📅 2023-yil 14-avgust · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2023 йил 14 август · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 14 августа 2023 г. · Постановления Кабинета Министров
Официальный текст. Официальный документ. Редакционные примечания не включены.
📅 14 August 2023 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
Пахта хом ашёсини етиштирувчилар учун қўшилган қиймат солиғини тўлаш ҳамда ҳисобга олиш муддатларини мувофиқлаштириш тўғрисида
Ўзбекистон Республикаси Президентининг «Пахта хом ашёси етиштирувчилар фаолиятини янада қўллаб-қувватлашнинг қўшимча чора-тадбирлари тўғрисида» 2023 йил 26 январдаги ПҚ-23-сон қарори ижросини таъминлаш, шунингдек, пахта хом ашёсини етиштирувчиларни қўллаб-қувватлаш ва уларга қўшимча қулайликлар яратиш мақсадида Вазирлар Маҳкамаси қарор қилади:
1. Қуйидагилар:
Ўзбекистон Республикаси Президентининг «Пахта хом ашёси етиштирувчилар фаолиятини янада қўллаб-қувватлашнинг қўшимча чора-тадбирлари тўғрисида» 2023 йил 26 январдаги ПҚ-23-сон қарорининг 10-бандида қўшилган қиймат солиғини тўлаш ҳамда ҳисобга олиш муддатини пахта хом ашёси бўйича амалга ошириладиган ҳисоб-китоб муддатига мувофиқлаштириш белгиланганлиги;
Вазирлар Маҳкамасининг 2021 йил 4 декабрдаги 733-сон қарори билан тасдиқланган Пахта-тўқимачилик кластерлари фаолиятини ташкил этиш тартиби тўғрисидаги низомнинг 31-бандига мувофиқ қишлоқ хўжалиги ер участкаларини ижарага олмасдан ташкил этилган пахта-тўқимачилик кластери пахта хом ашёси етиштирувчилар томонидан етиштирилган пахта хом ашёсини шартномада белгиланган нархларда сотиб олиш ва якуний ҳисоб-китобларни ҳосил йиғиб олинган йилнинг 31 декабрига қадар амалга ошириш мажбуриятига эга эканлиги маълумот учун қабул қилинсин.
2. Шундай тартиб ўрнатилсинки, унга мувофиқ:
а) 2023 йил ҳосилидан бошлаб, пахта-тўқимачилик кластерлари томонидан пахта хом ашёси тўлиқ электрон тарози орқали қабул қилинади;
б) қўшилган қиймат солиғини пахта хом ашёси бўйича якуний ҳисоб-китобларни амалга ошириш муддатига қадар тўлаш ва ҳисобга олишга рухсат этилади;
в) 2026 йил 1 апрелга қадар пахта-тўқимачилик кластерлари ва қишлоқ хўжалиги корхоналари (фермер хўжаликлари) ўртасидаги ҳисоб-китоблар ҳамда қўшилган қиймат солиғини ҳисобга олиш қуйидаги тартибда амалга оширилади:
пахта-тўқимачилик кластерлари томонидан пахта ҳосили учун якуний ҳисоб-китоблар ўз муддатида амалга оширилмаган тақдирда, юзага келган солиқ қарздорлигини қўшилган қиймат солиғи тўловчиси ҳисобланган қишлоқ хўжалиги корхоналари (фермер хўжаликлари)га уч ой муддатга тенг улушларда бўлиб-бўлиб тўлаш ҳуқуқи берилади.
г) пахта-тўқимачилик кластерлари ишлаб чиқариш қувватлари жойлашган ҳудуддан қатъи назар бошқа хўжалик юритувчи субъектларга, шу жумладан уларга алоқадор корхоналарга пахта хомашёсини шартномаларда белгиланган муддатларда тўловларни амалга ошириш шарти билан етказиб берилади.
3. Вазирлар Маҳкамаси ҳузуридаги Солиқ қўмитаси икки ой муддатда мазкур қарорнинг 2-бандида белгиланган талаблардан келиб чиққан ҳолда, қўшилган қиймат солиғини бўлиб-бўлиб тўлаш ва ҳисобга олишнинг автоматлаштирилган дастурини ишга туширсин.
4. Ўзбекистон Республикаси Қишлоқ хўжалиги вазирлиги:
«Ўзбекистон пахта-тўқимачилик кластерлари» уюшмаси билан биргаликда 2023 йил 5 сентябрга қадар ҳудудлар ва кластерлар кесимида пахта хом ашёсини йиғиб олиш билан боғлиқ маълумотлар шакллантириладиган ахборот тизими ишга туширилиши ҳамда 2023 йил 15 сентябрдан бошлаб «Агроплатформа» ахборот тизимига интеграция қилинишини;
Вазирлар Маҳкамаси билан биргаликда икки ой муддатда «Агроплатформа» ахборот тизими орқали пахта хом ашёсини етиштирувчилар тўғрисидаги маълумотлар солиқ органларининг ахборот тизими билан интеграция қилинишини ҳамда солиқ органларига доимий тақдим этиб борилишини таъминласин.
5. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосари — иқтисодиёт ва молия вазири Ж.А. Қўчқоров ҳамда Ўзбекистон Республикаси қишлоқ хўжалиги вазири А.Б. Воитов зиммасига юклансин.
Ўзбекистон Республикасининг Бош вазири А. АРИПОВ
Тошкент ш.,
2023 йил 14 август,
379-сон
Oʻzbekiston Respublikasi Vazirlar Mahkamasining
qarori
Paxta xom ashyosini yetishtiruvchilar uchun qoʻshilgan qiymat soligʻini toʻlash hamda hisobga olish muddatlarini muvofiqlashtirish toʻgʻrisida
Oʻzbekiston Respublikasi Prezidentining “Paxta xom ashyosi yetishtiruvchilar faoliyatini yanada qoʻllab-quvvatlashning qoʻshimcha chora-tadbirlari toʻgʻrisida” 2023-yil 26-yanvardagi PQ-23-son qarori ijrosini taʼminlash, shuningdek, paxta xom ashyosini yetishtiruvchilarni qoʻllab-quvvatlash va ularga qoʻshimcha qulayliklar yaratish maqsadida Vazirlar Mahkamasi qaror qiladi:
1. Quyidagilar:
Oʻzbekiston Respublikasi Prezidentining “Paxta xom ashyosi yetishtiruvchilar faoliyatini yanada qoʻllab-quvvatlashning qoʻshimcha chora-tadbirlari toʻgʻrisida” 2023-yil 26-yanvardagi PQ-23-son qarorining 10-bandida qoʻshilgan qiymat soligʻini toʻlash hamda hisobga olish muddatini paxta xom ashyosi boʻyicha amalga oshiriladigan hisob-kitob muddatiga muvofiqlashtirish belgilanganligi;
Vazirlar Mahkamasining 2021-yil 4-dekabrdagi 733-son qarori bilan tasdiqlangan Paxta-toʻqimachilik klasterlari faoliyatini tashkil etish tartibi toʻgʻrisidagi nizomning 31-bandiga muvofiq qishloq xoʻjaligi yer uchastkalarini ijaraga olmasdan tashkil etilgan paxta-toʻqimachilik klasteri paxta xom ashyosi yetishtiruvchilar tomonidan yetishtirilgan paxta xom ashyosini shartnomada belgilangan narxlarda sotib olish va yakuniy hisob-kitoblarni hosil yigʻib olingan yilning 31-dekabriga qadar amalga oshirish majburiyatiga ega ekanligi maʼlumot uchun qabul qilinsin.
2. Shunday tartib oʻrnatilsinki, unga muvofiq:
a) 2023-yil hosilidan boshlab, paxta-toʻqimachilik klasterlari tomonidan paxta xom ashyosi toʻliq elektron tarozi orqali qabul qilinadi;
b) qoʻshilgan qiymat soligʻini paxta xom ashyosi boʻyicha yakuniy hisob-kitoblarni amalga oshirish muddatiga qadar toʻlash va hisobga olishga ruxsat etiladi;
v) 2026-yil 1-aprelga qadar paxta-toʻqimachilik klasterlari va qishloq xoʻjaligi korxonalari (fermer xoʻjaliklari) oʻrtasidagi hisob-kitoblar hamda qoʻshilgan qiymat soligʻini hisobga olish quyidagi tartibda amalga oshiriladi:
paxta-toʻqimachilik klasterlari tomonidan paxta hosili uchun yakuniy hisob-kitoblar oʻz muddatida amalga oshirilmagan taqdirda, yuzaga kelgan soliq qarzdorligini qoʻshilgan qiymat soligʻi toʻlovchisi hisoblangan qishloq xoʻjaligi korxonalari (fermer xoʻjaliklari)ga uch oy muddatga teng ulushlarda boʻlib-boʻlib toʻlash huquqi beriladi.
g) paxta-toʻqimachilik klasterlari ishlab chiqarish quvvatlari joylashgan hududdan qatʼi nazar boshqa xoʻjalik yurituvchi subyektlarga, shu jumladan ularga aloqador korxonalarga paxta xomashyosini shartnomalarda belgilangan muddatlarda toʻlovlarni amalga oshirish sharti bilan yetkazib beriladi.
3. Vazirlar Mahkamasi huzuridagi Soliq qoʻmitasi ikki oy muddatda mazkur qarorning 2-bandida belgilangan talablardan kelib chiqqan holda, qoʻshilgan qiymat soligʻini boʻlib-boʻlib toʻlash va hisobga olishning avtomatlashtirilgan dasturini ishga tushirsin.
4. Oʻzbekiston Respublikasi Qishloq xoʻjaligi vazirligi:
“Oʻzbekiston paxta-toʻqimachilik klasterlari” uyushmasi bilan birgalikda 2023-yil 5-sentabrga qadar hududlar va klasterlar kesimida paxta xom ashyosini yigʻib olish bilan bogʻliq maʼlumotlar shakllantiriladigan axborot tizimi ishga tushirilishi hamda 2023-yil 15-sentabrdan boshlab “Agroplatforma” axborot tizimiga integratsiya qilinishini;
Vazirlar Mahkamasi bilan birgalikda ikki oy muddatda “Agroplatforma” axborot tizimi orqali paxta xom ashyosini yetishtiruvchilar toʻgʻrisidagi maʼlumotlar soliq organlarining axborot tizimi bilan integratsiya qilinishini hamda soliq organlariga doimiy taqdim etib borilishini taʼminlasin.
5. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari — iqtisodiyot va moliya vaziri J.A. Qoʻchqorov hamda Oʻzbekiston Respublikasi qishloq xoʻjaligi vaziri A.B. Voitov zimmasiga yuklansin.
Oʻzbekiston Respublikasining Bosh vaziri A. ARIPOV
Toshkent sh.,
2023-yil 14-avgust,
379-son