📅 2023-yil 11-avgust · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2023 йил 11 август · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 11 августа 2023 г. · Постановления Кабинета Министров
Официальный текст. Официальный документ. Редакционные примечания не включены.
📅 11 August 2023 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
Хоразм вилояти ҳудудидан оқиб ўтган Амударё дарёсининг қирғоқ ҳимоя дамбалари ва иншоотларини сел-тошқин сувларидан ҳимоя қилиш ишларини ташкил этиш чора-тадбирлари тўғрисида
Хоразм вилоятида сел-тошқин сувларини сув оқимлари бўйлаб барқарор ва хавфсиз ўтказиб юбориш бўйича амалга ошириладиган ишларнинг самарадорлигини ошириш ҳамда аҳолини, ижтимоий ва иқтисодиёт тармоқлари объектларини хавфли сел ва тошқин ҳодисаларининг салбий таъсиридан ҳимоя қилиш мақсадида Вазирлар Маҳкамаси қарор қилади:
1. Ўзбекистон Республикаси Сув хўжалиги вазирлиги, Экология, атроф-муҳитни муҳофаза қилиш ва иқлим ўзгариши вазирлиги, Тоғ-кон саноати ва геология вазирлиги, Фавқулодда вазиятлар вазирлиги ва Хоразм вилояти ҳокимлигининг Хоразм вилояти ҳудудидан оқиб ўтадиган Амударё дарёсининг қирғоқ ҳимоя дамбалари ва иншоотларини сел-тошқин сувларидан ҳимоя қилиш учун Чапқирғоқ Амударё ирригация тизимлари ҳавза бошқармаси ҳузуридаги Амударё Чапқирғоқ ҳимоя дамбалари бошқармасига «Хоразм» миллий табиат боғининг рекреация зонаси ҳудудидаги «Тангрикўл» карьерининг 14-участкасида жойлашган 19 гектар ер майдонидаги харсанг тошлардан фойдаланишга рухсат бериш тўғрисидаги таклифига розилик берилсин.
2. Хоразм вилояти ҳокимлиги Ўзбекистон Республикаси Экология, атроф-муҳитни муҳофаза қилиш ва иқлим ўзгариши вазирлиги, Қишлоқ хўжалиги вазирлиги, Иқтисодиёт ва молия вазирлиги ҳузуридаги Кадастр агентлиги билан биргаликда бир ой муддатда «Хоразм» миллий табиат боғининг рекреация зонаси ҳудудидаги «Тангрикўл» карьерининг 14-участкасидаги 19 гектар ер майдони белгиланган тартибда захирага олинишини ва Чапқирғоқ Амударё ирригация тизимлари ҳавза бошқармаси ҳузуридаги Амударё Чапқирғоқ ҳимоя дамбалари бошқармасига доимий фойдаланиш ҳуқуқи асосида ажратилишини ҳамда давлат рўйхатидан ўтказилишини таъминласин.
3. Ўзбекистон Республикаси Иқтисодиёт ва молия вазирлиги ҳузуридаги Кадастр агентлиги Хоразм вилояти ҳокимлиги ҳамда Экология, атроф-муҳитни муҳофаза қилиш ва иқлим ўзгариши вазирлиги билан биргаликда «Хоразм» миллий табиат боғи ер майдонларига белгиланган тартибда ўзгартиришлар киритсин.
4. Ўзбекистон Республикаси Сув хўжалиги вазирлиги:
ушбу қарорнинг 2-бандига мувофиқ доимий фойдаланиш ҳуқуқи билан ажратиладиган ер майдонидаги карьердан (кейинги ўринларда — карьер) қонунчилик ҳужжатларига мувофиқ олинган ер қаъри участкаларидан фойдаланиш ҳуқуқи учун рухсатнома асосида фойдаланишни;
карьердан фойдаланишнинг атроф-муҳитга таъсирини баҳолаш лойиҳалари ишлаб чиқилишини ва белгиланган тартибда давлат экологик экспертизасидан ўтказилишини;
карьердан фақат фавқулодда ҳолатларда Амударё дарёсининг қирғоқбўйи зонасини мустаҳкамлаш мақсадида фойдаланишни;
карьердан фойдаланиш натижасида бузилган ерларни рекультивация қилиш ишлари амалга оширилишини;
норуда фойдали қазилмалар қайта ишланган ва сотилган ҳолларда, ер қаъридан фойдаланганлик учун белгиланган тартибда солиқлар тўланилишини таъминласин.
Белгилаб қўйилсинки, Амударё дарёсининг қирғоқбўйи зонасини мустаҳкамлаш ишларини молиялаштириш норуда фойдали қазилмаларни сотишдан олинган даромадлар миқдорига мос равишда камайтирилади.
5. Ўзбекистон Республикаси Тоғ-кон саноати ва геология вазирлиги:
ер қаъри участкаларидан фойдаланиш ҳуқуқи учун рухсатнома Чапқирғоқ Амударё ирригация тизимлари ҳавза бошқармаси ҳузуридаги Амударё Чапқирғоқ ҳимоя дамбалари бошқармасига тўғридан-тўғри музокаралар асосида берилишини таъминласин;
карьердан фойдаланиш ишлари Вазирлар Маҳкамасининг «Ер қаъри участкаларидан фойдаланиш ҳуқуқи учун рухсатномалар бериш тартибини янада такомиллаштириш чора-тадбирлари тўғрисида» 2022 йил 25 мартдаги 133-сон қарори талаблари асосида амалга оширилишини назорат қилсин.
6. Ўзбекистон Республикаси Экология, атроф-муҳитни муҳофаза қилиш ва иқлим ўзгариши вазирлиги Чапқирғоқ Амударё ирригация тизимлари ҳавза бошқармаси ҳузуридаги Амударё Чапқирғоқ ҳимоя дамбалари бошқармасига ажратиладиган ер майдонидан фойдаланиш даврида атроф-муҳит муҳофазасига оид қонунчилик ҳужжатлари талабларига қатъий риоя этилиши ва бузилган ерлар рекультивация қилиниши устидан назорат ўрнатсин.
7. Ўзбекистон Республикаси Қурилиш ва уй-жой коммунал хўжалиги вазирлиги, Сув хўжалиги вазирлиги ҳамда Фавқулодда вазиятлар вазирлиги Амударё дарёсининг қирғоқ дамбалари ва иншоотларини сел-тошқин сувларидан ҳимоя қилиш ишлари сифатли амалга оширилишини таъминласин.
8. Мазкур қарорнинг бажарилишини назорат қилиш Ўзбекистон Республикаси сув хўжалиги вазири Ш.Р. Хамраев ва Хоразм вилояти ҳокими Ж.Р. Рахимов зиммасига юклансин.
Ўзбекистон Республикасининг Бош вазири А. АРИПОВ
Тошкент ш.,
2023 йил 11 август,
365-сон
Oʻzbekiston Respublikasi Vazirlar Mahkamasining
qarori
Xorazm viloyati hududidan oqib oʻtgan Amudaryo daryosining qirgʻoq himoya dambalari va inshootlarini sel-toshqin suvlaridan himoya qilish ishlarini tashkil etish chora-tadbirlari toʻgʻrisida
Xorazm viloyatida sel-toshqin suvlarini suv oqimlari boʻylab barqaror va xavfsiz oʻtkazib yuborish boʻyicha amalga oshiriladigan ishlarning samaradorligini oshirish hamda aholini, ijtimoiy va iqtisodiyot tarmoqlari obyektlarini xavfli sel va toshqin hodisalarining salbiy taʼsiridan himoya qilish maqsadida Vazirlar Mahkamasi qaror qiladi:
1. Oʻzbekiston Respublikasi Suv xoʻjaligi vazirligi, Ekologiya, atrof-muhitni muhofaza qilish va iqlim oʻzgarishi vazirligi, Togʻ-kon sanoati va geologiya vazirligi, Favqulodda vaziyatlar vazirligi va Xorazm viloyati hokimligining Xorazm viloyati hududidan oqib oʻtadigan Amudaryo daryosining qirgʻoq himoya dambalari va inshootlarini sel-toshqin suvlaridan himoya qilish uchun Chapqirgʻoq Amudaryo irrigatsiya tizimlari havza boshqarmasi huzuridagi Amudaryo Chapqirgʻoq himoya dambalari boshqarmasiga “Xorazm” milliy tabiat bogʻining rekreatsiya zonasi hududidagi “Tangrikoʻl” karyerining 14-uchastkasida joylashgan 19 gektar yer maydonidagi xarsang toshlardan foydalanishga ruxsat berish toʻgʻrisidagi taklifiga rozilik berilsin.
2. Xorazm viloyati hokimligi Oʻzbekiston Respublikasi Ekologiya, atrof-muhitni muhofaza qilish va iqlim oʻzgarishi vazirligi, Qishloq xoʻjaligi vazirligi, Iqtisodiyot va moliya vazirligi huzuridagi Kadastr agentligi bilan birgalikda bir oy muddatda “Xorazm” milliy tabiat bogʻining rekreatsiya zonasi hududidagi “Tangrikoʻl” karyerining 14-uchastkasidagi 19 gektar yer maydoni belgilangan tartibda zaxiraga olinishini va Chapqirgʻoq Amudaryo irrigatsiya tizimlari havza boshqarmasi huzuridagi Amudaryo Chapqirgʻoq himoya dambalari boshqarmasiga doimiy foydalanish huquqi asosida ajratilishini hamda davlat roʻyxatidan oʻtkazilishini taʼminlasin.
3. Oʻzbekiston Respublikasi Iqtisodiyot va moliya vazirligi huzuridagi Kadastr agentligi Xorazm viloyati hokimligi hamda Ekologiya, atrof-muhitni muhofaza qilish va iqlim oʻzgarishi vazirligi bilan birgalikda “Xorazm” milliy tabiat bogʻi yer maydonlariga belgilangan tartibda oʻzgartirishlar kiritsin.
4. Oʻzbekiston Respublikasi Suv xoʻjaligi vazirligi:
ushbu qarorning 2-bandiga muvofiq doimiy foydalanish huquqi bilan ajratiladigan yer maydonidagi karyerdan (keyingi oʻrinlarda — karyer) qonunchilik hujjatlariga muvofiq olingan yer qaʼri uchastkalaridan foydalanish huquqi uchun ruxsatnoma asosida foydalanishni;
karyerdan foydalanishning atrof-muhitga taʼsirini baholash loyihalari ishlab chiqilishini va belgilangan tartibda davlat ekologik ekspertizasidan oʻtkazilishini;
karyerdan faqat favqulodda holatlarda Amudaryo daryosining qirgʻoqboʻyi zonasini mustahkamlash maqsadida foydalanishni;
karyerdan foydalanish natijasida buzilgan yerlarni rekultivatsiya qilish ishlari amalga oshirilishini;
noruda foydali qazilmalar qayta ishlangan va sotilgan hollarda, yer qaʼridan foydalanganlik uchun belgilangan tartibda soliqlar toʻlanilishini taʼminlasin.
Belgilab qoʻyilsinki, Amudaryo daryosining qirgʻoqboʻyi zonasini mustahkamlash ishlarini moliyalashtirish noruda foydali qazilmalarni sotishdan olingan daromadlar miqdoriga mos ravishda kamaytiriladi.
5. Oʻzbekiston Respublikasi Togʻ-kon sanoati va geologiya vazirligi:
yer qaʼri uchastkalaridan foydalanish huquqi uchun ruxsatnoma Chapqirgʻoq Amudaryo irrigatsiya tizimlari havza boshqarmasi huzuridagi Amudaryo Chapqirgʻoq himoya dambalari boshqarmasiga toʻgʻridan-toʻgʻri muzokaralar asosida berilishini taʼminlasin;
karyerdan foydalanish ishlari Vazirlar Mahkamasining “Yer qaʼri uchastkalaridan foydalanish huquqi uchun ruxsatnomalar berish tartibini yanada takomillashtirish chora-tadbirlari toʻgʻrisida” 2022-yil 25-martdagi 133-son qarori talablari asosida amalga oshirilishini nazorat qilsin.
6. Oʻzbekiston Respublikasi Ekologiya, atrof-muhitni muhofaza qilish va iqlim oʻzgarishi vazirligi Chapqirgʻoq Amudaryo irrigatsiya tizimlari havza boshqarmasi huzuridagi Amudaryo Chapqirgʻoq himoya dambalari boshqarmasiga ajratiladigan yer maydonidan foydalanish davrida atrof-muhit muhofazasiga oid qonunchilik hujjatlari talablariga qatʼiy rioya etilishi va buzilgan yerlar rekultivatsiya qilinishi ustidan nazorat oʻrnatsin.
7. Oʻzbekiston Respublikasi Qurilish va uy-joy kommunal xoʻjaligi vazirligi, Suv xoʻjaligi vazirligi hamda Favqulodda vaziyatlar vazirligi Amudaryo daryosining qirgʻoq dambalari va inshootlarini sel-toshqin suvlaridan himoya qilish ishlari sifatli amalga oshirilishini taʼminlasin.
8. Mazkur qarorning bajarilishini nazorat qilish Oʻzbekiston Respublikasi suv xoʻjaligi vaziri Sh.R. Xamrayev va Xorazm viloyati hokimi J.R. Raximov zimmasiga yuklansin.
Oʻzbekiston Respublikasining Bosh vaziri A. ARIPOV
Toshkent sh.,
2023-yil 11-avgust,
365-son