📅 2022-yil 27-oktabr · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2022 йил 27 октябрь · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 27 октября 2022 г. · Постановления Кабинета Министров
Официальный текст. Официальный документ. Редакционные примечания не включены.
📅 27 October 2022 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
Фуқаролик ҳолати далолатномаларини ёзиш органлари фаолиятини янада такомиллаштириш чора-тадбирлари тўғрисида
Мамлакатимизда сўнгги йилларда фуқаролик ҳолати далолатнома ёзувларини қайд этиш соҳасида бир қатор ислоҳотлар амалга оширилди. Хусусан, Ўзбекистон Республикаси Президентининг 2021 йил 23 мартдаги ПФ-6191-сон Фармонига асосан фуқаролик ҳолати далолатномаларини қайд этиш ва никоҳланувчи шахсларни тиббий кўрикдан ўтказиш экстерриториал тамойил асосида амалга оширилиши белгиланди.
Туғилиш ва ўлим ҳолатини комплекс давлат хизмати сифатида кўрсатиш тартиби жорий этилди ва статистика органларига қоғоз шаклидаги далолатнома ёзувлари ҳақидаги ҳисоботларни топшириш амалиёти бекор қилинди.
Фуқаролик ҳолати далолатномаларини ёзиш органларининг архивларида қоғоз ташувчиларда сақланаётган қарийб 60 млн фуқаролик ҳолати далолатнома ёзувлари рақамлаштирилди.
Шу билан бирга, ушбу соҳада айрим тизимли муаммолар мавжуд. Хусусан, фуқаролар томонидан экстерриториал тамойил асосида республика бўйича ўзлари хоҳлаган ФҲДЁ органига мурожаат қилиниб, давлат хизматларидан фойдаланишлари натижасида Тошкент шаҳри ва вилоятлар марказларидаги ФҲДЁ бўлимларига фуқароларнинг мурожаатлари сони тобора ортиб боряпти.
Айни вақтда, республикада фаолият юритаётган 8 та никоҳ уйларида эса жами 20 та штат бирлиги мавжуд бўлган ҳолда, улар томонидан фақат никоҳни қайд қилиш билан боғлиқ ҳаракатлар амалга оширилмоқда. ФҲДЁ бўлимларида эса никоҳни қайд этиш билан бирга, туғилиш, никоҳдан ажратиш ва ўлимни қайд этиш бўйича ҳам давлат хизматлари кўрсатилади.
Шунга кўра, айрим ҳудудлардаги ФҲДЁ бўлимларини республикадаги мавжуд никоҳ уйлари штат бирликлари ҳисобидан қўшимча штат бирликлари билан таъминлашга эҳтиёж юзага келмоқда.
Ўзбекистон Республикаси Президентининг 2021 йил 23 мартдаги ПФ-6191-сон Фармонига мувофиқ фуқаролик ҳолати далолатномаларини экстерриториал тамойил асосида қайд этиш тартиби жорий этилганлиги муносабати билан фуқаролик ҳолати далолатномаларини ёзиш органларининг штат бирликларини мақбуллаштириш, ушбу соҳада фуқароларга кўрсатилаётган давлат хизматлари сифатини ошириш мақсадида Вазирлар Маҳкамаси қарор қилади:
1. Вазирлар Маҳкамасининг 2011 йил 30 декабрдаги 346-сон қарори билан тасдиқланган Фуқаролик ҳолати далолатномаларини ёзиш органлари ходимларининг сонини белгилаш тартиби тўғрисидаги низомнинг 2-бандига мувофиқ туман ва шаҳар фуқаролик ҳолати далолатномаларини ёзиш (кейинги ўринларда — ФҲДЁ) бўлимлари, никоҳ уйлари ҳамда Қорақалпоғистон Республикаси Адлия вазирлиги, вилоятлар ва Тошкент шаҳар адлия бошқармаларининг ФҲДЁ архивлари ФҲДЁ органлари ҳисобланиши маълумот учун қабул қилинсин.
2. Тошкент, Самарқанд, Бухоро, Қарши ва Гулистон шаҳарларидаги мавжуд никоҳ уйлари фаолияти тугатилиб, ушбу никоҳ уйлари ФҲДЁ бўлимлари этиб қайта номлансин.
3. Адлия вазирлиги:
ушбу қарорнинг 2-бандида назарда тутилган ФҲДЁ бўлимлари фаолиятини самарали йўлга қўйиш чораларини кўрсин;
жорий йил якуни билан ушбу қарорнинг 2-бандида назарда тутилган ФҲДЁ бўлимларининг иш ҳажмини ўргансин ва заруратга кўра, ходимлар сонини белгилаш тўғрисидаги таклифларни Вазирлар Маҳкамасининг 2011 йил 30 декабрдаги 346-сон қарори билан тасдиқланган Фуқаролик ҳолати далолатномаларини ёзиш органлари ходимларининг сонини белгилаш тартиби тўғрисидаги низомга мувофиқ Молия вазирлигига киритсин;
бошқа манфаатдор вазирлик ва идоралар билан биргаликда ўзлари қабул қилган норматив-ҳуқуқий ҳужжатларни икки ой муддатда ушбу қарорга мувофиқлаштирсин.
4. Ўзбекистон Республикаси Ҳукуматининг айрим қарорларига иловага мувофиқ ўзгартириш ва қўшимчалар киритилсин.
5. Мазкур қарорнинг бажарилишини назорат қилиш Ўзбекистон Республикаси адлия вазири Р.К. Давлетов зиммасига юклансин.
Вазирлар Маҳкамасининг 2022 йил 27 октябрдаги 623-сон қарорига ИЛОВА
Ўзбекистон Республикаси Ҳукуматининг айрим қарорларига киритилаётган ўзгартириш ва қўшимчалар
1. Вазирлар Маҳкамасининг 2011 йил 29 мартдаги 93-сон қарори билан тасдиқланган Ўзбекистон Республикаси адлия органлари ва муассасалари ходимларининг мартаба даражалари тўғрисидаги низомнинг 4-банди саккизинчи хатбошисидан «ва никоҳ уйлари» сўзлари чиқариб ташлансин.
4. Вазирлар Маҳкамасининг «Вилоятлар, шаҳарлар ва туманлар ҳокимликлари бошқарув аппаратлари тўғрисидаги намунавий низомларни тасдиқлаш ҳақида» 2016 йил 27 апрелдаги 123-сон қарорига 1-илованинг 6-банди ўн иккинчи хатбошисидан , 2-илованинг 6-банди ўнинчи хатбошисидан ҳамда 3-илованинг 6-банди ўнинчи хатбошисидан «ва никоҳ уйлари» сўзлари чиқариб ташлансин.
6. Вазирлар Маҳкамасининг «Ҳуқуқий ахборотни тарқатиш ва ундан фойдаланишни таъминлаш тўғрисида»ги Ўзбекистон Республикаси Қонунини амалга ошириш чора-тадбирлари тўғрисида» 2017 йил 22 декабрдаги 1013-сон қарорининг 5-банди қуйидаги мазмундаги хатбоши билан тўлдирилсин:
«вазирлик ва идоралар, маҳаллий ижро этувчи ҳокимият органлари томонидан ҳуқуқий ахборотни тарқатиш ва ундан фойдаланишни таъминлаш бўйича идоравий норматив-ҳуқуқий база шакллантирилганлиги ҳамда ушбу соҳада қабул қилинган буйруқ (қарор)лар асосида амалга оширилаётган ишларнинг ҳолатини мунтазам мониторинг ва таҳлил қилиб борсин».
Ўзбекистон Республикасининг Бош вазири А. АРИПОВ
Тошкент ш.,
2022 йил 27 октябрь,
623-сон
Oʻzbekiston Respublikasi Vazirlar Mahkamasining
qarori
Fuqarolik holati dalolatnomalarini yozish organlari faoliyatini yanada takomillashtirish chora-tadbirlari toʻgʻrisida
Mamlakatimizda soʻnggi yillarda fuqarolik holati dalolatnoma yozuvlarini qayd etish sohasida bir qator islohotlar amalga oshirildi. Xususan, Oʻzbekiston Respublikasi Prezidentining 2021-yil 23-martdagi PF-6191-son Farmoniga asosan fuqarolik holati dalolatnomalarini qayd etish va nikohlanuvchi shaxslarni tibbiy koʻrikdan oʻtkazish eksterritorial tamoyil asosida amalga oshirilishi belgilandi.
Tugʻilish va oʻlim holatini kompleks davlat xizmati sifatida koʻrsatish tartibi joriy etildi va statistika organlariga qogʻoz shaklidagi dalolatnoma yozuvlari haqidagi hisobotlarni topshirish amaliyoti bekor qilindi.
Fuqarolik holati dalolatnomalarini yozish organlarining arxivlarida qogʻoz tashuvchilarda saqlanayotgan qariyb 60 mln fuqarolik holati dalolatnoma yozuvlari raqamlashtirildi.
Shu bilan birga, ushbu sohada ayrim tizimli muammolar mavjud. Xususan, fuqarolar tomonidan eksterritorial tamoyil asosida respublika boʻyicha oʻzlari xohlagan FHDY organiga murojaat qilinib, davlat xizmatlaridan foydalanishlari natijasida Toshkent shahri va viloyatlar markazlaridagi FHDY boʻlimlariga fuqarolarning murojaatlari soni tobora ortib boryapti.
Ayni vaqtda, respublikada faoliyat yuritayotgan 8 ta nikoh uylarida esa jami 20 ta shtat birligi mavjud boʻlgan holda, ular tomonidan faqat nikohni qayd qilish bilan bogʻliq harakatlar amalga oshirilmoqda. FHDY boʻlimlarida esa nikohni qayd etish bilan birga, tugʻilish, nikohdan ajratish va oʻlimni qayd etish boʻyicha ham davlat xizmatlari koʻrsatiladi.
Shunga koʻra, ayrim hududlardagi FHDY boʻlimlarini respublikadagi mavjud nikoh uylari shtat birliklari hisobidan qoʻshimcha shtat birliklari bilan taʼminlashga ehtiyoj yuzaga kelmoqda.
Oʻzbekiston Respublikasi Prezidentining 2021-yil 23-martdagi PF-6191-son Farmoniga muvofiq fuqarolik holati dalolatnomalarini eksterritorial tamoyil asosida qayd etish tartibi joriy etilganligi munosabati bilan fuqarolik holati dalolatnomalarini yozish organlarining shtat birliklarini maqbullashtirish, ushbu sohada fuqarolarga koʻrsatilayotgan davlat xizmatlari sifatini oshirish maqsadida Vazirlar Mahkamasi qaror qiladi:
1. Vazirlar Mahkamasining 2011-yil 30-dekabrdagi 346-son qarori bilan tasdiqlangan Fuqarolik holati dalolatnomalarini yozish organlari xodimlarining sonini belgilash tartibi toʻgʻrisidagi nizomning 2-bandiga muvofiq tuman va shahar fuqarolik holati dalolatnomalarini yozish (keyingi oʻrinlarda — FHDY) boʻlimlari, nikoh uylari hamda Qoraqalpogʻiston Respublikasi Adliya vazirligi, viloyatlar va Toshkent shahar adliya boshqarmalarining FHDY arxivlari FHDY organlari hisoblanishi maʼlumot uchun qabul qilinsin.
2. Toshkent, Samarqand, Buxoro, Qarshi va Guliston shaharlaridagi mavjud nikoh uylari faoliyati tugatilib, ushbu nikoh uylari FHDY boʻlimlari etib qayta nomlansin.
3. Adliya vazirligi:
ushbu qarorning 2-bandida nazarda tutilgan FHDY boʻlimlari faoliyatini samarali yoʻlga qoʻyish choralarini koʻrsin;
joriy yil yakuni bilan ushbu qarorning 2-bandida nazarda tutilgan FHDY boʻlimlarining ish hajmini oʻrgansin va zaruratga koʻra, xodimlar sonini belgilash toʻgʻrisidagi takliflarni Vazirlar Mahkamasining 2011-yil 30-dekabrdagi 346-son qarori bilan tasdiqlangan Fuqarolik holati dalolatnomalarini yozish organlari xodimlarining sonini belgilash tartibi toʻgʻrisidagi nizomga muvofiq Moliya vazirligiga kiritsin;
boshqa manfaatdor vazirlik va idoralar bilan birgalikda oʻzlari qabul qilgan normativ-huquqiy hujjatlarni ikki oy muddatda ushbu qarorga muvofiqlashtirsin.
4. Oʻzbekiston Respublikasi Hukumatining ayrim qarorlariga ilovaga muvofiq oʻzgartirish va qoʻshimchalar kiritilsin.
5. Mazkur qarorning bajarilishini nazorat qilish Oʻzbekiston Respublikasi adliya vaziri R.K. Davletov zimmasiga yuklansin.
Vazirlar Mahkamasining 2022-yil 27-oktabrdagi 623-son qaroriga ILOVA
Oʻzbekiston Respublikasi Hukumatining ayrim qarorlariga kiritilayotgan oʻzgartirish va qoʻshimchalar
1. Vazirlar Mahkamasining 2011-yil 29-martdagi 93-son qarori bilan tasdiqlangan Oʻzbekiston Respublikasi adliya organlari va muassasalari xodimlarining martaba darajalari toʻgʻrisidagi nizomning 4-bandi sakkizinchi xatboshisidan “va nikoh uylari” soʻzlari chiqarib tashlansin.
4. Vazirlar Mahkamasining “Viloyatlar, shaharlar va tumanlar hokimliklari boshqaruv apparatlari toʻgʻrisidagi namunaviy nizomlarni tasdiqlash haqida” 2016-yil 27-apreldagi 123-son qaroriga 1-ilovaning 6-bandi oʻn ikkinchi xatboshisidan , 2-ilovaning 6-bandi oʻninchi xatboshisidan hamda 3-ilovaning 6-bandi oʻninchi xatboshisidan “va nikoh uylari” soʻzlari chiqarib tashlansin.
6. Vazirlar Mahkamasining “Huquqiy axborotni tarqatish va undan foydalanishni taʼminlash toʻgʻrisida”gi Oʻzbekiston Respublikasi Qonunini amalga oshirish chora-tadbirlari toʻgʻrisida” 2017-yil 22-dekabrdagi 1013-son qarorining 5-bandi quyidagi mazmundagi xatboshi bilan toʻldirilsin:
“vazirlik va idoralar, mahalliy ijro etuvchi hokimiyat organlari tomonidan huquqiy axborotni tarqatish va undan foydalanishni taʼminlash boʻyicha idoraviy normativ-huquqiy baza shakllantirilganligi hamda ushbu sohada qabul qilingan buyruq (qaror)lar asosida amalga oshirilayotgan ishlarning holatini muntazam monitoring va tahlil qilib borsin”.
Oʻzbekiston Respublikasining Bosh vaziri A. ARIPOV
Toshkent sh.,
2022-yil 27-oktabr,
623-son