📅 2023-yil 7-iyun · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2023 йил 7 июнь · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 7 июня 2023 г. · Постановления Кабинета Министров
Официальный текст. Официальный документ. Редакционные примечания не включены.
📅 7 June 2023 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
НИЗОМ
СХЕМАСИ
АРИЗА
РЕЕСТРИ
Маҳаллий хўжалик шартномалари доирасида юзага келадиган енгиб бўлмайдиган куч (форс-мажор) ҳолатларини тасдиқлаш тартиби тўғрисидаги низомни тасдиқлаш ҳақида
Ўзбекистон Республикасининг «Ўзбекистон Республикаси Савдо-саноат палатаси тўғрисида»ги Қонунига мувофиқ, шунингдек, тадбиркорлик субъектлари фаолиятини қўллаб-қувватлаш ҳамда уларнинг ҳуқуқлари ва қонуний манфаатларини ҳимоя қилиш тизимини такомиллаштириш мақсадида Вазирлар Маҳкамаси қарор қилади:
1. «Ўзбекистон Республикаси Савдо-саноат палатаси тўғрисида»ги Ўзбекистон Республикасининг Қонуни 9-моддасига мувофиқ маҳаллий хўжалик шартномалари доирасида юзага келадиган енгиб бўлмас куч (форс-мажор) ҳолатларини тасдиқлаш Савдо-саноат палатасининг асосий функцияларидан бири этиб белгиланганлиги маълумот учун қабул қилинсин.
2. Қуйидагиларни назарда тутувчи Маҳаллий хўжалик шартномалари доирасида юзага келадиган енгиб бўлмайдиган куч (форс-мажор) ҳолатларини тасдиқлаш тартиби тўғрисидаги низом иловага мувофиқ тасдиқлансин:
енгиб бўлмайдиган куч (форс-мажор) ҳолатларини тасдиқловчи сертификатни (кейинги ўринларда — сертификат) олиш учун тақдим этиладиган ҳужжатлар ва уларни бериш тартиби;
сертификат олиш учун тақдим этилган ҳужжатларни кўриб чиқиш тартиби ва муддатлари;
сертификатни расмийлаштириш ва беришни рад этиш тартиби.
3. Ўзбекистон Республикаси Савдо-саноат палатасига Рақамли технологиялар вазирлиги ҳамда бошқа манфаатдор вазирликлар ва идоралар билан биргаликда Савдо-саноат палатасининг расмий веб-сайти орқали икки ой муддатда:
маҳаллий хўжалик шартномалари доирасида юзага келадиган енгиб бўлмайдиган куч (форс-мажор) ҳолатларини тасдиқлаш бўйича ариза тақдим этиш ва уларнинг кўриб чиқилишини кузатиб бориш;
сертификатлар реестрини эълон қилиш имкониятларини яратиш тавсия этилсин.
4. Ушбу қарор расмий эълон қилинган кундан эътиборан икки ой ўтгач кучга киради.
5. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосари Ж.А. Қўчқоров зиммасига юклансин.
Вазирлар Маҳкамасининг 2023 йил 7 июндаги 231-сон қарорига ИЛОВА
Маҳаллий хўжалик шартномалари доирасида юзага келадиган енгиб бўлмайдиган куч (форс-мажор) ҳолатларини тасдиқлаш тартиби тўғрисида
1-боб. Умумий қоидалар
1. Ушбу Низом Ўзбекистон Республикаси Савдо-саноат палатаси (кейинги ўринларда — Палата) томонидан маҳаллий хўжалик шартномалари (кейинги ўринларда — шартнома) доирасида Ўзбекистон Республикаси ҳудудида бошланган ёки бўлиб ўтган енгиб бўлмайдиган куч (форс-мажор) ҳолатларини (кейинги ўринларда — форс-мажор ҳолатлар) тасдиқлаш тартибини белгилайди.
Мазкур Низом талаблари ташқи савдо битимлари ва халқаро шартномалар шартлари доирасида юзага келадиган форс-мажор ҳолатларга нисбатан татбиқ этилмайди.
2. Форс-мажор ҳолатлар Палата раисининг электрон рақамли имзоси (кейинги ўринларда — ЭРИ) билан тасдиқланган ҳамда ушбу Низомга 1-иловадаги электрон шаклда QR-код (матрик штрихли код) билан расмийлаштириладиган сертификатни бериш орқали тасдиқланади.
Сертификат муддатсиз даврга берилади. Сертификат бир марталик хусусиятга эга бўлиб, фақат аризада кўрсатилган шартномавий муносабатларга нисбатан татбиқ этилади.
3. Ушбу Низомда қуйидаги асосий тушунчалардан фойдаланилади:
сертификат — Палата томонидан ушбу Низом талабларига мувофиқ берилган ва форс-мажор ҳолатларни тасдиқловчи давлат намунасидаги расмий ҳужжат;
талабгор — шартнома доирасида форс-мажор ҳолатларни тасдиқлаш мақсадида ҳужжатларни тақдим этувчи Ўзбекистон Республикаси резиденти бўлган тадбиркорлик субъекти бўлган жисмоний ва юридик шахслар (шартнома тарафи);
Ўзбекистон Республикаси резидентлари — Ўзбекистон Республикасининг қонунчилигига мувофиқ давлат рўйхатидан ўтган тадбиркорлик субъектлари ва Солиқ кодексининг 33-моддаси биринчи қисмида назарда тутилган юридик шахслар;
форс-мажор ҳолатлар — томонларнинг хоҳиш-иродаси ва фаолиятига боғлиқ бўлмаган табиат ҳодисалари (зилзила, кўчки, бўрон, қурғоқчилик, сув тошқинлари ва бошқалар) ёки ижтимоий-иқтисодий ҳолатлар (оммавий норозиликлар, уруш ҳолати, қамал, давлат манфаатларини кўзлаб импорт ва экспортни тақиқлаш, халқаро санкцияларнинг жорий этилиши ва бошқалар), объектив тўсқинлик қилувчи ҳолатлар (эпидемия, пандемия, карантин), техноген офатлар (ёнгинлар, портлашлар ва бошқалар), инфратузилма тармоқларидаги (транспорт, энергетика тизимларидаги), фавқулодда ва кенг миқёсдаги кутилмаган авариялар, узилишлар сабабли юзага келган шароитларда тарафларга қабул қилинган мажбуриятларни бажариш имконини бермайдиган фавқулодда, олдини олиб бўлмайдиган ва кутилмаган ҳолатлар;
шартнома — Ўзбекистон Республикаси резидентлари ўртасида тузилган шартнома.
2-боб. Сертификат олиш учун ариза бериш тартиби
4. Сертификат талабгорнинг аризасига асосан ушбу Низомга 2-иловадаги схемага мувофиқ Палата томонидан расмийлаштирилади ва берилади.
5. Талабгор сертификат олиш бўйича Палатага Ўзбекистон Республикаси Ягона интерактив давлат хизматлари портали (кейинги ўринларда — ЯИДХП) ва Давлат хизматлари марказлари орқали мурожаат қилади.
Аризалар ЯИДХП орқали дам олиш ва байрам кунларидан қатъи назар, ҳар куни 24 соат давомида юборилиши мумкин.
Бунда аризалар иш вақтидан кейин ёки дам олиш ва байрам кунларида тушганда, календар бўйича навбатдаги иш куни аризаларнинг ваколатли органга тушган ва ваколатли орган томонидан қабул қилинган кун деб ҳисобланади.
Талабгор шахсан ёки унинг номидан мурожаат қилиш ҳуқуқига эга бўлган шахс ўзи келиб мурожаат этган тақдирда, Давлат хизматлари маркази ходими ариза берувчи номидан, ЯИДХП орқали мурожаат этган тақдирда эса, мустақил равишда ушбу низомга 2 1 -иловага мувофиқ шаклдаги аризани электрон шаклда тўлдиради
6. Аризага қуйидагилар илова қилинади:
шартнома(лар), қўшимча келишув(лар) (мавжуд бўлган тақдирда);
шартнома(лар) бўйича бажарилган мажбуриятларнинг ҳажмларини тасдиқловчи ҳужжатлар;
форс-мажор ҳолат юзага келганлиги тўғрисидаги ҳужжатлар (материаллар).
Талабгордан ушбу бандда кўрсатилмаган ҳужжатларни талаб қилиш тақиқланади.
7. Ариза тўлдирилганидан сўнг талабгор маълумот тўғрилигини текширади ва имзоларни идентификация қилишнинг замонавий воситалари (дактилоскопия, электрон рақамли имзо, Мобил-ID ва бошқа) билан тасдиқлайди.
Талабгор ЯИДХП орқали мурожаат этган тақдирда, паспортни электрон рақамли имзо билан тасдиқлаш талаб этилмайди.
7 1 . Сертификат берганлик учун тўлов ундирилмайди.
8. Мазкур Низомнинг 5 ва 6-бандларида келтирилган маълумотлар ва ҳужжатлар талабгор томонидан тўлиқ тақдим этилмаган бўлса ёки тақдим этилган ҳужжатлардаги маълумотлар форс-мажор ҳолатни тасдиқлаш учун етарли бўлмаса, Палата сертификат бериш тўғрисидаги ариза келиб тушган кундан бошлаб бир иш куни ичида Давлат хизматлари марказига (шахсан келиб мурожаат этган тақдирда) ёки талабгорга (электрон тарзда мурожаат этган тақдирда) ЯИДХП орқали талабгорга тўлиқ тақдим этилмаган маълумот ва ҳужжатларни беш кун ичида тақдим этиш тўғрисида сўров юборади.
Агар талабгор томонидан сўралган маълумотлар ва ҳужжатлар белгиланган муддатда тақдим этилмаса ёки ушбу муддатни узайтириш тўғрисида илтимоснома берилмаган бўлса, ушбу Низомнинг 12-бандига мувофиқ Палата томонидан сертификат беришни рад этиш тўғрисида қарор қабул қилинади.
Талабгорнинг илтимосига кўра тўлиқ тақдим этилмаган маълумот ва ҳужжатларни бериш муддати кўпи билан икки кун муддатга узайтирилиши мумкин.
3-боб. Аризани кўриб чиқиш ва сертификатни бериш тартиби
9. Палата қабул қилинган ҳужжатлар бўйича қуйидагиларни ўрганади:
шартнома бўйича мажбуриятларнинг мавжудлиги ва уларни бажариш муддатлари;
шартнома тарафларининг иродаси ва фаолиятига боғлиқ бўлмаган, фавқулодда ва енгиб бўлмайдиган хусусиятга эга ҳолатлар, шунингдек, ушбу ҳолатларни тасдиқловчи ваколатли органлар (ташкилотлар) ҳужжатларининг мавжудлиги;
содир бўлган ҳолатлар ва шартнома бўйича мажбуриятларни бажариш муддатларини инобатга олган ҳолда, уларни тўлиқ ёки қисман бажара олмаслик ўртасидаги сабабли боғлиқлик;
форс-мажор ҳолатларнинг амал қилиш муддатлари;
шартнома тарафларининг форс-мажор ҳолатлар вужудга келишида алоқаси йўқлиги.
10. Аризада кўрсатилган ҳолатларнинг ҳаққонийлиги Палата томонидан мустақил равишда республика ижро этувчи ҳокимият органлари, хўжалик бирлашмалари ва бошқа ташкилотлардан тегишли маълумотларни сўраб олиш орқали аниқланади.
11. Республика ижро этувчи ҳокимият органлари, хўжалик бирлашмалари ва бошқа ташкилотлар Палатанинг сўрови келиб тушган кундан бошлаб беш иш куни ичида сўралаётган маълумотларни ёзма шаклда бепул тақдим этиши шарт.
12. Талабгорга сертификат бериш ёки беришни рад этиш тўғрисидаги қарор Палата томонидан ариза қабул қилинган кундан бошлаб ўн иш куни ичида қабул қилинади.
13. Палата томонидан талабгорга сертификат берилган тақдирда, сертификат Давлат хизматлари марказига (шахсан келиб мурожаат этган тақдирда) ёки талабгорга (электрон тарзда мурожаат этган тақдирда) ЯИДХП орқали электрон шаклда юборилади ҳамда сертификат ва у билан боғлиқ барча ҳужжатлар Палатанинг расмий веб-сайтида эълон қилинади.
14. Сертификат беришни рад этиш учун қуйидагилар асос бўлади:
Палата томонидан ўтказилган ўрганишларга асосан аризада кўрсатилган ҳолатлар ўз тасдиғини топмаганлиги;
аризага илова қилинган ҳужжатларда нотўғри маълумотлар мавжудлиги ёки маълумотларни бузиб кўрсатиш ҳолатлари аниқланганлиги;
шартнома бўйича мажбуриятлар Ўзбекистон Республикаси ҳудудида бошланмаган ёки содир бўлмаган форс-мажор ҳолатлар оқибатида бажарилмаганлиги;
Ўзбекистон Республикаси ҳудудида шартномадан келиб чиқувчи мажбуриятнинг бажариб бўлинганлиги;
шартнома бўйича мажбуриятнинг бажарилмаганлиги форс-мажор ҳолатлар давом этган муддатларга мувофиқ эмаслиги;
Ўзбекистон Республикаси Фуқаролик кодексининг 333-моддасига мувофиқ талабгорнинг шартлашувчи шериклари томонидан мажбуриятларнинг бузилганлиги, мажбуриятни бажариш учун зарур товарларнинг бозорда мавжуд эмаслиги, талабгорда зарур маблағларнинг бўлмаганлиги;
форс-мажор ҳолат суд қарорига асосан тасдиқланганлиги;
ушбу Низомнинг 11-бандига мувофиқ республика ижро этувчи ҳокимият органлари, хўжалик бирлашмалари ва бошқа ташкилотларнинг форс-мажор ҳолатлар мавжуд эмаслиги бўйича асослантирилган маълумотлари олинганлиги.
Бошқа асосларга кўра сертификат беришни рад этишга йўл қўйилмайди.
15. Палата томонидан сертификат бериш рад этилган тақдирда бу ҳақида хабарнома Давлат хизматлари марказига (шахсан келиб мурожаат этган тақдирда) ёки ариза берувчига (электрон тарзда мурожаат этган тақдирда) ЯИДХП орқали электрон шаклда юборилади.
16. Сертификат беришни рад этиш тўғрисида қарор қабул қилингандан сўнг қайта киритилган ариза кўриб чиқилмайди, мазкур Низомнинг 8-бандида назарда тутилган ҳолатлар бундан мустасно.
17. Мазкур Низомнинг 8-бандида кўрсатилган муддатлардан кечикиб тақдим этилган ариза янгидан киритилган ҳисобланади ва Палата томонидан умумий асосларда кўриб чиқилади.
18. Талабгор сертификат бериш рад этилганлиги тўғрисидаги қарор, шунингдек, Палата мансабдор шахсининг хатти-ҳаракатлари (ҳаракатсизлиги) бўйича белгиланган тартибда судга шикоят қилиш ҳуқуқига эга.
4-боб. Якунловчи қоидалар
19. Палата томонидан берилган сертификатлар реестри ушбу Низомга 3-иловага мувофиқ Палатанинг расмий веб-сайтида автоматик шаклда юритилади.
20. Зарур ҳолларда Палата томонидан тадбиркорлик субъектларига сертификат бериш, форс-мажор ҳолатларни тасдиқлаш ва сертификат олиш учун ҳужжатларни кўриб чиқиш жараёни бўйича маслаҳатлар берилади.
21. Ушбу Низом талаблари бузилишида айбдор бўлган шахслар қонунчилик ҳужжатларида белгиланган тартибда жавоб берадилар.
Маҳаллий хўжалик шартномалари доирасида юзага келадиган енгиб бўлмайдиган куч (форс-мажор) ҳолатларини тасдиқлаш тартиби тўғрисидаги низомга 1-ИЛОВА
Маҳаллий хўжалик шартномалари доирасида юзага келадиган енгиб бўлмайдиган кучлар (форс-мажор) ҳолатларини тасдиқлаш бўйича сертификат намунаси
___________-сон СЕРТИФИКАТ Маҳаллий хўжалик шартномалари доирасида юзага келадиган енгиб бўлмайдиган куч (форс-мажор) ҳолатларини тасдиқлаш тартиби тўғрисидаги низомга асосан 1. Енгиб бўлмайдиган куч (форс-мажор) ҳолатларини тасдиқлаш тартиби 2. Енгиб бўлмайдиган куч (форс-мажор) ҳолатлари юзага келганлиги 3. Шартнома тўғрисида маълумот (шартнома тузилган сана, шартнома тарафлари ва уларнинг почта манзили, шартнома муддатлари, қарама-қарши мажбуриятларнинг бажарилиши ва бошқа реквизитлар) 4. Шартнома мажбуриятларини бажаришда енгиб бўлмайдиган куч (форс-мажор) ҳолатларининг юзага келганлигини тасдиқлаш Ўзбекистон Республикаси Савдо-саноат палатасининг ваколатли шахси: ___________________ _________________ _________________ (Лавозими) _____ _____ (QR-код) __ _________ (Ф.И.О)
Маҳаллий хўжалик шартномалари доирасида юзага келадиган енгиб бўлмайдиган куч (форс-мажор) ҳолатларини тасдиқлаш тартиби тўғрисидаги низомга 2-ИЛОВА
Енгиб бўлмайдиган куч (форс-мажор) ҳолатларини тасдиқлаш бўйича давлат хизматини кўрсатиш
Босқичлар Субъектлар Чора-тадбирлар Бажариш муддатлари 1-босқич Талабгор Сертификат олиш бўйича Савдо-саноат палатасига Ўзбекистон Республикаси Ягона интерактив давлат хизматлари портали (кейинги ўринларда — ЯИДХП) ва Давлат хизматлари марказлари орқали мурожаат қилади . Хоҳишига кўра 2-босқич Савдо-саноат палатаси 1. Тақдим этилган ҳужжатларни кўриб чиқади. 2. Тақдим этилган ҳужжатларда камчиликлар мавжуд бўлган тақдирда, талабгорга тўлиқ тақдим этилмаган маълумот ва ҳужжатларни ўн кун ичида тақдим этиш тўғрисида сўров юборади. Бир иш куни муддатда 3. Республика ижро этувчи ҳокимият органлари, хўжалик бирлашмалари ва бошқа ташкилотларга тегишли маълумот ёки хулоса олиш учун сўров юборади. Заруратга кўра 3-босқич Республика ижро этувчи ҳокимият органлари, хўжалик бирлашмалари ва бошқа ташкилотлар Сўров келиб тушган тақдирда, уни ўрганиб чиқади ҳамда тегишли хулоса тайёрлаб, Савдо-саноат палатасига бепул тақдим этади. Беш иш куни муддатда 4-босқич Савдо-саноат палатаси 1. Форс-мажор ҳолатлар мавжудлигини тасдиқлаш ёки рад этиш тўғрисида қарор қабул қилади. Ўн беш кун муддатда 2. Сертификат бериш рад этилган тақдирда, бу ҳақда Давлат хизматлари марказига (шахсан келиб мурожаат этган тақдирда) ёки талабгорга (электрон тарзда мурожаат этган тақдирда) ЯИДХП орқали аризада кўрсатилган манзил орқали асослантирилган жавоб хати юборади . Уч кун муддатда 5-босқич Савдо-саноат палатаси 1. Сертификат расмийлаштирилган тақдирда, бу ҳақда Давлат хизматлари марказига (шахсан келиб мурожаат этган тақдирда) ёки талабгорга (электрон тарзда мурожаат этган тақдирда) ЯИДХП орқали аризада кўрсатилган манзил орқали маълум қилади . 2. Сертификатни расмий веб-сайтида эълон қилади. 3. Берилган сертификатлар тўғрисидаги маълумотни сертификатлар реестрига киритади. Бир кун муддатда
Маҳаллий хўжалик шартномалари доирасида юзага келадиган енгиб бўлмайдиган куч (форс-мажор) ҳолатларини тасдиқлаш тартиби тўғрисидаги низомга 2 1 -ИЛОВА
Енгиб бўлмайдиган куч (форс-мажор) ҳолатларини тасдиқлаш бўйича сертификат олиш юзасидан
I. Ариза берувчи — юридик шахс ҳақида маълумотлар 1. Юридик шахс номи: 2. Юридик шахс СТИР: 3. Юридик шахс манзили: 4. Телефон рақами: 5. Электрон почтаси: II. Ариза берувчи — жисмоний шахс (якка тартибдаги тадбиркор) маълумотлари 1. Жисмоний шахснинг шахсий идентификация рақами: 2. Телефон рақами: 3. Якка тартибдаги тадбиркор гувоҳномаси маълумотлари (рўйхатдан ўтказиш рақами ва санаси): III. Товар (шартнома) ҳақида маълумотлар 1. Сертификат бериладиган шартнома(лар)нинг реквизити ва предмети: 2. Ариза берувчининг мазкур шартнома(лар) бўйича мажбуриятлари, уларни бажариш тартиби ва муддатлари: 3. Ариза берувчи шартнома(лар) бўйича ўз мажбуриятларини лозим даражада бажаришга тўсқинлик қилган деб ҳисоблайдиган форс-мажор ҳолатларнинг тавсифи (улар содир бўлган жой, вақт, давр ҳамда уларнинг таъсири): 4. Форс-мажор ҳолат амал қилиш муддатининг бошланганлиги ва тугаганлиги (агар тугаган бўлса): 5. Форс-мажор ҳолат билан боғлиқ қўшимча маълумотлар (мавжуд бўлса):
Маҳаллий хўжалик шартномалари доирасида юзага келадиган енгиб бўлмайдиган куч (форс-мажор) ҳолатларини тасдиқлаш тартиби тўғрисидаги низомга 3-ИЛОВА
Енгиб бўлмайдиган куч (форс-мажор) ҳолатларини тасдиқлаш бўйича берилган сертификатлар
Т/р СТИР (мавжуд бўлса) Талабгор тўғрисида маълумот Сертификат берилган шартнома санаси ва рақами Сертификат серияси, тартиб рақами ва берилган санаси Юридик шахснинг тўлиқ номи ва ташкилий-ҳуқуқий шакли / Якка тартибдаги тадбиркорнинг давлат рўйхатидан ўтганлиги тўғрисидаги гувоҳнома реквизитлари Почта манзили Электрон почта манзили (мавжуд бўлса), телефон рақами 1. 2. 3.
Ўзбекистон Республикасининг Бош вазири А. АРИПОВ
Тошкент ш.,
2023 йил 7 июнь,
231-сон
Oʻzbekiston Respublikasi Vazirlar Mahkamasining
qarori
NIZOM
SXEMASI
ARIZA
REYESTRI
Mahalliy xoʻjalik shartnomalari doirasida yuzaga keladigan yengib boʻlmaydigan kuch (fors-major) holatlarini tasdiqlash tartibi toʻgʻrisidagi nizomni tasdiqlash haqida
Oʻzbekiston Respublikasining “Oʻzbekiston Respublikasi Savdo-sanoat palatasi toʻgʻrisida”gi Qonuniga muvofiq, shuningdek, tadbirkorlik subyektlari faoliyatini qoʻllab-quvvatlash hamda ularning huquqlari va qonuniy manfaatlarini himoya qilish tizimini takomillashtirish maqsadida Vazirlar Mahkamasi qaror qiladi:
1. “Oʻzbekiston Respublikasi Savdo-sanoat palatasi toʻgʻrisida”gi Oʻzbekiston Respublikasining Qonuni 9-moddasiga muvofiq mahalliy xoʻjalik shartnomalari doirasida yuzaga keladigan yengib boʻlmas kuch (fors-major) holatlarini tasdiqlash Savdo-sanoat palatasining asosiy funksiyalaridan biri etib belgilanganligi maʼlumot uchun qabul qilinsin.
2. Quyidagilarni nazarda tutuvchi Mahalliy xoʻjalik shartnomalari doirasida yuzaga keladigan yengib boʻlmaydigan kuch (fors-major) holatlarini tasdiqlash tartibi toʻgʻrisidagi nizom ilovaga muvofiq tasdiqlansin:
yengib boʻlmaydigan kuch (fors-major) holatlarini tasdiqlovchi sertifikatni (keyingi oʻrinlarda — sertifikat) olish uchun taqdim etiladigan hujjatlar va ularni berish tartibi;
sertifikat olish uchun taqdim etilgan hujjatlarni koʻrib chiqish tartibi va muddatlari;
sertifikatni rasmiylashtirish va berishni rad etish tartibi.
3. Oʻzbekiston Respublikasi Savdo-sanoat palatasiga Raqamli texnologiyalar vazirligi hamda boshqa manfaatdor vazirliklar va idoralar bilan birgalikda Savdo-sanoat palatasining rasmiy veb-sayti orqali ikki oy muddatda:
mahalliy xoʻjalik shartnomalari doirasida yuzaga keladigan yengib boʻlmaydigan kuch (fors-major) holatlarini tasdiqlash boʻyicha ariza taqdim etish va ularning koʻrib chiqilishini kuzatib borish;
sertifikatlar reyestrini eʼlon qilish imkoniyatlarini yaratish tavsiya etilsin.
4. Ushbu qaror rasmiy eʼlon qilingan kundan eʼtiboran ikki oy oʻtgach kuchga kiradi.
5. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari J.A. Qoʻchqorov zimmasiga yuklansin.
Vazirlar Mahkamasining 2023-yil 7-iyundagi 231-son qaroriga ILOVA
Mahalliy xoʻjalik shartnomalari doirasida yuzaga keladigan yengib boʻlmaydigan kuch (fors-major) holatlarini tasdiqlash tartibi toʻgʻrisida
1-bob. Umumiy qoidalar
1. Ushbu Nizom Oʻzbekiston Respublikasi Savdo-sanoat palatasi (keyingi oʻrinlarda — Palata) tomonidan mahalliy xoʻjalik shartnomalari (keyingi oʻrinlarda — shartnoma) doirasida Oʻzbekiston Respublikasi hududida boshlangan yoki boʻlib oʻtgan yengib boʻlmaydigan kuch (fors-major) holatlarini (keyingi oʻrinlarda — fors-major holatlar) tasdiqlash tartibini belgilaydi.
Mazkur Nizom talablari tashqi savdo bitimlari va xalqaro shartnomalar shartlari doirasida yuzaga keladigan fors-major holatlarga nisbatan tatbiq etilmaydi.
2. Fors-major holatlar Palata raisining elektron raqamli imzosi (keyingi oʻrinlarda — ERI) bilan tasdiqlangan hamda ushbu Nizomga 1-ilovadagi elektron shaklda QR-kod (matrik shtrixli kod) bilan rasmiylashtiriladigan sertifikatni berish orqali tasdiqlanadi.
Sertifikat muddatsiz davrga beriladi. Sertifikat bir martalik xususiyatga ega boʻlib, faqat arizada koʻrsatilgan shartnomaviy munosabatlarga nisbatan tatbiq etiladi.
3. Ushbu Nizomda quyidagi asosiy tushunchalardan foydalaniladi:
sertifikat — Palata tomonidan ushbu Nizom talablariga muvofiq berilgan va fors-major holatlarni tasdiqlovchi davlat namunasidagi rasmiy hujjat;
talabgor — shartnoma doirasida fors-major holatlarni tasdiqlash maqsadida hujjatlarni taqdim etuvchi Oʻzbekiston Respublikasi rezidenti boʻlgan tadbirkorlik subyekti boʻlgan jismoniy va yuridik shaxslar (shartnoma tarafi);
Oʻzbekiston Respublikasi rezidentlari — Oʻzbekiston Respublikasining qonunchiligiga muvofiq davlat roʻyxatidan oʻtgan tadbirkorlik subyektlari va Soliq kodeksining 33-moddasi birinchi qismida nazarda tutilgan yuridik shaxslar;
fors-major holatlar — tomonlarning xohish-irodasi va faoliyatiga bogʻliq boʻlmagan tabiat hodisalari (zilzila, koʻchki, boʻron, qurgʻoqchilik, suv toshqinlari va boshqalar) yoki ijtimoiy-iqtisodiy holatlar (ommaviy noroziliklar, urush holati, qamal, davlat manfaatlarini koʻzlab import va eksportni taqiqlash, xalqaro sanksiyalarning joriy etilishi va boshqalar), obyektiv toʻsqinlik qiluvchi holatlar (epidemiya, pandemiya, karantin), texnogen ofatlar (yonginlar, portlashlar va boshqalar), infratuzilma tarmoqlaridagi (transport, energetika tizimlaridagi), favqulodda va keng miqyosdagi kutilmagan avariyalar, uzilishlar sababli yuzaga kelgan sharoitlarda taraflarga qabul qilingan majburiyatlarni bajarish imkonini bermaydigan favqulodda, oldini olib boʻlmaydigan va kutilmagan holatlar;
shartnoma — Oʻzbekiston Respublikasi rezidentlari oʻrtasida tuzilgan shartnoma.
2-bob. Sertifikat olish uchun ariza berish tartibi
4. Sertifikat talabgorning arizasiga asosan ushbu Nizomga 2-ilovadagi sxemaga muvofiq Palata tomonidan rasmiylashtiriladi va beriladi.
5. Talabgor sertifikat olish boʻyicha Palataga Oʻzbekiston Respublikasi Yagona interaktiv davlat xizmatlari portali (keyingi oʻrinlarda — YIDXP) va Davlat xizmatlari markazlari orqali murojaat qiladi.
Arizalar YIDXP orqali dam olish va bayram kunlaridan qatʼi nazar, har kuni 24 soat davomida yuborilishi mumkin.
Bunda arizalar ish vaqtidan keyin yoki dam olish va bayram kunlarida tushganda, kalendar boʻyicha navbatdagi ish kuni arizalarning vakolatli organga tushgan va vakolatli organ tomonidan qabul qilingan kun deb hisoblanadi.
Talabgor shaxsan yoki uning nomidan murojaat qilish huquqiga ega boʻlgan shaxs oʻzi kelib murojaat etgan taqdirda, Davlat xizmatlari markazi xodimi ariza beruvchi nomidan, YIDXP orqali murojaat etgan taqdirda esa, mustaqil ravishda ushbu nizomga 2 1 -ilovaga muvofiq shakldagi arizani elektron shaklda toʻldiradi
6. Arizaga quyidagilar ilova qilinadi:
shartnoma(lar), qoʻshimcha kelishuv(lar) (mavjud boʻlgan taqdirda);
shartnoma(lar) boʻyicha bajarilgan majburiyatlarning hajmlarini tasdiqlovchi hujjatlar;
fors-major holat yuzaga kelganligi toʻgʻrisidagi hujjatlar (materiallar).
Talabgordan ushbu bandda koʻrsatilmagan hujjatlarni talab qilish taqiqlanadi.
7. Ariza toʻldirilganidan soʻng talabgor maʼlumot toʻgʻriligini tekshiradi va imzolarni identifikatsiya qilishning zamonaviy vositalari (daktiloskopiya, elektron raqamli imzo, Mobil-ID va boshqa) bilan tasdiqlaydi.
Talabgor YIDXP orqali murojaat etgan taqdirda, pasportni elektron raqamli imzo bilan tasdiqlash talab etilmaydi.
7 1 . Sertifikat berganlik uchun toʻlov undirilmaydi.
8. Mazkur Nizomning 5 va 6-bandlarida keltirilgan maʼlumotlar va hujjatlar talabgor tomonidan toʻliq taqdim etilmagan boʻlsa yoki taqdim etilgan hujjatlardagi maʼlumotlar fors-major holatni tasdiqlash uchun yetarli boʻlmasa, Palata sertifikat berish toʻgʻrisidagi ariza kelib tushgan kundan boshlab bir ish kuni ichida Davlat xizmatlari markaziga (shaxsan kelib murojaat etgan taqdirda) yoki talabgorga (elektron tarzda murojaat etgan taqdirda) YIDXP orqali talabgorga toʻliq taqdim etilmagan maʼlumot va hujjatlarni besh kun ichida taqdim etish toʻgʻrisida soʻrov yuboradi.
Agar talabgor tomonidan soʻralgan maʼlumotlar va hujjatlar belgilangan muddatda taqdim etilmasa yoki ushbu muddatni uzaytirish toʻgʻrisida iltimosnoma berilmagan boʻlsa, ushbu Nizomning 12-bandiga muvofiq Palata tomonidan sertifikat berishni rad etish toʻgʻrisida qaror qabul qilinadi.
Talabgorning iltimosiga koʻra toʻliq taqdim etilmagan maʼlumot va hujjatlarni berish muddati koʻpi bilan ikki kun muddatga uzaytirilishi mumkin.
3-bob. Arizani koʻrib chiqish va sertifikatni berish tartibi
9. Palata qabul qilingan hujjatlar boʻyicha quyidagilarni oʻrganadi:
shartnoma boʻyicha majburiyatlarning mavjudligi va ularni bajarish muddatlari;
shartnoma taraflarining irodasi va faoliyatiga bogʻliq boʻlmagan, favqulodda va yengib boʻlmaydigan xususiyatga ega holatlar, shuningdek, ushbu holatlarni tasdiqlovchi vakolatli organlar (tashkilotlar) hujjatlarining mavjudligi;
sodir boʻlgan holatlar va shartnoma boʻyicha majburiyatlarni bajarish muddatlarini inobatga olgan holda, ularni toʻliq yoki qisman bajara olmaslik oʻrtasidagi sababli bogʻliqlik;
fors-major holatlarning amal qilish muddatlari;
shartnoma taraflarining fors-major holatlar vujudga kelishida aloqasi yoʻqligi.
10. Arizada koʻrsatilgan holatlarning haqqoniyligi Palata tomonidan mustaqil ravishda respublika ijro etuvchi hokimiyat organlari, xoʻjalik birlashmalari va boshqa tashkilotlardan tegishli maʼlumotlarni soʻrab olish orqali aniqlanadi.
11. Respublika ijro etuvchi hokimiyat organlari, xoʻjalik birlashmalari va boshqa tashkilotlar Palataning soʻrovi kelib tushgan kundan boshlab besh ish kuni ichida soʻralayotgan maʼlumotlarni yozma shaklda bepul taqdim etishi shart.
12. Talabgorga sertifikat berish yoki berishni rad etish toʻgʻrisidagi qaror Palata tomonidan ariza qabul qilingan kundan boshlab oʻn ish kuni ichida qabul qilinadi.
13. Palata tomonidan talabgorga sertifikat berilgan taqdirda, sertifikat Davlat xizmatlari markaziga (shaxsan kelib murojaat etgan taqdirda) yoki talabgorga (elektron tarzda murojaat etgan taqdirda) YIDXP orqali elektron shaklda yuboriladi hamda sertifikat va u bilan bogʻliq barcha hujjatlar Palataning rasmiy veb-saytida eʼlon qilinadi.
14. Sertifikat berishni rad etish uchun quyidagilar asos boʻladi:
Palata tomonidan oʻtkazilgan oʻrganishlarga asosan arizada koʻrsatilgan holatlar oʻz tasdigʻini topmaganligi;
arizaga ilova qilingan hujjatlarda notoʻgʻri maʼlumotlar mavjudligi yoki maʼlumotlarni buzib koʻrsatish holatlari aniqlanganligi;
shartnoma boʻyicha majburiyatlar Oʻzbekiston Respublikasi hududida boshlanmagan yoki sodir boʻlmagan fors-major holatlar oqibatida bajarilmaganligi;
Oʻzbekiston Respublikasi hududida shartnomadan kelib chiquvchi majburiyatning bajarib boʻlinganligi;
shartnoma boʻyicha majburiyatning bajarilmaganligi fors-major holatlar davom etgan muddatlarga muvofiq emasligi;
Oʻzbekiston Respublikasi Fuqarolik kodeksining 333-moddasiga muvofiq talabgorning shartlashuvchi sheriklari tomonidan majburiyatlarning buzilganligi, majburiyatni bajarish uchun zarur tovarlarning bozorda mavjud emasligi, talabgorda zarur mablagʻlarning boʻlmaganligi;
fors-major holat sud qaroriga asosan tasdiqlanganligi;
ushbu Nizomning 11-bandiga muvofiq respublika ijro etuvchi hokimiyat organlari, xoʻjalik birlashmalari va boshqa tashkilotlarning fors-major holatlar mavjud emasligi boʻyicha asoslantirilgan maʼlumotlari olinganligi.
Boshqa asoslarga koʻra sertifikat berishni rad etishga yoʻl qoʻyilmaydi.
15. Palata tomonidan sertifikat berish rad etilgan taqdirda bu haqida xabarnoma Davlat xizmatlari markaziga (shaxsan kelib murojaat etgan taqdirda) yoki ariza beruvchiga (elektron tarzda murojaat etgan taqdirda) YIDXP orqali elektron shaklda yuboriladi.
16. Sertifikat berishni rad etish toʻgʻrisida qaror qabul qilingandan soʻng qayta kiritilgan ariza koʻrib chiqilmaydi, mazkur Nizomning 8-bandida nazarda tutilgan holatlar bundan mustasno.
17. Mazkur Nizomning 8-bandida koʻrsatilgan muddatlardan kechikib taqdim etilgan ariza yangidan kiritilgan hisoblanadi va Palata tomonidan umumiy asoslarda koʻrib chiqiladi.
18. Talabgor sertifikat berish rad etilganligi toʻgʻrisidagi qaror, shuningdek, Palata mansabdor shaxsining xatti-harakatlari (harakatsizligi) boʻyicha belgilangan tartibda sudga shikoyat qilish huquqiga ega.
4-bob. Yakunlovchi qoidalar
19. Palata tomonidan berilgan sertifikatlar reyestri ushbu Nizomga 3-ilovaga muvofiq Palataning rasmiy veb-saytida avtomatik shaklda yuritiladi.
20. Zarur hollarda Palata tomonidan tadbirkorlik subyektlariga sertifikat berish, fors-major holatlarni tasdiqlash va sertifikat olish uchun hujjatlarni koʻrib chiqish jarayoni boʻyicha maslahatlar beriladi.
21. Ushbu Nizom talablari buzilishida aybdor boʻlgan shaxslar qonunchilik hujjatlarida belgilangan tartibda javob beradilar.
Mahalliy xoʻjalik shartnomalari doirasida yuzaga keladigan yengib boʻlmaydigan kuch (fors-major) holatlarini tasdiqlash tartibi toʻgʻrisidagi nizomga 1-ILOVA
Mahalliy xoʻjalik shartnomalari doirasida yuzaga keladigan yengib boʻlmaydigan kuchlar (fors-major) holatlarini tasdiqlash boʻyicha sertifikat namunasi
___________-son SERTIFIKAT Mahalliy xoʻjalik shartnomalari doirasida yuzaga keladigan yengib boʻlmaydigan kuch (fors-major) holatlarini tasdiqlash tartibi toʻgʻrisidagi nizomga asosan 1. Yengib boʻlmaydigan kuch (fors-major) holatlarini tasdiqlash tartibi 2. Yengib boʻlmaydigan kuch (fors-major) holatlari yuzaga kelganligi 3. Shartnoma toʻgʻrisida maʼlumot (shartnoma tuzilgan sana, shartnoma taraflari va ularning pochta manzili, shartnoma muddatlari, qarama-qarshi majburiyatlarning bajarilishi va boshqa rekvizitlar) 4. Shartnoma majburiyatlarini bajarishda yengib boʻlmaydigan kuch (fors-major) holatlarining yuzaga kelganligini tasdiqlash Oʻzbekiston Respublikasi Savdo-sanoat palatasining vakolatli shaxsi: ___________________ _________________ _________________ (Lavozimi) _____ _____ (QR-kod) __ _________ (F.I.O)
Mahalliy xoʻjalik shartnomalari doirasida yuzaga keladigan yengib boʻlmaydigan kuch (fors-major) holatlarini tasdiqlash tartibi toʻgʻrisidagi nizomga 2-ILOVA
Yengib boʻlmaydigan kuch (fors-major) holatlarini tasdiqlash boʻyicha davlat xizmatini koʻrsatish
Bosqichlar Subyektlar Chora-tadbirlar Bajarish muddatlari 1-bosqich Talabgor Sertifikat olish boʻyicha Savdo-sanoat palatasiga Oʻzbekiston Respublikasi Yagona interaktiv davlat xizmatlari portali (keyingi oʻrinlarda — YIDXP) va Davlat xizmatlari markazlari orqali murojaat qiladi . Xohishiga koʻra 2-bosqich Savdo-sanoat palatasi 1. Taqdim etilgan hujjatlarni koʻrib chiqadi. 2. Taqdim etilgan hujjatlarda kamchiliklar mavjud boʻlgan taqdirda, talabgorga toʻliq taqdim etilmagan maʼlumot va hujjatlarni oʻn kun ichida taqdim etish toʻgʻrisida soʻrov yuboradi. Bir ish kuni muddatda 3. Respublika ijro etuvchi hokimiyat organlari, xoʻjalik birlashmalari va boshqa tashkilotlarga tegishli maʼlumot yoki xulosa olish uchun soʻrov yuboradi. Zaruratga koʻra 3-bosqich Respublika ijro etuvchi hokimiyat organlari, xoʻjalik birlashmalari va boshqa tashkilotlar Soʻrov kelib tushgan taqdirda, uni oʻrganib chiqadi hamda tegishli xulosa tayyorlab, Savdo-sanoat palatasiga bepul taqdim etadi. Besh ish kuni muddatda 4-bosqich Savdo-sanoat palatasi 1. Fors-major holatlar mavjudligini tasdiqlash yoki rad etish toʻgʻrisida qaror qabul qiladi. Oʻn besh kun muddatda 2. Sertifikat berish rad etilgan taqdirda, bu haqda Davlat xizmatlari markaziga (shaxsan kelib murojaat etgan taqdirda) yoki talabgorga (elektron tarzda murojaat etgan taqdirda) YIDXP orqali arizada koʻrsatilgan manzil orqali asoslantirilgan javob xati yuboradi . Uch kun muddatda 5-bosqich Savdo-sanoat palatasi 1. Sertifikat rasmiylashtirilgan taqdirda, bu haqda Davlat xizmatlari markaziga (shaxsan kelib murojaat etgan taqdirda) yoki talabgorga (elektron tarzda murojaat etgan taqdirda) YIDXP orqali arizada koʻrsatilgan manzil orqali maʼlum qiladi . 2. Sertifikatni rasmiy veb-saytida eʼlon qiladi. 3. Berilgan sertifikatlar toʻgʻrisidagi maʼlumotni sertifikatlar reyestriga kiritadi. Bir kun muddatda
Mahalliy xoʻjalik shartnomalari doirasida yuzaga keladigan yengib boʻlmaydigan kuch (fors-major) holatlarini tasdiqlash tartibi toʻgʻrisidagi nizomga 2 1 -ILOVA
Yengib boʻlmaydigan kuch (fors-major) holatlarini tasdiqlash boʻyicha sertifikat olish yuzasidan
I. Ariza beruvchi — yuridik shaxs haqida maʼlumotlar 1. Yuridik shaxs nomi: 2. Yuridik shaxs STIR: 3. Yuridik shaxs manzili: 4. Telefon raqami: 5. Elektron pochtasi: II. Ariza beruvchi — jismoniy shaxs (yakka tartibdagi tadbirkor) maʼlumotlari 1. Jismoniy shaxsning shaxsiy identifikatsiya raqami: 2. Telefon raqami: 3. Yakka tartibdagi tadbirkor guvohnomasi maʼlumotlari (roʻyxatdan oʻtkazish raqami va sanasi): III. Tovar (shartnoma) haqida maʼlumotlar 1. Sertifikat beriladigan shartnoma(lar)ning rekviziti va predmeti: 2. Ariza beruvchining mazkur shartnoma(lar) boʻyicha majburiyatlari, ularni bajarish tartibi va muddatlari: 3. Ariza beruvchi shartnoma(lar) boʻyicha oʻz majburiyatlarini lozim darajada bajarishga toʻsqinlik qilgan deb hisoblaydigan fors-major holatlarning tavsifi (ular sodir boʻlgan joy, vaqt, davr hamda ularning taʼsiri): 4. Fors-major holat amal qilish muddatining boshlanganligi va tugaganligi (agar tugagan boʻlsa): 5. Fors-major holat bilan bogʻliq qoʻshimcha maʼlumotlar (mavjud boʻlsa):
Mahalliy xoʻjalik shartnomalari doirasida yuzaga keladigan yengib boʻlmaydigan kuch (fors-major) holatlarini tasdiqlash tartibi toʻgʻrisidagi nizomga 3-ILOVA
Yengib boʻlmaydigan kuch (fors-major) holatlarini tasdiqlash boʻyicha berilgan sertifikatlar
T/r STIR (mavjud boʻlsa) Talabgor toʻgʻrisida maʼlumot Sertifikat berilgan shartnoma sanasi va raqami Sertifikat seriyasi, tartib raqami va berilgan sanasi Yuridik shaxsning toʻliq nomi va tashkiliy-huquqiy shakli / Yakka tartibdagi tadbirkorning davlat roʻyxatidan oʻtganligi toʻgʻrisidagi guvohnoma rekvizitlari Pochta manzili Elektron pochta manzili (mavjud boʻlsa), telefon raqami 1. 2. 3.
Oʻzbekiston Respublikasining Bosh vaziri A. ARIPOV
Toshkent sh.,
2023-yil 7-iyun,
231-son