📅 2022-yil 31-dekabr · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2022 йил 31 декабрь · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 31 декабря 2022 г. · Постановления Кабинета Министров
Официальный текст. Официальный документ. Редакционные примечания не включены.
📅 31 December 2022 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
НИЗОМ
СХЕМАСИ
Товарларни божхона транзити божхона режимига жойлаштириш билан боғлиқ операцияларни тартибга солиш чора-тадбирлари тўғрисида
Ўзбекистон Республикасининг Божхона кодексига мувофиқ, шунингдек, товарларни электрон шаклда декларациялаш тартибини янада такомиллаштириш ва ташқи иқтисодий фаолият қатнашчиларига қулай шарт-шароитлар яратиш мақсадида Вазирлар Маҳкамаси қарор қилади:
1. Ўзбекистон Республикаси Божхона кодексининг 118 ва 261-моддаларига мувофиқ:
товарни божхона транзити божхона режимига жойлаштириш учун божхона органига транзит декларацияси ва товарнинг кузатув ҳужжатлари тақдим этилиши белгиланганлиги;
транзит декларацияси божхона ҳудудига кириб келаётган товарлар ва транспорт воситалари божхона чегарасини кесиб ўтгунига қадар ёки кесиб ўтиш вақтида берилиши белгиланганлиги маълумот учун қабул қилинсин.
2. Белгилансинки:
божхона органларига дастлабки ахборот тақдим этилган ҳолларда Юкларни халқаро йўлларда ташиш дафтарчасини қўллаган ҳолда юкларни халқаро ташиш тўғрисидаги Божхона конвенциясига (1975 йил 14 ноябрь, Женева) мувофиқ тўлдирилган халқаро йўлларда ташиш дафтарчаси ҳамда Вақтинча олиб кириш тўғрисидаги конвенцияга (1990 йил 26 июнь, Истанбул) мувофиқ тўлдирилган АТА карнети транзит декларацияси сифатида қабул қилинади;
божхона органига транзит декларацияси товарлар ва транспорт воситалари божхона чегарасини кесиб ўтгунига қадар тақдим этилганда, қонунчиликда белгиланган дастлабки электрон шаклдаги ахборотни тақдим этиш талаб этилмайди;
транзит декларациясини божхона органига тақдим этиш ва расмийлаштириш билан боғлиқ бўлган операциялар Иқтисодиёт ва молия вазирлиги ҳузуридаги Божхона қўмитасининг «E-Tranzit» автоматлаштирилган ахборот тизими ёки «us-uz.gov.uz» ахборот тизими орқали амалга оширилади.
3. Қуйидагиларни назарда тутувчи Товар ва транспорт воситалари билан транзит операцияларини амалга ошириш тартиби тўғрисидаги низом 1-иловага мувофиқ тасдиқлансин:
транзит декларациясининг божхона расмийлаштируви босқичлари;
транзит декларацияси тақдим этилиши талаб этиладиган ва талаб этилмайдиган ҳолатлар;
транзит декларациясини тақдим этишда илова қилинадиган ҳужжатлар турлари;
транзит декларациясини «E-Tranzit» автоматлаштирилган ахборот тизимида рўйхатга олиш тартиби;
транзит декларациясини ўзгартириш, унга қўшимча киритиш, уни қайта расмийлаштириш ёхуд бекор қилиш асослари ва тартиби.
3 1 . Белгилаб қўйилсинки:
ҳаво транспорти учун божхона назорати остида ташилаётган товар ва транспорт воситалари учун белгиланган етказиб бериш муддати ўтказиб юборилган ҳар бир куни учун — базавий ҳисоблаш миқдорининг 1 баравари миқдорида;
автотранспорт воситасида божхона назорати остида ташилаётган товар ва транспорт воситалари учун белгиланган етказиб бериш муддати ўтказиб юборилган ҳар бир куни учун — базавий ҳисоблаш миқдорининг 1 баравари миқдорида;
темир йўл транспортида божхона назорати остида ташилаётган товар ва транспорт воситалари учун белгиланган етказиб бериш муддати ўтказиб юборилган ҳар бир куни учун — базавий ҳисоблаш миқдорининг 10 фоизи миқдорида, 2028 йил 1 январдан базавий ҳисоблаш миқдорининг 1 баравари миқдорида;
автотранспорт воситасини бир календарь йил давомида тўқсон календарь кундан ортиқ муддатга вақтинчалик олиб кирганда, уни олиб чиқиб кетиш муддатининг ўтказиб юборилган ҳар куни учун — базавий ҳисоблаш миқдорининг 1 баравари миқдорида йиғимлар ундирилади.
Бунда автотранспорт воситасини бир календарь йил давомида тўқсон календарь кундан ортиқ муддатга вақтинчалик олиб кирганлик учун умумий ҳисобланган йиғимлар, транспорт воситасини «эркин муомалага чиқариш» божхона режимига жойлаштиргандаги тўланиши лозим бўлган божхона тўловлари суммасидан ошмаслиги шарт.
Мазкур бандда назарда тутилган йиғимлар божхона органларининг бюджетдан ташқари жамғармасига йўналтирилади.
5. Ўзбекистон Республикаси Иқтисодиёт ва молия вазирлиги манфаатдор вазирликлар ва идоралар билан биргаликда ўзлари қабул қилган норматив-ҳуқуқий ҳужжатларни икки ой муддатда ушбу қарорга мувофиқлаштирсин.
6. Белгилансинки:
мазкур қарор 2023 йил 1 январдан эътиборан кучга киради;
мазкур қарорга 2-илованинг 2-банди 2023 йил 1 июлдан кучга киради.
7. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосари Ж.А. Қўчқоров ҳамда Ўзбекистон Республикаси Иқтисодиёт ва молия вазири Ш.Д. Кудбиев зиммасига юклансин.
Вазирлар Маҳкамасининг 2022 йил 31 декабрдаги 737-сон қарорига 1-ИЛОВА
Товар ва транспорт воситалари билан транзит операцияларини амалга ошириш тартиби тўғрисида
1-боб. Умумий қоидалар
1. Мазкур Низом товар ва транспорт воситалари билан транзит операцияларини амалга ошириш тартибини белгилайди.
2. Ушбу Низомда қуйидаги асосий тушунчалар қўлланилади:
давлат назорати органлари — шахслар, товарлар ва транспорт воситаларини ушбу Низомга мувофиқ Давлат чегараси орқали ўтказишда иштирок этадиган чегара, божхона, санитария-карантин, фитосанитария, экология ва ветеринария назорати органлари;
декларацияловчи шахс — божхона органларига транзит декларациясини ўз номидан тақдим этаётган декларант ёки декларантнинг ёхуд декларант билан шартнома тузган божхона брокерининг штат бирлигида бўлган транзит декларациясини тўлдириш, имзолаш ва божхона органларига декларант номидан тақдим этишга ваколатли божхона расмийлаштируви бўйича мутахассис;
транзит декларацияси — товарлар ва (ёки) транспорт воситалари ҳақидаги маълумотлар кўрсатилган ҳолда божхона органига тақдим этиладиган ҳамда Ўзбекистон Республикасининг божхона ҳудудига олиб кириладиган ва Ўзбекистон Республикасининг ҳудуди орқали транзит олиб ўтиладиган товарларни жўнатувчи божхона органидан товар келиб тушадиган божхона органигача назорат қилиш учун фойдаланиладиган ҳужжат;
«E-tranzit» автоматлаштирилган ахборот тизими (кейинги ўринларда — «E-tranzit» ААТ) — божхона транзити божхона режимига жойлаштириладиган товар ва (ёки) транспорт воситалари тўғрисидаги ҳужжат ва маълумотларни тақдим этиш, қабул қилиш, рўйхатдан ўтказиш, расмийлаштириш, ҳисобга олиш ҳамда мониторинг қилишни назарда тутувчи Ўзбекистон Республикаси Иқтисодиёт ва молия вазирлиги ҳузуридаги Божхона қўмитасининг автоматлаштирилган ахборот тизими;
«Е-архив» интерактив хизмати — товарларни электрон шаклда декларациялашни шакллантиришга асос ҳисобланган электрон ҳужжатларни тақдим этиш ҳамда сақлаш учун мўлжалланган ва декларациялаш жараёни ва божхона расмийлаштируви давомида божхона органлари билан ахборот алмашинувига қаратилган бир марталик электрон архивни яратиш имконини берувчи хизмат;
жўнатувчи божхона органи — қайси божхона органи фаолият кўрсатиш зонасида товарларни божхона назорати остида ташиш бошланадиган бўлса, ўша божхона органи;
идентификация коди — божхона органларига тақдим қилинган транзит декларациясига «E-tranzit» ААТ орқали берилган ягона электрон код;
муносабат белгиси — давлат назорат органлари томонидан «E-tranzit» ААТга қўйиладиган белги;
товар келиб тушадиган божхона органи — қайси божхона органи фаолият кўрсатиш зонасида товарларни божхона назорати остида ташиш тугалланадиган бўлса, ўша божхона органи;
транзит операциялари — товар ва транспорт воситаларининг божхона расмийлаштирувида товарларга ва транспорт воситаларига нисбатан давлат назорат органлари ва (ёки) ваколатли шахс томонидан амалга ошириладиган ҳаракат.
3. Товар ва транспорт воситаларини божхона транзити божхона режимига жойлаштириш «E-tranzit» ААТда ёки «us-uz.gov.uz» ахборот тизимида транзит декларациясини божхона органига электрон тарзда тақдим этиш ва уни расмийлаштириш орқали амалга оширилади.
4. Транзит декларацияси бир ёки бир нечта товарнинг кузатув ҳужжатлари бўйича ташиладиган товарнинг ҳар бир туркуми ёки товарларнинг бир нечта туркуми учун расмийлаштирилади. Бунда товарнинг бир нечта туркуми бўйича битта транзит декларациясини расмийлаштириш учун улар бир транспорт воситасида битта транспорт ҳужжати билан битта жўнатувчидан битта қабул қилувчининг манзилига ташилаётган бўлиши лозим.
5. Транзит декларациясининг божхона расмийлаштируви қуйидаги икки босқичда ушбу Низомга иловада келтирилган схема бўйича амалга оширилади:
биринчи босқичда декларацияловчи шахс товарлар бўйича транзит декларациясини жўнатувчи божхона органларига электрон шаклда тақдим этади. Тақдим этилган транзит декларацияси божхона органларида рўйхатга олиниб, унга давлат назорат органлари томонидан муносабат белгиси қайд этилади ва транзит операцияси бошланади. Бунда, божхона, ветеринария ва фитосанитария органларининг назорат тартиботлари хавфни бошқариш тизимининг топшириғига асосан амалга оширилади;
иккинчи босқичда божхона транзити божхона режимига расмийлаштирилган товар ва транспорт воситалари белгиланган жойларга етказиб берилади, товар ва транспорт воситаси етказиб берилганлиги факти тасдиқланади ва кузатув ҳужжатлари тақдим этилгандан сўнг товар келиб тушадиган божхона органи томонидан транзит операциялари якунланади.
2-боб. Транзит декларацияси ва товарнинг кузатув ҳужжатларини тақдим этиш
6. Транзит декларацияси қуйидаги ҳолларда тақдим этилади:
товарларни божхона ҳудудига олиб киришда ёки божхона ҳудуди орқали транзит олиб ўтишда — товар ва транспорт воситаси божхона чегарасини кесиб ўтгунга қадар ёки кесиб ўтиш вақтида;
божхона ҳудудида турган товарларни божхона назорати остида етказиб беришни назорат қилишда — товарлар транспорт воситасига юкланишидан аввал тақдим этилади;
божхона ҳудудида турган божхона назорати остидаги транспорт воситасини товар сифатида етказиб беришни назорат қилишда — юк операцияларини амалга оширишдан олдин.
Агар транзит декларацияси жўнатувчи божхона органи томонидан рўйхатга олинган кундан эътиборан ўттиз календарь кун ичида унда кўрсатилган товарлар декларация рўйхатга олинган божхона органига тақдим этилмаган бўлса, транзит декларацияси берилмаган деб ҳисобланади ва автоматик тарзда бекор қилинади.
7. Божхона органига транзит декларациясини тақдим этиш қуйидаги ҳолатларда талаб этилмайди:
товар ва транспорт воситалари республика ҳудудидан олиб чиқилаётганда, бундан реэкспорт божхона режимидаги товарлар олиб чиқилиши мустасно;
жисмоний шахслар томонидан қўл юки ёки кузатиб бориладиган багажида товарлар олиб ўтилаётганда, бундан тижорат мақсадида олиб ўтилаётган товарлар мустасно;
юксиз транспорт воситалари ўтганда ҳамда йўловчилар ташилганда, транспорт воситасини Ўзбекистон Республикасининг божхона ҳудудига товар сифатида олиб кириш ва Ўзбекистон Республикасининг ҳудуди орқали товар сифатида транзит олиб ўтиш ҳолатлари бундан мустасно;
Юкларни халқаро йўлларда ташиш дафтарчасини қўллаган ҳолда Юкларни халқаро ташиш тўғрисидаги божхона Конвенциясига (1975 йил 14 ноябрь, Женева,) мувофиқ товарлар Юкларни халқаро йўлларда ташиш дафтарчаси асосида дастлабки ахборотни тақдим этиш орқали ташилганда;
Вақтинча олиб кириш тўғрисидаги конвенцияга (1990 йил 26 июнь, Истанбул) мувофиқ товарлар АТА карнети асосида божхона органларига дастлабки ахборотни тақдим этиш орқали ташилганда;
давлат сирлари тўғрисидаги маълумотлар мавжуд бўлган ташқи савдо контрактлари бўйича олиб келинаётган товарлар ташилганда;
қонунчилик ҳужжатларида белгиланган бошқа ҳолларда.
8. Транзит декларацияси жўнатувчи божхона органига электрон рақамли имзо билан тасдиқланган ҳолда электрон шаклда «Е-Транзит» ААТ орқали декларацияловчи шахс томонидан тақдим этилади.
Транзит декларацияси «Ўзбекистон темир йўллари» акциядорлик жамияти томонидан тақдим этилганда, декларацияловчи шахс томонидан тақдим этилган транзит декларацияси жамиятнинг масъул ходими томонидан умумлаштирилади ва битта темир йўл транспорти таркиби доирасида божхона органига ўзига бириктирилган электрон рақамли имзоси орқали тақдим этилади.
Бунда «Ўзбекистон темир йўллари» акциядорлик жамиятининг масъул ходимига транзит декларацияси товарга ваколатли шахс ёки у билан шартнома тузган божхона брокери номидан божхона расмийлаштируви бўйича мутахассис томонидан ўзига бириктирилган электрон рақамли имзоси орқали тақдим этилиши мумкин.
Транзит декларацияси «Ўзбекистон темир йўллари» акциядорлик жамияти масъул ходимига декларацияловчи шахс томонидан тақдим этилганда мазкур Низомнинг 11-бандида қайд этилган талаблар бўйича транзит декларациясидаги маълумотларнинг тўғрилиги ва унга илова қилинган ҳужжатларга мувофиқлиги учун жавобгарлик транзит декларациясини тўлдирган ва «Ўзбекистон темир йўллари» акциядорлик жамияти масъул ходимига тақдим этган декларацияловчи шахсда қолади.
9. Товар ва транспорт воситаларининг кузатув ҳужжатлари «E-Tranzit» ААТга «Е-архив» интерактив хизмати орқали илова қилинади. Бунда «E-Tranzit» ААТнинг тегишли майдонига «Е-архив» интерактив хизмати орқали ҳужжатларга берилган махсус рақам қўйилади.
Декларант ташқи иқтисодий фаолият иштирокчиси кабинетидаги «Е-архив» интерактив хизматидан фойдаланган ҳолда электрон архивни шакллантириб, унга ўзининг электрон рақамли имзоси билан тасдиқлаган божхона расмийлаштируви учун тақдим этиладиган ҳужжатларнинг электрон шаклларини жойлаштиради.
Электрон архивга жойлаштирилган ҳужжатларга автоматик тарзда махсус рақам берилади ва бу ҳақда декларантга тасдиқланган электрон хабарнома юборилади.
10. Товар ва транспорт воситаларининг кузатув ҳужжатлари «E-Tranzit» ААТга «Е-архив» интерактив хизмати орқали илова қилинганда, ушбу ҳужжатларни божхона ва бошқа расмийлаштирув жараёнларида давлат назорат органларига қайтадан тақдим этиш талаб этилмайди, сифатсиз (хира, бўялган, тушунарсиз ва ҳоказо) ҳужжатлар бундан мустасно.
11. Декларацияловчи шахс транзит декларациясидаги маълумотларнинг тўғрилиги ва унга илова қилинган ҳужжатларга мувофиқлиги учун жавобгар ҳисобланади, декларацияни тўлдириш учун тақдим этилган ҳужжатлардаги маълумотларнинг нотўғрилиги билан боғлиқ ҳолатлар бундан мустасно.
12. Декларант тақдим этилган ҳужжатлардаги (транзит декларацияси бундан мустасно) маълумотларнинг тўғрилиги ва амалда олиб ўтилаётган товарлар ва транспорт воситаларига ўзаро мувофиқлиги учун жавобгар ҳисобланади.
3-боб. Транзит декларациясини расмийлаштириш
1-§. Транзит декларациясини расмийлаштиришнинг биринчи босқичи
13. Транзит декларацияси қуйидаги ҳужжатларнинг электрон нусхаси билан бирга жўнатувчи божхона органига тақдим этилади:
а) автотранспорт воситасида ташилганда:
Йўл ҳаракати тўғрисида Конвенцияга (Вена, 1968 йил 8 ноябрь) мувофиқ автотранспорт воситасини рўйхатдан ўтказиш тўғрисида гувоҳнома;
Ўзбекистон Республикасининг халқаро шартномаларида назарда тутилган ҳолларда хорижий автотранспорт воситаларининг Ўзбекистон Республикаси ҳудудига кириши, чиқиши ва транзит ўтиши учун ваколатли органнинг рухсатномаси;
Юкларни халқаро йўлларда ташиш шартномаси тўғрисидаги Конвенция (Женева, 1956 йил 19 май) талабларига мувофиқ товар-транспорт юкхати;
тижорат ҳужжатлари;
товарлар божхона чегараси орқали олиб ўтилиши билан боғлиқ тақиқ ва чекловларга риоя этилишини тасдиқловчи ҳужжатлар, агар бундай ҳужжатлар мавжуд бўлганда олиб ўтишга йўл қўйилса;
б) темир йўл транспортида халқаро ташувларда:
Халқаро темир йўл юк йўналишлари тўғрисидаги битимга (1951 йил 1 ноябрь) мувофиқ ҳужжатлар;
тижорат ҳужжатлари;
темир йўлнинг ҳаракатдаги таркибига доир топшириш қайдномаси;
товарларнинг божхона чегараси орқали ҳаракатланишида тақиқлар ва чекловларга риоя қилинганлигини тасдиқловчи ҳужжатлар, агар бундай ҳаракатланиш ушбу ҳужжатлар мавжудлигида рухсат берилган тақдирда;
в) ҳаво транспортида халқаро ташиш чоғида:
юк қайдномаси;
авиа юк хати;
тижорат ҳужжатлари;
товарларнинг божхона чегараси орқали ҳаракатланишида тақиқлар ва чекловларга риоя қилинганлигини тасдиқловчи ҳужжатлар, агар бундай ҳаракатланиш ушбу ҳужжатлар мавжудлигида рухсат берилган тақдирда.
14. Транзит декларацияси божхона органига тақдим қилиниб, «E-Tranzit» ААТда ёки «us-uz.gov.uz» ахборот тизимида рўйхатга олингандан сўнг тизим орқали автоматик тарзда идентификация коди берилади.
Транзит декларацияси рўйхатга олинганлиги тўғрисида декларацияловчи шахсга электрон тарзда маълумот юборилади.
15. Транзит декларацияси «E-Tranzit» ААТда рўйхатга олинган пайтдан бошлаб юридик аҳамиятга молик фактлардан далолат берувчи ҳужжатга айланади.
16. Товар ва транспорт воситалари жўнатувчи божхона органига етиб келгандан сўнг ташувчи товар ва транспорт воситаларининг кузатув ҳужжатлари билан бирга идентификация кодини божхона органига тақдим этади.
Тақдим этилган идентификация коди асосида транзит декларацияси божхона органи томонидан қабул қилинади ва бу ҳақда декларацияловчи шахсга электрон хабарнома юборилади.
17. Божхона органлари ходими божхона расмийлаштирувини амалга оширишда божхона қонунчилигида белгиланган ҳаракатларни бажаради.
18. Товар ва транспорт воситаларини божхона транзити божхона режимига расмийлаштиришда тўланиши лозим бўлган барча турдаги тўловлар ва йиғимларни тўлаш транзит декларацияси расмийлаштирилгунга қадар ёки божхона ҳудудида амалга оширилади.
Мазкур тўловлар ва йиғимлар транзит декларацияси божхона органларида рўйхатдан ўтган кунда амалда бўлган норматив-ҳуқуқий ҳужжатларга мувофиқ Ўзбекистон Республикаси Марказий банки томонидан белгиланган валюталарнинг расмий айирбошлаш курси ёки базавий ҳисоблаш миқдоридан келиб чиқиб ҳисобланади ҳамда шу мақсадда очилган банк ҳисоб рақамига ўтказилади.
Ўтказилган тўлов ва йиғимлар беш иш куни мобайнида автоматик тарзда давлат назорати органларининг Иқтисодиёт ва молия вазирлиги ҳузуридаги шахсий ғазна ҳисобварағига ўтказилади.
19. Жўнатувчи божхона постида фаолият олиб борувчи давлат назорати органлари тўланиши лозим бўлган тегишли тўловлар ва йиғимлар тўғри ҳисобланганлигини тегишлилиги бўйича назорат қилади.
20. Жўнатувчи божхона органида фаолият олиб борувчи давлат назорат органлари ўзига юклатилган вазифаларидан келиб чиқиб, тақдим этилган ҳужжатлар ҳамда транзит декларациясидаги маълумотлар билан танишиб, ўзининг муносабат белгисини қайд этгандан сўнг транзит операциялари бошланади.
Транзит операциялари бошланганлиги ҳақида декларант ёки декларацияловчи шахсга электрон хабарнома юборилади. Бунда жўнатувчи божхона постида транзит декларацияси расмийлаштирилганлиги ва товарни етказиб бериш муддати билан боғлиқ маълумотлар хабарномада акс эттирилади.
2-§. Транзит декларациясини расмийлаштиришнинг иккинчи босқичи
21. Ташувчи томонидан товар ва транспорт воситаси белгиланган манзилга етказиб берилгандан ҳамда чегара божхона постида ҳисобланган йиғимлар тўлангандан сўнг божхона органи ахборот тизимида товар ва транспорт воситаси етказиб берилганлиги ҳамда йиғимлар тўланганлиги тасдиқланади.
22. Ахборот тизимида товар ва транспорт воситаси етказиб берилганлиги факти тасдиқлангандан сўнг божхона транзити божхона режими якунланади.
23. Ўзбекистон Республикасининг халқаро шартномаларида товарнинг кузатув ҳужжатларига божхона органлари томонидан белги қўйилиши кўзда тутилган ҳолларда мазкур Низомнинг 21-банди талаблари бажарилгандан сўнг ташувчи кузатув ҳужжатларини товарлар келиб тушадиган божхона органига белги қўйиш учун тақдим этади.
Кузатув ҳужжатлари тақдим этилгандан сўнг товар келиб тушадиган божхона органи тегишли белгини қўяди ва ташувчига қайтариб беради.
24. Божхона транзити божхона режими якунланган пайтдан эътиборан транзит декларациясидаги божхона ҳудудида турган товар «вақтинча сақлаш» божхона режимида турган товар мақомини олади, бундан «божхона омбори» божхона режимида божхона назорати остида турган вақтда бир божхона омборидан бошқасига божхона назорати остида етказиб берилган товарлар мустасно. Бунда «вақтинча сақлаш» божхона режимига жойлаштириш учун божхона юк декларациясини тақдим этиш талаб этилмайди.
Агар товарлар «божхона омбори» божхона режимида турган вақтда бир божхона омборидан бошқасига етказиб берилган бўлса, товарларни «божхона омбори» божхона режимига расмийлаштириш учун такроран божхона юк декларацияси тақдим этилмайди, бундан қонунчиликда назарда тутилган ҳоллар мустасно.
Вақтинча сақлаш» мақомида турган товарларни белгиланган муддатда бошқа божхона режимига жойлаштиришга масъул шахснинг маълумотлари декларант ёки унинг номидан иш кўрувчи ваколатли шахс томонидан Божхона қўмитасининг «Божхона ва юк операциялари» ахборот тизимида тасдиқланади.
4-боб. Транзит декларациясини ўзгартириш, унга қўшимча киритиш, уни қайта расмийлаштириш ёхуд бекор қилиш
25. Транзит декларациясида кўрсатилган маълумотларга декларант томонидан ўзгартиришлар ёки қўшимчалар киритилиши, топширилган транзит декларацияси эса қайтариб олиниши мумкин.
Транзит декларациясини ўзгартириш, унга қўшимча киритиш ва (ёки) уни қайтариб олиш транзит декларацияси божхона органи томонидан қабул қилингунига қадар амалга оширилади.
26. Транзит декларацияси қабул қилинганидан сўнг уни ўзгартириш, қўшимча киритиш, қайта расмийлаштириш, қайтариб олиш ва (ёки) бекор қилиш декларант божхона органига мурожаат этганидан кейин амалга оширилади.
27. Божхона расмийлаштируви тугалланганидан кейин транзит декларацияси божхона органи томонидан рўйхатга олинган кундан эътиборан уч йил ичида транзит декларациясига божхона органининг талаби билан ёки божхона органи декларант томонидан кўрсатилган сабабларни асосли деб топса, унинг аризасига кўра ўзгартириш, унга қўшимча киритиш, уни қайта расмийлаштириш ёхуд бекор қилиш мумкин.
28. Декларантнинг мурожаатига асосан транзит декларациясига божхона органлари томонидан ҳам ўзгартириш ва қўшимчалар киритилиши мумкин. Бунда транзит декларациясига киритилган ўзгартириш ва қўшимчалар учун қонунчилик ҳужжатларида белгиланган ставкалар бўйича йиғим ундирилади.
29. Транзит декларациясини тўлдириш, божхона органларига тақдим этиш, расмийлаштириш, ўзгартириш, унга қўшимча киритиш, уни бекор қилиш ва қайтариб олиш тартиби Ўзбекистон Республикаси Иқтисодиёт ва молия вазирлиги ҳузуридаги Божхона қўмитаси томонидан белгиланади.
30. Декларант ёки декларацияловчи шахс божхона расмийлаштируви жараёнида ва ундан сўнг божхона хизмати органлари томонидан транзит декларациясида қоидабузарликлар аниқлангунга қадар божхона тўловларини ҳисоблашга ёки тақиқ, чекловлар қўлланилишига таъсир этмайдиган қоидабузарликларни ихтиёрий равишда божхона органи рухсати билан тузатиш ҳуқуқига эга, бундан қонунчиликда декларант ёки декларацияловчи шахснинг мурожаатига асосан транзит декларациясини ўзгартириш, унга қўшимча киритиш, уни қайтариб олиш ва бекор қилиш тақиқланган ҳолатлар мустасно.
Ушбу ҳолатларда декларант ва декларацияловчи шахсга нисбатан маъмурий ҳуқуқбузарликка оид процессуал ҳужжатлар расмийлаштирилмайди.
31. Декларантнинг номидан у ишонч билдирган шахс божхона органларига божхона расмийлаштируви учун ҳужжатларнинг электрон шаклларини тақдим этиши, транзит декларациясини ўзгартириш, унга қўшимча киритиш, уни қайта расмийлаштириш ёхуд бекор қилиш бўйича мурожаат этиши мумкин. Бунда у қонунчилик ҳужжатларида белгиланган декларантнинг ҳуқуқ ва мажбуриятларига эга бўлади.
5-боб. Якунловчи қоидалар
32. Чегара божхона постларида ветеринария ва фитосанитария органларининг назорат тартиботларини хавфни бошқариш тамойили асосида ташкил этишда ветеринария, фитосанитария ва божхона органлари ўртасида ўзаро маълумот алмашинуви жорий этилади.
33. Ушбу Низомни қўллашда юзага келадиган низолар қонунчиликда белгиланган тартибда ҳал этилади.
34. Мазкур Низом талабларининг бузилишида айбдор бўлган шахслар қонунчиликка мувофиқ жавоб берадилар.
Товар ва транспорт воситалари билан транзит операцияларини амалга ошириш тартиби тўғрисидаги низомга ИЛОВА
Товар ва транспорт воситалари билан транзит операцияларини амалга ошириш
Босқичлар Иштирокчилар Тадбирлар Бажариш муддатлари 1-босқич Декларацияловчи шахс Транзит декларацияси ҳамда тақдим этиладиган ҳужжатларни тайёрлайди, электрон рақамли имзоси билан тасдиқлайди ва «E-tranzit» ААТ орқали божхона органларига юборади. Низомнинг 6-банди иккинчи — тўртинчи хатбошиларида белгиланган муддатларда «E-Tranzit» ААТ 1. Транзит декларациясини рўйхатга олади ва идентификация кодини беради. 2. Транзит декларацияси рўйхатга олинганлиги тўғрисида декларацияловчи шахсга электрон хабарнома юборади. Реал вақт режимида Декларант 1. Товар ва транспорт воситаларининг кузатув ҳужжатлари билан бирга идентификация кодни божхона органига тақдим этади. Божхона ҳудудига кириб келаётганда — товарлар ва транспорт воситалари жўнатувчи божхона органига келгандан сўнг. Ички ҳудудда — тайёр бўлишга кўра. 2. Тегишли божхона тўловлари ва йиғимларни тўлайди. Транзит декларацияси расмийлаштирилгунга қадар ёки божхона ҳудудида Давлат назорати органлари Тақдим этилган ҳужжатлар ҳамда транзит декларациясидаги маълумотлар билан танишиб, ўзининг муносабат белгисини қайд этади. Чегара божхона постида — уч соат ичида Ички ҳудудда — бир иш кунида «E-Tranzit» ААТ Ваколатли органларнинг муносабат белгилари қайд этилгандан сўнг транзит операциялари бошланганлиги ҳақида декларант ёки декларацияловчи шахсга электрон хабарнома юборади. Реал вақт режимида 2-босқич Божхона органи ахборот тизими Ташувчи томонидан товар ва транспорт воситаси белгиланган манзилга етказиб берилгандан ҳамда чегара божхона постида ҳисобланган йиғимлар тўлангандан сўнг божхона органи ахборот тизимида товар ва транспорт воситаси етказиб берилганлиги ҳамда йиғимлар тўланганлиги тасдиқланади ҳамда божхона транзити божхона режими якунланади. Реал вақт режимида Ташувчи Ўзбекистон Республикасининг халқаро шартномаларида товарнинг кузатув ҳужжатларига божхона органлари томонидан белги қўйилиши кўзда тутилган ҳолларда мазкур Низомнинг 21-банди талаблари бажарилгандан сўнг ташувчи товарлар келиб тушадиган божхона органига белги қўйиш учун тақдим этади. Иш вақтида уч соат ичида Товарлар келиб тушадиган божхона органи Кузатув ҳужжатлари тақдим этилгандан сўнг товар келиб тушадиган божхона органи тегишли белгини қўяди ва ташувчига қайтариб беради. 30 дақиқа ичида
Ўзбекистон Республикасининг Бош вазири А. АРИПОВ
Тошкент ш.,
2022 йил 31 декабрь,
737-сон
Oʻzbekiston Respublikasi Vazirlar Mahkamasining
qarori
NIZOM
SXEMASI
Tovarlarni bojxona tranziti bojxona rejimiga joylashtirish bilan bogʻliq operatsiyalarni tartibga solish chora-tadbirlari toʻgʻrisida
Oʻzbekiston Respublikasining Bojxona kodeksiga muvofiq, shuningdek, tovarlarni elektron shaklda deklaratsiyalash tartibini yanada takomillashtirish va tashqi iqtisodiy faoliyat qatnashchilariga qulay shart-sharoitlar yaratish maqsadida Vazirlar Mahkamasi qaror qiladi:
1. Oʻzbekiston Respublikasi Bojxona kodeksining 118 va 261-moddalariga muvofiq:
tovarni bojxona tranziti bojxona rejimiga joylashtirish uchun bojxona organiga tranzit deklaratsiyasi va tovarning kuzatuv hujjatlari taqdim etilishi belgilanganligi;
tranzit deklaratsiyasi bojxona hududiga kirib kelayotgan tovarlar va transport vositalari bojxona chegarasini kesib oʻtguniga qadar yoki kesib oʻtish vaqtida berilishi belgilanganligi maʼlumot uchun qabul qilinsin.
2. Belgilansinki:
bojxona organlariga dastlabki axborot taqdim etilgan hollarda Yuklarni xalqaro yoʻllarda tashish daftarchasini qoʻllagan holda yuklarni xalqaro tashish toʻgʻrisidagi Bojxona konvensiyasiga (1975-yil 14-noyabr, Jeneva) muvofiq toʻldirilgan xalqaro yoʻllarda tashish daftarchasi hamda Vaqtincha olib kirish toʻgʻrisidagi konvensiyaga (1990-yil 26-iyun, Istanbul) muvofiq toʻldirilgan ATA karneti tranzit deklaratsiyasi sifatida qabul qilinadi;
bojxona organiga tranzit deklaratsiyasi tovarlar va transport vositalari bojxona chegarasini kesib oʻtguniga qadar taqdim etilganda, qonunchilikda belgilangan dastlabki elektron shakldagi axborotni taqdim etish talab etilmaydi;
tranzit deklaratsiyasini bojxona organiga taqdim etish va rasmiylashtirish bilan bogʻliq boʻlgan operatsiyalar Iqtisodiyot va moliya vazirligi huzuridagi Bojxona qoʻmitasining “E-Tranzit” avtomatlashtirilgan axborot tizimi yoki “us-uz.gov.uz” axborot tizimi orqali amalga oshiriladi.
3. Quyidagilarni nazarda tutuvchi Tovar va transport vositalari bilan tranzit operatsiyalarini amalga oshirish tartibi toʻgʻrisidagi nizom 1-ilovaga muvofiq tasdiqlansin:
tranzit deklaratsiyasining bojxona rasmiylashtiruvi bosqichlari;
tranzit deklaratsiyasi taqdim etilishi talab etiladigan va talab etilmaydigan holatlar;
tranzit deklaratsiyasini taqdim etishda ilova qilinadigan hujjatlar turlari;
tranzit deklaratsiyasini “E-Tranzit” avtomatlashtirilgan axborot tizimida roʻyxatga olish tartibi;
tranzit deklaratsiyasini oʻzgartirish, unga qoʻshimcha kiritish, uni qayta rasmiylashtirish yoxud bekor qilish asoslari va tartibi.
3 1 . Belgilab qoʻyilsinki:
havo transporti uchun bojxona nazorati ostida tashilayotgan tovar va transport vositalari uchun belgilangan yetkazib berish muddati oʻtkazib yuborilgan har bir kuni uchun — bazaviy hisoblash miqdorining 1 baravari miqdorida;
avtotransport vositasida bojxona nazorati ostida tashilayotgan tovar va transport vositalari uchun belgilangan yetkazib berish muddati oʻtkazib yuborilgan har bir kuni uchun — bazaviy hisoblash miqdorining 1 baravari miqdorida;
temir yoʻl transportida bojxona nazorati ostida tashilayotgan tovar va transport vositalari uchun belgilangan yetkazib berish muddati oʻtkazib yuborilgan har bir kuni uchun — bazaviy hisoblash miqdorining 10 foizi miqdorida, 2028-yil 1-yanvardan bazaviy hisoblash miqdorining 1 baravari miqdorida;
avtotransport vositasini bir kalendar yil davomida toʻqson kalendar kundan ortiq muddatga vaqtinchalik olib kirganda, uni olib chiqib ketish muddatining oʻtkazib yuborilgan har kuni uchun — bazaviy hisoblash miqdorining 1 baravari miqdorida yigʻimlar undiriladi.
Bunda avtotransport vositasini bir kalendar yil davomida toʻqson kalendar kundan ortiq muddatga vaqtinchalik olib kirganlik uchun umumiy hisoblangan yigʻimlar, transport vositasini “erkin muomalaga chiqarish” bojxona rejimiga joylashtirgandagi toʻlanishi lozim boʻlgan bojxona toʻlovlari summasidan oshmasligi shart.
Mazkur bandda nazarda tutilgan yigʻimlar bojxona organlarining budjetdan tashqari jamgʻarmasiga yoʻnaltiriladi.
5. Oʻzbekiston Respublikasi Iqtisodiyot va moliya vazirligi manfaatdor vazirliklar va idoralar bilan birgalikda oʻzlari qabul qilgan normativ-huquqiy hujjatlarni ikki oy muddatda ushbu qarorga muvofiqlashtirsin.
6. Belgilansinki:
mazkur qaror 2023-yil 1-yanvardan eʼtiboran kuchga kiradi;
mazkur qarorga 2-ilovaning 2-bandi 2023-yil 1-iyuldan kuchga kiradi.
7. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari J.A. Qoʻchqorov hamda Oʻzbekiston Respublikasi Iqtisodiyot va moliya vaziri Sh.D. Kudbiyev zimmasiga yuklansin.
Vazirlar Mahkamasining 2022-yil 31-dekabrdagi 737-son qaroriga 1-ILOVA
Tovar va transport vositalari bilan tranzit operatsiyalarini amalga oshirish tartibi toʻgʻrisida
1-bob. Umumiy qoidalar
1. Mazkur Nizom tovar va transport vositalari bilan tranzit operatsiyalarini amalga oshirish tartibini belgilaydi.
2. Ushbu Nizomda quyidagi asosiy tushunchalar qoʻllaniladi:
davlat nazorati organlari — shaxslar, tovarlar va transport vositalarini ushbu Nizomga muvofiq Davlat chegarasi orqali oʻtkazishda ishtirok etadigan chegara, bojxona, sanitariya-karantin, fitosanitariya, ekologiya va veterinariya nazorati organlari;
deklaratsiyalovchi shaxs — bojxona organlariga tranzit deklaratsiyasini oʻz nomidan taqdim etayotgan deklarant yoki deklarantning yoxud deklarant bilan shartnoma tuzgan bojxona brokerining shtat birligida boʻlgan tranzit deklaratsiyasini toʻldirish, imzolash va bojxona organlariga deklarant nomidan taqdim etishga vakolatli bojxona rasmiylashtiruvi boʻyicha mutaxassis;
tranzit deklaratsiyasi — tovarlar va (yoki) transport vositalari haqidagi maʼlumotlar koʻrsatilgan holda bojxona organiga taqdim etiladigan hamda Oʻzbekiston Respublikasining bojxona hududiga olib kiriladigan va Oʻzbekiston Respublikasining hududi orqali tranzit olib oʻtiladigan tovarlarni joʻnatuvchi bojxona organidan tovar kelib tushadigan bojxona organigacha nazorat qilish uchun foydalaniladigan hujjat;
“E-tranzit” avtomatlashtirilgan axborot tizimi (keyingi oʻrinlarda — “E-tranzit” AAT) — bojxona tranziti bojxona rejimiga joylashtiriladigan tovar va (yoki) transport vositalari toʻgʻrisidagi hujjat va maʼlumotlarni taqdim etish, qabul qilish, roʻyxatdan oʻtkazish, rasmiylashtirish, hisobga olish hamda monitoring qilishni nazarda tutuvchi Oʻzbekiston Respublikasi Iqtisodiyot va moliya vazirligi huzuridagi Bojxona qoʻmitasining avtomatlashtirilgan axborot tizimi;
“E-arxiv” interaktiv xizmati — tovarlarni elektron shaklda deklaratsiyalashni shakllantirishga asos hisoblangan elektron hujjatlarni taqdim etish hamda saqlash uchun moʻljallangan va deklaratsiyalash jarayoni va bojxona rasmiylashtiruvi davomida bojxona organlari bilan axborot almashinuviga qaratilgan bir martalik elektron arxivni yaratish imkonini beruvchi xizmat;
joʻnatuvchi bojxona organi — qaysi bojxona organi faoliyat koʻrsatish zonasida tovarlarni bojxona nazorati ostida tashish boshlanadigan boʻlsa, oʻsha bojxona organi;
identifikatsiya kodi — bojxona organlariga taqdim qilingan tranzit deklaratsiyasiga “E-tranzit” AAT orqali berilgan yagona elektron kod;
munosabat belgisi — davlat nazorat organlari tomonidan “E-tranzit” AATga qoʻyiladigan belgi;
tovar kelib tushadigan bojxona organi — qaysi bojxona organi faoliyat koʻrsatish zonasida tovarlarni bojxona nazorati ostida tashish tugallanadigan boʻlsa, oʻsha bojxona organi;
tranzit operatsiyalari — tovar va transport vositalarining bojxona rasmiylashtiruvida tovarlarga va transport vositalariga nisbatan davlat nazorat organlari va (yoki) vakolatli shaxs tomonidan amalga oshiriladigan harakat.
3. Tovar va transport vositalarini bojxona tranziti bojxona rejimiga joylashtirish “E-tranzit” AATda yoki “us-uz.gov.uz” axborot tizimida tranzit deklaratsiyasini bojxona organiga elektron tarzda taqdim etish va uni rasmiylashtirish orqali amalga oshiriladi.
4. Tranzit deklaratsiyasi bir yoki bir nechta tovarning kuzatuv hujjatlari boʻyicha tashiladigan tovarning har bir turkumi yoki tovarlarning bir nechta turkumi uchun rasmiylashtiriladi. Bunda tovarning bir nechta turkumi boʻyicha bitta tranzit deklaratsiyasini rasmiylashtirish uchun ular bir transport vositasida bitta transport hujjati bilan bitta joʻnatuvchidan bitta qabul qiluvchining manziliga tashilayotgan boʻlishi lozim.
5. Tranzit deklaratsiyasining bojxona rasmiylashtiruvi quyidagi ikki bosqichda ushbu Nizomga ilovada keltirilgan sxema boʻyicha amalga oshiriladi:
birinchi bosqichda deklaratsiyalovchi shaxs tovarlar boʻyicha tranzit deklaratsiyasini joʻnatuvchi bojxona organlariga elektron shaklda taqdim etadi. Taqdim etilgan tranzit deklaratsiyasi bojxona organlarida roʻyxatga olinib, unga davlat nazorat organlari tomonidan munosabat belgisi qayd etiladi va tranzit operatsiyasi boshlanadi. Bunda, bojxona, veterinariya va fitosanitariya organlarining nazorat tartibotlari xavfni boshqarish tizimining topshirigʻiga asosan amalga oshiriladi;
ikkinchi bosqichda bojxona tranziti bojxona rejimiga rasmiylashtirilgan tovar va transport vositalari belgilangan joylarga yetkazib beriladi, tovar va transport vositasi yetkazib berilganligi fakti tasdiqlanadi va kuzatuv hujjatlari taqdim etilgandan soʻng tovar kelib tushadigan bojxona organi tomonidan tranzit operatsiyalari yakunlanadi.
2-bob. Tranzit deklaratsiyasi va tovarning kuzatuv hujjatlarini taqdim etish
6. Tranzit deklaratsiyasi quyidagi hollarda taqdim etiladi:
tovarlarni bojxona hududiga olib kirishda yoki bojxona hududi orqali tranzit olib oʻtishda — tovar va transport vositasi bojxona chegarasini kesib oʻtgunga qadar yoki kesib oʻtish vaqtida;
bojxona hududida turgan tovarlarni bojxona nazorati ostida yetkazib berishni nazorat qilishda — tovarlar transport vositasiga yuklanishidan avval taqdim etiladi;
bojxona hududida turgan bojxona nazorati ostidagi transport vositasini tovar sifatida yetkazib berishni nazorat qilishda — yuk operatsiyalarini amalga oshirishdan oldin.
Agar tranzit deklaratsiyasi joʻnatuvchi bojxona organi tomonidan roʻyxatga olingan kundan eʼtiboran oʻttiz kalendar kun ichida unda koʻrsatilgan tovarlar deklaratsiya roʻyxatga olingan bojxona organiga taqdim etilmagan boʻlsa, tranzit deklaratsiyasi berilmagan deb hisoblanadi va avtomatik tarzda bekor qilinadi.
7. Bojxona organiga tranzit deklaratsiyasini taqdim etish quyidagi holatlarda talab etilmaydi:
tovar va transport vositalari respublika hududidan olib chiqilayotganda, bundan reeksport bojxona rejimidagi tovarlar olib chiqilishi mustasno;
jismoniy shaxslar tomonidan qoʻl yuki yoki kuzatib boriladigan bagajida tovarlar olib oʻtilayotganda, bundan tijorat maqsadida olib oʻtilayotgan tovarlar mustasno;
yuksiz transport vositalari oʻtganda hamda yoʻlovchilar tashilganda, transport vositasini Oʻzbekiston Respublikasining bojxona hududiga tovar sifatida olib kirish va Oʻzbekiston Respublikasining hududi orqali tovar sifatida tranzit olib oʻtish holatlari bundan mustasno;
Yuklarni xalqaro yoʻllarda tashish daftarchasini qoʻllagan holda Yuklarni xalqaro tashish toʻgʻrisidagi bojxona Konvensiyasiga (1975-yil 14-noyabr, Jeneva,) muvofiq tovarlar Yuklarni xalqaro yoʻllarda tashish daftarchasi asosida dastlabki axborotni taqdim etish orqali tashilganda;
Vaqtincha olib kirish toʻgʻrisidagi konvensiyaga (1990-yil 26-iyun, Istanbul) muvofiq tovarlar ATA karneti asosida bojxona organlariga dastlabki axborotni taqdim etish orqali tashilganda;
davlat sirlari toʻgʻrisidagi maʼlumotlar mavjud boʻlgan tashqi savdo kontraktlari boʻyicha olib kelinayotgan tovarlar tashilganda;
qonunchilik hujjatlarida belgilangan boshqa hollarda.
8. Tranzit deklaratsiyasi joʻnatuvchi bojxona organiga elektron raqamli imzo bilan tasdiqlangan holda elektron shaklda “E-Tranzit” AAT orqali deklaratsiyalovchi shaxs tomonidan taqdim etiladi.
Tranzit deklaratsiyasi “Oʻzbekiston temir yoʻllari” aksiyadorlik jamiyati tomonidan taqdim etilganda, deklaratsiyalovchi shaxs tomonidan taqdim etilgan tranzit deklaratsiyasi jamiyatning masʼul xodimi tomonidan umumlashtiriladi va bitta temir yoʻl transporti tarkibi doirasida bojxona organiga oʻziga biriktirilgan elektron raqamli imzosi orqali taqdim etiladi.
Bunda “Oʻzbekiston temir yoʻllari” aksiyadorlik jamiyatining masʼul xodimiga tranzit deklaratsiyasi tovarga vakolatli shaxs yoki u bilan shartnoma tuzgan bojxona brokeri nomidan bojxona rasmiylashtiruvi boʻyicha mutaxassis tomonidan oʻziga biriktirilgan elektron raqamli imzosi orqali taqdim etilishi mumkin.
Tranzit deklaratsiyasi “Oʻzbekiston temir yoʻllari” aksiyadorlik jamiyati masʼul xodimiga deklaratsiyalovchi shaxs tomonidan taqdim etilganda mazkur Nizomning 11-bandida qayd etilgan talablar boʻyicha tranzit deklaratsiyasidagi maʼlumotlarning toʻgʻriligi va unga ilova qilingan hujjatlarga muvofiqligi uchun javobgarlik tranzit deklaratsiyasini toʻldirgan va “Oʻzbekiston temir yoʻllari” aksiyadorlik jamiyati masʼul xodimiga taqdim etgan deklaratsiyalovchi shaxsda qoladi.
9. Tovar va transport vositalarining kuzatuv hujjatlari “E-Tranzit” AATga “E-arxiv” interaktiv xizmati orqali ilova qilinadi. Bunda “E-Tranzit” AATning tegishli maydoniga “E-arxiv” interaktiv xizmati orqali hujjatlarga berilgan maxsus raqam qoʻyiladi.
Deklarant tashqi iqtisodiy faoliyat ishtirokchisi kabinetidagi “E-arxiv” interaktiv xizmatidan foydalangan holda elektron arxivni shakllantirib, unga oʻzining elektron raqamli imzosi bilan tasdiqlagan bojxona rasmiylashtiruvi uchun taqdim etiladigan hujjatlarning elektron shakllarini joylashtiradi.
Elektron arxivga joylashtirilgan hujjatlarga avtomatik tarzda maxsus raqam beriladi va bu haqda deklarantga tasdiqlangan elektron xabarnoma yuboriladi.
10. Tovar va transport vositalarining kuzatuv hujjatlari “E-Tranzit” AATga “E-arxiv” interaktiv xizmati orqali ilova qilinganda, ushbu hujjatlarni bojxona va boshqa rasmiylashtiruv jarayonlarida davlat nazorat organlariga qaytadan taqdim etish talab etilmaydi, sifatsiz (xira, boʻyalgan, tushunarsiz va hokazo) hujjatlar bundan mustasno.
11. Deklaratsiyalovchi shaxs tranzit deklaratsiyasidagi maʼlumotlarning toʻgʻriligi va unga ilova qilingan hujjatlarga muvofiqligi uchun javobgar hisoblanadi, deklaratsiyani toʻldirish uchun taqdim etilgan hujjatlardagi maʼlumotlarning notoʻgʻriligi bilan bogʻliq holatlar bundan mustasno.
12. Deklarant taqdim etilgan hujjatlardagi (tranzit deklaratsiyasi bundan mustasno) maʼlumotlarning toʻgʻriligi va amalda olib oʻtilayotgan tovarlar va transport vositalariga oʻzaro muvofiqligi uchun javobgar hisoblanadi.
3-bob. Tranzit deklaratsiyasini rasmiylashtirish
1-§. Tranzit deklaratsiyasini rasmiylashtirishning birinchi bosqichi
13. Tranzit deklaratsiyasi quyidagi hujjatlarning elektron nusxasi bilan birga joʻnatuvchi bojxona organiga taqdim etiladi:
a) avtotransport vositasida tashilganda:
Yoʻl harakati toʻgʻrisida Konvensiyaga (Vena, 1968-yil 8-noyabr) muvofiq avtotransport vositasini roʻyxatdan oʻtkazish toʻgʻrisida guvohnoma;
Oʻzbekiston Respublikasining xalqaro shartnomalarida nazarda tutilgan hollarda xorijiy avtotransport vositalarining Oʻzbekiston Respublikasi hududiga kirishi, chiqishi va tranzit oʻtishi uchun vakolatli organning ruxsatnomasi;
Yuklarni xalqaro yoʻllarda tashish shartnomasi toʻgʻrisidagi Konvensiya (Jeneva, 1956-yil 19-may) talablariga muvofiq tovar-transport yukxati;
tijorat hujjatlari;
tovarlar bojxona chegarasi orqali olib oʻtilishi bilan bogʻliq taqiq va cheklovlarga rioya etilishini tasdiqlovchi hujjatlar, agar bunday hujjatlar mavjud boʻlganda olib oʻtishga yoʻl qoʻyilsa;
b) temir yoʻl transportida xalqaro tashuvlarda:
Xalqaro temir yoʻl yuk yoʻnalishlari toʻgʻrisidagi bitimga (1951-yil 1-noyabr) muvofiq hujjatlar;
tijorat hujjatlari;
temir yoʻlning harakatdagi tarkibiga doir topshirish qaydnomasi;
tovarlarning bojxona chegarasi orqali harakatlanishida taqiqlar va cheklovlarga rioya qilinganligini tasdiqlovchi hujjatlar, agar bunday harakatlanish ushbu hujjatlar mavjudligida ruxsat berilgan taqdirda;
v) havo transportida xalqaro tashish chogʻida:
yuk qaydnomasi;
avia yuk xati;
tijorat hujjatlari;
tovarlarning bojxona chegarasi orqali harakatlanishida taqiqlar va cheklovlarga rioya qilinganligini tasdiqlovchi hujjatlar, agar bunday harakatlanish ushbu hujjatlar mavjudligida ruxsat berilgan taqdirda.
14. Tranzit deklaratsiyasi bojxona organiga taqdim qilinib, “E-Tranzit” AATda yoki “us-uz.gov.uz” axborot tizimida roʻyxatga olingandan soʻng tizim orqali avtomatik tarzda identifikatsiya kodi beriladi.
Tranzit deklaratsiyasi roʻyxatga olinganligi toʻgʻrisida deklaratsiyalovchi shaxsga elektron tarzda maʼlumot yuboriladi.
15. Tranzit deklaratsiyasi “E-Tranzit” AATda roʻyxatga olingan paytdan boshlab yuridik ahamiyatga molik faktlardan dalolat beruvchi hujjatga aylanadi.
16. Tovar va transport vositalari joʻnatuvchi bojxona organiga yetib kelgandan soʻng tashuvchi tovar va transport vositalarining kuzatuv hujjatlari bilan birga identifikatsiya kodini bojxona organiga taqdim etadi.
Taqdim etilgan identifikatsiya kodi asosida tranzit deklaratsiyasi bojxona organi tomonidan qabul qilinadi va bu haqda deklaratsiyalovchi shaxsga elektron xabarnoma yuboriladi.
17. Bojxona organlari xodimi bojxona rasmiylashtiruvini amalga oshirishda bojxona qonunchiligida belgilangan harakatlarni bajaradi.
18. Tovar va transport vositalarini bojxona tranziti bojxona rejimiga rasmiylashtirishda toʻlanishi lozim boʻlgan barcha turdagi toʻlovlar va yigʻimlarni toʻlash tranzit deklaratsiyasi rasmiylashtirilgunga qadar yoki bojxona hududida amalga oshiriladi.
Mazkur toʻlovlar va yigʻimlar tranzit deklaratsiyasi bojxona organlarida roʻyxatdan oʻtgan kunda amalda boʻlgan normativ-huquqiy hujjatlarga muvofiq Oʻzbekiston Respublikasi Markaziy banki tomonidan belgilangan valyutalarning rasmiy ayirboshlash kursi yoki bazaviy hisoblash miqdoridan kelib chiqib hisoblanadi hamda shu maqsadda ochilgan bank hisob raqamiga oʻtkaziladi.
Oʻtkazilgan toʻlov va yigʻimlar besh ish kuni mobaynida avtomatik tarzda davlat nazorati organlarining Iqtisodiyot va moliya vazirligi huzuridagi shaxsiy gʻazna hisobvaragʻiga oʻtkaziladi.
19. Joʻnatuvchi bojxona postida faoliyat olib boruvchi davlat nazorati organlari toʻlanishi lozim boʻlgan tegishli toʻlovlar va yigʻimlar toʻgʻri hisoblanganligini tegishliligi boʻyicha nazorat qiladi.
20. Joʻnatuvchi bojxona organida faoliyat olib boruvchi davlat nazorat organlari oʻziga yuklatilgan vazifalaridan kelib chiqib, taqdim etilgan hujjatlar hamda tranzit deklaratsiyasidagi maʼlumotlar bilan tanishib, oʻzining munosabat belgisini qayd etgandan soʻng tranzit operatsiyalari boshlanadi.
Tranzit operatsiyalari boshlanganligi haqida deklarant yoki deklaratsiyalovchi shaxsga elektron xabarnoma yuboriladi. Bunda joʻnatuvchi bojxona postida tranzit deklaratsiyasi rasmiylashtirilganligi va tovarni yetkazib berish muddati bilan bogʻliq maʼlumotlar xabarnomada aks ettiriladi.
2-§. Tranzit deklaratsiyasini rasmiylashtirishning ikkinchi bosqichi
21. Tashuvchi tomonidan tovar va transport vositasi belgilangan manzilga yetkazib berilgandan hamda chegara bojxona postida hisoblangan yigʻimlar toʻlangandan soʻng bojxona organi axborot tizimida tovar va transport vositasi yetkazib berilganligi hamda yigʻimlar toʻlanganligi tasdiqlanadi.
22. Axborot tizimida tovar va transport vositasi yetkazib berilganligi fakti tasdiqlangandan soʻng bojxona tranziti bojxona rejimi yakunlanadi.
23. Oʻzbekiston Respublikasining xalqaro shartnomalarida tovarning kuzatuv hujjatlariga bojxona organlari tomonidan belgi qoʻyilishi koʻzda tutilgan hollarda mazkur Nizomning 21-bandi talablari bajarilgandan soʻng tashuvchi kuzatuv hujjatlarini tovarlar kelib tushadigan bojxona organiga belgi qoʻyish uchun taqdim etadi.
Kuzatuv hujjatlari taqdim etilgandan soʻng tovar kelib tushadigan bojxona organi tegishli belgini qoʻyadi va tashuvchiga qaytarib beradi.
24. Bojxona tranziti bojxona rejimi yakunlangan paytdan eʼtiboran tranzit deklaratsiyasidagi bojxona hududida turgan tovar “vaqtincha saqlash” bojxona rejimida turgan tovar maqomini oladi, bundan “bojxona ombori” bojxona rejimida bojxona nazorati ostida turgan vaqtda bir bojxona omboridan boshqasiga bojxona nazorati ostida yetkazib berilgan tovarlar mustasno. Bunda “vaqtincha saqlash” bojxona rejimiga joylashtirish uchun bojxona yuk deklaratsiyasini taqdim etish talab etilmaydi.
Agar tovarlar “bojxona ombori” bojxona rejimida turgan vaqtda bir bojxona omboridan boshqasiga yetkazib berilgan boʻlsa, tovarlarni “bojxona ombori” bojxona rejimiga rasmiylashtirish uchun takroran bojxona yuk deklaratsiyasi taqdim etilmaydi, bundan qonunchilikda nazarda tutilgan hollar mustasno.
Vaqtincha saqlash” maqomida turgan tovarlarni belgilangan muddatda boshqa bojxona rejimiga joylashtirishga masʼul shaxsning maʼlumotlari deklarant yoki uning nomidan ish koʻruvchi vakolatli shaxs tomonidan Bojxona qoʻmitasining “Bojxona va yuk operatsiyalari” axborot tizimida tasdiqlanadi.
4-bob. Tranzit deklaratsiyasini oʻzgartirish, unga qoʻshimcha kiritish, uni qayta rasmiylashtirish yoxud bekor qilish
25. Tranzit deklaratsiyasida koʻrsatilgan maʼlumotlarga deklarant tomonidan oʻzgartirishlar yoki qoʻshimchalar kiritilishi, topshirilgan tranzit deklaratsiyasi esa qaytarib olinishi mumkin.
Tranzit deklaratsiyasini oʻzgartirish, unga qoʻshimcha kiritish va (yoki) uni qaytarib olish tranzit deklaratsiyasi bojxona organi tomonidan qabul qilinguniga qadar amalga oshiriladi.
26. Tranzit deklaratsiyasi qabul qilinganidan soʻng uni oʻzgartirish, qoʻshimcha kiritish, qayta rasmiylashtirish, qaytarib olish va (yoki) bekor qilish deklarant bojxona organiga murojaat etganidan keyin amalga oshiriladi.
27. Bojxona rasmiylashtiruvi tugallanganidan keyin tranzit deklaratsiyasi bojxona organi tomonidan roʻyxatga olingan kundan eʼtiboran uch yil ichida tranzit deklaratsiyasiga bojxona organining talabi bilan yoki bojxona organi deklarant tomonidan koʻrsatilgan sabablarni asosli deb topsa, uning arizasiga koʻra oʻzgartirish, unga qoʻshimcha kiritish, uni qayta rasmiylashtirish yoxud bekor qilish mumkin.
28. Deklarantning murojaatiga asosan tranzit deklaratsiyasiga bojxona organlari tomonidan ham oʻzgartirish va qoʻshimchalar kiritilishi mumkin. Bunda tranzit deklaratsiyasiga kiritilgan oʻzgartirish va qoʻshimchalar uchun qonunchilik hujjatlarida belgilangan stavkalar boʻyicha yigʻim undiriladi.
29. Tranzit deklaratsiyasini toʻldirish, bojxona organlariga taqdim etish, rasmiylashtirish, oʻzgartirish, unga qoʻshimcha kiritish, uni bekor qilish va qaytarib olish tartibi Oʻzbekiston Respublikasi Iqtisodiyot va moliya vazirligi huzuridagi Bojxona qoʻmitasi tomonidan belgilanadi.
30. Deklarant yoki deklaratsiyalovchi shaxs bojxona rasmiylashtiruvi jarayonida va undan soʻng bojxona xizmati organlari tomonidan tranzit deklaratsiyasida qoidabuzarliklar aniqlangunga qadar bojxona toʻlovlarini hisoblashga yoki taqiq, cheklovlar qoʻllanilishiga taʼsir etmaydigan qoidabuzarliklarni ixtiyoriy ravishda bojxona organi ruxsati bilan tuzatish huquqiga ega, bundan qonunchilikda deklarant yoki deklaratsiyalovchi shaxsning murojaatiga asosan tranzit deklaratsiyasini oʻzgartirish, unga qoʻshimcha kiritish, uni qaytarib olish va bekor qilish taqiqlangan holatlar mustasno.
Ushbu holatlarda deklarant va deklaratsiyalovchi shaxsga nisbatan maʼmuriy huquqbuzarlikka oid protsessual hujjatlar rasmiylashtirilmaydi.
31. Deklarantning nomidan u ishonch bildirgan shaxs bojxona organlariga bojxona rasmiylashtiruvi uchun hujjatlarning elektron shakllarini taqdim etishi, tranzit deklaratsiyasini oʻzgartirish, unga qoʻshimcha kiritish, uni qayta rasmiylashtirish yoxud bekor qilish boʻyicha murojaat etishi mumkin. Bunda u qonunchilik hujjatlarida belgilangan deklarantning huquq va majburiyatlariga ega boʻladi.
5-bob. Yakunlovchi qoidalar
32. Chegara bojxona postlarida veterinariya va fitosanitariya organlarining nazorat tartibotlarini xavfni boshqarish tamoyili asosida tashkil etishda veterinariya, fitosanitariya va bojxona organlari oʻrtasida oʻzaro maʼlumot almashinuvi joriy etiladi.
33. Ushbu Nizomni qoʻllashda yuzaga keladigan nizolar qonunchilikda belgilangan tartibda hal etiladi.
34. Mazkur Nizom talablarining buzilishida aybdor boʻlgan shaxslar qonunchilikka muvofiq javob beradilar.
Tovar va transport vositalari bilan tranzit operatsiyalarini amalga oshirish tartibi toʻgʻrisidagi nizomga ILOVA
Tovar va transport vositalari bilan tranzit operatsiyalarini amalga oshirish
Bosqichlar Ishtirokchilar Tadbirlar Bajarish muddatlari 1-bosqich Deklaratsiyalovchi shaxs Tranzit deklaratsiyasi hamda taqdim etiladigan hujjatlarni tayyorlaydi, elektron raqamli imzosi bilan tasdiqlaydi va “E-tranzit” AAT orqali bojxona organlariga yuboradi. Nizomning 6-bandi ikkinchi — toʻrtinchi xatboshilarida belgilangan muddatlarda “E-Tranzit” AAT 1. Tranzit deklaratsiyasini roʻyxatga oladi va identifikatsiya kodini beradi. 2. Tranzit deklaratsiyasi roʻyxatga olinganligi toʻgʻrisida deklaratsiyalovchi shaxsga elektron xabarnoma yuboradi. Real vaqt rejimida Deklarant 1. Tovar va transport vositalarining kuzatuv hujjatlari bilan birga identifikatsiya kodni bojxona organiga taqdim etadi. Bojxona hududiga kirib kelayotganda — tovarlar va transport vositalari joʻnatuvchi bojxona organiga kelgandan soʻng. Ichki hududda — tayyor boʻlishga koʻra. 2. Tegishli bojxona toʻlovlari va yigʻimlarni toʻlaydi. Tranzit deklaratsiyasi rasmiylashtirilgunga qadar yoki bojxona hududida Davlat nazorati organlari Taqdim etilgan hujjatlar hamda tranzit deklaratsiyasidagi maʼlumotlar bilan tanishib, oʻzining munosabat belgisini qayd etadi. Chegara bojxona postida — uch soat ichida Ichki hududda — bir ish kunida “E-Tranzit” AAT Vakolatli organlarning munosabat belgilari qayd etilgandan soʻng tranzit operatsiyalari boshlanganligi haqida deklarant yoki deklaratsiyalovchi shaxsga elektron xabarnoma yuboradi. Real vaqt rejimida 2-bosqich Bojxona organi axborot tizimi Tashuvchi tomonidan tovar va transport vositasi belgilangan manzilga yetkazib berilgandan hamda chegara bojxona postida hisoblangan yigʻimlar toʻlangandan soʻng bojxona organi axborot tizimida tovar va transport vositasi yetkazib berilganligi hamda yigʻimlar toʻlanganligi tasdiqlanadi hamda bojxona tranziti bojxona rejimi yakunlanadi. Real vaqt rejimida Tashuvchi Oʻzbekiston Respublikasining xalqaro shartnomalarida tovarning kuzatuv hujjatlariga bojxona organlari tomonidan belgi qoʻyilishi koʻzda tutilgan hollarda mazkur Nizomning 21-bandi talablari bajarilgandan soʻng tashuvchi tovarlar kelib tushadigan bojxona organiga belgi qoʻyish uchun taqdim etadi. Ish vaqtida uch soat ichida Tovarlar kelib tushadigan bojxona organi Kuzatuv hujjatlari taqdim etilgandan soʻng tovar kelib tushadigan bojxona organi tegishli belgini qoʻyadi va tashuvchiga qaytarib beradi. 30 daqiqa ichida
Oʻzbekiston Respublikasining Bosh vaziri A. ARIPOV
Toshkent sh.,
2022-yil 31-dekabr,
737-son