📅 2023-yil 3-avgust · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2023 йил 3 август · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 3 августа 2023 г. · Постановления Кабинета Министров
Официальный текст. Официальный документ. Редакционные примечания не включены.
📅 3 August 2023 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
НИЗОМ
СХЕМАСИ
СХЕМАСИ
РЎЙХАТИ
Қишлоқ хўжалиги соҳасига илғор рақамли технологияларни жорий қилишнинг қўшимча чора-тадбирлари тўғрисида
Ўзбекистон Республикаси Президентининг «Ўзбекистон Республикаси қишлоқ хўжалигини ривожлантиришнинг 2020 — 2030 йилларга мўлжалланган стратегиясида белгиланган вазифалар ижросини самарали ташкил этишга доир қўшимча чора-тадбирлар тўғрисида» 2022 йил 7 июндаги ПҚ-273-сон қарори ижросини таъминлаш, шунингдек, қишлоқ хўжалиги соҳасига илғор рақамли технологияларни кенг жорий қилиш орқали ер ва сув ресурсларидан самарали фойдаланиш, экинлар ҳолатини мониторинг қилишнинг идоралараро ахборот тизимларини жорий этиш мақсадида Вазирлар Маҳкамаси қарор қилади:
1. Қуйидагиларни назарда тутувчи «Агроплатформа» ахборот тизимидан фойдаланишни ташкил этиш тартиби тўғрисидаги низом 1-иловага мувофиқ тасдиқлансин:
ахборот тизимининг мақсадлари, функция ва вазифалари, ахборот тизими иштирокчилари ўртасида ахборот алмашиш тартиби;
ахборот тизими оператори ва фойдаланувчининг ҳуқуқ ва мажбуриятлари, ахборот тизимида фойдаланувчининг рўйхатдан ўтиш тартиби;
ахборот тизимидан фойдаланувчилар ўртасида электрон ҳужжатлар алмашиш ва техник хизматлар кўрсатиш тартиби.
2. Ўзбекистон Республикаси Ҳукуматининг 2-иловага мувофиқ айрим қарорларига ўзгартириш ва қўшимчалар киритилсин.
3. Ўзбекистон Республикаси Ҳукуматининг 3-иловага мувофиқ айрим қарорлари ўз кучини йўқотган деб ҳисоблансин.
4. Мазкур қарорнинг бажарилишини назорат қилиш Ўзбекистон Ресубликаси қишлоқ хўжалиги вазири А.Б. Воитов зиммасига юклансин.
Вазирлар Маҳкамасининг 2023 йил 3 августдаги 330-сон қарорига 1-ИЛОВА
«Агроплатформа» ахборот тизимидан фойдаланишни ташкил этиш тартиби тўғрисида
1-боб. Умумий қоидалар
1. Мазкур Низом «Агроплатформа» ахборот тизимининг (кейинги ўринларда — «Агроплатформа» АТ) мақсади, функциялари ва вазифалари, ахборот тизими иштирокчилари ўртасида электрон ҳужжатлар алмашинуви ҳамда ахборот тизимидан фойдаланишни ташкил этиш тартибини белгилайди.
2. Ушбу Низомда қуйидаги асосий тушунчалар қўлланилади:
«Агроплатформа» АТ — Ўзбекистон Республикаси Қишлоқ хўжалиги вазирлигининг (кейинги ўринларда — Қишлоқ хўжалиги вазирлиги) «Рақамли қишлоқ хўжалиги» ягона интеграцион платформаси таркибига кирувчи ҳамда пахта, бошоқли дон, мева-сабзавотлар етиштириш учун имтиёзли кредитларни ажратиш, қишлоқ хўжалиги маҳсулотлари етиштирувчиларга шаффофлик тамойилида хизмат кўрсатиш имкониятларини таъминлаб берадиган ахборот тизими;
«CropAgro» AT — қишлоқ хўжалиги ерларидан фойдаланувчиларнинг таклифларини қабул қилиш, қишлоқ хўжалиги экинларини электрон жойлаштириш, келишиш, маълумот ва ҳисоботларни шакллантириш учун фойдаланиладиган ахборот тизими * ;
буюртмалар — қишлоқ хўжалиги корхоналари томонидан таъминотчи ва хизмат кўрсатувчи ташкилотларга қишлоқ хўжалиги маҳсулотларини етиштиришда сарфланадиган минерал ўгитлар, ёқилғи-мойлаш материаллари, электр энергияси, техник хизматлар ва бошқа маҳсулот, хизматларга бўлган эҳтиёжлар учун буюртмалар;
ваколатли орган — Ўзбекистон Республикаси Қишлоқ хўжалиги вазирлиги;
иштирокчи — «Агроплатформа» АТдан фойдаланишда иштирок этувчи юридик шахслар (Қишлоқ хўжалиги вазирлиги, Сув хўжалиги вазирлиги, Иқтисодиёт ва молия вазирлиги ҳузуридаги Солиқ қўмитаси, Ўзбекистон фермер, деҳқон хўжаликлари ва томорқа ер эгалари кенгаши, Қорақалпоғистон Республикаси Вазирлар Кенгаши, вилоятлар ва Тошкент шаҳар, туман (Қувасой шаҳар) ҳокимликлари, Иқтисодиёт ва молия вазирлиги ҳузуридаги Қишлоқ хўжалигини давлат томонидан қўллаб-қувватлаш жамғармаси, қишлоқ хўжалиги корхоналарига хизмат кўрсатувчи тижорат банклари, суғурта ташкилотлари ва бошқа ташкилотлар);
тизимнинг ҳуқуқий оператори — «Рақамли қишлоқ хўжалиги» ягона интеграцион платформаси таркибига кирувчи барча ахборот ва геоахборот тизимларини жорий этиш, тизимлардан фойдаланувчилар ўртасида шартномавий муносабатларни мувофиқлаштириш учун масъул бўлган «Агросаноатни рақамлаштириш маркази» МЧЖ;
тизимнинг техник оператори — «Агроплатформа» АТни ҳамкорликда ишлаб чиқувчи, ишга тушириш, техник ва дастурий жиҳатдан қўллаб-қувватлашни амалга оширувчи «UZINFOCOM» давлат ахборот тизимларини яратиш ва қўллаб-қувватлаш бўйича ягона интегратор» МЧЖ;
фойдаланувчи — белгиланган тартибда «Агроплатформа» АТда рўйхатдан ўтган қишлоқ хўжалиги маҳсулотлари ишлаб чиқарувчиси;
шахсий кабинет — «Агроплатформа» АТда зарур ахборотни жойлаштириш ва ундан фойдаланишни таъминлайдиган индивидуал саҳифа;
қишлоқ хўжалиги корхоналари — ташкилий-ҳуқуқий шаклидан қатъи назар, пахта, бошоқли дон, мева-сабзавот ва бошқа қишлоқ хўжалиги маҳсулотлари етиштирувчи корхоналар.
3. «Агроплатформа» АТ фаолиятини ташкил этиш билан боғлиқ харажатлар лойиҳа-техник ҳужжатларга асосан ваколатли органнинг бюджетдан ташқари маблағлари, шунингдек, халқаро молия институтлари ва ташкилотларининг грантлари ҳамда қонунчилик ҳужжатларида тақиқланмаган бошқа манбалар ҳисобидан амалга оширилади.
2-боб. «Агроплатформа» АТнинг мақсадлари ва асосий вазифалари
4. «Агроплатформа» АТнинг мақсади қуйидагилардан иборат:
қишлоқ хўжалиги корхоналари, таъминотчи ва хизмат кўрсатувчи ташкилотларни агротехник тадбирларнинг амалга оширилиши бўйича ишончли маълумотлар билан таъминлаш;
қишлоқ хўжалиги маҳсулотлари етиштириш фаолиятини амалга ошириш доирасида идоралараро электрон ҳамкорликни ривожлантиришга кўмаклашиш;
қишлоқ хўжалиги маҳсулотлари етиштирувчиларга замонавий рақамли технологияларга асосланган хизматлар кўрсатиш;
қишлоқ хўжалиги маҳсулотлари етиштириш жараёнидаги мавжуд вақт сарфи ва операцион харажатларни қисқартириш;
қишлоқ хўжалиги маҳсулотлари етиштирувчилар ва уларга тегишли ер участкалари, экинлар тўғрисидаги барча маълумотларни ягона базага жамлаш, қайта ишлаш, масофавий узатиш орқали статистик ҳамда таҳлилий ҳисоботларни йиғиш ва улардан тезкор қарорлар қабул қилишда фойдаланиш;
агросаноат инфратузилмасини ривожлантириш ва агросаноат тармоқларида мавжуд бошқа масалаларни самарали ҳал этиш учун шароитлар яратиш.
5. Қуйидагилар «Агроплатформа» АТнинг асосий вазифалари ҳисобланади:
пахта, бошоқли дон, мева-сабзавот ва бошқа қишлоқ хўжалиги маҳсулотлари етиштириш учун имтиёзли кредитлар ажратиш жараёнларини рақамлаштириш, қишлоқ хўжалиги маҳсулотлари етиштирувчиларга хизматлар кўрсатишни шаффофлик тамойилига риоя этган ҳолда электрон шаклга ўтказиш;
хизматлар кўрсатиш шартномаларини электрон шаклда расмийлаштириш ва уларнинг электрон базасини шакллантириш, қишлоқ хўжалиги маҳсулотлари етиштирувчиларга ажратилган имтиёзли кредитлар ва кўрсатилган хизматлар мониторингини юритиш;
қишлоқ хўжалигига мўлжалланган ерларни ижарага бериш ва экинларни жойлаштириш тўғрисидаги маълумотларни электрон шакллантириш;
қишлоқ хўжалиги маҳсулотларини етиштириш ва реализация қилиш учун электрон тижорат таомилларини жорий этиш ҳамда қишлоқ хўжалиги корхоналари ўртасида ушбу имкониятлардан фойдаланишни тарғиб қилиш;
давлат органлари, таъминотчи ва хизмат кўрсатувчи ташкилотлар, қишлоқ хўжалиги корхоналари ва бошқа ташкилотларни қишлоқ хўжалиги маҳсулотлари етиштирувчиларга бириктирилган ер участкалари тўғрисидаги маълумотлар билан таъминлаш;
буюртманомаларни электрон шаклда юбориш ва қабул қилиш;
кўрсатилган хизматлар ва етказиб берилган маҳсулотлар мониторингини юритиш;
қишлоқ хўжалиги маҳсулотлари етиштиришга оид молиявий, статистик ва таҳлилий маълумотларни олиш;
қишлоқ хўжалиги маҳсулотлари етиштирувчиларнинг суғурталашга оид маълумотларини тижорат банклари ва бошқа манфаатдор ташкилотларга тақдим этиш.
3-боб. «Агроплатформа» AT иштирокчилари ўртасида ахборот алмашинуви
6. «Агроплатформа» АТ иштирокчилари ўртасида ахборот алмашинуви бўйича ҳамкорлик доирасида:
а) Ўзбекистон Республикаси Сув хўжалиги вазирлиги — ҳар бир ҳудуд бўйича экин майдонларининг мелиоратив ҳолати ҳамда уларни сув билан таъминлаш имкониятлари тўғрисидаги маълумотларни шакллантиради ва ҳар йили 1 майга қадар «Агроплатформа» AT («CropAgro» АТ)га жойлаштиради;
б) Ўзбекистон Республикаси Иқтисодиёт ва молия вазирлиги ҳузуридаги:
Кадастр агентлиги — қишлоқ хўжалиги ерлари чегараси, уларга бўлган ҳуқуқ эгалари ҳақидаги ҳамда қишлоқ хўжалиги ерлари контурлари тўғрисидаги маълумотларни ва кўчмас мулкка бўлган ҳуқуқлар давлат реестридан кўчирмаларни электрон маълумот алмашинуви (интеграция) орқали «CropAgro» АТга жойлаштириб боради;
Қишлоқ хўжалигини давлат томонидан қўллаб-қувватлаш жамғармаси — «Агроплатформа» AT орқали тижорат банкларидан электрон буюртмаларни қабул қилади ва ушбу буюртмаларга кўра қишлоқ хўжалиги маҳсулотлари етиштирувчилари учун имтиёзли кредитларни тижорат банкларига жойлаштириб боради;
в) қишлоқ хўжалиги маҳсулотлари етиштирувчилари — хизмат кўрсатувчи тижорат банкларига ариза ва кредит буюртманомаларини электрон шаклда тақдим этади, тижорат банклари — тақдим этилган электрон буюртманомаларга асосан кредитларни ажратиб боради;
г) Ўзбекистон фермер, деҳқон хўжаликлари ва томорқа ер эгалари кенгаши ҳузуридаги Фермер хўжаликларида бухгалтерия ҳисоби ва ҳисоботини юритиш маркази — қишлоқ хўжалиги ерларидан фойдаланувчиларга «Агроплатформа» AT имкониятларидан тўлиқ ва самарали фойдаланиш борасида кўмаклашади;
е) қишлоқ хўжалиги корхоналари — ажратилган имтиёзли кредитлар ҳисобидан етиштирилган ҳосил, омборга қабул қилинган хом ашё, тайёр ва ярим тайёр маҳсулотлар бўйича маълумотларни «Агроплатформа» АТга жойлаштириб боради;
ж) агрокластерлар — қишлоқ хўжалиги маҳсулотлари етиштирувчилари билан шартномавий муносабатларни расмийлаштириш мақсадида электрон шакллантирилган ва корхона раҳбари томонидан имзоланган тижорат таклифларини тақдим этади;
з) ваколатли орган — «Агроплатформа» АТ иштирокчилари ва уларнинг таркибини ҳамда маълумотлар шаклланишини мувофиқлаштиради.
7. Тизим операторлари:
«Агроплатформа» АТнинг узлуксиз ишлашини ва ахборот хавфсизлигини таъминлайди;
давлат бошқаруви органлари ва бошқа ташкилотларни, «Агроплатформа» АТ фойдаланувчисини тизимдаги техник носозликлар тўғрисида хабардор қилиб боради;
фойдаланувчига «Агроплатформа» АТдан фойдаланиш учун қулай шароит яратади;
қишлоқ хўжалиги корхоналари, таъминотчи ва хизмат кўрсатувчи ташкилотлар, давлат бошқаруви органлари ва бошқа ташкилотларга «Агроплатформа» АТнинг функционал имкониятларини тақдим этади ҳамда улардан тўлақонли фойдаланишда кўмаклашади.
4-боб. Тизим операторлари ва фойдаланувчининг ҳуқуқ ва мажбуриятлари
8. Тизим операторлари қуйидаги ҳуқуқларга эга:
«Агроплатформа» АТ маълумотларидан хизмат доирасида фойдаланиш;
фойдаланувчи томонидан «Агроплатформа» АТга киритилган маълумотларнинг тўғри ва ишончлигини текшириш.
9. «Агроплатформа» АТ операторларининг мажбуриятлари қуйидагилардан иборат:
«Агроплатформа» АТнинг ҳар бир иштирокчиси томонидан тизимга тақдим этиладиган соҳага доир маълумотларнинг доимий янгилаб борилишини таъминлаш;
«Электрон ҳукумат» тизимининг идоралараро маълумотлар узатиш тармоғига ҳамда «Агроплатформа» АТга жойлаштирилган ахборот алмашинуви объектларидан фойдаланишни ташкил қилиш;
фойдаланувчининг шахсига доир ва тижорат сирлари тўғрисидаги маълумотлари сир сақланишини кафолатлаш;
«Агроплатформа» АТ орқали амалга оширилган операцияларнинг рўйхатга олинишини, операциялар тўғрисида ҳисоботлар шакллантирилишини ва операциялар тўғрисидаги маълумотлар шакллантирилган, жўнатилган ёки қабул қилинган шаклда унинг яхлитлигини ва ўзгармаслигини таъминлаган ҳолда беш йилдан кам бўлмаган муддатда сақланишини таъминлаш.
10. Фойдаланувчи қуйидаги ҳуқуқларга эга:
«Агроплатформа» АТдан ва ундаги маълумотлардан мазкур Низом талаблари доирасида фойдаланиш;
электрон шаклдаги аризаларни тақдим этиш;
шартномаларни электрон шаклда расмийлаштириш.
11. Фойдаланувчининг мажбуриятлари қуйидагилардан иборат:
«Агроплатформа» АТдан фойдаланишда мазкур Низом талабларига қатъий риоя этиш, бошқа фойдаланувчи ва тизим операторлари фаолиятига зарар етказмаслик;
«Агроплатформа» АТ орқали хизматларни олишда ўз фаолиятига оид тўғри ва ишончли маълумотларни тақдим этиш.
5-боб. «Агроплатформа» АТда рўйхатдан ўтиш ва ундан фойдаланиш тартиби
12. Фойдаланувчи Интернет ахборот тармоғидаги расмий веб-сайт орқали «Агроплатформа» АТ имкониятларидан фойдаланиш учун рўйхатдан ўтади.
Бунда фойдаланувчи «Электрон ҳукумат» тизими фойдаланувчиларини идентификациялашнинг ягона ахборот тизимида (OnelD) рўйхатдан ўтган бўлиши шарт.
13. Фойдаланувчи «Агроплатформа» АТда рўйхатдан ўтиш жараёнида қуйидагиларни тақдим этади:
а) жисмоний шахслар учун:
фойдаланувчининг шахсий идентификация рақами (ЖШШИР);
фойдаланувчининг мобил телефон рақами;
фойдаланувчининг электрон почта манзили;
фойдаланувчининг яшаш манзили;
б) юридик шахслар учун:
юридик шахс вакилининг мобил телефон рақами;
юридик шахснинг жойлашган ери ва электрон почта манзили;
юридик шахснинг фаолият йўналиши.
Фойдаланувчининг бошқа маълумотлари идоралараро маълумот алмашинуви орқали олинади.
14. «Агроплатформа» АТдан рўйхатдан ўтиш якуни билан фойдаланувчи ва мазкур ахборот тизими операторлари ўртасида ахборот тизимидан фойдаланиш шартларини қабул қилиш бўйича электрон шаклда шартнома имзоланади.
15. Фойдаланувчи «Агроплатформа» АТга тақдим этилган маълумотларнинг тўғри ва ҳаққонийлиги учун жавобгар ҳисобланади.
16. «Агроплатформа» АТдан қуйидаги мақсадларда фойдаланилади:
қишлоқ хўжалиги экинларини жойлаштириш тўғрисидаги маълумотларни электрон харитада кўрсатиш ва ушбу маълумотларни белгиланган тартибда келишиш;
қишлоқ хўжалиги экинларини жойлаштирилиши тўғрисидаги маълумотларга асосан келгуси ҳосил учун фьючерс шартномаларини имзолаш;
имтиёзли кредитлар олиш учун электрон шаклдаги аризани тақдим этиш ҳамда кредит шартномасини имзолаш;
кредитларни қайтмаслик хавфидан суғурталаш;
қишлоқ хўжалиги ва мелиорация техникаларини лизингга олиш бўйича электрон аризани тақдим этиш ва лизинг шартномасини имзолаш;
қишлоқ хўжалигига доир статистик ва таҳлилий маълумотларни олиш, етиштирилган ҳосилнинг якуний ҳисоб-китобларини мониторинг қилиш.
17. Рўйхатдан ўтган ҳар бир фойдаланувчи учун «Агроплатформа» АТда шахсий кабинет яратилади.
Шахсий кабинетдан ушбу Низомнинг 16-бандида кўрсатилган мақсадларда фойдаланилади.
18. Фойдаланувчи ўз шахсий кабинети орқали амалга оширган ҳаракати учун масъул ҳисобланади.
Тизим операторлари фойдаланувчининг шахсий кабинетидан учинчи шахс рухсатсиз фойдаланганлиги учун жавобгар ҳисобланмайди.
19. Фойдаланувчи томонидан «Агроплатформа» AT орқали тақдим этилган маълумотларда номутаносибликлар аниқланганда, унинг «Агроплатформа» АТдан фойдаланиш ҳуқуқи вақтинча тўхтатилади.
Фойдаланувчи томонидан хатоликлар бартараф этилгандан сўнг унинг «Агроплатформа» АТдан фойдаланиш ҳуқуқи бир иш кунида қайта тикланади.
20. Фойдаланувчининг фаолияти қонунчилик ҳужжатларида белгиланган тартибда тугатилган тақдирда, унинг «Агроплатформа» АТдан фойдаланиш ҳуқуқи ҳам тўхтатилади.
6-боб. Электрон ҳужжат айланиши
21. Фойдаланувчи билан «Агроплатформа» АТдан фойдаланиш бўйича тузилган шартномага мувофиқ белгиланган мажбуриятлар электрон ҳужжат айланиши шаклида амалга оширилади.
22. Фойдаланувчи «Агроплатформа» АТдан фойдаланиш тўғрисидаги шартномани имзолаши билан бирга ушбу ахборот тизими орқали электрон ҳужжат айланишига ўз розилигини билдириши лозим.
23. «Агроплатформа» АТда электрон ҳужжат айланиши жараёнида электрон рақамли имзо калитларидан қонунчилик ҳужжатларида белгиланган тартибда фойдаланилади.
7-боб. «Агроплатформа» АТ бўйича техник хизматлар кўрсатиш
24. «Агроплатформа» АТ операторлари фойдаланувчига куйидаги техник хизматларни кўрсатиш мажбуриятини зиммасига олади:
«Агроплатформа» АТдан фойдаланиш бўйича маслаҳат бериш, ушбу ахборот тизимидан фойдаланиш бўйича фойдаланувчи мурожаатига жавоб қайтариш;
«Агроплатформа» АТ дастурий таъминотида юзага келган ва ушбу ахборот тизимининг функционал имкониятларининг бажарилишига таъсир кўрсатадиган хатоликларни бартараф этиш;
«Агроплатформа» АТда юзага келган узилишлар ва ушбу ахборот тизимига киритилган ўзгартиришлар тўғрисида фойдаланувчини ўз вақтида хабардор қилиш.
25. «Агроплатформа» АТ операторлари зарур ҳолларда фойдаланувчига шартнома шартларида белгиланган мажбуриятларга асосан қўшимча техник ёрдам кўрсатиши мумкин.
8-боб. Форс-мажор ҳолатлар
26. Форс-мажор ҳолатлари юзага келганда тарафлар мазкур ҳолатлар бартараф этилгунига қадар шартномада белгиланган ўзаро мажбуриятларни бажаришдан вақтинча озод қилинади.
27. Форс-мажор ҳолатлари юзага келганлиги ёки бартараф этилганлиги бўйича хабарнома тарафларда мавжуд бўлган барча алоқа воситалари орқали юборилади.
28. «Агроплатформа» АТ операторлари қуйидаги ҳолларда жавобгар ҳисобланмайди:
«Агроплатформа» АТдан фойдаланиш даврида умумий фойдаланиш учун мўлжалланган алоқа тармоқларининг техник носозлиги, фойдаланувчининг Интернет ахборот тармоғидан фойдаланишининг чекланиши, маълумотларни узатиш ва қабул қилиш жараёнидаги алоқа тармоқларидаги бошқа техник носозликлар;
фойдаланувчининг «Агроплатформа» АТга кириши учун рухсатнинг чекланиши;
фойдаланувчининг аппарати ёки дастурий таъминотидаги техник носозликлар;
«Агроплатформа» АТ операторларининг бевосита назорати остида бўлмаган бошқа ҳолатлар.
9-боб. Якунловчи қоидалар
29. «Агроплатформа» АТдан фойдаланиш жараёнида юзага келадиган низо ва келишмовчиликлар қонунчилик ҳужжатларида белгиланган тартибда ҳал этилади.
30. Ушбу Низом талаблари бузилишида айбдор бўлган шахслар қонунчилик ҳужжатларида белгиланган тартибда жавобгар бўладилар.
«Агроплатформа» ахборот тизимидан фойдаланишни ташкил этиш тартиби тўғрисидаги низомга ИЛОВА
«Агроплатформа» АТдан рўйхатдан ўтиш ва ундан фойдаланиш
Босқичлар Субъектлар Тадбирлар Бажариш муддатлари 1-босқич Қишлоқ хўжалиги маҳсулотлари етиштирувчилари (кейинги ўринларда — фойдаланувчи) Интернет ахборот тармоғидаги веб-сайт орқали «Агроплатформа» AT имкониятларидан фойдаланиш учун рўйхатдан ўтади. Ихтиёрий равишда 2-босқич Фойдаланувчи, «Агроплатформа» AT операторлари «Агроплатформа» АТдан фойдаланиш шартларини қабул қилиш бўйича электрон шаклда шартнома имзолайди. Фойдаланувчи «Агроплатформа» АТда рўйхатдан ўтгандан сўнг 3-босқич Фойдаланувчи Шахсий кабинет орқали: қишлоқ хўжалиги экинларини жойлаштирилиши тўғрисидаги маълумотларга асосан келгуси ҳосил учун фьючерс шартномаларини имзолайди; имтиёзли кредитлар олиш учун электрон шаклдаги аризани тақдим этади ҳамда кредит шартномасини имзолайди; кредитларни қайтмаслик хавфидан суғурталайди; қишлоқ хўжалиги ва мелиорация техникаларини лизингга олиш бўйича электрон аризани такдим этади ва лизинг шартномасини имзолайди; қишлоқ хўжалигига доир таҳлилий ва статистик маълумотларни олади ва етиштирилган ҳосилнинг якуний ҳисоб-китобларини мониторинг қилиб боради. Доимий 4-босқич «Агроплатформа» AT операторлари Фойдаланувчи тақдим этган маълумотларда ўзаро номутаносибликлар аниқланганда, фойдаланувчининг «Агроплатформа» АТдан фойдаланишини вақтинча тўхтатади. Номутаносибликлар аниқланган вақтда 5-босқич Фойдаланувчи Тақдим этилган маълумотлардаги номутаносибликларни бартараф этади ва бу тўғрисида «Агроплатформа» АТ операторларини ягона Call маркази орқали хабардор қилади. Ихтиёрий равишда 6-босқич «Агроплатформа» AT операторлари Фойдаланувчи такдим этган маълумотлардаги номутаносибликлар бартараф этилгандан сўнг фойдаланувчининг «Агроплатформа» АТдан фойдаланиш ҳуқуқини тиклайди. Бир иш кунида
Вазирлар Маҳкамасининг 2023 йил 3 августдаги 330-сон қарорига 2-ИЛОВА
Ўзбекистон Республикаси Ҳукуматининг айрим қарорларига киритилаётган ўзгартириш ва қўшимчалар
1. Вазирлар Маҳкамасининг 2019 йил 17 июлдаги 599-сон қарори билан тасдиқланган Қишлоқ хўжалигига мўлжалланган ерларнинг ер кадастрига доир ахборотни вазирликлар ва идораларнинг ҳамда маҳаллий давлат ҳокимияти органларининг расмий веб-сайтларига жойлаштириш ва улардан фойдаланиш тартиби тўғрисидаги низомда :
а) 2-бандда :
олтинчи хатбоши қуйидаги таҳрирда баён этилсин:
«Агроплатформа» АТ — Ўзбекистон Республикаси Қишлоқ хўжалиги вазирлигининг «Рақамли қишлоқ хўжалиги» ягона интеграцион платформаси таркибига кирувчи ҳамда пахта, бошоқли дон, мева-сабзавотлар етиштириш учун имтиёзли кредитларни ажратиш, қишлоқ хўжалиги маҳсулотлари етиштирувчиларга шаффофлик тамойилида хизмат кўрсатиш имкониятларини таъминлаб берадиган ахборот тизими»;
қуйидаги мазмундаги тўққизинчи хатбоши билан тўлдирилсин:
«очиқ электрон харитаси — қишлоқ хўжалиги геопортали»;
б) 7-банднинг «а» кичик банди қуйидаги таҳрирда баён этилсин:
«а) Ўзбекистон Республикаси Иқтисодиёт ва молия вазирлиги ҳузуридаги Кадастр агентлиги, Давлат кадастрлари палатаси (ер участкаси чегаралари бўйича) ҳудудий бўлинмалари»;
в) 8-банддаги «agroonline.uz дастури» сўзлари «Агроплатформа» ахборот тизими» сўзлари билан алмаштирилсин;
г) 9-банднинг «а» кичик банди қуйидаги таҳрирда баён этилсин:
«а) Давлат кадастрлари палатаси ҳудудий бўлинмалари томонидан:
ер участкасининг ердан фойдаланувчилари бўйича номи, хўжалик ва ҳуқуқий режими, жойлашган жойи (манзили), чегараси, майдони, ер тоифалари ва турлари»;
д) 9-банд қуйидаги таҳрирдаги «д» кичик банд билан тўлдирилсин:
«д) Қишлоқ хўжалиги вазирлигининг Тупроқшунослик ва агрокимёвий тадқиқотлар институти ва «Тупроқ таркиби ва репозиторийси, сифати таҳлил маркази» давлат унитар корхонаси томонидан:
тупроқнинг унумдорлиги (балл бонитети) ва сифат хусусиятлари тўғрисидаги маълумотлар»;
е) 10-банддаги «ягона электрон ахборот марказининг agroonline.uz дастурига» сўзлари «қишлоқ хўжалиги геопорталига» сўзлари билан алмаштирилсин;
ж) низомнинг иловасида :
I-блокда:
I-блокнинг номланишидаги «agroonline.uz дастури» сўзлари «қишлоқ хўжалиги геопортали» сўзлари билан алмаштирилсин;
1-босқичнинг «Субъектлар» устунидаги «Ер ресурслари, геодезия, картография ва давлат кадастри давлат қўмитаси, Қорақалпоғистон Республикаси ва вилоятлар ер ресурслари ва давлат кадастри бошқармалари, туман (шаҳар) ер ресурслари ва давлат кадастри бўлимлари» сўзлари «Иқтисодиёт ва молия вазирлиги ҳузуридаги Кадастр агентлиги ва Давлат кадастрлари палатаси ҳудудий бўлинмалари» сўзлари билан алмаштирилсин;
2-босқичнинг «Субъектлар» устунидаги «Қишлоқ хўжалиги вазирлиги ва унинг ҳудудий бўлинмалари ҳузурида ташкил этилган юридик шахс мақомига эга бўлмаган Ягона электрон ахборот маркази» сўзлари «Қишлоқ хўжалиги вазирлигининг туман (Қувасой шаҳар) қишлоқ хўжалиги бўлимлари, «Ўздаверлойиҳа» давлат илмий-лойиҳалаш институти» сўзлари билан алмаштирилсин;
II-блок қуйидаги таҳрирда баён этилсин:
«II. Ер кадастрига оид ахборотлардан фойдаланиш
».
2. Вазирлар Маҳкамасининг «Қишлоқ хўжалиги экинларини оқилона жойлаштириш тартиби тўғрисидаги низомни тасдиқлаш ҳақида» 2020 йил 24 августдаги 505-сон қарорида :
а) 2-банд қуйидаги таҳрирда баён этилсин:
«2. Ўзбекистон Республикаси Қишлоқ хўжалиги вазирлиги, Сув хўжалиги вазирлиги, Иқтисодиёт ва молия вазирлиги ҳамда Инвестициялар, саноат ва савдо вазирлиги ушбу низом талабларидан келиб чиққан ҳолда ўзларига юклатилган вазифаларни ўз вақтида бажарилишини таъминласин»;
б) иловада :
2-банднинг биринчи хатбоши қуйидаги таҳрирда баён этилсин:
«2. Суғориладиган ва лалми экин ерларида қишлоқ хўжалиги экинлари, биринчи навбатда, фермер хўжаликлари ва бошқа қишлоқ хўжалиги ташкилотларининг таклифлари, ихтисослашуви, ҳудудларнинг табиий иқлим шароити ва сув билан таъминланганлик даражаси ҳамда ички ва ташқи бозор талаблари, ерларнинг мелиоратив ҳолати ва тупроқ унумдорлиги, моддий-техника, меҳнат ва бошқа ресурслар билан таъминланганлик даражаси таҳлил қилинган ҳолда оқилона жойлаштирилади»;
3-банд қуйидаги таҳрирдаги иккинчи хатбоши билан тўлдирилсин:
«CropAgro» AT — қишлоқ хўжалиги ерларидан фойдаланувчиларнинг таклифларини қабул қилиш, қишлоқ хўжалиги экинларини электрон жойлаштириш, келишиш, маълумот ва ҳисоботларни шакллантириш учун фойдаланиладиган ахборот тизими»;
иккинчи — ўн учинчи хатбошилар тегишлича учинчи — ўн тўртинчи хатбошилар деб ҳисоблансин;
5-банд қуйидаги таҳрирдаги тўртинчи — еттинчи хатбошилар билан тўлдирилсин:
«ер ҳисоботи бўйича қишлоқ хўжалиги экинлари жойлаштириладиган ер майдонларини таҳлил қилади;
қишлоқ хўжалиги экинлари жойлаштириладиган майдонларнинг чегаралари ва ердан фойдаланувчилар кесимидаги хариталарни туман (Қувасой шаҳар) ҳокимликларига ва туман қишлоқ хўжалиги бўлимларига тақдим этади;
қишлоқ хўжалиги экинларини жойлаштиради ҳамда экин майдонларининг жойлашган чегаралари бўйича тупроқ балл-бонитети тўғрилигини ва ишончлилигини таъминлайди.
Бунда, ер ҳисоботи, қишлоқ хўжалиги экинларини жойлаштириш учун ер майдонлари ва уларнинг фойдаланувчилари кесимидаги хариталар Ўзбекистон Республикаси Иқтисодиёт ва молия вазирлиги ҳузуридаги Кадастр агентлиги томонидан электрон шаклда ишлаб чиқилади ҳамда Қишлоқ хўжалиги вазирлигига тақдим этилади»;
6-банд чиқариб ташлансин;
7 ва 8-бандлар қуйидаги таҳрирда баён этилсин:
«7. Ўзбекистон Республикаси Сув хўжалиги вазирлиги ҳар бир ҳудуд (контур) бўйича экин майдонларининг мелиоратив ҳолати ва сув билан таъминлаш имкониятлари тўғрисидаги объектив маълумотларни шакллантиради ҳамда «CropAgro» АТга жойлаштиради.
8. Ўзбекистон Республикаси Иқтисодиёт ва молия вазирлиги ички ва ташқи бозор талабларини инобатга олган ҳолда, қишлоқ хўжалиги маҳсулотлари ишлаб чиқаришнинг йиллик прогноз ҳажмларини туманлар кесимида шакллантиради ва Қишлоқ хўжалиги вазирлигига тақдим этади»;
9-бандда :
биринчи хатбоши қуйидаги таҳрирда баён этилсин:
«9. Ўзбекистон Республикаси Инвестициялар, саноат ва савдо вазирлиги»;
учинчи хатбоши қуйидаги таҳрирда баён этилсин:
«ташқи бозорларда қишлоқ хўжалиги маҳсулотлари турлари бўйича савдо айланмаси ва ҳажмлари тўғрисидаги маълумотларни давлатлар кесимида шакллантиради ва Қишлоқ хўжалиги вазирлигига тақдим этади»;
11-бандда :
биринчи хатбошидаги «Вазирлар Маҳкамаси ҳузуридаги» сўзлари «Ўзбекистон Республикаси Қишлоқ хўжалиги вазирлиги ҳузуридаги» сўзлари билан алмаштирилсин;
учинчи хатбошидаги «жойлаштирилиши» сўзидан кейин «ва унга мувофиқ тўлиқ экилиши» сўзлари билан тўлдирилсин;
13-банд қуйидаги таҳрирда баён этилсин:
«13. Ўзбекистон Республикаси Инвестициялар, саноат ва савдо вазирлиги охирги уч йиллик статистик маълумотларга асосланган ҳолда хорижий давлатлар кесимида қишлоқ хўжалиги маҳсулотларининг аниқ турларини экспорт қилиш талаблари ва ҳажмлари тўғрисидаги таклифларни ҳар йили апрель ойида Қишлоқ хўжалиги вазирлигига такдим этади»;
14-банднинг биринчи ва иккинчи хатбошилар қуйидаги таҳрирда баён этилсин:
«14. Туман (Қувасой шаҳар) ҳокимликлари ҳар йили 1 июлга қадар қишлоқ хўжалиги экинларини мустақил жойлаштириш бўйича қишлоқ хўжалиги ерларидан фойдаланувчиларнинг таклифларини «CropAgro» AT орқали қабул қилади;
қишлоқ хўжалиги ерларидан фойдаланувчиларнинг таклифлари туман (Қувасой шаҳар) қишлоқ хўжалиги бўлимлари, ирригация бўлимлари ҳамда фермер, деҳқон хўжаликлари ва томорқа ер эгалари кенгашлари томонидан кўриб чиқилишини таъминлайди»;
15-банд қуйидаги таҳрирда баён этилсин:
«15. Қишлоқ хўжалиги экинларини жойлаштиришда туман (Қувасой шаҳар) ирригация бўлимларидан экин майдонларининг сув билан таъминланганлик даражаси тўғрисида хулоса олинади ва «CropAgro» АТга жойлаштирилади»;
16-бандда :
биринчи хатбоши қуйидаги таҳрирда баён этилсин:
«16. Туман (Қувасой шаҳар) ҳокимлиги туман ва фермерлар кесимида киритилган экинларни жойлаштириш таклифларини уч иш кунида «CropAgro» АТда электрон рақамли имзо билан тасдиқлайди, бу ҳақида тизимда автоматик тарзда маълумотнома шакллантирилади. Қуйидаги ҳолларда таклифлар рад этилиши мумкин»;
бешинчи хатбошиси қуйидаги таҳрирда баён этилсин:
«Туман (Қувасой шаҳар) ҳокимлиги бу ҳақида уч кун ичида рад этиш сабабларини «CropAgro» АТга жойлаштиради ва фойдаланувчиларни тизим орқали хабардор қилади»;
18-бандда :
биринчи хатбоши қуйидаги таҳрирда баён этилсин:
«18. Ўзбекистон Республикаси Қишлоқ хўжалиги вазирлиги ҳузуридаги «Ўздаверлойиҳа» институтининг ҳудудий бўлинмаси туман (Қувасой шаҳар) қишлоқ хўжалиги бўлимлари билан биргаликда қишлоқ хўжалиги ерларидан фойдаланувчиларнинг таклифларини умумлаштириш асосида қишлоқ хўжалиги экинларини контурлар кесимида жойлаштиради»;
қуйидаги таҳрирдаги иккинчи хатбоши билан тўлдирилсин:
«Туман (Қувасой шаҳар) қишлоқ хўжалиги бўлимлари ирригация бўлимлари, фермер, деҳқон хўжаликлари ва томорқа ер эгалари кенгашлари, Тупроқшунослик ва агрокимёвий тадқиқотлар институти, «Тупроқ таркиби ва репозиторийси, сифати таҳлил маркази» давлат унитар корхонаси билан биргаликда қишлоқ хўжалиги экинларининг контурлар кесимида жойлаштирилишини кўриб чиқади, зарур ҳолларда қўшимча ва тўлдиришлар киритади ҳамда электрон рақамли имзо билан тасдиқлайди»;
иккинчи ва учинчи хатбошилар тегишлича учинчи ва тўртинчи хатбошилар деб ҳисоблансин;
тўртинчи хатбошидаги «ер ресурслари ва давлат кадастри бўлими,» сўзлари чиқариб ташлансин;
19-бандда :
биринчи хатбоши чиқариб ташлансин;
иккинчи хатбошидаги «тақдим этилган» сўзлари чиқариб ташлансин;
иккинчи хатбоши биринчи хатбоши деб ҳисоблансин;
20-банднинг биринчи хатбошидаги «ер ресурслари ва давлат кадастри бўлими,» сўзлари чиқариб ташлансин;
21-банднинг биринчи хатбоши қуйидаги таҳрирда баён этилсин:
«21. Туман (Қувасой шаҳар) ҳокимлиги қишлоқ хўжалиги экинларини жойлаштириш натижалари бўйича тегишли қарорни 5 иш кунида маҳаллий ижро этувчи ҳокимият органлари томонидан қабул қилинадиган қарорларни ишлаб чиқиш, келишиш ва рўйхатдан ўтказишнинг ягона электрон тизими — «E-qaror» орқали қабул қилади»;
23-банднинг биринчи хатбошидаги «10 июнга қадар» сўзлари «20 августга қадар» сўзлари билан алмаштирилсин;
24-банд қуйидаги таҳрирда баён этилсин:
«24. Ўзбекистон Республикаси Қишлоқ хўжалиги вазирлиги туман (Қувасой шаҳар) ҳокимларининг қишлоқ хўжалиги экинларини жойлаштириш бўйича қарорларини умумлаштирган ҳолда, келгуси йил ҳосили учун қишлоқ хўжалиги экинларини жойлаштиришнинг прогноз кўрсаткичларини www.agro.uz сайти ва ҳудудларнинг қишлоқ хўжалиги геопорталларида эълон қилади»;
25-банд чиқариб ташлансин;
26-банднинг биринчи хатбоши қуйидаги таҳрирда баён этилсин:
«26. Қишлоқ хўжалиги экинларини жойлаштириш натижалари мониторинги Ўзбекистон Республикаси Қишлоқ хўжалиги вазирлиги ҳузуридаги «Ўздаверлойиҳа» давлат илмий-лойиҳалаш институти томонидан юритилади»;
низомга илова қуйидаги таҳрирда баён этилсин:
«Қишлоқ хўжалиги экинларини оқилона жойлаштириш ишларини амалга ошириш
Босқичлар Субъектлар Тадбирлар Бажариш муддатлари 1-босқич Иқтисодиёт ва молия вазирлиги ҳузуридаги Кадастр агентлиги Қишлоқ хўжалигига мўлжалланган ер участкаси кадастр рақами, фойдаланувчиси, контур рақами, чегаралари, ер тури ва географик жойлашуви, майдони (гектарда) ва бошқа маълумотларни интеграция орқали тақдим этади. Доимий 2-босқич «Агросаноатни рақамлаштириш маркази» МЧЖ «CropAgro» АТда маълумотларни йиғиш, сақлаш, ишлов бериш, фойдаланувчиларни техник жиҳатдан қўллаб-қувватлаш, ҳисоботларни автоматик шакллантириш, инсон омилини қисқартириш бўйича дастурий ечимларни жорий этади ва такомиллаштириб боради. Доимий 3-босқич Сув хўжалиги вазирлиги Иқтисодиёт ва молия вазирлиги Экин майдонларининг мелиоратив ҳолати ва сув билан таъминлаш имконияти тўғрисида; ички ва ташқи бозордаги талабларни инобатга олган ҳолда, қишлоқ хўжалиги маҳсулотларини турлари бўйича ишлаб чиқаришнинг йиллик прогноз ҳажмлари тўғрисида маълумотларни Қишлоқ хўжалиги вазирлигига тақдим этади. Ҳар йили 1 майга қадар 4-босқич Қишлоқ хўжалиги ерларидан фойдаланувчилар «CropAgro» AT орқали қишлоқ хўжалиги экинларини жойлаштириш бўйича таклифларни туман (Қувасой шаҳар) ҳокимлигига киритади. Ҳар йили 1 июлга қадар 5-босқич Туман (Қувасой шаҳар) ҳокимликлари Таклифларни туман (Қувасой шаҳар) қишлоқ хўжалиги бўлими, ирригация бўлими, фермер, деҳқон хўжаликлари ва томорқа ер эгалари кенгаши томонидан кўриб чиқилишини таъминлайди. Уч иш кунида 6-босқич «Ўздаверлойиҳа» институтининг ҳудудий бўлинмалари Туман (Қувасой шаҳар) қишлоқ хўжалиги бўлими билан биргаликда таклифларни умумлаштиради, «CropAgro» АТда қишлоқ хўжалиги экинларини контурлар кесимида жойлаштиради. Ҳар бир экин турини тегишли шартли белгилар асосида 1:10000 миқёсдаги хариталарга туширади. Беш иш кунида 7-босқич Туман (Қувасой шаҳар) қишлоқ хўжалиги бўлими, Фермер, деҳқон хўжаликлари ва томорқа ер эгалари кенгаши, Ирригация бўлими ва Тупроқшунослик ва агрокимёвий тадқиқотлар институти, «Тупроқ таркиби ва репозиторийси, сифати таҳлил маркази» давлат унитар корхонаси Қишлоқ хўжалиги экинларининг контурлар кесимида жойлаштирилишини кўриб чиқади, зарур ҳолларда қўшимча ва тўлдиришлар киритади ҳамда электрон рақамли имзо билан тасдиқлайди. Икки иш кунида 8-босқич Туман (Қувасой шаҳар) ҳокимликлари Қишлоқ хўжалиги экинларини жойлаштириш натижалари бўйича тегишли қарорни маҳаллий ижро этувчи ҳокимият органлари томонидан қабул қилинадиган қарорларни ишлаб чиқиш, келишиш ва рўйхатдан ўтказишнинг ягона электрон тизими — «E-qaror» орқали қабул қилади. Беш иш кунида 9-босқич Қорақалпоғистон Республикаси Вазирлар Кенгаши ва вилоятлар ҳокимликлари Туманлар (Қувасой шаҳар) ҳокимликларининг келгуси йил ҳосили учун суғориладиган ва лалми майдонларга қишлоқ хўжалиги экинларини жойлаштириш тўғрисидаги қарорларини умумлаштирган ҳолда Қишлоқ хўжалиги вазирлигига тақдим этади. Ҳар йили 20 августга қадар 10-босқич «Ўздаверлойиҳа» институти ва унинг ҳудудий бўлинмалари Экинларнинг экилиши ва ҳолати мониторингини юритади. Доимий 11-босқич Қишлоқ хўжалиги вазирлиги Туман (Қувасой шаҳар) ҳокимларининг қишлоқ хўжалиги экинларини жойлаштириш бўйича қарорларини умумлаштирган ҳолда, келгуси йил ҳосили учун қишлоқ хўжалиги экинларини жойлаштиришнинг прогноз кўрсаткичларини www.agro.uz сайти ва ҳудудларнинг қишлоқ хўжалиги геопорталларида эълон қилади. Ҳар йили 10 сентябрга қадар ».
3. Вазирлар Маҳкамасининг «Қишлоқ хўжалиги маҳсулотлари ишлаб чиқарувчиларини давлат томонидан молиявий қўллаб-қувватлашни ташкил этиш тўғрисида» 2021 йил 11 мартдаги 130-сон қарорида :
а) 3 ва 5-бандлардаги «Молия вазирлиги» сўзлари «Иқтисодиёт ва молия вазирлиги» сўзлари билан алмаштирилсин;
4-банддаги «Иқтисодий тараққиёт ва камбағалликни қисқартириш вазирлиги» сўзлари «Иқтисодиёт ва молия вазирлиги» сўзлари билан алмаштирилсин;
б) 1-иловада :
1-банддаги «Молия вазирлиги» сўзлари «Иқтисодиёт ва молия вазирлиги» сўзлари билан алмаштирилсин;
7-банд қуйидаги таҳрирда баён этилсин:
«7. Қарз олувчи кредит олиш учун унинг асосий талаб қилиб олингунча сақланадиган депозит ҳисобварағига хизмат кўрсатаётган тижорат банкига Ўзбекистон Республикаси Қишлоқ хўжалиги вазирлигининг «Агроплатформа» АТ орқали ариза билан бирга қуйидаги ҳужжатларни тақдим этади:
а) Уруғчиликни ривожлантириш маркази таркибидаги элита уруғчилик хўжаликлари ҳамда ер участкасига эгалик ҳуқуқи бўлган пахта-тўқимачилик кластерлари томонидан:
ер участкасига бўлган ҳуқуқни тасдиқловчи ҳужжат (ер участкасини узоқ муддатли ижарага олиш шартномаси ёки кўчмас мулк объектига бўлган ҳуқуқларнинг Давлат рўйхатидан ўтказилганлиги тўғрисида давлат реестри кўчирмаси);
туман (Қувасой шаҳар) ҳокимининг ғўза экинини жойлаштириш тўғрисидаги электрон рақамли имзо билан тасдиқланган маълумотномаси;
Ўзбекистон Республикаси Қишлоқ хўжалиги вазирлигининг туман (Қувасой шаҳар) қишлоқ хўжалиги бўлимлари томонидан тасдиқланган тупроқнинг бир бонитет баллига нисбатан норматив ҳосилдорлиги (центнер/гектар) тўғрисидаги маълумотнома;
б) фермер хўжаликлари билан фьючерс шартномаси асосида фаолият юритадиган пахта-тўқимачилик кластерлари ва кооперациялари томонидан:
фьючерс шартномаси тузилган фермер хўжаликларининг тасдиқланган рўйхати;
туман (Қувасой шаҳар) ҳокимининг ғўза экинини жойлаштириш тўғрисидаги электрон рақамли имзо билан тасдиқланган маълумотномаси;
Ўзбекистон Республикаси Қишлоқ хўжалиги вазирлигининг туман (Қувасой шаҳар) қишлоқ хўжалиги бўлимлари томонидан тасдиқланган тупроқнинг бир бонитет баллига нисбатан норматив ҳосилдорлиги (центнер/гектар) тўғрисидаги маълумотнома»;
11-банд қуйидаги таҳрирда баён этилсин:
«11. Кредит микдори Ўзбекистон Республикаси Қишлоқ хўжалиги вазирлиги томонидан ҳар йили эълон қилинадиган минимал нарх асосида ҳамда тупроқнинг бир бонитет баллига нисбатан норматив ҳосилдорлигини (центнер/гектар) ҳисобга олган ҳолда белгиланади»;
23 8 , 23 9 , 23 15 ва 25-бандлардаги «Молия вазирлиги» сўзлари «Иқтисодиёт ва молия вазирлиги» сўзлари билан алмаштирилсин;
в) 2-иловада :
1-банддаги «Молия вазирлиги» сўзлари «Иқтисодиёт ва молия вазирлиги» сўзлари билан алмаштирилсин;
7-банд қуйидаги таҳрирда баён этилсин:
«7. Қарз олувчи кредит олиш учун унинг асосий талаб қилиб олингунча сақланадиган депозит ҳисобварағига хизмат кўрсатаётган тижорат банкига Ўзбекистон Республикаси Қишлоқ хўжалиги вазирлигининг «Агроплатформа» АТ орқали ариза билан бирга қуйидаги ҳужжатларни тақдим этади:
а) фермер хўжаликлари ва Уруғчиликни ривожлантириш маркази таркибидаги элита уруғчилик хўжаликлари ҳамда ер участкасига эгалик ҳуқуқи бўлган ғаллачилик кластерлари томонидан:
ер участкасига бўлган ҳуқуқни тасдиқловчи ҳужжат (ер участкасини узоқ муддатли ижарага олиш шартномаси ёки кўчмас мулк объектига бўлган ҳуқуқларнинг Давлат рўйхатидан ўтказилганлиги тўғрисида давлат реестри кўчирмаси);
туман (Қувасой шаҳар) ҳокимининг бошоқли дон экинини жойлаштириш тўғрисидаги электрон рақамли имзо билан тасдиқланган маълумотномаси;
Ўзбекистон Республикаси Қишлоқ хўжалиги вазирлигининг туман (Қувасой шаҳар) қишлоқ хўжалиги бўлимлари томонидан тасдиқланган тупроқнинг бир бонитет баллига нисбатан норматив ҳосилдорлиги (центнер/гектар) тўғрисидаги маълумотнома;
б) фермер хўжаликлари билан фьючерс шартномаси асосида фаолият юритадиган ғаллачилик кластерлари ва кооперациялари томонидан:
фьючерс шартномаси тузилган фермер хўжаликларининг тасдиқланган рўйхати;
туман (Қувасой шаҳар) ҳокимининг бошоқли дон экинини жойлаштириш тўғрисидаги электрон рақамли имзо билан тасдиқланган маълумотномаси;
Ўзбекистон Республикаси Қишлоқ хўжалиги вазирлигининг туман (Қувасой шаҳар) қишлоқ хўжалиги бўлимлари томонидан тасдиқланган тупроқнинг бир бонитет баллига нисбатан норматив ҳосилдорлиги (центнер/гектар) тўғрисидаги маълумотнома»;
11-банд қуйидаги таҳрирда баён этилсин:
«11. Кредит миқдори Ўзбекистон Республикаси Қишлоқ хўжалиги вазирлиги томонидан ҳар йили эълон қилинадиган минимал нарх асосида ҳамда тупроқнинг бир бонитет баллига нисбатан норматив ҳосилдорлигини (центнер/гектар) ҳисобга олган ҳолда белгиланади»;
25-банддаги «Молия вазирлиги» сўзлари «Иқтисодиёт ва молия вазирлиги» сўзлари билан алмаштирилсин;
г) 3-иловада :
1-банддаги «Молия вазирлиги» сўзлари «Иқтисодиёт ва молия вазирлиги» сўзлари билан алмаштирилсин;
7-банд қуйидаги таҳрирда баён этилсин:
«7. Қарз олувчи кредит олиш учун унинг асосий талаб қилиб олингунча сақланадиган депозит ҳисобварағига хизмат кўрсатаётган тижорат банкига Ўзбекистон Республикаси Қишлоқ хўжалиги вазирлигининг «Агроплатформа» АТ орқали ариза билан бирга қуйидаги ҳужжатларни тақдим этади:
ер участкасига бўлган ҳуқуқни тасдиқловчи ҳужжат (ер участкасини узоқ муддатли ижарага олиш шартномаси ёки кўчмас мулк объектига бўлган ҳуқуқларнинг Давлат рўйхатидан ўтказилганлиги тўғрисида давлат реестри кўчирмаси);
туман (Қувасой шаҳар) ҳокимининг сабзавот экинларини жойлаштириш тўғрисидаги электрон рақамли имзо билан тасдиқланган маълумотномаси;
Ўзбекистон Республикаси Қишлоқ хўжалиги вазирлигининг туман (Қувасой шаҳар) қишлоқ хўжалиги бўлимлари томонидан тасдиқланган тупроқнинг бир бонитет баллига нисбатан норматив ҳосилдорлиги (центнер/гектар) тўғрисидаги маълумотнома»;
11-банд қуйидаги таҳрирда баён этилсин:
«11. Кредит миқдори Ўзбекистон Республикаси Қишлоқ хўжалиги вазирлиги томонидан ҳар йили эълон қилинадиган минимал нарх асосида ҳамда тупроқнинг бир бонитет баллига нисбатан норматив ҳосилдорлигини (центнер/гектар) ҳисобга олган ҳолда белгиланади»;
25-банддаги «Молия вазирлиги» сўзлари «Иқтисодиёт ва молия вазирлиги» сўзлари билан алмаштирилсин.
4. Вазирлар Маҳкамасининг 2019 йил 9 июлдаги 571-сон қарори билан тасдиқланган Ўзбекистон Республикаси Қишлоқ хўжалиги вазирлиги тўғрисидаги низомнинг 9-банди ўн олтинчи хатбошидаги «Агросаноатни рақамлаштириш маркази» давлат муассасаси» сўзлари «Агросаноатни рақамлаштириш маркази» МЧЖ» сўзлари билан алмаштирилсин.
5. Вазирлар Маҳкамасининг «Ўзбекистон Республикаси агросаноат мажмуи ва қишлоқ хўжалигида рақамлаштириш тизимини ривожлантириш чора-тадбирлари тўғрисида» 2020 йил 17 декабрдаги 794-сон қарорининг 2-бандидаги «Агросаноатни рақамлаштириш маркази» давлат муассасасини» сўзлари «Агросаноатни рақамлаштириш маркази» МЧЖни» сўзлари билан алмаштирилсин.
6. Вазирлар Маҳкамасининг «Қишлоқ хўжалиги ва озиқ-овқат маҳсулотлари йўқотишларини қисқартиришга доир қўшимча чора-тадбирлар тўғрисида» 2021 йил 17 сентябрдаги 574-сон қарорида :
1-банддаги «Агросаноатни рақамлаштириш маркази» давлат муассасасида» сўзлари «Агросаноатни рақамлаштириш маркази» МЧЖ» сўзлари билан алмаштирилсин;
5-банднинг иккинчи хатбошидаги «Агросаноатни рақамлаштириш маркази» давлат муассасаси» сўзлари «Агросаноатни рақамлаштириш маркази» МЧЖ» сўзлари билан алмаштирилсин.
8. Вазирлар Маҳкамасининг «Томорқа хўжаликларида етиштирилган маҳсулотларни кафолатли харид қилиш тизимини молиявий жиҳатдан қўллаб-қувватлаш тўғрисида» 2022 йил 21 февралдаги 81-сон қарорининг 2-банди тўртинчи хатбошидаги ва қарорга илованинг 8-бандидаги «Қишлоқ хўжалиги вазирлиги ҳузуридаги «Агросаноатни рақамлаштириш маркази» давлат муассасасининг «Агросубсидия» ахборот тизими» сўзлари «Қишлоқ хўжалиги вазирлигининг «Агросубсидия» ахборот тизими» сўзлари билан алмаштирилсин.
9. Вазирлар Маҳкамасининг «Қишлоқ хўжалиги маҳсулотларини етиштирувчиларга субсидия бериш ахборот тизимини жорий қилиш чора-тадбирлари тўғрисида» 2022 йил 16 декабрдаги 711-сон қарорининг 3-банди биринчи хатбошидаги ва 1-илованинг 3-бандидаги «Агросаноатни рақамлаштириш маркази» давлат муассасаси» сўзлари «Агросаноатни рақамлаштириш маркази» МЧЖ» сўзлари билан алмаштирилсин.
Вазирлар Маҳкамасининг 2023 йил 3 августдаги 330-сон қарорига 3-ИЛОВА
Ўзбекистон Республикаси Ҳукуматининг ўз кучини йўқотган деб эътироф этилаётган айрим қарорлари
1. Вазирлар Маҳкамасининг «Қишлоқ хўжалиги корхоналари фаолиятига замонавий ахборот-коммуникация технологияларини кенг жорий қилиш чора-тадбирлари тўғрисида» 2018 йил 10 августдаги 645-сон қарори .
2. Вазирлар Маҳкамасининг «Ўзбекистон Республикаси Ҳукуматининг айрим қарорларига ўзгартиришлар киритиш, шунингдек, баъзиларини ўз кучини йўқотган деб ҳисоблаш тўғрисида (Ўзбекистон Республикаси Президентининг «Қишлоқ хўжалиги машинасозлиги соҳасини бошқариш тизимини янада такомиллаштиришга оид чора-тадбирлар тўғрисида» 2020 йил 30 июндаги ПҚ-4765-сон қарори)» 2020 йил 30 октябрдаги 666-сон қарорига 1-илованинг 3-банди .
3. Вазирлар Маҳкамасининг «Ўзбекистон Республикасида ўсимликлар карантини ва ҳимояси тизимини тубдан такомиллаштирилганлиги муносабати билан Ўзбекистон Республикаси ҳукуматининг айрим қарорларига ўзгартириш ва қўшимчалар киритиш, шунингдек, баъзиларини ўз кучини йўқотган деб ҳисоблаш тўғрисида» 2021 йил 15 декабрдаги 752-сон қарорига 1-илованинг 18-банди .
Ўзбекистон Республикасининг Бош вазири А. АРИПОВ
Тошкент ш.,
2023 йил 3 август,
330-сон
Oʻzbekiston Respublikasi Vazirlar Mahkamasining
qarori
NIZOM
SXEMASI
SXEMASI
ROʻYXATI
Qishloq xoʻjaligi sohasiga ilgʻor raqamli texnologiyalarni joriy qilishning qoʻshimcha chora-tadbirlari toʻgʻrisida
Oʻzbekiston Respublikasi Prezidentining “Oʻzbekiston Respublikasi qishloq xoʻjaligini rivojlantirishning 2020 — 2030-yillarga moʻljallangan strategiyasida belgilangan vazifalar ijrosini samarali tashkil etishga doir qoʻshimcha chora-tadbirlar toʻgʻrisida” 2022-yil 7-iyundagi PQ-273-son qarori ijrosini taʼminlash, shuningdek, qishloq xoʻjaligi sohasiga ilgʻor raqamli texnologiyalarni keng joriy qilish orqali yer va suv resurslaridan samarali foydalanish, ekinlar holatini monitoring qilishning idoralararo axborot tizimlarini joriy etish maqsadida Vazirlar Mahkamasi qaror qiladi:
1. Quyidagilarni nazarda tutuvchi “Agroplatforma” axborot tizimidan foydalanishni tashkil etish tartibi toʻgʻrisidagi nizom 1-ilovaga muvofiq tasdiqlansin:
axborot tizimining maqsadlari, funksiya va vazifalari, axborot tizimi ishtirokchilari oʻrtasida axborot almashish tartibi;
axborot tizimi operatori va foydalanuvchining huquq va majburiyatlari, axborot tizimida foydalanuvchining roʻyxatdan oʻtish tartibi;
axborot tizimidan foydalanuvchilar oʻrtasida elektron hujjatlar almashish va texnik xizmatlar koʻrsatish tartibi.
2. Oʻzbekiston Respublikasi Hukumatining 2-ilovaga muvofiq ayrim qarorlariga oʻzgartirish va qoʻshimchalar kiritilsin.
3. Oʻzbekiston Respublikasi Hukumatining 3-ilovaga muvofiq ayrim qarorlari oʻz kuchini yoʻqotgan deb hisoblansin.
4. Mazkur qarorning bajarilishini nazorat qilish Oʻzbekiston Resublikasi qishloq xoʻjaligi vaziri A.B. Voitov zimmasiga yuklansin.
Vazirlar Mahkamasining 2023-yil 3-avgustdagi 330-son qaroriga 1-ILOVA
“Agroplatforma” axborot tizimidan foydalanishni tashkil etish tartibi toʻgʻrisida
1-bob. Umumiy qoidalar
1. Mazkur Nizom “Agroplatforma” axborot tizimining (keyingi oʻrinlarda — “Agroplatforma” AT) maqsadi, funksiyalari va vazifalari, axborot tizimi ishtirokchilari oʻrtasida elektron hujjatlar almashinuvi hamda axborot tizimidan foydalanishni tashkil etish tartibini belgilaydi.
2. Ushbu Nizomda quyidagi asosiy tushunchalar qoʻllaniladi:
“Agroplatforma” AT — Oʻzbekiston Respublikasi Qishloq xoʻjaligi vazirligining (keyingi oʻrinlarda — Qishloq xoʻjaligi vazirligi) “Raqamli qishloq xoʻjaligi” yagona integratsion platformasi tarkibiga kiruvchi hamda paxta, boshoqli don, meva-sabzavotlar yetishtirish uchun imtiyozli kreditlarni ajratish, qishloq xoʻjaligi mahsulotlari yetishtiruvchilarga shaffoflik tamoyilida xizmat koʻrsatish imkoniyatlarini taʼminlab beradigan axborot tizimi;
“CropAgro” AT — qishloq xoʻjaligi yerlaridan foydalanuvchilarning takliflarini qabul qilish, qishloq xoʻjaligi ekinlarini elektron joylashtirish, kelishish, maʼlumot va hisobotlarni shakllantirish uchun foydalaniladigan axborot tizimi * ;
buyurtmalar — qishloq xoʻjaligi korxonalari tomonidan taʼminotchi va xizmat koʻrsatuvchi tashkilotlarga qishloq xoʻjaligi mahsulotlarini yetishtirishda sarflanadigan mineral oʻgitlar, yoqilgʻi-moylash materiallari, elektr energiyasi, texnik xizmatlar va boshqa mahsulot, xizmatlarga boʻlgan ehtiyojlar uchun buyurtmalar;
vakolatli organ — Oʻzbekiston Respublikasi Qishloq xoʻjaligi vazirligi;
ishtirokchi — “Agroplatforma” ATdan foydalanishda ishtirok etuvchi yuridik shaxslar (Qishloq xoʻjaligi vazirligi, Suv xoʻjaligi vazirligi, Iqtisodiyot va moliya vazirligi huzuridagi Soliq qoʻmitasi, Oʻzbekiston fermer, dehqon xoʻjaliklari va tomorqa yer egalari kengashi, Qoraqalpogʻiston Respublikasi Vazirlar Kengashi, viloyatlar va Toshkent shahar, tuman (Quvasoy shahar) hokimliklari, Iqtisodiyot va moliya vazirligi huzuridagi Qishloq xoʻjaligini davlat tomonidan qoʻllab-quvvatlash jamgʻarmasi, qishloq xoʻjaligi korxonalariga xizmat koʻrsatuvchi tijorat banklari, sugʻurta tashkilotlari va boshqa tashkilotlar);
tizimning huquqiy operatori — “Raqamli qishloq xoʻjaligi” yagona integratsion platformasi tarkibiga kiruvchi barcha axborot va geoaxborot tizimlarini joriy etish, tizimlardan foydalanuvchilar oʻrtasida shartnomaviy munosabatlarni muvofiqlashtirish uchun masʼul boʻlgan “Agrosanoatni raqamlashtirish markazi” MCHJ;
tizimning texnik operatori — “Agroplatforma” ATni hamkorlikda ishlab chiquvchi, ishga tushirish, texnik va dasturiy jihatdan qoʻllab-quvvatlashni amalga oshiruvchi “UZINFOCOM” davlat axborot tizimlarini yaratish va qoʻllab-quvvatlash boʻyicha yagona integrator” MCHJ;
foydalanuvchi — belgilangan tartibda “Agroplatforma” ATda roʻyxatdan oʻtgan qishloq xoʻjaligi mahsulotlari ishlab chiqaruvchisi;
shaxsiy kabinet — “Agroplatforma” ATda zarur axborotni joylashtirish va undan foydalanishni taʼminlaydigan individual sahifa;
qishloq xoʻjaligi korxonalari — tashkiliy-huquqiy shaklidan qatʼi nazar, paxta, boshoqli don, meva-sabzavot va boshqa qishloq xoʻjaligi mahsulotlari yetishtiruvchi korxonalar.
3. “Agroplatforma” AT faoliyatini tashkil etish bilan bogʻliq xarajatlar loyiha-texnik hujjatlarga asosan vakolatli organning budjetdan tashqari mablagʻlari, shuningdek, xalqaro moliya institutlari va tashkilotlarining grantlari hamda qonunchilik hujjatlarida taqiqlanmagan boshqa manbalar hisobidan amalga oshiriladi.
2-bob. “Agroplatforma” ATning maqsadlari va asosiy vazifalari
4. “Agroplatforma” ATning maqsadi quyidagilardan iborat:
qishloq xoʻjaligi korxonalari, taʼminotchi va xizmat koʻrsatuvchi tashkilotlarni agrotexnik tadbirlarning amalga oshirilishi boʻyicha ishonchli maʼlumotlar bilan taʼminlash;
qishloq xoʻjaligi mahsulotlari yetishtirish faoliyatini amalga oshirish doirasida idoralararo elektron hamkorlikni rivojlantirishga koʻmaklashish;
qishloq xoʻjaligi mahsulotlari yetishtiruvchilarga zamonaviy raqamli texnologiyalarga asoslangan xizmatlar koʻrsatish;
qishloq xoʻjaligi mahsulotlari yetishtirish jarayonidagi mavjud vaqt sarfi va operatsion xarajatlarni qisqartirish;
qishloq xoʻjaligi mahsulotlari yetishtiruvchilar va ularga tegishli yer uchastkalari, ekinlar toʻgʻrisidagi barcha maʼlumotlarni yagona bazaga jamlash, qayta ishlash, masofaviy uzatish orqali statistik hamda tahliliy hisobotlarni yigʻish va ulardan tezkor qarorlar qabul qilishda foydalanish;
agrosanoat infratuzilmasini rivojlantirish va agrosanoat tarmoqlarida mavjud boshqa masalalarni samarali hal etish uchun sharoitlar yaratish.
5. Quyidagilar “Agroplatforma” ATning asosiy vazifalari hisoblanadi:
paxta, boshoqli don, meva-sabzavot va boshqa qishloq xoʻjaligi mahsulotlari yetishtirish uchun imtiyozli kreditlar ajratish jarayonlarini raqamlashtirish, qishloq xoʻjaligi mahsulotlari yetishtiruvchilarga xizmatlar koʻrsatishni shaffoflik tamoyiliga rioya etgan holda elektron shaklga oʻtkazish;
xizmatlar koʻrsatish shartnomalarini elektron shaklda rasmiylashtirish va ularning elektron bazasini shakllantirish, qishloq xoʻjaligi mahsulotlari yetishtiruvchilarga ajratilgan imtiyozli kreditlar va koʻrsatilgan xizmatlar monitoringini yuritish;
qishloq xoʻjaligiga moʻljallangan yerlarni ijaraga berish va ekinlarni joylashtirish toʻgʻrisidagi maʼlumotlarni elektron shakllantirish;
qishloq xoʻjaligi mahsulotlarini yetishtirish va realizatsiya qilish uchun elektron tijorat taomillarini joriy etish hamda qishloq xoʻjaligi korxonalari oʻrtasida ushbu imkoniyatlardan foydalanishni targʻib qilish;
davlat organlari, taʼminotchi va xizmat koʻrsatuvchi tashkilotlar, qishloq xoʻjaligi korxonalari va boshqa tashkilotlarni qishloq xoʻjaligi mahsulotlari yetishtiruvchilarga biriktirilgan yer uchastkalari toʻgʻrisidagi maʼlumotlar bilan taʼminlash;
buyurtmanomalarni elektron shaklda yuborish va qabul qilish;
koʻrsatilgan xizmatlar va yetkazib berilgan mahsulotlar monitoringini yuritish;
qishloq xoʻjaligi mahsulotlari yetishtirishga oid moliyaviy, statistik va tahliliy maʼlumotlarni olish;
qishloq xoʻjaligi mahsulotlari yetishtiruvchilarning sugʻurtalashga oid maʼlumotlarini tijorat banklari va boshqa manfaatdor tashkilotlarga taqdim etish.
3-bob. “Agroplatforma” AT ishtirokchilari oʻrtasida axborot almashinuvi
6. “Agroplatforma” AT ishtirokchilari oʻrtasida axborot almashinuvi boʻyicha hamkorlik doirasida:
a) Oʻzbekiston Respublikasi Suv xoʻjaligi vazirligi — har bir hudud boʻyicha ekin maydonlarining meliorativ holati hamda ularni suv bilan taʼminlash imkoniyatlari toʻgʻrisidagi maʼlumotlarni shakllantiradi va har yili 1-mayga qadar “Agroplatforma” AT (“CropAgro” AT)ga joylashtiradi;
b) Oʻzbekiston Respublikasi Iqtisodiyot va moliya vazirligi huzuridagi:
Kadastr agentligi — qishloq xoʻjaligi yerlari chegarasi, ularga boʻlgan huquq egalari haqidagi hamda qishloq xoʻjaligi yerlari konturlari toʻgʻrisidagi maʼlumotlarni va koʻchmas mulkka boʻlgan huquqlar davlat reyestridan koʻchirmalarni elektron maʼlumot almashinuvi (integratsiya) orqali “CropAgro” ATga joylashtirib boradi;
Qishloq xoʻjaligini davlat tomonidan qoʻllab-quvvatlash jamgʻarmasi — “Agroplatforma” AT orqali tijorat banklaridan elektron buyurtmalarni qabul qiladi va ushbu buyurtmalarga koʻra qishloq xoʻjaligi mahsulotlari yetishtiruvchilari uchun imtiyozli kreditlarni tijorat banklariga joylashtirib boradi;
v) qishloq xoʻjaligi mahsulotlari yetishtiruvchilari — xizmat koʻrsatuvchi tijorat banklariga ariza va kredit buyurtmanomalarini elektron shaklda taqdim etadi, tijorat banklari — taqdim etilgan elektron buyurtmanomalarga asosan kreditlarni ajratib boradi;
g) Oʻzbekiston fermer, dehqon xoʻjaliklari va tomorqa yer egalari kengashi huzuridagi Fermer xoʻjaliklarida buxgalteriya hisobi va hisobotini yuritish markazi — qishloq xoʻjaligi yerlaridan foydalanuvchilarga “Agroplatforma” AT imkoniyatlaridan toʻliq va samarali foydalanish borasida koʻmaklashadi;
e) qishloq xoʻjaligi korxonalari — ajratilgan imtiyozli kreditlar hisobidan yetishtirilgan hosil, omborga qabul qilingan xom ashyo, tayyor va yarim tayyor mahsulotlar boʻyicha maʼlumotlarni “Agroplatforma” ATga joylashtirib boradi;
j) agroklasterlar — qishloq xoʻjaligi mahsulotlari yetishtiruvchilari bilan shartnomaviy munosabatlarni rasmiylashtirish maqsadida elektron shakllantirilgan va korxona rahbari tomonidan imzolangan tijorat takliflarini taqdim etadi;
z) vakolatli organ — “Agroplatforma” AT ishtirokchilari va ularning tarkibini hamda maʼlumotlar shakllanishini muvofiqlashtiradi.
7. Tizim operatorlari:
“Agroplatforma” ATning uzluksiz ishlashini va axborot xavfsizligini taʼminlaydi;
davlat boshqaruvi organlari va boshqa tashkilotlarni, “Agroplatforma” AT foydalanuvchisini tizimdagi texnik nosozliklar toʻgʻrisida xabardor qilib boradi;
foydalanuvchiga “Agroplatforma” ATdan foydalanish uchun qulay sharoit yaratadi;
qishloq xoʻjaligi korxonalari, taʼminotchi va xizmat koʻrsatuvchi tashkilotlar, davlat boshqaruvi organlari va boshqa tashkilotlarga “Agroplatforma” ATning funksional imkoniyatlarini taqdim etadi hamda ulardan toʻlaqonli foydalanishda koʻmaklashadi.
4-bob. Tizim operatorlari va foydalanuvchining huquq va majburiyatlari
8. Tizim operatorlari quyidagi huquqlarga ega:
“Agroplatforma” AT maʼlumotlaridan xizmat doirasida foydalanish;
foydalanuvchi tomonidan “Agroplatforma” ATga kiritilgan maʼlumotlarning toʻgʻri va ishonchligini tekshirish.
9. “Agroplatforma” AT operatorlarining majburiyatlari quyidagilardan iborat:
“Agroplatforma” ATning har bir ishtirokchisi tomonidan tizimga taqdim etiladigan sohaga doir maʼlumotlarning doimiy yangilab borilishini taʼminlash;
“Elektron hukumat” tizimining idoralararo maʼlumotlar uzatish tarmogʻiga hamda “Agroplatforma” ATga joylashtirilgan axborot almashinuvi obyektlaridan foydalanishni tashkil qilish;
foydalanuvchining shaxsiga doir va tijorat sirlari toʻgʻrisidagi maʼlumotlari sir saqlanishini kafolatlash;
“Agroplatforma” AT orqali amalga oshirilgan operatsiyalarning roʻyxatga olinishini, operatsiyalar toʻgʻrisida hisobotlar shakllantirilishini va operatsiyalar toʻgʻrisidagi maʼlumotlar shakllantirilgan, joʻnatilgan yoki qabul qilingan shaklda uning yaxlitligini va oʻzgarmasligini taʼminlagan holda besh yildan kam boʻlmagan muddatda saqlanishini taʼminlash.
10. Foydalanuvchi quyidagi huquqlarga ega:
“Agroplatforma” ATdan va undagi maʼlumotlardan mazkur Nizom talablari doirasida foydalanish;
elektron shakldagi arizalarni taqdim etish;
shartnomalarni elektron shaklda rasmiylashtirish.
11. Foydalanuvchining majburiyatlari quyidagilardan iborat:
“Agroplatforma” ATdan foydalanishda mazkur Nizom talablariga qatʼiy rioya etish, boshqa foydalanuvchi va tizim operatorlari faoliyatiga zarar yetkazmaslik;
“Agroplatforma” AT orqali xizmatlarni olishda oʻz faoliyatiga oid toʻgʻri va ishonchli maʼlumotlarni taqdim etish.
5-bob. “Agroplatforma” ATda roʻyxatdan oʻtish va undan foydalanish tartibi
12. Foydalanuvchi Internet axborot tarmogʻidagi rasmiy veb-sayt orqali “Agroplatforma” AT imkoniyatlaridan foydalanish uchun roʻyxatdan oʻtadi.
Bunda foydalanuvchi “Elektron hukumat” tizimi foydalanuvchilarini identifikatsiyalashning yagona axborot tizimida (OnelD) roʻyxatdan oʻtgan boʻlishi shart.
13. Foydalanuvchi “Agroplatforma” ATda roʻyxatdan oʻtish jarayonida quyidagilarni taqdim etadi:
a) jismoniy shaxslar uchun:
foydalanuvchining shaxsiy identifikatsiya raqami (JSHSHIR);
foydalanuvchining mobil telefon raqami;
foydalanuvchining elektron pochta manzili;
foydalanuvchining yashash manzili;
b) yuridik shaxslar uchun:
yuridik shaxs vakilining mobil telefon raqami;
yuridik shaxsning joylashgan yeri va elektron pochta manzili;
yuridik shaxsning faoliyat yoʻnalishi.
Foydalanuvchining boshqa maʼlumotlari idoralararo maʼlumot almashinuvi orqali olinadi.
14. “Agroplatforma” ATdan roʻyxatdan oʻtish yakuni bilan foydalanuvchi va mazkur axborot tizimi operatorlari oʻrtasida axborot tizimidan foydalanish shartlarini qabul qilish boʻyicha elektron shaklda shartnoma imzolanadi.
15. Foydalanuvchi “Agroplatforma” ATga taqdim etilgan maʼlumotlarning toʻgʻri va haqqoniyligi uchun javobgar hisoblanadi.
16. “Agroplatforma” ATdan quyidagi maqsadlarda foydalaniladi:
qishloq xoʻjaligi ekinlarini joylashtirish toʻgʻrisidagi maʼlumotlarni elektron xaritada koʻrsatish va ushbu maʼlumotlarni belgilangan tartibda kelishish;
qishloq xoʻjaligi ekinlarini joylashtirilishi toʻgʻrisidagi maʼlumotlarga asosan kelgusi hosil uchun fyuchers shartnomalarini imzolash;
imtiyozli kreditlar olish uchun elektron shakldagi arizani taqdim etish hamda kredit shartnomasini imzolash;
kreditlarni qaytmaslik xavfidan sugʻurtalash;
qishloq xoʻjaligi va melioratsiya texnikalarini lizingga olish boʻyicha elektron arizani taqdim etish va lizing shartnomasini imzolash;
qishloq xoʻjaligiga doir statistik va tahliliy maʼlumotlarni olish, yetishtirilgan hosilning yakuniy hisob-kitoblarini monitoring qilish.
17. Roʻyxatdan oʻtgan har bir foydalanuvchi uchun “Agroplatforma” ATda shaxsiy kabinet yaratiladi.
Shaxsiy kabinetdan ushbu Nizomning 16-bandida koʻrsatilgan maqsadlarda foydalaniladi.
18. Foydalanuvchi oʻz shaxsiy kabineti orqali amalga oshirgan harakati uchun masʼul hisoblanadi.
Tizim operatorlari foydalanuvchining shaxsiy kabinetidan uchinchi shaxs ruxsatsiz foydalanganligi uchun javobgar hisoblanmaydi.
19. Foydalanuvchi tomonidan “Agroplatforma” AT orqali taqdim etilgan maʼlumotlarda nomutanosibliklar aniqlanganda, uning “Agroplatforma” ATdan foydalanish huquqi vaqtincha toʻxtatiladi.
Foydalanuvchi tomonidan xatoliklar bartaraf etilgandan soʻng uning “Agroplatforma” ATdan foydalanish huquqi bir ish kunida qayta tiklanadi.
20. Foydalanuvchining faoliyati qonunchilik hujjatlarida belgilangan tartibda tugatilgan taqdirda, uning “Agroplatforma” ATdan foydalanish huquqi ham toʻxtatiladi.
6-bob. Elektron hujjat aylanishi
21. Foydalanuvchi bilan “Agroplatforma” ATdan foydalanish boʻyicha tuzilgan shartnomaga muvofiq belgilangan majburiyatlar elektron hujjat aylanishi shaklida amalga oshiriladi.
22. Foydalanuvchi “Agroplatforma” ATdan foydalanish toʻgʻrisidagi shartnomani imzolashi bilan birga ushbu axborot tizimi orqali elektron hujjat aylanishiga oʻz roziligini bildirishi lozim.
23. “Agroplatforma” ATda elektron hujjat aylanishi jarayonida elektron raqamli imzo kalitlaridan qonunchilik hujjatlarida belgilangan tartibda foydalaniladi.
7-bob. “Agroplatforma” AT boʻyicha texnik xizmatlar koʻrsatish
24. “Agroplatforma” AT operatorlari foydalanuvchiga kuyidagi texnik xizmatlarni koʻrsatish majburiyatini zimmasiga oladi:
“Agroplatforma” ATdan foydalanish boʻyicha maslahat berish, ushbu axborot tizimidan foydalanish boʻyicha foydalanuvchi murojaatiga javob qaytarish;
“Agroplatforma” AT dasturiy taʼminotida yuzaga kelgan va ushbu axborot tizimining funksional imkoniyatlarining bajarilishiga taʼsir koʻrsatadigan xatoliklarni bartaraf etish;
“Agroplatforma” ATda yuzaga kelgan uzilishlar va ushbu axborot tizimiga kiritilgan oʻzgartirishlar toʻgʻrisida foydalanuvchini oʻz vaqtida xabardor qilish.
25. “Agroplatforma” AT operatorlari zarur hollarda foydalanuvchiga shartnoma shartlarida belgilangan majburiyatlarga asosan qoʻshimcha texnik yordam koʻrsatishi mumkin.
8-bob. Fors-major holatlar
26. Fors-major holatlari yuzaga kelganda taraflar mazkur holatlar bartaraf etilguniga qadar shartnomada belgilangan oʻzaro majburiyatlarni bajarishdan vaqtincha ozod qilinadi.
27. Fors-major holatlari yuzaga kelganligi yoki bartaraf etilganligi boʻyicha xabarnoma taraflarda mavjud boʻlgan barcha aloqa vositalari orqali yuboriladi.
28. “Agroplatforma” AT operatorlari quyidagi hollarda javobgar hisoblanmaydi:
“Agroplatforma” ATdan foydalanish davrida umumiy foydalanish uchun moʻljallangan aloqa tarmoqlarining texnik nosozligi, foydalanuvchining Internet axborot tarmogʻidan foydalanishining cheklanishi, maʼlumotlarni uzatish va qabul qilish jarayonidagi aloqa tarmoqlaridagi boshqa texnik nosozliklar;
foydalanuvchining “Agroplatforma” ATga kirishi uchun ruxsatning cheklanishi;
foydalanuvchining apparati yoki dasturiy taʼminotidagi texnik nosozliklar;
“Agroplatforma” AT operatorlarining bevosita nazorati ostida boʻlmagan boshqa holatlar.
9-bob. Yakunlovchi qoidalar
29. “Agroplatforma” ATdan foydalanish jarayonida yuzaga keladigan nizo va kelishmovchiliklar qonunchilik hujjatlarida belgilangan tartibda hal etiladi.
30. Ushbu Nizom talablari buzilishida aybdor boʻlgan shaxslar qonunchilik hujjatlarida belgilangan tartibda javobgar boʻladilar.
“Agroplatforma” axborot tizimidan foydalanishni tashkil etish tartibi toʻgʻrisidagi nizomga ILOVA
“Agroplatforma” ATdan roʻyxatdan oʻtish va undan foydalanish
Bosqichlar Subyektlar Tadbirlar Bajarish muddatlari 1-bosqich Qishloq xoʻjaligi mahsulotlari yetishtiruvchilari (keyingi oʻrinlarda — foydalanuvchi) Internet axborot tarmogʻidagi veb-sayt orqali “Agroplatforma” AT imkoniyatlaridan foydalanish uchun roʻyxatdan oʻtadi. Ixtiyoriy ravishda 2-bosqich Foydalanuvchi, “Agroplatforma” AT operatorlari “Agroplatforma” ATdan foydalanish shartlarini qabul qilish boʻyicha elektron shaklda shartnoma imzolaydi. Foydalanuvchi “Agroplatforma” ATda roʻyxatdan oʻtgandan soʻng 3-bosqich Foydalanuvchi Shaxsiy kabinet orqali: qishloq xoʻjaligi ekinlarini joylashtirilishi toʻgʻrisidagi maʼlumotlarga asosan kelgusi hosil uchun fyuchers shartnomalarini imzolaydi; imtiyozli kreditlar olish uchun elektron shakldagi arizani taqdim etadi hamda kredit shartnomasini imzolaydi; kreditlarni qaytmaslik xavfidan sugʻurtalaydi; qishloq xoʻjaligi va melioratsiya texnikalarini lizingga olish boʻyicha elektron arizani takdim etadi va lizing shartnomasini imzolaydi; qishloq xoʻjaligiga doir tahliliy va statistik maʼlumotlarni oladi va yetishtirilgan hosilning yakuniy hisob-kitoblarini monitoring qilib boradi. Doimiy 4-bosqich “Agroplatforma” AT operatorlari Foydalanuvchi taqdim etgan maʼlumotlarda oʻzaro nomutanosibliklar aniqlanganda, foydalanuvchining “Agroplatforma” ATdan foydalanishini vaqtincha toʻxtatadi. Nomutanosibliklar aniqlangan vaqtda 5-bosqich Foydalanuvchi Taqdim etilgan maʼlumotlardagi nomutanosibliklarni bartaraf etadi va bu toʻgʻrisida “Agroplatforma” AT operatorlarini yagona Call markazi orqali xabardor qiladi. Ixtiyoriy ravishda 6-bosqich “Agroplatforma” AT operatorlari Foydalanuvchi takdim etgan maʼlumotlardagi nomutanosibliklar bartaraf etilgandan soʻng foydalanuvchining “Agroplatforma” ATdan foydalanish huquqini tiklaydi. Bir ish kunida
Vazirlar Mahkamasining 2023-yil 3-avgustdagi 330-son qaroriga 2-ILOVA
Oʻzbekiston Respublikasi Hukumatining ayrim qarorlariga kiritilayotgan oʻzgartirish va qoʻshimchalar
1. Vazirlar Mahkamasining 2019-yil 17-iyuldagi 599-son qarori bilan tasdiqlangan Qishloq xoʻjaligiga moʻljallangan yerlarning yer kadastriga doir axborotni vazirliklar va idoralarning hamda mahalliy davlat hokimiyati organlarining rasmiy veb-saytlariga joylashtirish va ulardan foydalanish tartibi toʻgʻrisidagi nizomda :
a) 2-bandda :
oltinchi xatboshi quyidagi tahrirda bayon etilsin:
“Agroplatforma” AT — Oʻzbekiston Respublikasi Qishloq xoʻjaligi vazirligining “Raqamli qishloq xoʻjaligi” yagona integratsion platformasi tarkibiga kiruvchi hamda paxta, boshoqli don, meva-sabzavotlar yetishtirish uchun imtiyozli kreditlarni ajratish, qishloq xoʻjaligi mahsulotlari yetishtiruvchilarga shaffoflik tamoyilida xizmat koʻrsatish imkoniyatlarini taʼminlab beradigan axborot tizimi”;
quyidagi mazmundagi toʻqqizinchi xatboshi bilan toʻldirilsin:
“ochiq elektron xaritasi — qishloq xoʻjaligi geoportali”;
b) 7-bandning “a” kichik bandi quyidagi tahrirda bayon etilsin:
“a) Oʻzbekiston Respublikasi Iqtisodiyot va moliya vazirligi huzuridagi Kadastr agentligi, Davlat kadastrlari palatasi (yer uchastkasi chegaralari boʻyicha) hududiy boʻlinmalari”;
v) 8-banddagi “agroonline.uz dasturi” soʻzlari “Agroplatforma” axborot tizimi” soʻzlari bilan almashtirilsin;
g) 9-bandning “a” kichik bandi quyidagi tahrirda bayon etilsin:
“a) Davlat kadastrlari palatasi hududiy boʻlinmalari tomonidan:
yer uchastkasining yerdan foydalanuvchilari boʻyicha nomi, xoʻjalik va huquqiy rejimi, joylashgan joyi (manzili), chegarasi, maydoni, yer toifalari va turlari”;
d) 9-band quyidagi tahrirdagi “d” kichik band bilan toʻldirilsin:
“d) Qishloq xoʻjaligi vazirligining Tuproqshunoslik va agrokimyoviy tadqiqotlar instituti va “Tuproq tarkibi va repozitoriysi, sifati tahlil markazi” davlat unitar korxonasi tomonidan:
tuproqning unumdorligi (ball boniteti) va sifat xususiyatlari toʻgʻrisidagi maʼlumotlar”;
e) 10-banddagi “yagona elektron axborot markazining agroonline.uz dasturiga” soʻzlari “qishloq xoʻjaligi geoportaliga” soʻzlari bilan almashtirilsin;
j) nizomning ilovasida :
I-blokda:
I-blokning nomlanishidagi “agroonline.uz dasturi” soʻzlari “qishloq xoʻjaligi geoportali” soʻzlari bilan almashtirilsin;
1-bosqichning “Subyektlar” ustunidagi “Yer resurslari, geodeziya, kartografiya va davlat kadastri davlat qoʻmitasi, Qoraqalpogʻiston Respublikasi va viloyatlar yer resurslari va davlat kadastri boshqarmalari, tuman (shahar) yer resurslari va davlat kadastri boʻlimlari” soʻzlari “Iqtisodiyot va moliya vazirligi huzuridagi Kadastr agentligi va Davlat kadastrlari palatasi hududiy boʻlinmalari” soʻzlari bilan almashtirilsin;
2-bosqichning “Subyektlar” ustunidagi “Qishloq xoʻjaligi vazirligi va uning hududiy boʻlinmalari huzurida tashkil etilgan yuridik shaxs maqomiga ega boʻlmagan Yagona elektron axborot markazi” soʻzlari “Qishloq xoʻjaligi vazirligining tuman (Quvasoy shahar) qishloq xoʻjaligi boʻlimlari, “Oʻzdaverloyiha” davlat ilmiy-loyihalash instituti” soʻzlari bilan almashtirilsin;
II-blok quyidagi tahrirda bayon etilsin:
“II. Yer kadastriga oid axborotlardan foydalanish
”.
2. Vazirlar Mahkamasining “Qishloq xoʻjaligi ekinlarini oqilona joylashtirish tartibi toʻgʻrisidagi nizomni tasdiqlash haqida” 2020-yil 24-avgustdagi 505-son qarorida :
a) 2-band quyidagi tahrirda bayon etilsin:
“2. Oʻzbekiston Respublikasi Qishloq xoʻjaligi vazirligi, Suv xoʻjaligi vazirligi, Iqtisodiyot va moliya vazirligi hamda Investitsiyalar, sanoat va savdo vazirligi ushbu nizom talablaridan kelib chiqqan holda oʻzlariga yuklatilgan vazifalarni oʻz vaqtida bajarilishini taʼminlasin”;
b) ilovada :
2-bandning birinchi xatboshi quyidagi tahrirda bayon etilsin:
“2. Sugʻoriladigan va lalmi ekin yerlarida qishloq xoʻjaligi ekinlari, birinchi navbatda, fermer xoʻjaliklari va boshqa qishloq xoʻjaligi tashkilotlarining takliflari, ixtisoslashuvi, hududlarning tabiiy iqlim sharoiti va suv bilan taʼminlanganlik darajasi hamda ichki va tashqi bozor talablari, yerlarning meliorativ holati va tuproq unumdorligi, moddiy-texnika, mehnat va boshqa resurslar bilan taʼminlanganlik darajasi tahlil qilingan holda oqilona joylashtiriladi”;
3-band quyidagi tahrirdagi ikkinchi xatboshi bilan toʻldirilsin:
“CropAgro” AT — qishloq xoʻjaligi yerlaridan foydalanuvchilarning takliflarini qabul qilish, qishloq xoʻjaligi ekinlarini elektron joylashtirish, kelishish, maʼlumot va hisobotlarni shakllantirish uchun foydalaniladigan axborot tizimi”;
ikkinchi — oʻn uchinchi xatboshilar tegishlicha uchinchi — oʻn toʻrtinchi xatboshilar deb hisoblansin;
5-band quyidagi tahrirdagi toʻrtinchi — yettinchi xatboshilar bilan toʻldirilsin:
“yer hisoboti boʻyicha qishloq xoʻjaligi ekinlari joylashtiriladigan yer maydonlarini tahlil qiladi;
qishloq xoʻjaligi ekinlari joylashtiriladigan maydonlarning chegaralari va yerdan foydalanuvchilar kesimidagi xaritalarni tuman (Quvasoy shahar) hokimliklariga va tuman qishloq xoʻjaligi boʻlimlariga taqdim etadi;
qishloq xoʻjaligi ekinlarini joylashtiradi hamda ekin maydonlarining joylashgan chegaralari boʻyicha tuproq ball-boniteti toʻgʻriligini va ishonchliligini taʼminlaydi.
Bunda, yer hisoboti, qishloq xoʻjaligi ekinlarini joylashtirish uchun yer maydonlari va ularning foydalanuvchilari kesimidagi xaritalar Oʻzbekiston Respublikasi Iqtisodiyot va moliya vazirligi huzuridagi Kadastr agentligi tomonidan elektron shaklda ishlab chiqiladi hamda Qishloq xoʻjaligi vazirligiga taqdim etiladi”;
6-band chiqarib tashlansin;
7 va 8-bandlar quyidagi tahrirda bayon etilsin:
“7. Oʻzbekiston Respublikasi Suv xoʻjaligi vazirligi har bir hudud (kontur) boʻyicha ekin maydonlarining meliorativ holati va suv bilan taʼminlash imkoniyatlari toʻgʻrisidagi obyektiv maʼlumotlarni shakllantiradi hamda “CropAgro” ATga joylashtiradi.
8. Oʻzbekiston Respublikasi Iqtisodiyot va moliya vazirligi ichki va tashqi bozor talablarini inobatga olgan holda, qishloq xoʻjaligi mahsulotlari ishlab chiqarishning yillik prognoz hajmlarini tumanlar kesimida shakllantiradi va Qishloq xoʻjaligi vazirligiga taqdim etadi”;
9-bandda :
birinchi xatboshi quyidagi tahrirda bayon etilsin:
“9. Oʻzbekiston Respublikasi Investitsiyalar, sanoat va savdo vazirligi”;
uchinchi xatboshi quyidagi tahrirda bayon etilsin:
“tashqi bozorlarda qishloq xoʻjaligi mahsulotlari turlari boʻyicha savdo aylanmasi va hajmlari toʻgʻrisidagi maʼlumotlarni davlatlar kesimida shakllantiradi va Qishloq xoʻjaligi vazirligiga taqdim etadi”;
11-bandda :
birinchi xatboshidagi “Vazirlar Mahkamasi huzuridagi” soʻzlari “Oʻzbekiston Respublikasi Qishloq xoʻjaligi vazirligi huzuridagi” soʻzlari bilan almashtirilsin;
uchinchi xatboshidagi “joylashtirilishi” soʻzidan keyin “va unga muvofiq toʻliq ekilishi” soʻzlari bilan toʻldirilsin;
13-band quyidagi tahrirda bayon etilsin:
“13. Oʻzbekiston Respublikasi Investitsiyalar, sanoat va savdo vazirligi oxirgi uch yillik statistik maʼlumotlarga asoslangan holda xorijiy davlatlar kesimida qishloq xoʻjaligi mahsulotlarining aniq turlarini eksport qilish talablari va hajmlari toʻgʻrisidagi takliflarni har yili aprel oyida Qishloq xoʻjaligi vazirligiga takdim etadi”;
14-bandning birinchi va ikkinchi xatboshilar quyidagi tahrirda bayon etilsin:
“14. Tuman (Quvasoy shahar) hokimliklari har yili 1-iyulga qadar qishloq xoʻjaligi ekinlarini mustaqil joylashtirish boʻyicha qishloq xoʻjaligi yerlaridan foydalanuvchilarning takliflarini “CropAgro” AT orqali qabul qiladi;
qishloq xoʻjaligi yerlaridan foydalanuvchilarning takliflari tuman (Quvasoy shahar) qishloq xoʻjaligi boʻlimlari, irrigatsiya boʻlimlari hamda fermer, dehqon xoʻjaliklari va tomorqa yer egalari kengashlari tomonidan koʻrib chiqilishini taʼminlaydi”;
15-band quyidagi tahrirda bayon etilsin:
“15. Qishloq xoʻjaligi ekinlarini joylashtirishda tuman (Quvasoy shahar) irrigatsiya boʻlimlaridan ekin maydonlarining suv bilan taʼminlanganlik darajasi toʻgʻrisida xulosa olinadi va “CropAgro” ATga joylashtiriladi”;
16-bandda :
birinchi xatboshi quyidagi tahrirda bayon etilsin:
“16. Tuman (Quvasoy shahar) hokimligi tuman va fermerlar kesimida kiritilgan ekinlarni joylashtirish takliflarini uch ish kunida “CropAgro” ATda elektron raqamli imzo bilan tasdiqlaydi, bu haqida tizimda avtomatik tarzda maʼlumotnoma shakllantiriladi. Quyidagi hollarda takliflar rad etilishi mumkin”;
beshinchi xatboshisi quyidagi tahrirda bayon etilsin:
“Tuman (Quvasoy shahar) hokimligi bu haqida uch kun ichida rad etish sabablarini “CropAgro” ATga joylashtiradi va foydalanuvchilarni tizim orqali xabardor qiladi”;
18-bandda :
birinchi xatboshi quyidagi tahrirda bayon etilsin:
“18. Oʻzbekiston Respublikasi Qishloq xoʻjaligi vazirligi huzuridagi “Oʻzdaverloyiha” institutining hududiy boʻlinmasi tuman (Quvasoy shahar) qishloq xoʻjaligi boʻlimlari bilan birgalikda qishloq xoʻjaligi yerlaridan foydalanuvchilarning takliflarini umumlashtirish asosida qishloq xoʻjaligi ekinlarini konturlar kesimida joylashtiradi”;
quyidagi tahrirdagi ikkinchi xatboshi bilan toʻldirilsin:
“Tuman (Quvasoy shahar) qishloq xoʻjaligi boʻlimlari irrigatsiya boʻlimlari, fermer, dehqon xoʻjaliklari va tomorqa yer egalari kengashlari, Tuproqshunoslik va agrokimyoviy tadqiqotlar instituti, “Tuproq tarkibi va repozitoriysi, sifati tahlil markazi” davlat unitar korxonasi bilan birgalikda qishloq xoʻjaligi ekinlarining konturlar kesimida joylashtirilishini koʻrib chiqadi, zarur hollarda qoʻshimcha va toʻldirishlar kiritadi hamda elektron raqamli imzo bilan tasdiqlaydi”;
ikkinchi va uchinchi xatboshilar tegishlicha uchinchi va toʻrtinchi xatboshilar deb hisoblansin;
toʻrtinchi xatboshidagi “yer resurslari va davlat kadastri boʻlimi,” soʻzlari chiqarib tashlansin;
19-bandda :
birinchi xatboshi chiqarib tashlansin;
ikkinchi xatboshidagi “taqdim etilgan” soʻzlari chiqarib tashlansin;
ikkinchi xatboshi birinchi xatboshi deb hisoblansin;
20-bandning birinchi xatboshidagi “yer resurslari va davlat kadastri boʻlimi,” soʻzlari chiqarib tashlansin;
21-bandning birinchi xatboshi quyidagi tahrirda bayon etilsin:
“21. Tuman (Quvasoy shahar) hokimligi qishloq xoʻjaligi ekinlarini joylashtirish natijalari boʻyicha tegishli qarorni 5 ish kunida mahalliy ijro etuvchi hokimiyat organlari tomonidan qabul qilinadigan qarorlarni ishlab chiqish, kelishish va roʻyxatdan oʻtkazishning yagona elektron tizimi — “E-qaror” orqali qabul qiladi”;
23-bandning birinchi xatboshidagi “10-iyunga qadar” soʻzlari “20-avgustga qadar” soʻzlari bilan almashtirilsin;
24-band quyidagi tahrirda bayon etilsin:
“24. Oʻzbekiston Respublikasi Qishloq xoʻjaligi vazirligi tuman (Quvasoy shahar) hokimlarining qishloq xoʻjaligi ekinlarini joylashtirish boʻyicha qarorlarini umumlashtirgan holda, kelgusi yil hosili uchun qishloq xoʻjaligi ekinlarini joylashtirishning prognoz koʻrsatkichlarini www.agro.uz sayti va hududlarning qishloq xoʻjaligi geoportallarida eʼlon qiladi”;
25-band chiqarib tashlansin;
26-bandning birinchi xatboshi quyidagi tahrirda bayon etilsin:
“26. Qishloq xoʻjaligi ekinlarini joylashtirish natijalari monitoringi Oʻzbekiston Respublikasi Qishloq xoʻjaligi vazirligi huzuridagi “Oʻzdaverloyiha” davlat ilmiy-loyihalash instituti tomonidan yuritiladi”;
nizomga ilova quyidagi tahrirda bayon etilsin:
“Qishloq xoʻjaligi ekinlarini oqilona joylashtirish ishlarini amalga oshirish
Bosqichlar Subyektlar Tadbirlar Bajarish muddatlari 1-bosqich Iqtisodiyot va moliya vazirligi huzuridagi Kadastr agentligi Qishloq xoʻjaligiga moʻljallangan yer uchastkasi kadastr raqami, foydalanuvchisi, kontur raqami, chegaralari, yer turi va geografik joylashuvi, maydoni (gektarda) va boshqa maʼlumotlarni integratsiya orqali taqdim etadi. Doimiy 2-bosqich “Agrosanoatni raqamlashtirish markazi” MCHJ “CropAgro” ATda maʼlumotlarni yigʻish, saqlash, ishlov berish, foydalanuvchilarni texnik jihatdan qoʻllab-quvvatlash, hisobotlarni avtomatik shakllantirish, inson omilini qisqartirish boʻyicha dasturiy yechimlarni joriy etadi va takomillashtirib boradi. Doimiy 3-bosqich Suv xoʻjaligi vazirligi Iqtisodiyot va moliya vazirligi Ekin maydonlarining meliorativ holati va suv bilan taʼminlash imkoniyati toʻgʻrisida; ichki va tashqi bozordagi talablarni inobatga olgan holda, qishloq xoʻjaligi mahsulotlarini turlari boʻyicha ishlab chiqarishning yillik prognoz hajmlari toʻgʻrisida maʼlumotlarni Qishloq xoʻjaligi vazirligiga taqdim etadi. Har yili 1-mayga qadar 4-bosqich Qishloq xoʻjaligi yerlaridan foydalanuvchilar “CropAgro” AT orqali qishloq xoʻjaligi ekinlarini joylashtirish boʻyicha takliflarni tuman (Quvasoy shahar) hokimligiga kiritadi. Har yili 1-iyulga qadar 5-bosqich Tuman (Quvasoy shahar) hokimliklari Takliflarni tuman (Quvasoy shahar) qishloq xoʻjaligi boʻlimi, irrigatsiya boʻlimi, fermer, dehqon xoʻjaliklari va tomorqa yer egalari kengashi tomonidan koʻrib chiqilishini taʼminlaydi. Uch ish kunida 6-bosqich “Oʻzdaverloyiha” institutining hududiy boʻlinmalari Tuman (Quvasoy shahar) qishloq xoʻjaligi boʻlimi bilan birgalikda takliflarni umumlashtiradi, “CropAgro” ATda qishloq xoʻjaligi ekinlarini konturlar kesimida joylashtiradi. Har bir ekin turini tegishli shartli belgilar asosida 1:10000 miqyosdagi xaritalarga tushiradi. Besh ish kunida 7-bosqich Tuman (Quvasoy shahar) qishloq xoʻjaligi boʻlimi, Fermer, dehqon xoʻjaliklari va tomorqa yer egalari kengashi, Irrigatsiya boʻlimi va Tuproqshunoslik va agrokimyoviy tadqiqotlar instituti, “Tuproq tarkibi va repozitoriysi, sifati tahlil markazi” davlat unitar korxonasi Qishloq xoʻjaligi ekinlarining konturlar kesimida joylashtirilishini koʻrib chiqadi, zarur hollarda qoʻshimcha va toʻldirishlar kiritadi hamda elektron raqamli imzo bilan tasdiqlaydi. Ikki ish kunida 8-bosqich Tuman (Quvasoy shahar) hokimliklari Qishloq xoʻjaligi ekinlarini joylashtirish natijalari boʻyicha tegishli qarorni mahalliy ijro etuvchi hokimiyat organlari tomonidan qabul qilinadigan qarorlarni ishlab chiqish, kelishish va roʻyxatdan oʻtkazishning yagona elektron tizimi — “E-qaror” orqali qabul qiladi. Besh ish kunida 9-bosqich Qoraqalpogʻiston Respublikasi Vazirlar Kengashi va viloyatlar hokimliklari Tumanlar (Quvasoy shahar) hokimliklarining kelgusi yil hosili uchun sugʻoriladigan va lalmi maydonlarga qishloq xoʻjaligi ekinlarini joylashtirish toʻgʻrisidagi qarorlarini umumlashtirgan holda Qishloq xoʻjaligi vazirligiga taqdim etadi. Har yili 20-avgustga qadar 10-bosqich “Oʻzdaverloyiha” instituti va uning hududiy boʻlinmalari Ekinlarning ekilishi va holati monitoringini yuritadi. Doimiy 11-bosqich Qishloq xoʻjaligi vazirligi Tuman (Quvasoy shahar) hokimlarining qishloq xoʻjaligi ekinlarini joylashtirish boʻyicha qarorlarini umumlashtirgan holda, kelgusi yil hosili uchun qishloq xoʻjaligi ekinlarini joylashtirishning prognoz koʻrsatkichlarini www.agro.uz sayti va hududlarning qishloq xoʻjaligi geoportallarida eʼlon qiladi. Har yili 10-sentabrga qadar ”.
3. Vazirlar Mahkamasining “Qishloq xoʻjaligi mahsulotlari ishlab chiqaruvchilarini davlat tomonidan moliyaviy qoʻllab-quvvatlashni tashkil etish toʻgʻrisida” 2021-yil 11-martdagi 130-son qarorida :
a) 3 va 5-bandlardagi “Moliya vazirligi” soʻzlari “Iqtisodiyot va moliya vazirligi” soʻzlari bilan almashtirilsin;
4-banddagi “Iqtisodiy taraqqiyot va kambagʻallikni qisqartirish vazirligi” soʻzlari “Iqtisodiyot va moliya vazirligi” soʻzlari bilan almashtirilsin;
b) 1-ilovada :
1-banddagi “Moliya vazirligi” soʻzlari “Iqtisodiyot va moliya vazirligi” soʻzlari bilan almashtirilsin;
7-band quyidagi tahrirda bayon etilsin:
“7. Qarz oluvchi kredit olish uchun uning asosiy talab qilib olinguncha saqlanadigan depozit hisobvaragʻiga xizmat koʻrsatayotgan tijorat bankiga Oʻzbekiston Respublikasi Qishloq xoʻjaligi vazirligining “Agroplatforma” AT orqali ariza bilan birga quyidagi hujjatlarni taqdim etadi:
a) Urugʻchilikni rivojlantirish markazi tarkibidagi elita urugʻchilik xoʻjaliklari hamda yer uchastkasiga egalik huquqi boʻlgan paxta-toʻqimachilik klasterlari tomonidan:
yer uchastkasiga boʻlgan huquqni tasdiqlovchi hujjat (yer uchastkasini uzoq muddatli ijaraga olish shartnomasi yoki koʻchmas mulk obyektiga boʻlgan huquqlarning Davlat roʻyxatidan oʻtkazilganligi toʻgʻrisida davlat reyestri koʻchirmasi);
tuman (Quvasoy shahar) hokimining gʻoʻza ekinini joylashtirish toʻgʻrisidagi elektron raqamli imzo bilan tasdiqlangan maʼlumotnomasi;
Oʻzbekiston Respublikasi Qishloq xoʻjaligi vazirligining tuman (Quvasoy shahar) qishloq xoʻjaligi boʻlimlari tomonidan tasdiqlangan tuproqning bir bonitet balliga nisbatan normativ hosildorligi (sentner/gektar) toʻgʻrisidagi maʼlumotnoma;
b) fermer xoʻjaliklari bilan fyuchers shartnomasi asosida faoliyat yuritadigan paxta-toʻqimachilik klasterlari va kooperatsiyalari tomonidan:
fyuchers shartnomasi tuzilgan fermer xoʻjaliklarining tasdiqlangan roʻyxati;
tuman (Quvasoy shahar) hokimining gʻoʻza ekinini joylashtirish toʻgʻrisidagi elektron raqamli imzo bilan tasdiqlangan maʼlumotnomasi;
Oʻzbekiston Respublikasi Qishloq xoʻjaligi vazirligining tuman (Quvasoy shahar) qishloq xoʻjaligi boʻlimlari tomonidan tasdiqlangan tuproqning bir bonitet balliga nisbatan normativ hosildorligi (sentner/gektar) toʻgʻrisidagi maʼlumotnoma”;
11-band quyidagi tahrirda bayon etilsin:
“11. Kredit mikdori Oʻzbekiston Respublikasi Qishloq xoʻjaligi vazirligi tomonidan har yili eʼlon qilinadigan minimal narx asosida hamda tuproqning bir bonitet balliga nisbatan normativ hosildorligini (sentner/gektar) hisobga olgan holda belgilanadi”;
23 8 , 23 9 , 23 15 va 25-bandlardagi “Moliya vazirligi” soʻzlari “Iqtisodiyot va moliya vazirligi” soʻzlari bilan almashtirilsin;
v) 2-ilovada :
1-banddagi “Moliya vazirligi” soʻzlari “Iqtisodiyot va moliya vazirligi” soʻzlari bilan almashtirilsin;
7-band quyidagi tahrirda bayon etilsin:
“7. Qarz oluvchi kredit olish uchun uning asosiy talab qilib olinguncha saqlanadigan depozit hisobvaragʻiga xizmat koʻrsatayotgan tijorat bankiga Oʻzbekiston Respublikasi Qishloq xoʻjaligi vazirligining “Agroplatforma” AT orqali ariza bilan birga quyidagi hujjatlarni taqdim etadi:
a) fermer xoʻjaliklari va Urugʻchilikni rivojlantirish markazi tarkibidagi elita urugʻchilik xoʻjaliklari hamda yer uchastkasiga egalik huquqi boʻlgan gʻallachilik klasterlari tomonidan:
yer uchastkasiga boʻlgan huquqni tasdiqlovchi hujjat (yer uchastkasini uzoq muddatli ijaraga olish shartnomasi yoki koʻchmas mulk obyektiga boʻlgan huquqlarning Davlat roʻyxatidan oʻtkazilganligi toʻgʻrisida davlat reyestri koʻchirmasi);
tuman (Quvasoy shahar) hokimining boshoqli don ekinini joylashtirish toʻgʻrisidagi elektron raqamli imzo bilan tasdiqlangan maʼlumotnomasi;
Oʻzbekiston Respublikasi Qishloq xoʻjaligi vazirligining tuman (Quvasoy shahar) qishloq xoʻjaligi boʻlimlari tomonidan tasdiqlangan tuproqning bir bonitet balliga nisbatan normativ hosildorligi (sentner/gektar) toʻgʻrisidagi maʼlumotnoma;
b) fermer xoʻjaliklari bilan fyuchers shartnomasi asosida faoliyat yuritadigan gʻallachilik klasterlari va kooperatsiyalari tomonidan:
fyuchers shartnomasi tuzilgan fermer xoʻjaliklarining tasdiqlangan roʻyxati;
tuman (Quvasoy shahar) hokimining boshoqli don ekinini joylashtirish toʻgʻrisidagi elektron raqamli imzo bilan tasdiqlangan maʼlumotnomasi;
Oʻzbekiston Respublikasi Qishloq xoʻjaligi vazirligining tuman (Quvasoy shahar) qishloq xoʻjaligi boʻlimlari tomonidan tasdiqlangan tuproqning bir bonitet balliga nisbatan normativ hosildorligi (sentner/gektar) toʻgʻrisidagi maʼlumotnoma”;
11-band quyidagi tahrirda bayon etilsin:
“11. Kredit miqdori Oʻzbekiston Respublikasi Qishloq xoʻjaligi vazirligi tomonidan har yili eʼlon qilinadigan minimal narx asosida hamda tuproqning bir bonitet balliga nisbatan normativ hosildorligini (sentner/gektar) hisobga olgan holda belgilanadi”;
25-banddagi “Moliya vazirligi” soʻzlari “Iqtisodiyot va moliya vazirligi” soʻzlari bilan almashtirilsin;
g) 3-ilovada :
1-banddagi “Moliya vazirligi” soʻzlari “Iqtisodiyot va moliya vazirligi” soʻzlari bilan almashtirilsin;
7-band quyidagi tahrirda bayon etilsin:
“7. Qarz oluvchi kredit olish uchun uning asosiy talab qilib olinguncha saqlanadigan depozit hisobvaragʻiga xizmat koʻrsatayotgan tijorat bankiga Oʻzbekiston Respublikasi Qishloq xoʻjaligi vazirligining “Agroplatforma” AT orqali ariza bilan birga quyidagi hujjatlarni taqdim etadi:
yer uchastkasiga boʻlgan huquqni tasdiqlovchi hujjat (yer uchastkasini uzoq muddatli ijaraga olish shartnomasi yoki koʻchmas mulk obyektiga boʻlgan huquqlarning Davlat roʻyxatidan oʻtkazilganligi toʻgʻrisida davlat reyestri koʻchirmasi);
tuman (Quvasoy shahar) hokimining sabzavot ekinlarini joylashtirish toʻgʻrisidagi elektron raqamli imzo bilan tasdiqlangan maʼlumotnomasi;
Oʻzbekiston Respublikasi Qishloq xoʻjaligi vazirligining tuman (Quvasoy shahar) qishloq xoʻjaligi boʻlimlari tomonidan tasdiqlangan tuproqning bir bonitet balliga nisbatan normativ hosildorligi (sentner/gektar) toʻgʻrisidagi maʼlumotnoma”;
11-band quyidagi tahrirda bayon etilsin:
“11. Kredit miqdori Oʻzbekiston Respublikasi Qishloq xoʻjaligi vazirligi tomonidan har yili eʼlon qilinadigan minimal narx asosida hamda tuproqning bir bonitet balliga nisbatan normativ hosildorligini (sentner/gektar) hisobga olgan holda belgilanadi”;
25-banddagi “Moliya vazirligi” soʻzlari “Iqtisodiyot va moliya vazirligi” soʻzlari bilan almashtirilsin.
4. Vazirlar Mahkamasining 2019-yil 9-iyuldagi 571-son qarori bilan tasdiqlangan Oʻzbekiston Respublikasi Qishloq xoʻjaligi vazirligi toʻgʻrisidagi nizomning 9-bandi oʻn oltinchi xatboshidagi “Agrosanoatni raqamlashtirish markazi” davlat muassasasi” soʻzlari “Agrosanoatni raqamlashtirish markazi” MCHJ” soʻzlari bilan almashtirilsin.
5. Vazirlar Mahkamasining “Oʻzbekiston Respublikasi agrosanoat majmui va qishloq xoʻjaligida raqamlashtirish tizimini rivojlantirish chora-tadbirlari toʻgʻrisida” 2020-yil 17-dekabrdagi 794-son qarorining 2-bandidagi “Agrosanoatni raqamlashtirish markazi” davlat muassasasini” soʻzlari “Agrosanoatni raqamlashtirish markazi” MCHJni” soʻzlari bilan almashtirilsin.
6. Vazirlar Mahkamasining “Qishloq xoʻjaligi va oziq-ovqat mahsulotlari yoʻqotishlarini qisqartirishga doir qoʻshimcha chora-tadbirlar toʻgʻrisida” 2021-yil 17-sentabrdagi 574-son qarorida :
1-banddagi “Agrosanoatni raqamlashtirish markazi” davlat muassasasida” soʻzlari “Agrosanoatni raqamlashtirish markazi” MCHJ” soʻzlari bilan almashtirilsin;
5-bandning ikkinchi xatboshidagi “Agrosanoatni raqamlashtirish markazi” davlat muassasasi” soʻzlari “Agrosanoatni raqamlashtirish markazi” MCHJ” soʻzlari bilan almashtirilsin.
8. Vazirlar Mahkamasining “Tomorqa xoʻjaliklarida yetishtirilgan mahsulotlarni kafolatli xarid qilish tizimini moliyaviy jihatdan qoʻllab-quvvatlash toʻgʻrisida” 2022-yil 21-fevraldagi 81-son qarorining 2-bandi toʻrtinchi xatboshidagi va qarorga ilovaning 8-bandidagi “Qishloq xoʻjaligi vazirligi huzuridagi “Agrosanoatni raqamlashtirish markazi” davlat muassasasining “Agrosubsidiya” axborot tizimi” soʻzlari “Qishloq xoʻjaligi vazirligining “Agrosubsidiya” axborot tizimi” soʻzlari bilan almashtirilsin.
9. Vazirlar Mahkamasining “Qishloq xoʻjaligi mahsulotlarini yetishtiruvchilarga subsidiya berish axborot tizimini joriy qilish chora-tadbirlari toʻgʻrisida” 2022-yil 16-dekabrdagi 711-son qarorining 3-bandi birinchi xatboshidagi va 1-ilovaning 3-bandidagi “Agrosanoatni raqamlashtirish markazi” davlat muassasasi” soʻzlari “Agrosanoatni raqamlashtirish markazi” MCHJ” soʻzlari bilan almashtirilsin.
Vazirlar Mahkamasining 2023-yil 3-avgustdagi 330-son qaroriga 3-ILOVA
Oʻzbekiston Respublikasi Hukumatining oʻz kuchini yoʻqotgan deb eʼtirof etilayotgan ayrim qarorlari
1. Vazirlar Mahkamasining “Qishloq xoʻjaligi korxonalari faoliyatiga zamonaviy axborot-kommunikatsiya texnologiyalarini keng joriy qilish chora-tadbirlari toʻgʻrisida” 2018-yil 10-avgustdagi 645-son qarori .
2. Vazirlar Mahkamasining “Oʻzbekiston Respublikasi Hukumatining ayrim qarorlariga oʻzgartirishlar kiritish, shuningdek, baʼzilarini oʻz kuchini yoʻqotgan deb hisoblash toʻgʻrisida (Oʻzbekiston Respublikasi Prezidentining “Qishloq xoʻjaligi mashinasozligi sohasini boshqarish tizimini yanada takomillashtirishga oid chora-tadbirlar toʻgʻrisida” 2020-yil 30-iyundagi PQ-4765-son qarori)” 2020-yil 30-oktabrdagi 666-son qaroriga 1-ilovaning 3-bandi .
3. Vazirlar Mahkamasining “Oʻzbekiston Respublikasida oʻsimliklar karantini va himoyasi tizimini tubdan takomillashtirilganligi munosabati bilan Oʻzbekiston Respublikasi hukumatining ayrim qarorlariga oʻzgartirish va qoʻshimchalar kiritish, shuningdek, baʼzilarini oʻz kuchini yoʻqotgan deb hisoblash toʻgʻrisida” 2021-yil 15-dekabrdagi 752-son qaroriga 1-ilovaning 18-bandi .
Oʻzbekiston Respublikasining Bosh vaziri A. ARIPOV
Toshkent sh.,
2023-yil 3-avgust,
330-son