалари бакалавриат таълим йўналишларининг битирувчи курс талабаларига тегишли тиббиёт муассасаларининг тажрибали шифокорлари ва тиббиёт олий таълим муассасаларининг профессор-ўқитувчиларини бириктирсин;
талабаларга бириктириладиган тегишли тиббиёт муассасаларининг шифокорларига Ўзбекистон Республикаси Президентининг «Тиббиёт муассасалари ходимларини моддий қўллаб-қувватлаш ҳамда рағбатлантиришни кучайтириш чора-тадбирлари тўғрисида» 2022 йил 17 майдаги ПФ-136-сон Фармонига мувофиқ Тиббиёт муассасаларининг моддий рағбатлантириш ва ривожлантириш жамғармаси ҳисобидан устамалар белгиланишини таъминласин;
Қорақалпоғистон Республикаси, вилоятлар ва Тошкент шаҳрида ўтказилган тажриба-синов лойиҳаси якунларига кўра, 2023 йил 1 августга қадар эришилган натижалар ҳамда қонунчилик ҳужжатларини янада такомиллаштириш юзасидан тегишли таклифларни Вазирлар Маҳкамасига киритсин.
4. Вазирлар Маҳкамасининг «Андижон давлат тиббиёт институти ва унинг клиникаси фаолиятини тубдан такомиллаштириш чора-тадбирлари тўғрисида» 2021 йил 25 ноябрдаги 713-сон қарори 4-бандининг «а» кичик банди қуйидаги таҳрирда баён этилсин:
«а) 2022/2023 ўқув йилидан бошлаб барча тиббиёт олий таълим муассасаларининг «Даволаш иши», «Педиатрия иши» ва «Тиббий-профилактика иши» таълим йўналишлари битирувчи курс талабалари учун ўқув йили давомида (қоида тариқасида, доимий яшаш жойларидаги ёки ўзларининг розилиги билан бошқа жойлардаги) тиббиёт муассасаларида амалиёт ўташини, режадаги маъруза ва ўқув машғулотларининг назарий қисмини масофавий шаклда олиб борилишини жорий қилиш;».
5. Соғлиқни сақлаш вазирлиги бошқа манфаатдор вазирликлар ва идоралар билан биргаликда ўзлари қабул қилган норматив-ҳуқуқий ҳужжатларни бир ой муддатда ушбу қарорга мувофиқлаштирсин.
6. Мазкур қарорнинг бажарилишини назорат қилиш Ўзбекистон Республикаси соғлиқни сақлаш вазири Б.А. Мусаев, Ўзбекистон Республикаси молия вазири Т.А. Ишметов зиммасига ҳамда Вазирлар Маҳкамасининг Таълим, соғлиқни сақлаш ва спорт масалалари котибиятига юклансин.
Ўзбекистон Республикасининг Бош вазири А. АРИПОВ
Тошкент ш.,
2022 йил 3 октябрь,
561-сон
Oʻzbekiston Respublikasi Vazirlar Mahkamasining
qarori
Davlat tibbiyot muassasalarini kadrlar bilan taʼminlash tizimini takomillashtirish toʻgʻrisida
Davlat tibbiyot muassasalarini kadrlar bilan taʼminlash tizimini takomillashtirish, tibbiyot oliy taʼlim muassasalari talabalarining tahsil olish jarayonida mehnat faoliyati bilan shugʻullanishlari va munosib daromad olishlari uchun qoʻshimcha sharoitlar yaratish, ularning amaliy koʻnikmalarini rivojlantirish va oʻqishdan boʻsh vaqtlarini samarali tashkil etish, aholiga koʻrsatilayotgan tibbiy xizmatlar sifatini yanada oshirish maqsadida, shuningdek koronavirus pandemiyasi davom etayotganligini inobatga olgan holda Vazirlar Mahkamasi qaror qiladi:
1. Vazirlar Mahkamasining “Andijon davlat tibbiyot instituti va uning klinikasi faoliyatini tubdan takomillashtirish chora-tadbirlari toʻgʻrisida” 2021-yil 25-noyabrdagi 713-son qarori 4-bandining “a” kichik bandiga muvofiq 2022/2023 oʻquv yilidan boshlab barcha tibbiyot oliy taʼlim muassasalarining “Davolash ishi” va “Pediatriya ishi” taʼlim yoʻnalishlari bitiruvchi kurs talabalari uchun oʻquv yilining birinchi semestri (5 oy) davomida doimiy yashash joylaridagi tibbiyot muassasalarida amaliyot oʻtashini, rejadagi maʼruza va oʻquv mashgʻulotlarining nazariy qismini masofaviy shaklda olib borilishini joriy qilish belgilanganligi maʼlumot uchun qabul qilinsin.
2. Sogʻliqni saqlash vazirligining Qoraqalpogʻiston Respublikasi, viloyatlar va Toshkent shahrida tajriba-sinov tariqasida (keyingi oʻrinlarda — tajriba-sinov loyihasi) 2022/2023 oʻquv yilida:
barcha tibbiyot oliy taʼlim muassasalarining “Davolash ishi”, “Pediatriya ishi” va “Tibbiy-profilaktika ishi” bakalavriat taʼlim yoʻnalishlarining bitiruvchi kurs talabalariga (keyingi oʻrinlarda — talabalar) mehnat shartnomasi asosida toʻliq stavkagacha birlamchi tibbiy-sanitariya yordami muassasalarida oilaviy shifokor, tez tibbiy yordam muassasalarida shifokor hamda Sanitariya-epidemiologik osoyishtalik va jamoat salomatligi xizmatining tuman (shahar) boʻlimlarida mavjud shifokor vakant oʻrinlarida;
barcha tibbiyot oliy taʼlim muassasalari, respublika ixtisoslashtirilgan ilmiy-amaliy tibbiyot markazlari va Tibbiyot xodimlarining kasbiy malakasini rivojlantirish markazining magistratura va klinik ordinatura mutaxassisliklarining bitiruvchi kurs talabalariga oʻz yoʻnalishidagi mutaxassislik boʻyicha mavjud vakant oʻrinlarda mehnat shartnomasi asosida toʻliq stavkagacha faoliyat koʻrsatishlariga ruxsat berish toʻgʻrisidagi takliflari maʼqullansin.
Belgilab qoʻyilsinki:
“Davolash ishi”, “Pediatriya ishi” va “Tibbiy-profilaktika ishi” bakalavriat taʼlim yoʻnalishlari, magistratura va klinik ordinatura mutaxassisliklari oʻquv rejalaridagi fanlar va amaliy mashgʻulotlarning nazariy qismi masofaviy shaklda oʻzlashtiriladi;
tibbiyot muassasalarining tajribali shifokorlari hamda tibbiyot oliy taʼlim muassasalarining masʼul professor-oʻqituvchilari ustoz-shogird tizimi asosida talabalar, magistr va klinik ordinatorlarga biriktiriladi;
talabalar, magistr va klinik ordinatorlar tomonidan aholiga koʻrsatilgan tibbiy yordam sifatiga ularga biriktirilgan tibbiyot muassasalarining shifokorlari hamda tibbiyot oliy taʼlim muassasalarining professor-oʻqituvchilari bevosita masʼul etib belgilanadi;
talabalarga biriktirilgan shifokorlar har ish kuni yakuni boʻyicha talabalar tomonidan aholiga koʻrsatilgan tibbiy yordam yuzasidan muhokama oʻtkazadi va ularga tegishli tavsiyalar berib boradi.
3. Sogʻliqni saqlash vazirligi:
Qoraqalpogʻiston Respublikasi Vazirlar Kengashi Raisi, viloyatlar va Toshkent shahar hokimlari bilan birgalikda tuman (shahar)lar kesimida birlamchi tibbiy-sanitariya yordami muassasalarida oilaviy shifokor va tor doiradagi shifokorlar, tez tibbiy yordam muassasalarida shifokorlar, shuningdek Sanitariya-epidemiologik osoyishtalik va jamoat salomatligi xizmatining tuman (shahar) boʻlimlarida shifokorlarga boʻlgan ehtiyojni aniqlasin hamda birinchi bosqichda 2022-yil 1-oktabrdan boshlab Surxondaryo viloyatida, ikkinchi bosqichda esa 2022-yil 1-noyabrdan boshlab respublikaning qolgan hududlarida mavjud vakant lavozimlarga talabalar, magistr va klinik ordinatorlarni ishga joylashtirish choralarini koʻrsin;
bir hafta muddatda talabalar, magistr va klinik ordinatorlar tomonidan aholiga koʻrsatiladigan tibbiy yordam sifatini biriktirilgan shifokorlar va professor-oʻqituvchilar tomonidan nazorat qilish, ularning aniq vazifalarini belgilovchi tartibni ishlab chiqsin va tasdiqlasin;
tibbiyot oliy taʼlim muassasalari bakalavriat taʼlim yoʻnalishlarining bitiruvchi kurs talabalariga tegishli tibbiyot muassasalarining tajribali shifokorlari va tibbiyot oliy taʼlim muassasalarining professor-oʻqituvchilarini biriktirsin;
talabalarga biriktiriladigan tegishli tibbiyot muassasalarining shifokorlariga Oʻzbekiston Respublikasi Prezidentining “Tibbiyot muassasalari xodimlarini moddiy qoʻllab-quvvatlash hamda ragʻbatlantirishni kuchaytirish chora-tadbirlari toʻgʻrisida” 2022-yil 17-maydagi PF-136-son Farmoniga muvofiq Tibbiyot muassasalarining moddiy ragʻbatlantirish va rivojlantirish jamgʻarmasi hisobidan ustamalar belgilanishini taʼminlasin;
Qoraqalpogʻiston Respublikasi, viloyatlar va Toshkent shahrida oʻtkazilgan tajriba-sinov loyihasi yakunlariga koʻra, 2023-yil 1-avgustga qadar erishilgan natijalar hamda qonunchilik hujjatlarini yanada takomillashtirish yuzasidan tegishli takliflarni Vazirlar Mahkamasiga kiritsin.
4. Vazirlar Mahkamasining “Andijon davlat tibbiyot instituti va uning klinikasi faoliyatini tubdan takomillashtirish chora-tadbirlari toʻgʻrisida” 2021-yil 25-noyabrdagi 713-son qarori 4-bandining “a” kichik bandi quyidagi tahrirda bayon etilsin:
“a) 2022/2023 oʻquv yilidan boshlab barcha tibbiyot oliy taʼlim muassasalarining “Davolash ishi”, “Pediatriya ishi” va “Tibbiy-profilaktika ishi” taʼlim yoʻnalishlari bitiruvchi kurs talabalari uchun oʻquv yili davomida (qoida tariqasida, doimiy yashash joylaridagi yoki oʻzlarining roziligi bilan boshqa joylardagi) tibbiyot muassasalarida amaliyot oʻtashini, rejadagi maʼruza va oʻquv mashgʻulotlarining nazariy qismini masofaviy shaklda olib borilishini joriy qilish;”.
5. Sogʻliqni saqlash vazirligi boshqa manfaatdor vazirliklar va idoralar bilan birgalikda oʻzlari qabul qilgan normativ-huquqiy hujjatlarni bir oy muddatda ushbu qarorga muvofiqlashtirsin.
6. Mazkur qarorning bajarilishini nazorat qilish Oʻzbekiston Respublikasi sogʻliqni saqlash vaziri B.A. Musayev, Oʻzbekiston Respublikasi moliya vaziri T.A. Ishmetov zimmasiga hamda Vazirlar Mahkamasining Taʼlim, sogʻliqni saqlash va sport masalalari kotibiyatiga yuklansin.
Oʻzbekiston Respublikasining Bosh vaziri A. ARIPOV
Toshkent sh.,
2022-yil 3-oktabr,
561-son