📅 2023-yil 1-may · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2023 йил 1 май · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 1 мая 2023 г. · Постановления Кабинета Министров
Официальный текст. Официальный документ. Редакционные примечания не включены.
📅 1 May 2023 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
Фуқаровий ва хизмат қуроли ҳамда унинг ўқ-дорилари муомаласи соҳасида лицензиялаш ва рухсат бериш тартиб-таомилларини такомиллаштириш чора-тадбирлари тўғрисида
Ўзбекистон Республикасининг «Қурол тўғрисидаги қонунчилик такомиллаштирилиши муносабати билан Ўзбекистон Республикасининг айрим қонун ҳужжатларига ўзгартиш ва қўшимчалар киритиш ҳақида» 2022 йил 31 майдаги ЎРҚ-772-сон Қонунига мувофиқ Вазирлар Маҳкамаси қарор қилади:
1. Ўзбекистон Республикасининг «Қурол тўғрисидаги қонунчилик такомиллаштирилиши муносабати билан Ўзбекистон Республикасининг айрим қонун ҳужжатларига ўзгартиш ва қўшимчалар киритиш ҳақида» 2022 йил 31 майдаги ЎРҚ-772-сон Қонуни билан фуқаровий қурол ва унинг ўқ-дорилари муомаласи бўйича талаблар кучайтирилганлиги маълумот учун қабул қилинсин.
2. Белгилансинки:
ушбу қарор қабул қилингунига қадар қурол муомаласи соҳасидаги ҳаракатларни ва (ёки) фаолиятни амалга ошириш ҳуқуқини берадиган рухсат этиш хусусиятига эга бўлган ҳужжатлар уларнинг амал қилиш муддати тугагунича ҳақиқий ҳисобланади;
ушбу қарор кучга кирганидан кейин:
а) оғиз қисмидаги қувват 7,5 жоулдан кам ва калибри 4,5 миллиметргача бўлган пневматик ов қуролини ва (ёки) оғиз қисмидаги қувват 3 жоулдан кам бўлган пневматик спорт қуролини таъмирлаш ва реализация қилиш билан шуғулланувчи шахслар ўз фаолиятини Ўзбекистон Республикаси Ички ишлар вазирлигининг тегишли лицензияси асосида амалга оширади;
б) оғиз қисмидаги қувват 7,5 жоулдан кам ва калибри 4,5 миллиметргача бўлган пневматик ов қуролидан ва (ёки) оғиз қисмидаги қувват 3 жоулдан кам бўлган пневматик спорт қуролидан фойдаланиш учун мўлжалланган тирлар ва ўқотиш майдонлари ўз фаолиятини ҳудудий ички ишлар органларининг қуролни сақлашга доир рухсатномаси асосида амалга оширади;
в) юридик ва жисмоний шахслардаги мавжуд оғиз қисмидаги қувват 7,5 жоулдан кам ва калибри 4,5 миллиметргача бўлган пневматик ов қуроли ва (ёки) оғиз қисмидаги қувват 3 жоулдан кам бўлган пневматик спорт қуроли белгиланган тартибда ички ишлар органларида рўйхатга қўйилади ҳамда уларга ички ишлар органлари томонидан қуролни сақлаш ва олиб юришга доир рухсатнома берилади;
г) «Қурол тўғрисида»ги Ўзбекистон Республикаси Қонунига мувофиқ Ўзбекистон Республикаси ҳудудида фуқаровий қурол сифатида муомаласи тақиқланган, махсус таъмирлаш ишларини амалга оширмасдан туриб ўқ узиш имкониятини истисно этадиган ўқув қуроли ҳамда вазн-ўлчамли қурол, шунингдек, нур-товушли таъсирга эга патрон билан ўқ узишни имитация қилиш учун мўлжалланган, махсус таъмирлаш ишларини амалга оширмасдан туриб бошқа турдаги патронлар билан ўқ узиш имкониятини истисно этадиган пахтавон қурол ва унинг ўқ-дорилари фуқаролар томонидан ички ишлар органларига текин топширилади, белгиланган тартибда йўқ қилинади ёки махсус органлар ва ҳарбий тузилмалар коллекцияларига топширилади;
д) фуқаролар учун пневматик калта стволли қурол ва ташқи томондан автоматик қурол нусхаларига (репликаларига) ўхшаш пневматик қуролнинг фақат спорт объектларида ички ишлар органларининг рухсатномалари асосида сақланишига ва улардан фойдаланишга йўл қўйилади. Фуқаро томонидан ушбу қуролни сақлашга доир рухсатномани олиш ёки ички ишлар органлари томонидан рухсатномани бериш рад этилган тақдирда, қурол фуқаровий ва хизмат қуролини ҳамда унинг ўқ-дориларини реализация қилиш учун лицензияга эга бўлган юридик шахслар орқали реализация қилинади ёки ушбу банднинг «г» кичик бандида белгиланган тартибда ички ишлар органларига топширилади.
4. Ўзбекистон Республикаси Ички ишлар вазирлиги манфаатдор вазирликлар ва идоралар билан биргаликда:
бир ой муддатда ушбу қарорнинг мақсади, моҳияти ва амалий аҳамиятини кенг ёритиш бўйича тадбирлар ташкил этилишини ҳамда амалга оширилишини таъминласин;
ўзлари қабул қилган норматив-ҳуқуқий ҳужжатларни икки ой муддатда ушбу қарорга мувофиқлаштирсин.
5. Мазкур қарорнинг бажарилишини назорат қилиш Ўзбекистон Республикаси ички ишлар вазири П.Р. Бобожонов зиммасига юклансин.
Ўзбекистон Республикасининг Бош вазири А. АРИПОВ
Тошкент ш.,
2023 йил 1 май,
175-сон
Oʻzbekiston Respublikasi Vazirlar Mahkamasining
qarori
Fuqaroviy va xizmat quroli hamda uning oʻq-dorilari muomalasi sohasida litsenziyalash va ruxsat berish tartib-taomillarini takomillashtirish chora-tadbirlari toʻgʻrisida
Oʻzbekiston Respublikasining “Qurol toʻgʻrisidagi qonunchilik takomillashtirilishi munosabati bilan Oʻzbekiston Respublikasining ayrim qonun hujjatlariga oʻzgartish va qoʻshimchalar kiritish haqida” 2022-yil 31-maydagi OʻRQ-772-son Qonuniga muvofiq Vazirlar Mahkamasi qaror qiladi:
1. Oʻzbekiston Respublikasining “Qurol toʻgʻrisidagi qonunchilik takomillashtirilishi munosabati bilan Oʻzbekiston Respublikasining ayrim qonun hujjatlariga oʻzgartish va qoʻshimchalar kiritish haqida” 2022-yil 31-maydagi OʻRQ-772-son Qonuni bilan fuqaroviy qurol va uning oʻq-dorilari muomalasi boʻyicha talablar kuchaytirilganligi maʼlumot uchun qabul qilinsin.
2. Belgilansinki:
ushbu qaror qabul qilinguniga qadar qurol muomalasi sohasidagi harakatlarni va (yoki) faoliyatni amalga oshirish huquqini beradigan ruxsat etish xususiyatiga ega boʻlgan hujjatlar ularning amal qilish muddati tugagunicha haqiqiy hisoblanadi;
ushbu qaror kuchga kirganidan keyin:
a) ogʻiz qismidagi quvvat 7,5 jouldan kam va kalibri 4,5 millimetrgacha boʻlgan pnevmatik ov qurolini va (yoki) ogʻiz qismidagi quvvat 3 jouldan kam boʻlgan pnevmatik sport qurolini taʼmirlash va realizatsiya qilish bilan shugʻullanuvchi shaxslar oʻz faoliyatini Oʻzbekiston Respublikasi Ichki ishlar vazirligining tegishli litsenziyasi asosida amalga oshiradi;
b) ogʻiz qismidagi quvvat 7,5 jouldan kam va kalibri 4,5 millimetrgacha boʻlgan pnevmatik ov qurolidan va (yoki) ogʻiz qismidagi quvvat 3 jouldan kam boʻlgan pnevmatik sport qurolidan foydalanish uchun moʻljallangan tirlar va oʻqotish maydonlari oʻz faoliyatini hududiy ichki ishlar organlarining qurolni saqlashga doir ruxsatnomasi asosida amalga oshiradi;
v) yuridik va jismoniy shaxslardagi mavjud ogʻiz qismidagi quvvat 7,5 jouldan kam va kalibri 4,5 millimetrgacha boʻlgan pnevmatik ov quroli va (yoki) ogʻiz qismidagi quvvat 3 jouldan kam boʻlgan pnevmatik sport quroli belgilangan tartibda ichki ishlar organlarida roʻyxatga qoʻyiladi hamda ularga ichki ishlar organlari tomonidan qurolni saqlash va olib yurishga doir ruxsatnoma beriladi;
g) “Qurol toʻgʻrisida”gi Oʻzbekiston Respublikasi Qonuniga muvofiq Oʻzbekiston Respublikasi hududida fuqaroviy qurol sifatida muomalasi taqiqlangan, maxsus taʼmirlash ishlarini amalga oshirmasdan turib oʻq uzish imkoniyatini istisno etadigan oʻquv quroli hamda vazn-oʻlchamli qurol, shuningdek, nur-tovushli taʼsirga ega patron bilan oʻq uzishni imitatsiya qilish uchun moʻljallangan, maxsus taʼmirlash ishlarini amalga oshirmasdan turib boshqa turdagi patronlar bilan oʻq uzish imkoniyatini istisno etadigan paxtavon qurol va uning oʻq-dorilari fuqarolar tomonidan ichki ishlar organlariga tekin topshiriladi, belgilangan tartibda yoʻq qilinadi yoki maxsus organlar va harbiy tuzilmalar kolleksiyalariga topshiriladi;
d) fuqarolar uchun pnevmatik kalta stvolli qurol va tashqi tomondan avtomatik qurol nusxalariga (replikalariga) oʻxshash pnevmatik qurolning faqat sport obyektlarida ichki ishlar organlarining ruxsatnomalari asosida saqlanishiga va ulardan foydalanishga yoʻl qoʻyiladi. Fuqaro tomonidan ushbu qurolni saqlashga doir ruxsatnomani olish yoki ichki ishlar organlari tomonidan ruxsatnomani berish rad etilgan taqdirda, qurol fuqaroviy va xizmat qurolini hamda uning oʻq-dorilarini realizatsiya qilish uchun litsenziyaga ega boʻlgan yuridik shaxslar orqali realizatsiya qilinadi yoki ushbu bandning “g” kichik bandida belgilangan tartibda ichki ishlar organlariga topshiriladi.
4. Oʻzbekiston Respublikasi Ichki ishlar vazirligi manfaatdor vazirliklar va idoralar bilan birgalikda:
bir oy muddatda ushbu qarorning maqsadi, mohiyati va amaliy ahamiyatini keng yoritish boʻyicha tadbirlar tashkil etilishini hamda amalga oshirilishini taʼminlasin;
oʻzlari qabul qilgan normativ-huquqiy hujjatlarni ikki oy muddatda ushbu qarorga muvofiqlashtirsin.
5. Mazkur qarorning bajarilishini nazorat qilish Oʻzbekiston Respublikasi ichki ishlar vaziri P.R. Bobojonov zimmasiga yuklansin.
Oʻzbekiston Respublikasining Bosh vaziri A. ARIPOV
Toshkent sh.,
2023-yil 1-may,
175-son