📅 2022-yil 2-noyabr · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2022 йил 2 ноябрь · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 2 ноября 2022 г. · Постановления Кабинета Министров
Официальный текст. Официальный документ. Редакционные примечания не включены.
📅 2 November 2022 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
РЎЙХАТИ
Маданият ва санъат муассасаларини малакали мутахассислар билан таъминлаш ва уларни давлат томонидан тизимли қўллаб-қувватлаш тўғрисида
Бахшичилик, анъанавий хонандалик, созандалик ва фортепиано ижрочилик йўналишларида юқори малакали кадрлар тайёрлашни кенгайтириш ва таҳсил олаётган талабаларни давлат томонидан қўллаб-қувватлаш, шунингдек, 2022 йил 30 июнь — Ёшлар куни муносабати билан бўлиб ўтган учрашувларда Ўзбекистон Республикаси Президенти томонидан илгари сурилган ташаббусларни амалга ошириш мақсадида Вазирлар Маҳкамаси қарор қилади:
1. Ўзбекистон Республикаси Президенти Ш.М. Мирзиёев раҳбарлигида 30 июнь — Ёшлар куни муносабати билан бўлиб ўтган учрашувда берилган топшириқларнинг 54-сонли баёни 3-бандига мувофиқ, 2022/2023 ўқув йилидан бошлаб:
мақом хонандалиги, мақом чолғу ижрочилиги ва бахшичилик йўналишларига янги қабул қилинган талабаларнинг шартнома тўловлари давлат томонидан тўлиқ қоплаб берилиши;
фортепиано ижрочиларини тайёрлаш бўйича қабул квотасини 3 бараварга кўпайтириб, талабаларнинг контракт тўловларини тўлиқ қоплаб берилиши белгиланганлиги маълумот учун қабул қилинсин.
2. Белгилансинки:
иловага мувофиқ тасдиқланган бакалавриат таълим йўналишлари рўйхатига киритилган Ўзбекистон Республикаси Маданият вазирлиги тизимидаги олий таълим муассасаларининг кундузги таълим шаклида тўлов-контракт асосида ўқишга янги қабул қилинган биринчи босқич талабаларининг (кейинги ўринларда — талабаларнинг) 2022/2023 ўқув йили учун тўлов-контракт (стипендиясиз) суммаси 2022 йил 15 ноябрга қадар Ўзбекистон Республикаси Маданият вазирлигига Давлат бюджетидан ажратилган маблағлар доирасида;
келгуси ўқув йилидан бошлаб эса 15 сентябрга қадар Маданият вазирлигига Давлат бюджетидан ушбу мақсадлар учун ажратилган қўшимча маблағлар ҳисобидан қопланади;
талабаларнинг тўлов-контракт суммаси учун ажратиладиган маблағлар ҳажми Маданият вазирлиги тизимидаги олий таълим муассасаларига бюджет тизими бюджетлари харажатларининг иқтисодий таснифи бўйича 48 21 190 «Бошқа харажатлар» моддасида бир сатрда режалаштирилган ҳолда акс эттирилади;
талабаларнинг тўлов-контракт суммаси учун ажратилган маблағлар олий таълим муассасаларининг бюджетдан ташқари (тўлов-контракт) маблағлари бўйича шахсий ғазна ҳисобварағига ўтказилади ҳамда белгиланган тартибда сарфланади.
3. Ўзбекистон Республикаси Маданият вазирлиги уч кун муддатда тўлов-контракт суммаси Давлат бюджети маблағлари ҳисобидан тўлаб бериладиган бакалавриат таълим йўналишлари бўйича ўқишга янги қабул қилинган талабаларнинг рўйхатини шакллантирсин ҳамда тўлов-контракт суммаларини тегишли олий таълим муассасаларига ўтказиб берилишини таъминласин.
4. Ўзбекистон Республикаси Маданият вазирлиги Иқтисодий тараққиёт ва камбағалликни қисқартириш вазирлиги, Олий ва ўрта махсус таълим вазирлиги билан келишилган ҳолда ҳақиқий эҳтиёждан келиб чиқиб Ўзбекистон давлат консерваториясига «Фортепиано (орган)» бакалавриат таълим йўналиши бўйича тўлов-контракт асосидаги қабул параметрини 2023/2024 ўқув йилидан бошлаб уч бараваргача оширган ҳолда тасдиқласин.
5. Ушбу қарорнинг бажарилишини назорат қилиш Ўзбекистон Республикаси Бош вазири ўринбосари — туризм ва маданий мерос вазири А.А. Абдухакимов ҳамда Ўзбекистон Республикаси маданият вазири О.А. Назарбеков зиммасига юклансин.
Вазирлар Маҳкамасининг 2022 йил 2 ноябрдаги 633-сон қарорига ИЛОВА
Маданият вазирлиги тизимидаги олий таълим муассасаларининг кундузги таълим шаклида тўлов-контракт асосида ўқишга янги қабул қилинган биринчи босқич талабаларининг тўлов-контракт суммаси Давлат бюджети маблағлари ҳисобидан қоплаб бериладиган бакалавриат таълим йўналишлари
Т/р Таълим йўналиши шифри Таълим йўналишлари ва мутахассисликлари 1. 60112400 Профессионал таълим: вокал санъати (анъанавий хонандалик) чолғу ижрочилиги (анъанавий чолғулар) 2. 60211400 Вокал санъати (анъанавий хонандалик) 3. 60211500 Чолғу ижрочилиги: (анъанавий чолғулар) 4. 60211900 Бахшичилик ва достончилик 5. 60211501 Фортепиано (орган)
Ўзбекистон Республикасининг Бош вазири А. АРИПОВ
Тошкент ш.,
2022 йил 2 ноябрь,
633-сон
Oʻzbekiston Respublikasi Vazirlar Mahkamasining
qarori
ROʻYXATI
Madaniyat va sanʼat muassasalarini malakali mutaxassislar bilan taʼminlash va ularni davlat tomonidan tizimli qoʻllab-quvvatlash toʻgʻrisida
Baxshichilik, anʼanaviy xonandalik, sozandalik va fortepiano ijrochilik yoʻnalishlarida yuqori malakali kadrlar tayyorlashni kengaytirish va tahsil olayotgan talabalarni davlat tomonidan qoʻllab-quvvatlash, shuningdek, 2022-yil 30-iyun — Yoshlar kuni munosabati bilan boʻlib oʻtgan uchrashuvlarda Oʻzbekiston Respublikasi Prezidenti tomonidan ilgari surilgan tashabbuslarni amalga oshirish maqsadida Vazirlar Mahkamasi qaror qiladi:
1. Oʻzbekiston Respublikasi Prezidenti Sh.M. Mirziyoyev rahbarligida 30-iyun — Yoshlar kuni munosabati bilan boʻlib oʻtgan uchrashuvda berilgan topshiriqlarning 54-sonli bayoni 3-bandiga muvofiq, 2022/2023 oʻquv yilidan boshlab:
maqom xonandaligi, maqom cholgʻu ijrochiligi va baxshichilik yoʻnalishlariga yangi qabul qilingan talabalarning shartnoma toʻlovlari davlat tomonidan toʻliq qoplab berilishi;
fortepiano ijrochilarini tayyorlash boʻyicha qabul kvotasini 3 baravarga koʻpaytirib, talabalarning kontrakt toʻlovlarini toʻliq qoplab berilishi belgilanganligi maʼlumot uchun qabul qilinsin.
2. Belgilansinki:
ilovaga muvofiq tasdiqlangan bakalavriat taʼlim yoʻnalishlari roʻyxatiga kiritilgan Oʻzbekiston Respublikasi Madaniyat vazirligi tizimidagi oliy taʼlim muassasalarining kunduzgi taʼlim shaklida toʻlov-kontrakt asosida oʻqishga yangi qabul qilingan birinchi bosqich talabalarining (keyingi oʻrinlarda — talabalarning) 2022/2023 oʻquv yili uchun toʻlov-kontrakt (stipendiyasiz) summasi 2022-yil 15-noyabrga qadar Oʻzbekiston Respublikasi Madaniyat vazirligiga Davlat budjetidan ajratilgan mablagʻlar doirasida;
kelgusi oʻquv yilidan boshlab esa 15-sentabrga qadar Madaniyat vazirligiga Davlat budjetidan ushbu maqsadlar uchun ajratilgan qoʻshimcha mablagʻlar hisobidan qoplanadi;
talabalarning toʻlov-kontrakt summasi uchun ajratiladigan mablagʻlar hajmi Madaniyat vazirligi tizimidagi oliy taʼlim muassasalariga budjet tizimi budjetlari xarajatlarining iqtisodiy tasnifi boʻyicha 48 21 190 “Boshqa xarajatlar” moddasida bir satrda rejalashtirilgan holda aks ettiriladi;
talabalarning toʻlov-kontrakt summasi uchun ajratilgan mablagʻlar oliy taʼlim muassasalarining budjetdan tashqari (toʻlov-kontrakt) mablagʻlari boʻyicha shaxsiy gʻazna hisobvaragʻiga oʻtkaziladi hamda belgilangan tartibda sarflanadi.
3. Oʻzbekiston Respublikasi Madaniyat vazirligi uch kun muddatda toʻlov-kontrakt summasi Davlat budjeti mablagʻlari hisobidan toʻlab beriladigan bakalavriat taʼlim yoʻnalishlari boʻyicha oʻqishga yangi qabul qilingan talabalarning roʻyxatini shakllantirsin hamda toʻlov-kontrakt summalarini tegishli oliy taʼlim muassasalariga oʻtkazib berilishini taʼminlasin.
4. Oʻzbekiston Respublikasi Madaniyat vazirligi Iqtisodiy taraqqiyot va kambagʻallikni qisqartirish vazirligi, Oliy va oʻrta maxsus taʼlim vazirligi bilan kelishilgan holda haqiqiy ehtiyojdan kelib chiqib Oʻzbekiston davlat konservatoriyasiga “Fortepiano (organ)” bakalavriat taʼlim yoʻnalishi boʻyicha toʻlov-kontrakt asosidagi qabul parametrini 2023/2024 oʻquv yilidan boshlab uch baravargacha oshirgan holda tasdiqlasin.
5. Ushbu qarorning bajarilishini nazorat qilish Oʻzbekiston Respublikasi Bosh vaziri oʻrinbosari — turizm va madaniy meros vaziri A.A. Abduxakimov hamda Oʻzbekiston Respublikasi madaniyat vaziri O.A. Nazarbekov zimmasiga yuklansin.
Vazirlar Mahkamasining 2022-yil 2-noyabrdagi 633-son qaroriga ILOVA
Madaniyat vazirligi tizimidagi oliy taʼlim muassasalarining kunduzgi taʼlim shaklida toʻlov-kontrakt asosida oʻqishga yangi qabul qilingan birinchi bosqich talabalarining toʻlov-kontrakt summasi Davlat budjeti mablagʻlari hisobidan qoplab beriladigan bakalavriat taʼlim yoʻnalishlari
T/r Taʼlim yoʻnalishi shifri Taʼlim yoʻnalishlari va mutaxassisliklari 1. 60112400 Professional taʼlim: vokal sanʼati (anʼanaviy xonandalik) cholgʻu ijrochiligi (anʼanaviy cholgʻular) 2. 60211400 Vokal sanʼati (anʼanaviy xonandalik) 3. 60211500 Cholgʻu ijrochiligi: (anʼanaviy cholgʻular) 4. 60211900 Baxshichilik va dostonchilik 5. 60211501 Fortepiano (organ)
Oʻzbekiston Respublikasining Bosh vaziri A. ARIPOV
Toshkent sh.,
2022-yil 2-noyabr,
633-son