📅 2023-yil 1-iyun · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2023 йил 1 июнь · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 1 июня 2023 г. · Постановления Кабинета Министров
Официальный текст. Официальный документ. Редакционные примечания не включены.
📅 1 June 2023 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
Вазирлар Маҳкамасининг «Жаҳон банки иштирокида «Институционал салоҳиятни ошириш» лойиҳасини амалга ошириш чора-тадбирлари тўғрисида» 2020 йил 30 октябрдаги 668-сон қарорига ўзгартиришлар ва қўшимча киритиш ҳақида
Кейинги йилларда мамлакатимизда олиб борилаётган кенг кўламли институционал ислоҳотларда иштирок этиш учун халқаро молия институтларини фаол жалб қилиш, уларнинг молиявий ва техник кўмагидан оқилона фойдаланиш орқали ислоҳотларни янада чуқурлаштириш, шунингдек, илғор халқаро тажрибаларни самарали қўллаш асосида институционал салоҳиятни мустаҳкамлашга қаратилган чора-тадбирлар амалга оширилмоқда.
Хусусан, Жаҳон банки иштирокида «Институционал салоҳиятни ошириш» лойиҳасини амалга ошириш учун Ўзбекистон Республикаси ва Халқаро тараққиёт уюшмаси ўртасида эришилган келишувга мувофиқ 30 йил муддатга 5 йиллик имтиёзли давр билан 33,0 млн АҚШ доллари миқдорида қарз, шунингдек, мазкур лойиҳа доирасида 250 минг АҚШ доллари миқдорида техник кўмак жалб қилинган.
Ўзбекистон Республикаси Президентининг «Янги Ўзбекистон маъмурий ислоҳотларини амалга ошириш чора-тадбирлари тўғрисида» 2022 йил 21 декабрдаги ПФ-269-сон Фармони ҳамда «Давлат иштирокидаги корхоналарни ислоҳ қилиш жараёнларини жадаллаштириш чора-тадбирлари тўғрисида» 2023 йил 1 мартдаги ПҚ-83-сон қарорига мувофиқ, шунингдек, Жаҳон банки иштирокидаги «Институционал салоҳиятни ошириш» лойиҳаси амалга оширилишини самарали мувофиқлаштириш мақсадида Вазирлар Маҳкамаси қарор қилади:
1. Вазирлар Маҳкамасининг «Жаҳон банки иштирокида «Институционал салоҳиятни ошириш» лойиҳасини амалга ошириш чора-тадбирлари тўғрисида» 2020 йил 30 октябрдаги 668-сон қарорига қуйидагиларни назарда тутувчи ўзгартиришлар ва қўшимча киритилсин:
Жаҳон банки иштирокида «Институционал салоҳиятни ошириш» лойиҳасини Ўзбекистон Республикаси Президенти ҳузуридаги Стратегик ислоҳотлар агентлиги томонидан мувофиқлаштириш;
Ўзбекистон Республикаси Президенти ҳузуридаги Стратегик ислоҳотлар агентлигига лойиҳанинг умумий қиймати доирасида йўналишлар бўйича ажратиладиган маблағлар миқдорларига ўзгартириш киритиш ҳамда йўналишлар бўйича амалга ошириладиган ишлар ёйилмасини тасдиқлаш ҳуқуқини бериш.
2. Ўзбекистон Республикаси Иқтисодиёт ва молия вазирлиги «Институционал салоҳиятни ошириш» лойиҳаси бўйича қарз битими ва ушбу лойиҳа доирасида тузилган шартномаларга тегишли ўзгартиришлар киритилишини таъминласин.
3. Ўзбекистон Республикаси Иқтисодиёт ва молия вазирлигида «Институционал салоҳиятни ошириш» лойиҳаси доирасида тузилган Лойиҳани амалга ошириш гуруҳи амалдаги молиялаштириш тартиби сақланган ҳолда, Ўзбекистон Республикаси Президенти ҳузуридаги Стратегик ислоҳотлар агентлигининг бўйсунувига ўтказилсин.
4. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосари Ж.А. Ходжаев зиммасига юклансин.
Вазирлар Маҳкамасининг 2023 йил 1 июндаги 225-сон қарорига ИЛОВА
Вазирлар Маҳкамасининг «Жаҳон банки иштирокида «Институционал салоҳиятни ошириш» лойиҳасини амалга ошириш чора-тадбирлари тўғрисида» 2020 йил 30 октябрдаги 668-сон қарорига киритилаётган ўзгартиришлар ва қўшимча
1. 3-банд қуйидаги мазмундаги тўртинчи хатбоши билан тўлдирилсин:
«Лойиҳанинг амалга оширилишини самарали ташкил этиш ва назорат қилиш, шунингдек, манфаатдор вазирлик ва идоралар ҳамда давлат иштирокидаги корхоналарнинг Лойиҳа доирасидаги фаолияти Ўзбекистон Республикаси Президенти ҳузуридаги Стратегик ислоҳотлар агентлиги томонидан мувофиқлаштирилади».
2. 4-банддаги «Ўзбекистон Республикаси молия вазирига» сўзлари «Ўзбекистон Республикаси Президенти ҳузуридаги Стратегик ислоҳотлар агентлиги бош директорига» сўзлари билан алмаштирилсин.
3. 5-банд қуйидаги таҳрирда баён этилсин:
«5. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосари Ж.А. Ходжаев зиммасига юклансин».
Ўзбекистон Республикасининг Бош вазири А. АРИПОВ
Тошкент ш.,
2023 йил 1 июнь,
225-сон
Oʻzbekiston Respublikasi Vazirlar Mahkamasining
qarori
Vazirlar Mahkamasining “Jahon banki ishtirokida “Institutsional salohiyatni oshirish” loyihasini amalga oshirish chora-tadbirlari toʻgʻrisida” 2020-yil 30-oktabrdagi 668-son qaroriga oʻzgartirishlar va qoʻshimcha kiritish haqida
Keyingi yillarda mamlakatimizda olib borilayotgan keng koʻlamli institutsional islohotlarda ishtirok etish uchun xalqaro moliya institutlarini faol jalb qilish, ularning moliyaviy va texnik koʻmagidan oqilona foydalanish orqali islohotlarni yanada chuqurlashtirish, shuningdek, ilgʻor xalqaro tajribalarni samarali qoʻllash asosida institutsional salohiyatni mustahkamlashga qaratilgan chora-tadbirlar amalga oshirilmoqda.
Xususan, Jahon banki ishtirokida “Institutsional salohiyatni oshirish” loyihasini amalga oshirish uchun Oʻzbekiston Respublikasi va Xalqaro taraqqiyot uyushmasi oʻrtasida erishilgan kelishuvga muvofiq 30 yil muddatga 5 yillik imtiyozli davr bilan 33,0 mln AQSh dollari miqdorida qarz, shuningdek, mazkur loyiha doirasida 250 ming AQSh dollari miqdorida texnik koʻmak jalb qilingan.
Oʻzbekiston Respublikasi Prezidentining “Yangi Oʻzbekiston maʼmuriy islohotlarini amalga oshirish chora-tadbirlari toʻgʻrisida” 2022-yil 21-dekabrdagi PF-269-son Farmoni hamda “Davlat ishtirokidagi korxonalarni isloh qilish jarayonlarini jadallashtirish chora-tadbirlari toʻgʻrisida” 2023-yil 1-martdagi PQ-83-son qaroriga muvofiq, shuningdek, Jahon banki ishtirokidagi “Institutsional salohiyatni oshirish” loyihasi amalga oshirilishini samarali muvofiqlashtirish maqsadida Vazirlar Mahkamasi qaror qiladi:
1. Vazirlar Mahkamasining “Jahon banki ishtirokida “Institutsional salohiyatni oshirish” loyihasini amalga oshirish chora-tadbirlari toʻgʻrisida” 2020-yil 30-oktabrdagi 668-son qaroriga quyidagilarni nazarda tutuvchi oʻzgartirishlar va qoʻshimcha kiritilsin:
Jahon banki ishtirokida “Institutsional salohiyatni oshirish” loyihasini Oʻzbekiston Respublikasi Prezidenti huzuridagi Strategik islohotlar agentligi tomonidan muvofiqlashtirish;
Oʻzbekiston Respublikasi Prezidenti huzuridagi Strategik islohotlar agentligiga loyihaning umumiy qiymati doirasida yoʻnalishlar boʻyicha ajratiladigan mablagʻlar miqdorlariga oʻzgartirish kiritish hamda yoʻnalishlar boʻyicha amalga oshiriladigan ishlar yoyilmasini tasdiqlash huquqini berish.
2. Oʻzbekiston Respublikasi Iqtisodiyot va moliya vazirligi “Institutsional salohiyatni oshirish” loyihasi boʻyicha qarz bitimi va ushbu loyiha doirasida tuzilgan shartnomalarga tegishli oʻzgartirishlar kiritilishini taʼminlasin.
3. Oʻzbekiston Respublikasi Iqtisodiyot va moliya vazirligida “Institutsional salohiyatni oshirish” loyihasi doirasida tuzilgan Loyihani amalga oshirish guruhi amaldagi moliyalashtirish tartibi saqlangan holda, Oʻzbekiston Respublikasi Prezidenti huzuridagi Strategik islohotlar agentligining boʻysunuviga oʻtkazilsin.
4. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari J.A. Xodjayev zimmasiga yuklansin.
Vazirlar Mahkamasining 2023-yil 1-iyundagi 225-son qaroriga ILOVA
Vazirlar Mahkamasining “Jahon banki ishtirokida “Institutsional salohiyatni oshirish” loyihasini amalga oshirish chora-tadbirlari toʻgʻrisida” 2020-yil 30-oktabrdagi 668-son qaroriga kiritilayotgan oʻzgartirishlar va qoʻshimcha
1. 3-band quyidagi mazmundagi toʻrtinchi xatboshi bilan toʻldirilsin:
“Loyihaning amalga oshirilishini samarali tashkil etish va nazorat qilish, shuningdek, manfaatdor vazirlik va idoralar hamda davlat ishtirokidagi korxonalarning Loyiha doirasidagi faoliyati Oʻzbekiston Respublikasi Prezidenti huzuridagi Strategik islohotlar agentligi tomonidan muvofiqlashtiriladi”.
2. 4-banddagi “Oʻzbekiston Respublikasi moliya vaziriga” soʻzlari “Oʻzbekiston Respublikasi Prezidenti huzuridagi Strategik islohotlar agentligi bosh direktoriga” soʻzlari bilan almashtirilsin.
3. 5-band quyidagi tahrirda bayon etilsin:
“5. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari J.A. Xodjayev zimmasiga yuklansin”.
Oʻzbekiston Respublikasining Bosh vaziri A. ARIPOV
Toshkent sh.,
2023-yil 1-iyun,
225-son