📅 2023-yil 14-avgust · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2023 йил 14 август · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 14 августа 2023 г. · Постановления Кабинета Министров
Официальный текст. Официальный документ. Редакционные примечания не включены.
📅 14 August 2023 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
МАЪМУРИЙ РЕГЛАМЕНТИ
СХЕМАСИ
СЎРОВНОМА
Олий таълим муассасалари талабаларини турар жой билан таъминлаш тизимини такомиллаштириш чора-тадбирлари тўғрисида
Талабаларни турар жой билан таъминлашнинг шаффоф ва самарали тизимини жорий этиш мақсадида Вазирлар Маҳкамаси қарор қилади:
1. Шундай тартиб ўрнатилсинки, унга кўра:
давлат олий таълим муассасаларининг талабалар турар жойига жойлашиш фақат давлат хизмати марказлари ва (ёки) Ўзбекистон Республикаси Ягона интерактив давлат хизматлари портали (кейинги ўринларда — ЯИДХП) орқали электрон ариза бериш йўли билан амалга оширилади ҳамда талабаларга навбатни онлайн кузатиш ва тўловларни амалга ошириш имконияти яратилади;
талабалар билан тузиладиган турар жой ижара шартномалари давлат солиқ хизмати органларида солиқ тўловчининг шахсий кабинети орқали масофадан туриб биометрик идентификациялаш (Face-ID) технологияси орқали электрон шаклда реал вақт режимида ҳисобга қўйилади.
2. Қуйидагиларни назарда тутувчи Давлат олий таълим муассасаларининг талабаларини талабалар турар жойига жойлаштириш бўйича давлат хизматлари кўрсатишнинг маъмурий регламенти 1-иловага мувофиқ тасдиқлансин.
3. Белгилансинки:
а) 2023/2024 ўқув йили учун давлат олий таълим муассасаларининг:
1-курс талабаларини талабалар турар жойига жойлаштириш ушбу қарор билан тасдиқланган маъмурий регламент талаблари асосида амалга оширилади;
2-курс ва ундан юқори курс талабаларини талабалар турар жойига жойлаштириш анъанавий тарзда амалга оширилади. Бунда талабалар турар жойига жойлашиш учун ариза олий таълим муассасаси талабалар турар жойларига жойлаштириш комиссиясига 2023 йил 25 августга қадар топширилади;
б) 2024/2025 ўқув йилидан бошлаб барча курс талабалари учун давлат олий таълим муассасалари талабалар турар жойига жойлашиш онлайн шаклда амалга оширилади. Бунда талабалар турар жойига жойлашиш учун ариза бериш 1 августдан бошлаб ўқув йили якунига қадар давом этади;
в) қуйидаги тоифадаги талабалар устуворлик асосида талабалар турар жойларига қабул қилинади:
«Меҳрибонлик уйлари» тарбияланувчилари, етим ва ота-она қарамоғидан маҳрум бўлган талабалар;
Ижтимоий реестр, «Темир дафтар» ва «Аёллар дафтари»га киритилган ижтимоий ҳимояга муҳтож оилаларнинг фарзандлари ҳамда «Ёшлар дафтари»да турадиган талабалар;
I ва II гуруҳ ногиронлиги бўлган талабалар;
бир оиладан бакалавриат босқичи кундузги таълим шаклида икки ёки ундан ортиқ тўлов-шартнома асосида ўқиётган оилалар фарзандлари;
халқаро фан олимпиадалари, Ўзбекистон Республикаси Олий таълим, фан ва инновациялар вазирлиги томонидан ўтказиладиган республика фан олимпиадаларида ғолибликни қўлга киритган талабалар;
«Йил талабаси» ва «Талабалар театр студиялари» кўрик-танловларининг республика босқичи ғолиби бўлган талабалар;
олий таълим муассасалари талабалари ўртасида ўтказилган «Заковат» интеллектуал ўйинининг республика босқичида ғолибликни қўлга киритган талабалар;
талабалар турар жойида талабалар кенгаши раиси, қават сардори бўлган талабалар;
г) давлат хизматлари марказлари ёки ЯИДХП орқали электрон ариза бериш ва тўловларни амалга оширишда давлат хизматини кўрсатганлик учун тўлов ундирилмайди.
4. Ўзбекистон Республикаси Олий таълим, фан ва инновациялар вазирлиги:
а) 2023 йил 20 августга қадар Олий таълим, фан ва инновациялар вазирлигининг Олий таълим муассасаларини ривожлантириш жамғармаси маблағлари ҳисобидан талабаларни талабалар турар жойига онлайн жойлаштириш имкониятини берувчи ахборот тизими ишлаб чиқилиши ва кейинчалик қўллаб-қувватланишини;
Рақамли технологиялар вазирлиги билан биргаликда «Электрон ҳукумат» идоралараро интеграциялашув платформаси орқали 2023 йил 20 августга қадар тегишли электрон маълумотлар базаларининг ўзаро интеграция қилинишини;
олий таълим муассасалари ҳамда давлат хизматлари кўрсатишда иштирок этувчи бошқа тузилмаларнинг ЯИДХПга уланишини таъминласин;
б) ЯИДХПда давлат хизматлари кўрсатилишининг ҳар бир босқичида мурожаатларнинг кўриб чиқилишини кузатиб бориш тартибини жорий этсин.
5. Ўзбекистон Республикаси Адлия вазирлиги, Олий таълим, фан ва инновациялар вазирлиги ушбу қарор талабларининг бажарилиши бўйича давлат органлари ва бошқа ташкилотларнинг фаолияти юзасидан доимий мониторинг олиб борсин.
6. Вазирлар Маҳкамасининг «Ижара ҳуқуқи асосида яшаётган талабалар томонидан тўланадиган ижара тўловларини қоплаб бериш тизимини жорий этиш чора-тадбирлари тўғрисида» 2021 йил 24 сентябрдаги 605-сон қарорига 2-иловага мувофиқ ўзгартиришлар киритилсин.
7. Мазкур қарорнинг бажарилишини назорат қилиш Ўзбекистон Республикаси олий таълим, фан ва инновациялар вазири И.Ю. Абдурахмонов зиммасига юклансин.
Вазирлар Маҳкамасининг 2023 йил 14 августдаги 376-сон қарорига 1-ИЛОВА
Давлат олий таълим муассасаларининг талабаларини талабалар турар жойига жойлаштириш бўйича давлат хизматлари кўрсатишнинг
1-боб. Умумий қоидалар
1. Мазкур Регламент давлат олий таълим муассасалари талабаларини талабалар турар жойларига жойлаштириш тартибини белгилайди.
2. Ушбу Регламентнинг қоидалари хорижий, нодавлат ва ҳарбий олий таълим ташкилотлари талабалар турар жойлари, шунингдек, давлат-хусусий шериклик шартлари асосида қурилган талабалар турар жойларининг хусусий шерик учун тижорий мақсадларда ажратиладиган ўринларига талабаларни қабул қилишга нисбатан татбиқ этилмайди.
3. Ушбу Регламентда қуйидаги асосий тушунчалардан фойдаланилади:
махсус ахборот тизими — талабаларни талабалар турар жойига жойлаштириш жараёнини рақамлаштирувчи Ўзбекистон Республикаси Олий таълим, фан ва инновациялар вазирлигининг (кейинги ўринларда — Вазирлик) ягона ахборот тизими;
имтиёзли рўйхат — Регламентнинг 5-бандига мувофиқ аниқланадиган ҳамда талабалар турар жойига биринчи навбатда жойлашиш ҳуқуқига эга талабалар рўйхати;
умумий рўйхат — талабалар турар жойига жойлашиш истагини билдирган имтиёзли рўйхатда мавжуд бўлмаган талабалар рўйхати.
4. Махсус ахборот тизимига қуйидаги маълумотлар олий таълим муассасаси томонидан мунтазам киритиб борилади:
а) ҳар йили 1 августга қадар:
тизимидаги ҳар бир талабалар турар жойининг манзили ва қуввати (ўқув йили давомида қўшимча ўринлар яратилган тақдирда, бир иш куни давомида);
талабалар турар жойида курслар ва факультетларга ажратилган ўринлар сони (ўқув йили давомида олий таълим муассасаси ректори (директори) буйруғи билан қайта тақсимланган тақдирда, шу куннинг ўзида);
б) мунтазам равишда — талабалар турар жойида мавжуд бўш ўринлар сони (бўш ўрин пайдо бўлган тақдирда шу куннинг ўзида тегишли маълумот махсус ахборот тизимига киритилади).
5. Имтиёзли рўйхатга қуйидаги мезонларнинг бирига мос келувчи талабалар киритилади:
а) тегишли тасдиқловчи маълумотлар асосида:
«Меҳрибонлик уйлари» тарбияланувчилари, етим ва ота-она қарамоғидан маҳрум бўлган талабалар;
Ижтимоий реестр, «Темир дафтар» ва «Аёллар дафтари», «Ёшлар дафтари»га киритилган ижтимоий ҳимояга муҳтож оила (аёл) фарзандлари;
I ва II гуруҳ ногиронлиги бўлган талабалар;
хорижий давлат фуқароси бўлган талабалар;
бир оиладан бакалавриат босқичи кундузги таълим шаклида икки ёки ундан ортиқ тўлов-шартнома асосида ўқиётган оилалар фарзандлари;
Ижтимоий реестрга киритилган оилалар фарзандлари.
б) олий таълим муассасаси ректори (директори) буйруғи асосида:
халқаро ва Вазирлик томонидан ўтказиладиган республика миқёсидаги фан олимпиадаларида ғолиб бўлган талабалар;
Вазирлик томонидан ўтказиладиган «Заковат» интеллектуал ўйинлари республика босқичи ғолиблари;
«Йил талабаси» кўрик-танлови республика босқичи ғолиблари;
«Талабалар театр студиялари» танловининг республика босқичи ғолиблари;
талабалар турар жойида талабалар кенгаши раиси, қават сардори бўлган талабалар.
6. Имтиёзли рўйхатдаги мезонлар тўғрисидаги маълумотлар ариза бериш жараёнида:
«Меҳрибонлик уйлари» тарбияланувчилари, чин етимлар ва ота-она қарамоғидан маҳрум бўлган талабалар тўғрисидаги маълумотлар Ўзбекистон Республикаси Мактабгача ва мактаб таълими вазирлигининг ахборот тизими орқали;
Ижтимоий реестрга киритилган оилалар тўғрисидаги маълумотлар Ўзбекистон Республикаси Иқтисодиёт ва молия вазирлигининг ахборот тизими орқали;
«Темир дафтар»га киритилган оилалар ва «Аёллар дафтари»га киритилган хотин-қизлар тўғрисидаги маълумотлар Ўзбекистон Республикаси Камбағалликни қисқартириш ва бандлик вазирлигининг ахборот тизими орқали;
I ва II гуруҳ ногиронлиги бўлган шахслар тўғрисидаги маълумотлар Ўзбекистон Республикаси Президенти Администрацияси ҳузуридаги Ижтимоий ҳимоя миллий агентлигининг ахборот тизими орқали;
«Ёшлар дафтари»га киритилган ёшлар тўғрисидаги маълумотлар Ёшлар ишлари агентлигининг ахборот тизими орқали;
1-курсга тавсия этилган талабалар тўғрисидаги маълумотлар Ўзбекистон Республикаси Олий таълим, фан ва инновациялар вазирлиги ҳузуридаги Билим ва малакаларни баҳолаш агентлигининг ахборот тизими орқали;
2-курс ва ундан юқори курс талабалари тўғрисидаги маълумотлар Вазирликнинг ахборот тизими орқали автоматик текширилади.
7. Давлат хизматлари марказлари, олий таълим муассасалари ва мутасадди вазирлик ва идоралар ўртасида ахборотлар алмашинуви фақат идоралараро электрон ўзаро ҳамкорлик орқали электрон рақамли имзони қўллаган ҳолда амалга оширилади.
Ушбу Регламентнинг 6-бандида кўрсатилган ҳолатларни тасдиқловчи маълумотлар «Электрон ҳукумат» тизими идоралараро интеграциялашув платформасидан олинади.
Тегишли маълумотлар «Электрон ҳукумат» тизими идоралараро интеграциялашув платформасида аниқланмаган тақдирда, талабадан имтиёзли рўйхатдаги мезонларга мувофиқлигини тасдиқловчи ҳужжатнинг нусхасини сўрашга йўл қўйилади.
8. Умумий рўйхатдаги талабалар учун олий таълим муассасаси талабалар турар жойида ортиб қолган ўринлар сонига нисбатан навбат асосида қуйидагича тақсимланади:
1-курс талабалари учун 55 — 65 фоизи;
2-курс талабалари учун 15 — 20 фоизи;
3-курс ва ундан юқори курс талабалари учун 20 — 25 фоизгача ажратилади.
Бунда:
курсларга ажратилган, бироқ тўлмай қолган ўринлар аввало қуйи курс талабалари орасида, сўнг курсларнинг ортиб бориши тартибига қатъий амал қилган ҳолда юқори курс талабалари орасида қайта тақсимланади;
олий таълим муассасаси томонидан талабалар турар жойидаги ўринлар сони умумий рўйхат бўйича факультетлар кесимида тақсимланиши мумкин.
9. Умумий рўйхатга киритиладиган талабалар қуйидаги кетма-кетлик асосида талабалар турар жойига жойлаштирилади:
битта оиладан бакалавриат босқичи кундузги таълим шаклида икки ёки ундан ортиқ тўлов-контракт асосида ўқиётган оила фарзандлари;
кундузги таълим шаклида ўқиётган талабалар (кундузги таълим шаклида ўқиётган талабалар турар жойига эҳтиёжи бор талабалар тўлиқ таъминланмасдан туриб, бошқа таълим шаклида ўқиётган талабаларни турар жойга жойлаштиришга йўл қўйилмайди);
талаба қизлар (талабалар контингентидан келиб чиқиб олий таълим муассасаси ректори (директори) ушбу устуворлик улушини белгилайди);
бакалавриат босқичида ўқиётган талабалар (бакалавриат босқичида ўқиётган турар жойга эҳтиёжи бор талабалар тўлиқ талабалар турар жойига жойлаштирилмасдан, таълимнинг магистратура ва докторантура босқичида ўқиётган талабаларни турар жойга жойлаштиришга йўл қўйилмайди);
олий таълим муассасаси жойлашган ҳудуддан бошқа ҳудудда доимий яшовчи талабалар;
ариза берилган сана бўйича навбат асосида.
10. Имтиёзли ва умумий рўйхатлар бўйича барча навбатлар ҳар ўқув йили якунидан сўнг бекор қилинади ҳамда август ойидан бошлаб талабаларнинг мурожаатлари асосида қайтадан шакллантирилади.
11. Талабаларни олий таълим муассасаси талабалар турар жойларига қабул қилиш ЯИДХП ёки давлат хизматлари марказлари орқали берилган йўлланма асосида ушбу Регламентга 1-иловада келтирилган схемага мувофиқ амалга оширилади.
Талабаларни талабалар турар жойига йўлланмасиз қабул қилиш тақиқланади.
12. Талабаларни талабалар турар жойига жойлаштириш бўйича йўлланмалар тақдим этилган ўқув йили учун амал қилади.
2-боб. Давлат хизматларини кўрсатиш тартиби
13. Талаба йўлланма олиш учун давлат хизматлари марказларига бевосита келиб (ишончли вакил орқали) ёки мустақил равишда ЯИДХП орқали мурожаат қилиши мумкин.
14. Талабалар турар жойига жойлашиш учун ариза бериш ҳар йили 1 августдан бошланади ва ўқув йили якунига қадар давом этади.
15. Талаба давлат хизматлари маркази орқали мурожаат қилганда, марказ ходими ариза берувчи номидан, ЯИДХП орқали мурожаат қилган тақдирда эса, мустақил равишда Регламентга 2-иловага мувофиқ сўровномани тўлдиради.
16. Сўровнома асосида махсус ахборот тизимида қуйидаги ҳаракатлар автоматик равишда амалга оширилади:
талабани имтиёзли ёки умумий рўйхатга киритиш;
талабалар турар жойида бўш ўрин бўлганда, йўлланмани шакллантириш;
талабалар турар жойида бўш ўрин мавжуд бўлмаган тақдирда — тегишли рўйхат бўйича талабани навбатга қўйиш ва бу ҳақда хабарнома юбориш;
талабалар турар жойида ўринлар бўшаши билан бўш ўринлар тўғрисидаги маълумотларни автоматик янгилаб бориш.
17. Талаба қуйидаги ҳуқуқларга эга:
сўровнома юборилганидан сўнг ҳам ундаги маълумотларни таҳрирлаш;
талабалар турар жойида, жумладан, тегишли факультет бўйича мавжуд бўш ўринлар тўғрисидаги маълумотни кўриш;
давлат хизматлари маркази, ЯИДХП ёки махсус рақамга сўров юбориш орқали рўйхатдаги навбат ҳолати ҳақида СМС-хабар олиш. Бунда ҳар бир кирувчи СМС-хабар учун тўлов ариза берувчи ҳисобидан ундирилади;
ҳар қандай босқичда давлат хизмати кўрсатилишидан воз кечиш.
Ариза берувчи талаба онлайн тарзда навбатни кузатиши ва ЯИДХПда хабарномаларни олиши, шунингдек талабалар турар жойига қабул қилиш учун ариза бериш усулидан (ЯИДХП ёки давлат хизматлари марказлари орқали) қатъи назар, давлат хизматлари марказларида мурожаат ҳолати тўғрисида маълумотни бепул олиши мумкин.
18. Олий таълим муассасаси талабанинг сўровномасида камчиликларни аниқлаган тақдирда, ариза берувчига беш иш куни ичида уларни бартараф этиш учун имконият берилади.
19. Сўровномада нотўғри маълумотлар кўрсатилганлиги ҳамда камчиликлар белгиланган муддат мобайнида бартараф этилмаганлиги давлат хизмати кўрсатишни рад этиш учун асос бўлади.
Талабани талабалар турар жойига жойлаштириш бўйича давлат хизмати кўрсатишни бошқа асосларга кўра рад этиш тақиқланади.
Давлат хизматидан фойдаланиш рад этилган ёки талаба давлат хизмати кўрсатилишидан воз кечган тақдирда, талабанинг сўровномаси тизим томонидан автоматик равишда кўриб чиқилмасдан қолдирилади ва навбатдан чиқарилади. Бунда навбатга туриш ҳақидаги хабарнома ёки йўлланма сўровнома билан биргаликда бекор қилинади.
20. Талабалар турар жойига жойлашиш учун йўлланма талабалар турар жойида ўринлар бўшаган куни махсус ахборот тизимида дастлаб имтиёзли рўйхат, сўнг умумий рўйхатдаги навбат бўйича автоматик равишда шакллантирилади.
21. Махсус ахборот тизими томонидан шакллантирилган электрон йўлланма ва талабаларнинг навбатга қўйилганлиги ҳақидаги электрон хабарнома уларнинг қоғоз шаклига тенглаштирилади.
Бунда йўлланма ва хабарномалар автоматик равишда олий таълим муассасасига ҳамда ариза берувчига давлат хизматлари маркази ёки ЯИДХП орқали юборилади.
Давлат хизматлари маркази йўлланма келиб тушгандан сўнг 10 дақиқа мобайнида уни ариза берувчининг электрон манзилига юборади ҳамда ариза берувчини бу ҳақда ахборот-коммуникация тизими орқали хабардор қилади.
Ариза берувчи давлат хизматлари марказига келиб мурожаат қилган тақдирда, йўлланма унинг сўровига кўра электрон ёки қоғоз шаклда берилади.
22. Талабани талабалар турар жойига жойлаштириш олий таълим муассасаси ва ариза берувчи ўртасида шартнома тузиш орқали расмийлаштирилади.
Бунда:
шартнома олий таълим муассасасига йўлланма келиб тушган ёки тақдим этилган куннинг ўзида тузилади;
йўлланма билан биргаликда шартнома ва биринчи ой учун тўлов топшириқномаси автоматик равишда шакллантирилади;
талаба йўлланма шакллангандан сўнг 10 иш куни мобайнида олий таълим муассасаси билан шартнома тузмаса ёки талабалар турар жойи учун дастлабки ойлик тўловни тўламаган тақдирда, йўлланма бекор қилинади.
23. Талабалар турар жойи учун ойлик тўлов миқдори ва муддатлари олий таълим муассасаси томонидан белгиланади ҳамда шартномада акс эттирилади.
24. Талабаларни талабалар турар жойига жойлаштириш бўйича давлат хизмати бепул кўрсатилади.
3-боб. Якунловчи қоидалар
25. Давлат хизматлари марказлари, олий таълим муассасалари ва ташкилотлар ўз фаолиятини амалга ошириш натижасида олинган ариза берувчи тўғрисидаги маълумотларнинг махфийлигини таъминлайди.
26. Ариза берувчи давлат органлари ва бошқа ташкилотлар ходимларининг хатти-ҳаракатлари юзасидан қонунчиликда белгиланган тартибда шикоят қилиши мумкин.
27. Мазкур Регламент талабларининг бузилишида айбдор бўлган шахслар қонунчилик ҳужжатларига мувофиқ жавоб берадилар.
Давлат олий таълим муассасаларининг талабаларини талабалар турар жойига жойлаштириш бўйича давлат хизматлари кўрсатишнинг маъмурий регламентига 1-ИЛОВА
Давлат олий таълим муассасалари талабаларини талабалар турар жойларига жойлаштириш
Босқичлар Масъуллар Амалга ошириш механизми Ижро муддати 1-босқич Ариза берувчи (талаба) Давлат хизматлари маркази ёки ЯИДХП орқали олий таълим муассасасига сўровнома юборади. Эҳтиёжига кўра 2-босқич Олий таълим муассасаси 1. Аризани кўриб чиқиб, қуйидаги хабарномалардан бирини ариза берувчига юборади: а) талабалар турар жойида бўш жой мавжуд бўлса, талабанинг аризаси имтиёзли рўйхатдаги мезонлар ва умумий рўйхат асосида қабул қилинганлиги ҳақида; б) талабалар турар жойида бўш жой мавжуд бўлмаса, навбатга қўйилганлиги ҳақида. Ариза автоматик тарзда юборилгач 10 дақиқада 2. Талабалар турар жойида мавжуд бўш ва банд жойлар тўғрисидаги маълумотларни махсус ахборот тизимига киритиб боради. Доимий равишда кунлик асосда янгилайди 3-босқич Ариза берувчи (талаба) Талабалар турар жойига қабул қилинганлиги ҳақидаги QR кодли йўлланмани давлат хизматлари маркази ёки ЯИДХП орқали олади. Навбат асосида йўлланма шакллангандан сўнг 4-босқич Олий таълим муассасаси Йўлланма келиб тушган ёки тақдим этилган куннинг ўзида талаба билан шартнома тузади ва уни талабалар турар жойига жойлаштиради. Йўлланма тақдим этилган куннинг ўзида
Давлат олий таълим муассасаларининг талабаларини талабалар турар жойига жойлаштириш бўйича давлат хизматлари кўрсатишнинг маъмурий регламентига 2-ИЛОВА
Давлат олий таълим муассасалари талабалар турар жойларига жойлаштириш бўйича давлат хизматларидан фойдаланиш учун
I. Ариза берувчи (талаба) ҳақида маълумот 1. Ф.И.О. 2. Паспорт маълумотлари (рақами ва серияси) 3. Доимий яшаш манзили 4. Телефон рақами 5. Электрон почта манзили (мавжуд бўлса) 6. Жинси 7. Фуқаролиги 8. Таълим олаётган олий таълим муассасаси номи 9. Факультети 10. Таълим йўналиши 11. Курси 12. Таълим шакли II. Олий таълим муассасалари талабалар турар жойи ҳақида маълумот * Талабалар турар жойи рақами (манзили, сиғими) III. Имтиёзли ҳуқуқ борлиги ҳақидаги маълумотлар ва уларни тасдиқловчи ҳужжатлар (мавжуд бўлса) * Ижтимоий реестрга киритилган оила фарзанди «Темир дафтар»га киритилган оила фарзанди «Аёллар дафтари»га киритилган шахс фарзанди «Ёшлар дафтари»га киритилган талаба «Меҳрибонлик уйлари» тарбияланувчиси Чин етимлар ва ота-она қарамоғидан маҳрум бўлган талаба I ва II гуруҳ ногиронлиги бўлган талаба Хорижий давлат фуқароси бўлган талаба Халқаро ёки Олий таълим, фан ва инновациялар вазирлиги томонидан ўтказилган республика миқёсидаги фан олимпиадаларида ғолиб бўлган талаба «Заковат» интеллектуал ўйини республика босқичи ғолиби «Йил талабаси» кўрик-танлови республика босқичи ғолиби «Талабалар театр студиялари» танловининг республика босқичи ғолиби Талабалар турар жойида талабалар кенгаши раиси ёки қават сардори бўлган талаба IV. Хабар бериш тартиби 1. Давлат хизматлари марказлари ёки ЯИДХП 2. СМС ёки телефон орқали 3. Электрон почта орқали
Вазирлар Маҳкамасининг 2023 йил 14 августдаги 376-сон қарорига 2-ИЛОВА
Вазирлар Маҳкамасининг «Ижара ҳуқуқи асосида яшаётган талабалар томонидан тўланадиган ижара тўловларини қоплаб бериш тизимини жорий этиш чора-тадбирлари тўғрисида» 2021 йил 24 сентябрдаги 605-сон қарорига киритилаётган ўзгартиришлар
1. 2-бандда :
иккинчи хатбошидан «белгиланган мезонлар асосида» сўзлари чиқариб ташлансин;
тўртинчи хатбошидаги «талабани ижтимоий мезонлар бўйича ўрганиш ва талабага ойлик ижара тўловининг бир қисмини қоплаб беришни кўриб чиқиш» сўзлари «талабалар аризасини кўриб чиқиш, ўрганиш ва ойлик ижара тўловининг бир қисмини қоплаб бериш бўйича қарор қабул қилиш» сўзлари билан алмаштирилсин;
2. 3-банд қуйидаги таҳрирда баён этилсин:
«3. Шундай тартиб ўрнатилсинки, унга мувофиқ:
талабалар сафига қабул қилинган ва талабалар турар жойи билан қамраб олинмаган олий таълим муассасасидан узоқ жойлашган ҳудудлардан келган биринчи босқич талабалари (доимий яшаш жойи бошқа туманда (шаҳарда) бўлган ижара асосида яшайдиган талабалар)га, олий таълим муассасаларига ушбу мақсадларда ажратилган маблағлар доирасида сентябрь ва октябрь ойлари учун ижара шартномаси талаб этмасдан ойлик ижара тўловининг бир қисми қоплаб берилади ҳамда белгиланган тартибда ижара шартномаси тақдим этган талабаларга ноябрь ойидан тўловлар давом эттирилади;
давлат олий таълим муассасалари томонидан ижара ҳуқуқи асосида яшаётган, бироқ ижара тўловлари ушбу қарорда белгиланган тартибда Ўзбекистон Республикаси Давлат бюджети ҳисобидан қопланадиган талабаларнинг 60 фоизидан ортган қисми учун ойлик ижара тўлови бир қисмини ушбу олий таълим муассасаси томонидан тасдиқланган мезонлар ва тартиб асосида молиявий имкониятидан келиб чиқиб бюджетдан ташқари маблағлари ҳисобидан қоплаб берилиши мумкин»;
3. Илова (Давлат олий таълим муассасаларининг ижара ҳуқуқи асосида яшаётган талабаларига ойлик ижара тўловининг бир қисмини Ўзбекистон Республикаси Давлат бюджети ҳисобидан қоплаб бериш тартиби тўғрисидаги низом)да:
а) 2-бандда :
учинчи хатбоши чиқариб ташлансин;
тўртинчи ва бешинчи хатбошилар тегишинча учинчи ва тўртинчи хатбошилар деб ҳисоблансин;
учинчи хатбоши қуйидаги таҳрирда баён этилсин:
«давлат олий таълим муассасаларининг ижара ҳуқуқи асосида яшаётган талабаларига ойлик ижара тўловининг бир қисмини Ўзбекистон Республикаси Давлат бюджети ҳисобидан қоплаб бериш бўйича талабгорларни танлаб олиш комиссияси (кейинги ўринларда — комиссия) — талабалар аризасини кўриб чиқиш, ўрганиш ва ойлик ижара тўловининг бир қисмини қоплаб бериш бўйича қарор қабул қилишга масъул бўлган мазкур Низомнинг 1-иловасига мувофиқ таркибда олий таълим муассасаси ректори (филиал директори) томонидан тасдиқланадиган доимий ва жамоатчилик асосида ишлайдиган тузилма»;
б) 4 — 7-бандлар қуйидаги таҳрирда баён этилсин:
«4. Битта турар жойда икки ва ундан ортиқ талаба ижара ҳуқуқи асосида яшаган ҳолатларда, уларнинг барчаси ижара шартномасида қайд этилган бўлишлари шарт.
Бунда талабгорларга ойлик ижара тўловининг бир қисми ижара шартномасининг суммасидан қатъи назар, Тошкент шаҳрида — базавий ҳисоблаш миқдорининг бир баравари, қолган ҳудудларда — базавий ҳисоблаш миқдорининг ярим баравари миқдорида тўланади.
5. Ариза берувчи томонидан тақдим этилган ариза ва унга илова қилинган ҳужжатлар асосида талабгорлар комиссия томонидан аниқланади.
6. Давлат олий таълим муассасаларининг фақат кундузги таълим шаклида (хорижий ҳамкор олий таълим ташкилотларининг қўшма таълим дастурлари асосида ва факультетларида таълим олаётган талабалардан ташқари), давлат гранти ёки тўлов-контракт асосида таҳсил олишидан қатъи назар, ижара ҳуқуқи асосида яшайдиган талабаларнинг 60 фоизига Ўзбекистон Республикаси Давлат бюджети ҳисобидан қоплаб берилади.
7. Ариза берувчи мустақил равишда ушбу Низомнинг 2-иловасига мувофиқ шаклдаги анкета-аризани икки нусхада тўлдириб, ижара шартномаси нусхаси билан ўзи таълим олаётган факультетнинг ёшлар билан ишлаш бўйича декан ўринбосари ёки олий таълим муассасасининг талабаларни турар жой билан таъминлаш ишларини мувофиқлаштирувчи бўлимига (кейинги ўринларда — масъуллар) топширади.
Бунда ариза берувчи мазкур бандда келтирилган ҳужжатларга қўшимча равишда ўзининг ижтимоий ҳолати тўғрисидаги маълумотномаларни (агар мавжуд бўлса) илова қилиши лозим»;
в) 3-бобнинг номидан «ижтимоий мезонлар бўйича» сўзлари чиқариб ташлансин;
г) 10-банд қуйидаги таҳрирда баён этилсин:
«10. Масъуллар бир ҳафта давомида тьюторлар билан биргаликда ариза берувчиларнинг маълумотларини комиссияга тақдим этиш учун ҳар томонлама ўрганади»;
д) 11-банддаги «хулоса бериш» сўзлари «қарор қабул қилиш» сўзлари билан алмаштирилсин;
е) 12-банддаги «талабгорлар» сўзи «ариза берувчилар» сўзлари билан алмаштирилсин;
ж) 13-банддаги «талабгор» сўзи «ариза берувчи» сўзлари билан алмаштирилсин;
з) 22-банднинг биринчи хатбошисидан «ҳамда ижтимоий мезонларга кўра» сўзлари чиқариб ташлансин;
и) 24-банд қуйидаги таҳрирда баён этилсин:
«24. Комиссия томонидан доимий равишда ижара шартномасини қалбакилаштирган ва нотўғри маълумотлар тақдим этган талабалар рўйхати шакллантирилиб борилади.
Ушбу талабалар рўйхатига тушган талабаларга комиссия қарори асосида ойлик ижара тўловининг бир қисмини қоплаб бериш тўхтатилиши мумкин»;
к) 25-банд қуйидаги таҳрирда баён этилсин:
«25. Қуйидаги ҳолатларда ариза берувчига ойлик ижара тўловининг бир қисмини қоплаб бериш рад этилиши мумкин:
ариза берувчи ушбу Низомнинг 24-бандида кўрсатилган талабалар рўйхатида мавжуд бўлганда;
ариза берувчининг ижара шартномасида кўрсатилган манзилда яшамаслиги, ижарада яшаётган манзил ота-онаси (қонуний вакиллари)га тегишли эканлиги, ижара шартномаси тегишли тартибда расмийлаштирилмаганлиги;
тақдим этилган ҳужжатларда нотўғри ёки сохта маълумотлар мавжуд бўлганда;
ариза ва тегишли ҳужжатлар қабул қилишнинг охирги санаси тугагандан кейин тақдим этилганда»;
л) 2-илова (Анкета-ариза)нинг 10-банди учинчи хатбошисидаги «ижтимоий мезонларга мувофиқлигимни» сўзлари «ижтимоий ҳолатимни» сўзлари билан алмаштирилсин.
Ўзбекистон Республикасининг Бош вазири А. АРИПОВ
Тошкент ш.,
2023 йил 14 август,
376-сон
Oʻzbekiston Respublikasi Vazirlar Mahkamasining
qarori
MAʼMURIY REGLAMENTI
SXEMASI
SOʻROVNOMA
Oliy taʼlim muassasalari talabalarini turar joy bilan taʼminlash tizimini takomillashtirish chora-tadbirlari toʻgʻrisida
Talabalarni turar joy bilan taʼminlashning shaffof va samarali tizimini joriy etish maqsadida Vazirlar Mahkamasi qaror qiladi:
1. Shunday tartib oʻrnatilsinki, unga koʻra:
davlat oliy taʼlim muassasalarining talabalar turar joyiga joylashish faqat davlat xizmati markazlari va (yoki) Oʻzbekiston Respublikasi Yagona interaktiv davlat xizmatlari portali (keyingi oʻrinlarda — YIDXP) orqali elektron ariza berish yoʻli bilan amalga oshiriladi hamda talabalarga navbatni onlayn kuzatish va toʻlovlarni amalga oshirish imkoniyati yaratiladi;
talabalar bilan tuziladigan turar joy ijara shartnomalari davlat soliq xizmati organlarida soliq toʻlovchining shaxsiy kabineti orqali masofadan turib biometrik identifikatsiyalash (Face-ID) texnologiyasi orqali elektron shaklda real vaqt rejimida hisobga qoʻyiladi.
2. Quyidagilarni nazarda tutuvchi Davlat oliy taʼlim muassasalarining talabalarini talabalar turar joyiga joylashtirish boʻyicha davlat xizmatlari koʻrsatishning maʼmuriy reglamenti 1-ilovaga muvofiq tasdiqlansin.
3. Belgilansinki:
a) 2023/2024 oʻquv yili uchun davlat oliy taʼlim muassasalarining:
1-kurs talabalarini talabalar turar joyiga joylashtirish ushbu qaror bilan tasdiqlangan maʼmuriy reglament talablari asosida amalga oshiriladi;
2-kurs va undan yuqori kurs talabalarini talabalar turar joyiga joylashtirish anʼanaviy tarzda amalga oshiriladi. Bunda talabalar turar joyiga joylashish uchun ariza oliy taʼlim muassasasi talabalar turar joylariga joylashtirish komissiyasiga 2023-yil 25-avgustga qadar topshiriladi;
b) 2024/2025 oʻquv yilidan boshlab barcha kurs talabalari uchun davlat oliy taʼlim muassasalari talabalar turar joyiga joylashish onlayn shaklda amalga oshiriladi. Bunda talabalar turar joyiga joylashish uchun ariza berish 1-avgustdan boshlab oʻquv yili yakuniga qadar davom etadi;
v) quyidagi toifadagi talabalar ustuvorlik asosida talabalar turar joylariga qabul qilinadi:
“Mehribonlik uylari” tarbiyalanuvchilari, yetim va ota-ona qaramogʻidan mahrum boʻlgan talabalar;
Ijtimoiy reyestr, “Temir daftar” va “Ayollar daftari”ga kiritilgan ijtimoiy himoyaga muhtoj oilalarning farzandlari hamda “Yoshlar daftari”da turadigan talabalar;
I va II guruh nogironligi boʻlgan talabalar;
bir oiladan bakalavriat bosqichi kunduzgi taʼlim shaklida ikki yoki undan ortiq toʻlov-shartnoma asosida oʻqiyotgan oilalar farzandlari;
xalqaro fan olimpiadalari, Oʻzbekiston Respublikasi Oliy taʼlim, fan va innovatsiyalar vazirligi tomonidan oʻtkaziladigan respublika fan olimpiadalarida gʻoliblikni qoʻlga kiritgan talabalar;
“Yil talabasi” va “Talabalar teatr studiyalari” koʻrik-tanlovlarining respublika bosqichi gʻolibi boʻlgan talabalar;
oliy taʼlim muassasalari talabalari oʻrtasida oʻtkazilgan “Zakovat” intellektual oʻyinining respublika bosqichida gʻoliblikni qoʻlga kiritgan talabalar;
talabalar turar joyida talabalar kengashi raisi, qavat sardori boʻlgan talabalar;
g) davlat xizmatlari markazlari yoki YIDXP orqali elektron ariza berish va toʻlovlarni amalga oshirishda davlat xizmatini koʻrsatganlik uchun toʻlov undirilmaydi.
4. Oʻzbekiston Respublikasi Oliy taʼlim, fan va innovatsiyalar vazirligi:
a) 2023-yil 20-avgustga qadar Oliy taʼlim, fan va innovatsiyalar vazirligining Oliy taʼlim muassasalarini rivojlantirish jamgʻarmasi mablagʻlari hisobidan talabalarni talabalar turar joyiga onlayn joylashtirish imkoniyatini beruvchi axborot tizimi ishlab chiqilishi va keyinchalik qoʻllab-quvvatlanishini;
Raqamli texnologiyalar vazirligi bilan birgalikda “Elektron hukumat” idoralararo integratsiyalashuv platformasi orqali 2023-yil 20-avgustga qadar tegishli elektron maʼlumotlar bazalarining oʻzaro integratsiya qilinishini;
oliy taʼlim muassasalari hamda davlat xizmatlari koʻrsatishda ishtirok etuvchi boshqa tuzilmalarning YIDXPga ulanishini taʼminlasin;
b) YIDXPda davlat xizmatlari koʻrsatilishining har bir bosqichida murojaatlarning koʻrib chiqilishini kuzatib borish tartibini joriy etsin.
5. Oʻzbekiston Respublikasi Adliya vazirligi, Oliy taʼlim, fan va innovatsiyalar vazirligi ushbu qaror talablarining bajarilishi boʻyicha davlat organlari va boshqa tashkilotlarning faoliyati yuzasidan doimiy monitoring olib borsin.
6. Vazirlar Mahkamasining “Ijara huquqi asosida yashayotgan talabalar tomonidan toʻlanadigan ijara toʻlovlarini qoplab berish tizimini joriy etish chora-tadbirlari toʻgʻrisida” 2021-yil 24-sentabrdagi 605-son qaroriga 2-ilovaga muvofiq oʻzgartirishlar kiritilsin.
7. Mazkur qarorning bajarilishini nazorat qilish Oʻzbekiston Respublikasi oliy taʼlim, fan va innovatsiyalar vaziri I.Yu. Abduraxmonov zimmasiga yuklansin.
Vazirlar Mahkamasining 2023-yil 14-avgustdagi 376-son qaroriga 1-ILOVA
Davlat oliy taʼlim muassasalarining talabalarini talabalar turar joyiga joylashtirish boʻyicha davlat xizmatlari koʻrsatishning
1-bob. Umumiy qoidalar
1. Mazkur Reglament davlat oliy taʼlim muassasalari talabalarini talabalar turar joylariga joylashtirish tartibini belgilaydi.
2. Ushbu Reglamentning qoidalari xorijiy, nodavlat va harbiy oliy taʼlim tashkilotlari talabalar turar joylari, shuningdek, davlat-xususiy sheriklik shartlari asosida qurilgan talabalar turar joylarining xususiy sherik uchun tijoriy maqsadlarda ajratiladigan oʻrinlariga talabalarni qabul qilishga nisbatan tatbiq etilmaydi.
3. Ushbu Reglamentda quyidagi asosiy tushunchalardan foydalaniladi:
maxsus axborot tizimi — talabalarni talabalar turar joyiga joylashtirish jarayonini raqamlashtiruvchi Oʻzbekiston Respublikasi Oliy taʼlim, fan va innovatsiyalar vazirligining (keyingi oʻrinlarda — Vazirlik) yagona axborot tizimi;
imtiyozli roʻyxat — Reglamentning 5-bandiga muvofiq aniqlanadigan hamda talabalar turar joyiga birinchi navbatda joylashish huquqiga ega talabalar roʻyxati;
umumiy roʻyxat — talabalar turar joyiga joylashish istagini bildirgan imtiyozli roʻyxatda mavjud boʻlmagan talabalar roʻyxati.
4. Maxsus axborot tizimiga quyidagi maʼlumotlar oliy taʼlim muassasasi tomonidan muntazam kiritib boriladi:
a) har yili 1-avgustga qadar:
tizimidagi har bir talabalar turar joyining manzili va quvvati (oʻquv yili davomida qoʻshimcha oʻrinlar yaratilgan taqdirda, bir ish kuni davomida);
talabalar turar joyida kurslar va fakultetlarga ajratilgan oʻrinlar soni (oʻquv yili davomida oliy taʼlim muassasasi rektori (direktori) buyrugʻi bilan qayta taqsimlangan taqdirda, shu kunning oʻzida);
b) muntazam ravishda — talabalar turar joyida mavjud boʻsh oʻrinlar soni (boʻsh oʻrin paydo boʻlgan taqdirda shu kunning oʻzida tegishli maʼlumot maxsus axborot tizimiga kiritiladi).
5. Imtiyozli roʻyxatga quyidagi mezonlarning biriga mos keluvchi talabalar kiritiladi:
a) tegishli tasdiqlovchi maʼlumotlar asosida:
“Mehribonlik uylari” tarbiyalanuvchilari, yetim va ota-ona qaramogʻidan mahrum boʻlgan talabalar;
Ijtimoiy reyestr, “Temir daftar” va “Ayollar daftari”, “Yoshlar daftari”ga kiritilgan ijtimoiy himoyaga muhtoj oila (ayol) farzandlari;
I va II guruh nogironligi boʻlgan talabalar;
xorijiy davlat fuqarosi boʻlgan talabalar;
bir oiladan bakalavriat bosqichi kunduzgi taʼlim shaklida ikki yoki undan ortiq toʻlov-shartnoma asosida oʻqiyotgan oilalar farzandlari;
Ijtimoiy reyestrga kiritilgan oilalar farzandlari.
b) oliy taʼlim muassasasi rektori (direktori) buyrugʻi asosida:
xalqaro va Vazirlik tomonidan oʻtkaziladigan respublika miqyosidagi fan olimpiadalarida gʻolib boʻlgan talabalar;
Vazirlik tomonidan oʻtkaziladigan “Zakovat” intellektual oʻyinlari respublika bosqichi gʻoliblari;
“Yil talabasi” koʻrik-tanlovi respublika bosqichi gʻoliblari;
“Talabalar teatr studiyalari” tanlovining respublika bosqichi gʻoliblari;
talabalar turar joyida talabalar kengashi raisi, qavat sardori boʻlgan talabalar.
6. Imtiyozli roʻyxatdagi mezonlar toʻgʻrisidagi maʼlumotlar ariza berish jarayonida:
“Mehribonlik uylari” tarbiyalanuvchilari, chin yetimlar va ota-ona qaramogʻidan mahrum boʻlgan talabalar toʻgʻrisidagi maʼlumotlar Oʻzbekiston Respublikasi Maktabgacha va maktab taʼlimi vazirligining axborot tizimi orqali;
Ijtimoiy reyestrga kiritilgan oilalar toʻgʻrisidagi maʼlumotlar Oʻzbekiston Respublikasi Iqtisodiyot va moliya vazirligining axborot tizimi orqali;
“Temir daftar”ga kiritilgan oilalar va “Ayollar daftari”ga kiritilgan xotin-qizlar toʻgʻrisidagi maʼlumotlar Oʻzbekiston Respublikasi Kambagʻallikni qisqartirish va bandlik vazirligining axborot tizimi orqali;
I va II guruh nogironligi boʻlgan shaxslar toʻgʻrisidagi maʼlumotlar Oʻzbekiston Respublikasi Prezidenti Administratsiyasi huzuridagi Ijtimoiy himoya milliy agentligining axborot tizimi orqali;
“Yoshlar daftari”ga kiritilgan yoshlar toʻgʻrisidagi maʼlumotlar Yoshlar ishlari agentligining axborot tizimi orqali;
1-kursga tavsiya etilgan talabalar toʻgʻrisidagi maʼlumotlar Oʻzbekiston Respublikasi Oliy taʼlim, fan va innovatsiyalar vazirligi huzuridagi Bilim va malakalarni baholash agentligining axborot tizimi orqali;
2-kurs va undan yuqori kurs talabalari toʻgʻrisidagi maʼlumotlar Vazirlikning axborot tizimi orqali avtomatik tekshiriladi.
7. Davlat xizmatlari markazlari, oliy taʼlim muassasalari va mutasaddi vazirlik va idoralar oʻrtasida axborotlar almashinuvi faqat idoralararo elektron oʻzaro hamkorlik orqali elektron raqamli imzoni qoʻllagan holda amalga oshiriladi.
Ushbu Reglamentning 6-bandida koʻrsatilgan holatlarni tasdiqlovchi maʼlumotlar “Elektron hukumat” tizimi idoralararo integratsiyalashuv platformasidan olinadi.
Tegishli maʼlumotlar “Elektron hukumat” tizimi idoralararo integratsiyalashuv platformasida aniqlanmagan taqdirda, talabadan imtiyozli roʻyxatdagi mezonlarga muvofiqligini tasdiqlovchi hujjatning nusxasini soʻrashga yoʻl qoʻyiladi.
8. Umumiy roʻyxatdagi talabalar uchun oliy taʼlim muassasasi talabalar turar joyida ortib qolgan oʻrinlar soniga nisbatan navbat asosida quyidagicha taqsimlanadi:
1-kurs talabalari uchun 55 — 65 foizi;
2-kurs talabalari uchun 15 — 20 foizi;
3-kurs va undan yuqori kurs talabalari uchun 20 — 25 foizgacha ajratiladi.
Bunda:
kurslarga ajratilgan, biroq toʻlmay qolgan oʻrinlar avvalo quyi kurs talabalari orasida, soʻng kurslarning ortib borishi tartibiga qatʼiy amal qilgan holda yuqori kurs talabalari orasida qayta taqsimlanadi;
oliy taʼlim muassasasi tomonidan talabalar turar joyidagi oʻrinlar soni umumiy roʻyxat boʻyicha fakultetlar kesimida taqsimlanishi mumkin.
9. Umumiy roʻyxatga kiritiladigan talabalar quyidagi ketma-ketlik asosida talabalar turar joyiga joylashtiriladi:
bitta oiladan bakalavriat bosqichi kunduzgi taʼlim shaklida ikki yoki undan ortiq toʻlov-kontrakt asosida oʻqiyotgan oila farzandlari;
kunduzgi taʼlim shaklida oʻqiyotgan talabalar (kunduzgi taʼlim shaklida oʻqiyotgan talabalar turar joyiga ehtiyoji bor talabalar toʻliq taʼminlanmasdan turib, boshqa taʼlim shaklida oʻqiyotgan talabalarni turar joyga joylashtirishga yoʻl qoʻyilmaydi);
talaba qizlar (talabalar kontingentidan kelib chiqib oliy taʼlim muassasasi rektori (direktori) ushbu ustuvorlik ulushini belgilaydi);
bakalavriat bosqichida oʻqiyotgan talabalar (bakalavriat bosqichida oʻqiyotgan turar joyga ehtiyoji bor talabalar toʻliq talabalar turar joyiga joylashtirilmasdan, taʼlimning magistratura va doktorantura bosqichida oʻqiyotgan talabalarni turar joyga joylashtirishga yoʻl qoʻyilmaydi);
oliy taʼlim muassasasi joylashgan hududdan boshqa hududda doimiy yashovchi talabalar;
ariza berilgan sana boʻyicha navbat asosida.
10. Imtiyozli va umumiy roʻyxatlar boʻyicha barcha navbatlar har oʻquv yili yakunidan soʻng bekor qilinadi hamda avgust oyidan boshlab talabalarning murojaatlari asosida qaytadan shakllantiriladi.
11. Talabalarni oliy taʼlim muassasasi talabalar turar joylariga qabul qilish YIDXP yoki davlat xizmatlari markazlari orqali berilgan yoʻllanma asosida ushbu Reglamentga 1-ilovada keltirilgan sxemaga muvofiq amalga oshiriladi.
Talabalarni talabalar turar joyiga yoʻllanmasiz qabul qilish taqiqlanadi.
12. Talabalarni talabalar turar joyiga joylashtirish boʻyicha yoʻllanmalar taqdim etilgan oʻquv yili uchun amal qiladi.
2-bob. Davlat xizmatlarini koʻrsatish tartibi
13. Talaba yoʻllanma olish uchun davlat xizmatlari markazlariga bevosita kelib (ishonchli vakil orqali) yoki mustaqil ravishda YIDXP orqali murojaat qilishi mumkin.
14. Talabalar turar joyiga joylashish uchun ariza berish har yili 1-avgustdan boshlanadi va oʻquv yili yakuniga qadar davom etadi.
15. Talaba davlat xizmatlari markazi orqali murojaat qilganda, markaz xodimi ariza beruvchi nomidan, YIDXP orqali murojaat qilgan taqdirda esa, mustaqil ravishda Reglamentga 2-ilovaga muvofiq soʻrovnomani toʻldiradi.
16. Soʻrovnoma asosida maxsus axborot tizimida quyidagi harakatlar avtomatik ravishda amalga oshiriladi:
talabani imtiyozli yoki umumiy roʻyxatga kiritish;
talabalar turar joyida boʻsh oʻrin boʻlganda, yoʻllanmani shakllantirish;
talabalar turar joyida boʻsh oʻrin mavjud boʻlmagan taqdirda — tegishli roʻyxat boʻyicha talabani navbatga qoʻyish va bu haqda xabarnoma yuborish;
talabalar turar joyida oʻrinlar boʻshashi bilan boʻsh oʻrinlar toʻgʻrisidagi maʼlumotlarni avtomatik yangilab borish.
17. Talaba quyidagi huquqlarga ega:
soʻrovnoma yuborilganidan soʻng ham undagi maʼlumotlarni tahrirlash;
talabalar turar joyida, jumladan, tegishli fakultet boʻyicha mavjud boʻsh oʻrinlar toʻgʻrisidagi maʼlumotni koʻrish;
davlat xizmatlari markazi, YIDXP yoki maxsus raqamga soʻrov yuborish orqali roʻyxatdagi navbat holati haqida SMS-xabar olish. Bunda har bir kiruvchi SMS-xabar uchun toʻlov ariza beruvchi hisobidan undiriladi;
har qanday bosqichda davlat xizmati koʻrsatilishidan voz kechish.
Ariza beruvchi talaba onlayn tarzda navbatni kuzatishi va YIDXPda xabarnomalarni olishi, shuningdek talabalar turar joyiga qabul qilish uchun ariza berish usulidan (YIDXP yoki davlat xizmatlari markazlari orqali) qatʼi nazar, davlat xizmatlari markazlarida murojaat holati toʻgʻrisida maʼlumotni bepul olishi mumkin.
18. Oliy taʼlim muassasasi talabaning soʻrovnomasida kamchiliklarni aniqlagan taqdirda, ariza beruvchiga besh ish kuni ichida ularni bartaraf etish uchun imkoniyat beriladi.
19. Soʻrovnomada notoʻgʻri maʼlumotlar koʻrsatilganligi hamda kamchiliklar belgilangan muddat mobaynida bartaraf etilmaganligi davlat xizmati koʻrsatishni rad etish uchun asos boʻladi.
Talabani talabalar turar joyiga joylashtirish boʻyicha davlat xizmati koʻrsatishni boshqa asoslarga koʻra rad etish taqiqlanadi.
Davlat xizmatidan foydalanish rad etilgan yoki talaba davlat xizmati koʻrsatilishidan voz kechgan taqdirda, talabaning soʻrovnomasi tizim tomonidan avtomatik ravishda koʻrib chiqilmasdan qoldiriladi va navbatdan chiqariladi. Bunda navbatga turish haqidagi xabarnoma yoki yoʻllanma soʻrovnoma bilan birgalikda bekor qilinadi.
20. Talabalar turar joyiga joylashish uchun yoʻllanma talabalar turar joyida oʻrinlar boʻshagan kuni maxsus axborot tizimida dastlab imtiyozli roʻyxat, soʻng umumiy roʻyxatdagi navbat boʻyicha avtomatik ravishda shakllantiriladi.
21. Maxsus axborot tizimi tomonidan shakllantirilgan elektron yoʻllanma va talabalarning navbatga qoʻyilganligi haqidagi elektron xabarnoma ularning qogʻoz shakliga tenglashtiriladi.
Bunda yoʻllanma va xabarnomalar avtomatik ravishda oliy taʼlim muassasasiga hamda ariza beruvchiga davlat xizmatlari markazi yoki YIDXP orqali yuboriladi.
Davlat xizmatlari markazi yoʻllanma kelib tushgandan soʻng 10 daqiqa mobaynida uni ariza beruvchining elektron manziliga yuboradi hamda ariza beruvchini bu haqda axborot-kommunikatsiya tizimi orqali xabardor qiladi.
Ariza beruvchi davlat xizmatlari markaziga kelib murojaat qilgan taqdirda, yoʻllanma uning soʻroviga koʻra elektron yoki qogʻoz shaklda beriladi.
22. Talabani talabalar turar joyiga joylashtirish oliy taʼlim muassasasi va ariza beruvchi oʻrtasida shartnoma tuzish orqali rasmiylashtiriladi.
Bunda:
shartnoma oliy taʼlim muassasasiga yoʻllanma kelib tushgan yoki taqdim etilgan kunning oʻzida tuziladi;
yoʻllanma bilan birgalikda shartnoma va birinchi oy uchun toʻlov topshiriqnomasi avtomatik ravishda shakllantiriladi;
talaba yoʻllanma shakllangandan soʻng 10 ish kuni mobaynida oliy taʼlim muassasasi bilan shartnoma tuzmasa yoki talabalar turar joyi uchun dastlabki oylik toʻlovni toʻlamagan taqdirda, yoʻllanma bekor qilinadi.
23. Talabalar turar joyi uchun oylik toʻlov miqdori va muddatlari oliy taʼlim muassasasi tomonidan belgilanadi hamda shartnomada aks ettiriladi.
24. Talabalarni talabalar turar joyiga joylashtirish boʻyicha davlat xizmati bepul koʻrsatiladi.
3-bob. Yakunlovchi qoidalar
25. Davlat xizmatlari markazlari, oliy taʼlim muassasalari va tashkilotlar oʻz faoliyatini amalga oshirish natijasida olingan ariza beruvchi toʻgʻrisidagi maʼlumotlarning maxfiyligini taʼminlaydi.
26. Ariza beruvchi davlat organlari va boshqa tashkilotlar xodimlarining xatti-harakatlari yuzasidan qonunchilikda belgilangan tartibda shikoyat qilishi mumkin.
27. Mazkur Reglament talablarining buzilishida aybdor boʻlgan shaxslar qonunchilik hujjatlariga muvofiq javob beradilar.
Davlat oliy taʼlim muassasalarining talabalarini talabalar turar joyiga joylashtirish boʻyicha davlat xizmatlari koʻrsatishning maʼmuriy reglamentiga 1-ILOVA
Davlat oliy taʼlim muassasalari talabalarini talabalar turar joylariga joylashtirish
Bosqichlar Masʼullar Amalga oshirish mexanizmi Ijro muddati 1-bosqich Ariza beruvchi (talaba) Davlat xizmatlari markazi yoki YIDXP orqali oliy taʼlim muassasasiga soʻrovnoma yuboradi. Ehtiyojiga koʻra 2-bosqich Oliy taʼlim muassasasi 1. Arizani koʻrib chiqib, quyidagi xabarnomalardan birini ariza beruvchiga yuboradi: a) talabalar turar joyida boʻsh joy mavjud boʻlsa, talabaning arizasi imtiyozli roʻyxatdagi mezonlar va umumiy roʻyxat asosida qabul qilinganligi haqida; b) talabalar turar joyida boʻsh joy mavjud boʻlmasa, navbatga qoʻyilganligi haqida. Ariza avtomatik tarzda yuborilgach 10 daqiqada 2. Talabalar turar joyida mavjud boʻsh va band joylar toʻgʻrisidagi maʼlumotlarni maxsus axborot tizimiga kiritib boradi. Doimiy ravishda kunlik asosda yangilaydi 3-bosqich Ariza beruvchi (talaba) Talabalar turar joyiga qabul qilinganligi haqidagi QR kodli yoʻllanmani davlat xizmatlari markazi yoki YIDXP orqali oladi. Navbat asosida yoʻllanma shakllangandan soʻng 4-bosqich Oliy taʼlim muassasasi Yoʻllanma kelib tushgan yoki taqdim etilgan kunning oʻzida talaba bilan shartnoma tuzadi va uni talabalar turar joyiga joylashtiradi. Yoʻllanma taqdim etilgan kunning oʻzida
Davlat oliy taʼlim muassasalarining talabalarini talabalar turar joyiga joylashtirish boʻyicha davlat xizmatlari koʻrsatishning maʼmuriy reglamentiga 2-ILOVA
Davlat oliy taʼlim muassasalari talabalar turar joylariga joylashtirish boʻyicha davlat xizmatlaridan foydalanish uchun
I. Ariza beruvchi (talaba) haqida maʼlumot 1. F.I.O. 2. Pasport maʼlumotlari (raqami va seriyasi) 3. Doimiy yashash manzili 4. Telefon raqami 5. Elektron pochta manzili (mavjud boʻlsa) 6. Jinsi 7. Fuqaroligi 8. Taʼlim olayotgan oliy taʼlim muassasasi nomi 9. Fakulteti 10. Taʼlim yoʻnalishi 11. Kursi 12. Taʼlim shakli II. Oliy taʼlim muassasalari talabalar turar joyi haqida maʼlumot * Talabalar turar joyi raqami (manzili, sigʻimi) III. Imtiyozli huquq borligi haqidagi maʼlumotlar va ularni tasdiqlovchi hujjatlar (mavjud boʻlsa) * Ijtimoiy reyestrga kiritilgan oila farzandi “Temir daftar”ga kiritilgan oila farzandi “Ayollar daftari”ga kiritilgan shaxs farzandi “Yoshlar daftari”ga kiritilgan talaba “Mehribonlik uylari” tarbiyalanuvchisi Chin yetimlar va ota-ona qaramogʻidan mahrum boʻlgan talaba I va II guruh nogironligi boʻlgan talaba Xorijiy davlat fuqarosi boʻlgan talaba Xalqaro yoki Oliy taʼlim, fan va innovatsiyalar vazirligi tomonidan oʻtkazilgan respublika miqyosidagi fan olimpiadalarida gʻolib boʻlgan talaba “Zakovat” intellektual oʻyini respublika bosqichi gʻolibi “Yil talabasi” koʻrik-tanlovi respublika bosqichi gʻolibi “Talabalar teatr studiyalari” tanlovining respublika bosqichi gʻolibi Talabalar turar joyida talabalar kengashi raisi yoki qavat sardori boʻlgan talaba IV. Xabar berish tartibi 1. Davlat xizmatlari markazlari yoki YIDXP 2. SMS yoki telefon orqali 3. Elektron pochta orqali
Vazirlar Mahkamasining 2023-yil 14-avgustdagi 376-son qaroriga 2-ILOVA
Vazirlar Mahkamasining “Ijara huquqi asosida yashayotgan talabalar tomonidan toʻlanadigan ijara toʻlovlarini qoplab berish tizimini joriy etish chora-tadbirlari toʻgʻrisida” 2021-yil 24-sentabrdagi 605-son qaroriga kiritilayotgan oʻzgartirishlar
1. 2-bandda :
ikkinchi xatboshidan “belgilangan mezonlar asosida” soʻzlari chiqarib tashlansin;
toʻrtinchi xatboshidagi “talabani ijtimoiy mezonlar boʻyicha oʻrganish va talabaga oylik ijara toʻlovining bir qismini qoplab berishni koʻrib chiqish” soʻzlari “talabalar arizasini koʻrib chiqish, oʻrganish va oylik ijara toʻlovining bir qismini qoplab berish boʻyicha qaror qabul qilish” soʻzlari bilan almashtirilsin;
2. 3-band quyidagi tahrirda bayon etilsin:
“3. Shunday tartib oʻrnatilsinki, unga muvofiq:
talabalar safiga qabul qilingan va talabalar turar joyi bilan qamrab olinmagan oliy taʼlim muassasasidan uzoq joylashgan hududlardan kelgan birinchi bosqich talabalari (doimiy yashash joyi boshqa tumanda (shaharda) boʻlgan ijara asosida yashaydigan talabalar)ga, oliy taʼlim muassasalariga ushbu maqsadlarda ajratilgan mablagʻlar doirasida sentabr va oktabr oylari uchun ijara shartnomasi talab etmasdan oylik ijara toʻlovining bir qismi qoplab beriladi hamda belgilangan tartibda ijara shartnomasi taqdim etgan talabalarga noyabr oyidan toʻlovlar davom ettiriladi;
davlat oliy taʼlim muassasalari tomonidan ijara huquqi asosida yashayotgan, biroq ijara toʻlovlari ushbu qarorda belgilangan tartibda Oʻzbekiston Respublikasi Davlat budjeti hisobidan qoplanadigan talabalarning 60 foizidan ortgan qismi uchun oylik ijara toʻlovi bir qismini ushbu oliy taʼlim muassasasi tomonidan tasdiqlangan mezonlar va tartib asosida moliyaviy imkoniyatidan kelib chiqib budjetdan tashqari mablagʻlari hisobidan qoplab berilishi mumkin”;
3. Ilova (Davlat oliy taʼlim muassasalarining ijara huquqi asosida yashayotgan talabalariga oylik ijara toʻlovining bir qismini Oʻzbekiston Respublikasi Davlat budjeti hisobidan qoplab berish tartibi toʻgʻrisidagi nizom)da:
a) 2-bandda :
uchinchi xatboshi chiqarib tashlansin;
toʻrtinchi va beshinchi xatboshilar tegishincha uchinchi va toʻrtinchi xatboshilar deb hisoblansin;
uchinchi xatboshi quyidagi tahrirda bayon etilsin:
“davlat oliy taʼlim muassasalarining ijara huquqi asosida yashayotgan talabalariga oylik ijara toʻlovining bir qismini Oʻzbekiston Respublikasi Davlat budjeti hisobidan qoplab berish boʻyicha talabgorlarni tanlab olish komissiyasi (keyingi oʻrinlarda — komissiya) — talabalar arizasini koʻrib chiqish, oʻrganish va oylik ijara toʻlovining bir qismini qoplab berish boʻyicha qaror qabul qilishga masʼul boʻlgan mazkur Nizomning 1-ilovasiga muvofiq tarkibda oliy taʼlim muassasasi rektori (filial direktori) tomonidan tasdiqlanadigan doimiy va jamoatchilik asosida ishlaydigan tuzilma”;
b) 4 — 7-bandlar quyidagi tahrirda bayon etilsin:
“4. Bitta turar joyda ikki va undan ortiq talaba ijara huquqi asosida yashagan holatlarda, ularning barchasi ijara shartnomasida qayd etilgan boʻlishlari shart.
Bunda talabgorlarga oylik ijara toʻlovining bir qismi ijara shartnomasining summasidan qatʼi nazar, Toshkent shahrida — bazaviy hisoblash miqdorining bir baravari, qolgan hududlarda — bazaviy hisoblash miqdorining yarim baravari miqdorida toʻlanadi.
5. Ariza beruvchi tomonidan taqdim etilgan ariza va unga ilova qilingan hujjatlar asosida talabgorlar komissiya tomonidan aniqlanadi.
6. Davlat oliy taʼlim muassasalarining faqat kunduzgi taʼlim shaklida (xorijiy hamkor oliy taʼlim tashkilotlarining qoʻshma taʼlim dasturlari asosida va fakultetlarida taʼlim olayotgan talabalardan tashqari), davlat granti yoki toʻlov-kontrakt asosida tahsil olishidan qatʼi nazar, ijara huquqi asosida yashaydigan talabalarning 60 foiziga Oʻzbekiston Respublikasi Davlat budjeti hisobidan qoplab beriladi.
7. Ariza beruvchi mustaqil ravishda ushbu Nizomning 2-ilovasiga muvofiq shakldagi anketa-arizani ikki nusxada toʻldirib, ijara shartnomasi nusxasi bilan oʻzi taʼlim olayotgan fakultetning yoshlar bilan ishlash boʻyicha dekan oʻrinbosari yoki oliy taʼlim muassasasining talabalarni turar joy bilan taʼminlash ishlarini muvofiqlashtiruvchi boʻlimiga (keyingi oʻrinlarda — masʼullar) topshiradi.
Bunda ariza beruvchi mazkur bandda keltirilgan hujjatlarga qoʻshimcha ravishda oʻzining ijtimoiy holati toʻgʻrisidagi maʼlumotnomalarni (agar mavjud boʻlsa) ilova qilishi lozim”;
v) 3-bobning nomidan “ijtimoiy mezonlar boʻyicha” soʻzlari chiqarib tashlansin;
g) 10-band quyidagi tahrirda bayon etilsin:
“10. Masʼullar bir hafta davomida tyutorlar bilan birgalikda ariza beruvchilarning maʼlumotlarini komissiyaga taqdim etish uchun har tomonlama oʻrganadi”;
d) 11-banddagi “xulosa berish” soʻzlari “qaror qabul qilish” soʻzlari bilan almashtirilsin;
e) 12-banddagi “talabgorlar” soʻzi “ariza beruvchilar” soʻzlari bilan almashtirilsin;
j) 13-banddagi “talabgor” soʻzi “ariza beruvchi” soʻzlari bilan almashtirilsin;
z) 22-bandning birinchi xatboshisidan “hamda ijtimoiy mezonlarga koʻra” soʻzlari chiqarib tashlansin;
i) 24-band quyidagi tahrirda bayon etilsin:
“24. Komissiya tomonidan doimiy ravishda ijara shartnomasini qalbakilashtirgan va notoʻgʻri maʼlumotlar taqdim etgan talabalar roʻyxati shakllantirilib boriladi.
Ushbu talabalar roʻyxatiga tushgan talabalarga komissiya qarori asosida oylik ijara toʻlovining bir qismini qoplab berish toʻxtatilishi mumkin”;
k) 25-band quyidagi tahrirda bayon etilsin:
“25. Quyidagi holatlarda ariza beruvchiga oylik ijara toʻlovining bir qismini qoplab berish rad etilishi mumkin:
ariza beruvchi ushbu Nizomning 24-bandida koʻrsatilgan talabalar roʻyxatida mavjud boʻlganda;
ariza beruvchining ijara shartnomasida koʻrsatilgan manzilda yashamasligi, ijarada yashayotgan manzil ota-onasi (qonuniy vakillari)ga tegishli ekanligi, ijara shartnomasi tegishli tartibda rasmiylashtirilmaganligi;
taqdim etilgan hujjatlarda notoʻgʻri yoki soxta maʼlumotlar mavjud boʻlganda;
ariza va tegishli hujjatlar qabul qilishning oxirgi sanasi tugagandan keyin taqdim etilganda”;
l) 2-ilova (Anketa-ariza)ning 10-bandi uchinchi xatboshisidagi “ijtimoiy mezonlarga muvofiqligimni” soʻzlari “ijtimoiy holatimni” soʻzlari bilan almashtirilsin.
Oʻzbekiston Respublikasining Bosh vaziri A. ARIPOV
Toshkent sh.,
2023-yil 14-avgust,
376-son