📅 2023-yil 11-mart · Vazirlik va idoralar hujjatlari · Korrupsiyaga qarshi kurashish agentligi direktori
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2023 йил 11 март · Вазирлик ва идоралар ҳужжатлари · Коррупцияга қарши курашиш агентлиги директори
Расмий матн. Расмий ҳужжат. Таҳририй изоҳлар киритилмаган.
📅 11 марта 2023 г. · Документы министерств и ведомств · Директор Агентства по противодействию коррупции
Официальный текст. Официальный документ. Редакционные примечания не включены.
📅 11 March 2023 · Ministry and agency documents · Korrupsiyaga qarshi kurashish agentligi direktori
Official text. Official document. Editorial notes are not included.
Ўзбекистон Республикаси Коррупцияга қарши курашиш агентлиги директорининг
буйруғи
НИЗОМ
Давлат фуқаролик хизматчиси томонидан хизмат сафарлари, халқаро ва бошқа расмий тадбирлар муносабати билан олиниши мумкин бўлган совға қиймати, шунингдек уни тасарруф этиш тартиби тўғрисидаги низомни тасдиқлаш ҳақида
Ўзбекистон Республикасининг «Давлат фуқаролик хизмати тўғрисида»ги Қонунининг 18-моддасига мувофиқ буюраман:
1. Давлат фуқаролик хизматчиси томонидан хизмат сафарлари, халқаро ва бошқа расмий тадбирлар муносабати билан олиниши мумкин бўлган совға қиймати, шунингдек уни тасарруф этиш тартиби тўғрисидаги низом иловага мувофиқ тасдиқлансин.
2. Мазкур буйруқ Ўзбекистон Республикаси Президенти ҳузуридаги Давлат хизматини ривожлантириш агентлиги, Ўзбекистон Республикаси Камбағалликни қисқартириш ва бандлик вазирлиги ҳамда Ўзбекистон Касаба уюшмалари Федерацияси билан келишилган.
3. Ушбу буйруқ расмий эълон қилинган кундан эътиборан кучга киради.
Келишилди:
Ўзбекистон Республикаси Коррупцияга қарши курашиш агентлиги директорининг 2023 йил 11 мартдаги 54-сон буйруғига ИЛОВА
Давлат фуқаролик хизматчиси томонидан хизмат сафарлари, халқаро ва бошқа расмий тадбирлар муносабати билан олиниши мумкин бўлган совға қиймати, шунингдек уни тасарруф этиш тартиби тўғрисидаги
Мазкур Низом давлат фуқаролик хизматчиси томонидан хизмат сафарлари, халқаро ва бошқа расмий тадбирлар муносабати билан олиниши мумкин бўлган совға қиймати, шунингдек уни тасарруф этиш тартибини белгилайди.
1-боб. Умумий қоидалар
1. Давлат фуқаролик хизматчиси Ўзбекистон Республикаси ҳудудидан ташқарида амалга ошириладиган хизмат сафарлари, халқаро ва бошқа расмий тадбирлар, шунингдек Ўзбекистон Республикаси ҳудудида ўтказиладиган халқаро ва бошқа расмий тадбирлар (бундан буён матнда халқаро ва бошқа расмий тадбирлар деб юритилади) муносабати билан совға олиши мумкин.
Ўзбекистон Республикаси ҳудудида ўтказиладиган халқаро ва бошқа расмий тадбирлар билан боғлиқ бўлмаган хизмат сафарлари муносабати билан давлат фуқаролик хизматчисининг совға олиши тақиқланади.
2. Мазкур Низомда қуйидаги асосий тушунчалардан фойдаланилади:
давлат органи — Давлат фуқаролик хизмати татбиқ қилинадиган давлат органлари ва ташкилотлари рўйхатига киритилган давлат ҳокимият ваколатларига эга бўлган ташкилий жиҳатдан алоҳида тузилма;
совға — давлат фуқаролик хизматчисига халқаро ва бошқа расмий тадбирлар муносабати билан жисмоний ва юридик шахслар томонидан бепул тақдим этилган, моддий қимматга эга бўлган мол-мулк ёки беғараз кўрсатилган хизмат;
халқаро тадбирлар — давлат органи номидан, унинг расмий вакиллари ҳамда хорижий мамлакатлар ва халқаро ташкилотлар вакиллари иштирокида ўзаро ҳамкорлик муносабатларини ўрнатиш, алоқаларни ривожлантириш, тажриба алмашиш мақсадида ташкил этиладиган ва ўтказиладиган тадбирлар, хусусан Ўзбекистон Республикаси делегациясининг хорижий мамлакатга, хорижий мамлакат делегациясининг Ўзбекистон Республикасига ташрифи билан боғлиқ тадбирлар;
расмий тадбирлар — давлат органига юклатилган вазифа ва функциялардан келиб чиқиб, давлат органи номидан, унинг расмий вакиллари иштирокида ташкил этиладиган, муайян мақсадларга эришишга қаратилган тадбирлар (расмий қабул, маросим, учрашув, анжуман, семинар, брифинг, симпозиум, тақдимот, давра суҳбати ва бошқа тадбирлар);
хизмат сафари — давлат органи раҳбарининг буйруғига (қарори, фармойишига) асосан давлат фуқаролик хизматчиси ўзининг доимий иш жойидан бошқа жойга (Ўзбекистон Республикаси ҳудудида ёки унинг ҳудудидан ташқари) хизмат вазифасини ва топшириғини бажариш учун муайян муддатга юборилиши;
совға берувчи — халқаро ва бошқа расмий тадбирлар муносабати билан давлат фуқаролик хизматчисига совға тақдим этувчи жисмоний ёки юридик шахс вакили;
Совғалар реестри — давлат фуқаролик хизматчиси томонидан халқаро ва бошқа расмий тадбирлар муносабати билан қабул қилинган совғалар тўғрисидаги маълумотлар рўйхати;
меҳмондўстлик белгиси — халқаро ва бошқа расмий тадбирлар муносабати билан икки томонлама алоқаларни мустаҳкамлаш ва этикет қоидаларига мувофиқ нонуштага, кофе-брейкка, тушликка, кечки овқатга ва оммавий-маданий ва концерт-томоша тадбирларига таклиф қилиш.
3. Мазкур Низом талабларига риоя этиш Давлат фуқаролик хизмати лавозимларининг давлат реестрига киритилган лавозимлардаги барча давлат фуқаролик хизматчилари учун мажбурийдир.
4. Давлат фуқаролик хизматчилари томонидан ўзларининг хизмат ваколатларини жисмоний ва юридик шахслар манфаатларини кўзлаб бажариш ёки бажармаслик эвазига улардан ҳар қандай совғалар олиш тақиқланади. Бундан давлат фуқаролик хизматчиси томонидан алоҳида хизматлари учун давлат органининг тегишли қарори асосида олинган совғалар, шунингдек мусобақалар ва танловларда эришган ютуқлари, давлат байрамлари, нишонланадиган саналар ҳамда бошқа расмий тадбирлар муносабати билан мукофотлаш натижасида олинган совғалар мустасно.
5. Давлат фуқаролик хизматчиси халқаро ва бошқа расмий тадбирлар муносабати билан ўзи ёки бошқа шахслар учун совға тақдим этилишини сўрашига ёки талаб қилишига йўл қўйилмайди.
6. Давлат фуқаролик хизматчисининг халқаро ва бошқа расмий тадбирлар муносабати билан унинг оила аъзоларига тақдим этилган совға давлат фуқаролик хизматчисига берилган совға деб ҳисобланади.
7. Давлат органи раҳбарининг буйруғига (қарорига, фармойишига) асосан:
совғанинг қийматини аниқлаш ва уни сақлаш, Совғалар реестрини юритиш давлат органининг хўжалик бўлинмаси (бундан буён матнда бўлинма деб юритилади) (ходими) томонидан;
совғани давлат органининг балансига кирим қилиш мазкур давлат органининг молия-иқтисод бўлинмаси (ходими) томонидан;
совғалар билан боғлиқ масалаларни назорат қилиш ва мувофиқлаштириш давлат органининг комплаенс ва коррупцияга қарши ички назорат тузилмаси (ходими) томонидан амалга оширилади.
Бунда, давлат органида мазкур бандда назарда тутилган таркибий бўлинмалар (ходимлар) мавжуд бўлмаган тақдирда тегишли вазифа давлат органи раҳбарининг буйруғига (қарорига, фармойишига) асосан бошқа таркибий бўлинмага (ходимга) юклатилиши мумкин.
2-боб. Халқаро ва бошқа расмий тадбирлар муносабати билан тақдим этилган совғани қабул қилиш талаблари
8. Давлат фуқаролик хизматчиси томонидан халқаро ва бошқа расмий тадбирлар муносабати билан олиниши мумкин бўлган совға қуйидаги талабларга жавоб бериши лозим:
Ўзбекистон Республикаси қонунчилик ҳужжатлари, давлат органининг ички идоравий ҳужжатлари ҳамда ушбу Низом талабларига мувофиқ бўлиши;
совға уни берувчи томонидан аниқ бир халқаро ва бошқа расмий тадбирлар муносабати билан ихтиёрий тақдим этилган бўлиши;
давлат фуқаролик хизматчиси томонидан очиқ ва ошкора қабул қилиниши;
давлат органининг обрўсига (нуфузига) путур етказмаслиги;
манфаатлар тўқнашуви ёки коррупциявий хавф-хатарларнинг келиб чиқишига сабаб бўлмаслиги, хусусан давлат фуқаролик хизматчисининг хизмат фаолиятида холис қарор қабул қилишига таъсир кўрсатадиган мажбуриятни юзага келтирмаслиги.
9. Давлат фуқаролик хизматчиси совғани қабул қилиш жараёнида совға берувчидан совғанинг қийматини тасдиқловчи ҳужжатларни (совғанинг қийматини тасдиқловчи савдо чекини ёки савдо квитанциясини ёхуд бошқа ҳужжатларни) сўраб олиши мумкин.
10. Давлат фуқаролик хизматчисига тақдим этилган тез яроқсиз ҳолга келувчи маҳсулотлар (табиий гулдаста, доналик ширинликлар), шунингдек канцелярия тўпламлари (тақвим, буклет, пластмассали ручка, кундалик ва блокнот) совға сифатида расмийлаштирилмайди ҳамда ушбу совғалар давлат фуқаролик хизматчиси томонидан ўз хоҳишига кўра тасарруф этилади.
11. Давлат фуқаролик хизматчиси унга халқаро ва бошқа расмий тадбирлар муносабати билан меҳмондўстлик белгиси сифатида билдирилган таклифни қабул қилиши мумкин.
Бунда, давлат фуқаролик хизматчиси меҳмондўстлик белгиси сифатида билдирилган таклифнинг беғаразлигига шубҳа сезган тақдирда, ушбу таклифни дарҳол рад этиши ва алоқа воситалари орқали бу ҳақда комплаенс ва коррупцияга қарши ички назорат тузилмасини огоҳлантириши шарт.
3-боб. Халқаро ва бошқа расмий тадбирлар муносабати билан тақдим этилган совғанинг қиймати ва уни тасарруф этиш
12. Давлат фуқаролик хизматчиси халқаро ва бошқа расмий тадбирлар муносабати билан унга тақдим этилган совғани ушбу тадбирлардан қайтиб келган кундан бошлаб уч иш куни ичида бўлинмага совғанинг қийматини тасдиқловчи тегишли ҳужжатлар (совғанинг қийматини тасдиқловчи савдо чеки ёки савдо квитанцияси ёхуд бошқа ҳужжатлар) мавжуд бўлса, ушбу ҳужжатлар билан бирга тақдим этади, бундан мазкур Низомнинг 10-бандида назарда тутилган совғалар мустасно.
13. Давлат фуқаролик хизматчиси томонидан совғани бўлинмага топширилиши тўғрисидаги топшириш ва қабул қилиш далолатномаси (бундан буён матнда далолатнома деб юритилади) расмийлаштирилгунга қадар совғанинг бутлиги ва сақланиши учун жавобгарлик давлат фуқаролик хизматчиси зиммасида бўлади.
14. Давлат фуқаролик хизматчиси томонидан бўлинмага топширилган ҳар қандай совға бўйича далолатнома ушбу бўлинма томонидан икки нусхада тузилади. Бунда, бўлинма томонидан ушбу далолатноманинг биринчи нусхаси мазкур Низомнинг иловасига мувофиқ шаклдаги Совғалар реестрида совғани рўйхатга олган ҳолда давлат фуқаролик хизматчисига қайтарилади, иккинчи нусхаси ушбу бўлинмада сақланади.
15. Давлат фуқаролик хизматчисида совғанинг қийматини тасдиқловчи ҳужжат мавжуд бўлмаса, бўлинма томонидан совғанинг қиймати аниқланади.
Бунда, бўлинма томонидан совғанинг бозор нархи савдо дўконлари, интернет ҳамда бошқа манбалар ва усуллар орқали ўрганилиб, унинг ўртача қиймати аниқланади ва унинг натижаси бўйича баённома расмийлаштирилади.
16. Совғанинг қиймати базавий ҳисоблаш миқдорининг 4 (тўрт) бараварига тенг ёки ундан кўп бўлмаган миқдорда эканлиги аниқланган тақдирда, совға давлат фуқаролик хизматчисида қолдирилади ва у томонидан ўз ихтиёрига кўра тасарруф этилади.
Бунда, бўлинма томонидан совғанинг давлат фуқаролик хизматчисига топширилганлиги бўйича далолатнома расмийлаштирилади.
Совғанинг қиймати базавий ҳисоблаш миқдорининг 4 (тўрт) бараваридан ортиқлиги аниқланган тақдирда, совға молия-иқтисод бўлинмаси томонидан давлат органининг балансига кирим қилинади.
17. Давлат органининг балансига ўтказилган совғадан давлат органининг эҳтиёжи учун фойдаланишга рухсат этилади.
18. Давлат фуқаролик хизматчиси халқаро ва бошқа расмий тадбирлар муносабати билан ўзига тақдим этилган совғаларни қабул қилишнинг қонунийлиги тўғрисида ҳар қандай шубҳа пайдо бўлганда, шу заҳоти ушбу масала бўйича бевосита ўзининг юқори турувчи раҳбариятини ёки комплаенс ва коррупцияга қарши ички назорат тузилмасини хабардор қилиши шарт.
Совғанинг қийматини тасдиқловчи ҳужжатларнинг ишончлилиги ва ҳақиқийлиги бўйича шубҳалар мавжуд бўлган тақдирда тақдим этилган ҳужжатларнинг ишончлилиги ва ҳақиқийлиги комплаенс ва коррупцияга қарши ички назорат тузилмаси томонидан текширилиши мумкин.
19. Давлат фуқаролик хизматчисининг халқаро ва бошқа расмий тадбирлар муносабати билан унинг оила аъзоларига тақдим этилган совға мазкур бобга мувофиқ тасарруф этилади.
4-боб. Якуний қоида
20. Ушбу Низом талаблари бузилишида айбдор бўлган шахслар қонунчилик ҳужжатларида белгиланган тартибда жавобгар бўлади.
Давлат фуқаролик хизматчиси томонидан хизмат сафарлари, халқаро ва бошқа расмий тадбирлар муносабати билан олиниши мумкин бўлган совға қиймати, шунингдек уни тасарруф этиш тартиби тўғрисидаги низомга ИЛОВА
___________________________________________________________________________, (давлат органи номи) Хизмат сафарлари, халқаро ва бошқа расмий тадбирлар муносабати билан давлат фуқаролик хизматчилари томонидан қабул қилинган совғалар бўйича РЕЕСТР Т/р Давлат хизматчиси томонидан совға қабул қилинган сана Совғани қабул қилган давлат хизматчисининг Ф.И.О ва лавозими Совғанинг тавсифи Совғанинг берилиш сабаби/муносабати Совға берувчининг маълумотлари * Совғанинг қиймати ** Совғанинг тасарруф этилиши *** Совғани топширган давлат хизматчисининг имзоси ва сана Масъул ходимнинг имзоси ва сана 1 2 3 4 5 6 7 8 9 10 1. 2. …
Директор А. БУРХАНОВ
Ўзбекистон касаба уюшмалари Федерацияси раиси К. РАФИКОВ
Давлат хизматини ривожлантириш агентлиги директорининг биринчи ўринбосари А. ХАСАНОВ
Камбағалликни қисқартириш ва бандлик вазири Б. МУСАЕВ
Тошкент ш.,
2023 йил 11 март,
2023 йил 7 март
2023 йил 9 март
2023 йил 10 март
54-сон
Oʻzbekiston Respublikasi Korrupsiyaga qarshi kurashish agentligi direktorining
buyrugʻi
NIZOM
Davlat fuqarolik xizmatchisi tomonidan xizmat safarlari, xalqaro va boshqa rasmiy tadbirlar munosabati bilan olinishi mumkin boʻlgan sovgʻa qiymati, shuningdek uni tasarruf etish tartibi toʻgʻrisidagi nizomni tasdiqlash haqida
Oʻzbekiston Respublikasining “Davlat fuqarolik xizmati toʻgʻrisida”gi Qonunining 18-moddasiga muvofiq buyuraman:
1. Davlat fuqarolik xizmatchisi tomonidan xizmat safarlari, xalqaro va boshqa rasmiy tadbirlar munosabati bilan olinishi mumkin boʻlgan sovgʻa qiymati, shuningdek uni tasarruf etish tartibi toʻgʻrisidagi nizom ilovaga muvofiq tasdiqlansin.
2. Mazkur buyruq Oʻzbekiston Respublikasi Prezidenti huzuridagi Davlat xizmatini rivojlantirish agentligi, Oʻzbekiston Respublikasi Kambagʻallikni qisqartirish va bandlik vazirligi hamda Oʻzbekiston Kasaba uyushmalari Federatsiyasi bilan kelishilgan.
3. Ushbu buyruq rasmiy eʼlon qilingan kundan eʼtiboran kuchga kiradi.
Kelishildi:
Oʻzbekiston Respublikasi Korrupsiyaga qarshi kurashish agentligi direktorining 2023-yil 11-martdagi 54-son buyrugʻiga ILOVA
Davlat fuqarolik xizmatchisi tomonidan xizmat safarlari, xalqaro va boshqa rasmiy tadbirlar munosabati bilan olinishi mumkin boʻlgan sovgʻa qiymati, shuningdek uni tasarruf etish tartibi toʻgʻrisidagi
Mazkur Nizom davlat fuqarolik xizmatchisi tomonidan xizmat safarlari, xalqaro va boshqa rasmiy tadbirlar munosabati bilan olinishi mumkin boʻlgan sovgʻa qiymati, shuningdek uni tasarruf etish tartibini belgilaydi.
1-bob. Umumiy qoidalar
1. Davlat fuqarolik xizmatchisi Oʻzbekiston Respublikasi hududidan tashqarida amalga oshiriladigan xizmat safarlari, xalqaro va boshqa rasmiy tadbirlar, shuningdek Oʻzbekiston Respublikasi hududida oʻtkaziladigan xalqaro va boshqa rasmiy tadbirlar (bundan buyon matnda xalqaro va boshqa rasmiy tadbirlar deb yuritiladi) munosabati bilan sovgʻa olishi mumkin.
Oʻzbekiston Respublikasi hududida oʻtkaziladigan xalqaro va boshqa rasmiy tadbirlar bilan bogʻliq boʻlmagan xizmat safarlari munosabati bilan davlat fuqarolik xizmatchisining sovgʻa olishi taqiqlanadi.
2. Mazkur Nizomda quyidagi asosiy tushunchalardan foydalaniladi:
davlat organi — Davlat fuqarolik xizmati tatbiq qilinadigan davlat organlari va tashkilotlari roʻyxatiga kiritilgan davlat hokimiyat vakolatlariga ega boʻlgan tashkiliy jihatdan alohida tuzilma;
sovgʻa — davlat fuqarolik xizmatchisiga xalqaro va boshqa rasmiy tadbirlar munosabati bilan jismoniy va yuridik shaxslar tomonidan bepul taqdim etilgan, moddiy qimmatga ega boʻlgan mol-mulk yoki begʻaraz koʻrsatilgan xizmat;
xalqaro tadbirlar — davlat organi nomidan, uning rasmiy vakillari hamda xorijiy mamlakatlar va xalqaro tashkilotlar vakillari ishtirokida oʻzaro hamkorlik munosabatlarini oʻrnatish, aloqalarni rivojlantirish, tajriba almashish maqsadida tashkil etiladigan va oʻtkaziladigan tadbirlar, xususan Oʻzbekiston Respublikasi delegatsiyasining xorijiy mamlakatga, xorijiy mamlakat delegatsiyasining Oʻzbekiston Respublikasiga tashrifi bilan bogʻliq tadbirlar;
rasmiy tadbirlar — davlat organiga yuklatilgan vazifa va funksiyalardan kelib chiqib, davlat organi nomidan, uning rasmiy vakillari ishtirokida tashkil etiladigan, muayyan maqsadlarga erishishga qaratilgan tadbirlar (rasmiy qabul, marosim, uchrashuv, anjuman, seminar, brifing, simpozium, taqdimot, davra suhbati va boshqa tadbirlar);
xizmat safari — davlat organi rahbarining buyrugʻiga (qarori, farmoyishiga) asosan davlat fuqarolik xizmatchisi oʻzining doimiy ish joyidan boshqa joyga (Oʻzbekiston Respublikasi hududida yoki uning hududidan tashqari) xizmat vazifasini va topshirigʻini bajarish uchun muayyan muddatga yuborilishi;
sovgʻa beruvchi — xalqaro va boshqa rasmiy tadbirlar munosabati bilan davlat fuqarolik xizmatchisiga sovgʻa taqdim etuvchi jismoniy yoki yuridik shaxs vakili;
Sovgʻalar reyestri — davlat fuqarolik xizmatchisi tomonidan xalqaro va boshqa rasmiy tadbirlar munosabati bilan qabul qilingan sovgʻalar toʻgʻrisidagi maʼlumotlar roʻyxati;
mehmondoʻstlik belgisi — xalqaro va boshqa rasmiy tadbirlar munosabati bilan ikki tomonlama aloqalarni mustahkamlash va etiket qoidalariga muvofiq nonushtaga, kofe-breykka, tushlikka, kechki ovqatga va ommaviy-madaniy va konsert-tomosha tadbirlariga taklif qilish.
3. Mazkur Nizom talablariga rioya etish Davlat fuqarolik xizmati lavozimlarining davlat reyestriga kiritilgan lavozimlardagi barcha davlat fuqarolik xizmatchilari uchun majburiydir.
4. Davlat fuqarolik xizmatchilari tomonidan oʻzlarining xizmat vakolatlarini jismoniy va yuridik shaxslar manfaatlarini koʻzlab bajarish yoki bajarmaslik evaziga ulardan har qanday sovgʻalar olish taqiqlanadi. Bundan davlat fuqarolik xizmatchisi tomonidan alohida xizmatlari uchun davlat organining tegishli qarori asosida olingan sovgʻalar, shuningdek musobaqalar va tanlovlarda erishgan yutuqlari, davlat bayramlari, nishonlanadigan sanalar hamda boshqa rasmiy tadbirlar munosabati bilan mukofotlash natijasida olingan sovgʻalar mustasno.
5. Davlat fuqarolik xizmatchisi xalqaro va boshqa rasmiy tadbirlar munosabati bilan oʻzi yoki boshqa shaxslar uchun sovgʻa taqdim etilishini soʻrashiga yoki talab qilishiga yoʻl qoʻyilmaydi.
6. Davlat fuqarolik xizmatchisining xalqaro va boshqa rasmiy tadbirlar munosabati bilan uning oila aʼzolariga taqdim etilgan sovgʻa davlat fuqarolik xizmatchisiga berilgan sovgʻa deb hisoblanadi.
7. Davlat organi rahbarining buyrugʻiga (qaroriga, farmoyishiga) asosan:
sovgʻaning qiymatini aniqlash va uni saqlash, Sovgʻalar reyestrini yuritish davlat organining xoʻjalik boʻlinmasi (bundan buyon matnda boʻlinma deb yuritiladi) (xodimi) tomonidan;
sovgʻani davlat organining balansiga kirim qilish mazkur davlat organining moliya-iqtisod boʻlinmasi (xodimi) tomonidan;
sovgʻalar bilan bogʻliq masalalarni nazorat qilish va muvofiqlashtirish davlat organining komplayens va korrupsiyaga qarshi ichki nazorat tuzilmasi (xodimi) tomonidan amalga oshiriladi.
Bunda, davlat organida mazkur bandda nazarda tutilgan tarkibiy boʻlinmalar (xodimlar) mavjud boʻlmagan taqdirda tegishli vazifa davlat organi rahbarining buyrugʻiga (qaroriga, farmoyishiga) asosan boshqa tarkibiy boʻlinmaga (xodimga) yuklatilishi mumkin.
2-bob. Xalqaro va boshqa rasmiy tadbirlar munosabati bilan taqdim etilgan sovgʻani qabul qilish talablari
8. Davlat fuqarolik xizmatchisi tomonidan xalqaro va boshqa rasmiy tadbirlar munosabati bilan olinishi mumkin boʻlgan sovgʻa quyidagi talablarga javob berishi lozim:
Oʻzbekiston Respublikasi qonunchilik hujjatlari, davlat organining ichki idoraviy hujjatlari hamda ushbu Nizom talablariga muvofiq boʻlishi;
sovgʻa uni beruvchi tomonidan aniq bir xalqaro va boshqa rasmiy tadbirlar munosabati bilan ixtiyoriy taqdim etilgan boʻlishi;
davlat fuqarolik xizmatchisi tomonidan ochiq va oshkora qabul qilinishi;
davlat organining obroʻsiga (nufuziga) putur yetkazmasligi;
manfaatlar toʻqnashuvi yoki korrupsiyaviy xavf-xatarlarning kelib chiqishiga sabab boʻlmasligi, xususan davlat fuqarolik xizmatchisining xizmat faoliyatida xolis qaror qabul qilishiga taʼsir koʻrsatadigan majburiyatni yuzaga keltirmasligi.
9. Davlat fuqarolik xizmatchisi sovgʻani qabul qilish jarayonida sovgʻa beruvchidan sovgʻaning qiymatini tasdiqlovchi hujjatlarni (sovgʻaning qiymatini tasdiqlovchi savdo chekini yoki savdo kvitansiyasini yoxud boshqa hujjatlarni) soʻrab olishi mumkin.
10. Davlat fuqarolik xizmatchisiga taqdim etilgan tez yaroqsiz holga keluvchi mahsulotlar (tabiiy guldasta, donalik shirinliklar), shuningdek kanselyariya toʻplamlari (taqvim, buklet, plastmassali ruchka, kundalik va bloknot) sovgʻa sifatida rasmiylashtirilmaydi hamda ushbu sovgʻalar davlat fuqarolik xizmatchisi tomonidan oʻz xohishiga koʻra tasarruf etiladi.
11. Davlat fuqarolik xizmatchisi unga xalqaro va boshqa rasmiy tadbirlar munosabati bilan mehmondoʻstlik belgisi sifatida bildirilgan taklifni qabul qilishi mumkin.
Bunda, davlat fuqarolik xizmatchisi mehmondoʻstlik belgisi sifatida bildirilgan taklifning begʻarazligiga shubha sezgan taqdirda, ushbu taklifni darhol rad etishi va aloqa vositalari orqali bu haqda komplayens va korrupsiyaga qarshi ichki nazorat tuzilmasini ogohlantirishi shart.
3-bob. Xalqaro va boshqa rasmiy tadbirlar munosabati bilan taqdim etilgan sovgʻaning qiymati va uni tasarruf etish
12. Davlat fuqarolik xizmatchisi xalqaro va boshqa rasmiy tadbirlar munosabati bilan unga taqdim etilgan sovgʻani ushbu tadbirlardan qaytib kelgan kundan boshlab uch ish kuni ichida boʻlinmaga sovgʻaning qiymatini tasdiqlovchi tegishli hujjatlar (sovgʻaning qiymatini tasdiqlovchi savdo cheki yoki savdo kvitansiyasi yoxud boshqa hujjatlar) mavjud boʻlsa, ushbu hujjatlar bilan birga taqdim etadi, bundan mazkur Nizomning 10-bandida nazarda tutilgan sovgʻalar mustasno.
13. Davlat fuqarolik xizmatchisi tomonidan sovgʻani boʻlinmaga topshirilishi toʻgʻrisidagi topshirish va qabul qilish dalolatnomasi (bundan buyon matnda dalolatnoma deb yuritiladi) rasmiylashtirilgunga qadar sovgʻaning butligi va saqlanishi uchun javobgarlik davlat fuqarolik xizmatchisi zimmasida boʻladi.
14. Davlat fuqarolik xizmatchisi tomonidan boʻlinmaga topshirilgan har qanday sovgʻa boʻyicha dalolatnoma ushbu boʻlinma tomonidan ikki nusxada tuziladi. Bunda, boʻlinma tomonidan ushbu dalolatnomaning birinchi nusxasi mazkur Nizomning ilovasiga muvofiq shakldagi Sovgʻalar reyestrida sovgʻani roʻyxatga olgan holda davlat fuqarolik xizmatchisiga qaytariladi, ikkinchi nusxasi ushbu boʻlinmada saqlanadi.
15. Davlat fuqarolik xizmatchisida sovgʻaning qiymatini tasdiqlovchi hujjat mavjud boʻlmasa, boʻlinma tomonidan sovgʻaning qiymati aniqlanadi.
Bunda, boʻlinma tomonidan sovgʻaning bozor narxi savdo doʻkonlari, internet hamda boshqa manbalar va usullar orqali oʻrganilib, uning oʻrtacha qiymati aniqlanadi va uning natijasi boʻyicha bayonnoma rasmiylashtiriladi.
16. Sovgʻaning qiymati bazaviy hisoblash miqdorining 4 (toʻrt) baravariga teng yoki undan koʻp boʻlmagan miqdorda ekanligi aniqlangan taqdirda, sovgʻa davlat fuqarolik xizmatchisida qoldiriladi va u tomonidan oʻz ixtiyoriga koʻra tasarruf etiladi.
Bunda, boʻlinma tomonidan sovgʻaning davlat fuqarolik xizmatchisiga topshirilganligi boʻyicha dalolatnoma rasmiylashtiriladi.
Sovgʻaning qiymati bazaviy hisoblash miqdorining 4 (toʻrt) baravaridan ortiqligi aniqlangan taqdirda, sovgʻa moliya-iqtisod boʻlinmasi tomonidan davlat organining balansiga kirim qilinadi.
17. Davlat organining balansiga oʻtkazilgan sovgʻadan davlat organining ehtiyoji uchun foydalanishga ruxsat etiladi.
18. Davlat fuqarolik xizmatchisi xalqaro va boshqa rasmiy tadbirlar munosabati bilan oʻziga taqdim etilgan sovgʻalarni qabul qilishning qonuniyligi toʻgʻrisida har qanday shubha paydo boʻlganda, shu zahoti ushbu masala boʻyicha bevosita oʻzining yuqori turuvchi rahbariyatini yoki komplayens va korrupsiyaga qarshi ichki nazorat tuzilmasini xabardor qilishi shart.
Sovgʻaning qiymatini tasdiqlovchi hujjatlarning ishonchliligi va haqiqiyligi boʻyicha shubhalar mavjud boʻlgan taqdirda taqdim etilgan hujjatlarning ishonchliligi va haqiqiyligi komplayens va korrupsiyaga qarshi ichki nazorat tuzilmasi tomonidan tekshirilishi mumkin.
19. Davlat fuqarolik xizmatchisining xalqaro va boshqa rasmiy tadbirlar munosabati bilan uning oila aʼzolariga taqdim etilgan sovgʻa mazkur bobga muvofiq tasarruf etiladi.
4-bob. Yakuniy qoida
20. Ushbu Nizom talablari buzilishida aybdor boʻlgan shaxslar qonunchilik hujjatlarida belgilangan tartibda javobgar boʻladi.
Davlat fuqarolik xizmatchisi tomonidan xizmat safarlari, xalqaro va boshqa rasmiy tadbirlar munosabati bilan olinishi mumkin boʻlgan sovgʻa qiymati, shuningdek uni tasarruf etish tartibi toʻgʻrisidagi nizomga ILOVA
___________________________________________________________________________, (davlat organi nomi) Xizmat safarlari, xalqaro va boshqa rasmiy tadbirlar munosabati bilan davlat fuqarolik xizmatchilari tomonidan qabul qilingan sovgʻalar boʻyicha REYESTR T/r Davlat xizmatchisi tomonidan sovgʻa qabul qilingan sana Sovgʻani qabul qilgan davlat xizmatchisining F.I.O va lavozimi Sovgʻaning tavsifi Sovgʻaning berilish sababi/munosabati Sovgʻa beruvchining maʼlumotlari * Sovgʻaning qiymati ** Sovgʻaning tasarruf etilishi *** Sovgʻani topshirgan davlat xizmatchisining imzosi va sana Masʼul xodimning imzosi va sana 1 2 3 4 5 6 7 8 9 10 1. 2. …
Direktor A. BURXANOV
Oʻzbekiston kasaba uyushmalari Federatsiyasi raisi K. RAFIKOV
Davlat xizmatini rivojlantirish agentligi direktorining birinchi oʻrinbosari A. XASANOV
Kambagʻallikni qisqartirish va bandlik vaziri B. MUSAYEV
Toshkent sh.,
2023-yil 11-mart,
2023-yil 7-mart
2023-yil 9-mart
2023-yil 10-mart
54-son