📅 2022-yil 23-dekabr · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2022 йил 23 декабрь · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 23 декабря 2022 г. · Постановления Кабинета Министров
Официальный текст. Официальный документ. Редакционные примечания не включены.
📅 23 December 2022 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
Қонунчилик ҳужжатларида коррупциявий нормаларни аниқлаш ва бартараф этиш тизими такомиллаштирилиши муносабати билан Пиллачилик ва тутчилик ташкилотларига тутзорларда сувни тежайдиган суғориш технологияларини жорий қилиш учун сарфланган харажатларнинг бир қисмини қоплаш тартиби тўғрисидаги низомга ўзгартириш ва қўшимчалар киритиш ҳақида
Республикада чорвачиликнинг муҳим тармоғи ҳисобланган пиллачиликни жадал ривожлантириш ҳамда ушбу соҳада фаолият юритаётган тадбиркорлик субъектларини қўллаб-қувватлаш ва рағбатлантиришга қаратилган норматив-ҳуқуқий база доимий равишда такомиллаштириб борилмоқда.
Шу билан бирга, соҳага оид қонунчилик ҳужжатларида коррупцияга шароит яратиши ва ҳуқуқни қўллаш амалиётида турлича талқин қилиниши мумкин бўлган нормаларни аниқлаш ва бартараф этиш долзарб вазифалардан бири бўлиб қолмоқда.
Пиллачилик тармоғида тадбиркорлик субъектларига субсидия бериш тизимининг шаффофлигини таъминлаш, соҳага оид қонунчилик ҳужжатларида аниқланган коррупциявий омилларга чек қўйиш, шунингдек, Вазирлар Маҳкамасининг «2022 йилда норматив-ҳуқуқий ҳужжатларни коррупцияга қарши экспертизадан ўтказиш чора-тадбирлари тўғрисида» 2022 йил 26 мартдаги 140-сон қарорига мувофиқ Вазирлар Маҳкамаси қарор қилади:
1. Вазирлар Маҳкамасининг 2021 йил 10 мартдаги 128-сон қарори билан тасдиқланган Пиллачилик ва тутчилик ташкилотларига тутзорларда сувни тежайдиган суғориш технологияларини жорий қилиш учун сарфланган харажатларнинг бир қисмини қоплаш тартиби тўғрисидаги низомга иловага мувофиқ қуйидагиларни назарда тутувчи ўзгартириш ва қўшимчалар киритилсин:
пиллачилик ва тутчилик ташкилотларига субсидия ажратиш бўйича туман ишчи гуруҳи таркибига ушбу ташкилотларда улушга (акцияга) эгалик қиладиган ёки уларнинг бошқарув (кузатув) органларига аъзо бўлган шахсларнинг киритилишини тақиқлаш;
субсидия олиш учун талабгор бўлган тадбиркорлик субъектлари туман ишчи гуруҳининг ишчи органига аризани бевосита, почта хизмати орқали ёки электрон шаклда тақдим этиши мумкинлигини белгилаш;
туман ишчи гуруҳи томонидан талабгорларга субсидия ажратиш мезонларини янада аниқлаштириш, шу жумладан, талабгорларга тегишли ер участкаси жойлашган ҳудудда ер ости ва ер усти сув манбалари мавжуд бўлмаган тақдирда, уларни субсидия ажратиш бўйича туман манзилли рўйхатига киритилишини рад этиш.
2. Ўзбекистон Республикаси Ипакчилик ва жун саноатини ривожлантириш қўмитаси манфаатдор вазирлик ва идоралар билан биргаликда ўзлари қабул қилган норматив-ҳуқуқий ҳужжатларни бир ой муддатда ушбу қарорга мувофиқлаштирсин.
3. Мазкур қарорнинг бажарилишини назорат қилиш Ўзбекистон Республикаси Бош вазирининг аграр ва озиқ-овқат соҳаларини ривожлантириш масалалари бўйича ўринбосари Ш.М. Ғаниев зиммасига юклансин.
Вазирлар Маҳкамасининг 2022 йил 23 декабрдаги 720-сон қарорига ИЛОВА
Пиллачилик ва тутчилик ташкилотларига тутзорларда сувни тежайдиган суғориш технологияларини жорий қилиш учун сарфланган харажатларнинг бир қисмини қоплаш тартиби тўғрисидаги низомга ўзгартириш ва қўшимчалар киритиш ҳақида
1. 8-банднинг иккинчи хатбошиси қуйидаги таҳрирда баён этилсин:
«Туман ишчи гуруҳи туман ҳокимининг қишлоқ ва сув хўжалиги масалалари бўйича ўринбосари, туман ирригация бўлими бошлиғи, туман электр тармоқлари корхонаси бошлиғи, «Ўзбекгидрогеология» институти вакили ҳамда хизмат кўрсатувчи тижорат банки раҳбаридан иборат таркибда тузилади. Туман ҳокими туман ишчи гуруҳи раҳбари ҳисобланади.».
2. Қуйидаги мазмундаги 8 1 -банд билан тўлдирилсин:
«8 1 . Туман ишчи гуруҳи таркибига пиллачилик ва тутчилик ташкилотларининг устав фондидаги (устав капиталидаги) улушларга ёки акцияларга эгалик қиладиган ёхуд бошқарув органи ва кузатув кенгашига ўзи ёки яқин қариндошлари аъзо бўлган шахсларнинг киритилиши тақиқланади».
3. 9-банд «ариза билан» сўзларидан кейин «бевосита, почта хизмати орқали ёки электрон шаклда» сўзлари билан тўлдирилсин.
4. 10-банд қуйидаги таҳрирда баён этилсин:
«10. Туман ишчи гуруҳи талабгорлардан ариза тушган кундан бошлаб уч иш кунида жойига чиққан ҳолда, тегишли ер участкасининг майдони, тупроқ бонитет балли ҳамда ер ости ва ер усти сув манбалари мавжудлигини ўрганиб чиқади.
Ўрганиш якуни бўйича туман ишчи гуруҳи талабгорларни келгуси йилда сувни тежайдиган суғориш технологияларини жорий этиш бўйича туман манзилли рўйхатига (кейинги ўринларда — туман манзилли рўйхати) киритиш тўғрисида хулоса беради.
Бунда тегишли ер участкаси жойлашган ҳудудда ер ости ва ер усти сув манбалари мавжуд бўлмаган тақдирда, талабгорларни туман манзилли рўйхатига киритиш рад этилади.
Ўрганиш натижаси кўра келгуси йилда туман манзилли рўйхати мазкур банднинг биринчи хатбошисида белгиланган мезонларга асосан мевали ва озиқа бўладиган янги тутзорларнинг ҳудудлар ҳамда талабгорлар бўйича ер участкаси майдони, ер бонитет балли, сув манбаини кўрсатган ҳолда шакллантиради».
5. Низомга 1-илова «II босқич» позициясининг «Чора-тадбирлар» устунининг 1-банди қуйидаги таҳрирда баён этилсин:
«1. Талабгорлар аризасини жойига чиққан ҳолда, уларга тегишли бўлган ер участкасининг майдони, тупроқ бонитет балли ҳамда ер ости ва ер усти сув манбалари мавжудлигини ўрганиб чиқади. Бунда талабгорларни келгуси йилда сувни тежайдиган суғориш технологияларини жорий этиш бўйича туман манзилли рўйхатига киритиш тўғрисида хулоса беради».
6. Низомга 2-илованинг матни қуйидаги таҳрирда баён этилсин:
«1. Туман ҳокими, ишчи гуруҳ раҳбари
2. Туман ҳокимининг қишлоқ ва сув хўжалиги масалалари бўйича ўринбосари, ишчи гуруҳ раҳбарининг ўринбосари
3. Туман электр тармоқлари корхонаси бошлиғи
4. «Ўзбекгидрогеология» институти (ДУК)нинг ҳудудий бўлими раҳбари
5. Хизмат кўрсатувчи тижорат банки раҳбари
6. Туман ирригация бўлими бошлиғи, ишчи гуруҳ котиби».
7. Низомга 4-иловадаги «3. Лавозимга кўра — туман қишлоқ хўжалиги бўлими бошлиғи» сўзлари чиқариб ташлансин.
Ўзбекистон Республикасининг Бош вазири А. АРИПОВ
Тошкент ш.,
2022 йил 23 декабрь,
720-сон
Oʻzbekiston Respublikasi Vazirlar Mahkamasining
qarori
Qonunchilik hujjatlarida korrupsiyaviy normalarni aniqlash va bartaraf etish tizimi takomillashtirilishi munosabati bilan Pillachilik va tutchilik tashkilotlariga tutzorlarda suvni tejaydigan sugʻorish texnologiyalarini joriy qilish uchun sarflangan xarajatlarning bir qismini qoplash tartibi toʻgʻrisidagi nizomga oʻzgartirish va qoʻshimchalar kiritish haqida
Respublikada chorvachilikning muhim tarmogʻi hisoblangan pillachilikni jadal rivojlantirish hamda ushbu sohada faoliyat yuritayotgan tadbirkorlik subyektlarini qoʻllab-quvvatlash va ragʻbatlantirishga qaratilgan normativ-huquqiy baza doimiy ravishda takomillashtirib borilmoqda.
Shu bilan birga, sohaga oid qonunchilik hujjatlarida korrupsiyaga sharoit yaratishi va huquqni qoʻllash amaliyotida turlicha talqin qilinishi mumkin boʻlgan normalarni aniqlash va bartaraf etish dolzarb vazifalardan biri boʻlib qolmoqda.
Pillachilik tarmogʻida tadbirkorlik subyektlariga subsidiya berish tizimining shaffofligini taʼminlash, sohaga oid qonunchilik hujjatlarida aniqlangan korrupsiyaviy omillarga chek qoʻyish, shuningdek, Vazirlar Mahkamasining “2022-yilda normativ-huquqiy hujjatlarni korrupsiyaga qarshi ekspertizadan oʻtkazish chora-tadbirlari toʻgʻrisida” 2022-yil 26-martdagi 140-son qaroriga muvofiq Vazirlar Mahkamasi qaror qiladi:
1. Vazirlar Mahkamasining 2021-yil 10-martdagi 128-son qarori bilan tasdiqlangan Pillachilik va tutchilik tashkilotlariga tutzorlarda suvni tejaydigan sugʻorish texnologiyalarini joriy qilish uchun sarflangan xarajatlarning bir qismini qoplash tartibi toʻgʻrisidagi nizomga ilovaga muvofiq quyidagilarni nazarda tutuvchi oʻzgartirish va qoʻshimchalar kiritilsin:
pillachilik va tutchilik tashkilotlariga subsidiya ajratish boʻyicha tuman ishchi guruhi tarkibiga ushbu tashkilotlarda ulushga (aksiyaga) egalik qiladigan yoki ularning boshqaruv (kuzatuv) organlariga aʼzo boʻlgan shaxslarning kiritilishini taqiqlash;
subsidiya olish uchun talabgor boʻlgan tadbirkorlik subyektlari tuman ishchi guruhining ishchi organiga arizani bevosita, pochta xizmati orqali yoki elektron shaklda taqdim etishi mumkinligini belgilash;
tuman ishchi guruhi tomonidan talabgorlarga subsidiya ajratish mezonlarini yanada aniqlashtirish, shu jumladan, talabgorlarga tegishli yer uchastkasi joylashgan hududda yer osti va yer usti suv manbalari mavjud boʻlmagan taqdirda, ularni subsidiya ajratish boʻyicha tuman manzilli roʻyxatiga kiritilishini rad etish.
2. Oʻzbekiston Respublikasi Ipakchilik va jun sanoatini rivojlantirish qoʻmitasi manfaatdor vazirlik va idoralar bilan birgalikda oʻzlari qabul qilgan normativ-huquqiy hujjatlarni bir oy muddatda ushbu qarorga muvofiqlashtirsin.
3. Mazkur qarorning bajarilishini nazorat qilish Oʻzbekiston Respublikasi Bosh vazirining agrar va oziq-ovqat sohalarini rivojlantirish masalalari boʻyicha oʻrinbosari Sh.M. Gʻaniyev zimmasiga yuklansin.
Vazirlar Mahkamasining 2022-yil 23-dekabrdagi 720-son qaroriga ILOVA
Pillachilik va tutchilik tashkilotlariga tutzorlarda suvni tejaydigan sugʻorish texnologiyalarini joriy qilish uchun sarflangan xarajatlarning bir qismini qoplash tartibi toʻgʻrisidagi nizomga oʻzgartirish va qoʻshimchalar kiritish haqida
1. 8-bandning ikkinchi xatboshisi quyidagi tahrirda bayon etilsin:
“Tuman ishchi guruhi tuman hokimining qishloq va suv xoʻjaligi masalalari boʻyicha oʻrinbosari, tuman irrigatsiya boʻlimi boshligʻi, tuman elektr tarmoqlari korxonasi boshligʻi, “Oʻzbekgidrogeologiya” instituti vakili hamda xizmat koʻrsatuvchi tijorat banki rahbaridan iborat tarkibda tuziladi. Tuman hokimi tuman ishchi guruhi rahbari hisoblanadi.”.
2. Quyidagi mazmundagi 8 1 -band bilan toʻldirilsin:
“8 1 . Tuman ishchi guruhi tarkibiga pillachilik va tutchilik tashkilotlarining ustav fondidagi (ustav kapitalidagi) ulushlarga yoki aksiyalarga egalik qiladigan yoxud boshqaruv organi va kuzatuv kengashiga oʻzi yoki yaqin qarindoshlari aʼzo boʻlgan shaxslarning kiritilishi taqiqlanadi”.
3. 9-band “ariza bilan” soʻzlaridan keyin “bevosita, pochta xizmati orqali yoki elektron shaklda” soʻzlari bilan toʻldirilsin.
4. 10-band quyidagi tahrirda bayon etilsin:
“10. Tuman ishchi guruhi talabgorlardan ariza tushgan kundan boshlab uch ish kunida joyiga chiqqan holda, tegishli yer uchastkasining maydoni, tuproq bonitet balli hamda yer osti va yer usti suv manbalari mavjudligini oʻrganib chiqadi.
Oʻrganish yakuni boʻyicha tuman ishchi guruhi talabgorlarni kelgusi yilda suvni tejaydigan sugʻorish texnologiyalarini joriy etish boʻyicha tuman manzilli roʻyxatiga (keyingi oʻrinlarda — tuman manzilli roʻyxati) kiritish toʻgʻrisida xulosa beradi.
Bunda tegishli yer uchastkasi joylashgan hududda yer osti va yer usti suv manbalari mavjud boʻlmagan taqdirda, talabgorlarni tuman manzilli roʻyxatiga kiritish rad etiladi.
Oʻrganish natijasi koʻra kelgusi yilda tuman manzilli roʻyxati mazkur bandning birinchi xatboshisida belgilangan mezonlarga asosan mevali va oziqa boʻladigan yangi tutzorlarning hududlar hamda talabgorlar boʻyicha yer uchastkasi maydoni, yer bonitet balli, suv manbaini koʻrsatgan holda shakllantiradi”.
5. Nizomga 1-ilova “II bosqich” pozitsiyasining “Chora-tadbirlar” ustunining 1-bandi quyidagi tahrirda bayon etilsin:
“1. Talabgorlar arizasini joyiga chiqqan holda, ularga tegishli boʻlgan yer uchastkasining maydoni, tuproq bonitet balli hamda yer osti va yer usti suv manbalari mavjudligini oʻrganib chiqadi. Bunda talabgorlarni kelgusi yilda suvni tejaydigan sugʻorish texnologiyalarini joriy etish boʻyicha tuman manzilli roʻyxatiga kiritish toʻgʻrisida xulosa beradi”.
6. Nizomga 2-ilovaning matni quyidagi tahrirda bayon etilsin:
“1. Tuman hokimi, ishchi guruh rahbari
2. Tuman hokimining qishloq va suv xoʻjaligi masalalari boʻyicha oʻrinbosari, ishchi guruh rahbarining oʻrinbosari
3. Tuman elektr tarmoqlari korxonasi boshligʻi
4. “Oʻzbekgidrogeologiya” instituti (DUK)ning hududiy boʻlimi rahbari
5. Xizmat koʻrsatuvchi tijorat banki rahbari
6. Tuman irrigatsiya boʻlimi boshligʻi, ishchi guruh kotibi”.
7. Nizomga 4-ilovadagi “3. Lavozimga koʻra — tuman qishloq xoʻjaligi boʻlimi boshligʻi” soʻzlari chiqarib tashlansin.
Oʻzbekiston Respublikasining Bosh vaziri A. ARIPOV
Toshkent sh.,
2022-yil 23-dekabr,
720-son