📅 2023-yil 13-mart · Prezident farmonlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2023 йил 13 март · Президент фармонлари
Расмий матн. Расмий ҳужжат. Таҳририй изоҳлар киритилмаган.
📅 13 марта 2023 г. · Указы Президента
Официальный текст. Официальный документ. Редакционные примечания не включены.
📅 13 March 2023 · Presidential decrees
Official text. Official document. Editorial notes are not included.
Ўзбекистон Республикаси Президентининг
Фармони
Ватан ҳимояси ва эл-юртимиз тинчлиги йўлида ҳалок бўлган ҳарбий хизматчилар ва ходимлар оила аъзоларини ижтимоий қўллаб-қувватлашни кучайтириш чора-тадбирлари тўғрисида
Ватан ҳимояси ва эл-юртимиз тинчлиги йўлида ҳалок бўлган ҳарбий хизматчилар ва ходимлар оила аъзолари ҳамда уларнинг қарамоғидаги шахсларни ҳар томонлама қўллаб-қувватлаш, уларга ғамхўрлик қилиш ва ҳурмат-эҳтиром кўрсатиш, шунингдек, жамиятда эзгулик, ҳамжиҳатлик ва инсонийлик муҳитини янада мустаҳкамлаш мақсадида:
1. Мудофаа вазирлиги, Ички ишлар вазирлиги, Фавқулодда вазиятлар вазирлиги, Миллий гвардия, Давлат хавфсизлик хизмати, Ўзбекистон Республикаси Президенти давлат хавфсизлик хизмати, Божхона қўмитаси ва Электрон технологияларни ривожлантириш марказининг (кейинги ўринларда — масъул вазирлик ва идоралар) Ватан ҳимояси ва эл-юртимиз тинчлиги йўлида яраланганлиги, контузия ёки майиб бўлганлиги оқибатида ҳалок бўлган ҳарбий хизматчилари ва ходимларининг оила аъзолари ҳамда уларнинг қарамоғидаги шахсларга (кейинги ўринларда — ҳалок бўлган ҳарбий хизматчилар (ходимлар) қуйидаги имтиёз ва кафолатлар берилсин:
а) 2023 йил 1 апрелдан бошлаб:
ҳалок бўлган ҳарбий хизматчи (ходим) оила аъзоларига бирйўла бериладиган нафақа марҳумнинг охирги эгаллаган лавозими бўйича маоши ва ҳарбий (махсус) унвони маоши йиғиндисининг 150 баравари миқдорида белгилансин;
ҳарбий хизматчиларнинг (ходимларнинг) давлат мажбурий шахсий суғуртаси доирасида ҳарбий хизматчи (ходим) ҳалок бўлганда тўланадиган суғурта суммаси базавий ҳисоблаш миқдорининг 200 баравари миқдорида белгилансин;
Қорақалпоғистон Республикаси Вазирлар Кенгаши, вилоятлар ва Тошкент шаҳри ҳокимликларига улар томонидан белгиланган миқдорларда (меҳнатга ҳақ тўлаш энг кам миқдорининг 50 фоизигача бўлган суммадан ошмаган ҳолда) маҳаллий бюджетларнинг қўшимча манбалари ҳисобидан ҳалок бўлган ҳарбий хизматчиларнинг (ходимларнинг) тегишли ҳудудда истиқомат қилувчи оила аъзоларига ҳар ой тўланадиган нафақа тайинлаш тартибини белгилаш ҳуқуқи берилсин;
б) 2023 йил 1 майдан бошлаб:
оиланинг меҳнатга лаёқатсиз ҳар бир аъзосига боқувчисини йўқотганлик пенсияси пенсияни ҳисоблаб чиқиш учун олинадиган пул таъминотининг (иш ҳақининг) 50 фоизи миқдорида белгилансин;
оила аъзолари (ота-онаси, турмуш ўртоғи, 23 ёшга тўлмаган фарзандлари) даромадлар қайси ойда олинган бўлса, ўша ойда ҳар бир ой учун меҳнатга ҳақ тўлаш энг кам миқдорининг 3 баравари миқдоридаги даромадлар бўйича жисмоний шахслардан олинадиган даромад солиғидан озод этилсин;
белгиланган тартибда тураржойга муҳтож деб тан олинган тақдирда, тураржой билан биринчи навбатдаги тартибда таъминлансин;
қонунчиликда белгиланган ҳарбий хизматчиларга (ходимларга) тураржой сотиб олиш (қуриш) учун узоқ муддатли имтиёзли ипотека кредитлари бериш тартибига мувофиқ узоқ муддатли имтиёзли ипотека кредитларини олиш ҳуқуқи сақлаб қолинсин;
ҳалок бўлган ҳарбий хизматчининг (ходимнинг) янги никоҳга кирмаган турмуш ўртоғи ва (ёки) ҳарбий хизматчининг (ходимнинг) қарамоғида бўлган ота-онасидан бирига Ўзбекистон Республикаси Қуролли Кучларининг ҳарбий хизматчиларига тураржойни ижарага олганлик (ижарада турганлик) учун ҳар ойлик пул компенсациясини тўлаш тартиби татбиқ этилсин (мулкида тураржой бўлмаган тақдирда).
2. Шундай тартиб ўрнатилсинки, унга мувофиқ 2023 йил 1 июндан бошлаб:
а) ҳалок бўлган ҳарбий хизматчининг (ходимнинг) фарзандлари мактабгача таълим муассасаларида бепул тарбияланиши, шунингдек, профессионал ва олий таълим муассасаларида давлат гранти асосида қўшимча квоталар бўйича таълим олиши таъминланади;
б) ҳалок бўлган ҳарбий хизматчининг (ходимнинг) ота-оналарига йилига икки марта темир йўл ва ҳаво йўловчилар транспортидан бепул фойдаланиш ҳуқуқи берилади;
в) ҳалок бўлган ҳарбий хизматчининг (ходимнинг) оила аъзоларига:
ушбу ҳалок бўлган ҳарбий хизматчилар (ходимлар) хизматни ўтаган масъул вазирлик ва идораларнинг тиббиёт муассасаларида бепул тиббий ёрдам олиш ҳуқуқи сақлаб қолинади, шунингдек, тиббий ёрдамнинг кафолатланган ҳажмлари доирасида тиббий ёрдамни устувор равишда олиш ва навбатдан ташқари шифохонага ётқизиш имконияти яратилади;
юқори технологик ихтисослаштирилган тиббий ёрдам кўрсатувчи тиббиёт ташкилотлари томонидан Давлат бюджети маблағлари ҳисобидан бепул тиббий ёрдам кўрсатилади;
навбатдаги йиллик меҳнат таътилидан қулай вақтда фойдаланиш, шунингдек, йилига икки ҳафтагача муддатга иш ҳақи сақланмайдиган қўшимча таътил олиш ҳуқуқи берилади.
3. Масъул вазирлик ва идоралар Давлат бюджетидан уларга ажратилган маблағлар ва бюджетдан ташқари манбалари ҳисобидан ҳалок бўлган ҳарбий хизматчилар (ходимлар) оила аъзолари учун уларнинг мурожаатларига асосан қуйидагиларни таъминласин:
Ўзбекистон Республикаси ҳудудидаги санаторий-курорт муассасалари ва болаларни соғломлаштириш оромгоҳларида йилига бир марта бепул соғломлаштириш;
шифокорларнинг рецептларига асосан 3 ойлик эҳтиёждан келиб чиқиб дори воситаларини (йилига бир марта), тиббий ва махсус протез-ортопедия мосламаларини олиб бериш ҳамда жарроҳлик амалиётларининг харажатларини қоплаш;
оғир ташхисли касалликлари ҳамда ногиронлиги бўлганларга шифокорларнинг рецептларига мувофиқ, йилига бир марта дори воситаларининг 50 фоизигача бўлган суммасини компенсация қилиш.
4. Ушбу Фармонда (1-банд «а» кичик бандининг иккинчи ва учинчи хатбошиларидан ташқари) белгиланган имтиёз ва кафолатлар 1991 йил 1 январдан бошлаб мазкур Фармон кучга киргунга қадар ҳалок бўлган ҳарбий хизматчилар (ходимлар) оила аъзоларига нисбатан ҳам татбиқ этилсин.
5. Мудофаа вазирлиги, Ички ишлар вазирлиги, Фавқулодда вазиятлар вазирлиги, Миллий гвардия, Давлат хавфсизлик хизмати, Ўзбекистон Республикаси Президенти давлат хавфсизлик хизмати, Божхона қўмитаси ва Электрон технологияларни ривожлантириш маркази ҳар бир ҳалок бўлган ҳарбий хизматчилар (ходимлар) оиласини оталиққа олсин.
Бунда:
ҳалок бўлган ҳарбий хизматчиларнинг (ходимларнинг) оила аъзоларидан хабар олиниши, уларнинг уй-жой билан таъминланиш, ишга жойлашиш, таълим олиш, тиббий ва ижтимоий хизматлардан фойдаланиш ҳамда бошқа долзарб масалалари ўрганилиши ҳамда мавжуд муаммолари ҳал қилиниши, мазкур Фармон ва бошқа қонунчилик ҳужжатларида белгиланган имтиёз ҳамда кафолатлардан фойдаланишда амалий ёрдам кўрсатиб борилиши таъминлансин;
масъул вазирлик ва идораларнинг биринчи раҳбарлари мазкур бандда белгиланган вазифаларнинг сифатли бажарилишига шахсан жавобгар этиб белгилансин;
масъул вазирлик ва идораларда умумий штатлар сони доирасида уларнинг биринчи раҳбарларига мазкур бандда белгиланган вазифаларни бажаришга кўмаклашадиган маслаҳатчи лавозими киритилсин ва ҳалок бўлган ҳарбий хизматчиларнинг (ходимларнинг) оилалари билан доимий алоқани ўрнатиш учун ишонч телефонлари ишга туширилсин;
мазкур банд ижроси натижалари тўғрисида Ўзбекистон Республикаси Президенти Администрациясига ҳар ойда ахборот киритиб борилсин.
6. Мудофаа вазирлиги Ички ишлар вазирлиги, Фавқулодда вазиятлар вазирлиги, Миллий гвардия, Давлат хавфсизлик хизмати, Ўзбекистон Республикаси Президенти давлат хавфсизлик хизмати, Иқтисодиёт ва молия вазирлиги ҳамда бошқа ташкилотлар билан биргаликда ишчи гуруҳлар тузган ҳолда:
икки ой муддатда мазкур Фармоннинг 1 , 2 ва 3-бандларида назарда тутилган ҳар бир имтиёз ва кафолатни тақдим этиш тартибини белгиловчи норматив-ҳуқуқий ҳужжатлар лойиҳаларини;
2023 йил 1 декабрга қадар «Фахрийлар тўғрисида»ги, «Ҳарбий хизматчилар мақоми ва уларни ижтимоий ҳимоя қилиш тўғрисида»ги ва «Ҳарбий хизматчиларнинг пенсия таъминоти тўғрисида»ги қонун лойиҳаларини ишлаб чиқиб, Вазирлар Маҳкамасига киритсин.
7. Иқтисодиёт ва молия вазирлиги мазкур Фармон ижросини таъминлаш учун 2023 йилда вазирлик ва идораларга Давлат бюджетидан зарур маблағларни ажратсин, 2024 йилдан бошлаб Давлат бюджети параметрларини шакллантиришда зарур маблағларни назарда тутсин.
8. Ахборот ва оммавий коммуникациялар агентлиги Ўзбекистон Миллий ахборот агентлиги ва Ўзбекистон Миллий телерадиокомпанияси билан биргаликда оммавий ахборот воситаларида ушбу Фармоннинг мазмун-моҳияти ва аҳамияти кенг ёритилишини таъминласин.
9. Мазкур Фармон ижросини самарали ташкил қилишга масъул ва шахсий жавобгар этиб мудофаа вазири Б.Н. Курбанов, ички ишлар вазири П.Р. Бобожонов, Давлат хавфсизлик хизмати раиси А.А. Азизов, Ўзбекистон Республикаси Президенти давлат хавфсизлик хизмати раиси А.А. Усманов ва Миллий гвардия қўмондони Р.М. Джураев белгилансин.
Мазкур Фармон ижросини ҳар чоракда муҳокама қилиб бориш, ижро учун масъул идоралар фаолиятини мувофиқлаштириш ва назорат қилиш Ўзбекистон Республикаси Президенти ҳузуридаги Хавфсизлик кенгаши котиби В.В. Махмудов зиммасига юклансин.
Ўзбекистон Республикаси Президенти Ш. МИРЗИЁЕВ
Тошкент ш.,
2023 йил 13 март,
ПФ-34-сон
Oʻzbekiston Respublikasi Prezidentining
Farmoni
Vatan himoyasi va el-yurtimiz tinchligi yoʻlida halok boʻlgan harbiy xizmatchilar va xodimlar oila aʼzolarini ijtimoiy qoʻllab-quvvatlashni kuchaytirish chora-tadbirlari toʻgʻrisida
Vatan himoyasi va el-yurtimiz tinchligi yoʻlida halok boʻlgan harbiy xizmatchilar va xodimlar oila aʼzolari hamda ularning qaramogʻidagi shaxslarni har tomonlama qoʻllab-quvvatlash, ularga gʻamxoʻrlik qilish va hurmat-ehtirom koʻrsatish, shuningdek, jamiyatda ezgulik, hamjihatlik va insoniylik muhitini yanada mustahkamlash maqsadida:
1. Mudofaa vazirligi, Ichki ishlar vazirligi, Favqulodda vaziyatlar vazirligi, Milliy gvardiya, Davlat xavfsizlik xizmati, Oʻzbekiston Respublikasi Prezidenti davlat xavfsizlik xizmati, Bojxona qoʻmitasi va Elektron texnologiyalarni rivojlantirish markazining (keyingi oʻrinlarda — masʼul vazirlik va idoralar) Vatan himoyasi va el-yurtimiz tinchligi yoʻlida yaralanganligi, kontuziya yoki mayib boʻlganligi oqibatida halok boʻlgan harbiy xizmatchilari va xodimlarining oila aʼzolari hamda ularning qaramogʻidagi shaxslarga (keyingi oʻrinlarda — halok boʻlgan harbiy xizmatchilar (xodimlar) quyidagi imtiyoz va kafolatlar berilsin:
a) 2023-yil 1-apreldan boshlab:
halok boʻlgan harbiy xizmatchi (xodim) oila aʼzolariga biryoʻla beriladigan nafaqa marhumning oxirgi egallagan lavozimi boʻyicha maoshi va harbiy (maxsus) unvoni maoshi yigʻindisining 150 baravari miqdorida belgilansin;
harbiy xizmatchilarning (xodimlarning) davlat majburiy shaxsiy sugʻurtasi doirasida harbiy xizmatchi (xodim) halok boʻlganda toʻlanadigan sugʻurta summasi bazaviy hisoblash miqdorining 200 baravari miqdorida belgilansin;
Qoraqalpogʻiston Respublikasi Vazirlar Kengashi, viloyatlar va Toshkent shahri hokimliklariga ular tomonidan belgilangan miqdorlarda (mehnatga haq toʻlash eng kam miqdorining 50 foizigacha boʻlgan summadan oshmagan holda) mahalliy budjetlarning qoʻshimcha manbalari hisobidan halok boʻlgan harbiy xizmatchilarning (xodimlarning) tegishli hududda istiqomat qiluvchi oila aʼzolariga har oy toʻlanadigan nafaqa tayinlash tartibini belgilash huquqi berilsin;
b) 2023-yil 1-maydan boshlab:
oilaning mehnatga layoqatsiz har bir aʼzosiga boquvchisini yoʻqotganlik pensiyasi pensiyani hisoblab chiqish uchun olinadigan pul taʼminotining (ish haqining) 50 foizi miqdorida belgilansin;
oila aʼzolari (ota-onasi, turmush oʻrtogʻi, 23 yoshga toʻlmagan farzandlari) daromadlar qaysi oyda olingan boʻlsa, oʻsha oyda har bir oy uchun mehnatga haq toʻlash eng kam miqdorining 3 baravari miqdoridagi daromadlar boʻyicha jismoniy shaxslardan olinadigan daromad soligʻidan ozod etilsin;
belgilangan tartibda turarjoyga muhtoj deb tan olingan taqdirda, turarjoy bilan birinchi navbatdagi tartibda taʼminlansin;
qonunchilikda belgilangan harbiy xizmatchilarga (xodimlarga) turarjoy sotib olish (qurish) uchun uzoq muddatli imtiyozli ipoteka kreditlari berish tartibiga muvofiq uzoq muddatli imtiyozli ipoteka kreditlarini olish huquqi saqlab qolinsin;
halok boʻlgan harbiy xizmatchining (xodimning) yangi nikohga kirmagan turmush oʻrtogʻi va (yoki) harbiy xizmatchining (xodimning) qaramogʻida boʻlgan ota-onasidan biriga Oʻzbekiston Respublikasi Qurolli Kuchlarining harbiy xizmatchilariga turarjoyni ijaraga olganlik (ijarada turganlik) uchun har oylik pul kompensatsiyasini toʻlash tartibi tatbiq etilsin (mulkida turarjoy boʻlmagan taqdirda).
2. Shunday tartib oʻrnatilsinki, unga muvofiq 2023-yil 1-iyundan boshlab:
a) halok boʻlgan harbiy xizmatchining (xodimning) farzandlari maktabgacha taʼlim muassasalarida bepul tarbiyalanishi, shuningdek, professional va oliy taʼlim muassasalarida davlat granti asosida qoʻshimcha kvotalar boʻyicha taʼlim olishi taʼminlanadi;
b) halok boʻlgan harbiy xizmatchining (xodimning) ota-onalariga yiliga ikki marta temir yoʻl va havo yoʻlovchilar transportidan bepul foydalanish huquqi beriladi;
v) halok boʻlgan harbiy xizmatchining (xodimning) oila aʼzolariga:
ushbu halok boʻlgan harbiy xizmatchilar (xodimlar) xizmatni oʻtagan masʼul vazirlik va idoralarning tibbiyot muassasalarida bepul tibbiy yordam olish huquqi saqlab qolinadi, shuningdek, tibbiy yordamning kafolatlangan hajmlari doirasida tibbiy yordamni ustuvor ravishda olish va navbatdan tashqari shifoxonaga yotqizish imkoniyati yaratiladi;
yuqori texnologik ixtisoslashtirilgan tibbiy yordam koʻrsatuvchi tibbiyot tashkilotlari tomonidan Davlat budjeti mablagʻlari hisobidan bepul tibbiy yordam koʻrsatiladi;
navbatdagi yillik mehnat taʼtilidan qulay vaqtda foydalanish, shuningdek, yiliga ikki haftagacha muddatga ish haqi saqlanmaydigan qoʻshimcha taʼtil olish huquqi beriladi.
3. Masʼul vazirlik va idoralar Davlat budjetidan ularga ajratilgan mablagʻlar va budjetdan tashqari manbalari hisobidan halok boʻlgan harbiy xizmatchilar (xodimlar) oila aʼzolari uchun ularning murojaatlariga asosan quyidagilarni taʼminlasin:
Oʻzbekiston Respublikasi hududidagi sanatoriy-kurort muassasalari va bolalarni sogʻlomlashtirish oromgohlarida yiliga bir marta bepul sogʻlomlashtirish;
shifokorlarning retseptlariga asosan 3 oylik ehtiyojdan kelib chiqib dori vositalarini (yiliga bir marta), tibbiy va maxsus protez-ortopediya moslamalarini olib berish hamda jarrohlik amaliyotlarining xarajatlarini qoplash;
ogʻir tashxisli kasalliklari hamda nogironligi boʻlganlarga shifokorlarning retseptlariga muvofiq, yiliga bir marta dori vositalarining 50 foizigacha boʻlgan summasini kompensatsiya qilish.
4. Ushbu Farmonda (1-band “a” kichik bandining ikkinchi va uchinchi xatboshilaridan tashqari) belgilangan imtiyoz va kafolatlar 1991-yil 1-yanvardan boshlab mazkur Farmon kuchga kirgunga qadar halok boʻlgan harbiy xizmatchilar (xodimlar) oila aʼzolariga nisbatan ham tatbiq etilsin.
5. Mudofaa vazirligi, Ichki ishlar vazirligi, Favqulodda vaziyatlar vazirligi, Milliy gvardiya, Davlat xavfsizlik xizmati, Oʻzbekiston Respublikasi Prezidenti davlat xavfsizlik xizmati, Bojxona qoʻmitasi va Elektron texnologiyalarni rivojlantirish markazi har bir halok boʻlgan harbiy xizmatchilar (xodimlar) oilasini otaliqqa olsin.
Bunda:
halok boʻlgan harbiy xizmatchilarning (xodimlarning) oila aʼzolaridan xabar olinishi, ularning uy-joy bilan taʼminlanish, ishga joylashish, taʼlim olish, tibbiy va ijtimoiy xizmatlardan foydalanish hamda boshqa dolzarb masalalari oʻrganilishi hamda mavjud muammolari hal qilinishi, mazkur Farmon va boshqa qonunchilik hujjatlarida belgilangan imtiyoz hamda kafolatlardan foydalanishda amaliy yordam koʻrsatib borilishi taʼminlansin;
masʼul vazirlik va idoralarning birinchi rahbarlari mazkur bandda belgilangan vazifalarning sifatli bajarilishiga shaxsan javobgar etib belgilansin;
masʼul vazirlik va idoralarda umumiy shtatlar soni doirasida ularning birinchi rahbarlariga mazkur bandda belgilangan vazifalarni bajarishga koʻmaklashadigan maslahatchi lavozimi kiritilsin va halok boʻlgan harbiy xizmatchilarning (xodimlarning) oilalari bilan doimiy aloqani oʻrnatish uchun ishonch telefonlari ishga tushirilsin;
mazkur band ijrosi natijalari toʻgʻrisida Oʻzbekiston Respublikasi Prezidenti Administratsiyasiga har oyda axborot kiritib borilsin.
6. Mudofaa vazirligi Ichki ishlar vazirligi, Favqulodda vaziyatlar vazirligi, Milliy gvardiya, Davlat xavfsizlik xizmati, Oʻzbekiston Respublikasi Prezidenti davlat xavfsizlik xizmati, Iqtisodiyot va moliya vazirligi hamda boshqa tashkilotlar bilan birgalikda ishchi guruhlar tuzgan holda:
ikki oy muddatda mazkur Farmonning 1 , 2 va 3-bandlarida nazarda tutilgan har bir imtiyoz va kafolatni taqdim etish tartibini belgilovchi normativ-huquqiy hujjatlar loyihalarini;
2023-yil 1-dekabrga qadar “Faxriylar toʻgʻrisida”gi, “Harbiy xizmatchilar maqomi va ularni ijtimoiy himoya qilish toʻgʻrisida”gi va “Harbiy xizmatchilarning pensiya taʼminoti toʻgʻrisida”gi qonun loyihalarini ishlab chiqib, Vazirlar Mahkamasiga kiritsin.
7. Iqtisodiyot va moliya vazirligi mazkur Farmon ijrosini taʼminlash uchun 2023-yilda vazirlik va idoralarga Davlat budjetidan zarur mablagʻlarni ajratsin, 2024-yildan boshlab Davlat budjeti parametrlarini shakllantirishda zarur mablagʻlarni nazarda tutsin.
8. Axborot va ommaviy kommunikatsiyalar agentligi Oʻzbekiston Milliy axborot agentligi va Oʻzbekiston Milliy teleradiokompaniyasi bilan birgalikda ommaviy axborot vositalarida ushbu Farmonning mazmun-mohiyati va ahamiyati keng yoritilishini taʼminlasin.
9. Mazkur Farmon ijrosini samarali tashkil qilishga masʼul va shaxsiy javobgar etib mudofaa vaziri B.N. Kurbanov, ichki ishlar vaziri P.R. Bobojonov, Davlat xavfsizlik xizmati raisi A.A. Azizov, Oʻzbekiston Respublikasi Prezidenti davlat xavfsizlik xizmati raisi A.A. Usmanov va Milliy gvardiya qoʻmondoni R.M. Djurayev belgilansin.
Mazkur Farmon ijrosini har chorakda muhokama qilib borish, ijro uchun masʼul idoralar faoliyatini muvofiqlashtirish va nazorat qilish Oʻzbekiston Respublikasi Prezidenti huzuridagi Xavfsizlik kengashi kotibi V.V. Maxmudov zimmasiga yuklansin.
Oʻzbekiston Respublikasi Prezidenti Sh. MIRZIYOYEV
Toshkent sh.,
2023-yil 13-mart,
PF-34-son
Президента Республики Узбекистан
Указ
О мерах по усилению социальной поддержки членов семей военнослужащих и сотрудников, погибших во имя защиты Родины и мирной жизни народа
В целях всесторонней поддержки, проявления заботы, уважения и почтения к членам семей военнослужащих и сотрудников, погибших во имя защиты Родины и мирной жизни народа, и лицам, находившимся на их иждивении, а также дальнейшего укрепления в обществе атмосферы доброты, согласия и гуманизма:
1. Предоставить членам семей военнослужащих и сотрудников Министерства обороны, Министерства внутренних дел, Министерства по чрезвычайным ситуациям, Национальной гвардии, Службы государственной безопасности, Государственной службы безопасности Президента Республики Узбекистан, Таможенного комитета и Центра развития электронных технологий (далее — ответственные министерства и ведомства), погибших во имя защиты Родины и мирной жизни народа вследствие ранения, контузии или увечья, и лицам, находившимся на их иждивении (далее — члены семей погибших военнослужащих (сотрудников), следующие льготы и гарантии:
а) с 1 апреля 2023 года:
единовременное пособие, выплачиваемое членам семьи погибшего военнослужащего (сотрудника), установить в размере 150-кратной суммы должностного оклада по последней занимаемой должности и оклада по военному (специальному) званию погибшего;
страховую сумму, выплачиваемую в связи с гибелью военнослужащего (сотрудника) в рамках государственного обязательного личного страхования военнослужащих (сотрудников), установить в 200-кратном размере базовой расчетной величины;
наделить Совет Министров Республики Каракалпакстан, хокимияты областей и города Ташкента правом на установление порядка назначения ежемесячного пособия членам семей погибших военнослужащих (сотрудников), проживающим на соответствующей территории, за счет дополнительных источников местных бюджетов в устанавливаемом ими размере (не превышающем сумму до 50 процентов минимального размера оплаты труда);
б) с 1 мая 2023 года:
пенсию по случаю потери кормильца на каждого нетрудоспособного члена семьи установить в размере 50 процентов денежного довольствия (заработной платы), принимаемого для исчисления пенсии;
освободить членов семьи (родителей, супруга (супругу), детей, не достигших 23-летнего возраста) от налога на доходы физических лиц по доходам в размере 3-кратного минимального размера оплаты труда за каждый месяц, в котором получены эти доходы;
обеспечить жильем в первоочередном порядке в случае признания их нуждающимися в жилье в установленном порядке;
сохранить право на получение долгосрочных льготных ипотечных кредитов в соответствии с установленным законодательством порядком предоставления военнослужащим (сотрудникам) долгосрочных льготных ипотечных кредитов для приобретения (строительства) жилья;
распространить на супруга (супругу) погибшего военнослужащего (сотрудника), не вступившего в новый брак, и (или) одного из родителей, находившихся на иждивении военнослужащего (сотрудника), порядок выплаты военнослужащим Вооруженных Сил Республики Узбекистан ежемесячной денежной компенсации за наем (поднаем) жилых помещений (при отсутствии в собственности жилья).
2. Установить порядок, в соответствии с которым с 1 июня 2023 года:
а) обеспечивается воспитание детей погибших военнослужащих (сотрудников) в дошкольных образовательных учреждениях на бесплатной основе, обучение в профессиональных и высших образовательных учреждениях — по дополнительным квотам на основе государственного гранта;
б) родителям погибшего военнослужащего (сотрудника) предоставляется право на бесплатное пользование железнодорожным и воздушным пассажирским транспортом два раза в год;
в) для членов семей погибших военнослужащих (сотрудников):
сохраняется право на получение бесплатной медицинской помощи в медицинских учреждениях ответственных министерств и ведомств, в которых проходили службу эти военнослужащие (сотрудники), а также создается возможность приоритетного получения медицинской помощи в рамках гарантированных объемов медицинской помощи и внеочередной госпитализации;
за счет средств Государственного бюджета предоставляется бесплатная медицинская помощь медицинскими организациями, оказывающими высокотехнологичную специализированную медицинскую помощь;
предоставляется право на использование очередного ежегодного трудового отпуска в удобное для них время, а также получение дополнительного отпуска без сохранения заработной платы продолжительностью до двух недель в год.
3. Ответственным министерствам и ведомствам обеспечить членам семей погибших военнослужащих (сотрудников), за счет средств, выделяемых из Государственного бюджета, и внебюджетных источников на основании их обращений:
бесплатное оздоровление в санаторно-курортных учреждениях и детских оздоровительных лагерях на территории Республики Узбекистан один раз в год;
покрытие расходов по приобретению лекарственных средств (один раз в год) на основе рецептов врачей, медицинских и специальных протезно-ортопедических изделий исходя из трехмесячной потребности, а также на хирургические операции;
компенсацию до 50 процентов суммы лекарственных средств лицам с диагнозом тяжелых заболеваний и лицам с инвалидностью на основе рецептов врачей один раз в год.
4. Распространить льготы и гарантии, установленные в настоящем Указе (за исключением абзацев второго и третьего подпункта «а» пункта 1), также на членов семей военнослужащих (сотрудников), погибших в период с 1 января 1991 года до вступления в силу настоящего Указа.
5. Министерству обороны, Министерству внутренних дел, Министерству по чрезвычайным ситуациям, Национальной гвардии, Службе государственной безопасности, Государственной службе безопасности Президента Республики Узбекистан, Таможенному комитету и Центру развития электронных технологий взять под свое шефство каждую семью погибших военнослужащих (сотрудников).
При этом:
обеспечить посещение членов семей погибших военнослужащих (сотрудников), изучение вопросов обеспечения жильем, трудоустройства, получения образования, пользования медицинскими и социальными услугами, других актуальных вопросов, а также регулярное оказание им практической помощи в решении имеющихся проблем, пользовании льготами и гарантиями, установленными в настоящем Указе и иных актах законодательства;
определить первых руководителей ответственных министерств и ведомств персонально ответственными за качественное выполнение задач, установленных в настоящем пункте;
в ответственных министерствах и ведомствах ввести должность советника, оказывающего содействие их первым руководителям в выполнении задач, установленных в настоящем пункте, в пределах общей штатной численности и запустить телефоны доверия для установления постоянной связи с семьями погибших военнослужащих (сотрудников);
ежемесячно вносить в Администрацию Президента Республики Узбекистан информацию о результатах исполнения настоящего пункта.
6. Министерству обороны совместно с Министерством внутренних дел, Министерством по чрезвычайным ситуациям, Национальной гвардией, Службой государственной безопасности, Государственной службой безопасности Президента Республики Узбекистан, Министерством экономики и финансов, а также другими заинтересованными организациями, создав рабочие группы, разработать и внести в Кабинет Министров:
в двухмесячный срок — проекты нормативно-правовых актов, устанавливающие порядок предоставления каждой льготы и гарантии, предусмотренных пунктами 1 , 2 и 3 настоящего Указа;
до 1 декабря 2023 года — проекты законов «О ветеранах», «О статусе и социальной защите военнослужащих» и «О пенсионном обеспечении военнослужащих».
7. Министерству экономики и финансов для обеспечения исполнения настоящего Указа в 2023 году выделить министерствам и ведомствам необходимые средства из Государственного бюджета, с 2024 года — предусматривать необходимые средства при формировании параметров Государственного бюджета.
8. Агентству информации и массовых коммуникаций совместно с Национальным информационным агентством Узбекистана и Национальной телерадиокомпанией Узбекистана обеспечить широкое освещение сути и значения настоящего Указа в средствах массовой информации.
9. Возложить на министра обороны Б.Н. Курбанова, министра внутренних дел П.Р. Бобожонова, председателя Службы государственной безопасности А.А. Азизова, председателя Государственной службы безопасности Президента Республики Узбекистан А.А. Усманова и командующего Национальной гвардией Р.М. Джураева персональную ответственность за эффективную организацию исполнения настоящего Указа.
Ежеквартальное обсуждение хода исполнения настоящего Указа, осуществление координации и контроля за деятельностью ведомств, ответственных за его исполнение, возложить на секретаря Совета безопасности при Президенте Республики Узбекистан В.В. Махмудова.
Президент Республики Узбекистан Ш. МИРЗИЁЕВ
г. Ташкент,
13 марта 2023 г.,
№ УП-34