📅 2023-yil 25-may · Vazirlik va idoralar hujjatlari · Sogʻliqni saqlash vaziri
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2023 йил 25 май · Вазирлик ва идоралар ҳужжатлари · Соғлиқни сақлаш вазири
Расмий матн. Расмий ҳужжат. Таҳририй изоҳлар киритилмаган.
📅 25 мая 2023 г. · Документы министерств и ведомств · Министр здравоохранения
Официальный текст. Официальный документ. Редакционные примечания не включены.
📅 25 May 2023 · Ministry and agency documents · Sogʻliqni saqlash vaziri
Official text. Official document. Editorial notes are not included.
Ўзбекистон Республикаси соғлиқни сақлаш вазирининг
буйруғи
НИЗОМ
Алоҳида ҳолатларда тиббиёт муассасасида беморлар томонидан олиб келинган дори воситалари ва тиббий жиҳозларни ишлатишга рухсат бериш тартиби тўғрисидаги низомни тасдиқлаш ҳақида
Ўзбекистон Республикаси Президентининг 2022 йил 26 октябрдаги ПҚ-411-сон «Аҳолини сифатли дори воситалари ва тиббий буюмлар билан таъминлаш юзасидан қўшимча чора-тадбирлар тўғрисида» қарорига мувофиқ буюраман:
1. Алоҳида ҳолатларда тиббиёт муассасасида беморлар томонидан олиб келинган дори воситалари ва тиббий жиҳозларни ишлатишга рухсат бериш тартиби тўғрисидаги низом иловага мувофиқ тасдиқлансин.
2. Мазкур буйруқ расмий эълон қилинган кундан эътиборан кучга киради.
Ўзбекистон Республикаси соғлиқни сақлаш вазирининг 2023 йил 25 майдаги 13-сон буйруғига ИЛОВА
Алоҳида ҳолатларда тиббиёт муассасасида беморлар томонидан олиб келинган дори воситалари ва тиббий жиҳозларни ишлатишга рухсат бериш тартиби тўғрисидаги
Мазкур Низом алоҳида ҳолатларда тиббиёт муассасасида беморлар томонидан олиб келинган дори воситалари ва тиббий жиҳозларни ишлатишга рухсат бериш тартибини белгилайди.
1-боб. Умумий қоидалар
1. Мазкур Низом Ўзбекистон Республикаси Президентининг «Соғлиқни сақлаш соҳасида ихтисослаштирилган тиббий ёрдам кўрсатиш тизимини янада такомиллаштириш чора-тадбирлари тўғрисида» 2021 йил 28 июлдаги ПҚ-5199-сон қарорига мувофиқ Давлат тиббий суғуртаси жамғармаси орқали молиялаштириш тизимига ўтказилган республика даражасидаги давлат стационар тиббиёт муассасаларида (бундан буён матнда тиббиёт муассасаси деб юритилади) алоҳида ҳолатларда беморлар томонидан олиб келинган дори воситалари ва тиббий жиҳозларни ишлатишга нисбатан татбиқ этилади.
2. Ушбу Низомда қуйидаги асосий тушунчалар қўлланилади:
алоҳида ҳолатлар — тиббиёт муассасасига даволаниш учун келган беморлар томонидан уларнинг тегишли асосий касалликларини, шунингдек уларда олдиндан мавжуд бўлган ёндош сурункали ва атрофдагилар учун хавф туғдирадиган касалликларни даволаш учун шифокор томонидан ёзилган рецепт асосида шу кунга қадар қабул қилаётган дори воситалари ва тиббий жиҳозларнинг тиббиёт муассасасига фойдаланиш мақсадида олиб келиниши;
ёндош сурункали ва атрофдагилар учун хавф туғдирадиган касалликлар — сил, ўсма касалликлари, жинсий йўл билан ўтадиган касалликлар, орттирилган иммунитет танқислиги синдроми, мохов, руҳий касалликлар, юрак-қон томир касалликлари, эндокринологик ва наркологик касалликлар.
3. Тиббиёт муассасасида беморларни дори воситалари ва тиббий жиҳозлар билан таъминлаш харажатлар сметаси бўйича ажратилиши кўзда тутилган маблағлар ҳисобидан кафолатланган тиббий хизматлар ва дори воситалари пакети доирасида бепул, қолган ҳолларда пуллик асосда шифохонага кирим қилинган нархларда амалга оширилади.
Бунда, беморлар тиббиёт муассасасига даволаниш учун келганда, улар ўзларининг асосий касалликларини, шунингдек уларда олдиндан мавжуд бўлган ёндош сурункали ва атрофдагилар учун хавф туғдирадиган касалликларни даволаш учун шифокор томонидан ёзилган рецепт асосида шу кунга қадар қабул қилаётган дори воситалари ва тиббий жиҳозларни (бундан буён матнда дори воситалари ва тиббий жиҳозлар деб юритилади) тиббиёт муассасасига фойдаланиш мақсадида олиб келиши мумкин.
2-боб. Беморлар томонидан олиб келинган дори воситалари ва тиббий жиҳозларни ишлатишга рухсат бериш, уларни сақлаш ва қўллаш
4. Беморлар томонидан тиббиёт муассасасига олиб келинган дори воситалари ва тиббий жиҳозларни ишлатишга рухсат беришда даволовчи шифокор томонидан:
ушбу дори воситалари ва тиббий жиҳозларнинг шифокор томонидан ёзилган рецептда кўрсатилганлиги;
дори воситалари ва тиббий жиҳозларнинг ўрамида кўрсатилган яроқлилик муддати, бирламчи ва иккиламчи ўрамдаги маълумотларнинг мос келиши, ташқи кўринишининг бутлиги;
беморнинг хозирги холатидаги касалликнинг тури ва оғирлик даражаси, касалликнинг кечиши, беморнинг ёши, вазни, шунингдек дори воситаларининг тиббиётда қўлланилишига доир йўриқномаларида кўрсатилган қарши кўрсатмалар, ножўя таъсирлар ҳамда дори воситаларининг ўзаро таъсирлашуви тўғрисидаги маълумотлар текширилади.
Бунда, беморлар томонидан тиббиёт муассасасига олиб келинган дори воситалари ва тиббий жиҳозлар ушбу банднинг иккинчи — тўртинчи хатбошиларида назарда тутилган талабларга жавоб берганда, даволовчи шифокор томонидан шу тиббиёт муассасасининг тор мутахассиси билан маслаҳатлашилган ҳолда мазкур дори воситалари ва тиббий жиҳозларни ишлатишга рухсат берилади.
5. Бемор томонидан олиб келинган дори воситалари ва тиббий жиҳозлар Мазкур Низомнинг 4-банди иккинчи — тўртинчи хатбошиларида назарда тутилган талабларга жавоб бермаса, ушбу дори воситалари ва тиббий жиҳозларни ишлатишга рухсат берилмайди.
6. Беморлар томонидан олиб келинган ва алоҳида сақлаш шароитларини талаб этмайдиган дори воситалари ва тиббий жиҳозлар бемор жойлаштирилган хонада сақланади.
Алоҳида сақлаш шароитларини талаб этадиган дори воситалари ва тиббий жиҳозлар эса тиббиёт муассасасининг муолажа хонасида (шу жумладан ушбу хонадаги музлатгичда) сақланади.
7. Тиббиёт муассасасининг даволовчи шифокори беморлар томонидан олиб келинган дори воситалари ва тиббий жиҳозларнинг сарфланиши бўйича маълумотларни ҳар куни касаллик тарихига қайд этиб боради ҳамда киритилган маълумотларнинг тўғрилиги учун жавобгар ҳисобланади.
3-боб. Тиббиёт муассасаси ходимлари (даволовчи шифокор, бўлим ҳамшираси) ва беморларнинг дори воситалари ва тиббий жиҳозларни тиббиёт муассасасига олиб келиниши ҳамда ишлатилишидаги ҳуқуқ ва мажбуриятлари
8. Қуйидагилар тиббиёт муассасаси ходимлари (даволовчи шифокор ҳамда бўлим ҳамшираси)нинг ҳуқуқлари ҳисобланади:
беморлар томонидан тиббиёт муассасасига олиб келинган дори воситалари ва тиббий жиҳозлар алоҳида сақлаш шароитларини талаб этадиган бўлса, ушбу дори воситалари ва тиббий жиҳозларни тиббиёт муассасасининг муолажа хонасида (шу жумладан ушбу хонадаги музлатгичда) сақлаш учун беморлардан талаб қилиб олиш;
беморлар томонидан тиббиёт муассасасига шифокор рецептида кўрсатилмаган дори воситалари ва тиббий жиҳозлар олиб келинган тақдирда, ушбу дори воситалари ва тиббий жиҳозларни тиббиёт муассасасига қабул қилмаслик ҳамда ишлатишга рухсат бермаслик.
9. Қуйидагилар тиббиёт муассасаси ходимлари (даволовчи шифокор ҳамда бўлим ҳамшираси)нинг мажбуриятлари ҳисобланади:
бемор томонидан олиб келинган дори воситалари ва тиббий жиҳозлар алоҳида сақлаш шароитларини талаб этадиган бўлса, ушбу дори воситалари ва тиббий жиҳозларни тиббиёт муассасасининг муолажа хонасида (шу жумладан ушбу хонадаги музлатгичда) сақлаш;
бемор томонидан олиб келинган дори воситалари ва тиббий жиҳозлар тиббиёт муассасасининг дори воситалари ва тиббий жиҳозлари, шунингдек бошқа бемор томонидан олиб келинган дори воситалари ва тиббий буюмлар билан аралашиб кетмаслигини таъминлаш;
10. Беморларнинг ҳуқуқлари қуйидагилар ҳисобланади:
мазкур Низомнинг 4-банди иккинчи — тўртинчи хатбошиларида назарда тутилган талабларга жавоб берадиган дори воситалари ва тиббий жиҳозларни ўзлари билан тиббиёт муассасасига олиб келиш;
ўзлари билан олиб келган дори воситалари ва тиббий жиҳозлар алоҳида сақлаш шароитларини талаб этадиган бўлса, ушбу дори воситалари ва тиббий жиҳозларни тиббиёт муассасасининг муолажа хонасида (шу жумладан ушбу хонадаги музлатгичда) сақланишини тиббиёт муассасаси ходимлари (даволовчи шифокор ҳамда бўлим ҳамшираси)дан талаб қилиш;
ўзлари билан олиб келган ҳамда тиббиёт муассасасининг муолажа хонасида (шу жумладан ушбу хонадаги музлатгичда) сақланган дори воситалари ва тиббий жиҳозларни тиббиёт муассасаси ходимларидан (бош шифокор, бўлим ҳамшираси) талаб қилиб олиш.
11. Беморларнинг мажбуриятлари қуйидагилар ҳисобланади:
ўзлари билан олиб келган дори воситалари ва тиббий жиҳозларни (агар улар алоҳида сақлаш шароитларини талаб этмаса) тиббиёт муассасаси ходимлари (даволовчи шифокор ҳамда бўлим ҳамшираси)нинг текширувидан ўтказган ҳолда муолажа хонасида сақлаш чорасини кўриш;
ўзлари билан олиб келган дори воситалари ва тиббий жиҳозларни (агар улар алоҳида сақлаш шароитларини талаб этса) тиббиёт муассасасининг муолажа хонасида (шу жумладан ушбу хонадаги музлатгичда) сақлаш учун тиббиёт муассасаси ходимлари (даволовчи шифокор, бўлим ҳамшираси)га топшириш.
4-боб. Якунловчи қоида
12. Ушбу Низом талабларининг бузилишида айбдор бўлган шахслар қонунчилик ҳужжатларига мувофиқ жавобгар бўлади.
Вазир А. ИНОЯТОВ
Тошкент ш.,
2023 йил 25 май,
13-сон
Oʻzbekiston Respublikasi sogʻliqni saqlash vazirining
buyrugʻi
NIZOM
Alohida holatlarda tibbiyot muassasasida bemorlar tomonidan olib kelingan dori vositalari va tibbiy jihozlarni ishlatishga ruxsat berish tartibi toʻgʻrisidagi nizomni tasdiqlash haqida
Oʻzbekiston Respublikasi Prezidentining 2022-yil 26-oktabrdagi PQ-411-son “Aholini sifatli dori vositalari va tibbiy buyumlar bilan taʼminlash yuzasidan qoʻshimcha chora-tadbirlar toʻgʻrisida” qaroriga muvofiq buyuraman:
1. Alohida holatlarda tibbiyot muassasasida bemorlar tomonidan olib kelingan dori vositalari va tibbiy jihozlarni ishlatishga ruxsat berish tartibi toʻgʻrisidagi nizom ilovaga muvofiq tasdiqlansin.
2. Mazkur buyruq rasmiy eʼlon qilingan kundan eʼtiboran kuchga kiradi.
Oʻzbekiston Respublikasi sogʻliqni saqlash vazirining 2023-yil 25-maydagi 13-son buyrugʻiga ILOVA
Alohida holatlarda tibbiyot muassasasida bemorlar tomonidan olib kelingan dori vositalari va tibbiy jihozlarni ishlatishga ruxsat berish tartibi toʻgʻrisidagi
Mazkur Nizom alohida holatlarda tibbiyot muassasasida bemorlar tomonidan olib kelingan dori vositalari va tibbiy jihozlarni ishlatishga ruxsat berish tartibini belgilaydi.
1-bob. Umumiy qoidalar
1. Mazkur Nizom Oʻzbekiston Respublikasi Prezidentining “Sogʻliqni saqlash sohasida ixtisoslashtirilgan tibbiy yordam koʻrsatish tizimini yanada takomillashtirish chora-tadbirlari toʻgʻrisida” 2021-yil 28-iyuldagi PQ-5199-son qaroriga muvofiq Davlat tibbiy sugʻurtasi jamgʻarmasi orqali moliyalashtirish tizimiga oʻtkazilgan respublika darajasidagi davlat statsionar tibbiyot muassasalarida (bundan buyon matnda tibbiyot muassasasi deb yuritiladi) alohida holatlarda bemorlar tomonidan olib kelingan dori vositalari va tibbiy jihozlarni ishlatishga nisbatan tatbiq etiladi.
2. Ushbu Nizomda quyidagi asosiy tushunchalar qoʻllaniladi:
alohida holatlar — tibbiyot muassasasiga davolanish uchun kelgan bemorlar tomonidan ularning tegishli asosiy kasalliklarini, shuningdek ularda oldindan mavjud boʻlgan yondosh surunkali va atrofdagilar uchun xavf tugʻdiradigan kasalliklarni davolash uchun shifokor tomonidan yozilgan retsept asosida shu kunga qadar qabul qilayotgan dori vositalari va tibbiy jihozlarning tibbiyot muassasasiga foydalanish maqsadida olib kelinishi;
yondosh surunkali va atrofdagilar uchun xavf tugʻdiradigan kasalliklar — sil, oʻsma kasalliklari, jinsiy yoʻl bilan oʻtadigan kasalliklar, orttirilgan immunitet tanqisligi sindromi, moxov, ruhiy kasalliklar, yurak-qon tomir kasalliklari, endokrinologik va narkologik kasalliklar.
3. Tibbiyot muassasasida bemorlarni dori vositalari va tibbiy jihozlar bilan taʼminlash xarajatlar smetasi boʻyicha ajratilishi koʻzda tutilgan mablagʻlar hisobidan kafolatlangan tibbiy xizmatlar va dori vositalari paketi doirasida bepul, qolgan hollarda pullik asosda shifoxonaga kirim qilingan narxlarda amalga oshiriladi.
Bunda, bemorlar tibbiyot muassasasiga davolanish uchun kelganda, ular oʻzlarining asosiy kasalliklarini, shuningdek ularda oldindan mavjud boʻlgan yondosh surunkali va atrofdagilar uchun xavf tugʻdiradigan kasalliklarni davolash uchun shifokor tomonidan yozilgan retsept asosida shu kunga qadar qabul qilayotgan dori vositalari va tibbiy jihozlarni (bundan buyon matnda dori vositalari va tibbiy jihozlar deb yuritiladi) tibbiyot muassasasiga foydalanish maqsadida olib kelishi mumkin.
2-bob. Bemorlar tomonidan olib kelingan dori vositalari va tibbiy jihozlarni ishlatishga ruxsat berish, ularni saqlash va qoʻllash
4. Bemorlar tomonidan tibbiyot muassasasiga olib kelingan dori vositalari va tibbiy jihozlarni ishlatishga ruxsat berishda davolovchi shifokor tomonidan:
ushbu dori vositalari va tibbiy jihozlarning shifokor tomonidan yozilgan retseptda koʻrsatilganligi;
dori vositalari va tibbiy jihozlarning oʻramida koʻrsatilgan yaroqlilik muddati, birlamchi va ikkilamchi oʻramdagi maʼlumotlarning mos kelishi, tashqi koʻrinishining butligi;
bemorning xozirgi xolatidagi kasallikning turi va ogʻirlik darajasi, kasallikning kechishi, bemorning yoshi, vazni, shuningdek dori vositalarining tibbiyotda qoʻllanilishiga doir yoʻriqnomalarida koʻrsatilgan qarshi koʻrsatmalar, nojoʻya taʼsirlar hamda dori vositalarining oʻzaro taʼsirlashuvi toʻgʻrisidagi maʼlumotlar tekshiriladi.
Bunda, bemorlar tomonidan tibbiyot muassasasiga olib kelingan dori vositalari va tibbiy jihozlar ushbu bandning ikkinchi — toʻrtinchi xatboshilarida nazarda tutilgan talablarga javob berganda, davolovchi shifokor tomonidan shu tibbiyot muassasasining tor mutaxassisi bilan maslahatlashilgan holda mazkur dori vositalari va tibbiy jihozlarni ishlatishga ruxsat beriladi.
5. Bemor tomonidan olib kelingan dori vositalari va tibbiy jihozlar Mazkur Nizomning 4-bandi ikkinchi — toʻrtinchi xatboshilarida nazarda tutilgan talablarga javob bermasa, ushbu dori vositalari va tibbiy jihozlarni ishlatishga ruxsat berilmaydi.
6. Bemorlar tomonidan olib kelingan va alohida saqlash sharoitlarini talab etmaydigan dori vositalari va tibbiy jihozlar bemor joylashtirilgan xonada saqlanadi.
Alohida saqlash sharoitlarini talab etadigan dori vositalari va tibbiy jihozlar esa tibbiyot muassasasining muolaja xonasida (shu jumladan ushbu xonadagi muzlatgichda) saqlanadi.
7. Tibbiyot muassasasining davolovchi shifokori bemorlar tomonidan olib kelingan dori vositalari va tibbiy jihozlarning sarflanishi boʻyicha maʼlumotlarni har kuni kasallik tarixiga qayd etib boradi hamda kiritilgan maʼlumotlarning toʻgʻriligi uchun javobgar hisoblanadi.
3-bob. Tibbiyot muassasasi xodimlari (davolovchi shifokor, boʻlim hamshirasi) va bemorlarning dori vositalari va tibbiy jihozlarni tibbiyot muassasasiga olib kelinishi hamda ishlatilishidagi huquq va majburiyatlari
8. Quyidagilar tibbiyot muassasasi xodimlari (davolovchi shifokor hamda boʻlim hamshirasi)ning huquqlari hisoblanadi:
bemorlar tomonidan tibbiyot muassasasiga olib kelingan dori vositalari va tibbiy jihozlar alohida saqlash sharoitlarini talab etadigan boʻlsa, ushbu dori vositalari va tibbiy jihozlarni tibbiyot muassasasining muolaja xonasida (shu jumladan ushbu xonadagi muzlatgichda) saqlash uchun bemorlardan talab qilib olish;
bemorlar tomonidan tibbiyot muassasasiga shifokor retseptida koʻrsatilmagan dori vositalari va tibbiy jihozlar olib kelingan taqdirda, ushbu dori vositalari va tibbiy jihozlarni tibbiyot muassasasiga qabul qilmaslik hamda ishlatishga ruxsat bermaslik.
9. Quyidagilar tibbiyot muassasasi xodimlari (davolovchi shifokor hamda boʻlim hamshirasi)ning majburiyatlari hisoblanadi:
bemor tomonidan olib kelingan dori vositalari va tibbiy jihozlar alohida saqlash sharoitlarini talab etadigan boʻlsa, ushbu dori vositalari va tibbiy jihozlarni tibbiyot muassasasining muolaja xonasida (shu jumladan ushbu xonadagi muzlatgichda) saqlash;
bemor tomonidan olib kelingan dori vositalari va tibbiy jihozlar tibbiyot muassasasining dori vositalari va tibbiy jihozlari, shuningdek boshqa bemor tomonidan olib kelingan dori vositalari va tibbiy buyumlar bilan aralashib ketmasligini taʼminlash;
10. Bemorlarning huquqlari quyidagilar hisoblanadi:
mazkur Nizomning 4-bandi ikkinchi — toʻrtinchi xatboshilarida nazarda tutilgan talablarga javob beradigan dori vositalari va tibbiy jihozlarni oʻzlari bilan tibbiyot muassasasiga olib kelish;
oʻzlari bilan olib kelgan dori vositalari va tibbiy jihozlar alohida saqlash sharoitlarini talab etadigan boʻlsa, ushbu dori vositalari va tibbiy jihozlarni tibbiyot muassasasining muolaja xonasida (shu jumladan ushbu xonadagi muzlatgichda) saqlanishini tibbiyot muassasasi xodimlari (davolovchi shifokor hamda boʻlim hamshirasi)dan talab qilish;
oʻzlari bilan olib kelgan hamda tibbiyot muassasasining muolaja xonasida (shu jumladan ushbu xonadagi muzlatgichda) saqlangan dori vositalari va tibbiy jihozlarni tibbiyot muassasasi xodimlaridan (bosh shifokor, boʻlim hamshirasi) talab qilib olish.
11. Bemorlarning majburiyatlari quyidagilar hisoblanadi:
oʻzlari bilan olib kelgan dori vositalari va tibbiy jihozlarni (agar ular alohida saqlash sharoitlarini talab etmasa) tibbiyot muassasasi xodimlari (davolovchi shifokor hamda boʻlim hamshirasi)ning tekshiruvidan oʻtkazgan holda muolaja xonasida saqlash chorasini koʻrish;
oʻzlari bilan olib kelgan dori vositalari va tibbiy jihozlarni (agar ular alohida saqlash sharoitlarini talab etsa) tibbiyot muassasasining muolaja xonasida (shu jumladan ushbu xonadagi muzlatgichda) saqlash uchun tibbiyot muassasasi xodimlari (davolovchi shifokor, boʻlim hamshirasi)ga topshirish.
4-bob. Yakunlovchi qoida
12. Ushbu Nizom talablarining buzilishida aybdor boʻlgan shaxslar qonunchilik hujjatlariga muvofiq javobgar boʻladi.
Vazir A. INOYATOV
Toshkent sh.,
2023-yil 25-may,
13-son