📅 2023-yil 20-yanvar · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2023 йил 20 январь · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 20 января 2023 г. · Постановления Кабинета Министров
Официальный текст. Официальный документ. Редакционные примечания не включены.
📅 20 January 2023 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
Тошкент шаҳри аҳолисини қўшимча иссиқлик ва электр энергияси билан таъминлаш мақсадида тажриба-синов лойиҳаларини амалга ошириш бўйича тезкор чора-тадбирлар тўғрисида
Ўзбекистон Республикаси Президенти Ш.М. Мирзиёевнинг жорий йил 13 декабрь куни Тошкент шаҳрининг Учтепа туманига ташрифи давомида берилган топшириқларни зудлик билан бажариш мақсадида Вазирлар Маҳкамаси қарор қилади:
1. Тошкент шаҳрида электр ва иссиқлик энергетикаси соҳасини ислоҳ қилиш, иссиқлик энергиясини ишлаб чиқариш бошқарув тизимига илғор хорижий тажрибани қўллаш, соҳа объектларини реконструкция қилиш орқали иссиқлик ва электр энергияси таъминотини янада яхшилаш мақсадида Вазирлар Маҳкамасининг 2023 йил 13 январдаги «Тошкент шаҳри марказлашган иссиқлик таъминоти корхоналарини фаолиятини такомиллаштириш тўғрисида»ги 13-сон қарори қабул қилинганлиги маълумот учун қабул қилинсин.
2. Энергетика вазирлиги ва Тошкент шаҳар ҳокимлигининг 11 та тумандаги иссиқлик тармоқларининг сўнгги қисмларида жойлашган иловага мувофиқ кўп квартирали уй-жойларни тажриба тариқасида когенерация ҳамда газ двигатели билан электр энергия ишлаб чиқарувчи ускуналарни (кейинги ўринларда — ускуналар) ўрнатиш орқали иситиш ва электр энергияси билан таъминлаш тўғрисидаги таклифларига розилик берилсин.
3. Энергетика вазирлиги Ташқи ишлар вазирлиги билан биргаликда Ўзбекистон Республикасининг хориждаги дипломатик ваколатхоналари орқали бир ҳафта муддатда ускуналарни ишлаб чиқарувчи корхоналар билан алоқа ўрнатиб, тайёр ускуналарни Ўзбекистонга қисқа муддатларда етказиб бериш ҳамда ўрнатиш, шу жумладан, техник таъминлаш бўйича тижорат таклифларини тайёрласин ва Вазирлар Маҳкамасига киритсин.
4. Ускуналарни харид қилиш ва ишга тушириш ҳамда заруратга кўра кўп квартирали уйларнинг ички ва ускуналаргача бўлган иссиқлик тармоқлари ва электр тизимини янгилаш (қуриш ёки реконструкция қилиш) ишларини амалга оширишда:
Иссиқлик электр станциялари» АЖ — Чилонзор, Сергели ва Олмазор туманларидаги объектларда буюртмачи этиб белгилансин;
қолган туманлардаги объектларда қурилиш ишлари хусусий инвестор томонидан амалга оширилади;
буюртмачи томонидан нарх, сифат, етказиб бериш муддатлари ҳамда техник таъминлаш хизматларига алоҳида эътибор қаратилсин.
5. Буюртмачига, истисно тариқасида, тендер (танлов) савдоларини ҳамда Иқтисодиёт ва молия вазирлиги ҳузуридаги «Лойиҳалар ва импорт контрактларини комплекс экспертиза қилиш маркази» ДУКда экспертизадан ўтказмасдан ва давлат харидларини амалга ошириш тўғрисида махсус ахборот порталига эълон жойлаштирмасдан энг яхши таклифни танлаб олиш асосида:
ускуналарни харид қилишга;
ускуналарни ўрнатиш ва ишга тушириш ҳамда заруратга кўра кўп квартирали уйларнинг ички ва ускуналаргача бўлган иссиқлик тармоқлари ва электр тизимини янгилаш (қуриш ёки реконструкция қилиш) ишларини амалга ошириш учун пудратчиларни аниқлашга рухсат берилсин.
6. Белгилансинки:
ускуналарни харид қилиш ишлари Тошкент шаҳар маҳаллий бюджетининг қўшимча манбалари ҳамда «Иссиқлик электр станциялари» АЖ маблағлари ҳисобидан молиялаштирилади;
ускуналардан фойдаланиш натижасида олинган иссиқлик ва электр энергияси ушбу иссиқлик ва электр энергияси етказиб берилаётган кўп квартирали уйлардаги истеъмолчиларга амалдаги тарифлар асосида етказиб берилади.
7. Ушбу қарорда белгиланган ҳар бир тадбирнинг ўз вақтида ва сифатли амалга оширилиши ҳамда маблағларнинг мақсадли ишлатилишига масъул ва жавобгар этиб Энергетика вазири Ж. Мирзамахмудов ва Тошкент шаҳар ҳокими вазифасини бажарувчи Б. Рахмонов белгилансин.
8. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосари А.Ж. Раматов зиммасига юклансин.
Вазирлар Маҳкамасининг 2023 йил 20 январдаги 23-сон қарорига ИЛОВА
Когенерация ҳамда газ двигатели билан электр энергияси ишлаб чиқарувчи ускуналар ўрнатиладиган иссиқлик тармоқларининг сўнгги қисмлари
Т/р Туманлар номи Маҳаллалар номи Кўп квартирали уйлар сони Мактаблар сони Мактабгача таълим муассасалари сони 1. Миробод Қорасув 101 1 4 2. Чилонзор Оқтепа 50 2 2 3. Мирзо Улуғбек Феруза 66 3 5 4. Шайхонтоҳур Шайхонтоҳур 37 2 3 5. Юнусобод Шоштепа, Увайсий 97 3 2 6. Юнусобод Беғубор, Меҳнатобод 7. Сергели Ўзгариш Ҳабибий 51 1 8. Олмазор Юқори Бешқўрғон 18 1 9. Яшнобод Тузель, Амир Темур, Моҳинур, Ал-Бухорий 77 2 3 10. Учтепа Бирлик 39 1 2 11. Янгиҳаёт Хушнуд, Чароғон, Дўстлик, Зарбдор, Ёрқин ҳаёт, Йўлдош 73 2 2
Ўзбекистон Республикасининг Бош вазири А. АРИПОВ
Тошкент ш.,
2023 йил 20 январь,
23-сон
Oʻzbekiston Respublikasi Vazirlar Mahkamasining
qarori
Toshkent shahri aholisini qoʻshimcha issiqlik va elektr energiyasi bilan taʼminlash maqsadida tajriba-sinov loyihalarini amalga oshirish boʻyicha tezkor chora-tadbirlar toʻgʻrisida
Oʻzbekiston Respublikasi Prezidenti Sh.M. Mirziyoyevning joriy yil 13-dekabr kuni Toshkent shahrining Uchtepa tumaniga tashrifi davomida berilgan topshiriqlarni zudlik bilan bajarish maqsadida Vazirlar Mahkamasi qaror qiladi:
1. Toshkent shahrida elektr va issiqlik energetikasi sohasini isloh qilish, issiqlik energiyasini ishlab chiqarish boshqaruv tizimiga ilgʻor xorijiy tajribani qoʻllash, soha obyektlarini rekonstruksiya qilish orqali issiqlik va elektr energiyasi taʼminotini yanada yaxshilash maqsadida Vazirlar Mahkamasining 2023-yil 13-yanvardagi “Toshkent shahri markazlashgan issiqlik taʼminoti korxonalarini faoliyatini takomillashtirish toʻgʻrisida”gi 13-son qarori qabul qilinganligi maʼlumot uchun qabul qilinsin.
2. Energetika vazirligi va Toshkent shahar hokimligining 11 ta tumandagi issiqlik tarmoqlarining soʻnggi qismlarida joylashgan ilovaga muvofiq koʻp kvartirali uy-joylarni tajriba tariqasida kogeneratsiya hamda gaz dvigateli bilan elektr energiya ishlab chiqaruvchi uskunalarni (keyingi oʻrinlarda — uskunalar) oʻrnatish orqali isitish va elektr energiyasi bilan taʼminlash toʻgʻrisidagi takliflariga rozilik berilsin.
3. Energetika vazirligi Tashqi ishlar vazirligi bilan birgalikda Oʻzbekiston Respublikasining xorijdagi diplomatik vakolatxonalari orqali bir hafta muddatda uskunalarni ishlab chiqaruvchi korxonalar bilan aloqa oʻrnatib, tayyor uskunalarni Oʻzbekistonga qisqa muddatlarda yetkazib berish hamda oʻrnatish, shu jumladan, texnik taʼminlash boʻyicha tijorat takliflarini tayyorlasin va Vazirlar Mahkamasiga kiritsin.
4. Uskunalarni xarid qilish va ishga tushirish hamda zaruratga koʻra koʻp kvartirali uylarning ichki va uskunalargacha boʻlgan issiqlik tarmoqlari va elektr tizimini yangilash (qurish yoki rekonstruksiya qilish) ishlarini amalga oshirishda:
Issiqlik elektr stansiyalari” AJ — Chilonzor, Sergeli va Olmazor tumanlaridagi obyektlarda buyurtmachi etib belgilansin;
qolgan tumanlardagi obyektlarda qurilish ishlari xususiy investor tomonidan amalga oshiriladi;
buyurtmachi tomonidan narx, sifat, yetkazib berish muddatlari hamda texnik taʼminlash xizmatlariga alohida eʼtibor qaratilsin.
5. Buyurtmachiga, istisno tariqasida, tender (tanlov) savdolarini hamda Iqtisodiyot va moliya vazirligi huzuridagi “Loyihalar va import kontraktlarini kompleks ekspertiza qilish markazi” DUKda ekspertizadan oʻtkazmasdan va davlat xaridlarini amalga oshirish toʻgʻrisida maxsus axborot portaliga eʼlon joylashtirmasdan eng yaxshi taklifni tanlab olish asosida:
uskunalarni xarid qilishga;
uskunalarni oʻrnatish va ishga tushirish hamda zaruratga koʻra koʻp kvartirali uylarning ichki va uskunalargacha boʻlgan issiqlik tarmoqlari va elektr tizimini yangilash (qurish yoki rekonstruksiya qilish) ishlarini amalga oshirish uchun pudratchilarni aniqlashga ruxsat berilsin.
6. Belgilansinki:
uskunalarni xarid qilish ishlari Toshkent shahar mahalliy budjetining qoʻshimcha manbalari hamda “Issiqlik elektr stansiyalari” AJ mablagʻlari hisobidan moliyalashtiriladi;
uskunalardan foydalanish natijasida olingan issiqlik va elektr energiyasi ushbu issiqlik va elektr energiyasi yetkazib berilayotgan koʻp kvartirali uylardagi isteʼmolchilarga amaldagi tariflar asosida yetkazib beriladi.
7. Ushbu qarorda belgilangan har bir tadbirning oʻz vaqtida va sifatli amalga oshirilishi hamda mablagʻlarning maqsadli ishlatilishiga masʼul va javobgar etib Energetika vaziri J. Mirzamaxmudov va Toshkent shahar hokimi vazifasini bajaruvchi B. Raxmonov belgilansin.
8. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari A.J. Ramatov zimmasiga yuklansin.
Vazirlar Mahkamasining 2023-yil 20-yanvardagi 23-son qaroriga ILOVA
Kogeneratsiya hamda gaz dvigateli bilan elektr energiyasi ishlab chiqaruvchi uskunalar oʻrnatiladigan issiqlik tarmoqlarining soʻnggi qismlari
T/r Tumanlar nomi Mahallalar nomi Koʻp kvartirali uylar soni Maktablar soni Maktabgacha taʼlim muassasalari soni 1. Mirobod Qorasuv 101 1 4 2. Chilonzor Oqtepa 50 2 2 3. Mirzo Ulugʻbek Feruza 66 3 5 4. Shayxontohur Shayxontohur 37 2 3 5. Yunusobod Shoshtepa, Uvaysiy 97 3 2 6. Yunusobod Begʻubor, Mehnatobod 7. Sergeli Oʻzgarish Habibiy 51 1 8. Olmazor Yuqori Beshqoʻrgʻon 18 1 9. Yashnobod Tuzel, Amir Temur, Mohinur, Al-Buxoriy 77 2 3 10. Uchtepa Birlik 39 1 2 11. Yangihayot Xushnud, Charogʻon, Doʻstlik, Zarbdor, Yorqin hayot, Yoʻldosh 73 2 2
Oʻzbekiston Respublikasining Bosh vaziri A. ARIPOV
Toshkent sh.,
2023-yil 20-yanvar,
23-son