📅 2023-yil 13-yanvar · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2023 йил 13 январь · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 13 января 2023 г. · Постановления Кабинета Министров
Официальный текст. Официальный документ. Редакционные примечания не включены.
📅 13 January 2023 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
Тошкент шаҳри марказлашган иссиқлик таъминоти корхоналарини фаолиятини такомиллаштириш тўғрисида
Тошкент шаҳрида электр ва иссиқлик энергетикаси соҳасини ислоҳ қилиш, иссиқлик энергиясини ишлаб чиқариш бошқарув тизимига илғор хорижий тажрибани қўллаш, соҳа объектларини реконструкция қилиш орқали иссиқлик ва электр энергияси таъминотини янада яхшилаш мақсадида Вазирлар Маҳкамаси қарор қилади:
1. Иқтисодиёт ва молия вазирлиги, Энергетика вазирлиги, Қурилиш ва уй-жой коммунал хўжалиги вазирлиги, Давлат активларини бошқариш агентлиги ва Тошкент шаҳар ҳокимлигининг:
Тошкент шаҳар ҳокимлигининг «Тошкент иссиқлик маркази» давлат унитар корхонасини масъулияти чекланган жамиятга айлантириш (кейинги ўринларда — Жамият);
2023 йил 1 февралга қадар Жамият устав капиталидаги улушни қолдиқ (баланс) қийматда «Иссиқлик электр станциялари» АЖга унинг устав фондидаги давлат улушини ошириш ҳисобига бериш тўғрисидаги таклифига розилик берилсин.
2. Белгилансинки:
Жамият «Тошкент иссиқлик маркази» давлат унитар корхонасининг шартномалари, ҳуқуқлари ва мажбуриятлари бўйича ҳуқуқий ворис ҳисобланади;
Жамият активлари (мулклари) инвентаризациядан ўтказилади ва Жамият устав капитали миқдори уларни баҳолашдан ўтказмаган ҳолда, солиқ органларига тақдим этилган охирги бухгалтерия баланси маълумотига асосан, унинг амалдаги устав капитали миқдорида белгиланади;
Солиқ кодексига мувофиқ Вазирлар Маҳкамаси қарори билан ўтказилаётган мулк, мулкий ҳуқуқлар, жумладан устав капиталидаги улушлар қиймати, шу жумладан уларни қайта ташкил этиш ва тугатиш чоғида солиққа тортишнинг барча турлари бўйича солиқ солиш объекти ҳисобланмайди.
3. «Иссиқлик электр станциялари» АЖ:
Тошкент шаҳрида аҳолига ва иқтисодиёт тармоқлари эҳтиёжлари учун ўз вақтида сифатли иссиқлик энергиясини узатиш вазифаси юклансин;
бошқарувга қабул қилинаётган Жамиятга тегишли қозонхоналарнинг техник ҳолатини тўлиқ хатловдан ўтказиб, инвестицияларни, шу жумладан тўғридан-тўғри хорижий инвестицияларни жалб қилган ҳолда давлат-хусусий шериклик асосида қозонхоналарни босқичма-босқич реконструкция қилиш бўйича комплекс чора-тадбирларни ишлаб чиқсин ва 2023 йил 1 мартга қадар Вазирлар Маҳкамасига тасдиқлаш учун киритсин.
4. Қурилиш ва уй-жой коммунал хўжалиги вазирлиги ҳамда Энергетика вазирлиги 2023 йил 1 апрелга қадар республикадаги иссиқлик марказлари фаолиятини ўрганиб чиқиб:
иссиқлик марказларини 2023 йил 1 июндан бошлаб босқичма-босқич «Иссиқлик электр станциялари» АЖга бериш;
иссиқлик узатиш тизимларини давлат-хусусий шериклик асосида модернизация қилиш ва уларни кейинчалик эксплуатация қилиш тўғрисидаги таклифларни Вазирлар Маҳкамасига киритсин.
5. Иқтисодиёт ва молия вазирлиги:
«Иссиқлик электр станциялари» АЖ марказий аппаратининг иссиқлик марказлари фаолиятини мувофиқлаштириш бўлинмасида қўшимча 6 та штат бирлигини жорий қилиш;
Давлат активларини бошқариш агентлиги билан биргаликда Тошкент шаҳар, Чилонзор тумани, Бунёдкор шоҳ кўчаси, 23-уйда жойлашган «Иссиқлик электр станциялари» АЖга оператив бошқарув ҳуқуқида берилган бино ва иншоотни баҳоланган қийматда «Иссиқлик электр станциялари» АЖ устав капиталига бериш бўйича тегишли бошқарув органлари қарорларини қабул қилсин.
Бунда, бино ва иншоотнинг баҳоланган қиймати ва қолдиқ (баланс) қиймати ўртасидаги фарқ жамият устав фондига давлат улуши сифатида киритилсин.
6. Мазкур қарорнинг бажарилишини назорат қилиш Ўзбекистон Республикаси энергетика вазири Ж.Т. Мирзамаҳмудов ва Тошкент шаҳар ҳокими Ж.А. Артикходжаев зиммасига юклансин.
Ўзбекистон Республикасининг Бош вазири А. АРИПОВ
Тошкент ш.,
2023 йил 13 январь,
13-сон
Oʻzbekiston Respublikasi Vazirlar Mahkamasining
qarori
Toshkent shahri markazlashgan issiqlik taʼminoti korxonalarini faoliyatini takomillashtirish toʻgʻrisida
Toshkent shahrida elektr va issiqlik energetikasi sohasini isloh qilish, issiqlik energiyasini ishlab chiqarish boshqaruv tizimiga ilgʻor xorijiy tajribani qoʻllash, soha obyektlarini rekonstruksiya qilish orqali issiqlik va elektr energiyasi taʼminotini yanada yaxshilash maqsadida Vazirlar Mahkamasi qaror qiladi:
1. Iqtisodiyot va moliya vazirligi, Energetika vazirligi, Qurilish va uy-joy kommunal xoʻjaligi vazirligi, Davlat aktivlarini boshqarish agentligi va Toshkent shahar hokimligining:
Toshkent shahar hokimligining “Toshkent issiqlik markazi” davlat unitar korxonasini masʼuliyati cheklangan jamiyatga aylantirish (keyingi oʻrinlarda — Jamiyat);
2023-yil 1-fevralga qadar Jamiyat ustav kapitalidagi ulushni qoldiq (balans) qiymatda “Issiqlik elektr stansiyalari” AJga uning ustav fondidagi davlat ulushini oshirish hisobiga berish toʻgʻrisidagi taklifiga rozilik berilsin.
2. Belgilansinki:
Jamiyat “Toshkent issiqlik markazi” davlat unitar korxonasining shartnomalari, huquqlari va majburiyatlari boʻyicha huquqiy voris hisoblanadi;
Jamiyat aktivlari (mulklari) inventarizatsiyadan oʻtkaziladi va Jamiyat ustav kapitali miqdori ularni baholashdan oʻtkazmagan holda, soliq organlariga taqdim etilgan oxirgi buxgalteriya balansi maʼlumotiga asosan, uning amaldagi ustav kapitali miqdorida belgilanadi;
Soliq kodeksiga muvofiq Vazirlar Mahkamasi qarori bilan oʻtkazilayotgan mulk, mulkiy huquqlar, jumladan ustav kapitalidagi ulushlar qiymati, shu jumladan ularni qayta tashkil etish va tugatish chogʻida soliqqa tortishning barcha turlari boʻyicha soliq solish obyekti hisoblanmaydi.
3. “Issiqlik elektr stansiyalari” AJ:
Toshkent shahrida aholiga va iqtisodiyot tarmoqlari ehtiyojlari uchun oʻz vaqtida sifatli issiqlik energiyasini uzatish vazifasi yuklansin;
boshqaruvga qabul qilinayotgan Jamiyatga tegishli qozonxonalarning texnik holatini toʻliq xatlovdan oʻtkazib, investitsiyalarni, shu jumladan toʻgʻridan toʻgʻri xorijiy investitsiyalarni jalb qilgan holda davlat-xususiy sheriklik asosida qozonxonalarni bosqichma-bosqich rekonstruksiya qilish boʻyicha kompleks chora-tadbirlarni ishlab chiqsin va 2023-yil 1-martga qadar Vazirlar Mahkamasiga tasdiqlash uchun kiritsin.
4. Qurilish va uy-joy kommunal xoʻjaligi vazirligi hamda Energetika vazirligi 2023-yil 1-aprelga qadar respublikadagi issiqlik markazlari faoliyatini oʻrganib chiqib:
issiqlik markazlarini 2023-yil 1-iyundan boshlab bosqichma-bosqich “Issiqlik elektr stansiyalari” AJga berish;
issiqlik uzatish tizimlarini davlat-xususiy sheriklik asosida modernizatsiya qilish va ularni keyinchalik ekspluatatsiya qilish toʻgʻrisidagi takliflarni Vazirlar Mahkamasiga kiritsin.
5. Iqtisodiyot va moliya vazirligi:
“Issiqlik elektr stansiyalari” AJ markaziy apparatining issiqlik markazlari faoliyatini muvofiqlashtirish boʻlinmasida qoʻshimcha 6 ta shtat birligini joriy qilish;
Davlat aktivlarini boshqarish agentligi bilan birgalikda Toshkent shahar, Chilonzor tumani, Bunyodkor shoh koʻchasi, 23-uyda joylashgan “Issiqlik elektr stansiyalari” AJga operativ boshqaruv huquqida berilgan bino va inshootni baholangan qiymatda “Issiqlik elektr stansiyalari” AJ ustav kapitaliga berish boʻyicha tegishli boshqaruv organlari qarorlarini qabul qilsin.
Bunda, bino va inshootning baholangan qiymati va qoldiq (balans) qiymati oʻrtasidagi farq jamiyat ustav fondiga davlat ulushi sifatida kiritilsin.
6. Mazkur qarorning bajarilishini nazorat qilish Oʻzbekiston Respublikasi energetika vaziri J.T. Mirzamahmudov va Toshkent shahar hokimi J.A. Artikxodjayev zimmasiga yuklansin.
Oʻzbekiston Respublikasining Bosh vaziri A. ARIPOV
Toshkent sh.,
2023-yil 13-yanvar,
13-son