UzbekAI

Ўзбекистон Республикаси Вазирлар Маҳкамасининг

қарори

НИЗОМ

СХЕМАСИ

Тезкор-қидирув тадбирларини ўтказишда гиёҳвандлик воситалари, психотроп моддалар ва уларнинг аналоглари, прекурсорлар, кучли таъсир қилувчи моддалар ҳамда валюта намуналарини экспресс текшириш жараёнида техник воситалардан фойдаланиш тартиби тўғрисидаги низомни тасдиқлаш ҳақида

«Тезкор-қидирув фаолияти тўғрисида»ги Ўзбекистон Республикаси Қонунига ҳамда Ўзбекистон Республикаси Президентининг 2022 йил 25 июлдаги қарорига мувофиқ, шунингдек, тезкор-қидирув тадбирларини ўтказиш жараёнида гиёҳвандлик воситалари, психотроп моддалар ва уларнинг аналоглари, прекурсорлар, кучли таъсир қилувчи моддалар ҳамда валюта намуналарини техник воситалардан фойдаланган ҳолда тезкорлик билан текширишни ташкил этиш мақсадида Вазирлар Маҳкамаси қарор қилади:

1. Ўзбекистон Республикаси Президентининг 2022 йил 25 июлдаги қарорига асосан тезкор-қидирув тадбирларини ўтказишда гиёҳвандлик воситалари, психотроп моддалар ва уларнинг аналоглари, прекурсорлар, кучли таъсир қилувчи моддалар (кейинги ўринларда — гиёҳвандлик воситалари) ҳамда валюта намуналарини экспресс текшириш жараёнида техник воситалардан фойдаланиш тартибини жорий этиш ҳамда экспресс текширадиган замонавий техник воситаларни бюджетдан ташқари маблағлар ҳисобидан харид қилиш бўйича вазифалар белгиланганлиги маълумот учун қабул қилинсин.

2. Қуйидагиларни назарда тутувчи Тезкор-қидирув тадбирларини ўтказишда гиёҳвандлик воситалари, психотроп моддалар ва уларнинг аналоглари, прекурсорлар, кучли таъсир қилувчи моддалар ҳамда валюта намуналарини экспресс текшириш жараёнида техник воситалардан фойдаланиш тартиби тўғрисидаги низом иловага мувофиқ тасдиқлансин:

тезкор-қидирув тадбирларини ўтказиш жараёнида гиёҳвандлик воситалари ва валюта намуналарини экспресс текшириш учун техник воситалардан фойдаланиш тартиби;

гиёҳвандлик воситалари ва валюта намуналарини экспресс текширишда техник воситалардан фойдаланиладиган ҳолатлар ва мазкур воситалар орқали ўтказилган текширувларни расмийлаштириш тартиби;

гиёҳвандлик воситалари ва валюта намуналарини текширишда қўлланиладиган экспресс техник воситаларни масъул ходимга бириктириш ва ушбу воситаларни сақлаш тартиби.

3. Шундай тартиб ўрнатилсинки, унга мувофиқ 2023 йил 1 июлдан бошлаб, тезкор-қидирув фаолиятини амалга оширувчи органлар:

гиёҳвандлик воситаларининг ноқонуний муомаласи билан боғлиқ ҳолатни қайд этишда аниқланган модда (буюм)нинг гиёҳванд воситасига тааллуқли эканлигига шубҳа пайдо бўлганда;

аниқланган модда (буюм)ни гиёҳвандлик воситаларининг қайси турига мансублиги бўйича савол туғилганда;

гиёҳвандлик воситаларининг янги турлари аниқланганда;

тезкор-қидирув тадбирларини ўтказишда аниқланган валюта намунаси қалбаки эканлигига шубҳа пайдо бўлганда;

тезкор-қидирув тадбирлари давомийлигини таъминлаш зарурати юзага келганда, тезкорликни амалга ошириш ҳамда тегишли вақтни тежаш мақсадида мазкур модда (буюм) ёки валюта намуналарини улар аниқланган жойнинг ўзида ёки ҳуқуқни муҳофаза қилувчи органлар биносида экспресс текшириш техник воситалари ёрдамида текширади.

4. Белгилансинки, гиёҳвандлик воситалари ҳамда валюта намуналарини экспресс текширадиган замонавий техник воситалар заруратга кўра, тезкор-қидирув фаолиятини амалга оширувчи органларнинг бюджетдан ташқари маблағлари ва қонунчилик ҳужжатларида тақиқланмаган бошқа манбалар ҳисобидан белгиланган тартибда харид қилинади.

5. Ички ишлар вазирлиги:

тезкор-қидирув фаолиятини амалга оширувчи бошқа органлар билан биргаликда икки ой муддатда тезкор ходимлар учун тезкор-қидирув тадбирларини ўтказишда гиёҳвандлик воситалари ҳамда валюта намуналарини экспресс текшириш жараёнида техник воситалардан фойдаланиш тартибининг мазмун-моҳиятига бағишланган ўқув-семинарлар ташкил этсин;

бошқа манфаатдор вазирлик ва идоралар билан биргаликда ўзлари қабул қилган норматив-ҳуқуқий ҳужжатларни бир ой муддатда ушбу қарорга мувофиқлаштирсин.

6. Мазкур қарорнинг бажарилишини назорат қилиш Ўзбекистон Республикаси ички ишлар вазири П.Р. Бобожонов зиммасига юклансин.

Вазирлар Маҳкамасининг 2023 йил 12 январдаги 12-сон қарорига ИЛОВА

1-боб. Умумий қоидалар

1. Ушбу Низом тезкор-қидирув фаолиятини амалга оширувчи органларнинг тезкор бўлинмалари томонидан тезкор-қидирув тадбирларини ўтказиш жараёнида гиёҳвандлик воситалари, психотроп моддалар ва уларнинг аналоглари, прекурсорлар, кучли таъсир қилувчи моддалар ҳамда валюта намуналарини экспресс текшириш учун техник воситалардан фойдаланиш тартибини белгилайди.

2. Мазкур Низомда қуйидаги асосий тушунчалардан фойдаланилади:

валюта намуналари — муомаладаги миллий валюта ҳамда чет давлатнинг муомаласида бўлган ва қонуний тўлов воситаси ҳисобланган, шунингдек, муомаладан чиқарилган ёки чиқарилаётган, лекин Ўзбекистон Республикасининг пул белгиси билан алмаштирилиши лозим бўлган банкнот тарзидаги чет эл пул белгиси;

валюта операциялари — валюта қимматликларига мулк ҳуқуқининг бировга ўтиши билан боғлиқ операциялар, шу жумладан, ташқи иқтисодий фаолиятни амалга оширишда чет эл валютасидан, шунингдек, Ўзбекистон Республикаси пул бирлигидан тўлов воситаси сифатида фойдаланиш билан боғлиқ операциялар; валюта қимматликларини чет элдан Ўзбекистон Республикасига келтириш ва жўнатиш, уларни Ўзбекистон Республикасидан четга олиб чиқиш ва жўнатиш, халқаро миқёсда пул ўтказиш операциялари;

гиёҳвандлик воситалари — гиёҳвандлик воситалари рўйхатига киритилган ва Ўзбекистон Республикасида назоратга олинадиган, келиб чиқиши синтетик ёки табиий моддалар, таркибида гиёҳвандлик моддаси бўлган препаратлар ва ўсимликлар;

гиёҳвандлик воситалари ва психотроп моддаларнинг аналоглари — кимёвий тузилиши ва хоссаларига кўра гиёҳвандлик воситалари ва психотроп моддаларга ўхшаш, улар сингари руҳиятга фаол таъсир этувчи, келиб чиқиши синтетик ёки табиий моддалар;

кучли таъсир қилувчи моддалар — кучли таъсир қилувчи моддалар рўйхатига киритилган ва Ўзбекистон Республикасида реализация қилиниши қатъий тартибга солинган дори воситалари;

прекурсорлар — прекурсорлар рўйхатига киритилган ва Ўзбекистон Республикасида назоратга олинадиган, гиёҳвандлик воситаларини, уларнинг аналогларини ва психотроп моддаларни тайёрлаш учун фойдаланиладиган моддалар;

психотроп моддалар — психотроп моддалар рўйхатига киритилган ва Ўзбекистон Республикасида назоратга олинадиган, келиб чиқиши синтетик ёки табиий моддалар;

экспресс текшириш техник воситаси — Ўзбекистон Республикаси давлат стандарти рўйхатидан ўтган ва махсус сертификатга эга бўлган, гиёҳвандлик воситалари, психотроп моддалар ва уларнинг аналоглари, прекурсорлар, кучли таъсир қилувчи моддаларни (кейинги ўринларда — гиёҳвандлик воситалари) текширишга мўлжалланган, шунингдек, валюта операциялари давомида муомалада бўлган валюта намуналарининг ҳақиқийлигини текшириш техник воситаси.

3. Қуйидаги ҳолатларда тезкор-қидирув тадбирларини ўтказадиган тезкор ходим гиёҳвандлик воситаларининг ноқонуний муомаласи билан боғлиқ ҳолатни қайд этишда, шунингдек, валюта операциялари давомида муомалада бўлган валюта намуналарини улар аниқланган жойнинг ўзида ёки ҳуқуқни муҳофаза қилувчи тегишли орган биносида экспресс текшириш техник воситаси ёрдамида мазкур Низомга иловага мувофиқ текширади:

аниқланган модда (буюм)нинг гиёҳвандлик воситаларига тааллуқли эканлигига шубҳа пайдо бўлганда;

аниқланган модда (буюм)ни гиёҳвандлик воситаларининг қайси турига мансублиги бўйича савол туғилганда;

гиёҳванд воситасининг янги турлари аниқланганда;

тезкор-қидирув тадбирларини ўтказишда аниқланган валюта намунаси қалбаки эканлигига шубҳа пайдо бўлганида;

тезкор-қидирув тадбирлари давомийлигини таъминлаш зарурати юзага келганда, тезкорликни амалга ошириш ҳамда тегишли вақтни тежаш мақсадида.

Ноқонуний муомалада бўлганлиги аниқланган ва расмийлаштириб олинган гиёҳвандлик воситалари ҳамда валюта намуналари бўйича қонунчилик ҳужжатларига асосан экспертиза тайинланиб, ўтказилиши шарт.

4. Экспресс текшириш ишларини ҳуқуқни муҳофаза қилувчи органлар биносида ўтказиш зарур бўлганда, тезкор ходим аниқланган модда (буюм)ни ёки валюта намунасини қонунчилик ҳужжатларида белгиланган тартибда расмийлаштиради ва мазкур модда ёки валюта намунасини тайёрлаш, олиш, сақлаш, ўтказиш ҳамда шу каби бошқа ҳаракатларни содир этган шахсни (кейинги ўринларда — аниқланган шахс) модда (буюм)ни ёки валюта намунасини экспресс текширувдан ўтказиш мақсадида ушбу бинога олиб боради.

Аниқланган шахс муомалага лаёқатли бўлмаган ёки вояга етмаган шахс бўлган тақдирда, текширув яқин қариндошлари ёки қонуний вакили иштирокида ўтказилади.

2-боб. Тезкор-қидирув тадбирларини ўтказиш жараёнида гиёҳвандлик воситалари ҳамда валюта намунасини экспресс текшириш учун техник воситалардан фойдаланиш тартиби

5. Олинган модда (буюм)ни ёки валюта намунасини экспресс текшириш техник воситаси орқали текширувдан ўтказишдан олдин текширувни ўтказадиган ходим аниқланган шахсга (унинг яқин қариндоши ёки қонуний вакилига) экспресс текшириш техник воситасининг ишлаш тартибини тушунтиради.

6. Олинган модда (буюм) ёки валюта намунаси экспресс текшириш техник воситаси орқали камида икки нафар холислар иштирокида текширувдан ўтказади.

7. Текширувни ўтказадиган ходим аниқланган шахс ва холисларга иш ҳолатини ҳамда уларнинг қонунчилик ҳужжатларида белгиланган ҳуқуқ ва мажбуриятларини тушунтириши шарт.

8. Текширувни ўтказадиган тезкор ходим хавфсизлик қоидаларига қатъий амал қилиши лозим.

9. Экспресс текшириш техник воситаси доимий равишда соз ва унинг дастурий-техник таъминоти ишчи ҳолатда бўлиши керак.

Экспресс текшириш техник воситасида носозликлар аниқланганда, ходим бу ҳақда дарҳол бевосита бошлиғига хабар беради ва процессуал ҳаракатларни қонунчилик ҳужжатларида белгиланган тартибда давом эттиради.

10. Экспресс текшириш техник воситаси орқали аниқланган модда (буюм) ёки валюта намунасининг текширув натижаси ходим томонидан барча эшита оладиган шаклда аниқланган шахс ва холисларга эълон қилинади ҳамда кўрсатилади.

11. Текширув натижаси юзасидан қонунчиликда белгиланган тартибда тегишли ҳужжатлар расмийлаштирилади.

3-боб. Экспресс текшириш техник воситасини сақлаш тартиби

12. Экспресс текшириш техник воситаси ваколатли раҳбар томонидан масъул ходимга бириктирилади.

13. Масъул ходим экспресс текшириш техник воситасидан эҳтиёткорлик билан фойдаланиши ҳамда уни бегона шахсларга фойдаланиш учун бермаслиги лозим.

14. Экспресс текшириш техник воситаси масъул ходим томонидан бошқа тезкор ходимга фақат ваколатли раҳбарнинг рухсати билан тезкор-қидирув тадбирларида фойдаланиш учун берилиши мумкин.

Экспресс текшириш техник воситаси масъул ходим томонидан бошқа тезкор ходимга соз ҳолатда топширилади ҳамда тадбир якунида ушбу техник восита соз ҳолатда қайтарилади.

15. Экспресс текшириш техник воситасидан фойдаланган ҳолда гиёҳвандлик воситалари ҳамда валюта намунасини текшириш ҳолатлари масъул ходим томонидан қайд этиб борилади, шунингдек, экспресс текшириш техник воситасидан фойдаланилган ҳар бир юқоридаги ҳолатнинг фото ва видеотасвирлари ҳисоботининг юритилишини таъминлаш мақсадида улар алоҳида йиғмажилд кўринишида икки йил давомида сақланади.

16. Экспресс текшириш техник воситаси ходимнинг масъулиятсизлиги оқибатида йўқолган, учинчи шахсларга берилган, қасддан нобуд қилинган ва унга ўрнатилган дастур ҳамда аксессуарлар қасддан яроқсиз ҳолга келтирилган тақдирда, етказилган зарар экспресс текшириш техник воситаси бириктирилган масъул ходим ҳисобидан тўлиқ қопланади. Агар ушбу ҳолатлар экспресс текшириш техник воситасини тезкор тадбирларда фойдаланиш учун олган ходимнинг ҳаракати ёки ҳаракатсизлиги натижасида келиб чиққан бўлса, келтирилган зарар мазкур ходим ҳисобидан тўлиқ қопланди.

4-боб. Якунловчи қоидалар

17. Экспресс текширувни ўтказиш жараёнида фуқаролар ҳаётини, соғлиғини, юридик ва жисмоний шахсларнинг мол-мулки ҳамда қонуний манфаатларини хавф остига қўядиган, шунингдек, инсон шаъни ва қадр-қимматини камситадиган ҳаракатлар (ҳаракатсизлик) содир этилиши тақиқланади.

18. Мазкур Низом ижросини таъминлашда юзага келадиган низолар қонунчилик ҳужжатларида белгиланган тартибда ҳал қилинади.

19. Ушбу Низом талаблари бузилишида айбдор бўлган шахслар қонунчилик ҳужжатларига мувофиқ жавоб берадилар.

Босқичлар Субъектлар Тадбирлар Муддатлар 1-босқич Тезкор-қидирув тадбирларини ўтказадиган тезкор ходим 1. Гиёҳвандлик воситалари ёки валюта намунасини тайёрлаш, олиш, сақлаш, ўтказиш ҳамда шу каби бошқа ҳаракатларни содир этган шахсни (кейинги ўринларда — аниқланган шахс) аниқлайди. 2. Гиёҳвандлик воситалари ёки валюта намунасини белгиланган тартибда расмийлаштиради ва аниқланган шахсни мазкур моддалар экспресс текшириш техник воситаси орқали текширилиши тўғрисида хабардор қилади. Тезкор-қидирув тадбири жараёнида 2-босқич Аниқланган шахс Аниқланган гиёҳвандлик воситалари ёки валюта намунасини тезкор-қидирув тадбирларини ўтказадиган тезкор ходимга тақдим этади. Гиёҳвандлик воситалари ёки валюта намунаси аниқлангандан сўнг 3-босқич Тезкор-қидирув тадбирларини ўтказадиган тезкор ходим Гиёҳвандлик воситалари ёки валюта намунаси аниқланган жойнинг ўзида экспресс текшириш техник воситаси ёрдамида текширув ўтказиш ёки ҳуқуқни муҳофаза қилувчи тегишли орган биносида экспресс текшириш техник воситаси ёрдамида текширувни ўтказиш учун аниқланган шахсни ва гиёҳвандлик воситалари ёки валюта намунасини олиб бориш чораларини кўради. Гиёҳвандлик воситалари ёки валюта намунаси аниқлангандан сўнг 4-босқич Тезкор-қидирув тадбирларини ўтказадиган тезкор ходим 1. Гиёҳвандлик воситалари ёки валюта намунасини текширувдан ўтказишда холислар иштирокини таъминлайди. 2. Аниқланган шахс ва холисларга иш ҳолатини ҳамда уларнинг қонунчилик ҳужжатларида белгиланган ҳуқуқ ва мажбуриятларини тушунтиради. 3. Гиёҳвандлик воситалари ёки валюта намунасини экспресс текшириш техник воситаси ёрдамида текширувдан ўтказади. Экспресс текшириш техник воситасини қўллашдан аввал 5-босқич Тезкор-қидирув тадбирларини ўтказадиган тезкор ходим 1. Текширув натижаси юзасидан қонунчиликда белгиланган тартибда тегишли ҳужжатларни расмийлаштиради ва тўпланган ҳужжатларни қонуний чора кўриш учун тегишли давлат органига юборади. Экспресс текшириш техник воситаси қўллангандан сўнг

Ўзбекистон Республикасининг Бош вазири А. АРИПОВ

Тошкент ш.,

2023 йил 12 январь,

12-сон

(Қонунчилик маълумотлари миллий базаси, 12.01.2023 й., 09/23/12/0019-сон)

lex.uz

Oʻzbekiston Respublikasi Vazirlar Mahkamasining

qarori

NIZOM

SXEMASI

Tezkor-qidiruv tadbirlarini oʻtkazishda giyohvandlik vositalari, psixotrop moddalar va ularning analoglari, prekursorlar, kuchli taʼsir qiluvchi moddalar hamda valyuta namunalarini ekspress tekshirish jarayonida texnik vositalardan foydalanish tartibi toʻgʻrisidagi nizomni tasdiqlash haqida

“Tezkor-qidiruv faoliyati toʻgʻrisida”gi Oʻzbekiston Respublikasi Qonuniga hamda Oʻzbekiston Respublikasi Prezidentining 2022-yil 25-iyuldagi qaroriga muvofiq, shuningdek, tezkor-qidiruv tadbirlarini oʻtkazish jarayonida giyohvandlik vositalari, psixotrop moddalar va ularning analoglari, prekursorlar, kuchli taʼsir qiluvchi moddalar hamda valyuta namunalarini texnik vositalardan foydalangan holda tezkorlik bilan tekshirishni tashkil etish maqsadida Vazirlar Mahkamasi qaror qiladi:

1. Oʻzbekiston Respublikasi Prezidentining 2022-yil 25-iyuldagi qaroriga asosan tezkor-qidiruv tadbirlarini oʻtkazishda giyohvandlik vositalari, psixotrop moddalar va ularning analoglari, prekursorlar, kuchli taʼsir qiluvchi moddalar (keyingi oʻrinlarda — giyohvandlik vositalari) hamda valyuta namunalarini ekspress tekshirish jarayonida texnik vositalardan foydalanish tartibini joriy etish hamda ekspress tekshiradigan zamonaviy texnik vositalarni budjetdan tashqari mablagʻlar hisobidan xarid qilish boʻyicha vazifalar belgilanganligi maʼlumot uchun qabul qilinsin.

2. Quyidagilarni nazarda tutuvchi Tezkor-qidiruv tadbirlarini oʻtkazishda giyohvandlik vositalari, psixotrop moddalar va ularning analoglari, prekursorlar, kuchli taʼsir qiluvchi moddalar hamda valyuta namunalarini ekspress tekshirish jarayonida texnik vositalardan foydalanish tartibi toʻgʻrisidagi nizom ilovaga muvofiq tasdiqlansin:

tezkor-qidiruv tadbirlarini oʻtkazish jarayonida giyohvandlik vositalari va valyuta namunalarini ekspress tekshirish uchun texnik vositalardan foydalanish tartibi;

giyohvandlik vositalari va valyuta namunalarini ekspress tekshirishda texnik vositalardan foydalaniladigan holatlar va mazkur vositalar orqali oʻtkazilgan tekshiruvlarni rasmiylashtirish tartibi;

giyohvandlik vositalari va valyuta namunalarini tekshirishda qoʻllaniladigan ekspress texnik vositalarni masʼul xodimga biriktirish va ushbu vositalarni saqlash tartibi.

3. Shunday tartib oʻrnatilsinki, unga muvofiq 2023-yil 1-iyuldan boshlab, tezkor-qidiruv faoliyatini amalga oshiruvchi organlar:

giyohvandlik vositalarining noqonuniy muomalasi bilan bogʻliq holatni qayd etishda aniqlangan modda (buyum)ning giyohvand vositasiga taalluqli ekanligiga shubha paydo boʻlganda;

aniqlangan modda (buyum)ni giyohvandlik vositalarining qaysi turiga mansubligi boʻyicha savol tugʻilganda;

giyohvandlik vositalarining yangi turlari aniqlanganda;

tezkor-qidiruv tadbirlarini oʻtkazishda aniqlangan valyuta namunasi qalbaki ekanligiga shubha paydo boʻlganda;

tezkor-qidiruv tadbirlari davomiyligini taʼminlash zarurati yuzaga kelganda, tezkorlikni amalga oshirish hamda tegishli vaqtni tejash maqsadida mazkur modda (buyum) yoki valyuta namunalarini ular aniqlangan joyning oʻzida yoki huquqni muhofaza qiluvchi organlar binosida ekspress tekshirish texnik vositalari yordamida tekshiradi.

4. Belgilansinki, giyohvandlik vositalari hamda valyuta namunalarini ekspress tekshiradigan zamonaviy texnik vositalar zaruratga koʻra, tezkor-qidiruv faoliyatini amalga oshiruvchi organlarning budjetdan tashqari mablagʻlari va qonunchilik hujjatlarida taqiqlanmagan boshqa manbalar hisobidan belgilangan tartibda xarid qilinadi.

5. Ichki ishlar vazirligi:

tezkor-qidiruv faoliyatini amalga oshiruvchi boshqa organlar bilan birgalikda ikki oy muddatda tezkor xodimlar uchun tezkor-qidiruv tadbirlarini oʻtkazishda giyohvandlik vositalari hamda valyuta namunalarini ekspress tekshirish jarayonida texnik vositalardan foydalanish tartibining mazmun-mohiyatiga bagʻishlangan oʻquv-seminarlar tashkil etsin;

boshqa manfaatdor vazirlik va idoralar bilan birgalikda oʻzlari qabul qilgan normativ-huquqiy hujjatlarni bir oy muddatda ushbu qarorga muvofiqlashtirsin.

6. Mazkur qarorning bajarilishini nazorat qilish Oʻzbekiston Respublikasi ichki ishlar vaziri P.R. Bobojonov zimmasiga yuklansin.

Vazirlar Mahkamasining 2023-yil 12-yanvardagi 12-son qaroriga ILOVA

1-bob. Umumiy qoidalar

1. Ushbu Nizom tezkor-qidiruv faoliyatini amalga oshiruvchi organlarning tezkor boʻlinmalari tomonidan tezkor-qidiruv tadbirlarini oʻtkazish jarayonida giyohvandlik vositalari, psixotrop moddalar va ularning analoglari, prekursorlar, kuchli taʼsir qiluvchi moddalar hamda valyuta namunalarini ekspress tekshirish uchun texnik vositalardan foydalanish tartibini belgilaydi.

2. Mazkur Nizomda quyidagi asosiy tushunchalardan foydalaniladi:

valyuta namunalari — muomaladagi milliy valyuta hamda chet davlatning muomalasida boʻlgan va qonuniy toʻlov vositasi hisoblangan, shuningdek, muomaladan chiqarilgan yoki chiqarilayotgan, lekin Oʻzbekiston Respublikasining pul belgisi bilan almashtirilishi lozim boʻlgan banknot tarzidagi chet el pul belgisi;

valyuta operatsiyalari — valyuta qimmatliklariga mulk huquqining birovga oʻtishi bilan bogʻliq operatsiyalar, shu jumladan, tashqi iqtisodiy faoliyatni amalga oshirishda chet el valyutasidan, shuningdek, Oʻzbekiston Respublikasi pul birligidan toʻlov vositasi sifatida foydalanish bilan bogʻliq operatsiyalar; valyuta qimmatliklarini chet eldan Oʻzbekiston Respublikasiga keltirish va joʻnatish, ularni Oʻzbekiston Respublikasidan chetga olib chiqish va joʻnatish, xalqaro miqyosda pul oʻtkazish operatsiyalari;

giyohvandlik vositalari — giyohvandlik vositalari roʻyxatiga kiritilgan va Oʻzbekiston Respublikasida nazoratga olinadigan, kelib chiqishi sintetik yoki tabiiy moddalar, tarkibida giyohvandlik moddasi boʻlgan preparatlar va oʻsimliklar;

giyohvandlik vositalari va psixotrop moddalarning analoglari — kimyoviy tuzilishi va xossalariga koʻra giyohvandlik vositalari va psixotrop moddalarga oʻxshash, ular singari ruhiyatga faol taʼsir etuvchi, kelib chiqishi sintetik yoki tabiiy moddalar;

kuchli taʼsir qiluvchi moddalar — kuchli taʼsir qiluvchi moddalar roʻyxatiga kiritilgan va Oʻzbekiston Respublikasida realizatsiya qilinishi qatʼiy tartibga solingan dori vositalari;

prekursorlar — prekursorlar roʻyxatiga kiritilgan va Oʻzbekiston Respublikasida nazoratga olinadigan, giyohvandlik vositalarini, ularning analoglarini va psixotrop moddalarni tayyorlash uchun foydalaniladigan moddalar;

psixotrop moddalar — psixotrop moddalar roʻyxatiga kiritilgan va Oʻzbekiston Respublikasida nazoratga olinadigan, kelib chiqishi sintetik yoki tabiiy moddalar;

ekspress tekshirish texnik vositasi — Oʻzbekiston Respublikasi davlat standarti roʻyxatidan oʻtgan va maxsus sertifikatga ega boʻlgan, giyohvandlik vositalari, psixotrop moddalar va ularning analoglari, prekursorlar, kuchli taʼsir qiluvchi moddalarni (keyingi oʻrinlarda — giyohvandlik vositalari) tekshirishga moʻljallangan, shuningdek, valyuta operatsiyalari davomida muomalada boʻlgan valyuta namunalarining haqiqiyligini tekshirish texnik vositasi.

3. Quyidagi holatlarda tezkor-qidiruv tadbirlarini oʻtkazadigan tezkor xodim giyohvandlik vositalarining noqonuniy muomalasi bilan bogʻliq holatni qayd etishda, shuningdek, valyuta operatsiyalari davomida muomalada boʻlgan valyuta namunalarini ular aniqlangan joyning oʻzida yoki huquqni muhofaza qiluvchi tegishli organ binosida ekspress tekshirish texnik vositasi yordamida mazkur Nizomga ilovaga muvofiq tekshiradi:

aniqlangan modda (buyum)ning giyohvandlik vositalariga taalluqli ekanligiga shubha paydo boʻlganda;

aniqlangan modda (buyum)ni giyohvandlik vositalarining qaysi turiga mansubligi boʻyicha savol tugʻilganda;

giyohvand vositasining yangi turlari aniqlanganda;

tezkor-qidiruv tadbirlarini oʻtkazishda aniqlangan valyuta namunasi qalbaki ekanligiga shubha paydo boʻlganida;

tezkor-qidiruv tadbirlari davomiyligini taʼminlash zarurati yuzaga kelganda, tezkorlikni amalga oshirish hamda tegishli vaqtni tejash maqsadida.

Noqonuniy muomalada boʻlganligi aniqlangan va rasmiylashtirib olingan giyohvandlik vositalari hamda valyuta namunalari boʻyicha qonunchilik hujjatlariga asosan ekspertiza tayinlanib, oʻtkazilishi shart.

4. Ekspress tekshirish ishlarini huquqni muhofaza qiluvchi organlar binosida oʻtkazish zarur boʻlganda, tezkor xodim aniqlangan modda (buyum)ni yoki valyuta namunasini qonunchilik hujjatlarida belgilangan tartibda rasmiylashtiradi va mazkur modda yoki valyuta namunasini tayyorlash, olish, saqlash, oʻtkazish hamda shu kabi boshqa harakatlarni sodir etgan shaxsni (keyingi oʻrinlarda — aniqlangan shaxs) modda (buyum)ni yoki valyuta namunasini ekspress tekshiruvdan oʻtkazish maqsadida ushbu binoga olib boradi.

Aniqlangan shaxs muomalaga layoqatli boʻlmagan yoki voyaga yetmagan shaxs boʻlgan taqdirda, tekshiruv yaqin qarindoshlari yoki qonuniy vakili ishtirokida oʻtkaziladi.

2-bob. Tezkor-qidiruv tadbirlarini oʻtkazish jarayonida giyohvandlik vositalari hamda valyuta namunasini ekspress tekshirish uchun texnik vositalardan foydalanish tartibi

5. Olingan modda (buyum)ni yoki valyuta namunasini ekspress tekshirish texnik vositasi orqali tekshiruvdan oʻtkazishdan oldin tekshiruvni oʻtkazadigan xodim aniqlangan shaxsga (uning yaqin qarindoshi yoki qonuniy vakiliga) ekspress tekshirish texnik vositasining ishlash tartibini tushuntiradi.

6. Olingan modda (buyum) yoki valyuta namunasi ekspress tekshirish texnik vositasi orqali kamida ikki nafar xolislar ishtirokida tekshiruvdan oʻtkazadi.

7. Tekshiruvni oʻtkazadigan xodim aniqlangan shaxs va xolislarga ish holatini hamda ularning qonunchilik hujjatlarida belgilangan huquq va majburiyatlarini tushuntirishi shart.

8. Tekshiruvni oʻtkazadigan tezkor xodim xavfsizlik qoidalariga qatʼiy amal qilishi lozim.

9. Ekspress tekshirish texnik vositasi doimiy ravishda soz va uning dasturiy-texnik taʼminoti ishchi holatda boʻlishi kerak.

Ekspress tekshirish texnik vositasida nosozliklar aniqlanganda, xodim bu haqda darhol bevosita boshligʻiga xabar beradi va protsessual harakatlarni qonunchilik hujjatlarida belgilangan tartibda davom ettiradi.

10. Ekspress tekshirish texnik vositasi orqali aniqlangan modda (buyum) yoki valyuta namunasining tekshiruv natijasi xodim tomonidan barcha eshita oladigan shaklda aniqlangan shaxs va xolislarga eʼlon qilinadi hamda koʻrsatiladi.

11. Tekshiruv natijasi yuzasidan qonunchilikda belgilangan tartibda tegishli hujjatlar rasmiylashtiriladi.

3-bob. Ekspress tekshirish texnik vositasini saqlash tartibi

12. Ekspress tekshirish texnik vositasi vakolatli rahbar tomonidan masʼul xodimga biriktiriladi.

13. Masʼul xodim ekspress tekshirish texnik vositasidan ehtiyotkorlik bilan foydalanishi hamda uni begona shaxslarga foydalanish uchun bermasligi lozim.

14. Ekspress tekshirish texnik vositasi masʼul xodim tomonidan boshqa tezkor xodimga faqat vakolatli rahbarning ruxsati bilan tezkor-qidiruv tadbirlarida foydalanish uchun berilishi mumkin.

Ekspress tekshirish texnik vositasi masʼul xodim tomonidan boshqa tezkor xodimga soz holatda topshiriladi hamda tadbir yakunida ushbu texnik vosita soz holatda qaytariladi.

15. Ekspress tekshirish texnik vositasidan foydalangan holda giyohvandlik vositalari hamda valyuta namunasini tekshirish holatlari masʼul xodim tomonidan qayd etib boriladi, shuningdek, ekspress tekshirish texnik vositasidan foydalanilgan har bir yuqoridagi holatning foto va videotasvirlari hisobotining yuritilishini taʼminlash maqsadida ular alohida yigʻmajild koʻrinishida ikki yil davomida saqlanadi.

16. Ekspress tekshirish texnik vositasi xodimning masʼuliyatsizligi oqibatida yoʻqolgan, uchinchi shaxslarga berilgan, qasddan nobud qilingan va unga oʻrnatilgan dastur hamda aksessuarlar qasddan yaroqsiz holga keltirilgan taqdirda, yetkazilgan zarar ekspress tekshirish texnik vositasi biriktirilgan masʼul xodim hisobidan toʻliq qoplanadi. Agar ushbu holatlar ekspress tekshirish texnik vositasini tezkor tadbirlarda foydalanish uchun olgan xodimning harakati yoki harakatsizligi natijasida kelib chiqqan boʻlsa, keltirilgan zarar mazkur xodim hisobidan toʻliq qoplandi.

4-bob. Yakunlovchi qoidalar

17. Ekspress tekshiruvni oʻtkazish jarayonida fuqarolar hayotini, sogʻligʻini, yuridik va jismoniy shaxslarning mol-mulki hamda qonuniy manfaatlarini xavf ostiga qoʻyadigan, shuningdek, inson shaʼni va qadr-qimmatini kamsitadigan harakatlar (harakatsizlik) sodir etilishi taqiqlanadi.

18. Mazkur Nizom ijrosini taʼminlashda yuzaga keladigan nizolar qonunchilik hujjatlarida belgilangan tartibda hal qilinadi.

19. Ushbu Nizom talablari buzilishida aybdor boʻlgan shaxslar qonunchilik hujjatlariga muvofiq javob beradilar.

Bosqichlar Subyektlar Tadbirlar Muddatlar 1-bosqich Tezkor-qidiruv tadbirlarini oʻtkazadigan tezkor xodim 1. Giyohvandlik vositalari yoki valyuta namunasini tayyorlash, olish, saqlash, oʻtkazish hamda shu kabi boshqa harakatlarni sodir etgan shaxsni (keyingi oʻrinlarda — aniqlangan shaxs) aniqlaydi. 2. Giyohvandlik vositalari yoki valyuta namunasini belgilangan tartibda rasmiylashtiradi va aniqlangan shaxsni mazkur moddalar ekspress tekshirish texnik vositasi orqali tekshirilishi toʻgʻrisida xabardor qiladi. Tezkor-qidiruv tadbiri jarayonida 2-bosqich Aniqlangan shaxs Aniqlangan giyohvandlik vositalari yoki valyuta namunasini tezkor-qidiruv tadbirlarini oʻtkazadigan tezkor xodimga taqdim etadi. Giyohvandlik vositalari yoki valyuta namunasi aniqlangandan soʻng 3-bosqich Tezkor-qidiruv tadbirlarini oʻtkazadigan tezkor xodim Giyohvandlik vositalari yoki valyuta namunasi aniqlangan joyning oʻzida ekspress tekshirish texnik vositasi yordamida tekshiruv oʻtkazish yoki huquqni muhofaza qiluvchi tegishli organ binosida ekspress tekshirish texnik vositasi yordamida tekshiruvni oʻtkazish uchun aniqlangan shaxsni va giyohvandlik vositalari yoki valyuta namunasini olib borish choralarini koʻradi. Giyohvandlik vositalari yoki valyuta namunasi aniqlangandan soʻng 4-bosqich Tezkor-qidiruv tadbirlarini oʻtkazadigan tezkor xodim 1. Giyohvandlik vositalari yoki valyuta namunasini tekshiruvdan oʻtkazishda xolislar ishtirokini taʼminlaydi. 2. Aniqlangan shaxs va xolislarga ish holatini hamda ularning qonunchilik hujjatlarida belgilangan huquq va majburiyatlarini tushuntiradi. 3. Giyohvandlik vositalari yoki valyuta namunasini ekspress tekshirish texnik vositasi yordamida tekshiruvdan oʻtkazadi. Ekspress tekshirish texnik vositasini qoʻllashdan avval 5-bosqich Tezkor-qidiruv tadbirlarini oʻtkazadigan tezkor xodim 1. Tekshiruv natijasi yuzasidan qonunchilikda belgilangan tartibda tegishli hujjatlarni rasmiylashtiradi va toʻplangan hujjatlarni qonuniy chora koʻrish uchun tegishli davlat organiga yuboradi. Ekspress tekshirish texnik vositasi qoʻllangandan soʻng

Oʻzbekiston Respublikasining Bosh vaziri A. ARIPOV

Toshkent sh.,

2023-yil 12-yanvar,

12-son

(Qonunchilik maʼlumotlari milliy bazasi, 12.01.2023-y., 09/23/12/0019-son)

lex.uz