UzbekAI

Ўзбекистон Республикаси Вазирлар Маҳкамасининг

қарори

НИЗОМ

СХЕМАСИ

ТАРКИБИ

«Янги Ўзбекистон юлдузлари» маданият ва санъат миллий мукофоти тўғрисидаги низомни тасдиқлаш ҳақида

Ўзбекистон Республикаси Президентининг «2022 — 2026 йилларга мўлжалланган янги Ўзбекистоннинг тараққиёт стратегияси тўғрисида» 2022 йил 28 январдаги ПФ-60-сон Фармони ҳамда «Маданият ва санъат соҳасини ривожлантиришга доир қўшимча чора-тадбирлар тўғрисида» 2022 йил 2 февралдаги ПҚ-112-сон қарори ижросини таъминлаш мақсадида Вазирлар Маҳкамаси қарор қилади:

1. Ўзбекистон Республикаси Президентининг «Маданият ва санъат соҳасини янада ривожлантиришга доир қўшимча чора-тадбирлар тўғрисида» 2022 йил 2 февралдаги ПҚ-112-сон қарори 10-бандига мувофиқ маданият ва санъат соҳасидаги ижодкорларни ҳар йили бир маротаба тақдирлаш мақсадида Маданият ва санъат миллий мукофоти таъсис этилганлиги маълумот учун қабул қилинсин, шунингдек, Маданият вазирлигининг ушбу Миллий мукофотни «Янги Ўзбекистон юлдузлари» деб номлаш тўғрисидаги таклифи маъқуллансин.

2. Қуйидагиларни назарда тутувчи «Янги Ўзбекистон юлдузлари» маданият ва санъат миллий мукофоти тўғрисидаги низом 1-иловага мувофиқ тасдиқлансин:

«Янги Ўзбекистон юлдузлари» маданият ва санъат миллий мукофоти (кейинги ўринларда — Миллий мукофот) билан тақдирлашни ҳар йили анъанавий тарзда бир марта ижодкорлар ўртасида ўтказиш;

Миллий мукофот номинацияларини (жами 20 та номинация) Миллий мукофот комиссияси хулосаси ва кенг жамоатчилик танлови асосида ҳар йили 10 январдан 10 февралгача танлаб олиш;

танлаб олинган Миллий мукофот номинацияларини ҳар йили 1 мартгача оммавий ахборот воситалари ва ижтимоий тармоқларда эълон қилиш;

мукофотлаш учун номзодларни ҳар йили 1 ноябргача Маданият вазирлиги (ишчи орган)га тақдим этиш;

ишчи орган томонидан ҳар йили 1 — 10 ноябрь кунлари номзодларга оид ҳужжатларни кўриб чиқиб, қарор қабул қилиш учун Комиссияга тақдим этиш;

Комиссия томонидан ҳар йили 10 — 15 ноябрь кунлари номзодларга оид ҳужжатларни кўриб чиқиб, энг яхши натижа кўрсатган 3 нафар номзодларни (ҳар бир номинация бўйича) саралаш;

энг яхши натижа кўрсатган 3 нафар номзодлар рўйхатини (ҳар бир номинация бўйича) Миллий мукофот ғолибини аниқлаш учун ҳар йили 15 декабрдан келгуси йилнинг 10 январь кунига қадар ижтимоий тармоқларга кенг жамоатчилик овоз бериши учун жойлаштириш;

жорий йил ғолибларининг Ўзбекистон Республикаси маданият вазирининг буйруғи асосида тақдирланишини келгуси йил 25 январь куни ташкил этиш.

3. «Янги Ўзбекистон юлдузлари» маданият ва санъат миллий мукофотига тақдим этилган номзодларни кўриб чиқиш бўйича комиссия таркиби 2-иловага мувофиқ тасдиқлансин.

4. Ўзбекистон Республикаси Маданият вазирлиги Ўзбекистон Бадиий академияси ва Ёзувчилар уюшмаси билан биргаликда 2022 йил 1 ноябрга қадар Миллий мукофотнинг статуэткаси ва сертификатлар намунасини ишлаб чиқсин ва тасдиқласин.

5. Белгилаб қўйилсинки, мукофотлаш ва сертификат бланкасини тайёрлаш учун зарур маблағлар 2022 йил учун Ўзбекистон Республикаси Маданият вазирлигининг бюджетдан ташқари маблағлари ҳамда Маданият вазирлигига ажратилган бюджет маблағлари доирасида, шунингдек, Маданият вазирлигининг бюджетдан ташқари жамғармаси маблағлари, жисмоний ва юридик шахсларнинг ҳомийлик хайриялари ҳамда қонунчилик ҳужжатлари билан тақиқланмаган бошқа манбалар ҳисобидан ажратилади.

6. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосари — туризм ва маданий мерос вазири А.А. Абдухакимов ҳамда Ўзбекистон Республикаси маданият вазири О.А. Назарбеков зиммасига юклансин.

Вазирлар Маҳкамасининг 2022 йил 14 октябрдаги 594-сон қарорига 1-ИЛОВА

«Янги Ўзбекистон юлдузлари» маданият ва санъат миллий мукофоти тўғрисида

1-боб. Умумий қоидалар

1. Мазкур Низом мамлакатимиз маданияти ва санъатини юксалтириш, унинг халқаро миқёсдаги нуфузини оширишда салмоқли, серқирра ижоди билан катта ҳисса қўшган истеъдодли ижодкорларни «Янги Ўзбекистон юлдузлари» маданият ва санъат миллий мукофоти (кейинги ўринларда — Мукофот) билан тақдирлаш тартибини белгилайди.

2. Мукофот билан тақдирлаш ҳар йили анъанавий тарзда бир марта ижодкорлар ўртасида ўтказилади.

3. Мукофотга театр, цирк, мусиқа соҳасининг эстрада, анъанавий, академик, фольклор, бастакорлик, композиторлик, рақс, шунингдек, тасвирий ва амалий санъат, бадиий ижод ҳамда маданият ва санъатнинг бошқа йўналишларида фаолият юритаётган соҳа вакиллари орасидан номзодлар кўрсатилиши мумкин.

4. Мукофотга муносиб номзодлар «Янги Ўзбекистон юлдузлари» маданият ва санъат миллий мукофоти комиссияси (кейинги ўринларда — Комиссия) хулосаси ҳамда кенг жамоатчилик танлови асосида танлаб олинади.

Комиссия жамоатчилик асосида фаолият юритади.

Ўзбекистон Республикаси Маданият вазирлиги Комиссиянинг ишчи органи (кейинги ўринларда — ишчи орган) ҳисобланади.

Комиссия томонидан ишчи орган тақдим этган номзодлар ҳақидаги ҳужжатлар ва маълумотлар пухта кўриб чиқилиб, Мукофотга тавсия этиш бўйича қарор қабул қилинади.

Комиссия қарори йиғилиш баёни билан расмийлаштирилади.

5. Мукофот учун номзодларни танлаб олиш жами 20 та тегишли номинациялар асосида ташкил этилади ҳамда уларни аниқлаш қуйидаги тартибда амалга оширилади:

а) ҳар йили 10 январдан 10 февралга қадар маданият ва санъатнинг барча йўналишларидаги номинациялар кенг жамоатчилик муҳокамасига тақдим этилади ҳамда жамоатчилик томонидан энг кўп овоз тўплаган 15 та номинация ҳар йилги Мукофотга тавсия этилади;

б) жамоатчилик томонидан оммавий ахборот воситалари, ижтимоий тармоқлар орқали очиқ овоз бериш натижасига кўра Комиссия 10 кун муддатда тегишли қарор асосида қолган 5 та номинацияни танлаб олади.

Аниқланган номинациялар рўйхатига Комиссиянинг тегишли тавсиясига кўра қўшимча номинациялар киритилиши мумкин.

6. Жамоатчилик ва Комиссия томонидан аниқланган номинациялар ҳақидаги тегишли маълумотлар ҳар йили 1 мартга қадар оммавий ахборот воситалари ва ижтимоий тармоқларда хабарлар жойлаштириш орқали эълон қилинади.

7. Номзодларни кўриб чиқиш ва танлаб олиш қуйидаги икки босқичда амалга оширилади:

биринчи босқич — маданият ва санъат соҳасидаги ижодкорларни йил якуни бўйича ижодий фаолиятида эришган ютуқларидан келиб чиққан ҳолда номзодларни кўриб чиқиш ва танлаб олиш Комиссия томонидан амалга оширилади;

иккинчи босқич — Комиссия хулосасига асосан энг юқори баҳоланган ижодкорлар жамоатчилик танловидан ўтказилади.

8. Мукофот билан тақдирлаш ушбу Низомнинг иловасида келтирилган схемага мувофиқ амалга оширилади.

2-боб. Мукофот билан тақдирлаш учун номзодларни танлаб олиш мезонлари

9. Мукофот билан тақдирлаш учун тавсия этилаётган номзодлар қуйидаги мезонлар асосида танлаб олинади:

жаҳон миқёсидаги кўрик-танлов ва фестивалларда юқори ўринларни эгаллаганлиги;

ўзбек санъати ва маданиятини дунё саҳналарида мунтазам равишда муваффақиятли намойиш этиб келаётганлиги;

муносиб ижодий кадрларни тайёрлаганлиги, ўзининг ўқув адабиётлари, илмий ишлари, катта амалий тажрибаси билан уларни тарбиялашга салмоқли ҳисса қўшганлиги;

ижодий асарлар маданиятимизнинг ўзига хослиги, юксак даражадаги маҳорати ва савияси, миллий санъатимизнинг юксак намуналаридан бохабарлиги билан алоҳида ажралиб турганлиги, халқимиз маънавиятини юксалтириш, мустақиллик ғояларини, жамиятимизда амалга оширилаётган маданий-маърифий ислоҳотлар моҳиятини санъат воситасида тарғиб этишга хизмат қилаётган юксак даражада яратилган ижодий асарлиги;

йил давомида ижодий асарнинг оммалашганлиги;

йил давомида ижодкорларни турли маҳаллий ва тарғибот-ташвиқот тадбирларида қўлга киритган ютуқлари ёки эътироф этилганлиги;

ижодий асарларга юксак бадиий дид билан ёндашилганлиги.

3-боб. Мукофотга номзодларнинг ҳужжатларини қабул қилиш ва кўриб чиқиш тартиби

10. Санъат соҳасидаги ижодкорлар (номзод) ўзи (қонуний вакили) ёки фаолият юритаётган ташкилоти орқали ҳар йили 1 ноябрга қадар аризаларни белгиланган тартибда ишчи органга қуйидаги ҳужжатларни илова қилган ҳолда тақдим этади:

номзоднинг маълумотнома-объективкаси (анкета);

маълумоти тўғрисидаги ҳужжат (диплом) нусхаси (мавжуд бўлса);

номзодга берилган ижодий тавсифнома (тасдиқланган);

оммавий ахборот воситаларида номзод ҳақида берилган телекўрсатув ва радиоэшиттиришларнинг ёки мамлакатимизда ва чет элларда чоп этилган мақолалар ҳаволаси (мавжуд бўлса);

номзоднинг ижодий ишлари, фаолияти ва эришган ютуқларини акс эттирувчи ҳужжатлар (муаллифлик асарлари ёки репертуар рўйхати, видео ва аудио альбомлари, турли тадбирларда қўлга киритган совринли ўринлар учун сертификат ва дипломлар нусхаси) тўплами.

Белгиланган муддатдан кеч тақдим этилган ҳужжатлар қабул қилинмайди.

11. Тақдим этилган ҳужжатларнинг ушбу Низомнинг 10-бандига мувофиқлиги ишчи орган томонидан ҳар йили 1 — 10 ноябрь кунлари ўрганилади ҳамда кўриб чиқиш ва тегишли қарор қабул қилиш учун Комиссияга тақдим этилади.

12. Комиссия ҳар йили 10 — 15 ноябрь кунлари ҳар бир номинациядан энг юқори натижаларга эришган 3 нафар номзодларни саралайди.

13. Комиссия номинациялар бўйича тақдим этилган номзодларнинг ижодий ва меҳнат фаолияти самарадорлиги мазкур Низомнинг 9-бандида кўрсатилган мезонларга тўлиқ мос келмаган тақдирда, ушбу номинацияларга ғолибларни аниқланмаслик юзасидан хулоса қабул қилиши мумкин.

14. Комиссиянинг тегишли қарори билан Мукофотга муносиб деб топилган уч нафар номзодлар тўғрисидаги маълумотлар оммавий ахборот воситалари ва ижтимоий тармоқларда кенг жамоатчилик орасида овоз берилиши учун жойлаштирилади.

Ҳар бир номинация бўйича номзодларга жамоатчилик томонидан берилган жами овозлар сонидан 30 фоизи инобатга олиниб, Комиссиянинг якуний хулосасига қўшилади ва натижалар умумлаштирилади.

15. Овоз бериш жараёни ижтимоий тармоқларда ҳар йили 15 декабрдан келгуси йилнинг 10 кунига қадар ўтказилади.

16. Ишчи орган Комиссия хулосаси ва жамоатчилик овоз бериш натижаларини умумлаштиради ҳамда Мукофотга муносиб деб топилган номзодлар Мукофотни тантанали топшириш маросимига қадар жамоатчиликка эълон қилинмайди.

17. Номзодларнинг умумий натижалари тенг бўлиб қолган ҳолатда Комиссия раиси ҳал қилувчи овозга эга.

18. Мукофотга сазовор бўлган ижодкорларни рағбатлантириш тўғрисида Ўзбекистон Республикаси маданият вазирининг тегишли буйруғи асосида ушбу буйруқ қабул қилинган кунда белгиланган базавий ҳисоблаш миқдорининг 100 баравари миқдорида Маданият вазирлигига ажратилган бюджет маблағлари доирасида, шунингдек Маданият вазирлигининг бюджетдан ташқари жамғармаси маблағлари, жисмоний ва юридик шахсларнинг ҳомийлик хайриялари ҳамда қонунчилик ҳужжатлари билан тақиқланмаган бошқа манбалар ҳисобидан бир марталик пул мукофоти билан моддий рағбатлантирилади ва уларга Мукофот махсус статуэткаси ҳамда сертификати топширилади.

4-боб. Тақдирлаш маросимини ташкил этиш ва ўтказиш

19. Мукофотни топшириш маросими жорий йил ғолибларини тақдирлаш келгуси йил январь ойида Тошкент шаҳрида ўтказилади.

20. Мукофот билан тақдирланадиган маданият ва санъат вакиллари рўйхати республика оммавий ахборот воситаларида эълон қилинади.

5-боб. Якунловчи қоида

21. Ушбу Низом талаблари бузилиши бўйича келиб чиқадиган низолар қонунчилик ҳужжатларида белгиланган тартибда ҳал этилади.

«Янги Ўзбекистон юлдузлари» маданият ва санъат миллий мукофоти тўғрисидаги низомга ИЛОВА

«Янги Ўзбекистон юлдузлари» маданият ва санъат миллий мукофоти билан тақдирлаш

Босқичлар Субъектлар Тадбирлар Муддатлар 1-босқич «Янги Ўзбекистон юлдузлари» маданият ва санъат миллий мукофотига тақдим этилган номзодларни кўриб чиқиш бўйича комиссия, кенг жамоатчилик Мукофот номинацияларини аниқлайди Ҳар йили 10 январдан 10 февралгача 2-босқич Комиссия Номинацияларни оммавий ахборот воситалари ва ижтимоий тармоқларда эълон қилади Ҳар йили 1 мартгача 3-босқич Маданият вазирлиги тизимидаги ташкилотлар ҳамда тегишли вазирлик ва идоралар ёки номзодлар Ариза ва ҳужжатларни Маданият вазирлиги — ишчи органга тақдим этади Ҳар йили 1 ноябргача 4-босқич Маданият вазирлиги — ишчи орган Тақдим этилган номзодлар ҳужжатларини ўрганади ҳамда тегишли қарор қабул қилиш учун Комиссияга тақдим этади Ҳар йили 1 — 10 ноябрь кунлари 5-босқич Комиссия Тақдим этилган номзодларни саралайди Ҳар йили 10 — 15 ноябрь кунлари 6-босқич Комиссия, кенг жамоатчилик Ҳар бир номинация бўйича энг юқори натижаларга эришган 3 нафар номзодлар рўйхатини ижтимоий тармоқларга жойлаштиради ҳамда кенг жамоатчилик орасида овоз берилади Ҳар йили 15 декабрдан келгуси йилнинг 10 январь кунига қадар 7-босқич Маданият вазирлиги Ўзбекистон Республикаси маданият вазирининг тегишли буйруғи асосида мукофотланади ва уни тантанали равишда топширилади Жорий йил ғолибларини тақдирлаш келгуси йил январь ойида

Вазирлар Маҳкамасининг 2022 йил 14 октябрдаги 594-сон қарорига 2-ИЛОВА

«Янги Ўзбекистон юлдузлари» маданият ва санъат миллий мукофотига тақдим этилган номзодларни кўриб чиқиш бўйича комиссия

1. А. Абдухакимов — Ўзбекистон Республикаси Бош вазирининг ўринбосари, Комиссия раиси 2. О. Назарбеков — Ўзбекистон Республикаси маданият вазири, Комиссия раиси ўринбосари 3. М. Ҳожиматов — Республика Маънавият ва маърифат маркази раҳбари 4. А. Нуридинов — Ўзбекистон Бадиий академияси раиси 5. С. Сайидов — Ўзбекистон Ёзувчилар уюшмаси раиси 6. Р. Абдуллаев — Ўзбекистон композиторлари ва бастакорлари уюшмаси раиси 7. М. Йўлчиева — Ўзбекистон қаҳрамони, Ўзбекистон халқ артисти 8. Ф. Зокиров — Ўзбекистон халқ артисти 9. А. Исмоилов — Юнус Ражабий номидаги Мақом ансамбли бадиий раҳбари, Ўзбекистон халқ артисти 10. З. Мадраҳимова — «Баҳор» давлат рақс ансамбли бадиий раҳбари, Ўзбекистонда хизмат кўрсатган артист 11. О. Матёқубов — Юнус Ражабий номидаги Ўзбек миллий мусиқа санъати институти доценти, бахши, Ўзбекистонда хизмат кўрсатган артист 12. К. Ўринбоев — Ўзбекистон давлат консерваторияси ректори, Ўзбекистонда хизмат кўрсатган артист 13. И. Юлдашев — Ўзбекистон давлат санъат ва маданият институти ректори 14. Ш. Тохтасимов — Ўзбекистон давлат хореография академияси ректори 15. А. Мансуров — Ботир Зокиров номидаги Миллий эстрада санъати институти ректори 16. Б. Абдулпаттаев — Ўзбекистон Республикаси Маданият вазирлиги Кадрлар бошқармаси бошлиғи, Комиссия масъул котиби

Ўзбекистон Республикасининг Бош вазири А. АРИПОВ

Тошкент ш.,

2022 йил 14 октябрь,

594-сон

(Қонунчилик маълумотлари миллий базаси, 15.10.2022 й., 09/22/594/0922-сон)

lex.uz

Oʻzbekiston Respublikasi Vazirlar Mahkamasining

qarori

NIZOM

SXEMASI

TARKIBI

“Yangi Oʻzbekiston yulduzlari” madaniyat va sanʼat milliy mukofoti toʻgʻrisidagi nizomni tasdiqlash haqida

Oʻzbekiston Respublikasi Prezidentining “2022 — 2026-yillarga moʻljallangan yangi Oʻzbekistonning taraqqiyot strategiyasi toʻgʻrisida” 2022-yil 28-yanvardagi PF-60-son Farmoni hamda “Madaniyat va sanʼat sohasini rivojlantirishga doir qoʻshimcha chora-tadbirlar toʻgʻrisida” 2022-yil 2-fevraldagi PQ-112-son qarori ijrosini taʼminlash maqsadida Vazirlar Mahkamasi qaror qiladi:

1. Oʻzbekiston Respublikasi Prezidentining “Madaniyat va sanʼat sohasini yanada rivojlantirishga doir qoʻshimcha chora-tadbirlar toʻgʻrisida” 2022-yil 2-fevraldagi PQ-112-son qarori 10-bandiga muvofiq madaniyat va sanʼat sohasidagi ijodkorlarni har yili bir marotaba taqdirlash maqsadida Madaniyat va sanʼat milliy mukofoti taʼsis etilganligi maʼlumot uchun qabul qilinsin, shuningdek, Madaniyat vazirligining ushbu Milliy mukofotni “Yangi Oʻzbekiston yulduzlari” deb nomlash toʻgʻrisidagi taklifi maʼqullansin.

2. Quyidagilarni nazarda tutuvchi “Yangi Oʻzbekiston yulduzlari” madaniyat va sanʼat milliy mukofoti toʻgʻrisidagi nizom 1-ilovaga muvofiq tasdiqlansin:

“Yangi Oʻzbekiston yulduzlari” madaniyat va sanʼat milliy mukofoti (keyingi oʻrinlarda — Milliy mukofot) bilan taqdirlashni har yili anʼanaviy tarzda bir marta ijodkorlar oʻrtasida oʻtkazish;

Milliy mukofot nominatsiyalarini (jami 20 ta nominatsiya) Milliy mukofot komissiyasi xulosasi va keng jamoatchilik tanlovi asosida har yili 10-yanvardan 10-fevralgacha tanlab olish;

tanlab olingan Milliy mukofot nominatsiyalarini har yili 1-martgacha ommaviy axborot vositalari va ijtimoiy tarmoqlarda eʼlon qilish;

mukofotlash uchun nomzodlarni har yili 1-noyabrgacha Madaniyat vazirligi (ishchi organ)ga taqdim etish;

ishchi organ tomonidan har yili 1 — 10-noyabr kunlari nomzodlarga oid hujjatlarni koʻrib chiqib, qaror qabul qilish uchun Komissiyaga taqdim etish;

Komissiya tomonidan har yili 10 — 15-noyabr kunlari nomzodlarga oid hujjatlarni koʻrib chiqib, eng yaxshi natija koʻrsatgan 3 nafar nomzodlarni (har bir nominatsiya boʻyicha) saralash;

eng yaxshi natija koʻrsatgan 3 nafar nomzodlar roʻyxatini (har bir nominatsiya boʻyicha) Milliy mukofot gʻolibini aniqlash uchun har yili 15-dekabrdan kelgusi yilning 10-yanvar kuniga qadar ijtimoiy tarmoqlarga keng jamoatchilik ovoz berishi uchun joylashtirish;

joriy yil gʻoliblarining Oʻzbekiston Respublikasi madaniyat vazirining buyrugʻi asosida taqdirlanishini kelgusi yil 25-yanvar kuni tashkil etish.

3. “Yangi Oʻzbekiston yulduzlari” madaniyat va sanʼat milliy mukofotiga taqdim etilgan nomzodlarni koʻrib chiqish boʻyicha komissiya tarkibi 2-ilovaga muvofiq tasdiqlansin.

4. Oʻzbekiston Respublikasi Madaniyat vazirligi Oʻzbekiston Badiiy akademiyasi va Yozuvchilar uyushmasi bilan birgalikda 2022-yil 1-noyabrga qadar Milliy mukofotning statuetkasi va sertifikatlar namunasini ishlab chiqsin va tasdiqlasin.

5. Belgilab qoʻyilsinki, mukofotlash va sertifikat blankasini tayyorlash uchun zarur mablagʻlar 2022-yil uchun Oʻzbekiston Respublikasi Madaniyat vazirligining budjetdan tashqari mablagʻlari hamda Madaniyat vazirligiga ajratilgan budjet mablagʻlari doirasida, shuningdek, Madaniyat vazirligining budjetdan tashqari jamgʻarmasi mablagʻlari, jismoniy va yuridik shaxslarning homiylik xayriyalari hamda qonunchilik hujjatlari bilan taqiqlanmagan boshqa manbalar hisobidan ajratiladi.

6. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari — turizm va madaniy meros vaziri A.A. Abduxakimov hamda Oʻzbekiston Respublikasi madaniyat vaziri O.A. Nazarbekov zimmasiga yuklansin.

Vazirlar Mahkamasining 2022-yil 14-oktabrdagi 594-son qaroriga 1-ILOVA

“Yangi Oʻzbekiston yulduzlari” madaniyat va sanʼat milliy mukofoti toʻgʻrisida

1-bob. Umumiy qoidalar

1. Mazkur Nizom mamlakatimiz madaniyati va sanʼatini yuksaltirish, uning xalqaro miqyosdagi nufuzini oshirishda salmoqli, serqirra ijodi bilan katta hissa qoʻshgan isteʼdodli ijodkorlarni “Yangi Oʻzbekiston yulduzlari” madaniyat va sanʼat milliy mukofoti (keyingi oʻrinlarda — Mukofot) bilan taqdirlash tartibini belgilaydi.

2. Mukofot bilan taqdirlash har yili anʼanaviy tarzda bir marta ijodkorlar oʻrtasida oʻtkaziladi.

3. Mukofotga teatr, sirk, musiqa sohasining estrada, anʼanaviy, akademik, folklor, bastakorlik, kompozitorlik, raqs, shuningdek, tasviriy va amaliy sanʼat, badiiy ijod hamda madaniyat va sanʼatning boshqa yoʻnalishlarida faoliyat yuritayotgan soha vakillari orasidan nomzodlar koʻrsatilishi mumkin.

4. Mukofotga munosib nomzodlar “Yangi Oʻzbekiston yulduzlari” madaniyat va sanʼat milliy mukofoti komissiyasi (keyingi oʻrinlarda — Komissiya) xulosasi hamda keng jamoatchilik tanlovi asosida tanlab olinadi.

Komissiya jamoatchilik asosida faoliyat yuritadi.

Oʻzbekiston Respublikasi Madaniyat vazirligi Komissiyaning ishchi organi (keyingi oʻrinlarda — ishchi organ) hisoblanadi.

Komissiya tomonidan ishchi organ taqdim etgan nomzodlar haqidagi hujjatlar va maʼlumotlar puxta koʻrib chiqilib, Mukofotga tavsiya etish boʻyicha qaror qabul qilinadi.

Komissiya qarori yigʻilish bayoni bilan rasmiylashtiriladi.

5. Mukofot uchun nomzodlarni tanlab olish jami 20 ta tegishli nominatsiyalar asosida tashkil etiladi hamda ularni aniqlash quyidagi tartibda amalga oshiriladi:

a) har yili 10-yanvardan 10-fevralga qadar madaniyat va sanʼatning barcha yoʻnalishlaridagi nominatsiyalar keng jamoatchilik muhokamasiga taqdim etiladi hamda jamoatchilik tomonidan eng koʻp ovoz toʻplagan 15 ta nominatsiya har yilgi Mukofotga tavsiya etiladi;

b) jamoatchilik tomonidan ommaviy axborot vositalari, ijtimoiy tarmoqlar orqali ochiq ovoz berish natijasiga koʻra Komissiya 10 kun muddatda tegishli qaror asosida qolgan 5 ta nominatsiyani tanlab oladi.

Aniqlangan nominatsiyalar roʻyxatiga Komissiyaning tegishli tavsiyasiga koʻra qoʻshimcha nominatsiyalar kiritilishi mumkin.

6. Jamoatchilik va Komissiya tomonidan aniqlangan nominatsiyalar haqidagi tegishli maʼlumotlar har yili 1-martga qadar ommaviy axborot vositalari va ijtimoiy tarmoqlarda xabarlar joylashtirish orqali eʼlon qilinadi.

7. Nomzodlarni koʻrib chiqish va tanlab olish quyidagi ikki bosqichda amalga oshiriladi:

birinchi bosqich — madaniyat va sanʼat sohasidagi ijodkorlarni yil yakuni boʻyicha ijodiy faoliyatida erishgan yutuqlaridan kelib chiqqan holda nomzodlarni koʻrib chiqish va tanlab olish Komissiya tomonidan amalga oshiriladi;

ikkinchi bosqich — Komissiya xulosasiga asosan eng yuqori baholangan ijodkorlar jamoatchilik tanlovidan oʻtkaziladi.

8. Mukofot bilan taqdirlash ushbu Nizomning ilovasida keltirilgan sxemaga muvofiq amalga oshiriladi.

2-bob. Mukofot bilan taqdirlash uchun nomzodlarni tanlab olish mezonlari

9. Mukofot bilan taqdirlash uchun tavsiya etilayotgan nomzodlar quyidagi mezonlar asosida tanlab olinadi:

jahon miqyosidagi koʻrik-tanlov va festivallarda yuqori oʻrinlarni egallaganligi;

oʻzbek sanʼati va madaniyatini dunyo sahnalarida muntazam ravishda muvaffaqiyatli namoyish etib kelayotganligi;

munosib ijodiy kadrlarni tayyorlaganligi, oʻzining oʻquv adabiyotlari, ilmiy ishlari, katta amaliy tajribasi bilan ularni tarbiyalashga salmoqli hissa qoʻshganligi;

ijodiy asarlar madaniyatimizning oʻziga xosligi, yuksak darajadagi mahorati va saviyasi, milliy sanʼatimizning yuksak namunalaridan boxabarligi bilan alohida ajralib turganligi, xalqimiz maʼnaviyatini yuksaltirish, mustaqillik gʻoyalarini, jamiyatimizda amalga oshirilayotgan madaniy-maʼrifiy islohotlar mohiyatini sanʼat vositasida targʻib etishga xizmat qilayotgan yuksak darajada yaratilgan ijodiy asarligi;

yil davomida ijodiy asarning ommalashganligi;

yil davomida ijodkorlarni turli mahalliy va targʻibot-tashviqot tadbirlarida qoʻlga kiritgan yutuqlari yoki eʼtirof etilganligi;

ijodiy asarlarga yuksak badiiy did bilan yondashilganligi.

3-bob. Mukofotga nomzodlarning hujjatlarini qabul qilish va koʻrib chiqish tartibi

10. Sanʼat sohasidagi ijodkorlar (nomzod) oʻzi (qonuniy vakili) yoki faoliyat yuritayotgan tashkiloti orqali har yili 1-noyabrga qadar arizalarni belgilangan tartibda ishchi organga quyidagi hujjatlarni ilova qilgan holda taqdim etadi:

nomzodning maʼlumotnoma-obyektivkasi (anketa);

maʼlumoti toʻgʻrisidagi hujjat (diplom) nusxasi (mavjud boʻlsa);

nomzodga berilgan ijodiy tavsifnoma (tasdiqlangan);

ommaviy axborot vositalarida nomzod haqida berilgan telekoʻrsatuv va radioeshittirishlarning yoki mamlakatimizda va chet ellarda chop etilgan maqolalar havolasi (mavjud boʻlsa);

nomzodning ijodiy ishlari, faoliyati va erishgan yutuqlarini aks ettiruvchi hujjatlar (mualliflik asarlari yoki repertuar roʻyxati, video va audio albomlari, turli tadbirlarda qoʻlga kiritgan sovrinli oʻrinlar uchun sertifikat va diplomlar nusxasi) toʻplami.

Belgilangan muddatdan kech taqdim etilgan hujjatlar qabul qilinmaydi.

11. Taqdim etilgan hujjatlarning ushbu Nizomning 10-bandiga muvofiqligi ishchi organ tomonidan har yili 1 — 10-noyabr kunlari oʻrganiladi hamda koʻrib chiqish va tegishli qaror qabul qilish uchun Komissiyaga taqdim etiladi.

12. Komissiya har yili 10 — 15-noyabr kunlari har bir nominatsiyadan eng yuqori natijalarga erishgan 3 nafar nomzodlarni saralaydi.

13. Komissiya nominatsiyalar boʻyicha taqdim etilgan nomzodlarning ijodiy va mehnat faoliyati samaradorligi mazkur Nizomning 9-bandida koʻrsatilgan mezonlarga toʻliq mos kelmagan taqdirda, ushbu nominatsiyalarga gʻoliblarni aniqlanmaslik yuzasidan xulosa qabul qilishi mumkin.

14. Komissiyaning tegishli qarori bilan Mukofotga munosib deb topilgan uch nafar nomzodlar toʻgʻrisidagi maʼlumotlar ommaviy axborot vositalari va ijtimoiy tarmoqlarda keng jamoatchilik orasida ovoz berilishi uchun joylashtiriladi.

Har bir nominatsiya boʻyicha nomzodlarga jamoatchilik tomonidan berilgan jami ovozlar sonidan 30 foizi inobatga olinib, Komissiyaning yakuniy xulosasiga qoʻshiladi va natijalar umumlashtiriladi.

15. Ovoz berish jarayoni ijtimoiy tarmoqlarda har yili 15-dekabrdan kelgusi yilning 10 kuniga qadar oʻtkaziladi.

16. Ishchi organ Komissiya xulosasi va jamoatchilik ovoz berish natijalarini umumlashtiradi hamda Mukofotga munosib deb topilgan nomzodlar Mukofotni tantanali topshirish marosimiga qadar jamoatchilikka eʼlon qilinmaydi.

17. Nomzodlarning umumiy natijalari teng boʻlib qolgan holatda Komissiya raisi hal qiluvchi ovozga ega.

18. Mukofotga sazovor boʻlgan ijodkorlarni ragʻbatlantirish toʻgʻrisida Oʻzbekiston Respublikasi madaniyat vazirining tegishli buyrugʻi asosida ushbu buyruq qabul qilingan kunda belgilangan bazaviy hisoblash miqdorining 100 baravari miqdorida Madaniyat vazirligiga ajratilgan budjet mablagʻlari doirasida, shuningdek Madaniyat vazirligining budjetdan tashqari jamgʻarmasi mablagʻlari, jismoniy va yuridik shaxslarning homiylik xayriyalari hamda qonunchilik hujjatlari bilan taqiqlanmagan boshqa manbalar hisobidan bir martalik pul mukofoti bilan moddiy ragʻbatlantiriladi va ularga Mukofot maxsus statuetkasi hamda sertifikati topshiriladi.

4-bob. Taqdirlash marosimini tashkil etish va oʻtkazish

19. Mukofotni topshirish marosimi joriy yil gʻoliblarini taqdirlash kelgusi yil yanvar oyida Toshkent shahrida oʻtkaziladi.

20. Mukofot bilan taqdirlanadigan madaniyat va sanʼat vakillari roʻyxati respublika ommaviy axborot vositalarida eʼlon qilinadi.

5-bob. Yakunlovchi qoida

21. Ushbu Nizom talablari buzilishi boʻyicha kelib chiqadigan nizolar qonunchilik hujjatlarida belgilangan tartibda hal etiladi.

“Yangi Oʻzbekiston yulduzlari” madaniyat va sanʼat milliy mukofoti toʻgʻrisidagi nizomga ILOVA

“Yangi Oʻzbekiston yulduzlari” madaniyat va sanʼat milliy mukofoti bilan taqdirlash

Bosqichlar Subyektlar Tadbirlar Muddatlar 1-bosqich “Yangi Oʻzbekiston yulduzlari” madaniyat va sanʼat milliy mukofotiga taqdim etilgan nomzodlarni koʻrib chiqish boʻyicha komissiya, keng jamoatchilik Mukofot nominatsiyalarini aniqlaydi Har yili 10-yanvardan 10-fevralgacha 2-bosqich Komissiya Nominatsiyalarni ommaviy axborot vositalari va ijtimoiy tarmoqlarda eʼlon qiladi Har yili 1-martgacha 3-bosqich Madaniyat vazirligi tizimidagi tashkilotlar hamda tegishli vazirlik va idoralar yoki nomzodlar Ariza va hujjatlarni Madaniyat vazirligi — ishchi organga taqdim etadi Har yili 1-noyabrgacha 4-bosqich Madaniyat vazirligi — ishchi organ Taqdim etilgan nomzodlar hujjatlarini oʻrganadi hamda tegishli qaror qabul qilish uchun Komissiyaga taqdim etadi Har yili 1 — 10-noyabr kunlari 5-bosqich Komissiya Taqdim etilgan nomzodlarni saralaydi Har yili 10 — 15-noyabr kunlari 6-bosqich Komissiya, keng jamoatchilik Har bir nominatsiya boʻyicha eng yuqori natijalarga erishgan 3 nafar nomzodlar roʻyxatini ijtimoiy tarmoqlarga joylashtiradi hamda keng jamoatchilik orasida ovoz beriladi Har yili 15-dekabrdan kelgusi yilning 10-yanvar kuniga qadar 7-bosqich Madaniyat vazirligi Oʻzbekiston Respublikasi madaniyat vazirining tegishli buyrugʻi asosida mukofotlanadi va uni tantanali ravishda topshiriladi Joriy yil gʻoliblarini taqdirlash kelgusi yil yanvar oyida

Vazirlar Mahkamasining 2022-yil 14-oktabrdagi 594-son qaroriga 2-ILOVA

“Yangi Oʻzbekiston yulduzlari” madaniyat va sanʼat milliy mukofotiga taqdim etilgan nomzodlarni koʻrib chiqish boʻyicha komissiya

1. A. Abduxakimov — Oʻzbekiston Respublikasi Bosh vazirining oʻrinbosari, Komissiya raisi 2. O. Nazarbekov — Oʻzbekiston Respublikasi madaniyat vaziri, Komissiya raisi oʻrinbosari 3. M. Hojimatov — Respublika Maʼnaviyat va maʼrifat markazi rahbari 4. A. Nuridinov — Oʻzbekiston Badiiy akademiyasi raisi 5. S. Sayidov — Oʻzbekiston Yozuvchilar uyushmasi raisi 6. R. Abdullayev — Oʻzbekiston kompozitorlari va bastakorlari uyushmasi raisi 7. M. Yoʻlchiyeva — Oʻzbekiston qahramoni, Oʻzbekiston xalq artisti 8. F. Zokirov — Oʻzbekiston xalq artisti 9. A. Ismoilov — Yunus Rajabiy nomidagi Maqom ansambli badiiy rahbari, Oʻzbekiston xalq artisti 10. Z. Madrahimova — “Bahor” davlat raqs ansambli badiiy rahbari, Oʻzbekistonda xizmat koʻrsatgan artist 11. O. Matyoqubov — Yunus Rajabiy nomidagi Oʻzbek milliy musiqa sanʼati instituti dotsenti, baxshi, Oʻzbekistonda xizmat koʻrsatgan artist 12. K. Oʻrinboyev — Oʻzbekiston davlat konservatoriyasi rektori, Oʻzbekistonda xizmat koʻrsatgan artist 13. I. Yuldashev — Oʻzbekiston davlat sanʼat va madaniyat instituti rektori 14. Sh. Toxtasimov — Oʻzbekiston davlat xoreografiya akademiyasi rektori 15. A. Mansurov — Botir Zokirov nomidagi Milliy estrada sanʼati instituti rektori 16. B. Abdulpattayev — Oʻzbekiston Respublikasi Madaniyat vazirligi Kadrlar boshqarmasi boshligʻi, Komissiya masʼul kotibi

Oʻzbekiston Respublikasining Bosh vaziri A. ARIPOV

Toshkent sh.,

2022-yil 14-oktabr,

594-son

(Qonunchilik maʼlumotlari milliy bazasi, 15.10.2022-y., 09/22/594/0922-son)

lex.uz