📅 2022-yil 31-dekabr · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2022 йил 31 декабрь · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 31 декабря 2022 г. · Постановления Кабинета Министров
Официальный текст. Официальный документ. Редакционные примечания не включены.
📅 31 December 2022 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
«XT Xarid texnologiyalari» масъулияти чекланган жамият устав капиталидаги давлат улушини сотиш бўйича чора-тадбирлар тўғрисида
Давлат харидларининг электрон тизимига хусусий капитал иштироки учун кенгроқ имкониятлар яратиш, ушбу соҳадаги давлат иштирокини қисқартириш ва рақобат муҳитини янада яхшилаш мақсадида Вазирлар Маҳкамаси қарор қилади:
1. Иқтисодиёт ва молия вазирлиги, Давлат активларини бошқариш агентлигининг «XT Xarid texnologiyalari» масъулияти чекланган жамият (кейинги ўринларда — «XT Xarid texnologiyalari» МЧЖ) устав капиталидаги 50 фоиз миқдоридаги давлат улушини бозор қийматида сотиш тўғрисидаги таклифига розилик берилсин.
2. Иқтисодиёт ва молия вазирлиги уч кун муддатда «XT Xarid texnologiyalari» МЧЖ устав капиталидаги «Иқтисодиёт ва молия вазирлиги Ахборот технологиялари маркази» давлат унитар корхонасининг 50 фоиз миқдоридаги улушини (кейинги ўринларда — давлат улуши) Давлат активларини бошқариш агентлигига ўтказиб берилишини таъминласин.
3. Давлат активларини бошқариш агентлиги:
бир ҳафта муддатда «XT Xarid texnologiyalari» МЧЖ таъсис ҳужжатларини ўзгартирган ҳолда давлат рўйхатидан ўтказилишини;
бир ой муддатда «XT Xarid texnologiyalari» МЧЖ устав капиталидаги давлат улушининг бозор қийматини белгиланган тартибда аниқланишини таъминласин.
4. Белгилансинки, «XT Xarid texnologiyalari» МЧЖ уставидаги давлат улушини сотиш қуйидаги тартибда амалга оширилади:
Давлат активларини бошқариш агентлиги томонидан «XT Xarid texnologiyalari» МЧЖ нинг бошқа иштирокчиларига ва жамиятнинг ўзига давлат улушини имтиёзли ҳуқуқдан фойдаланган ҳолда бозор қийматида сотиб олишлари мумкинлиги тўғрисида хабарнома юборилади;
«XT Xarid texnologiyalari» МЧЖнинг бошқа иштирокчилари ва жамиятдан давлат улушини имтиёзли ҳуқуқдан фойдаланган ҳолда сотиб олиш бўйича таклиф келиб тушмаган тақдирда, давлат улуши бозор қийматидаги бошланғич нарх билан «E-auksion» электрон савдо платформаси орқали аукцион савдоларига чиқарилади;
давлат улуши бўйича тасарруф этиш ҳуқуқи уни сотиб олиш бўйича тўловлари тўлиқ келиб тушгандан сўнг белгиланган тартибда расмийлаштирилади;
давлат улушини сотишдан тушган маблағлар, истисно тариқасида, тўлиқ миқдорда (бундан сотиш билан боғлиқ харажатлар мустасно) «Иқтисодиёт ва молия вазирлиги Ахборот технологиялари маркази» ДУКнинг моддий-техника базасини мустаҳкамлашга йўналтирилади.
5. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосари Ж.А. Қўчқоров зиммасига юклансин.
Ўзбекистон Республикасининг Бош вазири А. АРИПОВ
Тошкент ш.,
2022 йил 31 декабрь,
735-сон
Oʻzbekiston Respublikasi Vazirlar Mahkamasining
qarori
“XT Xarid texnologiyalari” masʼuliyati cheklangan jamiyat ustav kapitalidagi davlat ulushini sotish boʻyicha chora-tadbirlar toʻgʻrisida
Davlat xaridlarining elektron tizimiga xususiy kapital ishtiroki uchun kengroq imkoniyatlar yaratish, ushbu sohadagi davlat ishtirokini qisqartirish va raqobat muhitini yanada yaxshilash maqsadida Vazirlar Mahkamasi qaror qiladi:
1. Iqtisodiyot va moliya vazirligi, Davlat aktivlarini boshqarish agentligining “XT Xarid texnologiyalari” masʼuliyati cheklangan jamiyat (keyingi oʻrinlarda — “XT Xarid texnologiyalari” MChJ) ustav kapitalidagi 50 foiz miqdoridagi davlat ulushini bozor qiymatida sotish toʻgʻrisidagi taklifiga rozilik berilsin.
2. Iqtisodiyot va moliya vazirligi uch kun muddatda “XT Xarid texnologiyalari” MChJ ustav kapitalidagi “Iqtisodiyot va moliya vazirligi Axborot texnologiyalari markazi” davlat unitar korxonasining 50 foiz miqdoridagi ulushini (keyingi oʻrinlarda — davlat ulushi) Davlat aktivlarini boshqarish agentligiga oʻtkazib berilishini taʼminlasin.
3. Davlat aktivlarini boshqarish agentligi:
bir hafta muddatda “XT Xarid texnologiyalari” MChJ taʼsis hujjatlarini oʻzgartirgan holda davlat roʻyxatidan oʻtkazilishini;
bir oy muddatda “XT Xarid texnologiyalari” MChJ ustav kapitalidagi davlat ulushining bozor qiymatini belgilangan tartibda aniqlanishini taʼminlasin.
4. Belgilansinki, “XT Xarid texnologiyalari” MChJ ustavidagi davlat ulushini sotish quyidagi tartibda amalga oshiriladi:
Davlat aktivlarini boshqarish agentligi tomonidan “XT Xarid texnologiyalari” MChJ ning boshqa ishtirokchilariga va jamiyatning oʻziga davlat ulushini imtiyozli huquqdan foydalangan holda bozor qiymatida sotib olishlari mumkinligi toʻgʻrisida xabarnoma yuboriladi;
“XT Xarid texnologiyalari” MChJning boshqa ishtirokchilari va jamiyatdan davlat ulushini imtiyozli huquqdan foydalangan holda sotib olish boʻyicha taklif kelib tushmagan taqdirda, davlat ulushi bozor qiymatidagi boshlangʻich narx bilan “E-auksion” elektron savdo platformasi orqali auksion savdolariga chiqariladi;
davlat ulushi boʻyicha tasarruf etish huquqi uni sotib olish boʻyicha toʻlovlari toʻliq kelib tushgandan soʻng belgilangan tartibda rasmiylashtiriladi;
davlat ulushini sotishdan tushgan mablagʻlar, istisno tariqasida, toʻliq miqdorda (bundan sotish bilan bogʻliq xarajatlar mustasno) “Iqtisodiyot va moliya vazirligi Axborot texnologiyalari markazi” DUKning moddiy-texnika bazasini mustahkamlashga yoʻnaltiriladi.
5. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari J.A. Qoʻchqorov zimmasiga yuklansin.
Oʻzbekiston Respublikasining Bosh vaziri A. ARIPOV
Toshkent sh.,
2022-yil 31-dekabr,
735-son