📅 2023-yil 14-avgust · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2023 йил 14 август · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 14 августа 2023 г. · Постановления Кабинета Министров
Официальный текст. Официальный документ. Редакционные примечания не включены.
📅 14 August 2023 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
Санитария жиҳатидан тозалаш инфратузилмаси объектларини жойлаштириш ва улардан фойдаланиш ҳамда маиший чиқиндилар билан боғлиқ ишларни амалга ошириш қоидаларига маданий мерос объектларини муҳофаза қилишни кучайтиришга йўналтирилган ўзгартириш ва қўшимчалар киритиш ҳақида
Мамлакатимизда туризм хизматларини жадал ривожлантириш, айниқса, инфратузилмани яхшилаш, зиёрат туризми ва ички туризм имкониятларини кенгроқ ишга солиш, шунингдек, маданий мерос объектлари муҳофазасини кучайтириш борасида тизимли чора-тадбирлар амалга оширилмоқда.
Бугунги кунда маданий мерос объектларини муҳофаза қилиш ва улардан фойдаланиш, шунингдек, ёндош инфратузилмани ташкил этишда мазкур объектларга зарар етказилиши мумкин бўлган ҳолатларнинг олдини олиш ҳамда уларнинг туристик жозибадорлиги сақлаб қолинишини таъминлаш юзасидан қўшимча чоралар кўриш зарурати пайдо бўлмоқда.
Моддий маданий мерос объектларини асраш, уларнинг ўзгартирилиши мумкин бўлмаган ўзига хос хусусиятларини ва тарихий муҳитини сақлаб қолиш ҳамда уларга ташқи омиллар таъсирини камайтириш, шунингдек, Ўзбекистон Республикаси Президентининг «Ички туризм хизматларини диверсификация қилишга оид қўшимча чора-тадбирлар тўғрисида» 2022 йил 30 апрелдаги ПҚ-232-сон қарори ижросини таъминлаш мақсадида Вазирлар Маҳкамаси қарор қилади:
1. Вазирлар Маҳкамасининг 2018 йил 2 октябрдаги 787-сон қарори билан тасдиқланган Санитария жиҳатидан тозалаш инфратузилмаси объектларини жойлаштириш ва улардан фойдаланиш ҳамда маиший чиқиндилар билан боғлиқ ишларни амалга ошириш қоидаларига иловага мувофиқ қуйидагиларни назарда тутувчи ўзгартириш ва қўшимчалар киритилсин:
чиқинди тўплаш ҳамда иккиламчи хом ашёни қабул қилиш шохобчаларини моддий маданий мерос кўчмас мулк объектларининг қўриқланадиган тегралари чегараларидан ташқарида жойлаштириш;
моддий маданий мерос кўчмас мулк объектлари ҳудудида қаттиқ маиший чиқиндиларни вақтинчалик тўплаш ва сақлаш жойларини бинолар фасадининг транспорт ва пиёда транзит коммуникацияси кўринмайдиган зонасида ташкил этиш, бунда чиқинди ташиш махсус автотранспорт воситаларининг мазкур объектларга шикаст етказмаслик чораларини кўриш;
моддий маданий мерос кўчмас мулк объектларига шикаст етказилишининг олдини олиш мақсадида улар жойлашган ҳудудларга беш тоннадан юқори вазнга эга катта ҳажмли транспорт воситаларининг киритилишига йўл қўймаслик.
2. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосари А.Ж. Раматов зиммасига юклансин.
Вазирлар Маҳкамасининг 2023 йил 14 августдаги 370-сон қарорига ИЛОВА
Санитария жиҳатидан тозалаш инфратузилмаси объектларини жойлаштириш ва улардан фойдаланиш ҳамда маиший чиқиндилар билан боғлиқ ишларни амалга ошириш қоидаларига киритилаётган ўзгартириш ва қўшимчалар
1. 13-банднинг биринчи хатбошиси «масофада» сўзидан кейин «шунингдек, моддий маданий мерос кўчмас мулк объектларининг қўриқланадиган тегралари чегараларидан ташқарида» сўзлари билан тўлдирилсин.
2. 25-бандда :
а) қуйидаги мазмундаги иккинчи хатбоши билан тўлдирилсин:
«Моддий маданий мерос кўчмас мулк объектлари ҳудудида қаттиқ маиший чиқиндиларни вақтинчалик тўплаш ва сақлаш жойлари бинолар фасадининг транспорт ва пиёда транзит коммуникацияси кўринмайдиган зонасида (имкон қадар) ташкил этилади ва бунда чиқинди ташиш махсус автотранспорт воситаларининг мазкур объектларга шикаст етказмаслик чоралари кўрилади»;
б) иккинчи ва учинчи хатбошилар тегишлича учинчи ва тўртинчи хатбошилар деб ҳисоблансин.
3. 44-бандда :
а) қуйидаги мазмундаги учинчи хатбоши билан тўлдирилсин:
«Моддий маданий мерос кўчмас мулк объектларига шикаст етказилишининг олдини олиш мақсадида улар жойлашган ҳудудларга беш тоннадан юқори вазнга эга катта ҳажмли чиқинди ташиш махсус автотранспорт воситалари киритилишига йўл қўйилмайди»;
б) учинчи ва тўртинчи хатбошилар тегишлича тўртинчи ва бешинчи хатбошилар деб ҳисоблансин.
4. 47 3 -банд «ташкил этиши» сўзларидан кейин «ҳамда моддий маданий мерос кўчмас мулк объектларининг қўриқланадиган тегралари чегараларидан ташқарида жойлашиши» сўзлари билан тўлдирилсин.
Ўзбекистон Республикасининг Бош вазири А. АРИПОВ
Тошкент ш.,
2023 йил 14 август,
370-сон
Oʻzbekiston Respublikasi Vazirlar Mahkamasining
qarori
Sanitariya jihatidan tozalash infratuzilmasi obyektlarini joylashtirish va ulardan foydalanish hamda maishiy chiqindilar bilan bogʻliq ishlarni amalga oshirish qoidalariga madaniy meros obyektlarini muhofaza qilishni kuchaytirishga yoʻnaltirilgan oʻzgartirish va qoʻshimchalar kiritish haqida
Mamlakatimizda turizm xizmatlarini jadal rivojlantirish, ayniqsa, infratuzilmani yaxshilash, ziyorat turizmi va ichki turizm imkoniyatlarini kengroq ishga solish, shuningdek, madaniy meros obyektlari muhofazasini kuchaytirish borasida tizimli chora-tadbirlar amalga oshirilmoqda.
Bugungi kunda madaniy meros obyektlarini muhofaza qilish va ulardan foydalanish, shuningdek, yondosh infratuzilmani tashkil etishda mazkur obyektlarga zarar yetkazilishi mumkin boʻlgan holatlarning oldini olish hamda ularning turistik jozibadorligi saqlab qolinishini taʼminlash yuzasidan qoʻshimcha choralar koʻrish zarurati paydo boʻlmoqda.
Moddiy madaniy meros obyektlarini asrash, ularning oʻzgartirilishi mumkin boʻlmagan oʻziga xos xususiyatlarini va tarixiy muhitini saqlab qolish hamda ularga tashqi omillar taʼsirini kamaytirish, shuningdek, Oʻzbekiston Respublikasi Prezidentining “Ichki turizm xizmatlarini diversifikatsiya qilishga oid qoʻshimcha chora-tadbirlar toʻgʻrisida” 2022-yil 30-apreldagi PQ-232-son qarori ijrosini taʼminlash maqsadida Vazirlar Mahkamasi qaror qiladi:
1. Vazirlar Mahkamasining 2018-yil 2-oktabrdagi 787-son qarori bilan tasdiqlangan Sanitariya jihatidan tozalash infratuzilmasi obyektlarini joylashtirish va ulardan foydalanish hamda maishiy chiqindilar bilan bogʻliq ishlarni amalga oshirish qoidalariga ilovaga muvofiq quyidagilarni nazarda tutuvchi oʻzgartirish va qoʻshimchalar kiritilsin:
chiqindi toʻplash hamda ikkilamchi xomashyoni qabul qilish shoxobchalarini moddiy madaniy meros koʻchmas mulk obyektlarining qoʻriqlanadigan tegralari chegaralaridan tashqarida joylashtirish;
moddiy madaniy meros koʻchmas mulk obyektlari hududida qattiq maishiy chiqindilarni vaqtinchalik toʻplash va saqlash joylarini binolar fasadining transport va piyoda tranzit kommunikatsiyasi koʻrinmaydigan zonasida tashkil etish, bunda chiqindi tashish maxsus avtotransport vositalarining mazkur obyektlarga shikast yetkazmaslik choralarini koʻrish;
moddiy madaniy meros koʻchmas mulk obyektlariga shikast yetkazilishining oldini olish maqsadida ular joylashgan hududlarga besh tonnadan yuqori vaznga ega katta hajmli transport vositalarining kiritilishiga yoʻl qoʻymaslik.
2. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari A.J. Ramatov zimmasiga yuklansin.
Vazirlar Mahkamasining 2023-yil 14-avgustdagi 370-son qaroriga ILOVA
Sanitariya jihatidan tozalash infratuzilmasi obyektlarini joylashtirish va ulardan foydalanish hamda maishiy chiqindilar bilan bogʻliq ishlarni amalga oshirish qoidalariga kiritilayotgan oʻzgartirish va qoʻshimchalar
1. 13-bandning birinchi xatboshisi “masofada” soʻzidan keyin “shuningdek, moddiy madaniy meros koʻchmas mulk obyektlarining qoʻriqlanadigan tegralari chegaralaridan tashqarida” soʻzlari bilan toʻldirilsin.
2. 25-bandda :
a) quyidagi mazmundagi ikkinchi xatboshi bilan toʻldirilsin:
“Moddiy madaniy meros koʻchmas mulk obyektlari hududida qattiq maishiy chiqindilarni vaqtinchalik toʻplash va saqlash joylari binolar fasadining transport va piyoda tranzit kommunikatsiyasi koʻrinmaydigan zonasida (imkon qadar) tashkil etiladi va bunda chiqindi tashish maxsus avtotransport vositalarining mazkur obyektlarga shikast yetkazmaslik choralari koʻriladi”;
b) ikkinchi va uchinchi xatboshilar tegishlicha uchinchi va toʻrtinchi xatboshilar deb hisoblansin.
3. 44-bandda :
a) quyidagi mazmundagi uchinchi xatboshi bilan toʻldirilsin:
“Moddiy madaniy meros koʻchmas mulk obyektlariga shikast yetkazilishining oldini olish maqsadida ular joylashgan hududlarga besh tonnadan yuqori vaznga ega katta hajmli chiqindi tashish maxsus avtotransport vositalari kiritilishiga yoʻl qoʻyilmaydi”;
b) uchinchi va toʻrtinchi xatboshilar tegishlicha toʻrtinchi va beshinchi xatboshilar deb hisoblansin.
4. 47 3 -band “tashkil etishi” soʻzlaridan keyin “hamda moddiy madaniy meros koʻchmas mulk obyektlarining qoʻriqlanadigan tegralari chegaralaridan tashqarida joylashishi” soʻzlari bilan toʻldirilsin.
Oʻzbekiston Respublikasining Bosh vaziri A. ARIPOV
Toshkent sh.,
2023-yil 14-avgust,
370-son