📅 2023-yil 6-yanvar · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2023 йил 6 январь · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 6 января 2023 г. · Постановления Кабинета Министров
Официальный текст. Официальный документ. Редакционные примечания не включены.
📅 6 January 2023 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
Қишки спорт турлари бўйича республика ихтисослаштирилган спорт мактаби фаолиятини ташкил этиш чора-тадбирлари тўғрисида
Ўзбекистон Республикаси Президентининг «2026 йил Милан ва Кортина-дʼАмпеццо шаҳарларида (Италия) бўлиб ўтадиган XXV қишки Олимпия ва XIV Паралимпия ўйинларига Ўзбекистон спортчиларини комплекс тайёрлаш тўғрисида» 2022 йил 1 июлдаги ПҚ-303-сон қарори ижросини таъминлаш, шунингдек, қишки спорт турлари бўйича иқтидорли спортчиларни тайёрлаш мақсадида Вазирлар Маҳкамаси қарор қилади:
1. Ўзбекистон Республикаси Президентининг «2026 йил Милан ва Кортина-дʼАмпеццо шаҳарларида (Италия) бўлиб ўтадиган XXV қишки Олимпия ва XIV Паралимпия ўйинларига Ўзбекистон спортчиларини комплекс тайёрлаш тўғрисида» 2022 йил 1 июлдаги ПҚ-303-сон қарорига мувофиқ Тошкент шаҳрида Қишки спорт турлари бўйича республика ихтисослаштирилган спорт мактаби (кейинги ўринларда — Республика қишки спорт мактаби) ташкил этилганлиги маълумот учун қабул қилинсин.
2. Қуйидагилар Республика қишки спорт мактаби мактабининг асосий вазифалари этиб белгилансин:
зарур спорт анжомлари ва ускуналари билан жиҳозланган, замонавий халқаро талаблар ва стандартларга жавоб берадиган моддий-техника ҳамда ўқув-машғулот базаларини яратиш ва турли даражадаги халқаро ва минтақавий мусобақаларда — қишки Олимпия ва Паралимпия ўйинлари, жаҳон ва Осиё чемпионатлари ҳамда бошқа халқаро мусобақаларда Ўзбекистоннинг шарафини муносиб ҳимоя қилишга қодир бўлган халқаро даражадаги спортчиларни тайёрлаш;
қишки спорт турлари бўйича халқаро даражадаги спортчиларни тайёрлаш учун юқори малакали мутахассис-тренерлар, психологлар ва услубчиларни, шу жумладан, хорижий мамлакатлардан етакчи мутахассисларни кенг жалб этиш орқали тренерлар таркибини мустаҳкамлаш;
спортчиларнинг ўқув-машғулот жараёнини халқаро стандартлар даражасида ташкил этиш, илғор тажрибани ҳисобга олган ҳолда, ўқув-машқ жараёнларига энг янги илмий-услубий технологияларни жорий этиш йўли билан уларни назарий ва техник-тактик жиҳатдан тайёрлаш сифатини мунтазам ошириб бориш;
спортчиларнинг профессионал фазилатларини ривожлантириш, шунингдек, қишки спорт турини ривожлантиришнинг халқаро талабларига мувофиқ ҳолда Ўзбекистон миллий терма жамоаларига юқори маҳоратли спортчиларни тайёрлаш;
қишки спорт турлари бўйича ёш истиқболли спортчиларни танлаш ва тарбиялаш масалалари бўйича ихтисослаштирилган спорт мактаблари, Олимпия ва Паралимпия спорт турларига тайёрлаш марказлари, клублар, Спортнинг қишки ва мураккаб техник турлари бўйича республика олий спорт маҳорати мактаби ва бошқа спорт-таълим муассасалари билан узлуксиз ҳамкорликни амалга ошириш;
қишки спорт турлари бўйича миллий терма жамоалар ва уларнинг захиралари иштирокида ўқув-машқ йиғинлари, республика ва минтақавий спорт мусобақаларини ташкил этиш ҳамда мунтазам равишда ўтказиб бориш, тренерлар ҳамда спортчиларнинг касб маҳорати даражасини ошириш учун тажриба алмашиш, шу жумладан хорижий мамлакатларнинг қишки спорт турлари бўйича мактаблари, клублари ва марказлари билан ҳамкорликни ривожлантириш.
3. Белгилаб қўйилсинки, Республика қишки спорт мактаби:
юридик шахс мақомига эга бўлган мактабдан ташқари спорт-таълим муассасаси ҳисобланади;
ўз фаолиятини 2024/2025 ўқув йилидан бошлайди;
ўз фаолиятини Вазирлар Маҳкамасининг «Спорт мактаблари фаолиятини ҳамда спорт мактаблари тренерлари ва мутахассислари меҳнатини моддий рағбатлантириш тизимини янада такомиллаштириш тўғрисида» 2010 йил 23 сентябрдаги 211-сон қарорига мувофиқ амалга оширади ҳамда мақоми бўйича (фаолиятини молиялаштириш, ташкил этиш, бошқариш ва бошқалар) ихтисослаштирилган спорт мактабига тенглаштирилади.
4. Қуйидагилар Республика қишки спорт мактабини молиялаштириш манбалари этиб белгилансин:
Давлат бюджети маблағлари;
фаолият ихтисослиги бўйича товарларни (ишларни, хизматларни) реализация қилишдан ва Республика қишки спорт мактабининг уставидаги вазифаларга мувофиқ бўлган бошқа фаолият турларидан олинган даромадлар;
асосий машғулотлар ўтказилмайдиган вақтда бўш турган мол-мулкни ижарага беришдан тушган даромадлар;
юридик ва жисмоний шахсларнинг ҳомийлик хайриялари;
қонунчилик ҳужжатларида тақиқланмаган бошқа манбалар.
5. Спорт вазирлиги:
а) уч ой муддатда:
Республика қишки спорт мактабининг тузилмасини ва уставини тасдиқлаш, шунингдек, уставни белгиланган тартибда давлат рўйхатидан ўтказиш;
Республика қишки спорт мактабини юқори малакали тренер кадрлар билан таъминлаш ва спорт захирасини тайёрлаш ишларини олиб бориш чораларини кўрсин;
б) Ўзбекистон Миллий олимпия қўмитаси, қишки спорт турлари бўйича федерация (ассоциация)лар билан биргаликда Республика қишки спорт мактабида спортчиларни тайёрлаш сифати юзасидан доимий назоратни амалга оширсин.
6. Давлат активларини бошқариш агентлиги Ёшлар сиёсати ва спорт вазирлиги, Қурилиш ва уй-жой коммунал хўжалиги вазирлиги билан биргаликда 2023 йил 1 мартга қадар Республика қишки спорт мактабини ташкил этиш учун фойдаланилмаётган бино ва иншоотларни ажратиш бўйича тегишли таклифларни Вазирлар Маҳкамасига киритсин.
Бунда Республика қишки спорт мактабини ташкил этиш ва спорт иншоотларини қуришда қишки спорт турлари (фигурали учиш, конькида учиш, шорт-трек, хоккей) билан ўқувчиларнинг доимий машғулот ўтказишлари учун замонавий ёпиқ муз саройи ва очиқ спорт майдони ҳамда махсус тренажёр залига эга бўлиши назарда тутилсин.
7. Спорт вазирлиги Иқтисодиёт ва молия вазирлиги ҳамда Камбағалликни қисқартириш ва бандлик вазирлиги билан биргаликда Республика қишки спорт мактабининг қурилиш ишларини амалга ошириш учун зарур маблағлар 2024 йил ва келгуси йиллар ижтимоий ва ишлаб чиқариш инфратузилмасини ривожлантириш дастурларида Жисмоний тарбия ва спорт объектларини қуриш, реконструкция қилиш ва мукаммал таъмирлаш учун ажратиладиган марказлаштирилган капитал қўйилмалар лимитлари доирасида ажратилишини таъминласин.
8. Спорт вазирлиги Иқтисодиёт ва молия вазирлиги ҳамда Камбағалликни қисқартириш ва бандлик вазирлиги билан биргаликда Республика қишки спорт мактаби фаолиятини сақлаш билан боғлиқ зарур маблағлар 2024 йилдан бошлаб Давлат бюджети параметрларида назарда тутилишини таъминласин.
9. Мазкур қарорнинг бажарилишини назорат қилиш ёшлар сиёсати ва спорт вазири А.И. Икрамов зиммасига юклансин.
Ўзбекистон Республикасининг Бош вазири А. АРИПОВ
Тошкент ш.,
2023 йил 6 январь,
3-сон
Oʻzbekiston Respublikasi Vazirlar Mahkamasining
qarori
Qishki sport turlari boʻyicha respublika ixtisoslashtirilgan sport maktabi faoliyatini tashkil etish chora-tadbirlari toʻgʻrisida
Oʻzbekiston Respublikasi Prezidentining “2026-yil Milan va Kortina-dʼAmpetstso shaharlarida (Italiya) boʻlib oʻtadigan XXV qishki Olimpiya va XIV Paralimpiya oʻyinlariga Oʻzbekiston sportchilarini kompleks tayyorlash toʻgʻrisida” 2022-yil 1-iyuldagi PQ-303-son qarori ijrosini taʼminlash, shuningdek, qishki sport turlari boʻyicha iqtidorli sportchilarni tayyorlash maqsadida Vazirlar Mahkamasi qaror qiladi:
1. Oʻzbekiston Respublikasi Prezidentining “2026-yil Milan va Kortina-dʼAmpetstso shaharlarida (Italiya) boʻlib oʻtadigan XXV qishki Olimpiya va XIV Paralimpiya oʻyinlariga Oʻzbekiston sportchilarini kompleks tayyorlash toʻgʻrisida” 2022-yil 1-iyuldagi PQ-303-son qaroriga muvofiq Toshkent shahrida Qishki sport turlari boʻyicha respublika ixtisoslashtirilgan sport maktabi (keyingi oʻrinlarda — Respublika qishki sport maktabi) tashkil etilganligi maʼlumot uchun qabul qilinsin.
2. Quyidagilar Respublika qishki sport maktabi maktabining asosiy vazifalari etib belgilansin:
zarur sport anjomlari va uskunalari bilan jihozlangan, zamonaviy xalqaro talablar va standartlarga javob beradigan moddiy-texnika hamda oʻquv-mashgʻulot bazalarini yaratish va turli darajadagi xalqaro va mintaqaviy musobaqalarda — qishki Olimpiya va Paralimpiya oʻyinlari, jahon va Osiyo chempionatlari hamda boshqa xalqaro musobaqalarda Oʻzbekistonning sharafini munosib himoya qilishga qodir boʻlgan xalqaro darajadagi sportchilarni tayyorlash;
qishki sport turlari boʻyicha xalqaro darajadagi sportchilarni tayyorlash uchun yuqori malakali mutaxassis-trenerlar, psixologlar va uslubchilarni, shu jumladan, xorijiy mamlakatlardan yetakchi mutaxassislarni keng jalb etish orqali trenerlar tarkibini mustahkamlash;
sportchilarning oʻquv-mashgʻulot jarayonini xalqaro standartlar darajasida tashkil etish, ilgʻor tajribani hisobga olgan holda, oʻquv-mashq jarayonlariga eng yangi ilmiy-uslubiy texnologiyalarni joriy etish yoʻli bilan ularni nazariy va texnik-taktik jihatdan tayyorlash sifatini muntazam oshirib borish;
sportchilarning professional fazilatlarini rivojlantirish, shuningdek, qishki sport turini rivojlantirishning xalqaro talablariga muvofiq holda Oʻzbekiston milliy terma jamoalariga yuqori mahoratli sportchilarni tayyorlash;
qishki sport turlari boʻyicha yosh istiqbolli sportchilarni tanlash va tarbiyalash masalalari boʻyicha ixtisoslashtirilgan sport maktablari, Olimpiya va Paralimpiya sport turlariga tayyorlash markazlari, klublar, Sportning qishki va murakkab texnik turlari boʻyicha respublika oliy sport mahorati maktabi va boshqa sport-taʼlim muassasalari bilan uzluksiz hamkorlikni amalga oshirish;
qishki sport turlari boʻyicha milliy terma jamoalar va ularning zaxiralari ishtirokida oʻquv-mashq yigʻinlari, respublika va mintaqaviy sport musobaqalarini tashkil etish hamda muntazam ravishda oʻtkazib borish, trenerlar hamda sportchilarning kasb mahorati darajasini oshirish uchun tajriba almashish, shu jumladan xorijiy mamlakatlarning qishki sport turlari boʻyicha maktablari, klublari va markazlari bilan hamkorlikni rivojlantirish.
3. Belgilab qoʻyilsinki, Respublika qishki sport maktabi:
yuridik shaxs maqomiga ega boʻlgan maktabdan tashqari sport-taʼlim muassasasi hisoblanadi;
oʻz faoliyatini 2024/2025 oʻquv yilidan boshlaydi;
oʻz faoliyatini Vazirlar Mahkamasining “Sport maktablari faoliyatini hamda sport maktablari trenerlari va mutaxassislari mehnatini moddiy ragʻbatlantirish tizimini yanada takomillashtirish toʻgʻrisida” 2010-yil 23-sentabrdagi 211-son qaroriga muvofiq amalga oshiradi hamda maqomi boʻyicha (faoliyatini moliyalashtirish, tashkil etish, boshqarish va boshqalar) ixtisoslashtirilgan sport maktabiga tenglashtiriladi.
4. Quyidagilar Respublika qishki sport maktabini moliyalashtirish manbalari etib belgilansin:
Davlat budjeti mablagʻlari;
faoliyat ixtisosligi boʻyicha tovarlarni (ishlarni, xizmatlarni) realizatsiya qilishdan va Respublika qishki sport maktabining ustavidagi vazifalarga muvofiq boʻlgan boshqa faoliyat turlaridan olingan daromadlar;
asosiy mashgʻulotlar oʻtkazilmaydigan vaqtda boʻsh turgan mol-mulkni ijaraga berishdan tushgan daromadlar;
yuridik va jismoniy shaxslarning homiylik xayriyalari;
qonunchilik hujjatlarida taqiqlanmagan boshqa manbalar.
5. Sport vazirligi:
a) uch oy muddatda:
Respublika qishki sport maktabining tuzilmasini va ustavini tasdiqlash, shuningdek, ustavni belgilangan tartibda davlat roʻyxatidan oʻtkazish;
Respublika qishki sport maktabini yuqori malakali trener kadrlar bilan taʼminlash va sport zaxirasini tayyorlash ishlarini olib borish choralarini koʻrsin;
b) Oʻzbekiston Milliy olimpiya qoʻmitasi, qishki sport turlari boʻyicha federatsiya (assotsiatsiya)lar bilan birgalikda Respublika qishki sport maktabida sportchilarni tayyorlash sifati yuzasidan doimiy nazoratni amalga oshirsin.
6. Davlat aktivlarini boshqarish agentligi Yoshlar siyosati va sport vazirligi, Qurilish va uy-joy kommunal xoʻjaligi vazirligi bilan birgalikda 2023-yil 1-martga qadar Respublika qishki sport maktabini tashkil etish uchun foydalanilmayotgan bino va inshootlarni ajratish boʻyicha tegishli takliflarni Vazirlar Mahkamasiga kiritsin.
Bunda Respublika qishki sport maktabini tashkil etish va sport inshootlarini qurishda qishki sport turlari (figurali uchish, konkida uchish, short-trek, xokkey) bilan oʻquvchilarning doimiy mashgʻulot oʻtkazishlari uchun zamonaviy yopiq muz saroyi va ochiq sport maydoni hamda maxsus trenajyor zaliga ega boʻlishi nazarda tutilsin.
7. Sport vazirligi Iqtisodiyot va moliya vazirligi hamda Kambagʻallikni qisqartirish va bandlik vazirligi bilan birgalikda Respublika qishki sport maktabining qurilish ishlarini amalga oshirish uchun zarur mablagʻlar 2024-yil va kelgusi yillar ijtimoiy va ishlab chiqarish infratuzilmasini rivojlantirish dasturlarida Jismoniy tarbiya va sport obyektlarini qurish, rekonstruksiya qilish va mukammal taʼmirlash uchun ajratiladigan markazlashtirilgan kapital qoʻyilmalar limitlari doirasida ajratilishini taʼminlasin.
8. Sport vazirligi Iqtisodiyot va moliya vazirligi hamda Kambagʻallikni qisqartirish va bandlik vazirligi bilan birgalikda Respublika qishki sport maktabi faoliyatini saqlash bilan bogʻliq zarur mablagʻlar 2024-yildan boshlab Davlat budjeti parametrlarida nazarda tutilishini taʼminlasin.
9. Mazkur qarorning bajarilishini nazorat qilish yoshlar siyosati va sport vaziri A.I. Ikramov zimmasiga yuklansin.
Oʻzbekiston Respublikasining Bosh vaziri A. ARIPOV
Toshkent sh.,
2023-yil 6-yanvar,
3-son